Молебный параклис святым Архангелам
Иерей: Благословен Бог наш…
И аще мирянин, глаголет: Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Иерей: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Господи! услышь молитву мою, внемли молению моему по истине Твоей; услышь меня по правде Твоей и не входи в суд с рабом Твоим, потому что не оправдается пред Тобой ни один из живущих. Враг преследует душу мою, втоптал в землю жизнь мою, принудил меня жить во тьме, как давно умерших, – и уныл во мне дух мой, онемело во мне сердце мое. Вспоминаю дни древние, размышляю о всех делах Твоих, рассуждаю о делах рук Твоих. Простираю к Тебе руки мои; душа моя – к Тебе, как жаждущая земля. Скоро услышь меня, Господи: дух мой изнемогает; не скрывай лица Твоего от меня, чтобы я не уподобился нисходящим в могилу. Даруй мне рано услышать милость Твою, ибо я на Тебя уповаю. Укажи мне, [Господи,] путь, по которому мне идти, ибо к Тебе возношу я душу мою. Избавь меня, Господи, от врагов моих; к Тебе прибегаю. Научи меня исполнять волю Твою, потому что Ты Бог мой; Дух Твой благий да ведет меня в землю правды. Ради имени Твоего, Господи, оживи меня; ради правды Твоей выведи из напасти душу мою. И по милости Твоей истреби врагов моих и погуби всех, угнетающих душу мою, ибо я Твой раб.
Слава Отцу и Сыну и Святому Духу, и ныне и присно и во веки веков. Аминь.
Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже наш, слава Тебе.
Бог Господь, и явися нам, благословен Грядый во имя Господне.
Стих 1: Исповедайтеся Господеви, яко благ, яко в век милость Его. Стих 2: Вси языцы обыдоша мя, и именем Господним противляхся им. Стих 3: Не умру, но жив буду и повем дела Господня. Стих 4: Камень, егоже небрегоша зиждущии, сей бысть во главу угла; от Господа бысть сей и есть дивен во очесех наших.
Небесных воинств Архистратизи, молим вас присно мы, недостойнии, да вашими молитвами оградите нас кровом крил невещественныя вашея славы, сохраняюще нас, припадающих и прилежно вопиющих: от бед избавите нас, яко чиноначальницы вышних сил.
Слава Отцу и Сыну и Святому Духу.
Небесных воинств Архистратизи, молим вас присно мы, недостойнии, да вашими молитвами оградите нас кровом крил невещественныя вашея славы, сохраняюще нас, припадающих и прилежно вопиющих: от бед избавите нас, яко чиноначальницы вышних сил.
И ныне и присно и во веки веков. Аминь.
Не умолчим никогда, Богородице, силы твоя глаголати, недостойнии; аще бы бо ты не предстояла молящи, кто бы нас сохранил доныне свободны? Не отступим, Владычице, от тебе, твоя бо рабы спасаеши присно от всяких лютых.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Ирмос: Поим Господеви, проведшему люди Своя сквозе Чермное море; Тому единому поим, яко прославися.
Святии Архангели, молите Бога о нас.
Велицыи Архангели и небесных людей главы, Свету незаходимому неприступно служащии, подвизайтеся и о нас присно, прося от Него милости.
Святии Архангели, молите Бога о нас.
Лики Архангельския имамы ходатаи и с ними Божественнаго Михаила, иже Святей Троице, Создательнице всех сущих, немолчно песнь приносят.
Слава Отцу и Сыну и Святому Духу.
Пред престолы Божиими светло предстоящии Архангели, сиянием света Божества исполнени, просвещаете люди, достойно славящия вас.
И ныне и присно и во веки веков. Аминь.
Великим венцем и ризою златотканною украшенная, Владычице Марие, яко порфирою, покрый нас молитвами святых Ангел.
Ирмос: Ты еси утверждение притекающих к Тебе, Христе, Ты еси свет омраченных, и величает Тя душа моя.
Святии Архангели, молите Бога о нас.
Велия есть сила, Христе, Архангелов, яко безплотни суть, и мир обходят, яко молния, и церквам мир подают.
Святии Архангели, молите Бога о нас.
Род наш сохрани, Христе, молитвами Архангелов и вся грады и веси Иверии покрый от нашествия иноплеменников.
Слава Отцу и Сыну и Святому Духу.
Архангели Господни, присно предстоящии престолом славы, ныне помозите немощным, и плавающим, и в скорбех сущим, и избавите нас от печалей.
И ныне и присно и во веки веков. Аминь.
О Владычице Марие, от Ангел радостно приветствованная, с ними моли Сына твоего, да купно воспоем Царство Его.
Избави от бед рабы твоя, Пресвятая Богородице Дево, яко вси по Бозе к тебе прибегаем, яко нерушимой стене и предстательству.
Призри на ны, Всепетая Богородице, и тел наших лютыя язвы исцели и душ наших болезни.
Иерей: Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (Трижды).
Иерей: Еще молимся о богохранимем народе нашем и державе его (о христолюбивом правительстве и воинстве его).
Лик: Господи, помилуй (Трижды).
Иерей: Еще молимся о Святейшем и Блаженнейшем Католикосе-Патриархе всея Грузии, Архиепископе Мцхетско-Тбилисском и Митрополите Бичвинтском и Цхум-Абхазском, великом господине и отце нашем Илии, и о преосвященнейшем (поминается местный архиерей), и о всей во Христе братии нашей.
Лик: Господи, помилуй (Трижды).
Иерей: Еще помолимся Господу Богу нашему, да помилует раба или рабу…. Умножи, Господи, дни и лета живота их и избави их, Господи, от всякия скорби, гнева и нужды, и от всякия язвы душевныя и телесныя, и прости им всякое согрешение, вольное же и невольное.
Лик: Господи, помилуй (Трижды).
Иерей: Еще молимся о всех православных христианех.
Лик: Господи, помилуй (Трижды).
Иерей: Яко милостив и человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Приидите, воспоим песньми духовными Архангелы: Михаила и Гавриила, Рафаила и Уриила, Селафиила и Иегудиила, Варахиила, Иеремиила и Тахнила, яко безплотных чинов первии предстоятели суть, предводители и Архангели, и ходатаи теплии и заступницы верных; сего ради помолимся, да даруют миру мир и велию милость чтущим их.
Слава Отцу и Сыну и Святому Духу, и ныне и присно и во веки веков. Аминь.
Проповедник вочеловечения Твоего Гавриил и святаго воскресения Михаил, Архангели, зряще Тебе, невидимаго Царя, восходяща на небо, с радостию вопияху с небесными силами, Христе, и глаголаху: возмите врата, князи, ваша. И возвзяшася врата вечная, и вниде Царь славы, Иже есть прежде век Бог, яко Сей Крестом ад плени и верным дарова жизнь вечную.
Ирмос: Услышах, Господи, смотрения Твоего неизреченная таинства, разумех дела Твоя и исповедах Твое Божество.
Святии Архангели, молите Бога о нас.
Собравый безплотныя в светлый оный собор, ныне востани в помощь нам, небесных чинов Предводителю Михаиле, и суди обидящим ны, и побори борющия нас.
Святии Архангели, молите Бога о нас.
Превысшее умов, Слово всякаго существа, сподобился еси, Гаврииле, слышати и принесл еси глас радости Деве, благовествуя от нея воплощение Сына Божия.
Слава Отцу и Сыну и Святому Духу.
Архангеле Божий Рафаиле, иже врачу и пути наставниче, ныне буди мне тихое пристанище, в пустынех, на водах и в мори сущему, и исцели мя от недугов душевных и телесных.
И ныне и присно и во веки веков. Аминь.
Литийно молят лице твое Ангели, преславная Марие; светильник душ наших просвети молитвами их, Дево.
Ирмос: Утренююще вопием Ти, Господи: спаси ны, яко Благ, Ты бо еси Бог наш, разве Тебе иного не знаем.
Святии Архангели, молите Бога о нас.
Иже просвещаеши молящихся тебе, о Архангеле Урииле, избави мя ныне от тьмы страстей и ум мой просвети, грехми омраченный.
Святии Архангели, молите Бога о нас.
Приемый благодать врачевания душ и телес, ныне разреши возставшия в душах наших страсти, Архангеле Селафииле, и болезни телесныя силою Божественною.
Слава Отцу и Сыну и Святому Духу.
Твердому надзиранию твоему и всесильной помощи припадаю и молю тя, о Архангеле Иегудииле, да наставиши мя на всех путех моих и направиши я, якоже сам веси, во славу Божию.
И ныне и присно и во веки веков. Аминь.
Песнию «осанна» хвалят тя святии Ангели, Дево Марие; молитвами их помилуй нас, Владычице.
Ирмос: Даждь ми ризу светлу, одеяйся светом, яко ризою, Боже, молитвами Ангел.
Святии Архангели, молите Бога о нас.
Пред Троицею непоколебимо предстояй и человеком благодати испрашаяй, Архангеле Варахииле, ныне испроси непоколебимое сохранение церквам и святыню верным.
Святии Архангели, молите Бога о нас.
Излиянием благодати твоея, Архангеле Иеремииле, возбуди в сердце моем любовь к Богу и ближнему и даждь ми дар разсуждения добра и зла.
Слава Отцу и Сыну и Святому Духу.
Помощниче чтущих тя, о преславный Архангеле Тахниле, ныне сохрани нас от всяких скорбей и от нападения враг.
И ныне и присно и во веки веков. Аминь.
Серафим святейшая Марие, помилуй души наша, егда вострубят страшно святии Ангели.
Избави от бед рабы твоя, Пресвятая Богородице Дево, яко вси по Бозе к тебе прибегаем, яко нерушимой стене и предстательству.
Призри на ны, Всепетая Богородице, и тел наших лютыя язвы исцели и душ наших болезни.
Иерей: Паки и паки миром Господу помолимся.
Лик: Господи, помилуй.
Иерей: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Иерей: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга и весь живот наш Христу Богу предадим.
Лик: Тебе, Господи.
Иерей: Яко Ты еси Царь мира и Спас душ наших, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Архистратизи Божии, служителие Божественныя славы, Ангелов начальницы и заблудших наставницы, полезное нам просите и велию милость, яко безплотных воинств Архистратизи.
Иерей: Вонмем. Премудрость. Прокимен, глас 4
Творяй Ангелы Своя духи и слуги Своя пламень огненный.
Стих: Хвалите Господа, вси Ангели Его.
Иерей: Господу помолимся.
Лик: Господи, помилуй.
Иерей: Яко свят еси, Боже наш, и во святых почиваеши, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Иерей: Всякое дыхание да хвалит Господа.
Стих: Хвалите Бога во святых Его, хвалите Его во утверждении силы Его.
Иерей: И о сподобитися нам слышанию святаго Евангелия Господа Бога молим.
Лик: Господи, помилуй (Трижды).
Иерей: Премудрость, прости, услышим святаго Евангелия. Мир всем.
Лик: И духови твоему.
Иерей: От Матфея святаго Евангелия чтение.
Лик: Слава Тебе, Господи, слава Тебе.
Иерей: Вонмем.
Рече Господь: смотрите, не презирайте ни одного из малых сих; ибо говорю вам, что Ангелы их на небесах всегда видят лице Отца Моего Небеснаго. Ибо Сын Человеческий пришел взыскать и спасти погибшее. Какая польза человеку, если он приобретет весь мир, а душе своей повредит? или какой выкуп даст человек за душу свою? Ибо приидет Сын Человеческий во славе Отца Своего с Ангелами Своими и тогда воздаст каждому по делам его.
Слава Отцу и Сыну и Святому Духу.
Молитвами Архангелов, Милостиве, очисти множества наших согрешений.
И ныне и присно и во веки веков. Аминь.
Молитвами Богородицы, Милостиве, очисти множества наших согрешений.
Помилуй мя, Боже, по велицей милости Твоей, и по множеству щедрот Твоих очисти беззаконие мое, и помилуй мя, Боже.
Стихира: Не презри моления Архангелов Твоих, всемилостиве Господи, иже скорее молнии исполняют мановение Твое, но предстательством их даруй народу нашему крепость, миру мир и душам нашим велию милость.
Иерей: Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста, силою Креста от виноградной лозы и Иверския иконы Богородицы Вратарницы; предстательствы честных Небесных Сил безплотных; честнаго, славнаго Пророка, Предтечи и Крестителя Иоанна; святаго пророка Илии Фесвитянина и праведнаго Еноха; святых славных и всехвальных первоверховных апостолов Петра и Павла; святаго апостола Фомы и просветителей Грузии, апостолов Андрея Первозваннаго, Симона Кананита и Матфия; святыя матере нашея, равноапостольныя девы Нины; святых равноапостольных царя Мириана и царицы Наны; иже во святых отец наших и вселенских великих учителей и святителей Василия Великаго, Григория Богослова и Иоанна Златоустаго; святых и чудотворцев отец наших Николая, архиепископа Мир Ликийских, и Спиридона Тримифунтскаго; святаго преподобнаго отца нашего Иоанна Зедазнийскаго и двоюнадесяти учеников его, вторых просветителей Церкве Грузинския и присных ея покровителей; святых славных и добропобедных мучеников: святаго великомученика и победоносца Георгия и святых великих дев-мучениц Варвары и Марины; святых славных мучеников, князей Аргветских Давида и Константина, и святаго великомученика Шалвы Ахалцихскаго; святаго великомученика Бидзины и святых славных мучеников Шалвы и Элизбара, эриставов Ксанских; святаго священномученика Неофита Урбнисскаго и святаго великомученика Або Тбилисскаго; богомудрых блаженных отец Илариона Грузина, Серапиона Зарзмскаго и Григория Хандзтийскаго; преподобных отец наших Афонских: Иоанна и Гавриила Грузин, Иоанна, бывшаго Торники, Евфимия и Георгия Святогорцев; святых благоверных и великих царей наших Вахтанга Горгасала, Ашота Куропалата, Давида Строителя и Соломона; святыя благоверныя царицы Тамары; святых добропобедных царей и цариц Архила, Димитрия, Шушаники, Кетевани и Луарсаба; святых ста тысяч мучеников, в Тбилиси от хорезмийцев избиенных; святых шести тысяч мучеников, иноков Гареджийских; святаго праведнаго Илии; святых и праведных богоотец Иоакима и Анны (и святаго, егоже есть храм), и Архангелов Михаила и Гавриила, Рафаила и Уриила, Селафиила, Иегудиила и Варахиила, Иеремиила и Тахнила, и всех святых Твоих: молим Тя, многомилостиве Господи, услыши нас, грешных, молящихся Тебе, и помилуй нас.
Лик: Господи, помилуй (12 раз).
Иерей: Милостию, и щедротами, и человеколюбием Единороднаго Сына Твоего, с Нимже благословен еси, со Пресвятым, и Благим, и Животворящим Твоим Духом, ныне и присно и во веки веков.
Лик: Аминь.
Ирмос: Отроцы еврейстии в пещи хождаху по огню дерзновенно и, орошаеми, сице вопияху и глаголаху: благословен еси, Господи, Боже отец наших.
Святии Архангели, молите Бога о нас.
Даждь, Благий, Архангельская воинства покровители народу нашему, да будут нам стена и покров, и помогут во брани с врагом, и посрамят ненавидящия нас.
Святии Архангели, молите Бога о нас.
Небесных чинов предводителие, любовию пламенною пред Ним предстоите служащии и немолчно поете единое существо безначальнаго Божества.
Слава Отцу и Сыну и Святому Духу.
Всецело к Богу любовию преклоненнии и Божественныя благости образи бывшии Архангели, ходатайствуйте о прибегающих к вам, да избавятся от напастей и страстей.
И ныне и присно и во веки веков. Аминь.
Тебе поет, Невесто, лик небесных безплотных, тебе хвалит всяк язык человеческий, яко Создатель их паче разума родися от тебе; к Нему ходатаица буди нам.
Ирмос: Царя человеков, Емуже служат лики ангельстии, пойте и превозносите Его во веки.
Святии Архангели, молите Бога о нас.
Яко предтеча и начальник Ангелов, всехвальне Михаиле, свободи нас от врага видимаго и невидимаго и от силы его.
Святии Архангели, молите Бога о нас.
Небесных сил великий предводителю и безплотных чинов первопредстоятелю, Гаврииле, ныне приими молитву нашу и даруй народу нашему премудрость и крепость.
Святии Архангели, молите Бога о нас.
На всяк день спутницы будите ми, Ангелов начальниче Рафаиле с Селафиилом, неизреченною силою вашею, и путь сей мой благо направите, и во здравии соблюдите мя.
Слава Отцу и Сыну и Святому Духу.
Постави мя на пути покаяния, великий начальниче ангельских сил Урииле, и по смерти настави мя ко Господу, да не удержан буду от бесов за грехи моя.
И ныне и присно и во веки веков. Аминь.
Мы, недостойнии раби, со Ангелы хвалим тя и молим, Марие: по обычаю благости твоея помилуй нас, Богородице.
Ирмос: Богородицу тя вси исповедуем, тобою спасеннии, Дево Чистая, с безплотными лики тя непрестанно величающе.
Святии Архангели, молите Бога о нас.
Яко избавитель теплейший призывающих тя в напастех, от путей пагубных избави мя, Архангеле Иегудииле, и покрый мя кровом крил твоих.
Святии Архангели, молите Бога о нас.
Ныне призри на ны, невещественнаго лика Архангеле Варахииле, и оживотвори душу мою, умерщвленную грехми.
Святии Архангели, молите Бога о нас.
Призри на ны свыше, Архангеле Иеремииле, и избави нас от лютых болезней и грехов и исполни нас любве Божественныя.
Слава Отцу и Сыну и Святому Духу.
Избави нас, великий воинств начальниче Тахниле, в печалех, злобах и напастех сущих, и покрый нас от всяких козней и ухищрений сего сильнаго врага.
И ныне и присно и во веки веков. Аминь.
Ты, Пречистая, Святая Владычице Богородице Марие, хранителя нашего Ангела посли нам, да наставит нас ко истинному свету, и величаем тя, Мати Света.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Иерей кадит.
Чтец: Во свете неприступнем живый, Христе Боже наш, молим Тя: святыми Архангелы не презри моления и хваления людей согрешивших.
Архангельския силы, Христе, пред престолом Твоим предстоящия, молят Тя о роде человечестем; их убо молением избави нас от зла диавольскаго и от страшнаго мучения и наказания.
Ангельских ликов чиноначальницы, на небесех пред Трисолнечным Божеством предстоящии, иже богато источаете Божественное сияние, ныне приведите нас ко Благому Богу, да низложит на земли насилие гордых и мир подаст Православию.
О просветителие умов верных и мира благодатию озарителие, Архангели Михаиле и Гаврииле, Рафаиле, Урииле и Селафииле, Иегудииле, Варахииле, Иеремииле и Тахниле, ныне покрыйте нас от всякаго от бесов обстояния и от насилия человеческаго.
Пресвятая Богородице Дево, со Архангелы настави мя ко истинному свету и буди ми помощница во всех напастех, печалех и скорбех, да сподоблюся добрым житием совершитися и во святыни достигнути, и зрети, и достойно поклонитися, и воспети Единосущную Святую Троицу:
Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Иерей: Яко Твое есть Царство…
Помилуй нас, Господи, помилуй нас; всякаго бо ответа недоумеюще, сию Ти молитву, яко Владыце, грешнии приносим: помилуй нас.
Слава Отцу и Сыну и Святому Духу.
Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри и ныне на ны, яко благоутробен, и избави ны от праведнаго гнева Твоего: Ты бо еси Бог наш, и мы людие Твои, вси дела руку Твоею, и имя Твое наречеся на нас; и помилуй нас.
И ныне и присно и во веки веков. Аминь.
Милосердия двери отверзи нам, благословенная Богородице, надеющиися на тя да не погибнем, но да избавимся тобою от сопротивных враг: ты бо еси спасение рода христианскаго.
Иерей: Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (Трижды).
Иерей: Еще молимся о милости, жизни, мире, здравии, долгоденствии, спасении, просвещении, прощении, благопоспешении и тишине рабов (или рабынь) Божиих и всех чад Церкве нашея, да сохранит Господь Бог наш царствующий град сей наш и святый храм сей и вся грады и веси Иверии от глада, губительства, труса, потопа, огня, меча, нашествия иноплеменников, междоусобныя брани и смертоносныя язвы; да милостив нам будет Бог благостию и человеколюбием Своим, во еже благостояти, и отвратит гнев, на ны повседневно движимый, и избавит нас от праведнаго Своего прещения, на ны належащаго, и помилует нас.
Лик: Господи, помилуй (40 раз).
Иерей: Услыши ны, Боже, Спасителю наш, упование всех концев земли и сущих в мори далече, и милостив, милостив буди о гресех наших, и помилуй ны; милостив бо и человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
О святии Архангели Михаиле и Гаврииле, Рафаиле и Урииле, Селафииле и Иегудииле, Варахииле, Иеремииле и Тахниле, непогрешительнии наставницы и человеков посредницы, молящих вас покровителие и светом блистания вашего души наша просвещающии!
О Архангели Божественнии, премудрости органи, присно предстоящии престолом славы, помозите нам, на земли сущим, святии безплотнии, да избавимся от беззаконий наших, яко вам дадеся благодать ходатайствовати о нас; народ же наш невредим сохраните от ополчений и нашествия враг, да не будем попрани от хищных иноплеменных язык и родов; молите Христа, Царя нашего, единаго многомилостиваго, да призрит на люди Своя, не имущия ответа пред Ним, и от всех язык, на брань нам собравшихся, избавит и покрыет нас от всяких печалей, недугов и болезней, от язв страстей и от напрасныя смерти; укрепите Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященныя митрополиты, архиепископы и епископы, весь священный и монашеский чин и всех православных христиан. Молим вас, вся безплотныя силы, покровом крил ваших покрыйте нас от видимых и невидимых враг наших.
О невещественнаго лика Архангели, окрест престола Создателева предстоящии, и воинств Архистратиже, Божественный Михаиле, преславне, покровом вашим покрыйте нас и наставляйте нас ко исполнению всех заповедей Божиих, и в последний день мирно и сладостно приимите души наша, во Второе же Пришествие ходатаи будите о нас пред праведным Судиею Иисусом, да сподобимся Царствия Небеснаго и с вами воспоем, восхвалим и прославим Пресвятую Троицу, Ейже подобает всякая слава, честь и поклонение, ныне и присно и во веки веков. Аминь.
Иерей: Премудрость!
Пресвятая Богородице, спаси нас.
Лик: Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Иерей: Слава Тебе, Боже наш, слава Тебе.
Лик: Слава Отцу и Сыну и Святому Духу, и ныне и присно и во веки веков. Аминь.
Господи, помилуй (Трижды). Благослови.
Иерей творит отпуст.
Лик: Аминь.
Мирянин: Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, Архангелов и всех святых, помилуй нас. Аминь.
При целовании иконы святых Ангел поем сие:
Всего живота нашего хранители и покровители стяжахом вас, Архангели Божии, яко власть имате свободити нас от всех страстей и коварств вражиих. Темже образ ваш лобызаем и молим вы: покрыйте нас от сетей диавольских и наставите нас к жизни вечней, да славим Всеблагаго и Человеколюбиваго Бога.
Автор-составитель: Тинатин Мчедлишвили
