Молебный параклис преподобному отцу нашему Додо Гареджийскому
Иерей: Благословен Бог наш…
И аще мирянин, глаголет: Господи Иисусе Христе, Сыне Божий, молитвами Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Иерей: Яко Твое есть Царство…
Лик: Аминь.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Господи! услышь молитву мою, внемли молению моему по истине Твоей; услышь меня по правде Твоей и не входи в суд с рабом Твоим, потому что не оправдается пред Тобой ни один из живущих. Враг преследует душу мою, втоптал в землю жизнь мою, принудил меня жить во тьме, как давно умерших, – и уныл во мне дух мой, онемело во мне сердце мое. Вспоминаю дни древние, размышляю о всех делах Твоих, рассуждаю о делах рук Твоих. Простираю к Тебе руки мои; душа моя – к Тебе, как жаждущая земля. Скоро услышь меня, Господи: дух мой изнемогает; не скрывай лица Твоего от меня, чтобы я не уподобился нисходящим в могилу. Даруй мне рано услышать милость Твою, ибо я на Тебя уповаю. Укажи мне, [Господи,] путь, по которому мне идти, ибо к Тебе возношу я душу мою. Избавь меня, Господи, от врагов моих; к Тебе прибегаю. Научи меня исполнять волю Твою, потому что Ты Бог мой; Дух Твой благий да ведет меня в землю правды. Ради имени Твоего, Господи, оживи меня; ради правды Твоей выведи из напасти душу мою. И по милости Твоей истреби врагов моих и погуби всех, угнетающих душу мою, ибо я Твой раб.
Слава Отцу и Сыну и Святому Духу, и ныне и присно и во веки веков. Аминь.
Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже наш, слава Тебе.
Бог Господь, и явися нам, благословен Грядый во имя Господне.
Стих 1: Исповедайтеся Господеви, яко благ, яко в век милость Его. Стих 2: Вси языцы обыдоша мя, и именем Господним противляхся им. Стих 3: Не умру, но жив буду и повем дела Господня. Стих 4: Камень, егоже небрегоша зиждущии, сей бысть во главу угла; от Господа бысть сей и есть дивен во очесех наших.
От Гареджи возсиял еси, яко светильник на высоком свещнице священства, и, светом Троицы просвещая землю нашу, ревность иноков возрастил еси и множайших иных воздвигл еси на желание иночества, закона очистителю, отче Додо, моли Христа Бога помиловати души наша.
Слава Отцу и Сыну и Святому Духу.
Пустыни житель и во плоти ангел, и чудотворец явился еси, богоносе отче Додо; постом, бдением и молитвою небесную благодать приим, исцеляеши недуги немощных и души, верою к тебе притекающих. Слава Давшему ти крепость, слава Венчавшему тя, слава Действующему тобою всем чудеса.
И ныне и присно и во веки веков. Аминь.
Не умолчим никогда, Богородице, силы твоя глаголати, недостойнии; аще бы бо ты не предстояла молящи, кто бы нас избавил от толиких бед? Кто же бы сохранил доныне свободны? Не отступим, Владычице, от тебе, твоя бо рабы спасаеши присно от всяких лютых.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Ирмос: Колесниц множество со всадники в глубину моря Чермнаго крепостию мышцы ввержено бысть; Христом спасошася израильтяне и новую песнь победную глаголаху.
Преподобне отче Додо Гареджийский, моли Бога о нас
Хвалим дивныя подвиги твоя и благодарение приносим Богу, пославшему тя подвижника и молитвенника народу нашему, в славу и утверждение Кахетии.
Преподобне отче Додо Гареджийский, моли Бога о нас
Яко отрасль боголепная прозябл еси от корене благороднаго, и, от юности бегая мятежей мирских, ко ангельскому подвигу тщался еси.
Слава Отцу и Сыну и Святому Духу.
Егда избра тя Господь сосуд избран, вместилище благодатей Своих, нестяжания любителю, в Ниноцминде уединился еси и подвигом крепким угодил еси Богу.
И ныне и присно и во веки веков. Аминь.
Ты еси воистину Мати Божия, Святая, рая украшение и царей победа; и ныне восхваляющих тя песнию победною днесь избави от невидимых врагов.
Ирмос: Основавый землю на водах и плодоносие ей всецело даровавый, на камени заповедей Твоих непоколебимем, Христе, утверди Церковь Твою, Едине Благий и Человеколюбче.
Преподобне отче Додо Гареджийский, моли Бога о нас
Услышав дивная дела Давида, из Ассирии в Картли пришедшаго и с учеником своим Лукианом в Гаредже водворившагося, подвиглся еси видети его и пришел еси ко дверем келлии его.
Преподобне отче Додо Гареджийский, моли Бога о нас
Егда узре тя блаженный Давид, уразуме святыню твою и исполнися радости; и, беседующе о божественном и духовном учении, молили есте Бога, да сохранит народ иверский от всяких страстей и искушений.
Слава Отцу и Сыну и Святому Духу.
Видя тя зело подвизающася, святый показа тебе скалу обонпол и глаголаше тебе: «Сотвори обитель и церковь во имя Пресвятыя Богородицы», и благослови тя на тесный путь уединения.
И ныне и присно и во веки веков. Аминь.
В безчисленныя напасти впадох окаянный безчисленными моими грехми и во глубину зол приидох бедный; ты же, Владычице Святая, избави раба твоего и спаси мя.
Избави от бед рабы твоя, Пресвятая Богородице Дево, яко вси по Бозе к тебе прибегаем, яко нерушимой стене и предстательству.
Призри на ны, Всепетая Богородице, и тел наших лютыя язвы исцели и душ наших болезни.
Иерей: Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (Трижды).
Иерей: Еще молимся о богохранимем народе нашем и державе его (о христолюбивом правительстве и воинстве его).
Лик: Господи, помилуй (Трижды).
Иерей: Еще молимся о Святейшем и Блаженнейшем Католикосе-Патриархе всея Грузии, Архиепископе Мцхетско-Тбилисском и Митрополите Бичвинтском и Цхум-Абхазском, великом господине и отце нашем Илии, и о преосвященнейшем (поминается местный архиерей), и о всей во Христе братии нашей.
Лик: Господи, помилуй (Трижды).
Иерей: Еще помолимся Господу Богу нашему, да помилует... (здесь поминаются по именам те, о нихже молятся Богу).
Лик: Господи, помилуй (Трижды).
Иерей: Умножи, Господи, дни и лета живота их и избави их, Господи, от всякия скорби, гнева и нужды, и от всякия язвы душевныя и телесныя, и прости им всякое согрешение, вольное же и невольное.
Лик: Господи, помилуй (Трижды).
Иерей: Еще молимся о всей братии и о всех христианех.
Лик: Господи, помилуй (Трижды).
Иерей: Яко милостив и человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Веселится ныне народ наш о богосветлом празднике твоем, и силы небесныя невидимо поют согласно, и полк иноков радуется, хваляся трудами твоими, в пустыни совершенными, преподобне отче Додо Гареджийский; моли Христа Бога прегрешений оставление даровати почитающим любовию святую память твою.
Ирмос: Услыша пришествие Твое славное, удивися Аввакум, Христе, и со страхом вопияше: изшел еси во спасение людей Твоих, спасти помазанныя Твоя.
Преподобне отче Додо Гареджийский, моли Бога о нас
Послушал еси повеления святаго отца, и, прешед хребет, блаженне, вселился еси в тесней разселине камене, и трудом и подвигом угождал еси Богу.
Преподобне отче Додо Гареджийский, моли Бога о нас
Быв зритель сокровенных страстей и соблазнов лукаваго, прозирал еси вся сердечная желания к тебе притекающих и утверждал еси их в подвизех и добродетелех.
Слава Отцу и Сыну и Святому Духу.
Аще и есть место оно безводно и безутешно, блаженне, мнози последоваша стопам твоим и, иноцы бывающе, пещеры и келлии в скалах иссекаху.
И ныне и присно и во веки веков. Аминь.
Страсти душевныя исцели и просвети ми ум и сердце, Мати Божия, родившая человеком Подателя света, Христа Спаса.
Ирмос: Одеяйся светом, яко ризою, к Тебе прибегаю и Тебе зову: душу мою омраченную просвети, яко Един Многомилостив.
Преподобне отче Додо Гареджийский, моли Бога о нас
Уча язычники закону христианскому, крестил еси их, ибо иерей бе, приносяй Жертву, и научал еси пути, ко Царствию ведущему.
Преподобне отче Додо Гареджийский, моли Бога о нас
Избравшим с тобою подвизатися, блаженне, воздвигл еси храм во имя Пресвятыя Богородицы и возставил еси монастыри в жилище им.
Слава Отцу и Сыну и Святому Духу.
Егда народи ко тебе в пустыню стекахуся, исцелял еси немощныя и лютыми недуги одержимыя и утверждал еси веру их. Ныне душ наших язвы исцели и здравие даруй телесем нашим.
И ныне и присно и во веки веков. Аминь.
Бога Святаго воплощенна родила еси, Дево Святая, во освящение нам, иже верою и страхом святим Святаго, Освятителя нашего.
Ирмос: Море, воздвизаемое волнением губительным, укротил еси, Христе, прещением утолил еси; и мене, погруженна грехми, возведи, Милостиве.
Преподобне отче Додо Гареджийский, моли Бога о нас
Подвиг жестокий восприим, укрепился еси и течением слез благоуханен явился еси, яко миром; ныне окропи нас росою благодати твоея и даруй нам ревность о непорочном житии.
Преподобне отче Додо Гареджийский, моли Бога о нас
Грешныя и заблуждшия обращал еси к покаянию, и, егда молил еси Господа о укреплении их, с любовию повиновахуся тебе, отче, и славляху Бога. Того моли ныне, да избавит нас от страстей душевных и телесных.
Слава Отцу и Сыну и Святому Духу.
Многое время в игуменстве пребыв, яко солнце просветил еси пустыню сию, зверей стан и бесов жилище, и вместо их вселил еси мужей, ангелом равных, да присно славят Бога Вседержителя.
И ныне и присно и во веки веков. Аминь.
Утешительницу, и силу, и предстательство, и заступницу имамы тя, Дево Пресвятая; уповающия на тя избави от всех скорбей и искушений.
Избави от бед рабы твоя, Пресвятая Богородице Дево, яко вси по Бозе к тебе прибегаем, яко нерушимой стене и предстательству.
Призри на ны, Всепетая Богородице, и тел наших лютыя язвы исцели и душ наших болезни.
Иерей: Паки и паки миром Господу помолимся.
Лик: Господи, помилуй.
Иерей: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Иерей: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга и весь живот наш Христу Богу предадим.
Лик: Тебе, Господи.
Иерей: Яко Ты еси Царь мира и Спас душ наших, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Юность несовершенную младенчества в возраст совершенный старости облекл еси, и насадил еси в себе подвиги отеческия, богато слезами их напоенныя, и ты не презрел еси заповеданий их, и явился еси покровитель чадом Церкве, сочиниче небесных сил и сокровниче Давида Гареджийскаго, совершенство отцев, преподобне Додо.
Радуется Церковь Грузинская с чады своими, и хвалится Кахетия о прозябении твоем, яко просветил еси живущих в ней божественным учением, и в пустыни Гареджийской умножил еси обители и исполнил еси их отцы духовными, пасый страхом Божиим и учением истинным, преподобне отче Додо Гареджийский, и сияеши на небесех.
Божественною благодатию просветившу ти страну Кахетинскую, возвещает «Додорка» дивныя подвиги твоя и вопиет о трудех твоих, в ней совершенных; сего ради воспоминаем созидания твоя и молим Прославльшаго тя, да сподобит нас возобновления обителей Гареджийских, и умножения в них подвизающихся отец, и утверждения в служении благодатию, тобою подаваемою.
Иерей: Вонмем. Премудрость.
Прокимен, глас 4: Честна пред Господем смерть святых Его.
Стих: Пойте Господеви, преподобнии Его.
Иерей: Господу помолимся.
Лик: Господи, помилуй.
Иерей: Яко свят еси, Боже наш, и во святых почиваеши, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Иерей: Всякое дыхание да хвалит Господа.
Стих: Хвалите Бога во святых Его, хвалите Его во утверждении силы Его.
Иерей: И о сподобитися нам слышанию святаго Евангелия Господа Бога молим.
Лик: Господи, помилуй (Трижды).
Иерей: Премудрость, прости, услышим святаго Евангелия. Мир всем.
Лик: И духови твоему.
Иерей: От Луки святаго Евангелия чтение.
Лик: Слава Тебе, Господи, слава Тебе.
Иерей: Вонмем.
Во время оно стал Иисус на ровном месте, и множество учеников Его, и много народа из всей Иудеи и Иерусалима и приморских мест Тирских и Сидонских, которые пришли послушать Его и исцелиться от болезней своих, также и страждущие от нечистых духов; и исцелялись. И весь народ искал прикасаться к Нему, потому что от Него исходила сила и исцеляла всех. И Он, возведя очи Свои на учеников Своих, говорил: Блаженны нищие духом, ибо ваше есть Царствие Божие. Блаженны алчущие ныне, ибо насытитесь. Блаженны плачущие ныне, ибо воссмеетесь. Блаженны вы, когда возненавидят вас люди и когда отлучат вас, и будут поносить, и пронесут имя ваше, как бесчестное, за Сына Человеческого. Возрадуйтесь в тот день и возвеселитесь, ибо велика вам награда на небесах.
Лик: Слава Тебе, Господи, слава Тебе.
Слава Отцу и Сыну и Святому Духу.
Молитвами преподобнаго отца нашего Додо Гареджийскаго, Милостиве, очисти множества наших согрешений.
И ныне и присно и во веки веков. Аминь.
Молитвами Святыя Богородицы, Милостиве, очисти множества наших согрешений.
Помилуй мя, Боже, по велицей милости Твоей, и по множеству щедрот Твоих очисти беззаконие мое, и помилуй мя, Боже.
Стихира: Тебе, проповедника истины и всесветлое светило народа грузинскаго, похвалами украшаем, отче блаженне Додо Гареджийский, и молим тя усердно: воздвигни ныне руце твои ко Пресвятей Троице и испроси нам непоколебимое сохранение Церкве, избавление Иверии от нашествия врагов и дарование Крестом победы народу нашему, и нас, верных, да сподобит прощения и милости.
Иерей: Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста; предстательствы честных Небесных Сил безплотных; честнаго, славнаго Пророка, Предтечи и Крестителя Иоанна; святаго великаго пророка Илии Фесвитянина и праведнаго Еноха; святых славных и всехвальных первоверховных апостолов Петра и Павла; святаго апостола Фомы и просветителей Грузии, апостолов Андрея Первозваннаго, Симона Кананита, Варфоломея, Фаддея и Матфия; иже во святых отец наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, чудотворца; святаго славнаго великомученика и победоносца Георгия и святых великих дев-мучениц Варвары и Марины; преподобныя матере нашея, равноапостольныя девы Нины, просветительницы Грузии, и святых равноапостольных царя Мириана и царицы Наны; святых патриархов наших Петра, Самуила, Сармиана, Мамая, Арсения, Мелхиседека, Иоанна-Златоуста, Николая, Евдемия, Иосифа, Кириона и Амвросия; преподобнаго отца нашего Иоанна Зедазнийскаго и двоюнадесяти учеников его, вторых просветителей Церкве Грузинския и присных ея покровителей, и от учеников преподобнаго отца нашего Давида Гареджийскаго; святых и блаженных отец наших Лукиана, Дамиана, Онуфрия и Симеона Гареджийских и святаго священномученика Неофита Урбнисскаго; богомудрых блаженных отец наших Илариона Грузина, Серапиона Зарзмскаго, Григория Хандзтийскаго и Саввы Ишхнийскаго; преподобных отец наших Афонских Иоанна и Гавриила Грузинов, Иоанна, бывшаго Торники, и Евфимия и Георгия Святогорцев; святых славных и добропобедных мучеников наших Раждена, Евстафия Мцхетскаго, Або Тбилисскаго, Гоброна, Феодора пресвитера, Христофора Гурийскаго, Николая Двали, Козмана, князей Аргветских Давида и Константина и князя Константина; святаго великомученика Бидзины и святых славных мучеников Шалвы и Элизбара, эриставов Ксанских; святаго мученика Шалвы Ахалцихскаго и святых ста тысяч мучеников, в Тбилиси от хорезмийцев избиенных; святых мучеников, шести тысяч иноков Гареджийских, и многих святых отцев и матерей, в Аджарии от турок умученных; святых добропобедных царей и цариц Мирдата, Ашота, Архила, Димитрия, Луарсаба, Шушаники и Кетевани; святых благоверных и великих царей наших Вахтанга Горгасала, Давида Строителя, Димитрия-Дамиана, Тамары и Соломона; святаго Илии Праведнаго, Евфимия Человека Божия и Евфимия Исповедника; святых исповедников отец наших Иоанна и Георгия-Иоанна Бетанийских и преподобнаго отца нашего архимандрита Гавриила, исповедника и юродиваго; святых и праведных богоотец Иоакима и Анны (и святаго, егоже есть храм); преподобнаго и богоноснаго отца нашего Додо Гареджийскаго и всех святых Твоих молим Тя, многомилостиве Боже, услыши моление нас, грешных, и помилуй нас.
Лик: Господи, помилуй (12 раз).
Иерей: Милостию, и щедротами, и человеколюбием Единороднаго Сына Твоего, с Нимже благословен еси, со Пресвятым, и Благим, и Животворящим Твоим Духом, ныне и присно и во веки веков.
Лик: Аминь.
Ирмос: Препрославленный отцев наших Бог пещь пламенную отроком угаси, и тии вопияху: Боже, благословен еси.
Преподобне отче Додо Гареджийский, моли Бога о нас
Егда свыше возвещена ти бысть кончина твоя, отче, благословлял и утверждал еси учеников твоих, ибо скорбяху о разлучении учителя и подвижника своего.
Преподобне отче Додо Гареджийский, моли Бога о нас
Яко пастырь добрый, предав стадо и потом душу твою непорочную Господу, лик ангельский предиде тебе и возведе тя пред престол Его.
Слава Отцу и Сыну и Святому Духу.
Зряще лице твое, яко ангела, многоподвижное тело твое обвиша власяницею и, погребше в келлии твоей, возложиша камень и оставиша скважню для изнесения земли.
И ныне и присно и во веки веков. Аминь.
Пристанище жизни вси познаем тя, Дево; волны страстей претвори в тишину и покаяния стяжание даруй уповающим на тя.
Ирмос: Тебе, единому Создателю всех, песнь духовную возопиша отроцы: вся дела Господня, пойте и превозносите Его во веки.
Преподобне отче Додо Гареджийский, моли Бога о нас
Аще и гроб покры тя, подвиг твой, богомудре, не погрузися во глубину забвения, но обитель оную нарекоша «Додорка», и келлию твою, в церковь сотворенную, благолепно украсиша.
Преподобне отче Додо Гареджийский, моли Бога о нас
Честь святыни ниже смертию отъятся от тебе, ибо подвиг твой возвеличи Церковь, и гроб мощей твоих, яко бездну благодатей, содержаху грузины.
Слава Отцу и Сыну и Святому Духу.
Егда обитель твоя многажды от врагов разорися, гроб твой бысть неприступен и угасе лампада пред ним; сего ради перенесение твое в лавру Давидову умысли монах Михаил-Гоброн Сабинин.
И ныне и присно и во веки веков. Аминь.
Ты еси свещник светлый Христа Избавителя, и тебе приносим всемирную хвалу: радуйся, Дево, надеждо мира; радуйся, недужных сило и врачевнице.
Ирмос: Исаие, ликуй, Дева име во чреве и роди Сына Безначальнаго, Еммануила, Бога же и человека, Восток имя Ему, Егоже величающе, Деву ублажаем.
Преподобне отче Додо Гареджийский, моли Бога о нас
Едва обретоша иноцы в Додорке храм твой, и, егда очистиша его, исполненный илом и камением, совершиша параклис и, яко во святей церкви, моляху тя о помощи.
Преподобне отче Додо Гареджийский, моли Бога о нас
Егда отвалиша камень гроба, изыде из него благоухание, и вси с трепетом хваляху тя, преподобне, и славляху Бога; Того моли ныне о утверждении веры нашея.
Слава Отцу и Сыну и Святому Духу.
Егда изнесоша святыя мощи твоя, блаженне, понесоша их с пением, и се, отцы сретоша их с литиею, и, внесше во церковь, положиша близ Давида.
И ныне и присно и во веки веков. Аминь.
Просвети мя, Богородице, во тьме страстей заключеннаго, избави мя от огня онаго, грешнаго и окаяннаго, по Бозе надеждо моя, Всесвятая.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Иерей кадит; чтец или мирянин чтет:
Слышаще подвиг твой, с великим Давидом хвалим тя, светило народа грузинскаго и паче Кахетии, во иноцех светлый отче Додо, и притекаем в Гареджу, святое жилище мощей ваших, яже, яко источник неоскудный, благоухание благодатей источает, и молим вас: от путей погибельных отвратите нас и сохраните от грехопадения.
Се, каковыя подвиги показал еси стаду Христову ради, блаженне отче, ибо преславно украсил еси святую Церковь светлостию жития, и вопиет пустыня Гареджийская и зовет нас хвалити подвиг твой и святыню, мы же радуемся духом и просим твоея помощи пред Богом, да отженет всякое тщеславие и гордыню от омраченнаго ума нашего и утвердит нас на камени заповедей Христовых.
Приидите, о людие грузинстии, и хвалением духовным украсим блаженнаго отца нашего Додо, яко умножителя пустынных обителей и утвердителя грузин в правой вере, иже богато излия благодать и исцеления на землю нашу, и прославим Христа Бога, яко даде таковаго отца и ходатая народу нашему, жребию Матере Своея.
ჵ, სანატრელო მამაო ჩუენო დოდო, ყოვლად ბრძენო, არა მხოლოჲ მკჳდრ ხარ შენ ზეცისა, არამედ მლოცველი და მსწრაფლშემწჱ, და ყოვლად ძლიერი მფარველი მრავალჭირნახულისა ერისა ჩუენისა, ამისთჳს აღგძრავთ შენ მეოხებად ღმრთისა მიმართ, განაქარვოს მზაკუვარებაჲ მტერთა ჩუენთაჲ და ძალი, სიბრძნჱ, და ერთსულოვნებაჲ მოჰმადლოს განბნეულსა ერსა ქართველთასა.
Подвижническим дерзновением призри на ны, призывающия тя, о отче дивный, и поручи нас Покровительнице народа нашего, возлюбленней тобою Богородице, да исполнит глаголы Своя, яко Милостивая, и да не отлучит нас от всесвятаго покрова Своего, но да поможет нам во всякой скорби и соблазне и да исполнит нас божественнаго бодрствования, да вси творим правду и благодарение и славу возсылаем Богу:
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Помилуй нас, Господи, помилуй нас; всякаго бо ответа недоумеюще, сию Ти молитву, яко Владыце, грешнии приносим: помилуй нас.
Слава Отцу и Сыну и Святому Духу.
Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри на ны милостию, яко благоутробен, и избави ны праведно от гнева Твоего; Ты бо еси Бог наш, и мы людие Твои, вси дела руку Твоею, и имя Твое наречеся на нас, и помилуй нас.
И ныне и присно и во веки веков. Аминь.
Милосердия двери отверзи нам, благословенная Богородице, надеющиися на тя да не погибнем, но да избавимся тобою от сопротивных враг: ты бо еси спасение рода христианскаго.
Иерей: Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (Трижды).
Иерей: Еще молимся о милости, жизни, мире, здравии, долгоденствии, спасении, просвещении, прощении, благопоспешении и тишине рабов (или рабынь) Божиих и всех чад Церкве нашея, да сохранит Господь Бог наш царствующий град сей наш и святый храм сей и вся грады и веси Иверии от глада, губительства, труса, потопа, огня, меча, нашествия иноплеменников, междоусобныя брани и смертоносныя язвы; да милостив нам будет Бог благостию и человеколюбием Своим, во еже благостояти, и отвратит гнев, на ны повседневно движимый, и избавит нас от праведнаго Своего прещения, на ны належащаго, и помилует нас.
Лик: Господи, помилуй (12 раз).
Иерей: Услыши ны, Боже, Спасителю наш, упование всех концев земли и сущих в мори далече, и милостив, милостив буди о гресех наших, и помилуй ны; милостив бо и человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
О светозарная звездо пустыни, преподобне отче наш Додо Гареджийский, великий игумене Божественныя обители «Додорки» и похвало возлюбленнаго народа нашего; памятниче подвига и твердая скало веры; наставниче отцев и прекрасное украшение Церкве Христовы; многих чудес делателю и ходатаю наш пред Спасителем и Пречистою Его Материю!
О в отцех благочестием просиявый, великий чудотворче Додо Гареджийский! Иже свыше Божиим промыслом пришел еси в пустыню Гареджийскую во пристанище душ и во умножение обителей, совершил еси ангельское течение твое на земли и, вознесся от плоти пред Христа Бога и Спаса, даровал еси всехвальныя мощи твоя святей Церкви, во свет и венец благодатей, и поклоняемся им и молим тя: буди нам ходатай пред Ним, да благодать Свою и милость обновит народу нашему, жребию Матере Своея, носящему Крест Господень на земли, и сохранит нас от сети вражия и от насмешки и насилия антихристова. Многомощною силою твоею покрый и укрепи Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов и весь священный и монашеский чин. Укрепи служителей Божиих и всех православных христиан.
О пустыни безводныя во грады претворивый и добрый строителю подвижниче, преподобне отче наш, святый Додо Гареджийский! Избравый житие ангельское и облекийся во святую оную схиму иноческую, ныне помяни нас пред Богом, яко имаши дерзновение велие к Нему, да дарует церквам благолепие, священству честность, властем и правителем нашим доброе пасение народа, воинству мужество, мирянам безгрешие и женам целомудрие, нас же да возрастит, умножит и исполнит духом премудрости, взаимною любовию и Божественным разумением, да возставит нам правдолюбие, многочадие и милость ко вдовицам и сиротам; да дарует нам любовь ко святому житию, ненависть к непотребным делом и сокрушение сердца, да не обладает нами растлевающий дух века сего, и, небеснаго жительства сподобльшеся, с тобою поем, благословим и славословим Пресвятую Троицу, Ейже Единой подобает всякая слава, честь и поклонение, Отцу и Сыну и Святому Духу, ныне и присно и во веки веков. Аминь.
Иерей: Премудрость!
Пресвятая Богородице, спаси нас.
Лик: Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Иерей: Слава Тебе, Христе Боже, упование наше, слава Тебе.
Лик: Слава Отцу и Сыну и Святому Духу, и ныне и присно и во веки веков. Аминь.
Господи, помилуй (Трижды). Благослови.
Иерей: Творит отпуст...
Лик: Аминь.
Мирянин: Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, преподобнаго и богоноснаго отца нашего Додо Гареджийскаго и всех святых, помилуй нас. Аминь.
При целовании иконы поем сице:
Имамы тя стража неусыпнаго, треблаженне святый Додо, и молим тя: ходатайствуй о нас пред Богом, да избавятся души наша от работы темнаго диавола и от пленения страстей, в час же суда да избавит нас от вечных горьких мук.
Пресвятая Богородице, Невесто и Мати Непорочная, Дево Марие, призри на с верою покланяющихся и с любовию лобызающих честную икону святаго Додо Гареджийскаго; благодать же его и милость твоя да сопутствуют нам во вся дни живота нашего.
Автор-составитель: Тинатин Мчедлишвили
