Покаянный акафист для жен, погубивших младенцев во чреве своем (для домашняго чтения)
Агнче Божий, вземляй грехи мира, услыши рыдание мое и внемли печали сердца моего; возми бремя тяжкое грехов моих, Иже немощи человеческия понесый; приими мя, с покаянием припадающую к Тебе, молящуюся и зовущую из глубины сердца: Господи мой, Господи, радосте моя, помилуй мя падшую.
Боже и Господи! Создание рук Твоих есмь, но горе мне, яко прелесть Адама, в раи созданнаго, в души и в теле моем есть, и рабски угождаю ей; ныне же молю Тя:
Помилуй мя, Творче премирный; помилуй мя, Творче земли; помилуй мя, Господи сил небесных; помилуй мя, Правителю всякия плоти; помилуй мя, о всех Промышлениче; помилуй мя, слезы покаяния Тебе приносящую; Господи мой, Господи, радосте моя, помилуй мя падшую.
Господи многомилостиве, како дерзну аз, таковая грешница и скверная, приближитися к Тебе молитвою моею, яко преступих заповедь Твою, реченную пророком Твоим Моисеем: не убий; аз же убийца есмь, и горе мне, во сто крат лютейшая бых ехидны, яже на время не вредит птенцем своим, потом же пожирает их; аз же, окаянная, чада моя лиших не токмо света чувственнаго, но паче Света истиннаго, Господа нашего Иисуса Христа, просвещающаго Крещением; и, покоя временнаго ищущи, многочадия бегах, убивающи младенцы во утробе моей. Сего ради, омраченная сим и многими грехми, все упование мое на благоутробие Твое возлагаю и дерзновенно зову Ти: Аллилуиа.
Словеса живота Твоего презрех, Господи, и в похотех моих ходих от юности моея даже до днешняго дне; ныне же с покаянием зову Ти, Многомилостиве, спаси мя:
Помилуй мя, в беззакониих зачатую; помилуй мя, во гресех рожденную; помилуй мя, заповедей Твоих не сохранившую; помилуй мя, благодати Твоея лишенную; помилуй мя, о спасении моем нерадивую бывшую; помилуй мя, в сети страстей уловленную; Господи мой, Господи, радосте моя, помилуй мя падшую.
Се что добро или что красно, братие, еже жити вкупе и любити друг друга, якоже заповеда нам Спаситель наш; всяк ненавидяй брата своего человекоубийца есть; аз же гневом превзыдох всех от века рожденных, паче же и убийц, ихже жертвы различны бяху виною, житием и возрастом; аз же, окаянная, пресекох жизнь тех, иже токмо прияша ю от Тебе, Жизнодавца; аз, безумная, немилостиво отъях жизнь их, еще во утробе моей сущих; страха Божия не имущи, отвергох волю Твою и благословенный Тобою дар чадородия; самоволием моим исторгах безгрешныя чада моя из рук Твоих зиждительных и безстудно убивах их пред очима Твоима. Но участь их в деснице Твоей, Господи, а грех мой предо мною есть выну. Тебе единому каюся и молю Тя, Преблагий, исправи стопы моя на пути покаяния, да со всеми кающимися грешники пою Ти: Аллилуиа.
Един ведый немощи человеческия, веси и моя грехопадения. Грехов юности моея не помяни и от тайных моих очисти мя, зовущую Ти:
Помилуй мя, велию грешницу; помилуй мя, Божественнаго закона нарушительницу; помилуй мя, завета Твоего преступницу; помилуй мя, яко за дары Твоя, Царю, злом воздавшую; помилуй мя, в покаянии моем яко делателя единонадесятаго часа; помилуй мя, окаянную чадоубийцу; Господи мой, Господи, радосте моя, помилуй мя падшую.
Царю Небесный, Подателю жизни, прииди и вселися в мя, грехми оскверненную, и очисти мя от всякия скверны и спаси душу мою, да, спасена, зову Ти: Аллилуиа.
Заблудих, яко овча погибшее, взыщи мя, рабу Твою, Боже мой, от заповедей Твоих удалившуюся в дебри страстей и непроходимаго самоволия; спаси мя, недостойную, воздыханием тепле к Тебе стенящую, молящую и вопиющую:
Помилуй мя, грехми самоволия отягченную; помилуй мя, страстьми омраченную; помилуй мя, гордынею восхищенную; помилуй мя, завистию снедаемую; помилуй мя, неправды исполненную; помилуй мя, не хотяй смерти грешника; помилуй мя, вольную чад моих убийцу; Господи мой, Господи, радосте моя, помилуй мя падшую.
Идеже хощеши, Всесильный Боже мой, тамо побеждается естества чин; победи и мое естество греховное и силу его, яже влечет мя ко грехом, яко Ты еси Творец всех и Создатель естеств. Божественною благодатию Твоею дух прав обнови во утробе моей, не отвержи мене от лица Твоего и Духа Твоего Святаго не отыми от мене, и изглади праведно на души моей напечатленный знак чадоубийцы, судом Твоим шестою заповедию «не убий» положенный, и возстави мне завет Твой вечный, Господи, грехми моими нарушенный, и паки возстави прежния добродетели, грехми отгнанныя, да невозбранно пою Ти: Аллилуиа.
Кто согреши, якоже аз, окаянная? Кий грех не сотворих, кое зло не вообразих в души моей? Но сокрушенным сердцем и слезами прихожду к Тебе, многомилостивый Боже, вопиющи сице:
Помилуй мя, рабу Твою непотребную; помилуй мя, во гресех ожесточенную; помилуй мя, ближняго ненавидящую; помилуй мя, словом и делом унылую; помилуй мя, душею и телом оскверненную; помилуй мя, совестию опаляемую; помилуй мя, младенцеубийцу, яко Ирода; Господи мой, Господи, радосте моя, помилуй мя падшую.
Сиянием благодати Твоея, Господи Светодавче, просвети одежду души моея и спаси мя, да с радостию пою Ти: Аллилуиа.
Паче множества многа суть, Христе, согрешения моя, и тьма нощная житие мое, но уповаю на милость Твою, Избавителю мой, и, яко Давид, пою Ти:
Помилуй мя, в лености все житие мое иждившую; помилуй мя, грехов моих ради непрестанно Тебе молящуюся; помилуй мя, ко благим Твоим, к покаянию приводящим, вразумлениям неблагодарную; помилуй мя, закон Твой презревшую и заповеди Твоя разорившую; помилуй мя, мир сей и яже в мире возлюбившую; помилуй мя, суетам мира сего поработившуюся; помилуй мя, на заповеди мира сего взиравшую, благословением Твоим о чадородии пренебрегшую и чадоубийство сотворившую; Господи мой, Господи, радосте моя, помилуй мя падшую.
На небо возвожу очи мои к Тебе, Слове Божий, но тленное естество мое к земли влечет мя, Спасе мой. О Творче неба и земли и всего, еже в них! Направи стопы моя к небеси, якоже мыслию, тако и делом, да победно пою Ти сердцем и устнами сице: Аллилуиа.
Коварства и нечистоты исполнено око мое, соблазны мира сего прельщена есмь; сего ради молю Тя, Благий, отврати очи мои, да не видят суеты, зовущую Ти молитвенно:
Помилуй мя, верно служити Тебе жаждущую; помилуй мя, духом и истиною поклонитися Тебе вожделевающую; помилуй мя, вместо грехов слезы покаяния яко жертвы Тебе приносящую; помилуй мя, прощения за убиение чад моих просящую; помилуй мя, на Тя уповающую об избавлении от страстей моих; помилуй мя, о тяжких и смертных гресех моих выну плачущую; помилуй мя, убийцу, суду Божию и человеческому повинную; Господи мой, Господи, радосте моя, помилуй мя падшую.
Помилуй мя, Господи, Спасе мой, пришедый в мир грешники спасти, от нихже первая есмь аз; но молю Тя, многомилостиве Боже мой, преклонися на милость благоутробия Твоего, услыши воздыхания моя, приими источник слез моих, теплыя и духовныя молитвы души моея, Спасе, да пою Ти: Аллилуиа.
Яко разбойницы, лукавыя помыслы нападоша на дремлющую совесть мою; горе мне, яко светлую одежду мою, в купели мне дарованную, скверных ради грехов моих совлекоша с мене; сего ради младенцеубийство сотворих и добродетелей праздна доселе пребываю, темже не смею возвести очи мои горе, яже грехов моих ради, пред Тобою сотворенных, долу поникоша, Господи, и сице зову Ти:
Помилуй мя, смертный грех сотворившую; помилуй мя, во гресех доселе пребывающую; помилуй мя, всякия скверны исполненную; помилуй мя, противоестественными пороками оскверненную; помилуй мя, чистоты девства не сохранившую; помилуй мя, яко благочестие материнства от себе отринух; помилуй мя, младенца моего из утробы моея изгнавшую; Господи мой, Господи, радосте моя, помилуй мя падшую.
Источник слез даждь ми, Боже мой, да плачу о гресех моих и тако радующися вопию: Аллилуиа.
Тело мое оскверних тайными мерзостьми, душу мою омрачих безчисленными деяньми моими; немощно тело, немощна и душа моя. Тебе единому, непамятозлобному, милостивому Судии и Богу моему, припадая молюся:
Помилуй мя, убийцу, понеже, воспоминая участь младенцев, мною убиенных, ужасаюся и трепещу и неизреченному удивлению предаюся: како терпиши и благотвориши мне, милосердый Господи и Судие праведный, достойней во аде вселитися, и даже до сего часа ждеши покаяния моего; помилуй мя, многажды покаяние обещавшую и паки ко грехом, яко пес на свою блевотину, возвращающуюся; помилуй мя, многия убийства сотворившую; помилуй мя, яко, страха Божия и любве материнския не имущи, зверским неистовством чада моя растерзах; помилуй мя, яко волею моею многия грехи сотворих; помилуй мя, мерзкими похотьми душу мою осквернившую; помилуй мя, даже доселе житию греховному последующую; Господи мой, Господи, радосте моя, помилуй мя падшую.
Соблазнами мира сего уязвлена есмь и преклонила колена моя пред ним, избравши ненависть к закону Твоему, яже губит; забых обеты моя, данныя во время Крещения, и прилагаю беззаконие ко греху, еже предлагает ми мир сей; наконец достигох вершины смертных грехов — чадоубийства; но, Боже Отче, простри руце Твои и обыми мя, к Тебе прибегающую, дондеже принесу Ти жертву хвалы в конце жития моего, вопиющи: Аллилуиа.
Татие, убийцы, разбойницы и вси нераскаяннии грешницы Царствия Божия не наследят. Аз же всякою нечистотою и неправдою осквернила есмь душу и тело мое. Таковаго ради окаянства душевнаго припадаю к Тебе и зову Ти:
Помилуй мя, Создателю благодатнаго Царствия в Новом Завете; помилуй мя, в Церкви, Тобою созданной, воцерковленную; помилуй мя, дарами Духа Святаго запечатленную; помилуй мя, Пречистым Твоим Телом и животворящею Кровию вскормленную; помилуй мя, во Христа крестившуюся и во Христа облекшуюся; помилуй мя, от всех сих благодеяний отрекшуюся и житие скверное избравшую; Господи мой, Господи, радосте моя, помилуй мя падшую.
Господи и Владыко живота моего, дух целомудрия даруй ми, яко от юности моея оскудех добродетелию, всецело поработихся страстем, дух и душу оскверних и тело растлих. Боже многия милости и благоутробия! Не возгнушайся очистити мя, толикую скверную грешницу, создание перстов Твоих; помилуй и очисти мя от всякия скверны плоти и духа и сподоби мя дерзновенно пети Тебе: Аллилуиа.
Господи, чаяние сердца моего, не отвержи мене, на Тя уповающую, и не посрами мене пред Ангелы и человеки на праведном и страшном суде Твоем; не суди мне по делом моим, но милостию Твоею прости согрешения моя, зовущей Ти:
Помилуй мя, нечистое сердце имущую; помилуй мя, от бесов плененную; помилуй мя, во гресех рожденную, Крещением омытую и паки, яко свиния, в беззакония впадшую; помилуй мя, в смрадней души моей язвы греховныя имущую; помилуй мя, тяжких и смертных грехов моих ради во отчаяние и уныние впадшую; помилуй мя, всяким грехом оскверненную и всякому наказанию повинную; помилуй мя, Творче мой, и покаянием приими мя падшую; Господи мой, Господи, радосте моя, помилуй мя падшую.
Безмерною любовию Твоею, Боже мой, покрый грехи беззакония моего, приемый покаяние мое, да с любовию присно зову Ти: Аллилуиа.
Юность моя в безумии мину, и все житие мое во гресех иждих, небрежением и леностию к покаянию; но старость, неизбежною смертию и судом Твоим устрашенная, к покаянию приведе мя. Не отвержи мене от Тебе, Спасе мой, в единонадесятый час пришедшую под руце Твои, Отче мой, и с покаянием зовущую:
Помилуй мя, яко кровь неповинных чад моих вопиет к Тебе и свидетельствует о убийствах моих; помилуй мя, Боже, естеством Триединый; помилуй мя, Господи, человеколюбием преудивительный Человеколюбче; помилуй мя, Царю, о согрешениих наших многотерпеливый; помилуй мя, Царю Святый, немощей наших Врачу; помилуй мя, любве исполненный и сею отчаянныя грешники согревающий; помилуй мя, Всесильне, немощи наша понесый; Господи мой, Господи, радосте моя, помилуй мя падшую.
Явитися имать знамение Сына Человеческаго на небеси, Пресвятый и Животворящий Крест Сына Божия, во страшное Второе Пришествие судити живым и мертвым. Тогда восплачутся вся колена земная. О Иисусе Христе, Спасе и Судие наш и всех Царю! Прежде дне онаго даждь нам слезы покаяния, да изглажду ими злая и пагубная дела, мною сотворенная, имиже душу мою оскверних и Пречестную Кровь Твою Новаго Завета горько поругах! Тако в час он со Ангелы и всеми святыми и праведными да пою Тебе: Аллилуиа. (Трижды)
(Также икос 1 и кондак 1.)
О Владыко Господи Иисусе Христе, Сыне Божий! Неизреченною благостию Твоею нас ради человек и нашего ради спасения воплотивыйся, распныйся и во гробе положенный, Кровию Твоею растленное наше естество обновивый, приими покаяние мое и услыши словеса моя: согреших, Господи, на небо и пред Тобою, словом, делом, душею и телом и помышлением ума моего; заповеди Твоя преступих, повелений Твоих не послушах, прогневах благость Твою, Боже мой; но понеже создание Твое есмь, не отчаяваюся упования моего, но к безмерному благоутробию Твоему дерзновенно приступаю и молю Тя: Господи! Во время покаяния даруй ми сердце сокрушенное и приими мя молящуюся и даруй ми помысл благий; даруй ми изволение исповедати грехи моя и слезы умиления; Господи, сподоби мя благодать Твою положити во основание всех благих начинаний моих. Помилуй мя, Боже, помилуй мя падшую и помяни грешную рабу Твою во Царствии Твоем, ныне и присно и во веки веков. Аминь.
О Боже, многомилостиве Иисусе Христе, Избавителю грешных, иже спасения ради рода человеческаго оставил еси пресветлое небо и снизшел еси в сию юдоль плачевную многогрешную, понесл еси на Божественных раменах немощи наша и болезни наша подъял еси; Ты, о Святый Страдальче, язвлен был еси за грехи наша и мучен беззаконий наших ради; сего ради мы вси, Человеколюбче, приносим Ти смиренныя сия молитвы: приими я, о Всеблагий Господи, снисходителен буди к немощем нашим и грехов наших не помяни, и грозное прещение отмщения за грехи наша отврати от нас. Пречестною Кровию Твоею падшее естество наше обновивый, Господи Иисусе Христе, Спасе наш, обнови и нас, во тлении греховнем сущих, и утеши сердца наша радостию всепрощения Твоего: плачем и безчисленными слезами покаяния припадаем к Божественней Твоей милости: очисти нас всех, Боже наш, Божественною благодатию Твоею от всех неправд и беззаконий жития нашего, да во святыни человеколюбия Твоего восхваляем всесвятое имя Твое со Отцем и Всеблагим и Животворящим Духом, ныне и присно и во веки веков. Аминь.
Милосердия двери отверзи нам, благословенная Богородице, надеющиися на тя да не погибнем, но да избавимся тобою от сопротивных враг: ты бо еси спасение рода христианскаго. Аминь.
Радуйся, едина Пресвятая Мати единаго Творца, Господа Бога и Спаса нашего Иисуса Христа!
Буди ми ходатаица в день страшнаго испытания моего, егда предстану престолу нелицеприятнаго Судии, да избавлена буду от гнева огненнаго мучения молитвою твоею, едина благословенная.
(Поклон и отпуст)
Пресвятая Богородице, спаси нас!
Молитесь сим во вся дни жизни вашея.
