Акафист святой блаженной Ксении Петербургской
Избранная угоднице Божия и Христа ради юродивая, святая блаженная мати Ксение, подвиг терпения понесшая и зле пострадавшая, чтуще святую память твою, хвалебное пение приносим тебе; ты же покрый от враг видимых и невидимых нас, зовущих тебе: Радуйся, блаженная Ксение, молитвеннице о душах наших!
Равноангельному житию причастилася еси, блаженная мати, по преставлении супруга твоего, отвергшися красоты мира сего и всего, еже в мире: похоти очес, похоти плоти и гордости житейския; Христа ради юродивая, ум Христов облеклася еси. Темже услыши от нас хвалу, тебе возносимую:
Радуйся, житием твоим Андрею, Христа ради юродивому, равная; радуйся, имени твоего отрекшаяся и себе умершею нарекшая; радуйся, юродством твоим имя Андрея, супруга твоего, приявшая; радуйся, мужеское имя прием, немощь женскую оставившая; радуйся, все имение твое добрым людем и нищим раздавшая; радуйся, Христа ради вольную нищету восприявшая; радуйся, юродством твоим отвергати суемудрие века сего научающая; радуйся, в молитвах к тебе прибегающих благо утешающая; Радуйся, блаженная Ксение, молитвеннице о душах наших!
Видяще странное житие твое, возненавидевшия дом твой и все богатство мирское, сродницы по плоти безумную тя вменяху. Народ же града Петрова, смирение твое, нестяжание и вольную нищету зря, пояше Господу: Аллилуиа.
Разум, от Бога тебе данный, блаженная Ксение, мнимым безумием твоим покрыла еси; в суетней молве великаго града, яко пустынница живущи, молитвы твоя непрестанно к Богу возсылала еси. Мы же, дивящеся таковому житию твоему, хвалами вопием тебе:
Радуйся, тяжкий крест юродства, от Бога тебе данный, на рамена твоя подъявшая; радуйся, мнимым безумием блистание благодатное покрывшая; радуйся, дар прозорливства крайним смирением и молитвенным подвигом стяжавшая; радуйся, дар сей на пользу и спасение труждающихся являвшая; радуйся, даром прозорливства страдания человеческия в недоведомой дали прозревающая; радуйся, благочестивей матери рождение сына предрекшая; радуйся, матери той младенца от Бога испросившая; радуйся, всех ко Богу молитвенно приближатися научающая; Радуйся, блаженная Ксение, молитвеннице о душах наших!
Силою, свыше от Бога данною, зной и лютый мраз мужественно претерпевала еси, распинающи плоть со страстьми и похотьми; тако и, Духом Святым просвещаема, непрестанно вопияла еси к Богу: Аллилуиа.
Имущи, о блаженная, небо покровом, землю же ложем, Царствия ради Божия плотское угодие оставила еси. Мы же, видяще таковое житие твое, умиленным сердцем взываем ти:
Радуйся, земное жилище твое людем отдавшая; радуйся, небеснаго пристанища взыскавшая и обретшая; радуйся, земнаго ничтоже имущая, но всех духовно обогащающая; радуйся, житием твоим терпению нас научающая; радуйся, любовь Божию человеком являющая; радуйся, плодами благочестия украшенная; радуйся, терпение и безгневие миру являющая; радуйся, пред Престолом Всевышняго тепле предстоящая; Радуйся, блаженная Ксение, молитвеннице о душах наших!
Бурю суеты, во граде Петрове свирепствующую, смирением и безгневием твоим преодолела еси, безстрастие к тленному миру стяжавши, блаженная мати; темже пела еси Господу: Аллилуиа.
Слышав о тебе народ, како, Христа ради зле пострадавшая, печальныя утешаеши, немощныя укрепляеши, заблудшия на правый путь наставляеши, труждающиися, к помощи твоей прибегающе, пение тебе возношаху:
Радуйся, путь Христов всем сердцем возлюбившая; радуйся, крест Христов с радостию подъявшая; радуйся, всякое поругание от мира, плоти и диавола претерпевшая; радуйся, дарований, от Бога данных, исполненная; радуйся, любовь к ближнему являющая; радуйся, труждающихся утешительнице; радуйся, слезы плачущих отирающая; радуйся, благодатию Святаго Духа чудесно согретая; Радуйся, блаженная Ксение, молитвеннице о душах наших!
Звезда Божия мерцающая явися святыня твоя, блаженная Ксение, небосклон града Петрова озаряющая. Народу, в безумии грехов к погибели грядущему, показала еси путь спасения, всех к покаянию призывающи и вопиющи к Богу: Аллилуиа.
Видяще подвиг твой, в молитве стужу и зной терпящия, благочестивии людие, облегчити страдания твоя тщащеся, одежду и пищу подаваху тебе; ты же, в подвизе твоем пребывати хотящи, вся нищим раздаяла еси. Мы же, вольной нищете твоей дивящеся, вопием ти сице:
Радуйся, стужу и зной Христа ради вольно терпевшая; радуйся, в непрестанной молитве пребывавшая; радуйся, град Петров от бед всенощным бдением хранившая; радуйся, гнев Божий от него многажды отвратившая; радуйся, во вся дни лета нощию в поле молившаяся; радуйся, райскую сладость в духовной нищете вкусившая; радуйся, сладости ради сея вся земная оставившая; радуйся, яко всецело в Бозе почиваеши; Радуйся, блаженная Ксение, молитвеннице о душах наших!
Святость жития твоего проповедуют, богоблаженная, вси, тобою от различных болезней, бед и скорбей избавленнии, богатии и нищии, старцы и отроцы; темже и мы, величающии тя, вопием Господу: Аллилуиа.
Возсия слава подвигов твоих, блаженная мати, егда, труды зиждущих Смоленский храм облегчающи, тайно камение им приношала еси. Мы же, грешнии, видяще сие, вопием ти сице:
Радуйся, тайно творити благое научающая; радуйся, всех к подвигу благочестия призывающая; радуйся, зиждителем храмов Божиих помощнице; радуйся, благолепия церковнаго любительнице; радуйся, труды наша на пути ко спасению облегчающая; радуйся, прибегающим к тебе скорая помощнице; радуйся, всех скорбящих благая утешительнице; радуйся, града Петрова небесная заступнице; Радуйся, блаженная Ксение, молитвеннице о душах наших!
Хотящи утолити скорбь плачущаго врача, погребающаго супругу свою, девице оной на Охту бежати повелела еси, тамо мужа обрести и утешити его. И егда сбыстся, якоже ты прорекла еси, с радостию воззваша Господу: Аллилуиа.
Новое чудо показала еси молитвою твоею, блаженная мати, егда благочестивей жене глаголала еси: «Возьми пятачок, потухнет». Сим пожар дома ея предрекла еси и молитвою твоею пламень огненный угасила еси. Мы же, видяще сие, хвалебное пение возсылаем:
Радуйся, скорби народныя утоляющая; радуйся, дерзновение пред Богом о труждающихся являющая; радуйся, свеще неугасимая, в молитвах к Богу светло горящая; радуйся, в бедах и напастех наша заступнице; радуйся, страстьми одержимых от погибели избавляющая; радуйся, благочестивыя девицы от неподобнаго брака изимающая; радуйся, клеветою уязвленных от отчаяния избавляющая; радуйся, от неправеднаго суда скорая защитнице; Радуйся, блаженная Ксение, молитвеннице о душах наших!
Странническим житием бездомным путь жизни прошла еси, скорби и поругания величайшим терпением претерпевши. Ныне же, во Иерусалиме небеснем пребывающи, с радостию вопиеши Господу: Аллилуиа.
Всем вся была еси, блаженная Ксение: плачущим утешение, немощным покров и защита, скорбящим радость, нищим одеяние, болящим врачевание. Темже вопием ти:
Радуйся, в вышних почивающая; радуйся, тамо о нас грешных молящаяся; радуйся, образ благочестия к Богу подающая; радуйся, обидимых и гонимых покровительнице; радуйся, молитвою твоею людем православным заступнице; радуйся, поругаемых и молящихся хранительнице; радуйся, ругающихся в чувство приводящая; радуйся, неправедных и тщеславных посрамляющая; Радуйся, блаженная Ксение, молитвеннице о душах наших!
Всякую немощь претерпела еси, блаженная мати: нищету телесную, глад и жажду, такожде и поругания от беззаконных человек, яко безумную тя вменяху. Ты же, Господу молящися, вопияла еси Ему: Аллилуиа.
Витии многовещаннии не могут уразумети, како юродством твоим безумие мира сего обличила еси и немощию твоею сильных и мудрых посрамила еси, не познавших в тебе силы Божественныя и премудрости Божественныя. Мы же, помощь твою приемлюще, поем ти сице:
Радуйся, сосуде Духа Святаго; радуйся, со апостолом Павлом немощьми твоими хвалящаяся; радуйся, мнимым юродством твоим мир обличающая; радуйся, красоты сокровищ сих спасения ради души отвергшаяся; радуйся, благ небесных всем сердцем возлюбившая; радуйся, на путь спасения нас наставляющая; радуйся, греха пьянства грозная обличительнице; радуйся, врачу безмездный, ко всем милостивая; Радуйся, блаженная Ксение, молитвеннице о душах наших!
Спасти душу твою хотящи, плоть твою со страстьми и похотьми сице распяла еси и, отвергшися себе навсегда, взяла еси крест твой и усердно последовала еси Христу, поющи Ему: Аллилуиа.
Стена твердая и забрало необоримое была еси молящим тя, мати Ксение. Темже молитвою твоею от враг наших видимых и невидимых сохрани нас, вопиющих ти:
Радуйся, к деланию духовному нас наставляющая; радуйся, от сетей вражиих нас избавляющая; радуйся, благоухание, к Богу возносимое; радуйся, мир Божественный на сердца изливающая; радуйся, в сердцах озлобленных дух злобы угашающая; радуйся, благочестивых отроков благословляющая; радуйся, от болезней тайною молитвою исцеляющая их; радуйся, озлобленному миру премудрость Божественную являющая; Радуйся, блаженная Ксение, молитвеннице о душах наших!
Пение хвалебное приносят, блаженная Ксение, молитвою твоею от скорбей, печалей и всяких бед избавленнии, и тии с тобою радостно поют Господу: Аллилуиа.
Светом озаряющим явися нам житие твое, святая мати, во тьме житие сие, человеки просвещающее. Ибо падших от тьмы греховныя избавила еси и ко свету Христову шествие их направила еси; темже вопием ти:
Радуйся, люди православныя светом Божественным просвещающая; радуйся, угоднице Христова, в мире премирно пожившая; радуйся, многими труды велию благодать стяжавшая; радуйся, во тьме греховней благодатию Божественною просвещенная; радуйся, на пути спасения отчаявшимся руку помощи простирающая; радуйся, немощных в вере утверждающая; радуйся, духов злобы посрамляющая; радуйся, житием твоим Ангелы удивившая; Радуйся, блаженная Ксение, молитвеннице о душах наших!
Благодать обильно излиявала еси на чтущих память твою и покрова твоего ищущих. Тако и на нас, молящихся тебе, излий от Бога источники исцелений, вопиющих Ему: Аллилуиа.
Воспевающе многая чудеса твоя, блаженная мати, хвалим тя и усердно молим: не остави нас, грешных, в скорбех, но испроси у Господа силу, да не отступим от православныя веры нашея, тобою в ней утверждаемии, вопиюще ти:
Радуйся, сострадати обремененным научающая; радуйся, немощей наших усердная целительнице; радуйся, распинати плоть со страстьми и похотьми научающая; радуйся, чтущих память твою заступнице и покровительнице; радуйся, в скорбех путь прошедшая; радуйся, сим вечнаго спасения достигшая; радуйся, ко гробу твоему прибегающим радость подающая; радуйся, о спасении отечества усердная молитвеннице; Радуйся, блаженная Ксение, молитвеннице о душах наших!
О святая блаженная мати Ксение, житием твоим тяготу крестную понесшая, приими от нас, грешных, моление сие, тебе приносимое. Молитвою твоею покрый нас от нападения духов тьмы и от всех злоумышляющих на ны. Испроси у всемилостиваго Господа силу и крепость, да кийждо от нас возмет крест свой и последует Христу, с тобою поя Ему: Аллилуиа.
Сей кондак глаголется трижды. Потом икос 1 и кондак 1.
О святая всеблаженная мати Ксение, под кровом Всевышняго пожившая, Богородицею водимая и укрепляемая, глад и жажду, стужу и зной, поругания и гонения претерпевшая, дар прозорливства и чудотворения от Бога приявшая, в сени Всесильнаго почиваеши.
Ныне же святая Церковь, яко цвет благоуханный, прославляет тя. Предстояще гробу твоему и святому образу твоему, яко живей и с нами сущей, молимтися: приими прошения наша и принеси я пред Престол всемилостиваго Отца Небеснаго, и, яко дерзновение имущая, испроси прибегающим к тебе жизнь вечную, на вся благая дела и начинания наша щедрое благословение, от всяких бед и скорбей избавление.
Предстани святыми твоими молитвами пред всемилостивым Спасом нашим о нас, недостойных и грешных.
Помози, святая блаженная мати Ксение, младенцы наши светом святаго Крещения просветити и печатию дара Духа Святаго запечатлети, отроки и отроковицы наша в вере, честности и страсе Божии воспитати и успех во учении им даровати; болящия и недугующия исцели, семействам любовь и согласие низпосли, монашествующия подвигом добрым подвизатися сподоби и от поношений огради; пастыри в крепости Духа Святаго утверди, народ и отечество наше в мире и тишине сохрани, за лишенных в смертный час причащения святых Таин Христовых милости испроси.
Ты еси надежда и упование наше, скорая услышательница и избавительница, тебе благодарение возсылаем и с тобою славим Отца и Сына и Святаго Духа, ныне и присно и во веки веков. Аминь.
Грузинский перевод: Мелания Шанава-Вепхвадзе
