Акафист святой благоверной царице Тамаре
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Величие твое кто повесть, о дивновысокая державнице? Ибо паче ума нашего вознесеся хвала добродетелей твоих; но, безчисленными искушеньми утесняеми, прибегаем ко святой иконе твоей и подвизаем тя к Богу помощницею и ходатаицею, да дарует нам победу на вся прелести и сподобит нас восхвалити и воспети тебе: Радуйся, святая благоверная царице Тамаро!
О, коликое величие стяжа тебе мужество твое, ублажаемая! Ибо и по смерти твоей подвигов твоих возвестительница есть ныне славная Вардзия, и велегласно проповедуют Метехи и Бетания о теплых молитвах твоих; мы же, ведуще множество ходатайств и милостей твоих, всецело себе предаем Божественному покрову твоему и, усердно повествующе о добродетели твоей, изрекаем похвалы твоя:
Радуйся, насаждение Иессеово, отрасле Давидова; радуйся, образе женскаго целомудрия; радуйся, процветшая ветвь святыни; радуйся, славо земли и веры; радуйся, неизследимая бездно любве; радуйся, Божественная трубо Православия; радуйся, неоскудный источниче милости и неисчерпаемое море человеколюбия; радуйся, благолепно возсиявшая истинная служительнице Спасова; радуйся, вождю и крестоносице народа твоего и помощнице Мессиина; радуйся, стено и утверждение Церкве Христовы; радуйся, сило и славо скипетра царей; радуйся, солнце явное, светило Иверии; Радуйся, святая благоверная царице Тамаро!
Насадивши присно в сердце твоем страх и любовь Божию, облеклася еси в милость, кротость и благоговение и подражала еси житию достойных оных жен-мироносиц и сестер Лазаревых; ныне и с ними моли Бога, да благоволит возрастити, умножити и исполнити нас взаимною любовию и премудростию Божественною, да краткаго сего жития нашего путь добре пройдем и присно хвалим Спаса нашего Христа: Аллилуиа.
Видев божественную твою святыню и простоту ума Ведый тайная, помаза тя елеем радости и самодержицею Иверии и всего Востока постави; ты же преславныя победы оружием Животворящаго Креста управила еси и стадо, вверенное тебе, во благоверии утвердила еси; тако и ныне народ наш мужеством укрепи и путь наш царский добре управи, да мудре ходим путем истины и непрестанно хвалим тя:
Радуйся, от корений благочестивых прозябшая и дщерию Давида пророка нареченная; радуйся, во святыни воспитанная и нелицемерною верою огражденная; радуйся, от юности твоея царским елеем помазанная; радуйся, милостию освященная и помыслом просвещенная; радуйся, житием добродетельным и премудростию Божественною усовершенная; радуйся, благостию и человеколюбием просиявшая; радуйся, благолепием и красотою превзошедшая; радуйся, любовию к родной земли воспламененная; радуйся, народа, жребия Богородицы, пасти и владети посланная; радуйся, твердостию великих подвигов твоих украшенная; радуйся, благословеннаго винограда отечества неутомимая делательнице, от Господа вознесенная; радуйся, царицею и вождем таргамосиан призванная; Радуйся, святая благоверная царице Тамаро!
Ангелоподобна бе образом и исполнена премудрости, о царице, Христу последовавшая, и ум твой очистила еси поучением в Божественных Писаниих и теплою молитвою, плоть же изнурила еси постом, бдением и возлежанием на земли, и просияла еси блистанием добродетелей; сего ради подвизаем тя на ходатайство к Богу, да призрит на ны, не имущия ответа пред Ним, и исполнит нас бодрствования Божественнаго, да избежим гнева, от Бога воздвигнутаго, и хвалим Иисуса, Всесильнаго Бога: Аллилуиа.
Бодрым пастырем явилася еси народу твоему, в царех подвига победительнице Тамаро, и скоро собрала еси всех мужей священных и закона ведущих, да изыщут благое и отвергнут строптивое, и собор оный, яко жена, с благоговением оставила еси; егда же услыша словеса твоя всеблаженное собрание отцев, возрадовашася боголюбию души твоея и, яко споспешнице собора, явную похвалу принесоша тебе:
Радуйся, солнце грузинское многосветлое, зарею благочестия всех озаряющее; радуйся, светильниче Православныя Церкве, мрак неразумия отгоняяй; радуйся, сердца, волнами мира поколебанная, в благочестии утверждающая; радуйся, лжеверие мужественно обличившая; радуйся, многия души от плена и от порабощения насильником избавившая; радуйся, делателей плодоносны творящая и нищих питающая; радуйся, иереев, во одеждах овчих пришедших, внутрь же сущих волков, низлагающая и разсеявающая; радуйся, ненавидящих правду и злое благим полагающих посрамляющая; радуйся, заблудших на путь истины обращающая; радуйся, сердца разсвирепевших зверей умягчающая; радуйся, насильников, человеконенавистных начальников и судей обличительнице и неправедно гонимых от них милостивице; радуйся, благоговейных иереев и иноков скорая помощнице и предстательнице; Радуйся, святая благоверная царице Тамаро!
Ходившей в заповедех Божиих и во оправданиих Его, дарова тебе сердце разумно и мудро, разуметь благое и лукавое; и ты исполнила еси срама и всякаго безчестия двоедушныя в народе, тако и дерзость сокруши вооружившихся безбожием на правоверных; и избави нас от всякаго вреда злых человек, да всем правоверным добре поспешится и молитва наша принесена будет пред Богом: Аллилуиа.
О, како воистину божественна и дивна суть дела твоя, мужественная царице! Ибо в благочестии и благоговении не оставила еси временнаго царства без попечения, но паче всех царей и мудрых добре управила еси и устроила еси и преуспела еси славою и победами; народ же твой, благодарный Всемилостивому Богу, всем повествоваше славу твою и сице ублажаше тя, просвещенную и всехвальную:
Радуйся, цвете прекрасный пресветлаго вертограда Давидова; радуйся, неисчерпаемый источниче Божественныя премудрости; радуйся, небесною благодатию просиявшая, поклоннице Мессиина; радуйся, неуязвимая хранительнице правыя веры; радуйся, непоколебимый столпе праведнаго суда; радуйся, сладостно носящая иго Божественное; радуйся, Божественная делательнице винограда Христова; радуйся, щите, хранящий благочестие; радуйся, мечу, отсекающий злочестие; радуйся, сладкое и благое утешение народа грузинскаго; радуйся, славо и крепосте отечества нашего; радуйся, неусыпная хранительнице и укрепительнице Иверии; Радуйся, святая благоверная царице Тамаро!
Любовь и добродетель, яко порфиру, облеклася еси, боголюбивая помазаннице Господня, и, отверзши сокровища отцев и дедов твоих, простерла еси милость и приятие, якоже никтоже никогда виде; народ же твой, познав матернее милосердие твое, еще при жизни возвеличи тя и не престаяше пети Богу: Аллилуиа.
Егда призре Иисус милостию на народ наш, жребий Матере Своея, низпосла тебе силу, мужество и одоление на всех утеснителей, якоже боголюбивому деду твоему Давиду Строителю; и ты верности ради отечеству и мирнаго ради сохранения народов твоих, подобно ему, разсеяла еси коварство двоедушных и врагов; ныне не престани о народе твоем пред Христом Избавителем, да до скончания века сохранит Иверию и народ Иверии, да в любви и мире спасаемся и с верою поем:
Радуйся, благородство духа сохранившая; радуйся, пламень прельстителя и сети его слезами угасившая; радуйся, многообразныя скорби и печали мужественно претерпевшая; радуйся, богомудрыя умы услаждающая; радуйся, достоинства народа твоего хранительнице; радуйся, искушения и волны утишающая; радуйся, истиною ложь разрушающая и гнев Божий удерживающая; радуйся, гордость мучителей и прелесть диаволю попирающая; радуйся, всех, враждующих на иверов, ужасающая и смиряющая; радуйся, от многосплетенных оных козней вражиих избавляющая; радуйся, на беззаконных ужас наводящая; радуйся, превозношение исмаильтян умаляющая; Радуйся, святая благоверная царице Тамаро!
Не прельсти тебе наслаждение века сего, ни венец и скипетр славный, якоже многих царей, но, горния славы вожделевши, и дольнюю сию славу обильно прияла еси по обетованию Господню; не престани молити Его, да умилосердится о роде нашем и паки дарует нам пастыря верна и мужественна, да учит и управляет законный народ, в сыны Божия избранный, и присно жертву хвалы приносит Богу: Аллилуиа.
Егда печахуся о рождении наследника, не оставиша тебе на воли твоей, вовсе не хотящей брака, и, избравше мужественнаго Давида от царскаго рода, якоже подобаше жребию и чину сияния твоего, возложиша на боголепную главу твою честный венец супружества; народ же твой радостию веселяшеся и, яко всесветлому светилу мира, единогласно пояше тебе:
Радуйся, пастырю добрый Божественных стад; радуйся, подобно Соломону премудрости исполненная и судие праведнаго правления; радуйся, с небесе дарованное утверждение православных; радуйся, избранный сосуде добродетелей; радуйся, жилище благих дел; радуйся, приносительнице церквам; радуйся, благодетельнице священства; радуйся, созидательнице странноприимниц и врачу недугующих; радуйся, милостивице нищих и защитнице вдовиц и сирот; радуйся, праведная судие безпомощных и помощнице немощных подчиненных; радуйся, в скорбех непостыдно руку подающая и ходатаице призывающих тя; радуйся, венче и славо благочестивых царей; Радуйся, святая благоверная царице Тамаро!
Егда во сне в видении узрела еси наслаждение рая и престол пресветлый, украшенный камением многоценным, и устремилася еси сести на нем, не попусти тебе некий муж светоносный, сице взывая: «Рабы твоея есть, царице, ибо ризы двунадесяти иереев рукою своею сотка»; тогда тако сотворила еси и ты и, стяжавши оныя нетленныя небесныя ризы, с собором святых присно взываеши Богу: Аллилуиа.
По всей земли разпространися славное и дивное имя твое, на царство помазанная царице, ибо в немощи женскаго естества мужески подвизалася еси и вверенныя тебе народы и царства от обстоящих искушений безстрашно сохранила еси, пределы же Грузии от Спери даже до Дербента паче разширила еси, и храмы и монастыри не токмо во отечестве твоем, но и во всех святых местех во славу Божию создала еси и великою милостию исполнила еси; ныне не лиши нас помощи твоея и народ наш, Христово имя носящий, силою Его покрый, да, невредимо сохранени, хвалимся и вопием:
Радуйся, светом благочестия во тьме пребывающия души просвещающая; радуйся, многия язвы исцеляющая; радуйся, от мятежа и брани избавляющая; радуйся, прелесть суеверия упраздняющая; радуйся, теплохладную веру оживляющая; радуйся, благодатию Божественною невежды умудряющая; радуйся, жестоковыйных и непокоривых умом наставляющая; радуйся, осужденных от смерти избавляющая; радуйся, от смрада беззакония очищающая; радуйся, злоумышления врагов прогоняющая; радуйся, трудом рук твоих старцев и неимущих питающая; радуйся, славную нерукотворенную Анчийскую икону украсившая и благолепну сотворившая; Радуйся, святая благоверная царице Тамаро!
Царство твое, Богом благословенное, возвеличила еси Божественным жительством и украсила еси добрыми делы, житие же твое украсила еси терпением и смирением; сего ради возложи Бог на главу твою венец славы и утверди благоденствие народа твоего; тако и ныне излей на ны благодать молитвы твоея и даруй нам, якоже тебе, теплоту веры, любовь к ближнему и Божественную ревность об отечестве, да день от дне подвизаемся во славу Божию и хвалим силу Его: Аллилуиа.
Падение в нищету и изнеможение гладом скоро постиже кесаря Алексия, егда забы страх Божий и расхити великое богатство, тобою дарованное монахом Черныя Горы, ибо естественный оный праведный гнев возгореся в тебе, милостивой; и, паки послав большее сокровище инокам, отъяла еси Трапезунт и Лазию у корыстолюбиваго кесаря и праведно даровала еси Алексию Комнину, иже благодарение принесе Богу, давшему ему таковую помощницу и покровительницу, и ублажаше тя в подвизе славном и блаженном:
Радуйся, Авраамову страннолюбию подражательнице; радуйся, грехолюбивых человек сладости воздержания научающая; радуйся, коварства ненавистнице и жестоких сердец умягчительнице; радуйся, человеки на служение отечеству и ко благочинию приводящая; радуйся, оружие правоверных и разсвирепевших богоненавистников победительнице; радуйся, безстудных дерзость разрушающая и нападающих и надменных низлагающая; радуйся, неистовых препинающая и неразумие волхвов угашающая; радуйся, честности и мужества насадительнице; радуйся, на народоначальников и вождей, творящих беззаконие, гнев наводящая; радуйся, осквернителей святыни и развратителей христианства ужасающая; радуйся, основанием «Трапезундской империи» пределы земли твоея охранившая; радуйся, царство твое от нападения врагов покрывающая; Радуйся, святая благоверная царице Тамаро!
Якоже принесе ожерелие златое в Гелати Хахульской Богородице Давид Строитель, егда от Бога дарована ему бысть в Дидгори «победа дивная», тако и ты, свыше победу приемши при Шамхоре, посла тамо знамя халифово и украшение златое рукою Шалвы Ахалцихскаго и, приносящи Богородице ямбик, Трисвятую песнь принесла еси Богу: Аллилуиа.
Ни во чтоже вменила еси прещения беззаконнаго онаго султана Рукн ад-Дина и не убоялася еси похвальбы мучителей, но теплою молитвою вручила еси Сослана Давида и воинство его Вардзийской Богородице и, изувшися, с потоками слез провождала еси воинство к Басиани; и дондеже достигоша, взошла еси на высочайший холм и благословила еси знамя победоносное и воинство непобедимое; тако и ныне подвизаем тя на ходатайство к Богу, да не оскудеет в земли нашей владычество сродников твоих, благословенных и миропомазанных, и сице поем тебе, просвещенной и всехвальной:
Радуйся, сладчайшими устнами живую воду источающая; радуйся, заблудших и падших абие возставляющая; радуйся, жертвенники низлагающая и идолы с корением исторгающая; радуйся, всякия злыя нравы и пороки изглаждающая; радуйся, христолюбивое воинство возвышающая; радуйся, верных любящая и двоедушных смиряющая; радуйся, на высоких скалах и во святых оных местех церкви и монастыри созидающая; радуйся, неприступныя врагом и непоборимыя столпы и грады-крепости воздвигающая; радуйся, огрубевших сердцем к любви подвизающая; радуйся, свеще, разумных просвещающая и безумных попаляющая; радуйся, потоком слез твоих безчисленныя враги потопляющая; радуйся, непрестанною молитвою брани без брани разрушающая; Радуйся, святая благоверная царице Тамаро!
О сила человеколюбиваго Бога, Иже милостиво призре на теплую молитву твою и безбожныя варвары и неверныя агаряны смири под ноги христиан, царство же твое неприкосновенно сохрани от ополчений и нашествия врагов, и, слезами облиянная, благодарение приносила еси Богу; Того моли, да даст нам премудрость и твердость попрати козни вражия, да не рекут ненавидящии нас: где есть Бог их, на Негоже уповаша? — и да хвалим Укрепляющаго тя: Аллилуиа.
Десница Вышняго помогаше тебе, мужественная державнице, и явны творяше дивныя победы на враги, воздвигшияся на тя, ибо сам той беззаконный слуга султанов с трепетом вопияше, како Архангел сотвори победу над ними; тогда страх и ужас святыни твоея нападе на цари и многия народы, яко держава непреоборимыя владычицы; с нимиже и мы умиленно припадаем ко честней иконе Михаила Архангела и приносим тебе благодарственную похвалу:
Радуйся, вдовство твое, подобно Анне пророчице, с благоговением сохранившая; радуйся, любви к отечеству учительнице; радуйся, дела отцев и дедов добре управляющая; радуйся, православныя полки мужественны творящая и милующая; радуйся, упованием твердым злобу противников погубляющая; радуйся, христоненавистным агаряном ужас наводящая и победительнице; радуйся, пресветлая возобновительнице победы Давидовы; радуйся, знамя Горгасала и Давида паче возвысившая; радуйся, ближних соединительнице и врагов поразительнице; радуйся, братоненавистников и корыстолюбцев обличительнице и крепко попирающая; радуйся, благоговейных жен благословляющая и скверных и безумных посрамляющая; радуйся, вся народы и племена, тебе вверенныя, возращающая; Радуйся, святая благоверная царице Тамаро!
Егда услышаша грузины об изнурении твоем от недугов, повсядневно моляхуся с усердием; но тщетно бысть всякое изыскание искусства врачей, ибо определение бе непреложно, и Призывающий стояше при дверех, яко недостойна бе не токмо Грузия, но и вся земли царствия твоего; сего ради на благодатное утешение и помощь, тобою подаваемую, уповаем и Божественное сие пение приносим Богу: Аллилуиа.
Язвами неисцельными, яко Иов, искушена была еси и, дрожащим гласом призвавши вельмож, пред иконою Господнею и Животворящим Крестом благословила еси их и молила еси всех, да присно пребывают во благих, поминающе тя; благодаря же Христа, вручила еси Ему царство и непорочную душу твою и присоединилася еси к собору Ангелов; тогда многоподвижное тело твое погребоша в Гелати с обильным излиянием слез и, яко благословенней матери грузин, принесоша тебе сию благодарственную похвалу:
Радуйся, род таргамосиан во единомыслие, единодушие и единоволие связавшая; радуйся, на зловерных гнев наводящая и всех правоверных утешительнице; радуйся, землю твою процветшая и народ твой отрезвившая; радуйся, Божественным подвигом твоим безплотныя чины удивившая; радуйся, сияние христианских царей просветившая; радуйся, вместо преходящаго царствования свет непреходящий приявшая; радуйся, со святыми вселившаяся и венцем победы украшенная; радуйся, ко славному лику царей, о вере и земли подвизавшихся, приложенная; радуйся, на небесех и на земли возвеличенная; радуйся, к молящимся милостиво приклоняющаяся и о спасении нашем пекущаяся; радуйся, в сердцах боголюбивых благодатную радость распростирающая; радуйся, мужеством духа малодушным и разслабленным пример давшая; Радуйся, святая благоверная царице Тамаро!
Якоже избавила еси землю твою и весь православный народ от обстоящих искушений и исполнила еси радостию Божественною, тако и ныне низложи утеснителей наших, враждующих на многоподвижный народ твой, доселе смиренный и уничиженный, и ходатайством твоим избави нас от страстей душевных и недугов телесных, да, якоже ты, достойно и праведно послужим отечеству и славим Бога: Аллилуиа.
Ведуще множество ходатайств и милостей твоих, всецело себе предаем Божественному покрову твоему и молим тя: призри с небесе на наследие грузин и на живущий в нем православный народ наш, ибо безчисленнии врази, любящии смуту, воздвигоша на ны брань непрестанную, и не можем противостати им; но ты избави нас от сетей их ходатайством Богородицы, да не будем в попрание разорителем, иноплеменником и родом чуждым, и, силою духа твоею вооружени, отверзем уста пети тебе:
Радуйся, дщи дому Багратионов, еяже вверен бысть престол Давидов и печать Соломоня; радуйся, естеством кроткая и многомилостивая, прежде всех упразднившая смертную казнь и отсечение членов; радуйся, поборнице благочестия, научившая многих отцев и матерей чину супружества и мере благостыни; радуйся, ангеле хранителю царства твоего, сокрушившая всех врагов и бранников, приходящих искоренити язык и народ наш от жилищ его; радуйся, победою и одолением исполненная, посрамившая всех врагов Божиих; радуйся, дивнаго смирения делательнице, ибо Ангели, видевше тя воистину победительницу, удивляющеся, глаголаху: паде, паде враг от жены, и венценосец явися подвижник Христов; радуйся, о непорочности закона подвизавшаяся, еяже вместо честнаго онаго венца возложен бысть седмерицею честнейший венец небесный; радуйся, невесто Христова непобедимая, ибо, наслаждению райскому приобщившися, со Ангелы радуешися и царствуеши со Христом во веки; радуйся, красото пресветлаго лика царей, ибо и по смерти светлее солнечнаго круга светиши земли нашей; радуйся, богодухновенная подвижнице, ибо вожделенный гроб твой сокры Господь, якоже пророка и боговидца Моисея; радуйся, похвало народа твоего, по всей земли возгласившая глас победы грузин; радуйся, от картлосиан присно поминаемая, ибо не токмо народ твой, но и камение вопиет о славе твоей; Радуйся, святая благоверная царице Тамаро!
О в скиптродержателех преславнейшая и в женах добродетельнейшая, царице Тамаро, приими ныне пения сия наша и благочестивым дерзновением моли Христа Бога нашего, да избавит нас от всех скорбей и искушений и наставит нас, да не уклонимся от пути правды и не преступим заповедей Его, но по обычаю мужей отечества нашего возненавидим всякую ложь и корысть и вси купно поем Господу: Аллилуиа.
Сей кондак трижды, потом:
О, коликое величие стяжа тебе мужество твое, ублажаемая! Ибо и по смерти твоей подвигов твоих возвестительница есть ныне славная Вардзия, и велегласно проповедуют Метехи и Бетания о теплых молитвах твоих; мы же, ведуще множество ходатайств и милостей твоих, всецело себе предаем Божественному покрову твоему и, усердно повествующе о добродетели твоей, изрекаем похвалы твоя:
Радуйся, насаждение Иессеово, отрасле Давидова; радуйся, образе женскаго целомудрия; радуйся, процветшая ветвь святыни; радуйся, славо земли и веры; радуйся, неизследимая бездно любве; радуйся, Божественная трубо Православия; радуйся, неоскудный источниче милости и неисчерпаемое море человеколюбия; радуйся, благолепно возсиявшая истинная служительнице Спасова; радуйся, вождю и крестоносице народа твоего и помощнице Мессиина; радуйся, стено и утверждение Церкве Христовы; радуйся, сило и славо скипетра царей; радуйся, солнце явное, светило Иверии; Радуйся, святая благоверная царице Тамаро!
Величие твое кто повесть, о дивновысокая державнице? Ибо паче ума нашего вознесеся хвала добродетелей твоих; но, безчисленными искушеньми утесняеми, прибегаем ко святой иконе твоей и подвизаем тя к Богу помощницею и ходатаицею, да дарует нам победу на вся прелести и сподобит нас восхвалити и воспети тебе: Радуйся, святая благоверная царице Тамаро!
О богоугодным царствованием и делы подвига просиявшая жительнице горняго Иерусалима, святая Тамаро! Поборнице грузин и похвало жен, милостивая, безгневная, нищих предстательнице и падших скорая помощнице, ходатайством твоим скорбящих веселящая, и утверждение и сило прибегающих к тебе с верою!
О во святых славная и в женах благочестием просиявшая, всечудная царице Тамаро! Матерним твоим милосердием умилостиви о нас возлюбленнаго тобою сладчайшаго Иисуса, Бога нашего, да безмерною милостию Своею призрит на народ наш, жребий Матере Своея, носящий Крест Господень на земли, и сохранит от сети вражия и от вражды братий, веру же нашу к Нему паки обновит и возставит нам помазанника от корене Давидова, иже силою Креста оградит вкупе вся пределы Грузии и вознесет и возставит высоту и крепость нашу от земли забвения, да будем едино стадо и Господь да будет Пастырь наш. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан.
О воистину премудрая царице и мужественная подвижнице, венценосная Тамаро, славная! Паки воздвигни подвигом облеченныя руце твои к Царю Небесному, пред Нимже богосветлым венцем прославлена еси, ублажаемая, и испроси нам, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, святыя и благоверныя царицы Тамары и всех святых, помилуй нас. Аминь.
Автор-составитель: Тинатин Мчедлишвили
