Акафист святой великомученице Варваре
Избранная Богом от рода идолослужителей и призванная во языки святых, человеков обновление, Невесто Христова, яко тобою избавленнии от различных зол и обстояний, благодарственное пение и похвалу приносим тебе, молящиися тебе, святая и всехвальная великомученице; ты же, яко имущая дерзновение, от всяких напастей свободи нас, да с радостию зовем тебе: Радуйся, Варваро, Невесто Христова прекрасная.
Ангелом честную и вселюбезную чистоту непорочности сохранила еси, честная Варваро, и Ангелом сожительства сподобилася еси. С нимиже егда поеши Богу на небесех песнь Троическую, услыши и нас, поющих тебе на земли хвалебныя песни сия:
Радуйся, отроковице, от Бога Отца предуготованная подобострастна страданием Сына Его. Радуйся, от Сына Божия, Света от Светов, из тьмы в дивный свет веры и благости Его призванная. Радуйся, яко по призвавшему тя Святому Духу сама еси свята плотию и духом. Радуйся, яко от скверны плоти и духа неприкосновенна соблюдена еси. Радуйся, яко честно обручилася еси, дева, Рождшемуся от Девы Жениху Христу. Радуйся, яко не возлюбила еси земнаго обручника паче Небеснаго. Радуйся, крине девства, среди терний идолослужения на поле прозябший. Радуйся, цвете чистоты, в неувядаемей славе горе процветший. Радуйся, в горнем саду Христовым благоуханием наслаждающаяся. Радуйся, Краснейшаго паче сынов человеческих тамо зрением утешаемая. Радуйся, одежду свою на земли убелившая. Радуйся, в лице дев Агнцу Божию на небеси последовавшая. Радуйся, Варваро, Невесто Христова прекрасная.
Видящи святая Варвара себе на высоцем столпе, от отца созданнем, мняше себе мановением Божиим на небо возведену, понеже положи в сердце своем разумное восхождение от тьмы ко свету, и, от лестных идол к Богу истинному умом вознесшися, пояше Ему: Аллилуиа.
Разума непостижимаго единаго всех тварей Творца уразумети ищущи, Дево святая Варваро, помышляла еси в себе, глаголющи: како возможно есть от темных идол создатися дивным светилом небесным? И сама отвещала еси словом псалмопевца: вси бози языков бесове, един же есть Бог и Господь, Иже сотвори небеса и вся светила их. Таковой премудрости твоей удивляющеся, вопием тебе:
Радуйся, паче старцев идолослужителей разумнейшая. Радуйся, паче мудрых века сего премудрейшая. Радуйся, яко тебе явил есть Бог безвестная и тайная премудрости Своея. Радуйся, яко Сам Бог Слово научил тя есть истинному богословию. Радуйся, всех звездочетцев умом Христовым превзошедшая. Радуйся, явственнее всех оных небесных сводов испытательнице. Радуйся, яко в твари, яко в зерцале, Самаго Творца узрела еси. Радуйся, яко в сотворенных светилах уразумела еси Свет несозданный. Радуйся, ныне без зерцала зрящая на небеси свет лица Божия. Радуйся, светом оным неизреченно веселящаяся. Радуйся, звездо разумная, еяже просвещением лице Божие, яко солнце, светло нам является. Радуйся, луно разума, еюже нощь заблуждения, яко день, просвещается. Радуйся, Варваро, Невесто Христова прекрасная.
Сила Вышняго даяшеся тогда святей Варваре, якоже древле пророку Иезекиилю, во образ адаманта крепка пред всеми идолослужители, да не убоится от зверообразных лиц их и да не ужаснется от лютаго запрещения; сего ради дерзновенно вопияше мудрая дева: в Троице чту едино Божество и, с верою покланяющися, пою громогласно: Аллилуиа.
Имущи в себе святая Варвара свыше дарованную премудрость, взыде к зиждущим отчую баню и, являющи им таинство Святыя Троицы, повеле сотворити три окна в бани. Аще, рече, идолослужители умолкнут и не рекут славы Бога истиннаго, тогда стены бани сея, треоконныя, яко трилицыя, да свидетельствуют, яко един есть Бог во Святей Троице, от всех тварей славимый и покланяемый. Таковаго ради мудрования, святая Варваро, приими похвалу сию:
Радуйся, в купели треоконныя бани святым крещением во имя Пресвятыя Троицы омовенная. Радуйся, в купели воды и Духа, и кровию подвига твоего измытая. Радуйся, яко треми окны прогнала еси тьму многобожия, Святей Троице противную. Радуйся, яко треми окны узрела еси явственно свет Троицы. Радуйся, яко треми оными окны призре на тя Солнце правды, тридневно возсиявшее из гроба. Радуйся, яко теми возсия тебе день жизни Троический. Радуйся, присно имущая сердце твое отверсто к Единому в Троице славимому Богу. Радуйся, крепко заключившая чувства твоя пред воюющими трема враги: плотию, миром и диаволом. Радуйся, яко сотворила еси в душе твоей три окна разумная: веры, надежды и любве. Радуйся, яко треми оными окны с Троическим Божеством узрела еси и Церковь тела тридневно возставшаго Христа. Радуйся, яко отверзошася тебе небеса треми чиноначалии ангельскими. Радуйся, яко с веселием прият тя горний чертог Троический. Радуйся, Варваро, Невесто Христова прекрасная.
Буря велия ярости отца твоего, убийственными прещеньми дышащаго, воздвижеся на храмину души твоея, святая Варваро, но не возможе поколебати ю, понеже основана бяше на твердем камени веры Христовы; ты же, мудрая дево, на нем непоколебимо стоящи, укрепляющему тя Иисусу Христу пела еси песнь: Аллилуиа.
Слышав от тебе, мудрая дево, отец твой Диоскор неслыханная о Святей Троице словеса, яко аспид глухий, затыкаше уши своя и, подобно змию ядовитоязычному, устремися острым мечем умертвити тя; ты же, Невесто Христова Варваро, подражающи Жениху твоему Иисусу, от меча Иродова бежавшему, бежала еси от меча Диоскорова, хотящи обратити от ярости звероподобнаго сердца его к любви отеческой; мы же, избраннии, мудрое бегство твое почитаем сим:
Радуйся, блаженная, изгнанная правды ради из дому земнаго. Радуйся, о Христе богатая, лишенная богатства отча Христа ради. Радуйся, яко избрала еси нищету плотскую ради Царствия Небеснаго. Радуйся, яко уготовашася тебе сокровища вечных благ. Радуйся, агнице словесная, от злаго волка хищника к доброму Пастырю Христу прибегшая. Радуйся, во двор праведных овец Его, одесную стоящих, вшедшая. Радуйся, голубице незлобивая, от земнаго врана под покров небеснаго орла прилетевшая. Радуйся, под кровом крил Его и нам благий покров обретшая. Радуйся, горняго Отца дщи честная, яко от земнаго родителя гонима была еси безчестно на смерть. Радуйся, яко со славою приятая еси от Безсмертнаго Господа в жизнь вечную. Радуйся, тояжде жизни и нам непрестанная ходатаице. Радуйся, усердная о нас к Богу молитвеннице. Радуйся, Варваро, Невесто Христова прекрасная.
Боготечней звезде подобна была еси, святая великомученице Варваро, бегущи пред отцем твоим и наставляющи его на таинственный путь, ведущий к правому пути, ко Христу Богу, от Девы возсиявшему, понеже ослеплен бяше душевным оком, сего ради и плотским не узре тебе, пред ним текущую; ты же, сквозь камень, пред тобою разселшийся повелением Божиим, прошедши гору, укрылася еси от очию его в пещере каменней, да в ней, яко птица, воздаси славу Богу, поющи: Аллилуиа.
Видевше тя пастырие, на верху горы овцы пасущии, в камени сокрываему, удивляющеся взываху, како словесная агница сия бежит от волка; и се, Диоскор, паче волка лютаго, со тщанием на гору взышед, тамо сокровенну обрете тя и, ем прекрасныя власы твоя, влечаше тя в дом свой жестоким путем, на немже с верою срящем тя гласом сим:
Радуйся, младой серне на горах благовонных уподобльшаяся. Радуйся, восхождение горнее в сердцы твоем положивши, паче дольняго возлюбившая. Радуйся, избавившаяся от рва пагубнаго идолослужения. Радуйся, на гору поклонения Троицы взошедшая. Радуйся, сквозь камень прошедшая, бежащи от гонения каменносердаго. Радуйся, в камени утвердившаго тя в камень Христов обретшая. Радуйся, в пещеру каменну вшедшая, еже зрети лежащаго во гробе каменном Иисуса. Радуйся, зрящая Господа, на престоле славы седящаго. Радуйся, яко власы главы твоея, Христа ради хранимии, и власы, от идолослужителя исторгнутии на землю, не погибнут. Радуйся, яко сии изочтени быша от Господа во увенчание на небеси. Радуйся, власы твоя, кровию обагренныя, яко цветы багряныя, по земли постлавшая. Радуйся, плетеныя власы твоя в венец злат себе изменившая. Радуйся, Варваро, Невесто Христова прекрасная.
Проповеднице богоносная, ревнительнице апостолов Христовых, дерзновенно проповедала еси Христа истиннаго Бога и за Него лютыя язвы, острыми черепы раздираема, мужественно претерпела еси, святая Варваро, яже в темнице, яко в чертозе, о Христе Иисусе веселилася еси, поющи Ему: Аллилуиа.
Возсиявый в сердце твоем свет истиннаго богопознания возсия и во очию твоею свет Божественнаго лица Своего Христос Господь, егда, яко возлюбленный Жених твой, прииде в темницу твою в полунощи к непорочней невесте Своей, с любовию призрев, язвы твоя исцели и сиянием лица Своего неизреченно возвесели душу твою; нас же, верных, научи пети тебе:
Радуйся, за биенаго Христа немилостиво биенная. Радуйся, терпением ран невидимаго врага уязвившая. Радуйся, язвы Господа твоего на плоти твоей приявшая. Радуйся, от всех язв плоти твоея Тем же Господем исцеленная. Радуйся, яко Сам Господь, Свет миру, в темнице явися тебе. Радуйся, яко Сам Врач душ и телес прииде к тебе, болящей. Радуйся, темницею земною в горний чертог светло вшедшая. Радуйся, кровьми твоими брачную себе одежду соткавшая. Радуйся, яко тобою грешнии от многих язв исцеляются. Радуйся, яко тобою от всяких недуг избавляются с верою призывающии тя. Радуйся, от уз греховных скоро разрешающая. Радуйся, язвы зело лютыя благо врачующая. Радуйся, Варваро, Невесто Христова прекрасная.
Хотящу безумному мучителю исполнити желание свое и паки покусившуся ласкательными словесы от истиннаго Бога отвратити тя, святая Варваро, ко лестным идолом, ты же, яко мудрая дева, отвещала еси ему: удобнее твердый адамант в воск претвориши, нежели мене отвратиши от Христа Бога моего, ибо Того со Отцем и Святым Духом единаго истиннаго Бога исповедую, хвалю и пою Ему: Аллилуиа.
Новую показа безчеловечную ярость звероподобный мучитель, егда повеле тебе, святая великомученице Варваро, на древе повешене быти, и когтьми железными плоть твою строгати, и свещами горящими ребра твоя опаляти, паки же млатами тяжкими главу твою бити. Сего ради преестественнаго терпения твоего благоговейно поминающе, ублажаем тя похвалами сими:
Радуйся, яко повешена была еси на древе ради Христа, на кресте распятаго. Радуйся, строгаемая по ребрам ради Иисуса, в ребра копием прободеннаго. Радуйся, яко огнь любве Божия в сердце твоем возжгла еси. Радуйся, яко того ради огненными свещами опаляема была еси. Радуйся, адаманта тверже, в терпении невредимая. Радуйся, каменнаго столпа крепчайшая, в мужестве непоколебимая. Радуйся, яко бьющии млатом по главе твоей венец царствия тебе содеяша. Радуйся, яко темже млатом сокрушила еси главу врага твоего. Радуйся, яко со Христом пострадала еси Его ради на земли. Радуйся, яко с Ним и Его ради прославилася еси на небеси. Радуйся, всех врагов наших крепко побеждающая. Радуйся, во всех бедах наших скорая помощнице. Радуйся, Варваро, Невесто Христова прекрасная.
Странное и страшное страдание святыя Варвары видевши, благочестивая в женах Иулиания удивися зело, како мужественно терпит Христа ради таковыя муки юная отроковица в юном теле, и, исполнившися слез умиления, возопи и та благодарственно ко Христу Богу: Аллилуиа.
Всесладчайшая сладость Иисус бысть всежеланна тебе, святая Варваро, ибо Того ради претерпела еси горькия муки, глаголющи: чашу страданий, юже даде ми возлюбленный Жених мой, не имам ли пити ю? Сама же явилася еси чашею, сладость дивных исцелений источающею всем, вопиющим тебе сице:
Радуйся, горесть идолов в горе адстей отвергшая. Радуйся, горния сладости Иисусовы возлюбившая. Радуйся, стамно разумная, вместо манны творение воли Божия в себе имущая. Радуйся, благое желание верных исполняющая. Радуйся, реко, исполненная водами благости Божия. Радуйся, источниче, кипящия чудеса источающий. Радуйся, яко пчела, отлетевшая от смраднаго дыма жертв идольских. Радуйся, в благоухание мира Христова сладкоуханно прибегшая. Радуйся, яко язвами плоти твоея уподобилася еси сотом. Радуйся, яко капли крове твоея паче меда сладчайшия бяху всесладчайшему Иисусу. Радуйся, яко всем верным память твоя всесладостна есть. Радуйся, яко всей Церкви Христовой имя твое честнейшее есть. Радуйся, Варваро, Невесто Христова прекрасная.
Всякое естество ангельское веселяшеся великим веселием, видя мужественную силу твою, святая и непобедимая мученице Варваро. Чин же ангельский, зря древняго врага, гордейшаго князя тьмы, со всем бесовством его и лики идольскими, от тебе единыя юныя девы поруганна, побеждена и под ноги твоя поверженна, высоким гласом вопияше Богу: Аллилуиа.
Риторы многовещаннии красноречивым языком своим не могут изрещи величия болезненных страданий твоих, о Варваро; кто бо изречет множество болезней твоих, егда отрезаша сосцы твоя; кто изглаголет срамоту девическаго лица, егда обнажена по всему граду водима была еси. Таковыя болезни и безчестия твоя поминающе, ужасаемся и умильно вопием сице:
Радуйся, благолетная отрасле вертограда Иисусова. Радуйся, истинная лозо винограда Христова. Радуйся, два отрезанныя сосцы твоя, яко два грозда, в честь Господа твоего принесшая. Радуйся, кровь твою, яко вино умиления, от них источившая. Радуйся, яко обнаженнаго Христа ради и ты обнажена была еси. Радуйся, яко Его ради, во Иерусалиме с поруганием водимаго, и ты водима была еси по граду с поношением. Радуйся, от Ангелов светлою одеждою в наготе твоей облеченная. Радуйся, тою невидимо от безстудных очес покрытая. Радуйся, дивное Ангелом и человеком бывшее зрелище. Радуйся, и самых мучителей терпением твоим удививая. Радуйся, яко Сам Господь свыше призре на страдания твоя. Радуйся, яко Сам Той, Подвигоположник, похвали подвиги твоя. Радуйся, Варваро, Невесто Христова прекрасная.
Спасения души твоея хотящи, не пеклася еси о плоти твоей отнюд, святая Варваро. Егда же изыде на смерть мечем осуждение твое, тогда под острый меч, яко под красный венец, с радостию текущи, Богу, укрепляющему тя в мученическом подвизе, пела еси песнь: Аллилуиа.
Стен каменных тверже окаменелое сердце Диоскора, святая Варваро, уже не родителя твоего, но лютаго мучителя, иже, слышав осуждение твое на смерть мечем, не токмо не умилися мало о смерти твоей, но сам мечем своим на месте казни усекну святую главу твою; и тако, по предречению Господню, окаянный отец предаде на смерть чадо свое; сего ради в блаженней кончине твоей приими убо от нас пения сия:
Радуйся, за Главу Церкве Христа главу твою под меч приклонившая. Радуйся, любве ради к горнему Человеколюбцу, безсмертному Отцу, от земнаго безчеловечнаго отца на смерть тленную преданная. Радуйся, течение подвижническаго пути добре совершившая. Радуйся, веру безсмертнаго Обручника Христа до смерти мужественно соблюдшая. Радуйся, свыше силою препоясанная на брань противу сил преисподних. Радуйся, победоносною славою горних от Христа Победителя облеченная. Радуйся, оружием добродетели Божия на земли увенчанная. Радуйся, цветом нетления на небесех украшенная. Радуйся, дев доброто и наслаждение. Радуйся, мучеников красото и радосте. Радуйся, христиан крепкое утверждение. Радуйся, верных твердое заступление. Радуйся, Варваро, Невесто Христова прекрасная.
Пение наше хвалебное, аще бы и многочисленно было, вемы, яко не довлеет достойно восхвалити тя, святая и всехвальная мученице Варваро; мы же, благодаряще за подаваемая нам тобою богатно дарования Божия, Богу, в благодеяниих Своих дивно прославляемому в тебе, благодарственными устнами поем: Аллилуиа.
Светоприемную свещу на небесех пред престолом Святыя Троицы стоящую зрим тя оком разума, святая дево Варваро, оттуду же тьму нощи грехов наших озаряеши лучами молитв твоих и наставляеши нас на светлую стезю спасения, сего ради по долгу достойна еси от нас сицевым воззванием почитаема быти:
Радуйся, светоумное сияние, со Светом Незаходимым соединенное. Радуйся, заре разума, возшедшая на осияние дне невечерняго. Радуйся, миро благовонное, Церковь Христову облагоухающее. Радуйся, кадильнице златая, фимиам молитв о нас к Богу возносящая. Радуйся, миро неоскудное во исцеления положившая. Радуйся, сокровище неистощимое даров Божиих. Радуйся, сосуде, почерпающий радость от богатства дому Божия. Радуйся, чаше, приемлющая вся сладости небесныя от исполнения Христова. Радуйся, адаманте, печатию безсмертия украшенный, со Христом Обручником. Радуйся, добротою вечною в руце Господни держимая. Радуйся, яко Царь славы, Господь сил, возложи на тя славу и великолепие. Радуйся, яко Царь царствующих и Господь господствующих дарова тебе Царство Свое и господство. Радуйся, Варваро, Невесто Христова прекрасная.
Благодать дадеся тебе от Бога хранити и покрывати от внезапныя болезни и напрасныя смерти всякаго человека, с верою, любовию и благоговением честное страдание твое поминающаго и почитающаго; не лиши и нас благодати тоя, благая дево Варваро, да мы, мирно пребывающе плотию и духом в житии настоящем и будущем, поем о тебе Богу: Аллилуиа.
Воспеваем крепкий подвиг твой, почитаем страдание, хвалим терпение, ублажаем святую кончину твою, величаем в немощней плоти твоей явленное непобедимое мужество, имже прославилася еси на земли и на небеси, святая и добропобедная великомученице Варваро; в честь же победоносных подвигов и страданий твоих приносим тебе похвалу сию:
Радуйся, от чинов ангельских в сожительство их с любовию приятая. Радуйся, от ликов девических в чертоги небесныя с радостию введенная. Радуйся, от полков мученических под венец славы гласом радостным препровожденная. Радуйся, от всех живущих на небеси целование о Господе приемлющая. Радуйся, яко мзда твоя многа на небесех. Радуйся, яко радость твоя вечна во свете святых. Радуйся, от врагов видимых и невидимых крепкая наша заступнице. Радуйся, радости, благодати и славы нам вечныя ходатаице. Радуйся, недугов наших душевных и телесных врачевнице. Радуйся, спасительных благ земных и небесных подательнице. Радуйся, яко тобою надеемся избавления от смерти вечныя. Радуйся, яко тобою благою надеждою чаем сподобитися жизни вечныя. Радуйся, Варваро, Невесто Христова прекрасная.
О многострадальная и всехвальная святая великомученице Варваро, приими настоящее моление наше, избави нас от всех душевных и телесных недугов, и от врагов видимых и невидимых, и от вечныя муки богоугодным твоим предстательством сохрани, да с тобою на земли живых во веки поем Богу: Аллилуиа. (Трижды)
Ангелом честную и вселюбезную чистоту непорочности сохранила еси, честная Варваро, и Ангелом сожительства сподобилася еси. С нимиже егда поеши Богу на небесех песнь Троическую, услыши и нас, поющих тебе на земли хвалебныя песни сия:
Радуйся, отроковице, от Бога Отца предуготованная подобострастна страданием Сына Его. Радуйся, от Сына Божия, Света от Светов, из тьмы в дивный свет веры и благости Его призванная. Радуйся, яко по призвавшему тя Святому Духу сама еси свята плотию и духом. Радуйся, яко от скверны плоти и духа неприкосновенна соблюдена еси. Радуйся, яко честно обручилася еси, дева, Рождшемуся от Девы Жениху Христу. Радуйся, яко не возлюбила еси земнаго обручника паче Небеснаго. Радуйся, крине девства, среди терний идолослужения на поле прозябший. Радуйся, цвете чистоты, в неувядаемей славе горе процветший. Радуйся, в горнем саду Христовым благоуханием наслаждающаяся. Радуйся, Краснейшаго паче сынов человеческих тамо зрением утешаемая. Радуйся, одежду свою на земли убелившая. Радуйся, в лице дев Агнцу Божию на небеси последовавшая. Радуйся, Варваро, Невесто Христова прекрасная.
Избранная Богом от рода идолослужителей и призванная во языки святых, человеков обновление, Невесто Христова, яко тобою избавленнии от различных зол и обстояний, благодарственное пение и похвалу приносим тебе, молящиися тебе, святая и всехвальная великомученице; ты же, яко имущая дерзновение, от всяких напастей свободи нас, да с радостию зовем тебе: Радуйся, Варваро, Невесто Христова прекрасная.
Святая славная и всехвальная великомученице Христова Варваро, собраннии днесь во Божественный храм твой людие, и раку мощей твоих почитающии и с любовию лобызающии, страдания же твоя мученическая и в них Самаго Подвигоположника Христа, даровавшаго тебе не токмо еже веровати в Него, но и еже по Нем страдати, похвалами ублажающии, молим тя, известную желания нашего Ходатаицу: моли с нами и о нас, умоляемаго от Своего благоутробия Бога, да милостивно услышит нас, просящих Его благостыни, и да не оставит всех ко спасению и жизни полезных прошений наших, и христианскую кончину животу нашему безболезненну, непостыдну, мирну, Божественных Таин причащением дарует, и всем на всяком месте, во всякой скорби и обстоянии требующим Его человеколюбия и помощи, велию Свою милость подаст, да благодатию Божиею и теплым твоим заступлением, душею и телом всегда здравствующе, славим дивнаго во святых Своих Бога Израилева, не удаляющаго помощи Своея от нас всегда, ныне и присно и во веки веков. Аминь.
Всемудрая и всекрасная святая великомученице Христова Варваро, блаженна еси, яко всекротчайшую премудрость Божию не плоть и кровь яви тебе, но Сам Бог, Отец Небесный, Иже прият тя за веру, от неверующаго отца оставленную, отчужденную и убиенную, в дщерь Себе возлюбленную. Вместо тленнаго земнаго наследия нетление плоти дарова тебе, труды мученичества претвори в покой горняго Царствия. Временную жизнь твою, смертию за Него сокращенную, прослави такою честию, яко душу соедини с небесными чинами духов, тело же, на земли во храмех ангельских лежащее, повеле Ангелом хранити всецело, честно и многочудесно.
Блаженна еси, Христу Сыну Божию, горнему Жениху, обручившаяся Дево, Егоже желающи всеми добротами украситися подвизалася еси, всеми страданиями, ранами, отсечением членов и самыя главы усечением, яко украшением драгоценнейшим, тщащися украсити себе, да тако, яко жена верная главы своея Христа Мужа, духом и телом неразлучно соединившися, реклабы: обретох, Егоже возлюби душа моя, удержах Его и не оставлю Его.
Блаженна еси, яко почи на тебе Дух Святый, Имже духовная духовне научилася еси разсуждати. Всякаго духа злобы во идолех отвергла еси, яко губителя, и единаго Бога Духа ведущи, яко истинная поклонница, духом и истиною покланялася еси, пророчески взывающи: Троицу чту, едино Божество. Сию Святую Троицу, юже прославила еси в животе и смерти, моли о мне, Предстательнице моя, да и аз троичною верою, любовию и надеждою, тоюжде благодеятельностию прославляю Святую Троицу. Имам светильник веры, но праздный елея добрых дел. Ты, мудрая Дево, кровию подвига плоти твоея исполненная и ранами источающая, яко светильник имущая, даждь ми от елея твоего, да им светильник души моея украсив, сподоблюся по тебе внити в горний чертог. Пришлец есмь и преходящий на земли, якоже вси отцы мои. Сокровище вечных благ и блаженная, причастнице вечери в Царствии Небеснем, якоже в странствии жизни, тако и во исходе от мира, к трапезе Божественнаго угощения сподоби мя вожделеннаго спутешествия, и егда последним сном смертным начну засыпати, коснися тогда немощней плоти моей, якоже иногда Ангел Илии, глаголя: востани, яждь и пий; да, благодатию Божиею Тела и Крове Таинствы укрепився, пройду в крепости ядения сего путь долгий смертный до горы небесныя, и тамо, юже узрела еси прежде треми окны бани верою Божиею, Троицу, купно с тобою сподоблюся видети лицем к лицу и славити Ю в безконечныя веки. Аминь.
