Акафист святым тринадцати сирийским отцам
Во имя Отца и Сына и Святаго Духа. Аминь.
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды, с тремя малыми поклонами)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся и припадем Цареви нашему Богу. (Поклон) Приидите, поклонимся и припадем Христу, Цареви нашему Богу. (Поклон) Приидите, поклонимся и припадем Самому Христу, Цареви и Богу нашему. (Поклон)
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Словом Божиим препоясаннии победоноснии подвижницы, радостную память вашу празднующии, вам, избранныя свободы глашатаем, сице поем: Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Первых оных великих иноков сокровни, потоки безбожия богоучением изсушисте и в пещи искушений оросисте нас потоки наслаждения; сего ради подвизаются органы умов наших возгласити вам сице:
Радуйся, двенадесяти учеников твоих наставниче непогрешительный и Зедазнийское око, горе зримое, Иоанне; радуйся, Некресская зарю, Авиве; радуйся, уединением ко множеству святых приложенный Антоние; радуйся, пустыню Гареджийскую во градоподобное обиталище претворивый Давиде; радуйся, Икалтойская красото, Зеноне; радуйся, Степанцминдское мужество, Фаддее; радуйся, Цилканское благогласие, Исе; радуйся, Алавердское окрыление, Иосифе; радуйся, Самтависское блистание, Исидоре; радуйся, Улумбийская светлосте, Михаиле; радуйся, Бретская свирель доброгласная, Пире; радуйся, Хирсский отче Божественный, Стефане; радуйся, из пещеры на небеса возшедый Шио; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Ненасытимыя вечери брачницы и чаши премудрости наполнителие, от грезнов ваших изстисся сладость непреходящия жизни: Аллилуиа.
Вольному смирению последовавшии, к неоскудному сокровищу ревнующии, вас, Божественнаго течения учителей, сице величаем:
Радуйтеся, ведением света поживше; радуйтеся, Царствия проповедницы; радуйтеся, апостольскаго слова истолкователие; радуйтеся, невидимых браней воини; радуйтеся, спасительных дарований сокровищницы; радуйтеся, добродетелей делателие; радуйтеся, скрижали закона; радуйтеся, повапленных словесных гробов разрушителие; радуйтеся, мук наших угасителие; радуйтеся, образи самовластия; радуйтеся, яко ниже в лыстех мужеских благоволит Господь; радуйтеся, яко благоволит Господь в боящихся Его и в уповающих на милость Его; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Огненному столпу пригвожденный Симеон из бездн добродетелей воззва вас, светло сияющих для Иверии: Аллилуиа.
Единаго Божества певцы и правыя веры трубы, к нимже добре взывают пустыни, подражающе таковым псалмопевцем, и мы славословим:
Радуйтеся, столпи веры; радуйтеся, на живом камени созданнии храми; радуйтеся, простоты соборы пространнейшии; радуйтеся, истиннаго уединения явителие; радуйтеся, высокаго луга пчелы; радуйтеся, Божественных видений сподобльшиися; радуйтеся, неоскудныя сладости; радуйтеся, неохладевающая теплото; радуйтеся, со святыми радующиися; радуйтеся, плачущих утешителие; радуйтеся, благодатнаго слова повествователие; радуйтеся, отцы чудотворцы; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Псалмы и песньми лютыя пустыни украсившии, на небесех запечатлешася украшения добраго подвига вашего: Аллилуиа.
Отцы вожделеннии и делателие трудных нив, ихже Божественныя жатвы, днесь приспевшия, приобщаемся, неоскудныя трапезы искателие, вас, нетленныя чаши богоданных виночерпцев, сице величаем:
Радуйтеся, плотию изнуреннии; радуйтеся, духом просветившиися; радуйтеся, от младенчества вашего богоносии; радуйтеся, желанием Христовым воспитаннии; радуйтеся, сосуди Божии; радуйтеся, уз наших разрешителие; радуйтеся, от сетей ноги наша избавляющии; радуйтеся, от небес истекающая благоухания; радуйтеся, неплодных чадородие; радуйтеся, плененных свобода; радуйтеся, падших возстание; радуйтеся, недугующих исцеление; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Духовных крастел произрастителие и восхождения на небо глаголницы, хлебом словесным насытите нас, гладом века сего утесненных: Аллилуиа.
Чаемых сокровищ предвозвестницы, иже повсядневно просвещаете чувства наша, со страхом и любовию на похвалу вам собраннии, сице вам возглашаем:
Радуйтеся, высокаго жития достигшии; радуйтеся, Божественным умом возрастшии; радуйтеся, зноем пустынь опаленнии; радуйтеся, памятию Иисусовою прохлажденнии; радуйтеся, Духом Святым глаголющии; радуйтеся, чина естества победителие; радуйтеся, на воздусе блаженства взлетевшии; радуйтеся, грезни горняго винограда; радуйтеся, светлостию вашею паче солнечнаго света вознесеннии; радуйтеся, всего мира радости; радуйтеся, иже пением, яко млеком, возпитастеся; радуйтеся, иже лютостей воздушных превыше бысте; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Се, христиане, мудрыя девы, на сретение Жениха уготованныя, ихже ради не престанем глаголати: Аллилуиа.
Божественных дарований жилища и невечерния славы причастницы, превосходный оный свет по силе нашей ощущающии, сице вам возглашаем:
Радуйтеся, в пещь подвига волею вшедшии; радуйтеся, в пещи оной благодатию Божиею оросившиися; радуйтеся, иноцы богословцы; радуйтеся, пустынь процветания; радуйтеся, рудницы благословения; радуйтеся, Пасхи Церкве; радуйтеся, первых оных пустынножителей сокелейницы; радуйтеся, праздницы непреходящии; радуйтеся, добродетели врата отверстая; радуйтеся, многих душ утвердителие; радуйтеся, оружия христиан; радуйтеся, присноблаженнии подвижницы; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Божественным плачем блаженным, ихже плодоносящую духовную нищету ныне на земли сокровищствуют смирения кимвалницы, немолчным гласом вопием: Аллилуиа.
Неиспытанных высот рачителие и сонасаждении во Христе, ваших простерших ветви насаждений зрителие, сице величаем:
Радуйтеся, Божественнаго жития благовестницы; радуйтеся, Христовых таин изглаголателие; радуйтеся, благаго учения лимонари; радуйтеся, дивныя жатвы благочестия сокровищницы; радуйтеся, реки наслаждения; радуйтеся, умерщвленныя умы наша оживляющии; радуйтеся, безсловесных разумны творящии; радуйтеся, нивы слова жизни; радуйтеся, мятежных помыслов изгладителие; радуйтеся, посмеяний прелести обличителие; радуйтеся, яко отъясте тьму неведения; радуйтеся, яко мужественным подвигом отсекосте козни Велиаровы; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Концев мира свети, отверзите нам сии очи, тьмою века сего омраченныя, на видение Создателя: Аллилуиа.
Уста Божия, органы Духа Святаго, мы, победную песнь поющии горняго отечества мусикийцы, сице вам поем:
Радуйтеся, свирели богодохновенныя; радуйтеся, вверенных вам учителие; радуйтеся, Христова царствия глашатаи; радуйтеся, богоносных очеса; радуйтеся, на камени создании чертози; радуйтеся, Божественнаго духа добрии хранителие; радуйтеся, будущих ведущии; радуйтеся, иноческаго чина изъяснителие; радуйтеся, поприща ваша совершившии; радуйтеся, водами живыми исполненнии; радуйтеся, благодатию Божиею мучителя победившии; радуйтеся, мглы безбожия прогнавшии; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Огнем Духа терния мира попалившии, попалите и наших заблуждений терния погибельная: Аллилуиа.
Вечныя жизни наставницы, от нихже текут источницы жизни, насадите нас при исходищах вод духовных, богоучиненная насаждения, вопиющих сице:
Радуйтеся, Свете Тихаго служителие; радуйтеся, плодовитии и зеленеющии; радуйтеся, во многих телесех единый ум имущии; радуйтеся, всех виновных поручницы; радуйтеся, на ходатайство о нас подвигшиися; радуйтеся, повсядневно мученическим житием поживше; радуйтеся, нищетою обогатившиися; радуйтеся, босотою обувшиися; радуйтеся, имени Божия благословителие; радуйтеся, египетскаго мудрования разрушителие; радуйтеся, ихже мысленнаго солнца излиянием прейдохом нощь безбожия; радуйтеся, о нихже силы небесныя удивляются; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Ожесточенных умов наших Божественнии оратае, ныне на земли прозябоша зеленения, от подвигов ваших рожденная: Аллилуиа.
Небесным умом, благоуханием, из Царствия изшедшим, мы, святых Божиих славословцы, сице величаем:
Радуйтеся, дивнаго Победителя подражателие; радуйтеся, иерее Божественнии; радуйтеся, от младенчества Богу принесеннии; радуйтеся, на словесныя жертвы огнь свыше низводящии; радуйтеся, спасительныя дары богато приемшии; радуйтеся, добродетельми мир исполняющии; радуйтеся, делателие многоподвижнии; радуйтеся, Невесты Неневестныя певцы; радуйтеся, едиными усты и единым умом Бога славящии; радуйтеся, камени драгоценнии; радуйтеся, любомудрцы истиннии; радуйтеся, Духом Святым окрилившиися; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
С небесными силами сочтеннии и в невещественный свет приятии, не престаните о нас ходатайствовати к Богу, иже сице изрекаем славу: Аллилуиа.
Израильтяне истиннии и присно к Богу ощущающии, желанием горняго Иерусалима уязвите сердца наша, вопиющих сице:
Радуйтеся, первородству Царствия приобщившиися; радуйтеся, совершенною любовию очищеннии; радуйтеся, к таинственной вечери в причастие приятии; радуйтеся, радостныя вечери хлебодателие; радуйтеся, богопознанием наученнии; радуйтеся, умом вашим, яко безплотнии, летающии; радуйтеся, души наша от Египта изводящии; радуйтеся, шествия наша добре направляющии; радуйтеся, со христианы спутешественницы; радуйтеся, с Богом беседующии; радуйтеся, яко посрами Бог утесняющих вас; радуйтеся, яко изведе Господь, яко свет, правду вашу; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Любящаго праведника и милующаго грешники, Того Самаго молите о приятии малаго сего пения: Аллилуиа.
Великаго жития описателие и вожделенною кончиною преставльшиися, вам, пещер и гор неугасимым светом, помощи вашея требующии, сице возглашаем:
Радуйтеся, во плоти меры безплотных достигшии; радуйтеся, к Вышнему преставльшиися; радуйтеся, к лику Божественных отцев приложеннии; радуйтеся, на лонех Авраамлих упокоеннии; радуйтеся, горния земли жителие; радуйтеся, от Бога украшеннии; радуйтеся, девственницы Божественнии; радуйтеся, на вечная блаженства взирающии; радуйтеся, первыя оныя красоты образи; радуйтеся, от нихже многоразличным богатствам научихомся; радуйтеся, иже вместо преходящаго непреходящее купили есте; радуйтеся, яко ныне с вами веселится сподвигом с вами прославленный Илия диакон; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
О соли мира благословенная и агнцы закланнии, в неиспытанную бездну добродетели внидшии, отверзите устне наша на всякий день во славу Божию: Аллилуиа. (Сей кондак трижды.)
Первых оных великих иноков сокровни, потоки безбожия богоучением изсушисте и в пещи искушений оросисте нас потоки наслаждения; сего ради подвизаются органы умов наших возгласити вам сице:
Радуйся, двенадесяти учеников твоих наставниче непогрешительный и Зедазнийское око, горе зримое, Иоанне; радуйся, Некресская зарю, Авиве; радуйся, уединением ко множеству святых приложенный Антоние; радуйся, пустыню Гареджийскую во градоподобное обиталище претворивый Давиде; радуйся, Икалтойская красото, Зеноне; радуйся, Степанцминдское мужество, Фаддее; радуйся, Цилканское благогласие, Исе; радуйся, Алавердское окрыление, Иосифе; радуйся, Самтависское блистание, Исидоре; радуйся, Улумбийская светлосте, Михаиле; радуйся, Бретская свирель доброгласная, Пире; радуйся, Хирсский отче Божественный, Стефане; Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
Словом Божиим препоясаннии победоноснии подвижницы, радостную память вашу празднующии, вам, избранныя свободы глашатаем, сице поем: Радуйтеся, в пещерах тмочисленных, жаждущих спасения, напоителие и дивнаго иночества возвысившии стражи, святии тринадесяте сирийстии отцы!
О в пустынях храмы воздвигшии и Православия столпи непоколебимии, молитвою вашею просветите богохранимый народ наш и власть его, Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов, епископов, честных иереев, во Христе диаконов, весь монашеский чин и всех православных христиан.
О Богом украшеннии святии тринадесяте сирийстии отцы: Иоанне Зедазнийский, Авиве Некресский, Антоние Марткопский, Давиде Гареджийский, Зеноне Икалтойский, Фаддее Степанцминдский, Исе Цилканский, Иосифе Алавердский, Исидоре Самтависский, Михаиле Улумбийский, Пире Бретский, Стефане Хирсский и Шио Мгвимский! Нас, на пение вам подвигшихся и во храме Божием собравшихся, представите приемлющему кающихся и Спасителю Богу нашему, да, присно на благая взирающе, непрестанною хвалою славословим Его, непостижимаго и неизреченнаго Создателя всех, Отца и Сына и Святаго Духа, ныне и присно и во веки веков. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых, помилуй нас. Аминь.
Автор: протоиерей Михаил Галдава.
