Акафистное пение святителю Николаю, архиепископу Мир Ликийских, чудотворцу
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Якоже Христос Бог прият две лепте вдовицы, всесвященне Николае, тако приими и наше скудное сие пение, яко достойное нечто, и не возгнушайся нами, окаянными страстьми, ибо не дерзостию дерзнухом, блаженне, но с верою величаем тя и, яко иерею верному и святителю великому, между Богом и человеки ходатаю, сице вопием тебе: Радуйся, благодатию чудотворения украшенный, премудрый святителю, святый Николае!
Равноангельне на земли явлейся человече небесный, кто не удивится Божественной ревности твоей, или кто не воспоет Христа, даровавшаго тебе таковую силу, еюже даровался еси недугующим врачем и алчущим питателем, нищим, сиротам и падшим предстателем и теплым помощником сущим в скорбех и с верою поющим:
Радуйся, богопознанием вооруженный служителю Троицы; радуйся, всехвальный делателю Божественныя благодати; радуйся, от младенчества освященный учителю поста; радуйся, непоколебимый столпе веры; радуйся, правило правды и утешения; радуйся, непобедимый столпе смирения и образе кротости; радуйся, щите, хранящий благочестие; радуйся, мечу, отсекающий злочестие; радуйся, первопрестольниче и честный хранителю Мир Ликийских; радуйся, пастырю великий и просветителю всего мира; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Егда дарован был еси от Бога благословенным родителем твоим, яко вторый Самуил, помаза тя Божественным оным миром благодать Святаго Духа, и недуги родителей твоих всецело разреши и упраздни; ты же от младенчества был еси жилищем Божиим и, воздев руце, бодрствуя, славил еси Его в Божественной купели: Аллилуиа.
Видев святыню священства твоего Ведый тайная, помаза тя первым святителем Мирликийским и благодать исцеления и изгнания бесов дарова тебе; ты же силою Христовою попрал еси полки еретиков и стадо твое спасл еси от прелести их; ныне и нас не остави, святе, без помощи и избави от всякаго зла, да не впадем в сеть вражию и усердно восхвалим дела твоя, хвалы достойная:
Радуйся, благочестивых родителей плоде прекрасный, подобно Самуилу пророку от чрева матерня Господу принесенный; радуйся, отрасле боголепная, плодом безсмертия и насаждением подвига возрастшая; радуйся, дивный младенче, в среду и пяток млека матерня отрицаяйся; радуйся, умом простый и смиренный, духом просвещенный; радуйся, премудростию веры усовершенный; радуйся, тезоименитый победе, силою Божественною укрепленный; радуйся, множеством подвигов украшенный и трудами изнуренный; радуйся, на высоту добродетелей возшедый и милосердием твоим зело прославленный; радуйся, свете всесветлый, паче солнечнаго круга просиявый; радуйся, человече Божий и строителю таин Его, подобно великому Павлу до третияго небесе восхищенный и пред престолом Божиим представший; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Вооружен благодатию Духа, единосущие Пресвятыя Троицы православно научил еси на Соборе Никейском и губителя людей Господних Ария удавил еси жилою словес твоих, слияние же Савеллиево мужественно низложил еси и избавил еси верных от скверны их; сего ради хвалим тя, премудраго и святаго святителя, и поем Богу по учению твоему: Аллилуиа.
Бысть ревнитель и подвижник о вере, добре богословствуяй Николае, всецело подражатель апостолом явился еси, единосущна Отцу Сына проповедал еси и от ереси сохранил еси многия христолюбивыя люди; тако и ныне в земли нашей умножися сонмище злых, но ты разсей их, яко прах, ходатайством твоим низложи их и сохрани нас присно, поющих тебе:
Радуйся, невидимыя глубины Божественныя премудрости испытавый; радуйся, искушения диаволя и лютыя сети его постом и молитвою угасивый; радуйся, виновных к покаянию обращаяй и непокоривых прогоняяй; радуйся, неразумных умудряяй и от погибельных скверн очищаяй; радуйся, грехолюбивых человек сладости воздержания научаяй; радуйся, клятвы разрешителю и благословения подателю; радуйся, вдовиц предстателю и обидящим их воздаятелю; радуйся, нищих заступниче и нагих одеятелю; радуйся, злыя обычаи отсекаяй и скверну суеверия изглаждаяй; радуйся, всякое благонравие и богоугодное житие насаждаяй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Слышав хулу и лукавословие Ариево, возревновал еси ревностию Божественною, яко Илия, и врага единосущия дерзновенно ударил еси жезлом святительским; но не уразумеша отцы смотрения Божия и, сняв с тебе святительскую честь, видеша в Божественном видении, с какою любовию прият руку твою Всемилостивая Владычица и благослови тя Евангелием и омофором; тогда скоро возвратиша честь присному рабу Матере Божия и славу воздаша Единородному Сыну Ея: Аллилуиа.
Воистину святителем разумным и пастырем непорочным, благим явился еси, о богодухновенне Николае, и, ревностию Божественною распаляемь, разорил еси бездушныя оны храмы Артемидины и низложил еси жертвенники идолопоклонников; тако и ныне изглади лютыя кумиры ума нашего и разреши гнев, на ны воздвигнутый, да радуемся духом, отче, и силу твою крепкую вси хвалим:
Радуйся, богомудре, ревность благочестия по разуму стяжавый; радуйся, человеки к вере и благочинию приводяй; радуйся, пастырю добрый и бодрый, разсеянных овец собираяй; радуйся, бодренно и трезвенно жити научаяй; радуйся, по учению апостольскому мрак многобожия прогоняяй; радуйся, стадо твое от многообразных волн избавляяй; радуйся, дерзость зловерных упраздняяй; радуйся, умышления еретиков тщетна являяй; радуйся, иереев, во одеждах овчих пришедших, внутрь же сущих волков хищных, низлагаяй и разсеваяй; радуйся, ум освобождаяй и отроков вразумляяй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
О превыше человек вознесенный гражданине горняго Иерусалима, иже, яко пастыреначальник добрый, препитал еси град твой, гладом изнемогший, и укрепил еси немощныя благодатию исцелений твоих, ныне препитай и душу мою хлебом разумения и даждь ми шествие благообразное в мире сем, да не будем в поношение и посмех врагом нашим, но по обычаю мужей отечества нашего твердо и непоколебимо станем на пути заповедей Христовых и Трисвятым пением воспоем Троице единосущней: Аллилуиа.
Яко сладкий и милостивый отец, избавил еси три девы, хотящия пасти во грех, и покрыл еси от горькаго срама, егда дал еси убогому отцу их три узлы злата тайно; тако и ты буди нам поручитель и воздаятель пред Богом и облегчитель тяготы грехов, да скоро пробудимся, подобно ниневитяном, и сподобимся покаяния, иже с верою восхваляем тя:
Радуйся, человече, вожделение души; радуйся, истины проповедниче и тайноводителю боговидения; радуйся, сокровище Божественныя премудрости и богатство благодати; радуйся, глубокая бездно любве; радуйся, правило веры и поборниче благочестия; радуйся, громе Божественныя проповеди; радуйся, столпе непоколебимый терпения; радуйся, источниче неоскудный Православия; радуйся, правды помощниче и лжи непреклонный сокрушителю; радуйся, всесветлое светило всего мира; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Христа Избавителя верный ученик был еси, о дивный отченачальниче, и наставил еси стадо твое и люди в правой вере и сохранил еси их непорочны от ереси; тако и ныне избави мя от путей погибельных, преподобне Николае, и настави мя ко пристанищу Божественных заповедей, да радуюся с чинми небесными и присно славлю Создателя всех: Аллилуиа.
На благодатное тобою утешение и помощь уповаем, всеблаженне Николае, и тепле молим святыню твою: якоже в видениих возвестил еси царю Константину неповинную погибель мужей от Аблавия и повелел еси отпустити их, иже тобою Богу моляхуся, и осужденных избавил еси от смерти, тако и мене избави, святе, в день скорби, да, невредимо сохраненный, хвалюся и глаголю по силе нашей:
Радуйся, внутренних оных сокровенных страстей обличителю; радуйся, в сердцах боголюбивых благодатную радость распростираяй; радуйся, всепремудрый делателю, ищущих учения совершаяй; радуйся, во славу имене Христова требища бесовская низлагаяй; радуйся, неразумие волхвов и гадателей и скверная их призывания угашаяй; радуйся, окаменелая и жестокая сердца умягчаяй; радуйся, гордостию превознесшихся смиряяй; радуйся, образ жития христианских дев возвышаяй; радуйся, незлобивых отроков от всякия скверны и порока избавляяй; радуйся, без суда на смерть осужденных, дальних яко ближних, избавителю; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Высотою учений и чудес прославился еси во святителех и дивен во мучениках, добропобедный подвижниче, ибо даже до крове противостал еси еретиком и мучителем доброю волею и уязвил еси Велиара стрелою учений; стада же твоя, трудом собранная и духовно рожденная, смирением своим достигоша в меру велию и пением доброхвальным восхваляху тя, яко подражателя во всем Пастыреначальника Христа, и, подвигом твоим ободреннии, пояху силу Его: Аллилуиа.
Последовав Божественным делом апостольским, и престол их наследовал еси, яко святитель честный, и, благодать от Бога имея, всем, прибегающим под покров твой, подаеши исцеление и доброе исполнение прошений; ныне не престани о избавлении всех нас от обстоящих лютых скорбей и печалей и печаль нашу на радость претвори, да мы, усердно, святе, не умолкнем хвалити и пети тебе:
Радуйся, душу твою за стадо твое положивый; радуйся, поношение и укоризну Христа ради подъявый; радуйся, мрак темницы и муки мужественно претерпевый; радуйся, учителей лжезакония посрамивый; радуйся, к зрелищам небесным восхищенный и Божественныя славы зрителю; радуйся, со святыми в Царствии вселивыйся и о спасении нашем пекийся; радуйся, в келлиях возсылаемыя молитвы скоро услышаваяй; радуйся, к тебе прибегающия страждущия души приемляй; радуйся, в пристанище вечныя жизни мирно вводяй; радуйся, на осквернителей святыни и развратителей христианства гнев наводяй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Присно исцеления источающая рака твоя источаше миро благоухания и прославляше церковь Мирликийскую; ныне же радуется град Бар, идеже сокровенны суть мощи твоя мироточивыя, и с верою к ним прибегающим подаеши благодать исцелений и велию милость, да царие и князи со священники и людьми пением и пении духовными хвалят тя, законоположника искуснаго, и, подвигом твоим ободреннии, поют венчавшему тя Христу Богу: Аллилуиа.
Победителем и подвижником народа верных явился еси во искушениих и повсядневно веселил еси всех нищих и падших и утешал еси скорбящих; егда же вознесся еси от плоти к вожделенному тобою Богу, не оставил еси чтущих тя, но, иконами изображенный и молитвами поминаемый, творищи чудеса: милостию печешися на земли и на морях о дальних и ближних и от искушений избавляеши сущих в печалех и узах и тепле восхваляющих тя:
Радуйся, сосуде Святаго Духа и сокровище мира; радуйся, жилище благости и добродетели; радуйся, собеседниче Ангелов и гражданине небесный; радуйся, красото отцев и преподобных сподвижниче; радуйся, утешение иноков и доброто святителей; радуйся, умудрителю царей и соборов помощниче; радуйся, апостолов сообщниче и богатых по закону строителю; радуйся, всех верных непоколебимая стено; радуйся, благоговением добрым просиявый и сладости исполненный; радуйся, с ликами вышних сил пред Царем всех предстояй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Христос Бог, прославляяй прославляющих Его, прослави тя чудесы и в житии и по смерти и явил тя есть теплейшим избавителем всех призывающих тя; ныне помощию твоею исцели нас и в прелестех и в пещи скорбей окропи и нас росою благодати твоея, да сердце наше не будет хладно слышати Божественная учения и славити и пети Богу: Аллилуиа.
Множество чудес твоих, яко река многоводная, напаяет концы мира и подает нам утешение и мужество, ибо благодатию, от Господа тебе данною, скоро исцеляеши от многоразличных страстей душевных и телесных, от искушений избавляеши, тьму отгоняеши, волны утишаеши, страсти разрешаеши, алчущия насыщаеши и всякое богоугодное прошение исполняеши чтущим тя и с любовию поющим:
Радуйся, духовно жаждущих Божественным учением напаяяй; радуйся, гладом утесненных чудесно питаяй; радуйся, строптивость мучителей разрушаяй; радуйся, дерзость богоборцев низлагаяй; радуйся, от нападения и зол невидимых врагов покрываяй; радуйся, пещь скорбей и печалей угашаяй; радуйся, от козней лжи избавляяй; радуйся, свеще, разумных просвещающая и безумных попаляющая; радуйся, от веры уклонившихся и беззаконие творящих народоначальников и судей обличителю и неправедно гонимых от них милостивче; радуйся, неправедно собирающих и мамоне порабощенных посрамляяй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Явился еси миром благовонным, отче дивный, и чтущих тя облагоухал еси миром добродетелей твоих и разсеял еси злое зловоние неведения; тако и ныне суетную и тщетную веру сродников наших угаси и омый скверну неверия, да не впадем в сеть вражию и поем с благодарением Господу, дивно прославившему тя: Аллилуиа.
Из уст твоих источник благодати истече, меда слаждший, имже посрамил еси идолослужителей и еретиков и многих обратил еси на служение истинному Богу; тако и ныне и нам отверзи дверь разумения и даруй нам премудрость разсуждения добра и зла и даждь нам силу прощения, да, в меру совершенну добродетелию достигше, избежим сетей лукаваго и вси купно хвалим тя, яко наставника и утверждение православных:
Радуйся, блистанием чудес твоих Церковь Христову украшаяй; радуйся, благоуханием святых мощей твоих весь мир облагоухаваяй; радуйся, мраком печали одержимых просвещаяй; радуйся, многих добрых пастырей возсиявый; радуйся, утесненныя души скоро озаряяй; радуйся, многоразличныя сети вражия обличаяй; радуйся, лютыя скорби скоро прогоняяй; радуйся, одержимых сном лености ободряяй; радуйся, оскверненныя и многогрешныя души очищаяй; радуйся, сердца, волнами мира поколебанная, в благочестии утверждаяй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Обстояни многими враги и искушеньми, хвалами воспеваем высоту милостей твоих и молим тя, всесвятый Николае: недугующии — врача, скорбящии — избавителя, грешнии — ходатая, нищии — сокровище, печальнии — утешителя и плавающии — кормчаго; уповающии же на тя просим от тебе помощи и изрекаем Божественное пение: Аллилуиа.
Подателем исцелений и чудотворцем благодатию Духа возсиял еси всем верным и основание твердое положил еси желающим Божественнаго жития; ныне моли всех Милостиваго, да изведет достойныя делатели и подвижники на жатву Свою, во утверждение всех, да не оскудеет вера в возлюбленном народе нашем и, словом Божиим умудреннии, сподобимся пети тебе:
Радуйся, зарею знамений и чудес чтущих тя просвещаяй; радуйся, бесовскими искушеньми поколебанных утверждаяй; радуйся, праведных от уз и темницы освобождаяй; радуйся, к молящимся милостиво приклоняяйся и чтущих тя ободряяй; радуйся, зноем скорби и пещьми греха искушенных водою живою прохлаждаяй; радуйся, от духов нечистых страждущих исцеляяй; радуйся, князей тьмы губителю и злых победителю; радуйся, волхвов чародейство разрушаяй и насмешку их победою обличаяй; радуйся, восхваляющих тя неусыпный хранителю и покровителю; радуйся, в кораблех по морю плавающих мирно управляяй; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Ты, имеяй ходатайство ко Милостивому, отче, не остави нас без помощи, но вразуми власти и правителей наших, владеющих в сие время, и миром огради ходатайством Богородицы, да непреложным мужеством благо управляют жребием Ея — народом и землею нашею — и сподобятся хвалити и славити Благаго Сына Ея: Аллилуиа.
Хвалим тя, пастыря великаго и учителя всего мира, и умиленно просим от тебе: чудотворче Николае, якоже древле явился еси Божественным мановением и избавил еси от сетей вражиих с верою приходящих в храм твой, тако и ныне призри на с любовию лобызающих честную икону твою и умилостиви о нас Бога Благаго, да помилует род наш, доселе смиренный и уничиженный, и да низпослет мужество духа и чистоту сердца любящим тя и с любовию восхваляющим:
Радуйся, струе Божественнаго разумения и источниче, благодать источающий; радуйся, повестию жития твоего всех верных радости исполняяй; радуйся, чудес и знамений совершителю; радуйся, огрубевших сердцем к любви подвизаяй; радуйся, от сетей сатанинских и от нашествия иноплеменных покрываяй; радуйся, невидимых врагов попирателю и душетлителей низложителю; радуйся, волны искушений утишаяй и страсти утоляяй; радуйся, уста всех неверных заграждаяй; радуйся, от вражды между братиями и взаимныя ненависти избавляяй; радуйся, от греховнаго уклонения хранителю; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
О добролепием светозарный, великий святителю Николае! Ведуще множество ходатайств и милостей твоих, с любовию притекаем принести смиренная моления наша; ты же, яко имея дерзновение велие, помози нам и утоли движения невидимых и видимых страстей, да к невечернему свету Божию достигнем мы грешнии и с праведными поем Христу Богу: Аллилуиа.
Сей кондак рцы трижды, потом:
Равноангельне на земли явлейся человече небесный, кто не удивится Божественной ревности твоей, или кто не воспоет Христа, даровавшаго тебе таковую силу, еюже даровался еси недугующим врачем и алчущим питателем, нищим, сиротам и падшим предстателем и теплым помощником сущим в скорбех и с верою поющим:
Радуйся, богопознанием вооруженный служителю Троицы; радуйся, всехвальный делателю Божественныя благодати; радуйся, от младенчества освященный учителю поста; радуйся, непоколебимый столпе веры; радуйся, правило правды и утешения; радуйся, непобедимый столпе смирения и образе кротости; радуйся, щите, хранящий благочестие; радуйся, мечу, отсекающий злочестие; радуйся, первопрестольниче и честный хранителю Мир Ликийских; радуйся, пастырю великий и просветителю всего мира; радуйся, премудрый кормчие святыя Церкве Иверския и покровителю народа нашего; Радуйся, благодатию чудотворения украшенный, премудрый святителю, святый Николае!
Якоже Христос Бог прият две лепте вдовицы, всесвященне Николае, тако приими и наше скудное сие пение, яко достойное нечто, и не возгнушайся нами, окаянными страстьми, ибо не дерзостию дерзнухом, блаженне, но с верою величаем тя и, яко иерею верному и святителю великому, между Богом и человеки ходатаю, сице вопием тебе: Радуйся, благодатию чудотворения украшенный, премудрый святителю, святый Николае!
О всехвальный и знамении и чудесы украшенный, великий святителю Николае! Столпе и утверждение Церкве среди человек и светило всего мира, избранный служителю Святыя Троицы, приносителю словесных душ Небесному Отцу и скорый помощниче и заступниче всех безпомощных, отчаянных и тепле призывающих тя.
О пастырю достойный стад Христовых и отцев наставниче, чудотворче Николае! Отеческою милостию твоею умилостиви о нас Бога Благаго, да любовь Свою к нам и веру нашу к Нему паки обновит и даст нам Божественную ревность об отечестве, любовь к правде и мужество духа, да исполнит нас Божественнаго бодрствования и дарует нам чистоту жития и страх Божий. Моли, блаженне, возлюбленнаго тобою сладчайшаго Иисуса, да отвратит гнев, воздвигнутый на ны множества ради грехов наших, и милостиво призрит на народ наш, жребий Матере Своея, носящий Крест Господень на земли, и, яко Лазаря, да возставит отечество наше — Грузию — в первую славу, да не будем в попрание разорителем, иноплеменником и родом чуждым, ниже да рекут язычницы и еретицы: где есть Бог их, на Негоже уповаша? Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан.
О богомудрый архиепископе Мирликийский, святый Николае! Не престани тепле моляся ко Христу и испроси нам, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды).
Господи Иисусе Христе, Сыне Божий, молитвами Пречистыя Твоея Матере, святаго отца нашего Николая, архиепископа Мир Ликийских, чудотворца, и всех святых, помилуй нас. Аминь.
Автор-составитель: Тинатин Мчедлишвили
