Акафистное пение святому великомученику князю Бидзине и мученикам Шалве и Элизбару, эриставам Ксанским
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Несть никогоже, иже призывая вас в скорбех, не обрящет скораго утешения, воини Христовы непобедимии; сего ради, собравшеся, хвалим Создателя, даровавшаго вам таковая дарования, и приносим вам «радуйтеся», помощницы наша: Радуйтеся, непобедимии воини мученицы, Бидзино, Шалво и Элизбаре, достойно хвалимии!
Аще имена ваша, с верою поминаемая, Божественною силою явно исцеляют болезни, избавите нас, иже хвалами величаем вас, мученицы Господни, от недугов и болезней душевных и телесных и от всех страстей освободите, да по обычаю мужей отечества нашего присно хвалим святых мучеников и непрестанно восхваляем мужество ваше:
Радуйтеся, в делах человеческих непостыднии; радуйтеся, воинской храбрости учителие; радуйтеся, лучшее от худшаго и доброе от злаго разсуждающии; радуйтеся, любве ради отечества и верности ради народа себе предавшии; радуйтеся, воинство на брань со враги ободряющии; радуйтеся, духовное мужество иверов утверждающии; радуйтеся, народ наш от погибельнаго нерадения избавляющии; радуйтеся, огрубевших сердцем к любви подвизающии; радуйтеся, от ненависти между братиями избавляющии; радуйтеся, забывающим отечество свое и обычаи гнев наводящии; радуйтеся, народ грузинский во единомыслие, единодушие и единоволие связующии; радуйтеся, сущих во вражде и разделении любовию к отечеству утверждающии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Егда малый шах Аббас умысли от наследия всецело искоренити род грузинский и безчисленных татар с женами и детьми их всели от края до края Кахетии, тогда, аще и ниоткуду бяше способа избавления и помощи, Господь даде благий умысл Заалу, эриставу Арагвскому, брань и отмщение воздвигнути на шаха, и втайне призва вас, эриставов Ксанских Шалву и Элизбара и суфраджи Кахетинскаго Бидзину Чолокашвили; вы же скоро вооружисте мужественныя люди и взывали есте песнь победы: Аллилуиа.
Едиными усты и единым сердцем совещавающе, друзи добрии и мужие прекраснии, и бывше искуснии в воинском ополчении, укрепивше тушин и горцев, в нощь едину темну и безлунну втайне нападосте на стоящее в Бахтриони безчисленное воинство шахово и избисте всех мечем, ни единаго оставльше; сего ради ублажаем предусмотрение и победы ваша на персы и по силе нашей сплетаем вам похвалу:
Радуйтеся, народа вождие, от Бога данныя; радуйтеся, храбростию и доблестию во бранех избраннии; радуйтеся, упованием на Господа и мужественною крепостию вооруженнии; радуйтеся, оружием крестным огражденнии; радуйтеся, любовию к Богу, отечеству и ближнему во единомыслие связаннии; радуйтеся, Православием хвалящиися и пламеннейше за Христа себе предавшии; радуйтеся, народу, жребию Богородицы, во избавление и покров посланнии; радуйтеся, без суда немилостивой смерти предаденнии; радуйтеся, последования ради стопам Христовым многоразличными лютыми муками искушеннии; радуйтеся, за отечество жертвою принесеннии; радуйтеся, ко славному лику отцев, за веру и землю живот положивших, приложеннии; радуйтеся, древних земель и вод грузинских хранителие и стражие поставленнии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Всякою премудростию Строитель, провидев твердость ума вашего и любовь, юже имеясте к Нему, даде таковую помощь малым оным грузином, ибо победоносец Георгий на коне белем, яко молния, носяйся, предхождаше воинству вашему и низлагаше иноплеменники оны и обращаше вспять; сего ради благодарение и славу возсыласте Богу, слезы проливающе: Аллилуиа.
Помощию Пренепорочныя Владычицы нашея Богородицы и соратничеством великомученика Георгия мужественно ударисте на стоящих в Алаверди надменных кизилбашей, безчисленных избисте и возстависте победу грузином; тако и ныне, пред Богом с дерзновением предстояще, яко мученицы, испросите от Христа непоколебимое сохранение церквам, дарование Крестом победы народу нашему и твердость православным грузином, да, любовию к Богу и отечеству во единомыслие связаннии, присно ублажаем вас, воистину хвалы достойных:
Радуйтеся, мужеством врагов победителие и сопротивных сил низложителие; радуйтеся, во славу имене Христова неверным ужас наводящии; радуйтеся, меч крепкий подъявшии и изощренный меч персидский сокрушившии; радуйтеся, осквернителей храма Алавердскаго поразившии; радуйтеся, сокрушителей иконы святаго Георгия низложившии; радуйтеся, нераздельную любовь к Богу, отечеству и ближнему насадившии; радуйтеся, твердыню прелести разсекшии и злоумышления врагов прогнавшии; радуйтеся, христиан, от безбожных ужасшихся, духовно ободряющии; радуйтеся, от тяжкия скорби и плена избавляющии; радуйтеся, коварство беззаконных оных мучителей немощным показавшии; радуйтеся, разслабленный дух отечества оживляющии; радуйтеся, одоление и победу с небесе приявшии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Егда, победоноснии вождие народа, от врага упразднистеся, создасте разрушенныя храмы и украсисте и благолепны сотвористе церкви во славу Божию, весь же разсеянный народ он вселися паки на местех своих, и благодаряще вас непрестанно возсылаху к Богу молитву и славу; тако и ныне принесите моление наше Избавителю и испросите нам, да разсыплет безчисленныя враги наша и паки соберет разсеянный народ грузинский, да без препятствия приступаем к честной гробнице вашей и достойно ублажаем мужество ваше: Аллилуиа.
Егда возвестиша шаху Аббасу повесть сию дивную, с великим гневом повеле правителю Кахетии погубити и умертвити эристава Арагвскаго Заала и послати вас пред него; тогда с желанием Божественным честь и славу остависте и скоро предстасте Муртуза-кули-хану, иже посла вас всех троих в Персию, пред немилостиваго шаха; дивный же и мужественный воин Христов, эристав Заал, убиен бысть изменою; сего ради поем вам, единству, Духом Святым соединенному:
Радуйтеся, закона отеческаго хранителие; радуйтеся, благоверия сохранителие; радуйтеся, неправедныя суды разрушившии; радуйтеся, звоне духовнаго бодрствования; радуйтеся, души ваша прежде за Христа и потом за братию положившии; радуйтеся, слезы скорби грузин отирающии; радуйтеся, ближних соединителие и врагов поразителие; радуйтеся, подобно Давиду иноплеменники низлагающии; радуйтеся, одолением варваров посрамившии; радуйтеся, персов обуздавшии и праведно вспять обратившии; радуйтеся, хулителей, прелюбодеев и татей ужасающии; радуйтеся, на отступников от веры и отечества гнев наводящии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Егда поставиша вас пред судилищем онем шаховым, обещаваху вам многая блага и нуждаху оставити Христа и обратитися к Мухаммеду; вы же безстрашно глаголасте: «Не ищем даров ваших, ибо мы раби есмы Небеснаго Царя и неоскудных мзд от Него чаем»; сего ради мужественных, Крестом вооруженных воинов Христовых, хвалим вас вси собравшиися: Аллилуиа.
Тогда мучителие поминаху мужество и доблесть вашу и глаголаху вам, да пощадите себе и не предадитеся безвременней смерти; вы же невозмутимым умом отвещасте: «Не отступим мы от закона Христова и никогдаже послушаем лживаго онаго пророка вашего», и, присно молитвою огражденнии, низложисте прелесть лукаваго; сего ради языку нашему, немощно глаголющему, дадите силу украсити подвиг ваш:
Радуйтеся, дивнии и воистину мужественнии воини Небеснаго Царя; радуйтеся, верою твердою обличившии коварство мучителей; радуйтеся, непреклонныя стены земли и веры; радуйтеся, столпи и помощницы Православия; радуйтеся, златокованнии светильницы благочестия; радуйтеся, образи Божественнаго воинства и возбудителие мужества; радуйтеся, крепцыи мстителие врагов картлосиан; радуйтеся, преславная светила земли иверския; радуйтеся, избавителие и покровителие края Кахетинскаго; радуйтеся, похвальнии сынове отечества нашего; радуйтеся, образи победоносия грузин; радуйтеся, бисери драгоценнии Церкве небесныя и земныя; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Егда безбожнии они отсекошася от надежды обращения вашего, яша вас, всех троих воинов Христовых, и, связанных, биша и влачаху немилостиво по земли, и паки нуждаху отвергнутися Христа; вы же, яко в чужей плоти, лютыя биения мужественно терпели есте и песнь трех отроков доброгласно взывали есте: Аллилуиа.
Тогда бывшии тамо слуги ваша моляху вас, блаженнии, да покоритеся повелению их и избавите себе от толиких зол; вы же скоро запретисте им и ресте: «Не довольно ли суть нуждающии нас мучителие сии безбожнии и с ними невидимии оны врази, люте борющии род наш?» Сего ради достойно есть вам, мученицы, глаголати песни сия победныя:
Радуйтеся, благородство духа непреложно сохранившии; радуйтеся, свещи, разумных просвещающия и безумных попаляющия; радуйтеся, от коварств человеческих и от лести вражия избавляющии; радуйтеся, силою Божественною многоразличныя страсти претерпевшии; радуйтеся, от скверны и смрада беззакония очищающии; радуйтеся, мечем обличения служителей диавола поражающии; радуйтеся, недуги многоразличныя и немощи прогоняющии; радуйтеся, пламень страстей и лютыя недуги угашающии; радуйтеся, непослушных отроков вразумляющии и наставляющии; радуйтеся, пленных освобождающии и сирот и вдовиц защитницы; радуйтеся, мнимое во грехе благополучие обличающии; радуйтеся, народу грузинскому сладость благочестия от Господа испрашивающии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Ни ласкательство, ни прещение не возможе поколебати, мужественнии, непобедимаго ума вашего, но друг друга ободрясте, да с радостию приимете всякую муку, находящую на вы, и со слезами моляхуся и Бога прошасте, да послет вам помощь Свою, и Пресвятую Троицу Трисвятою песнию славили есте: Аллилуиа.
Тогда удивися мучитель мужеству вашему и ласкательно глаголаше мужественным мучеником: «Не творите себе, именитых, посмешищем врагом, ниже избирайте смерть вместо сладкия жизни, но отвергнитеся закона Христова и приимите множество даров и обилие потребных»; вы же не поработисте себе недостойному рабству и от изволения своего непреклонни пребысте; сего ради блажен есть во святых подвиг и победа ваша, сице хвалимая:
Радуйтеся, делателие Божественнаго закона; радуйтеся, твердии столпи веры; радуйтеся, избраннии сосуди святыни; радуйтеся, всенепоколебимии столпи мужества; радуйтеся, образи и печати бытия отечества; радуйтеся, щиты, хранящии благочестие; радуйтеся, мечи обоюдоострии, отсекающии злочестие; радуйтеся, насаждения райская, плод благий приносящая; радуйтеся, немилостиво отсеченныя лозы винограда Христова; радуйтеся, славы и крепости отечества нашего; радуйтеся, ходатаи и укрепителие народа иверскаго; радуйтеся, сладкогласныя гусли и прекраснии органи Церкве грузинския; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Сия вся слышавше безбожнии они, совлекоша вас и, связанных по рукам и ногам, повергоша на зное солнечнем; вы же, гладом и жаждею изнуреннии и от мух и ос немилостиво угрызаемии, о плоти не печалистеся, но, чающе венцев и наград победы, Христу, Подвигоположнику вашему, с любовию пели есте: Аллилуиа.
Первее приидоша мучителие ко двема славным эриставом и прежде восхотеша отсещи главы ваша, да сим токмо ужас наведут на Бидзину Чолокашвили и устрашат мужественнаго духом и храбраго умом; но он ободряше вас и глаголаше вам: «Ничтоже сладчайше есть смерти Христа ради», и устне его не престаяху славословити Бога; вы же прежде вручисте отечество и потом души ваша Христу Царю, и ныне с собором святых веселитеся и ходатаи есте поющих вам:
Радуйтеся, крепостию духа немощь человеческую покрывшии; радуйтеся, немощных крепосте и сильных низложителие; радуйтеся, пещь мук росою терпения угасившии; радуйтеся, прелесть иноплеменных дерзновенно низложившии; радуйтеся, гордых и надменных смиряющии; радуйтеся, смиренных и нищелюбцев возносящии; радуйтеся, братоненавистников и корыстолюбцев посрамляющии; радуйтеся, клеветников и не чтущих родителей обличителие; радуйтеся, всех тепле молящих вас спасающии; радуйтеся, в подвизе и монашестве пребывающих милующии; радуйтеся, в странстве и пришельстве сущих утешителие; радуйтеся, носящих имя Христово воинств сподвижницы и покровителие; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Егда мучителие оны воздвигоша десницы своя, да крепко ударят по выям вашим, не возмогоша досязати, ибо мужественни и высоци бесте возрастом; тогда ударивше мечи по голеням вашим, повергоша вас на колена долу и тако отсекоша главы пресветлым эриставом; вы же не избрали есте чести временныя сея, ниже отверглися есте имене Христова, егоже ради и пострадасте и положисте души ваша за Него; мы же, чада Церкве грузинския, с удивлением возглашаем и глаголем: Аллилуиа.
Видевше мучителие, яко страх смерти не преклони сердца твоего, облекоша Божественнаго мученика в чадру, якоже Христа Бога нашего в хламиду багряную, потом приведоша осла и всадиша тя на него, и водяху тя по улицам и ругахуся; ты же паки обличал еси злый закон их и паче ожесточал еси их, ибо со другами твоими тщался еси внити в горний Иерусалим, мужественне Бидзино; сего ради подобающе поем тебе и с любовию чтим память твою:
Радуйся, светом мученичества твоего мрак отечества озаряяй; радуйся, подвигом твоим Церковь просветивый; радуйся, безплотныя чины удививый; радуйся, верных паче утверждаяй; радуйся, благодатию Божественною невежды умудряяй; радуйся, многосплетенныя оны козни и ухищрения насильника сего врага упраздняяй; радуйся, убогаго и утесненнаго защитниче; радуйся, разслабленныя души исцеляяй; радуйся, из одержимых лукавыя духи прогоняяй; радуйся, верных помощниче и безбожных низложителю; радуйся, язвы грехов наших утоляяй; радуйся, чтущих тя скорый заступниче и от неправеднаго озлобления избавителю; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Тогда взяша мучителие оны мечи изощренныя и начаша немилостиво сещи и резати члены и составы твоя, мужественне Бидзино: прежде отсекоша персты десныя руки по единому, и потом левыя, и, егда раздирахуся плоть твоя, неповинная кровь твоя, яко жертва благовонная, приносима бяше пред Богом; ты же, люте распростертый, раздробление плоти и немилостивое изнурение, подобно Иакову Персянину, мужественно терпел еси и немолчным умом славил еси Укрепляющаго тя: Аллилуиа.
Потом отсекоша обе руце до лактей и обе голени до колен, и обе мышцы от лактей до рамен, и тако немилостиво отсеченныя члены твоя по земли влачаху, и паки отсекоша оба бедра, ты же еще жив бе, мужественне Бидзино, ибо едина токмо глава бяше невредима на многострадальном теле твоем, и страшно бяше видети; ты же разрешение составов молчанием терпел еси и знамение молитвы очима показовал еси; сего ради, созерцающе постигшия тя беды и скорби, дерзаем пети тебе:
Радуйся, верою в Троицу власть вражию поправый; радуйся, агнче святый и непорочный, Христа ради кровь пролиявый; радуйся, непрестанною молитвою искушения диаволя прогоняяй; радуйся, кровию твоею огнь безбожия угасивый; радуйся, мудрых и добре зрящих возносяй; радуйся, двоедушных и нераскаянных смиряяй; радуйся, чародеев и гадателей низлагаяй; радуйся, за Христа себе предающих милуяй и лжесвидетелей на Христа поражаяй; радуйся, всех, враждующих на иверов, ужасаяй и смиряяй; радуйся, заблудших на пути истины утверждаяй; радуйся, прельщенных коварным врагом грузин паки на служение отечеству поставляяй; радуйся, ненавидящих правду обличителю и злое благим полагающих сокрушителю; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Егда за власы влачаху тя безчестно по земли, един от мучителей воззре внутрь и виде сердце твое, яко по обычаю еще движашеся, и, разгневавшися, удари мечем во святое сердце твое и, яко овча, закла тя копием; всесветлая же душа твоя вселися в горний Иерусалим, идеже жительствоваху Шалва и Элизбар; сего ради засвидетельствоваша грузины великомученичество твое, мужественне Бидзино, и изрекоша сию песнь хвалы: Аллилуиа.
Егда мечем изсеченныя члены мучеников повергоша непогребенны, в нощь ону излияся свет пресветлый на всех трех телесех, всем видим, и видевшии славляху Бога; тогда тайно взяша их тамо сущии армяне и погребоша в церкви своей, и мощи оны святых творяху многа исцеления; по времени же изнесоша смешенная друг со другом телеса их жена и сын Шалвин и положиша во едину раку, в Икорте, в церкви Архангелов; сего ради сретоша их мученолюбивии народи и крестоносный собор с пением и взываху усердно:
Радуйтеся, страстем Христовым подражателие и смерть волею подъявшии; радуйтеся, души ваша безмятежно Богу предавшии; радуйтеся, немилостивую смерть с благодарением приявшии; радуйтеся, подвигом вашим свет непреходящий приявшии; радуйтеся, на служение отечеству и ко благочинию призывающии; радуйтеся, лжи и клятвопреступления ненавистницы; радуйтеся, отвергающихся подвига отцев и дедов и приспособленцев обличителие; радуйтеся, всех злых и нерадивых посрамителие; радуйтеся, хранящих святыню с благоговением благословляющии; радуйтеся, о вере и отечестве потрудившихся милующии; радуйтеся, путем истины шествующих утешителие; радуйтеся, на всякия злыя нравы и пороки гнев наводящии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Понеже крепко подвизастеся и заколением и кровию стяжасте благодать духовную, ныне принесите моление наше Избавителю и испросите нам, да никогдаже сподобятся человецы лживии и невернии, иже хулят Бога истиннаго и имут себе в поклонение и в молитву мамону, владычества над народом нашим и расхищения православных грузин, но да умножатся нам народоначальницы, совершенни всяким грузинским благонравием, иже пекутся о народе нашем и, яко Давид, со смирением поют Богу: Аллилуиа.
Якоже бодрии пастырие явистеся иверяном и сон духовный от народа отгнасте, тако и ныне потщитеся избавити нас от искушений и дело, видение и веру добре управите, да отцы чадом своим прошедшее родныя земли поучают, матери же, подражающе древним матерем, рожденных ими любви к закону и ближнему наставляют, да вси духом и истиною Иисуса, Избавителя нашего, славят и благословенным языком грузинским мужество ваше непрестанно хвалят:
Радуйтеся, купно носящии лютое оное искушение, яко подвиг святый соединяет братство и украшают е венцы победы; радуйтеся, свети верных и преславная светила веры, яко разсеясте нощь персидския прелести; радуйтеся, за отечество наше во время нашествия иноплеменных непобедимии борцы, яко приясте мзду оную трудов; радуйтеся, воини Христу учиненнии, иже дарова вам таковую дивную победу; радуйтеся, гордаго онаго змия сокрушителие, яко Христа Распятаго имеясте стеною и силою; радуйтеся, красото светлаго лика мучеников, яко желанием Христовым воинство земное пременисте на бисер нетленный; радуйтеся, духом непобедимии адаманти, яко дивная терпения ваша удивляют ум наш; радуйтеся, из недр прошлаго нашего изшедшии, яко принесением себе Христу подражателие бысте первых мучеников; радуйтеся, раби благии, добрии и вернии, яко течение добре совершисте и вселистеся во свете онем неизреченном; радуйтеся, в преславных преславнии, ихже пожаша безбожнии персы, якоже прежде светло венчанную царицу Кетевань и преславное светило грузин царя Луарсаба; радуйтеся, земель и вод, кровию предков наших упитанных, неусыпнии хранителие, яко гроб ваш нескудно источает благодать и освящает места оны Шида-Картли; радуйтеся, от картлосиан присно поминаемии, яко славное имя Христово вами светло прославляется; Радуйтеся, непобедимии воини мученицы, Бидзино, Шалво и Элизбаре, достойно хвалимии!
О подвига победителие, мужественнии мученицы Бидзино, Шалво и Элизбаре! Приимите моления и воздыхания, от сердца сокрушенна ныне вам приносимая, и не помяните злобы нашея, яко согрешихом и беззаконновахом и не сотворихом, яже заповеда нам Бог; но, яко имуще дерзновение велие, молите Христа Бога, да невредимо сохранит нас от всякия скорби и от сети вражия и оставление грехов дарует поющим вам: Аллилуиа.
Сей кондак рцы трижды, потом:
Аще имена ваша, с верою поминаемая, Божественною силою явно исцеляют болезни, избавите нас, иже хвалами величаем вас, мученицы Господни, от недугов и болезней душевных и телесных и от всех страстей освободите, да по обычаю мужей отечества нашего присно хвалим святых мучеников и непрестанно восхваляем мужество ваше:
Радуйтеся, в делах человеческих непостыднии; радуйтеся, воинской храбрости учителие; радуйтеся, лучшее от худшаго и доброе от злаго разсуждающии; радуйтеся, любве ради отечества и верности ради народа себе предавшии; радуйтеся, воинство на брань со враги ободряющии; радуйтеся, духовное мужество иверов утверждающии; радуйтеся, народ наш от погибельнаго нерадения избавляющии; радуйтеся, огрубевших сердцем к любви подвизающии; радуйтеся, от ненависти между братиями избавляющии; радуйтеся, забывающим отечество свое и обычаи гнев наводящии; радуйтеся, народ грузинский во единомыслие, единодушие и единоволие связующии; радуйтеся, сущих во вражде и разделении любовию к отечеству утверждающии; Радуйтеся, непобедимии воини мученицы, Бидзино, Шалво и Элизбаре, достойно хвалимии!
Несть никогоже, иже призывая вас в скорбех, не обрящет скораго утешения, воини Христовы непобедимии; сего ради, собравшеся, хвалим Создателя, даровавшаго вам таковая дарования, и приносим вам «радуйтеся», помощницы наша: Радуйтеся, непобедимии воини мученицы, Бидзино, Шалво и Элизбаре, достойно хвалимии!
О во бранех непобедимии воини пресветлии и в скорбех непостыдно руку подающии, всехвальнии мученицы Бидзино, Шалво и Элизбаре, молящих вас скорыя помощницы и всех грузин ограждение и покрове!
О по членом изсеченный и мечем пораженный великомучениче Бидзино и сострадальцы твои, эристави Ксанстии Шалво и Элизбаре! Помяните нас пред Богом и народ наш, искушеньми и скорбьми обстояемый, избавите ходатайством вашим, да не вместо милости приимем наказание за дерзость, ибо забыхом благотворение предков наших и дух древняго благородства, единодушие братий, послушание отцем, и дух мужества уклонися от нас. Вместо сего уподобихомся языком иноплеменным и родом разсвирепевшим, любителем века сего, отступившим от Христа, от нихже научихомся делом их и служим похотем сердец наших, подражающе им, яко не имущии упования на Христа и забывшии жизнь вечную. Паки обновите в нас, якоже в вас, теплоту веры, братскую любовь к ближнему и Божественную ревность об отечестве, упитанном кровию вашею, и без препятствия возставите нам от корене Давидова помазанника Божия, иже верою твердою оградит вся пределы Грузии и вознесет и возставит высоту и крепость нашу от земли забвения, да будем едино стадо и Господь да будет Пастырь наш. Укрепите Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священный и монашеский чин, военачальников и градоначальников, христолюбивое воинство, и благодетелей наших, и всех православных христиан. Тезоименитых вам и молящихся вам возвеличите. Молите, всесветлии мученицы, возлюбленнаго вами сладчайшаго Иисуса, да простит нам отступления, разорения и осквернения церквей, убиения служителей Божиих, междоусобныя брани, измену, зависть и вражды, убиения младенцев во утробе и иная множества прегрешений наших.
О Крестом Христовым вооруженнии мученицы Бидзино, Шалво и Элизбаре! Се, картлосиане молим вас: ходатайствуйте пред Богом, да дарует церквам славу, священству честность, властем доброе пасение народа, воинству мужество, мирянам безгрешие, женам целомудрие и чадом благовоспитание, нам же да паки возставит любовь к правде, мужество духа, многочадие, милость ко вдовицам и сиротам и взаимную поддержку; и да дарует нам любовь ко святому житию, ненависть к непотребным делом и сокрушение сердца, со святыми венчание и наследие Царства Небеснаго, да и мы с вами славим Отца и Сына и Святаго Духа, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Господи Иисусе Христе, Сыне Божий, молитвами Пречистыя Твоея Матере, святаго великомученика Бидзины и святых славных мучеников Шалвы и Элизбара и всех святых, помилуй нас. Аминь.
Автор-составитель: Тинатин Мчедлишвили
