Акафистное пение святому великому мученику и победоносцу Георгию
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Воспеваем подвиги твоя, мужественный мучениче Иисусов, и святую память твою величаем, мы же, иже избавление тобою прияхом, «Радуйся» с благодарением приносим тебе, храбрый, и яко к скорому помощнику прибегающе и с любовию пришедше, славному и всеславному чудесы, тепле вопием ти: Радуйся, победоносче великомучениче Георгие!
Сияеши светом мученичества, воине Христов, мужественный духом, и венцем мучеников украшен, светло стоиши пред Богом; Того Единаго моли ныне спасти и просветити достойно поющих святыню твою, да вси уведят, яко и по смерти жив еси и утешение и мужество подаеши с верою поющим:
Радуйся, избранниче Божий и истинный и дивный воине Царев; радуйся, столпе правыя веры, до небес досязающий; радуйся, правило правды и утешения; радуйся, стено мужества и столпе непоколебимый крепости; радуйся, сосуде добраго нрава и разума; радуйся, данный тебе талант сторицею умноживый; радуйся, непобедимый борче лютаго онаго велиара; радуйся, мечу несокрушимый воинства картлосиан; радуйся, добрый делателю винограда Христова; радуйся, неоскудный источниче воды живыя и море человеколюбия; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Отвратишася от света и последоваша тьме нечестивии, ибо изыде повеление всему миру, да не служат Богу Живому, но идолом бездушным; ты же, видев толикое нечестие и христоборный ум их, любве ради Божия раздал еси имение твое нищим, себе же в жертву благоугодну Христу, и восхвалял еси силу Его: Аллилуиа.
Егда почи на тебе Божественный чудотворный Дух, уповая на Бога истиннаго, не убоялся еси ни страха беззаконнаго царя, ни уготованных мучений, но, исповедник Христов, дерзновенно предстал еси пред лукавым сонмищем и обличил еси идолослужение; тако и ныне прииди к нам, непобедимый духом, и даждь нам разумение прегрешений наших, да не затворятся врата Царствия восхваляющим тя:
Радуйся, в Каппадокии прозябый и в Палестине добре возрастый; радуйся, любовию Господних страстей уязвленный; радуйся, милостынею и верою очищенный; радуйся, Божественным разумением просвещенный; радуйся, силою мужества и храбрости просиявый; радуйся, крест Христов на рамена твоя подъявый; радуйся, во единоплеменницех твоих Божественная учения распространивый; радуйся, подобно Давиду иноплеменники низложивый; радуйся, воинской храбрости учителю; радуйся, молитвою нищих вооруженный и немощь немощных носящий; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Невидимыя обетованныя сладости предузрел еси оком душевным, храбрый подвижниче, и ни во чтоже вменил еси преходящия сладости века сего, но, подобно Избавителю твоему, волею твоею стремился еси к подвигом и, в темницу заключен, яко во храме пребывая, Творцу всех громогласно воспевал еси: Аллилуиа.
Яко роза благоуханная, красотою цвета явился еси от терний безплодных, и яко свеща, возгорелся еси среди тьмы родов неразумных, прекрасная славо мучеников, и явно гнушался еси лживыми идолы, сего ради уготовишася убити тя; ты же молитвою и упованием на Бога душу твою укрепил еси и многоразличныя муки естеством тленныя плоти претерпел еси; сего ради призываем тя Ходатаем к Богу и сице вопием ти:
Радуйся, Божественнаго закона явный хранителю; радуйся, благое намерение в сердце твоем положивый; радуйся, лозу православныя веры насадивый; радуйся, во пленении благородство души сохранивый; радуйся, подвиги и искушения мужественно подъявый; радуйся, поношение и поругание за Христа претерпевый; радуйся, душетленных учений низложителю; радуйся, от злаго безстрашия и безстудия избавителю; радуйся, от сетей сатаниных и от нашествия иноплеменников хранителю; радуйся, коварства поразителю и бесов скорый сокрушителю; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Не восхоте обратитися от слепоты и жестокости царь безумный, ты же светлым и крепким гласом исповедал еси Христа Богом, идолы бесами нарицал еси и всю слепоту оную обличал еси, иже ложно боги исповедуют не боги, вся к Богу призывал еси и трисвятым славословием прославлял еси Пресвятую Троицу: Аллилуиа.
Слышавше словеса твоя мучители, посрамишася зело, ибо боги их поругал еси и на посмех показал еси, Христа же Бога, плотию распятаго, проповедал еси, упраздняющаго прелесть душепагубную, и, присно молитвою ограждаемый, низложил еси дерзость прельстителя; тако и ныне возжги в сердцах наших Божественный огнь ревности, да желанием твоим подвизаемся мужественно и глаголем усердно:
Радуйся, мечем обличения идолослужителей поразивый; радуйся, твердою верою нечестие мучителей обличивый; радуйся, непоколебимым мужеством всех удививый; радуйся, светом богопознания тьму идолослужителей просветивый; радуйся, неживую и хладную веру нашу оживляющий; радуйся, вдовиц утешителю и сирот питателю; радуйся, делателей плодоносными творящий и нищих посещающий; радуйся, многих душ от пленения и работы мучителей избавителю; радуйся, болезней разрешителю и смрада нечестия изсушителю; радуйся, скверны суеверия потребителю; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Заткнуша уши царь озлобленный, подобно глухому аспиду, ибо не услыша гласа твоего, добре глаголющаго мудраго, и повеле повесити тя на древе и копием пронзити; но Бог чудес упраздни совет его, и егда пронзоша тя, абие обратися острие копия, яко воск, и от плоти твоея изыде роса крове; ты же, дивно сохраненный, благодарение возсылал еси к Богу Вышнему и славил еси милость Его: Аллилуиа.
Паки исполнися Диоклитиан гнева велика и повеле ноги твоя в клады забити и на перси камень возложити; ты же высоким гласом благодарение и славу принесл еси Богу, яко сподобил тя есть носити на персех тяжкий камень и в сердце твоем непоколебимо утверждение правыя веры; Христос же исцели тя от язв и укрепи тя, да вси, видевшии великое чудо, утвердятся и, яко агнца Божия, с верою ублажат тя:
Радуйся, непрестанною молитвою искушения диаволя прогоняющий; радуйся, небеснаго Иерусалима ради муки претерпевый; радуйся, упованием на Бога изощренное оружие врага сокрушивый; радуйся, волхвов чародейства разрушителю и лукавство их победою обличивый; радуйся, верным честь подаяй и двоедушных смиряяй; радуйся, немощных крепосте и мучителей низложителю; радуйся, ближних соединителю и врагов поразителю; радуйся, неправедно на смерть осужденных заступниче и покровителю; радуйся, честности и мужества насадителю; радуйся, злых нравов пресекателю; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Премногия искушения и страшныя муки, диавольскими ухищрении составленныя, не наведоша страха на подвижника, ибо за Христа боролся еси с ними и Ангели покрываху тя; но страх и трепет на велиара навел еси и растопил еси его, яко воск пред огнем, попаляющим противящихся Христу, и восхвалял еси Укрепляющаго тя: Аллилуиа.
Видев плоть твою, медными орудиями изсеченную и острым ножем на части раздробленную, духом мужественный, возвел еси очи на небо и возопил еси: «Призри на раба Твоего, Боже мой, и помози ми, да не побежден буду от лукаваго»; тогда абие услышал еси вожделенный глас от Безначальнаго: «Георгие, Аз с тобою присно, и ты со Мною во веки»; и паки обнови тя; у Негоже проси, блаженне, народу нашему избавления от владычества иноплеменных и милости поющим тебе:
Радуйся, блистанием чудес твоих весь мир украшающий; радуйся, неистовство противящихся ни во чтоже вменивый; радуйся, бодрственному и трезвенному житию научающий; радуйся, дерзость злославящих сокрушающий; радуйся, осквернителей святыни и развратителей христианства прещением казнящий; радуйся, всех обидимых и угнетенных покровителю; радуйся, ненавидящих правду и зло благим полагающих посрамляющий; радуйся, грехолюбивых человек сладости воздержания научающий; радуйся, мучительных человеконенавистных князей и судей обличителю; радуйся, от них неправедно гонимых милующий; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Егда пригвоздиша тя к страшному колесу, беззаконнии мняху умертвити тя, но паки исцелился еси пришествием Ангела Божия и, обновлен и светел, предстал еси пред царем и Магнентием, другом его, и явлением цельным многих привлекл еси к вере в истиннаго Бога; они же мечем кончину прияша и радуются и поют пред Ним: Аллилуиа.
Вострепета безумный оный царь и сонм его, ибо изнемогоша муки их, не вредяще тебе, и начаша ласкательно глаголати к тебе: «Георгие, ныне покорися нам, и возвеличим тя»; ты же обличал еси заблуждение их и глаголал еси: «Слава ваша вам да будет, нечестивии, в погибель вашу»; и, немилостиво биемый, хвалами превозносил еси Бога, Егоже ныне умоли сохранити от злых искушений уповающих на тя и с желанием поющих:
Радуйся, звоне духовнаго бдения; радуйся, дикость капищ дерзновенно разоривый; радуйся, козни лжи разрушивый; радуйся, тьму темницы и узы мужественно претерпевый; радуйся, пещь скорбей и печалей угасивый; радуйся, искушения и волны укротивый; радуйся, уста всех неверных заградивый; радуйся, сердца, волнами мира потрясенныя и оскверненныя, умиротворяющий; радуйся, свеще, мудрых просвещающая и безумных попаляющая; радуйся, отроков от всякия скверны и порока избавляющий; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Якоже Елиссей милотию Илииною абие раздели реку, тако и ты крестом разделил еси реки насилий неверия, сквозь нихже преидоша людие мнози, ибо видеша тя не токмо жива и одушевлена, но всецело невредима в новогашеной извести, яко огнь пылающей, и, удивльшеся, возопиша: «Воистину велий Бог христианский»; ты же, подобно трем отроком, в пещи зной огненный мужественно презрел еси и благодарственное пение принесл еси Богу: Аллилуиа.
Повеле царь безумный зело разжещи сапоги железныя, гвоздьми пронзенныя, и обути в них честныя ноги твоя; ты же моляшеся: «Буди сие избавление ногам моим, свеща возжженная и путь течения моего к Тебе»; Ангели же возвеселишася о добрых подвизех твоих и исцелиша тя от всех мук; сего ради умоли Бога, да Ангелы Своими отженет от нас всякое зло и сохранит нас от всех искушений, да обрящем упокоение и наслаждение непреходящее, хвалами величающии тя:
Радуйся, сокровище Святаго Духа; радуйся, таинниче боговидения; радуйся, исповедниче гонимыя веры; радуйся, мужественный обличителю закона, человеческим искусством составленнаго; радуйся, презревый остроту железа и зной огня; радуйся, разумный адаманте терпения; радуйся, образе Божественнаго воинства; радуйся, теплый ходатаю вернаго народа; радуйся, крепкий мстителю врагов картлосиан; радуйся, в мори греха потопающим пристанище спасения; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Тобою показа Бог нечестивым дивное чудо и молитвою твоею воскреси из гроба мертвеца, давно умершаго и неверием в идолослужении уснувшаго, иже, благодаря тя, яко победоносца, отречением проклинаше идолы бездушныя и громогласно исповедаше Христа Богом; Афанасий же, волшебством прославленный, абие обратися, егда силою Божиею упразднися искусство волшебства его, и принесе Ему славословное пение: Аллилуиа.
Егда сокрушил еси крестом лукавыя идолы, великий вождю верных, Божественною ревностию возгореся блаженная царица Александра и, отлучившися от Диоклитиана, ученика диаволя, возгласи: «Сие ведите отныне: аз есмь раба Христова, Егоже проповедует святый Георгий», и абие уверова во Христа великое множество народа; сего ради дивимся теплому боголюбию твоему и приносим тебе песнь песней:
Радуйся, правыя веры апостольски проповедниче; радуйся, нераскаянных к покаянию приводящий; радуйся, окаменелыя и жестокия сердца умягчающий; радуйся, разсвирепевшаго змия дерзновенно уязвивый и умертвивый; радуйся, чудом, над волом сотворенным, преблаженнаго Гликерия к Богу обративый; радуйся, Анатолия и Протолеона стратилатов к подвигом твоим приобщивый; радуйся, чудесы идолослужителей смутивый; радуйся, царицу Александру на пути истины поставивый; радуйся, души, в глубине нечестия потопленныя, к познанию Бога извлекий; радуйся, грехи душ и болезни телес потребляющий; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Ужасеся Диоклитиан и неизреченнаго гнева исполнися, видя преуспеяние веры и уничижение бездушных идолов, како в темницу приводимии немощнии тобою дивнаго исцеления сподоблялися, безчисленный же народ и множество воинов, знаменьми и чудесы мужественни бывше и духом укрепившеся, Иисусу, Всесильному Богу, явно и известно пояху: Аллилуиа.
Оскудеша ухищрения мучений немилостивому оному царю, ибо видяху чудеса — ни копие тя не сечаше, ни огнь не попаляше, ни страх смерти не устрашаше, и рече народу своему: «Се, ничтоже вредихом мучением отступника онаго, но и иных мнози прельсти», и, яко жертвеннаго тельца, осуди тя на заклание; ты же сокрушенным сердцем моли Бога, да мощи твоя Божественною силою прогоняют недуги и страсти, и имена твоя, с верою поминаемая, исцеляют поющих тебе:
Радуйся, на неверныя враги Христа Бога великий и победоносный воине; радуйся, по учению апостол тьму многобожия прогоняющий; радуйся, неплененная врата правоверия; радуйся, щите, хранящий благочестие, и мечу, отсекающий злочестие; радуйся, злато, огнем искушенное и принесенное безсмертному Жениху; радуйся, смирно, в миро принесенная безсмертному Царю; радуйся, ливане, возкуренный на Божественнем оном жертвеннице; радуйся, огню, попаляющий в сердцы нашем всякия плевелы и терния; радуйся, звездо пресвятая Божественныя славы; радуйся, недремлющий хранителю и поборниче земли иверов; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Яко агнец не вопиял еси, ни взывал еси, егда на заклание шел еси, но с воздыханием моляшеся Богу и поминающим мученичество твое избавления от всякия скорби и напасти дерзновенно просил еси; тогда явися тебе из облака Господь и обеща благое исполнение прошения твоего; ты же с радостию преклонил еси выю твою мечу и благодарственным гласом воспевал еси Укрепляющему тя: Аллилуиа.
Совершив течение твое и преставлься к Богу, благодать изгнания нечистых духов и попрания видимых и невидимых врагов приял еси свыше, и иконами написанный и в молитвах поминаемый, скоро помогаеши в скорбех и узах сущим; раки же мощей твоих святыя, яко сокровище благоуханий, благоухают верным и подвизают нас на хвалу и пение тебе:
Радуйся, Божественным подвигом твоим безплотныя чины удививый; радуйся, тельче святый и непорочный, за Христа кровь излиявый; радуйся, агнче, Богу угодный, блаженство Царствия стяжавый; радуйся, от Господа власть над нечистыми духи приимый; радуйся, в сердцах боголюбцев благодатную радость изливающий; радуйся, духовная дарования обильно подаяй; радуйся, благоуханием нетленных мощей твоих и множеством знамений весь мир облагоухаваяй; радуйся, благодатию исцелений твоих немощныя укрепляяй; радуйся, от одержимых злыя духи прогоняяй; радуйся, к молящимся милостиво приклоняяйся и уповающих на тя ободряяй; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Православною верою уязвленный, якоже обличил еси лукавство идолослужения, тако и ныне покрый святую Христову Церковь от единения с еретиками, еже есть пучина скверны; врага же, губителя верных грузин, низложи и попери, и тайну беззакония, на народ наш воздвигнутую, упраздни, да не будем в посмех врагом нашим, но, любовию к Богу и отечеству во единомыслие связаннии, хвалами превозносим Венчавшаго тя: Аллилуиа.
Великаго Царя мужественный воине Георгие, благослови и заступи нас, да человецы лживии и неверии, хулящии истиннаго Бога и имущии маммону в поклонение и моление свое, никогдаже сподобятся владычествовати над народом нашим и расхищати православных грузин, но да умножатся нам вожди народа, всяким грузинским нравом совершеннии, да в простоте сердца пекутся о народе нашем и благословенным языком грузинским ублажают мужество твое:
Радуйся, зарею знамений и чудес уповающих на тя просвещаяй; радуйся, скорбящих утешителю и лютых бед скорый прогонителю; радуйся, обреченных на смерть избавителю; радуйся, бедствующим и злостраждущим руку простираяй; радуйся, мудрых и добре зрящих возвышаяй; радуйся, христолюбивыя народы духовною радостию исполняяй; радуйся, омраченных тьмою века сего утешителю; радуйся, благоверных властей и воинств благословителю и милостивче; радуйся, отступивших от веры и беззаконие творящих князей и вождей народа прещением наказуяй; радуйся, от всех верных достойно почитаемый и присно поминаемый; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
О страстотерпче, великомучениче Георгие! В напастех сущим готовый еси помощник и власть имаши освободити нас от всех страстей и коварств вражиих; и ныне не престани о воспевающих тя, избавляя от окружающих искушений и ухищрений сего лютаго врага, да избежим горьких мук вечных и присно с тобою воспеваем Пресвятей Троице: Аллилуиа.
Сей кондак трижды, затем
Сияеши светом мученичества, воине Христов, мужественный духом, и венцем мучеников украшен, светло стоиши пред Богом; Того Единаго моли ныне спасти и просветити достойно поющих святыню твою, да вси уведят, яко и по смерти жив еси и утешение и мужество подаеши с верою поющим:
Радуйся, избранниче Божий и истинный и дивный воине Царев; радуйся, столпе правыя веры, до небес досязающий; радуйся, правило правды и утешения; радуйся, стено мужества и столпе непоколебимый крепости; радуйся, сосуде добраго нрава и разума; радуйся, данный тебе талант сторицею умноживый; радуйся, непобедимый борче лютаго онаго велиара; радуйся, мечу несокрушимый воинства картлосиан; радуйся, добрый делателю винограда Христова; радуйся, неоскудный источниче воды живыя и море человеколюбия; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Воспеваем подвиги твоя, мужественный мучениче Иисусов, и святую память твою величаем, мы же, иже избавление тобою прияхом, «Радуйся» с благодарением приносим тебе, храбрый, и яко к скорому помощнику прибегающе и с любовию пришедше, славному и всеславному чудесы, тепле вопием ти: Радуйся, победоносче великомучениче Георгие!
О благолепием пресветлый, великомучениче Георгие, светило всего мира и храбрый воине Христа Бога, непобедимый поборниче народа грузинскаго и покровителю Церкве нашея, помощниче верных, скорбящих радосте и веселие, пленных избавителю и ходатаю пред Богом всех молящихся и прославляющих тя.
О богувенчанный великомучениче Георгие! Помяни нас пред Богом и блистанием святыни твоея призри на наследие грузинское и на живущий в нем народ наш православный, многажды от нападений насильников стесненный, и утверди его. Покори под ноги христианом противныя враги, видимыя и невидимыя, и якоже споборник был еси при Дидгори боголюбивому царю Давиду и даровал еси «дивную победу» над иноплеменники, тако и ныне ходатайствуй за нас ко Христу и испроси нам, да отвратит гнев, возставший на нас за множество грехов наших, и, яко Лазаря, да воздвигнет отечество наше — Грузию — в первую славу, да не будем попраны пленяющими иноплеменными племены и родами, и да не рекут язычницы: где есть Бог их, на Негоже уповают? Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священнический и монашеский чин, военачальников и градоначальников; многомощною силою твоею укрепи христолюбивое воинство, и благодетелей наших, и всех православных христиан.
О мужественный и в подвизе славный мучениче, святый Георгие! Богопрославленными чудесы и знамении твоими освободи пленныя, исцели немощныя, избави в напастех сущих, спаси плавающих по морю, обрати грешныя и приведи ко Христу Богу, всех приемлющему. Всех мучениколюбцев и прославляющих святое имя твое прослави и душею и телом возвыси, да славы Царствия и великолепнаго сияния Божия сподобимся вси, со Ангелы воспоем, со святыми прославим и, с тобою спасеннии, благословим венчавшаго тя Отца, укрепившаго тя Сына и в тебе глаголавшаго Святаго Духа, Емуже подобает всякая слава, честь и поклонение, ныне и присно и во веки веков. Аминь.
О мучеников и подвижников красото, мое обучение и сияние, сладкий и именем и делом, многоплодное делание Царево, всех праведных украшение, на неверныя враги победоносный великий воине Христа Бога, святый великомучениче Георгие, иже проповедал еси святое и славное имя Его пред цари и князи беззаконными и прещений и мук их не убоялся еси, но приял еси с усердием многоразличными муками чашу мученичества и венец нетления от животворящия десницы Вышняго возложил еси, и ныне на небесех пред престолы Его благодатию Его со Ангелы предстоиши, на земли же знамения и чудеса и преславная дива совершаеши, имже несть числа: прииди ныне и стани посреде нас и щедро раздели восхваляющим и воспевающим тя благодать, милость и оставление грехов, и направи нас на путь мира к вожделенным обителем, в Царство Небесное, о Христе Иисусе Господе нашем, Емуже подобает всяка слава, честь и поклонение со Отцем и Святым Духом, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды).
Господи Иисусе Христе, Сыне Божий, молитвами Пречистыя Твоея Матере, святаго великомученика, победоносца Георгия и всех святых, помилуй нас. Аминь.
Автор-составитель: Тинатин Мчедлишвили
