Акафист святым великомученикам, князьям Аргветским Давиду и Константину
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Песнопения достоин всесвятый подвиг ваш, и имена ваша велия хвалы, воини пресветлии и мученицы дивнии; сего ради похвалами украшаем вас и молим: приимите малое сие пение наше и от всякия страсти и соблазна избавите восхваляющих вас: Радуйтеся, Давиде с Константином, мудрии, мужественно претерпевшии, храбрии мученицы!
Единство братства совершисте положением себе за Христа и, вознесшеся на небо, равныя чести и славы сподобистеся и от Царя всех приясте венец славы и обетованную оную благодать исцеления и избавления от скорбей, и исцеляете присно величающих вас и избавляете от напастей восхваляющих вас:
Радуйтеся, истиннии исповедницы правыя веры; радуйтеся, сладостно носящии иго Божественное; радуйтеся, мечи обоюдоострии, отсекающии злочестие; радуйтеся, столпи непоколебимии мужества; радуйтеся, образи Божественнаго воинства; радуйтеся, похвало рода вашего; радуйтеся, крепцыи мстителие врагов картлосиан; радуйтеся, жертвы и приношения явленная Христу Богу; радуйтеся, славо и крепосте отечества нашего; радуйтеся, образи победоносия предков наших; радуйтеся, твердыя стены Церкве иверския; Радуйтеся, Давиде с Константином, мудрии, мужественно претерпевшии, храбрии мученицы!
Егда пределы Аргветския беззаконными исполняхуся, тогда два сия брата, во бранех непобедимии и народа вождие, уготовистеся к брани и ободристе дружину львоподобных мужей, да сохраните отечество ваше от сарацин; тако и ныне примирите нас Иисусу Всесильному, да призрит на народ наш, иже не имать ответа пред Ним, и землю нашу, нападеньми врагов поколебанную, сохранит непоколебиму, да не преклонимся к беззаконию и с благодарением славим Бога: Аллилуиа.
Безстрашни бысте, яко безплотнии, и не устрашистеся множества врагов, но люте ударисте на превознесшихся нападающих мусульман, безчисленных избисте и возстависте победу грузином; ныне же князи беззакония воздвигошася на ны и подвизаются о растлении и истреблении народа нашего, мы же сну и разслаблению предахомся, и земля наша опустошена и падеся; но даждьте нам силу, мужественнии, попрати козни вражия, да избежим гнева, от Бога воздвигнутаго, и речем песнь сию хвалебную:
Радуйтеся, эристави и военачальницы, памятницы мужества несокрушимии; радуйтеся, Давиде, воине искуснейший, и Константине, юноше премудрый; радуйтеся, во время нашествия иноплеменных борцы непобедимии; радуйтеся, духом единодушнии и плотию крепчайшии; радуйтеся, во бранех ободряющии и храбрость возбуждающии; радуйтеся, тепле за Христа живот положившии и крестом Его хвалящиися; радуйтеся, к служению отечеству призывающии; радуйтеся, заблудших на путь истины приводящии; радуйтеся, окаменелая и ожесточенная сердца умягчающии; радуйтеся, нищих питателие и скорбящих утешителие; радуйтеся, Божественное поприще добре совершившии; Радуйтеся, Давиде с Константином, мудрии, мужественно претерпевшии, храбрии мученицы!
Егда уведа лютый он Мурван Глухий о постигшем их, воздвижеся на брань и мщение грузином и, пришед с безчисленным воинством, начат избивати и истребляти всех; вы же, срамляющиеся возвратитися вспять, многажды ударили есте на скверного оного амира, но, зело утрудившеся от брани, впадосте в руце лютых врагов и, яко отроцы в пещи, приносили есте Богу жертву хвалы: Аллилуиа.
Егда возвестиша скверному оному Глухому ятие ваше, радостнейшее и приятнейшее ему, воздвиже руце на небо и возвеличи лжезаконника Мухаммеда; вы же стоясте посреде безбожных, мужественнии, твердо и непоколебимо, яко столпи, и Христа, Бога истиннаго, непрестанно проповедасте; Егоже молите ныне, подвигом победившии, да избавит от всякия скорби и печали поющих вам:
Радуйтеся, братским умом сочетаннии; радуйтеся, Божественным советом утвержденнии; радуйтеся, упованием на Господа и мужественною крепостию вооруженнии; радуйтеся, силою Распятаго ободреннии; радуйтеся, на поприще подвига мужественно вшедшии; радуйтеся, агнцы Божии, стопам Пастыря добраго последовавшии; радуйтеся, кровию подвигов ваших, яко багряницею, просиявшии; радуйтеся, сослужебницы и сподвижницы, безконечнаго Царствия сонаследницы; радуйтеся, в лице мучеников водворившиися; радуйтеся, ко славному лику отцев, за веру и землю живот положивших, приложеннии; радуйтеся, блаженнии и с благословением поминаемии; Радуйтеся, Давиде с Константином, мудрии, мужественно претерпевшии, храбрии мученицы!
Егда поставиша вас пред амиром Мурваном, ревность Божественная паче ободри вас, и дерзновенно обличасте последователя лжепророка, иже понуждаше вас ради суетныя жизни погубити безсмертную оную жизнь, и дела его обличасте; тако и нам даруйте Божественную ревность об отечестве, чистоту жития и страх Божий, да сердце наше не будет хладно слышати Божественная учения и славити и пети Богу: Аллилуиа.
Слышав мучитель словеса ваша премудрая, исполнися гнева зело и повеле мучителем бити вас жезлием; вы же терзания плоти подъясте усердным умом и полки безбожных с вождем их низложисте; тако и на нас призрите и отжените от нас искушения и бесовская нападения ходатайством вашим, да, невредимо сохранени, хвалимся и глаголем по силе нашей:
Радуйтеся, в плене Божественное благородство сохранившии; радуйтеся, силою духа немощь человеческую покрывшии; радуйтеся, воинской храбрости учителие; радуйтеся, пещь беззакония росою терпения угасившии; радуйтеся, дерзость богоненавистников смирившии; радуйтеся, ухищрения еретиков разрушившии; радуйтеся, варварския дерзости укротившии; радуйтеся, языком огненным многосоставную ложь попалившии; радуйтеся, от коварства человеческаго и прелестей диавольских избавителие; радуйтеся, ближних соединителие и врагов низложителие; радуйтеся, всякаго блага и богоугоднаго насадителие; Радуйтеся, Давиде с Константином, мудрии, мужественно претерпевшии, храбрии мученицы!
Мнящу всезлобному оному амиру терпение ваше победити и прельстити, лукавым ласкательством глаголаше мужественным мучеником: «Оставите суетную веру вашу и покоритеся закону Мухаммедову, да дарую вам безчисленное богатство и сотворю вас превыше всех военачальников моих»; но суетно бысть лукавство его, ибо прелестную оную славу и честь воинскую ни во чтоже вменисте желания ради Христа Бога и безстрашно воспевасте силу Его: Аллилуиа.
Желающе Царствия Спасова, единогласно отвещасте беззаконному: «О мучителю лукавый, Бог наш призва нас во свет, и мы готови есмы за имя Его на муки и смерть», и дерзновенно заградисте уста мучителю оному хульнику; тако и нам даруйте благодать единства и оживите образ нашея духовныя силы, да братским и единодушным подвигом служения Богу и отечеству противостанем коварству видимаго и невидимаго врага и речем благодарственное пение:
Радуйтеся, благочестия хранителие бодрии; радуйтеся, сладости мира сего ни во чтоже вменившии; радуйтеся, нетленнаго онаго вечнаго богатства искателие; радуйтеся, мнимое во грехе благополучие обличившии; радуйтеся, сети сопротивных борцев сокрушившии; радуйтеся, прелесть безбожных мученическим дерзновением разрушившии; радуйтеся, душетленная учения низложившии; радуйтеся, многоразличныя муки естеством тленныя плоти претерпевшии; радуйтеся, Божественную силу на земли утвердившии; радуйтеся, любве к Богу и отечеству насадителие; радуйтеся, свещи, мудрых просвещающия и безумных попаляющия; Радуйтеся, Давиде с Константином, мудрии, мужественно претерпевшии, храбрии мученицы!
Ни во чтоже вменисте гнев беззаконных и ниже устрашистеся, но дивное мужество показасте и, яко воини великаго Царя непобедимии, низложисте многоухищренное коварство врага; тако и ныне отжените всякую дерзость и гордыню от омраченнаго ума нашего и даруйте нам премудрость разсуждения добра и зла, да от пагубных сетей вражиих отступим и сподобимся трисвятаго пения: Аллилуиа.
Видя вас непобедимы, неистовый он амир разгневася зело и предаде вас в руце мучителей и злодеев, да мучат вас десять дней без покоя; вы же сокрушения членов и лютыя раны подъясте твердою верою и, ко древу пригвождени, начасте воспевати Спаса; ходатайствуйте ныне пред Ним, да до скончания века сохранит Иверию и народ Иверии, егоже избра, и покрыет нас от всякия ереси и чуждаго закона, да не отступим от святыя апостольския Церкве и, в заповедех Божиих ходяще, сподобимся восхвалити подвиг ваш:
Радуйтеся, многоразличныя волны и муки подъявшии; радуйтеся, глад и жажду мужественно претерпевшии; радуйтеся, коварство беззаконных оных мучителей немощным показавшии; радуйтеся, скверну неверия омывшии; радуйтеся, Божественным подвигом вашим безплотныя чины удивившии; радуйтеся, неразумием омраченных вразумляющии; радуйтеся, духовнаго мужества иверов укрепителие; радуйтеся, глубоко уснувшую совесть нашу пробуждающии; радуйтеся, скорбящих утешителие и лютых бед скории прогонителие; радуйтеся, православнаго воинства ободрителие; радуйтеся, уповающих на вас к подражанию добродетелей ваших возбуждающии; Радуйтеся, Давиде с Константином, мудрии, мужественно претерпевшии, храбрии мученицы!
Видевше вас волхвы беззаконнии в темнице мучимых, ласкательно прещаху вам лютыми мучении, аще не отвержетеся Христа, Господа и Бога живых и мертвых; вы же не стерпесте поругания Бога Создателя от человек безбожных и грешных, но мужественно укористе ласкательства их и Укрепляющаго вас славили есте пред беззаконными: Аллилуиа.
О безстрашное мужество, друзи добрии и братие прекраснии! Ибо, злостраданием изнуренни, глаголасте мучителем: «Познайте Создателя вашего»; они же заткнуша уши своя, подобно глухому аспиду, и различными муками телеса ваша изнуриша, блаженнии; но удивишася мужеству вашему, ибо смерть и страдание в радость вменисте и, подобно Избавителю вашему, стремилися есте к подвигом даже до смерти; сего ради двема славным, непобедимым мучеником и сильным воином сице вопием:
Радуйтеся, в темнице молитвою и псалмопением Бога славившии; радуйтеся, христианския Божественныя премудрости проповедницы; радуйтеся, тьму темницы и узы мужественно претерпевшии; радуйтеся, овцы словесныя и приношения духовная, любве ради Христовы кровь излиявшии; радуйтеся, нападения мучителей низложившии; радуйтеся, волхвов и прорицателей чародейство разрушившии; радуйтеся, лукавство их победою обличившии; радуйтеся, сильных и храбрых, о богатстве мышцы своея хвалящихся и о множестве людей превозносящихся, посрамившии; радуйтеся, верным честь подающии; радуйтеся, изменников и отступников отечества устрашающии; радуйтеся, скверну суеверия изглаждающии; Радуйтеся, Давиде с Константином, мудрии, мужественно претерпевшии, храбрии мученицы!
Егда связанных, яко агнцы, приведоша вас на заклание ко брегу реки, с радостию предстасте на поприще мученическаго подвига и тепле молистеся Всеблагому Богу, да мощи ваша Божественною силою прогоняют страсти и имена ваша, с верою поминаемая, исцеляют недуги и болезни; тогда глас Божественный услышасте свыше во слух всем, обещавый дарование благодати помощи, и с молитвою и пением предасте души ваша Богу: Аллилуиа.
Егда услышаша глас он с небесе, добре исполняющий моление ваше, не уразумеша чудесе сего неблагодарнии оны мучителие и, камени обвесивше и связавше, ввергоша вас в великую реку Риони, идеже приясте Божественную кончину и, победою украшени, венчани бысте от десницы Божия; и ныне ходатайствуйте пред Ним, да насадит в нас страх и ненависть ко греху и любовь к добродетели, да достойно и свято ходим путем отцев и дедов наших и ублажаем вас с любовию:
Радуйтеся, светильницы пресветлии, мрак безбожия разгоняющии; радуйтеся, любве ради Божия и верности ради народа себе предавшии; радуйтеся, немилостивую смерть с благодарением приявшии; радуйтеся, от Господа власть над духи нечистыми приявшии; радуйтеся, ходатайством вашим двери Божественныя милости отверзающии; радуйтеся, народу грузинскому сладость благочестия от Господа испрашивающии; радуйтеся, плодом мужества вашего одержимых сном лености укрепляющии; радуйтеся, честною кровию вашею Церковь иверскую украсившии; радуйтеся, повестию подвигов ваших верных сынов Грузии и рабов верных утешающии; радуйтеся, забывающим отечество свое и закон гнев наводящии; радуйтеся, злыя и чуждыя нравы и обычаи отсекающии; Радуйтеся, Давиде с Константином, мудрии, мужественно претерпевшии, храбрии мученицы!
Уразумеша Божественное величие ваше служители ваши, егда видеша чудеса превыше естества — три оны столпы света и телеса ваша, сияющая на воде светлее солнца, — и, изнесше вас с честию, положиша под престолом, в притворе церковнем, и, подвиг ваш повествующе, приношаху вам похвалу пения и хваляху Подателя вам победы: Аллилуиа.
От странного и страшного видения ужасеся царь Баграт, егда во сне явистеся ему, воини Христовы, вооружени, и возвестисте место погребения вашего; тогда подвигнуся духом благочестивый царь и на месте том созда монастырь прекрасный, в церкви же в раце положи мощи ваша нетленныя и невредимыя, во утверждение православныя веры и в знамение безсмертия, да вси покланяются им, яко сокровищу, святыню носящему, и глаголют похвалы ваша:
Радуйтеся, всесветлии поборницы и мученицы истины; радуйтеся, памятницы веры и печати твердости; радуйтеся, адаманти мысленнии терпения; радуйтеся, купно подъявшии лютое оное искушение; радуйтеся, мужественно обличившии закон, хитростию человеческою сплетенный; радуйтеся, мечи, отсекающии плевелы прелести Мухаммедовы; радуйтеся, делателие подвига воинскаго и мученическаго; радуйтеся, приемницы венца нетления; радуйтеся, благоуханнии цвети рая; радуйтеся, немилостиво отсеченнии лозы винограда Христова; радуйтеся, камени драгоценнии, светила Церкве иверския; Радуйтеся, Давиде с Константином, мудрии, мужественно претерпевшии, храбрии мученицы!
Егда боговенчанною землею нашею дерзостно овладеша невернии, иже не ведяху силы Божия, подобно оным варваром-нападателем разориша «Мокви» и оскверниша всечестную и святую усыпальницу вашу; и аще и ниоткуду бяше способа избавления и помощи, Вседержитель Господь благоволи явити Божественную славу вашу, да тако усердно украсим вас и принесем Богу благодарение хвалы: Аллилуиа.
Егда озверевшии оны богоборцы многострадальныя мощи ваша, яко мужественных четыредесяти, безчестно вергоша на колесницу и спешаху ввергнути в реку Риони, Бог чудес разруши умысл их, и не возмогоша приближитися ко брегом реки, ибо град и дождь лютый, яко стена непоколебимая, воздвигошася пред хулителями и исповедником Христовым подаваху утешение и мужество, да вси, слышавшии чудеса ваша, светом духовным исполнятся и, яко непоборимыя столпы и неразрушимыя стены грузин, непрестанно вас ублажают:
Радуйтеся, венцем мученическим и непобедимыми воины Христовыми явльшиися; радуйтеся, знамении безбожных и развращенных смущающии; радуйтеся, на хулителей Духа Святаго гнев наводящии; радуйтеся, коварством народ Господень растлевающих сокрушающии; радуйтеся, разорителей святилища и гонителей священства ужасающии; радуйтеся, от злаго небрежения и безстудия избавляющии; радуйтеся, правоверных утешителие и зловерных посрамителие; радуйтеся, в сердцах боголюбивых благодатную радость распростирающии; радуйтеся, бодренно и трезвенно жити научающии; радуйтеся, душ пробудителие и грехов наших обличителие; радуйтеся, в Православии мудрствующим народоначальником и судиям заступницы и скорослушателие; Радуйтеся, Давиде с Константином, мудрии, мужественно претерпевшии, храбрии мученицы!
О, коликое величие стяжа вам мужество, мученицы! Ибо мощи ваша, Божиим промыслом в музеи положенныя, яко источник благодати и множества знамений, непрестанно источаху исцеление душ и телес и под насилием порабощенных укрепляху во время оно богоборчества; ободренное же собрание верных обильно приимаше благодать и исцеление и сладкогласно пояше Создателю всех: Аллилуиа.
Егда умыслиша оны насильницы посрамленныя мощи ваша возвратити тайно тамо, в усыпальницу вашу, да не ощутят мученолюбцы, безчисленный народ и множество грузин с радостию подвигошася во сретение ваше и, отвергше страх христоненавистников, светильники и свещами просветиша невидимую ону тьму мрака и, тотчас притекше в «Мокви», хваляху вас, яко от Бога дарованных теплых ходатаев:
Радуйтеся, светлостию знамений и блистанием подвигов ваших двема светилома мира уподобльшиися; радуйтеся, от святыя сея обители, яко от реки Едемския, потоки жизни по лицу земли и рода нашего разливающии; радуйтеся, немощное прошение приемлющии и духовная дарования обильно подающии; радуйтеся, богохульством обезбоженных посрамляющии; радуйтеся, христиан, от них ужасшихся, духовною радостию исполняющии; радуйтеся, силою мощей ваших духи нечистыя прогоняющии; радуйтеся, верным сладкий свет победы простирающии и укрепляющии; радуйтеся, сердца, волнами мира поколебанная, в благочестии утверждающии; радуйтеся, души, мраком облеченныя, просвещающии; радуйтеся, к молящимся милостиво приклоняющиися и чтущих вас ободряющии; радуйтеся, пламень страстей и лютыя недуги угашающии; Радуйтеся, Давиде с Константином, мудрии, мужественно претерпевшии, храбрии мученицы!
Ныне ликует Церковь грузинская во память вашу и красуются пределы Аргветския, паче же хвалится «Мокви» и всем верным приобщает радость и нескудно разделяет благодать истинную и милость; сего ради притецем ко прекрасной обители сей и к месту упокоения мощей ваших, да святыню вашу тепле облобызаем и гласом благодарения хвалим Бога: Аллилуиа.
О, чудо Божественныя любве и благодати! Ибо и по смерти светлее солнца сияете концем земли нашея и из раки проповедуете Христа Бога; Того Единаго молите, да отвратит гнев, праведно на ны грех ради наших подвигнутый, и разрушит дерзость безчисленных врагов наших, иже присно насилуют и утесняют нас, и дарует безмятежное и разумное житие восхваляющим вас:
Радуйтеся, великоименитии и славнии, яко воини Господни бысте мученичеством и доныне стяжасте имя безсмертия; радуйтеся, соединеннии неразлучно, яко чтим мучения ваша общая и единую смерть, ихже ради прославистеся; радуйтеся, яко благоизволи Христос всесвятыя мощи ваша престолом Своим положити и верным ходатайством вашим подает утешение; радуйтеся, яко имамы храм ваш славный, яко сокровище благодатей неоскудных, и приемлем в нем обильно милость и благословение; радуйтеся, яко прослави Бог святую память вашу, паче же раку честных костей ваших; радуйтеся, яко имамы святую раку вашу, яко богатство духовное и сокровище Божественное, и, с верою притекающе облобызати ю, сподобляемся добраго исполнения прошений; радуйтеся, яко кости ваша обнаженныя от царей и святителей велико-честно почитаются; радуйтеся, помощницы нераздельнии и непобедимии, яко, прикасающеся мощем вашим, душею и телом исцеляемся; радуйтеся, яко вси вернии подвизаемся приступити к раце мощей ваших и почерпаем благодать и знамения исцелений; радуйтеся, велицыи чудотворцы, яко знамения и чудеса, от Бога данныя, совершаете и обуреваемым подаете избавление и спасение; радуйтеся, яко мученическое хранилище костей ваших благоухает всем поющим вам; Радуйтеся, Давиде с Константином, мудрии, мужественно претерпевшии, храбрии мученицы!
О, во бранех непобедимии воини пресветлии и в скорбех непостыдныя руце подающии, богоносии Давиде и Константине, всехвальнии мученицы! Воинство земное пременили есте на воинство небесное и ныне с безплотными чинми присно радуетеся на небесех, с нимиже молите Христа, Царя нашего, Единаго Многомилостиваго, да помилует и спасет нас от грехов лютых, и немощей, и искушений, да избежим горьких оных мук вечных и присно с вами поем Богу, дивному во святых: Аллилуиа.
Сей кондак трижды; потом икос 1 и кондак 1.
Единство братства совершисте положением себе за Христа и, вознесшеся на небо, равныя чести и славы сподобистеся и от Царя всех приясте венец славы и обетованную оную благодать исцеления и избавления от скорбей, и исцеляете присно величающих вас и избавляете от напастей восхваляющих вас:
Радуйтеся, истиннии исповедницы правыя веры; радуйтеся, сладостно носящии иго Божественное; радуйтеся, мечи обоюдоострии, отсекающии злочестие; радуйтеся, столпи непоколебимии мужества; радуйтеся, образи Божественнаго воинства; радуйтеся, похвало рода вашего; радуйтеся, крепцыи мстителие врагов картлосиан; радуйтеся, жертвы и приношения явленная Христу Богу; радуйтеся, славо и крепосте отечества нашего; радуйтеся, образи победоносия предков наших; радуйтеся, твердыя стены Церкве иверския; Радуйтеся, Давиде с Константином, мудрии, мужественно претерпевшии, храбрии мученицы!
Песнопения достоин всесвятый подвиг ваш, и имена ваша велия хвалы, воини пресветлии и мученицы дивнии; сего ради похвалами украшаем вас и молим: приимите малое сие пение наше и от всякия страсти и соблазна избавите восхваляющих вас: Радуйтеся, Давиде с Константином, мудрии, мужественно претерпевшии, храбрии мученицы!
О добропобеднии мученицы Христовы, мужественно претерпевшии, Давиде, воине искуснейший, и Константине, юноше премудрый, молящих вас скорыя помощницы и милости подателие, пресветлии князи Аргветстии!
О пресветлая и великая украшения мучеников, Давиде, непобедимым подвигом просиявый, и Константине, умом во страданиих твердый! Вознесшеся от плоти к вожделенному вами Богу, даровали есте всехвальныя мощи ваша святей Церкви, во свет и венец благодатей, и покланяемся им и молим вас: помяните нас пред Богом и сиянием святыни вашея угасите тайну беззакония, на возлюбленный народ наш воздвигнутую, и покрыйте нас от сонмища еретиков, еже есть «мерзость запустения», да не рекут безбожнии и язычницы: где есть Бог их, на Негоже уповаша? Будите теплии ходатаи нас грешных ко Христу, да сохранит нас от сети вражия и от междоусобныя брани и дарует нам верна и разумна мужа, благоугодна царя и вождя, яко Давида Израилю, иже силою Креста возставит разрушенное единство отечества нашего и, якоже древле, вознесет достоинство и крепость земли, жребия Богородицы, и рода нашего. Укрепите в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священный и монашеский чин, военачальников и градоначальников, христолюбивое воинство, и благодетелей наших, и всех православных христиан.
О красото мучеников и подвижников, наставницы и светила наша, многоплодныя делателие Царевы, Давиде, великое светило мира, и Константине, сосуде мужества! Яко имущии силу, от Бога дарованную, ходатайствуйте пред Богом, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с вами славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, святых великомучеников, князей Аргветских, и всех святых, помилуй нас. Аминь.
Автор-составитель: Тинатин Мчедлишвили
