Акафистное пение святому Иотаму Зедгенидзе, положившему душу свою за царя
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй (12 раз). Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Слава Отцу и Сыну и Святому Духу, и ныне и присно и во веки веков. Аминь.
Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже наш, слава Тебе.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Похвалами ублажаем тя, досточтимый Иотаме, и просим от тебе помощи; ты же, яко имея дерзновение велие, умилостиви о нас человеколюбиваго Господа, да препояшет нас силою Своею непобедимою на враги наша видимыя и невидимыя, да обрящем покой и радость непреходящую, похвалами воспевающии тя: Радуйся, святый Иотаме, любве ради к народу и верности ради отечеству положивый душу свою за царя!
Бывый совершен возрастом, непобедим умом и непреклонен духом, подвизался еси паче немощи естества человеческаго, и положил еси душу твою за царя, и народ твой избавил еси от грядущия беды и искушения; и ныне не презри моления нашего и буди нам ходатай пред Богом, да до скончания века сохранит Иверию и народ иверский, да помощию твоею хвалимся и ублажаем тя усердно:
Радуйся, княже и военачальниче, несокрушимый памятниче мужества; радуйся, столпе непоколебимый крепости; радуйся, великий искусниче одоления врагов; радуйся, щите, защищаяй народ твой; радуйся, мечу обоюдоострый, отсекаяй злобу; радуйся, образе Божественнаго воинства; радуйся, славо земли и веры; радуйся, образе доблести и разума предков наших; радуйся, мужественный и избранный всаднице, к храбрости подвизаяй; Радуйся, святый Иотаме, любве ради к народу и верности ради отечеству положивый душу свою за царя!
Егда прогневася Господь на христианы грех ради их, взя султан Константинополь, и вознесошася турки, и начаша зло творити и опустошати народы, во Христа верующия; во время же оно наипаче возвысися атабег Самцхийский Кваркваре и, отступив от царя Георгия, непрестанно подвизашеся разрушити единство Грузии; ты же верен был еси богопомазанному оному царю, народолюбец и хвалитель Божий: Аллилуиа.
Слышав царь отступление атабега, собра воинство и пойде в Самцхе, и егда постави стан в пределех Паравани, подослаша к нему изменники, да убиют помазанника Божия; ты же, слышав страшный умысл отступников, ужасеся и опечалися зело, яко вменил еси дело оно в посрамление народа и в разорение единства; тако и ныне тщетны сотвори страшныя козни тех, иже злобою подвизаются на вред нам, и невредимы соблюди нас от нападения врагов, да с радостию ублажаем тя и восхваляем светлое твое богатырство:
Радуйся, от древних нарочитых азнауров прозябый; радуйся, от юности добродетелелюбием украшенный; радуйся, благостию и человеколюбием просиявый; радуйся, богодухновенными книгами наученный; радуйся, житием преславным совершенный; радуйся, милосердием явленный; радуйся, любовию к отечеству разжженный; радуйся, мужественною крепостию вооруженный; радуйся, благодатию благочестия исполненный; Радуйся, святый Иотаме, любве ради к народу и верности ради отечеству положивый душу свою за царя!
Егда вскоре поведал еси дело сие царю, он не верова измене и прогневася на тя яростию; ты же паки уверял еси его и возвещал еси злый оный умысл ближних его; сего ради подвизаем тя ходатайствовати к Богу, да призрит на ны, не имущия ответа пред Ним, и да исполнит нас бодрости Божественныя, да избегнем гнева Божия и благодарение и славу воздаем Богу: Аллилуиа.
Ходящу тебе в заповедех Божиих и в оправданиих Его, даде ти Господь благое изволение, и твердость, и силу положити душу за царя, и глаголал еси ему усердно: «Аще не истинно слово мое, ныне молю тя, да в нощь сию аз возлягу на ложи твоем, и аще убиют мя, мнящии мя царем, не забуди сынов моих». Тако и ныне сохрани и нас от всякия скорби и напасти, да в любви и мире живем и глаголем похвалы твоя:
Радуйся, Господем от всех избранный; радуйся, благодатию благотворения просвещенный; радуйся, верностию и добродетелию просиявый; радуйся, в утешение Церкве и в украшение Грузии явленный; радуйся, во избавление народа твоего и подвижником посланный; радуйся, двоедушия и коварства ненавистниче; радуйся, силою Божиею добре вооруженный; радуйся, твердостию великих подвигов твоих украшенный; радуйся, с мученики Христовыми сопричтенный; Радуйся, святый Иотаме, любве ради к народу и верности ради отечеству положивый душу свою за царя!
Излияние крове вожделеннее ти бысть, о Иотаме, агнче Христов блаженный, нежели наслаждение временное, и заповедал еси сыном твоим положити душу за народ свой и отечество, и, наставляя их, досточтимый, разжигал еси ревностию и Божественною любовию; и ныне не престани моляся Богу, да в пещи соблазнов и скорбей окропит и нас росою благодати твоея, да положим душу нашу за непорочность закона и за братию нашу, и, егда Бог несумненно дарует нам жизнь вечную, присно с тобою воспеваем Ему песнь хвалебную: Аллилуиа.
Ни во что вменил еси страх смерти и не возвратился еси сиротства ради чад, но верности ради отечеству и мирнаго ради сохранения народа твоего честь и славу, данную ти от прадед в наследие, оставил еси и умыслил еси спасти царя; и ныне умертви вся умышления враг моих, хотящих погибели моея, и подаждь нам, чтущим и восхваляющим тя, милость, яже от Христа:
Радуйся, благословеннаго винограда отечества делателю неутомимый; радуйся, в сердце твоем страх Божий и любовь к ближнему присно насадивый; радуйся, пещь скорбей и печалей угашаяй; радуйся, мужеством и храбростию малодушныя и разслабленныя посрамляяй; радуйся, немощных крепосте и сильных низложителю; радуйся, нищих прибежище и нагих одеяние; радуйся, безпомощных праведный судие, вдовиц и сирот заступниче; радуйся, бодренно и трезвенно жити научаяй; радуйся, ненавидящих правду и злое за благо полагающих запрещение; Радуйся, святый Иотаме, любве ради к народу и верности ради отечеству положивый душу свою за царя!
Аще и не верова царь беде оной воистинну, но великодушия, человеколюбия и мужества твоего ради прият тя с великою честию и рече тебе, на страдание грядущему: «Аще и не верую беде сей, благодарен тебе есмь и дарую ти высокое достоинство»; мы же ублажаем дивное твое самоотвержение и славим Бога, Создателя всех: Аллилуиа.
Удиви убо царя твердость твоя и безстрашное поведение, и, исполнити всякое прошение с клятвою обещав, рече тебе: «Аще тако предаеши себе на смерть, присно заступник и покровитель буду всему дому твоему и сродником»; ныне и нас помилуй и моли Христа, Спаса нашего и Бога, да не воздаст нам по правде за злая дела наша и да подаст оставление грехов молящим и поющим сия:
Радуйся, светом благочестия души, во тьме пребывающия, просвещаяй; радуйся, в народе нашем дух премудрости и благочестия обновляяй; радуйся, благодатию Божиею неведущия умудряяй; радуйся, теплохладную веру оживляяй; радуйся, жестоковыйных и умом непокорных вразумляяй; радуйся, многих язв исцелителю; радуйся, злоумышления врагов разрушителю; радуйся, смрада безсовестия очистителю; радуйся, народу твоему от Господа сладость благочестия испрашаяй; Радуйся, святый Иотаме, любве ради к народу и верности ради отечеству положивый душу свою за царя!
Егда даде ти царь соизволение, возсия поприще победолюбцев, и текл еси путем тесным и прискорбным, и, уготовлься смерть претерпети, возгласил еси премудро и мужественно: «Ныне и аз да умру вместо царя, яко тако благоугодно Богу, спасения ради народа нашего», и благословил еси Христа, давшаго ти благое изволение, и, благодатию умудрен, пел еси Ему, яко Светодавцу: Аллилуиа.
В нощь ону, егда внидоша изменницы в шатер царев, молитвою и верою вооружен, глаголал еси к себе: «Радуйся, о Иотаме! яко за царя отдаеши жизнь твою смертную и от Христа, яко от безсмертнаго Царя, приимеши в воздаяние жизнь безконечную», и предавал еси душу твою Богу; они же, видевше тя возлежаща на одре, мняху тя царя, и, егда яко овча заклаша тя мечем, стяжал еси благодать верности и венец мужества; и ныне, сопричтен преславному лику отцев, положивших души за веру и землю, не престани моляся, да сподобятся оставления грехов поющии тебе:
Радуйся, немилостиво мечем изсеченный и яко жертвенное агнча закланный; радуйся, агнче очищенный, небесному жертвеннику принесенный; радуйся, со святыми во Иерусалиме небеснем водворивыйся; радуйся, вольным приятием смерти отступников обличивый; радуйся, покровом благодати твоея народа нашего хранителю и покровителю; радуйся, коварных и двоедушных посрамителю; радуйся, верных царю духовною радостию исполняяй; радуйся, падший дух христианский возращаяй; радуйся, гнев Божий удержаваяй; Радуйся, святый Иотаме, любве ради к народу и верности ради отечеству положивый душу свою за царя!
Заутра поспеши царь в шатер свой и, видев тело твое, в крови плавающее, прогневася зело и горькими слезами оплака тя, враги же и изменники своя ят, и ни един избеже рук его; ныне и мы прогневахом Господа Бога нашего лукавым житием, оскверненным умом и нечистым поведением; но ты ходатайствуй пред Ним, да насадит в нас страх и ненависть ко греху и любовь к добродетели, да помощию твоею хвалимся и присно восхваляем благость Его: Аллилуиа.
Тогда подвижеся царь благодарностию и, призвав сыны твоя, исполни их милости, и старейшему дарова крепость Горисджвари и имения, и вручи ему спаспетство Картлийское и амилахорство царскаго двора; они же добре прияша честь сию и, усердно служаще царю и народу, благодаряху тебе, яко вину возвышения своего, и славяху Бога; к Нему посылаем тя ходатаем, преславне, да даст нам сердце смысленное и мудрое разсуждати благое и злое, да мужественно подвизаемся противу страстей и сподобимся принести тебе пение:
Радуйся, мужественный и непобедимый, трудом и кровию подвигом добрым подвизавыйся; радуйся, вместо преходящия славы непреходящий свет приемый; радуйся, немилосердие врагов укротивый; радуйся, силою Божиею коварных и двоедушных посрамляяй; радуйся, отчаянным и заблудшим правый путь показуяй; радуйся, от веры уклонившихся и беззаконие творящих запрещение; радуйся, самопожертвованием за царя потомком твоим Шио-Мгвимскую обитель в родовую усыпальницу стяжавый; радуйся, дивным подвигом твоим азнаурское достоинство их на княжеское пременивый; радуйся, роду Амилахвари основание положивый; Радуйся, святый Иотаме, любве ради к народу и верности ради отечеству положивый душу свою за царя!
Слышавше грузины самоотвержение твое, како убиен был еси вместо царя, всякою добротою совершеннаго и украшеннаго, иже подвизашеся и тщашеся о единстве Грузии, достойно восхваляху величие мужества твоего и, благодарни ко всемилостивому Богу, приношаху Ему сию хвалу хвал: Аллилуиа.
Зело мужествен и верен явился еси, всехвальне Иотаме, егда уготовился еси принести себе и исповедати заповедь Господню, глаголющую: «Больши сея любве никтоже имать, да кто душу свою положит за други своя», еже и сотворил еси — добродетель высокую, неизреченную и всякия хвалы достойную:
Радуйся, столпе премудрости, до небес достигаяй; радуйся, стено непоколебимая благочестия; радуйся, бездно неизследимая любве; радуйся, насадителю добраго нрава и богоугоднаго жития; радуйся, море неисчерпаемое человеколюбия; радуйся, подвигом твоим Божественное течение добре совершивый; радуйся, вместо венца мужества небесный венец возложивый; радуйся, покровом благодати твоея народа грузинскаго хранителю и покровителю; радуйся, совесте и похвало рода нашего; Радуйся, святый Иотаме, любве ради к народу и верности ради отечеству положивый душу свою за царя!
Аще и прежде ведал еси смерть твою, блаженне, положил еси живот и душу твою за народ твой и за царя, и избавил еси его от страдания и смерти; тако и ныне волцы хищнии обыдоша нас растлити души и телеса наша; но ты помози нам, досточтимый Иотаме, и, аще и недостойни есмы грех ради наших, моли Христа Бога нашего, да даст нам пастыря верна и праведна, благоугоднаго царя и предводителя стад своих, да всяким духовным и телесным благом возрастит жребий Богородицы, народ наш, во время сие умаленный и смиренный, и присно славит Иисуса, Спаса и Бога: Аллилуиа.
О, коликую славу стяжа тебе дивное твое самоотвержение, яко, егда мужественнейшее подвигов любление показал еси, Церковь Грузинская во всеобщее ведение во святых тя причте и прославление и поминовение твое всем стадом своим уставила есть; мы же чтим тя, воине Христов Иотаме, и, в молитвах предстояще, хвалим тя и славословим по силе нашей:
Радуйся, солнце грузинское многосветлое, подвигом твоим мрак отечества озаривый; радуйся, светильниче Православныя Церкве, тьму неразумия отгоняяй; радуйся, подвиги и находящия искушения претерпевый; радуйся, сердца, волнами мира поколебанная, благочестию научаяй; радуйся, звоне духовнаго бодрствования; радуйся, любве к Богу и отечеству утвердителю; радуйся, всяких злых обычаев отсекателю; радуйся, от сетей сатанинских и от нашествия иноплеменных хранителю; радуйся, братоненавистников и коварных человек обличителю; Радуйся, святый Иотаме, любве ради к народу и верности ради отечеству положивый душу свою за царя!
Имевый велие сострадание ко царю и избавивый его от беды, виждь ныне сети безчисленных врагов, злокозненно распростертыя на единородныя и единоверныя грузины, и избави нас от взаимнаго насилия и междоусобныя брани, яко укрепление народа единства требует, да, любовию к Богу и отечеству единомысленно связани, благодарим и славим Создателя всех: Аллилуиа.
Якоже явился еси избавителем народу нашему и царю, тако и ныне услыши молитвы наша и помяни нас пред Богом, да угасит тайну беззакония, воздвигнутую на народ наш, и да дарует нам преподобных отцев и мудрых наставников, да не до конца погибнет Грузия, земля сия, жребий Богородицы, но вси да творим правду и возглашаем пения сицевая:
Радуйся, свыше посланный во освящение народа твоего; радуйся, великий искусниче одоления врагов; радуйся, учителю мужества и великодушия; радуйся, столпе непоколебимый праведнаго суда; радуйся, цвете неувядаемый мысленнаго рая; радуйся, красото светлаго лика грузинскаго; радуйся, со исповедники Христовыми сопричтенный, мзду делания приемый; радуйся, твердосте скипетра царей; радуйся, сыне преславный отечества нашего; Радуйся, святый Иотаме, любве ради к народу и верности ради отечеству положивый душу свою за царя!
Дивное твое самоотвержение не погрузися во глубину забвения, яко древния летописи возвещают нам житие твое, како подвизался еси во славу Божию и в процветание Иверии; тако и ныне ходатайствуй о нас ко Господу и испроси нам, да отвратит гнев, воздвигшийся на ны множества ради грехов наших, и, яко Лазаря, возставит отечество наше, Грузию, в первую славу, да не будем попрани от хищных иноплеменных язык и родов, но, на Христа уповающе, восхваляем державу Его: Аллилуиа.
Праведно чтут тя и хвалятся Зедгенидзе со Амилахвари и благодарят тебе, святе, именитаго и преславнаго праотца, яко вину многих благ; сего ради и мы с ними хвалим тя, богопрославленный Иотаме, и ходатая посылаем тя ко Христу, да тобою будем воинство Божие, противостоящее и низлагающее вся враги Его, и ублажаем тя, яко стену и покров наш:
Радуйся, потоком крове твоея ругание заговорщиков угасивый; радуйся, многосплетенныя козни вражия разрешивый; радуйся, добрый посредниче и коварства отгонителю; радуйся, пламень страстей и лютых недугов утоляяй; радуйся, плодом мужества твоего последующих тебе ободряяй; радуйся, неистовствующих богоненавистников победителю; радуйся, жестокости и коварства ненавистниче; радуйся, даже доныне имя безсмертное стяжавый; радуйся, от картлосиан присно поминаемый; Радуйся, святый Иотаме, любве ради к народу и верности ради отечеству положивый душу свою за царя!
Явился еси светлым светилом, подвига победителю Иотаме, и, упразднив умысл изменников народа, возвеличил еси имя твое и род твой Божественным житием; ныне же сокруши дерзость тех, иже безбожием вооружишася на православныя, и избави нас от всякаго вреда злых человек, да временную жизнь добре пройдем и Христа восхваляем духом и истиною: Аллилуиа.
Яко мужественна и мудра знает тя собрание православных грузин, и памятником подвига явленным нарицаем тя, досточтимый Иотаме, и молим тя: просвети ныне нас, волнами греха омраченных и смущением мира всецело потопленных, и даруй нам мужество и честность, и тщетны сотвори сети и соблазны врагов, да сердцем правым вси ублажаем тя и похвалу сию приносим:
Радуйся, картлосианом с небесе дарованная твердосте, яко ублажаем древнюю славу и крепость грузин; радуйся, силою мужества просиявый, яко безстрашен был еси, яко безплотен, и сокрушил еси всякое оружие лютыя брани; радуйся, яко и по разделении всея Грузии сродницы твои бяху военачальники знамени Картлийскаго и моурави Горийстии; радуйся, яко потомцы твои паки славят Христа, давшаго им таковаго праотца, и восхваляют подвиг твой; радуйся, светильниче блистающий, яко озарил еси нощь измены; радуйся, оружием Креста огражденный, яко на поприще страдания явился еси совершенным воином; радуйся, яко сияеши во всех концех земли нашея, невечерний свет простирая; радуйся, славо исповедников и светлосте воинов, яко прослави подвиг твой Церковь Грузинская; радуйся, в скорбех непостыдный заступниче, иже всем, прибегающим к тебе, подаеши обильныя дары от источника неоскудныя благодати; Радуйся, святый Иотаме, любве ради к народу и верности ради отечеству положивый душу свою за царя!
О, в подвизе мужественный Иотаме! Не отврати молящих тя, но, к крепкому твоему заступлению и отеческой благодати и помощи припадающих, избави нас присно от многих сетей врагов видимых и невидимых, и во время суда изми нас от вечных горьких мук, да, тобою наставляеми, достигнем небеснаго Иерусалима и сподобимся с тобою славити Пресвятую Троицу: Аллилуиа.
Сей кондак трижды; потом икос 1 и кондак 1.
О, мученическою кровию украшенный воине светлый, и в скорбех непостыдный заступниче, молящих тя скорый помощниче и всех грузин стено и покрове, богоблаженне Иотаме!
О, мечем немилостиво пораженный и вместо царя пострадавый, подвига победителю, великий воине Иотаме! Помяни нас пред Богом и сиянием святыни твоея покрый землю Иверскую от ереси и от закона чуждаго, всем же живущим в ней даруй, якоже тебе, теплоту веры, братскую любовь к ближнему и Божественную ревность об отечестве, и без препятствия возставь нам от корене Давидова помазанника Божия, иже верою твердою оградит вся пределы Грузии и вознесет и возставит высоту и крепость нашу от земли забвения, да будем едино стадо и Господь да будет Пастырь наш. Многомощною силою твоею укрепи Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священный и монашеский чин, военачальников и градоначальников, христолюбивое воинство, и благодетелей наших, и всех православных христиан, и тезоименитых тебе и молящихся тебе возвеличи. Моли, всесветлый мучениче, возлюбленнаго тобою сладчайшаго Иисуса, да простит нам отступления, разорения и осквернения церквей, убиения служителей Божиих, измену, зависть и безчиния, убиения младенцев наших во утробе и иная множества прегрешений наших.
О, положивый душу за царя и отечество и народ твой от беды покрывый, мужественный воине Христов Иотаме! Благочестивым дерзновением ходатайствуй пред Богом, да дарует церквам славу, священству честность, начальником добре пасти народ, воином мужество, мирским безгрешность и женам целомудрие, нам же да возставит благочестие, правдолюбие, многочадие и милость ко вдовицам и сиротам; да дарует нам любовь к чистому житию, ненависть к непотребным делом и сокрушение сердца, венцы со святыми и наследие Царства Небеснаго, да и мы с тобою славим Отца и Сына и Святаго Духа, ныне и присно и во веки веков.
Достойно есть яко воистинну блажити тя, Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Слава, и ныне. Господи, помилуй (Трижды).
Господи Иисусе Христе, Сыне Божий, молитвами Пречистыя Твоея Матере, святаго Иотама Зедгенидзе, положившаго душу за царя, и всех святых, помилуй нас. Аминь.
Автор-составитель: Тинатин Мчедлишвили
