Акафистное пение святой великой мученице Варваре
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
В небесных обителех светло водворилася еси со Иулианиею и воинством мучеников, яко от Небеснаго Жениха обрученная; мы же почитаем тя, подвигом победившая мученице Христова Варваро, и молим тя: от всякия напасти избави и от недугов сохрани мужество твое поминающих и с желанием поющих: Радуйся, Невесто Христова непобедимая, великомученице Варваро!
Болезни и лютыя страдания разрешает и упраздняет память твоя, якоже испросила еси от Христа Бога, всехвальная Варваро, и аще кто призовет тя в молитве тепле, избавляеши от всякаго зла; сего ради и нас избави от всякия страсти, да по воли нечестивых ко беззаконию не преклонимся и глаголем по силе нашей:
Радуйся, розо прекрасная, от терний безплодных прозябшая; радуйся, крине девства, среди плевел идолослужения произрастший; радуйся, от Бога из язычников избранная; радуйся, чистотою и верностию просиявшая; радуйся, благодати исполненная и духовным чином украшенная; радуйся, упованием на Господа и мужеством благочестия облеченная; радуйся, бодрому и трезвенному житию научающая; радуйся, многими скорбьми правды ради гонимая; радуйся, яко Авель закланная и яко Исаак в жертву принесенная; радуйся, дево, ко Деве Царице приближившаяся; радуйся, на небесех со святыми лики соединившаяся; радуйся, нетленными мощми прославленная; Радуйся, Невесто Христова непобедимая, великомученице Варваро!
Егда прият царство Максимиан, воздвиже гонение велие на церкви и христиан люте избиваше; ты же, аще и в уединении воспитывалася еси в высоцем столпе, от отца идолослужителя созданнем, неприступный Свет просвети ум твой, и помышляла еси в себе, како возможно есть от темных идол создатися небу и земли? И сама отвещала еси: «Ни! Един есть Бог, нерукотворенный, и Сам есть Творец всех, Емуже подобает слава и хвала»: Аллилуиа.
Сияющей тебе благолепием плоти и красотою души, мнози явишася ищущии руки твоея, но ты не возлюбила еси земнаго жениха паче Небеснаго и, Невеста бывши Сыну Божию Иисусу Христу, твердо отвещала еси отцу твоему: «Не ведаеши ли, отче, яко ни во чтоже ми есть тленная сия доброта, и подобает ми принести чистоту плоти и духа и совершенную любовь Богу». Сего ради благодатию твоею радуемся и вопием усердно:
Радуйся, в дому отца твоего язычника в неге воспитанная; радуйся, разумом не детским, но мудрым избранная; радуйся, благодати благодеянием просвещенная; радуйся, от лестных идол к Богу истинному умом вознесшаяся; радуйся, светом богопознания просиявшая; радуйся, в истинном богословии Богом Словом наученная; радуйся, свыше дарованныя премудрости вместилище; радуйся, чистоты и целомудрия добрая хранительнице; радуйся, сладости правыя веры возлюбившая; радуйся, прелесть идолослужения возненавидевшая; радуйся, нищих заступнице и милостивая; радуйся, вдовиц ходатаице и сирот посетительнице; Радуйся, Невесто Христова непобедимая, великомученице Варваро!
Слышав отец твой намерение твое, повеле создати баню с двема окны, в память солнца и луны, да отвлечет ум твой от искания истины и обратит тя к наслаждению плоти, сам же отиде далече; тогда, от иных дев прияв светло веру, положила еси обет чистоты и девства и с мудрыми оными девами во единобожии славила еси и воспевала Святую Троицу: Аллилуиа.
Просветившуся Духом Святым сердцу твоему, облеклася еси во свет Христов крещением и, во плоти сущи, подобно безплотным жительствовала еси и служила еси Богу истинному; видевши же баню с двема окны, взыде к зиждущим баню и повелела еси сотворити три окна, и премудростию и разумом показавши таинство Святыя Троицы, изобразила еси перстом в бани знамение распятаго Христа Бога, славо мучеников; с ними моли Бога, да и нам даст разумение разсуждения добра и зла, да твоею силою духовною вооружившеся, сподобимся принести пение:
Радуйся, скверну отец и дедов оставившая и славу Божию проповедавшая; радуйся, Христа ради суетную жизнь возненавидевшая; радуйся, дево, от Рожденнаго от Девы Жениха Христа честно обрученная; радуйся, агнице Божия, доброму Пастырю последовавшая; радуйся, благодать богословия стяжавшая; радуйся, треми окны тьму многобожия прогнавшая; радуйся, постом и бдением плоть изнурившая; радуйся, молитвою на всяк час непрестанно, воздыханием слезным и смиренным пением присно Господу молящаяся; радуйся, печать Святаго Духа непорочну и неоскверненну соблюдшая; радуйся, миродержца Божественною благодатию низложившая; радуйся, всякия злыя нравы и пороки крепко поправшая; радуйся, чин жития дев христианских превознесшая; Радуйся, Невесто Христова непобедимая, великомученице Варваро!
Возвратився отец твой в дом свой, узре баню с треми окны и удивися; ты же хотяше обратити его к Богу и безстрашно учаше закону Христову: «Изведу тя, отче, от тьмы во свет; не веси ли, яко три окна сия суть, яже просвещают весь мир — Отец, Сын и Святый Дух, и Тому единому подобает благодарение и славословие»: Аллилуиа.
Не стерпела еси, Непорочная, беззакония отца твоего и, ревностию Божественною распаляема, лукавство его дерзновенно обличила еси и стоящия на высоте идолы низвергла еси; тогда исполнися гнева скверный он, ибо ослеплен бе душевным оком, и разъярися убити тя мечем; но тщетна бысть дерзость его, ибо, гонима от отца твоего, яко агница непорочная от злаго волка, притекла еси к доброму Пастырю Христу и, якоже первомученицу Феклу, камень прият тя; тако и ныне к тебе с благочестием прибегающих примири благому Богу, да вооружит нас силою Своею непобедимою на враги видимыя и невидимыя, да правою верою воспрянувше, возгласим «Радуйся»:
Радуйся, дево, среди язычников свято и непоколебимо пожившая; радуйся, дщи Небеснаго Отца честная, разве Небеснаго иного жениха не восхотевшая; радуйся, святых и блаженных мучеников подражательнице; радуйся, крест Христов на рамена твоя подъявшая; радуйся, волею твоею муки Его ради претерпевшая; радуйся, неправедных судилищ разорительнице; радуйся, от любезнаго отечества отлученная и небесное отечество избравшая; радуйся, от земнаго отца за веру Христову гонимая; радуйся, сквозь камень, повелением Божиим тебе разселшийся, прошедшая; радуйся, в пещеру дивно вшедшая; радуйся, миро благовонное, Церковь Христову облагоухающее; радуйся, всех православных утешение и злославных посрамление; Радуйся, Невесто Христова непобедимая, великомученице Варваро!
Видевше два пастыря, како искаше тебе беззаконный отец твой, един лукавый предаде тя и жилище твое возвести безумному; обрет же тя, в сокровенном месте седящую, злый Диоскор ят прекрасныя власы твоя и, влекущу тя в дом свой, растерзанная плоть твоя обагрися кровию, и ею обагреннии власы твои разсыпашася по пути; но ум твой ко Господу вознесен бе, блаженная, и вопияла еси мужественно: «Помощник мой Христос, аз раба Его есмь», и хвалила еси Укрепляющаго тя: Аллилуиа.
Забыв естественнаго закона любовь чадолюбия, отец твой затвори тя во тьме и мучаше гладом, сам же предста пред идолослужителем правителем и возвести ему, како призываеши Бога христианскаго; сего ради злый князь оный разгневася и повеле безумному привести тя; ты же моляшеся: «Посли, Господи, помощь мне свыше от святаго Твоего, да неоскверненно сохраню девство мое, и укрепи мя на супостаты Твоя и на диавола, да одолею ему и сокрушу его силою Твоею»; сего ради чада православныя Церкве восхваляем тя гласом велиим:
Радуйся, кровьми твоими брачною одеждою облекшаяся; радуйся, вместо плетеных власов небесный венец приявшая; радуйся, потоком крове твоея пламень прелести угасившая; радуйся, звездо, ищущим спасения путь показующая; радуйся, храбростию и мужеством твоим малодушных и разслабленных посрамляющая; радуйся, твердою верою злых духов победительнице и сокрушительнице; радуйся, нечестивая учения дерзновенно разрушившая; радуйся, свеще, мудрых просвещающая и безумных попаляющая; радуйся, помыслы велиаровы истребляющая и всякую скверну потребляющая; радуйся, Божественным огнем сердца наша возжигающая; радуйся, правыя веры и богопочитания насадительнице; радуйся, от нападения и зол невидимых врагов покрывающая; Радуйся, Невесто Христова непобедимая, великомученице Варваро!
Видев юность и красоту твою, Маркиан мняше обратити тя ко идолом, блаженная, и ласканием рече тебе: «Ведят бози, яко не хощу мучити тя, о Варваро, но пожри богом и избавишися страшных мук»; тебе же Дух Отчий даяше ответ пред мучители, и глаголала еси ему: «Не поколеба твердости моея ни благостию, ни биением, но уповаю на Бога, Творца всех, Иисуса Христа со Отцем Его и Святым Духом, единаго Бога истиннаго, да избавит мя от беззакония и тления, и пою Ему духом и истиною»: Аллилуиа.
Тогда исполнися гнева судия лжи и рече тебе: «Аще не послушаеши мене, уды твоя мечем изсечены будут, и огнь гнева моего пояст тя»; ты же твердо отвещала еси: «Ныне не покоряюся безумию вашему, ниже поклоняюся лживым оным идолом, глухим и немым, руками человеческими сотворенным, якоже рече пророк Давид: уста имут и не возглаголют, очи имут и не узрят… подобни им да будут творящии я и вси надеющиися на ня», и коварства его упразднила еси силою духа; сего ради, тобою хвалящиися, приносим тебе благодарственную хвалу сию:
Радуйся, пророка, царя и праотца Давида речения исполнившая; радуйся, проповеднице богоносная, апостолов Христовых подражательнице; радуйся, от путей истины заблудших обличительнице; радуйся, непрестанною молитвою искушения диавольская прогоняющая; радуйся, подвиги и находящия напасти подъявшая; радуйся, по учению их тьму многобожия разгонявшая; радуйся, коварства мучителей упраздняющая и идолослужение мужественно посрамляющая; радуйся, уста всех неверных заградившая; радуйся, от душетленных учений избавляющая; радуйся, коварства поразительнице и противных сил низложительнице; радуйся, в заступлениих теплая помощнице и молящихся тебе скорая послушнице; радуйся, суетным стремлениям узду налагающая; Радуйся, Невесто Христова непобедимая, великомученице Варваро!
Разгнева неразумнаго оного твердость твоя, и повеле бити тя воловьими жилами; зрящии же язвы плоти твоея плакаху горько и глаголаху тебе, кровию обагренней: «Исповеждь убо боги и избави себе от биения»; ты же ни во чтоже вменила еси прошение их и сице отвещала еси: «Вместо биений сих упокоения чаю от Господа моего Иисуса Христа со святыми девами, и Тому единому приношу благодарение и пение»: Аллилуиа.
Мняше Маркиан смерть твою, и ввержe тя в темницу, в место темное; ты же возвела еси очи и начала еси молитися: «Единородна есмь у матере моея, и отец мой остави мя; Ты же призри на мя, Боже, и посли росу исцеления, да умалит муку мою и болезни моя претворит в радость»; и се, услыша Господь глас моления твоего, и свет возсия в темнице, ибо явися тебе Христос со Ангелы и, исцелив от всех язв, рече: «Мир тебе, Варваро! Не ужасайся беззаконнаго оного судии, егоже укрепи диавол, но Аз с тобою стою и избавлю тя от всякаго зла»; ты же, обретши себе всецело невредиму, с радостию благодарила еси Бога; Того умоли ныне избавити нас от страстей душевных и недугов телесных, ублажающих тя и вопиющих усердно:
Радуйся, блаженнокрасная Невесто Господня; радуйся, судие суда и правды; радуйся, носительнице благаго ига Христова; радуйся, сосуде добраго нрава и разума; радуйся, громе Божественныя проповеди; радуйся, щите, хранящий благочестие; радуйся, мечу, отсекающий злочестие; радуйся, столпе мужества всенепоколебимый; радуйся, лозо винограда Христова, немилостиво обрезанная; радуйся, Божественная чаше горняго жертвенника; радуйся, смирно, в миро принесенная безсмертному Царю; радуйся, помощнице всякия мудрыя и мужественныя жены; радуйся, бисере честный Церкве Христовы; Радуйся, Невесто Христова непобедимая, великомученице Варваро!
Видевше тя стражие твои, молящуюся пред Богом, купно возопиша: «Велий Бог христианский, Иже исцели сию, и несть иного Бога болий Его»; слышав же Маркиан, ужасеся и повеле воином привести тя; ты же, изшедши из темницы, запечатлела еси вся уды твоя печатию Христовою и Божественным пением славила еси Бога: Аллилуиа.
Видев тя князь всецело здраву и невредиму, призываше тя поклонитися идолом и рече: «Принеси жертву богом нашим в знамение благодарности»; ты же возопила еси: «Бесов прелестных служителю, не буди любитель идолов глухих и немых, иже не могут видети, ниже помощи надеющимся на ня, но поклонися Христу, Иже распятся, погребеся и воскресе в третий день и крестом Своим укрепи мя на тя»; и се, мучителие твои возгласиша: «И мы веруем во Иисуса Христа, яко несть иного Бога разве Его»; сего ради усекоша главы их, и наследиша Царствие Небесное; тако и ныне умудри душу и ум наш о Бозе, святая, да, мужеством твоим вооружившеся, ублажаем тя благодарно и глаголем с похвалою:
Радуйся, Богом из тьмы в свет веры дивно призванная; радуйся, по всей земли, яко звезда, возсиявшая; радуйся, дивная отроковице, сильнейшая сильных явившаяся; радуйся, за распятаго Христа на древе повешенная; радуйся, терпением биений адаманта тверже явившаяся; радуйся, и самых мучителей к вере приведшая; радуйся, отступивших и отрекшихся обращающая; радуйся, мужество и непоколебимую твердость подающая; радуйся, клеветников и хулителей обличительнице; радуйся, от Господа власть над нечистыми духи приявшая; радуйся, злыми недуги одержимых исцеляющая; радуйся, неискусных и юных дев от страстных похотей покрывающая; радуйся, от сетей сатаниных и от нашествия иноплеменных хранящая; Радуйся, Невесто Христова непобедимая, великомученице Варваро!
Зело разгневася Маркиан и повеле повесити тя на древе, и строгати ребра твоя когтьми железными, и свещи горящия приносити; тогда мучители сотвориша тако и плоть твою опалиша огнем; множество же народа не противляшеся таковому злодеянию, разве едина благочестивая жена, именем Иулиания, безстрашно обличаше князя, и егда вопрошаше ю: «Коему Богу служиши, жено?» — «Христу, Богу истинному», — отвеща дерзновенно, и абие повеле мучити ю с тобою; вы же, биеми на позорищи, укрепляли есте друг друга и славили есте Бога: Аллилуиа.
Видев злочестивый мужество ваше, разгневася зело и вверже Иулианию в темницу, тебе же совлекоша одежду, да постыдишися девическим студом, и водиша по граду; но Ангел, светом облеченный, егда обнажиша тя Христа ради, светлою одеждою облече тя, святая, и от безстудных очес невидимо сохрани; сего ради ужасеся беззаконный он князь, да не како весь град исповесть Христа, и Иулианию мечем умертвити повеле воином, отцу же твоему глаголаше: «Возми меч и соверши дщерь твою усекновением главы»; сего ради в честь победоносных подвигов и страданий твоих поем ти с желанием:
Радуйся, яко страшное страдание твое видевши благочестивая в женах Иулиания удивися зело, како мужественно терпела еси Христа ради таковыя муки; радуйся, яко она, исполнившися слез умиления, скоро исповеда Христа; радуйтеся, Варваро дево прекрасная и Иулиание, яко желанием Христовым немощи женскаго естества противустасте мужескими подвиги; радуйтеся, от противных непобедимыя, яко естеством женским победисте насилие мужей; радуйтеся, яко обыдоша вас, агницы, волцы злии и растерзаша немилостиво, яко Ирод младенцы незлобивыя и яко Захарию, неповинно закланнаго; радуйтеся, тельцы святии и непорочнии, яко лютыя язвы мужественно претерпесте и за Христа кровь излиясте; радуйтеся, яко возжгосте светильники ваша, подобно мудрым оным девам; радуйтеся, яко взясте елей в сосуды ваша и срететe Жениха и внидосте на брак царский; радуйтеся, яко добрым подвигом и мужественным страданием умертвисте лукаваго врага; радуйтеся, яко украсистеся честно, подвигом победившии мученицы, от нас, грешных, велико ублажаемыя, и приясте от Христа неувядаемый венец небесный; радуйтеся, девы и православныя, Деве Марии и Сыну Ея молитеся, да и нам оставит согрешения наша; радуйтеся, блаженныя и с благословением поминаемыя, яко от восток солнца до запад хвально имя ваше; Радуйся, Невесто Христова непобедимая, великомученице Варваро!
Тогда изведе тя вне града родитель твой, и егда достигосте места, идеже хотяше усекновение главы твоея быти, молила еси немилостиваго: «Остави мя мало, да помолюся пред Богом, да возведет душу мою на место оно упокоения». Он же с яростию вопияше: «Кто есть Бог твой? Призови, елико можеши, да вижу, аще приидет и избавит тя от руку моею»; тогда воздела еси святыя руце на небо и благодарила еси Бога, сподобившаго тя познати святое имя Его, и приносила еси песнь песней: Аллилуиа.
Паки моляшеся на коленех ко Господу, дево прекрасная, и тепле вопияла еси: «Услыши, Господи, рабу Твою и даруй плоти и костем моим благодать исцеления душ и телес, желающим же слышати о подвизе моем даждь оставление грехов, и аще кто впадет в дело суда неправедно, да победит враги своя воспоминанием имене моего»; сего ради, яко врача недугов и сокровище чудес духовное, имамы тя вси вернии и приносим тебе похвалу:
Радуйся, мудрая дево, светлый светильник имущая; радуйся, временную красоту ни во чтоже вменившая; радуйся, вместо преходящия славы непреходящий свет приявшая; радуйся, блаженную жизнь купившая; радуйся, всех скорбящих и в узах сущих утешительнице; радуйся, к истине тщащихся скорая послушнице; радуйся, лжи поклоняющихся и истину ненавидящих устрашающая; радуйся, мучениколюбивых народов неусыпная хранительнице; радуйся, завистников и клеветников смиряющая; радуйся, душу и тело неприкосновенно соблюдающая; радуйся, благоговейным священником и монахом руку простирающая; радуйся, девам и женам богодарованная помощнице и милостивице; Радуйся, Невесто Христова непобедимая, великомученице Варваро!
Скончавши молитву твою, Божественный глас слышала еси, исполняющий прошения твоя: «Се, вся, яже просила еси, даровах тебе, и аще кто призовет тя в молитве, избавлю его от всякаго зла, блажен же будет род той, иже уверует в Мя тобою; и прииди ныне с сестрою твоею Иулианиею на место, еже уготовах вам, одесную Феклы и мучениц, пресветло красных и венценосных, да во веки купно воспеваете Святей Троице»: Аллилуиа.
Сей глас слышавше Диоскор и иже с ним, ужасошася; ты же, молитвою и верою вооружена, предала еси дух твой Господу и, выю преклоншая, рекла еси отцу твоему: «Ныне соверши повеленное тебе от князя, о безбожне, ибо силою Христа моего победих нечистаго оного судию»; и се есть дивно, яко окаянный отец предаде на смерть возлюбленное чадо свое и святую главу твою отсече; егда же разгласися мужество твое и мученичество, многа пения принесоша тебе, блаженная, стоящии окрест мощей твоих, с нимиже и аз пою тебе и за явление таковыя победы слагаю похвалу:
Радуйся, древних мучеников сподвижнице, яко остроту железа и зной огня мужественно презрела еси и тем поправила еси козни вражия; радуйся, яко любве ради ко Отцу безсмертному земный отец предаде тя немилостивей смерти; радуйся, яко, от неверующаго отца убиенную, в дщерь Себе возлюбленную прият тя Отец Небесный и вместо тленнаго земнаго богатства нетление плоти дарова тебе; радуйся, яко непорочно бысть тело твое кроплением крове твоея, и со Иулианиею веселишися во веки вечною славою; радуйтеся, купно закланныя сестры, заступницы наша, яко печали ваша на радость претворишася и болезни в сладость, и обретосте наслаждение вечное; радуйтеся, яко сияете светом мученичества и, венцем мучеников украшены, светло стоите пред Богом; радуйся, мощми твоими первее Илиополь, потом Константинополь облагоухавшая, последи же мощи твоя дарованы быша граду Киеву в венец благодати; радуйся, благих прошений исполнительнице, яко от Царя всех прияла еси дар чудотворения, и святыя мощи твоя исцеляют множество недугов, бесы прогоняют и веселят весь мир; радуйся, яко, мертва, яко жива, светлее солнца светиши всем концем земли и из раки проповедуеши Христа Бога; радуйся, яко всяк верный и всяк православный народ почитает нетленныя мощи твоя и от лета до лета совершает память твою; радуйся, помощнице всех отчаянных, яко врача недугов и язв и чудотворицу имут тя вси православнии; радуйся, яко превыше естества, слова, ведения и разума суть мужества твоя, и похвалами хвалима еси от верных; Радуйся, Невесто Христова непобедимая, великомученице Варваро!
Благословен Царь, сподобивый тя святых мироносиц и ликов мучеников соединения и подобно им почтивый тя венцем подвигов, ибо исполни Христос прошение твое, Варваро, и в воздаяние дарова тебе благодать исцелений молящимся тебе, преподобная, просящии же помощи приемлют паче прошения; сего ради славим Бога, даровавшаго тебе таковую благодать и святыню, и поем Прославившему тя: Аллилуиа.
Радости исполняется и хвалится ныне град Киев, идеже есть святая рака мощей твоих и неоскудно источает благодать и милость, вси же, с верою притекающии облобызати ю, получают благое исполнение прошений, ибо благодатию, от Господа тебе данною, скоро исцеляеши страсти душевныя и телесныя, и, иконами написанная и в молитвах поминаемая, избавляеши от напастей восхваляющих тя:
Радуйся, силою Распятаго прелести вражия невидимы творящая; радуйся, со чины безплотных на небесех водворившаяся и чудотворящая; радуйся, от ликов девических в чертоги небесныя с радостию введенная; радуйся, мучением опечаленных утешительнице; радуйся, немощей наших душевных и телесных исцелительнице; радуйся, от злых духов одержимых избавительнице; радуйся, от врагов видимых и невидимых избавляющая; радуйся, хладную веру оживляющая; радуйся, лютыя беды скоро прогоняющая; радуйся, скверну суеверия упраздняющая; радуйся, к тебе прибегающия страждущия души приемлющая; радуйся, печали наша на радость претворяющая; Радуйся, Невесто Христова непобедимая, великомученице Варваро!
О девством украшенная и мученичеством просиявшая, великомученице Варваро, претерпением страстей благодать изгнания нечистых духов и попрания злых невидимых врагов прияла еси свыше и всем молящимся тебе возсияваеши дары помощи твоея; и ныне буди врач немощей моих и моли Христа Бога, да дарует ми христианскую кончину и до смерти сподобит мя причащатися пресвятых и животворящих Таин Его, да, благодатию Божиею укрепляемь, с тобою воспеваю Пресвятей Троице: Аллилуиа.
Сей кондак трижды, затем
Болезни и лютыя страдания разрешает и упраздняет память твоя, якоже испросила еси от Христа Бога, всехвальная Варваро, и аще кто призовет тя в молитве тепле, избавляеши от всякаго зла; сего ради и нас избави от всякия страсти, да по воли нечестивых ко беззаконию не преклонимся и глаголем по силе нашей:
Радуйся, розо прекрасная, от терний безплодных прозябшая; радуйся, крине девства, среди плевел идолослужения произрастший; радуйся, от Бога из язычников избранная; радуйся, чистотою и верностию просиявшая; радуйся, благодати исполненная и духовным чином украшенная; радуйся, упованием на Господа и мужеством благочестия облеченная; радуйся, бодрому и трезвенному житию научающая; радуйся, многими скорбьми правды ради гонимая; радуйся, яко Авель закланная и яко Исаак в жертву принесенная; радуйся, дево, ко Деве Царице приближившаяся; радуйся, на небесех со святыми лики соединившаяся; радуйся, нетленными мощми прославленная; Радуйся, Невесто Христова непобедимая, великомученице Варваро!
В небесных обителех светло водворилася еси со Иулианиею и воинством мучеников, яко от Небеснаго Жениха обрученная; мы же почитаем тя, подвигом победившая мученице Христова Варваро, и молим тя: от всякия напасти избави и от недугов сохрани мужество твое поминающих и с желанием поющих: Радуйся, Невесто Христова непобедимая, великомученице Варваро!
О святая, славная и добропобедная великомученице Варваро, светильниче пресветлый Церкве Христовы, чудес обильная подательнице, милостивая, незлобивая, нищих заступнице и немощных скорая помощнице!
О святая славная и всехвальная девомученице Варваро, Невесто Христова прекрасная, яко от Небеснаго Жениха обрученная, в чертогах Его водворилася еси с пятию мудрыми девами и со Иулианиею, испроси ныне от Христа Бога, да сохранит отечество наше от сетей вражиих и от братоненавидения, и милостивно призрит на удел Матере Своея, народ наш православный и правоисповедный. Исцели многия язвы наша богоприятною молитвою твоею и даждь нам Божественную ревность об отечестве и страх Божий, да вси живущии в Грузии в Православии и единомыслии утвердимся и единеми усты и единем сердцем Христу, истинному Богу, воспеваем. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех православных христиан. Именем твоим нарицаемых и молящихся тебе прослави. Умоли, всесветлая мученице, возлюбленнаго тобою сладчайшаго Иисуса, да простит нам отступления, разорение и осквернение церквей, убиения служителей Божиих, измену, зависть и беззакония, убиения во чреве младенцев наших и прочее множество грехов наших.
О всемудрая и всекрасная Варваро, мученице и Невесто Христа Бога! Ходатайствуй пред Ним, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды).
Господи Иисусе Христе, Сыне Божий, молитвами Пречистыя Твоея Матере, преславныя и всехвальныя девомученицы Варвары и всех святых, помилуй нас. Аминь.
Автор-составитель: Тинатин Мчедлишвили
