Акафист преподобным и богоносным отцем нашим Иоанну и Гавриилу Грузинским, Иоанну-Торникию, Евфимию и Георгию Святогорцам
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй (12 раз). Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Похвалами воспеваем с Евфимием великаго Георгия Святогорца, Иоанна-Торникия — воина Христова, и Иоанна и Гавриила Грузинских, и ко Богу посылаем вас ходатаи, да отвратит гнев, праведно подвигнутый за грехи наша, и разрушит дерзость безчисленных врагов наших, иже присно насильствуют и утесняют нас, и дарует безмятежное и разумное житие восхваляющим вас: Радуйтеся, преподобнии отцы Афонстии, истиннии пастырие и учителие народа грузинскаго!
Силы небесныя удиви свыше дарованная вам благодать чудотворения, превосходящая человеческую силу и слово, и мы благодарение приносим Иисусу, Богу нашему, иже не презре народа сего нашего возлюбленнаго, ходатайством Матере Своея, и посла вам таковых отцев в научение и вразумление нам, да ревнители и подражатели добродетелей ваших будем и вопием благодарно:
Радуйтеся, от Афона возсиявшая светила Грузии; радуйтеся, мужественнии проповедницы Православия; радуйтеся, необоримыя стены благочестия; радуйтеся, пустыни любителие, подобно великому Предтечи; радуйтеся, подвига Григория Ханцтийскаго продолжателие; радуйтеся, столпи и утверждения монашескаго собора; радуйтеся, служителие Божии и вернии отечеству и царю; радуйтеся, уставы и каноны Церкве; радуйтеся, пресвятыя звезды Божественныя славы; радуйтеся, небеснии поборницы народа нашего; радуйтеся, недремлющии хранителие и защитницы земли иверской; Радуйтеся, преподобнии отцы Афонстии, истиннии пастырие и учителие народа грузинскаго!
Благодать Божия вселися в тя, мужественне Иоанне, и богатство преходящее оставил еси, храбрый и в полцех избранный, и освободил еси себе от всех попечений мира сего; достиг же славныя лавры Четырех церквей, тамошних отцев, преподобных Моисея и Гелазия, удивил еси монашеским подвигом, ибо едино токмо попечение имел еси — угодити Богу молитвою и постом; тако и ныне напой души наша учением и наставлением Божественным, да желанием твоим подвизаемся мужественно и сподобимся пети Богу: Аллилуиа.
Егда разгласися слава твоя в Грузии, странничество бысть тебе вождем на пути истинном, и благословением отцев достиг горы Олимпийския, стрелы лукаваго разженныя угасил еси послушанием и службу у мсков понесл еси со смирением; тако и ныне просвети душу мою сиянием благодати твоея и отжени всякую дерзость и гордыню от омраченнаго ума моего, да присно творим угодное Богу и ублажаем тя с верою:
Радуйся, крест Христов на рамена своя подъявый; радуйся, во смирении и послушании хвалимый; радуйся, любезное отечество оставивый и небесное отечество избравый; радуйся, любве ради Божия от славы века сего бежавый и небесную славу стяжавый; радуйся, благодать богословия приобретый; радуйся, суетных гордецев и лжецов возненавидевый; радуйся, Божественной ревности и благоговению научающий; радуйся, от путей истины заблудших обличителю; радуйся, славу прельстителя и сети его непрестанною молитвою и псалмопением угасивый; радуйся, стадо Христово в Православии воспитавый; Радуйтеся, преподобнии отцы Афонстии, истиннии пастырие и учителие народа грузинскаго!
Благородство оставив, яко Авраам, странствовал еси в земли чуждей, и егда слышал еси, яко сына твоего Евфимия даша в заложники царю греческому, взыде в Константинополь, царствующий град, сына твоего избавил еси и, на Олимп возвратився, воспитал еси его духовно; тако и ныне помози нам отеческою милостию твоею, да отцы наша день от дне учат чада своя Божественному закону и любви к отечеству, и матери грузинския воспитанию чад во славу последуют, подражающе древним матерем, да вси в мудрости ходим путем истины и присно поем Господу: Аллилуиа.
Во всю землю изыде глас добродетелей твоих, мужественне Иоанне, и, бегая славы человеческия, взял еси сына твоего Евфимия и, тайно достигши Святыя Горы, лавры великаго Афанасия, сокрытием добродетелей и чудес твоих посрамил еси гордаго супостата; тако и ныне угаси помышления нечестивых, на народ наш воздвигнутая, и языки еретиков изнемози силою Христовою, да ходим путями правды и истины и, невредимо сохранени, глаголем усердно:
Радуйся, Божественным жительством среди человек, яко Ангел, просиявый; радуйся, плотию изнуренный и духом украшенный; радуйся, пчело, от подвижников мед мужества собравшая; радуйся, яко Авраам мудрый, на невидимом жертвеннице сына твоего принесый; радуйся, древо доброплодное, отрасль благую произрастившее; радуйся, прельстителя миродержца посрамивый; радуйся, от всякаго злаго дела и от плотских движений избавляяй; радуйся, неведущих и непокоривых вразумителю; радуйся, смрад нечестия прогоняяй и семя богопочитания насаждаяй; радуйся, народу грузинскому сладость благочестия от Господа испрашиваяй; радуйся, нищим руку простираяй и вдовиц и сирот посещаяй; Радуйтеся, преподобнии отцы Афонстии, истиннии пастырие и учителие народа грузинскаго!
Тщался еси по Божию внушению, блаженне Иоанне, научити сына твоего переводу, сын же твой Евфимий от юности благодатию Божиею просветися, и дадеся ему ум высокий, зрящий Божественная премудрости, и разумение глаголати языки и переводити книги, якоже возвестися ему явлением Пресвятыя Богородицы; сего ради единородному Сыну Ея, удел Ея, приносим песнь достойную: Аллилуиа.
Во время юности зело разболеся сын твой, Иоанне, и никоеяже пользы бысть от тщания врачей; ты же вшел еси в церковь и поклонился еси святей иконе Пречистыя Матере, и со излиянием слез моля ю о Евфимии, призре Благоутробная Мати на скорби твоя и дарова здравие и дух премудрости сыну твоему; сего ради покланяемся Деве Богоматери и приносим тебе благодарственную хвалу:
Радуйся, смиренный и уничижения любителю; радуйся, сосуде избранный добродетелей и обителе богоугодных дел; радуйся, великаго Афанасия собеседниче и подражателю апостолов; радуйся, пастырю добрый Божественных стад; радуйся, уставе и правило монахов; радуйся, первых оных праведников сопричастниче; радуйся, великое украшение служителей Божиих и наставниче пустыннолюбцев; радуйся, прибежище старцев и юношей; радуйся, милостивый и благодетелю нищих; радуйся, помощниче и ходатаю заблудших; радуйся, отче сладкий всех к тебе прибегающих; радуйся, благий ходатаю между Богом и человеки; Радуйтеся, преподобнии отцы Афонстии, истиннии пастырие и учителие народа грузинскаго!
Пребывающу тебе в церкви, видение виде сын твой, и пришед, преподобне Иоанне, зрел еси его здрава и невредима. «Что есть сие, чадо мое?» — вопросил еси с удивлением сына твоего, и отверз уста своя отрок, яко источник, непрестанно истече чистейший паче всех грузин: «Предста ми пресветло облеченная Царица и языком нашим рече ми: что ти есть, Евфимие? — Умираю, Владычице, — возопих со слезами; она же исцели мя и глаголаше: не бойся, отроче, востани и свободно глаголи по-грузински; и се, якоже видиши, избави мя от горьких болезней». Ты же, сие слышав, блаженне, благодати и милости восприемник, принесл еси песнь Богородице и сладкогласно славил еси рожденнаго от Нея Христа Бога: Аллилуиа.
Доселе скорбел еси, богомудре Иоанне, яко с трудом глаголаше сын твой по-грузински, но, сподобивыйся блаженнаго онаго видения, единым Ангелом подобающаго, дуновением Духа возглашаше славу Христа Бога и паче сил человеческих величаше сладкую и утешительную Матерь Его, Еяже даром и милостию совершися подвиг ваш; и мы, любовию вашею разжигаеми, благодарение приносим Богородице и подвизаемся воспевати вас:
Радуйтеся, мужие желаний духовных, истиннии возрастителие богопознания; радуйтеся, камени несекомии правыя веры; радуйтеся, причастницы Божественныя любве; радуйтеся, светильницы златокованнии благочестия; радуйтеся, неоскуднии источницы милости; радуйтеся, щити, хранящии благочестие, и мечи, отсекающии злочестие; радуйтеся, громогласнии проповедницы Пресвятыя Богородицы; радуйтеся, правила правды и утешения; радуйтеся, славо и похвало возлюбленнаго отечества вашего; радуйтеся, светильницы пресветлии, просвещающии народ грузинский; радуйтеся, неутомимии делателие винограда Христова; Радуйтеся, преподобнии отцы Афонстии, истиннии пастырие и учителие народа грузинскаго!
Тогда глаголаше тебе премудрый отец твой, Евфимие: «Земля наша зело скудна есть книгами, и талант, егоже Бог дарова тебе, яко раб верный, умножи и многократно принеси Церкви иверстей»; и ты послушно последовал еси повелению его и, яко пчела словесная, подвизаяся о сладком меде Божественных книг, нектаром переводов твоих услаждал еси язык наш и Церковь; сего ради поюще в ней славословим, и, яко органным гласом сладким, поем Умудрившему тя: Аллилуиа.
Егда Источник воды живыя, Царица Богородица, напои тя премудростию, блаженне Евфимие, от уст твоих изыде источник нетления, обильно напаяющий безводную землю твою, егоже государь тщашеся, да переводиши от греческаго языка и посылаеши книги Божественныя; сего ради не даял еси покоя себе и Писания благочестия послал еси Давиду Куропалату; он же с радостию вопияше: «Благодарение Богу, явившему народу нашему новаго Златоуста», и хваляше усердие твое:
Радуйся, от младенчества Богу посвященный и непорочным священством Христу последовавый; радуйся, молитвою очищенный и благодатию прозорливости обогащенный; радуйся, от Пренепорочныя Девы Марии неизреченныя радости исполненный; радуйся, сокровенныя тайны языком грузинским боголепно глаголавый и премудрость распространивый; радуйся, сердца слышащих к разумению наставляяй; радуйся, отче всех переводов, Писания святая и от православных отцев написанная умноживый; радуйся, языком богословным всякое ухищрение словес разрушивый и иудейское роптание пресекий; радуйся, учения душеполезная даровавый и душевредная смиривый; радуйся, от различных цветов един сот вечныя сладости роду грузинскому сокровивый; радуйся, редкия рукописи списавый и силу глубины книг прекрасно истолковавый; радуйся, уставов и канонов церковных, утверждающих веру нашу, непогрешимый списателю; радуйся, среди картлосиан богопознание насадивый и скверну суеверия изгладивый; Радуйтеся, преподобнии отцы Афонстии, истиннии пастырие и учителие народа грузинскаго!
Имел еси брата богобоязненнаго, спаспета Картли, Торникия Чордванели; той не пощаде возраста и чести воинския, и, подъяв подвиг монашеский любве ради Божия, шед на Олимп, не обрете тамо тебе, преподобне Иоанне, и пришед на Святую Гору, достиг великия лавры; и целовали есте друг друга, добрии оныи друзи, и благодарили есте Бога, сподобившаго вас паки видети друг друга, и пели есте благости Его: Аллилуиа.
Егда изыде имя ваше во вся концы, помощию Божиею начаша грузини приходити и умножатися; и сие видевше, мужественнии, создасте церковь Иоанна Богослова и келлии в пустыни прекрасней, удел же Богородицы, народ, водвористе на горе, Ея жребию данней; молите ныне Деву Богородицу, да обновит благодать и благословение народу нашему и на Святей Горе, в Иверстей обители, паки умножит род грузинский, да не забудем благодеяния вашего и, совершающе память вашу, ублажаем премудрость вашу:
Радуйтеся, словеснии столпи непоколебимии и памятницы мужества непоколебимии; радуйтеся, сопоборницы и искуснейшии военачальницы, от Тао прозябшии; радуйтеся, сподвижницы, на Святей Горе процветшии; радуйтеся, премудровещании и Божественная Писания право исполняющии; радуйтеся, вместо мирскаго богатства и покоя смирение и нищету возлюбившии; радуйтеся, единодушно жительствующии и всякая вредная дела скоро искореняющии; радуйтеся, мужеством духа малодушным и ленивым образ дающии и нерадивых посрамляющии; радуйтеся, единоплеменников, во странствии сущих, утешителие и заступницы; радуйтеся, непорочных жителей и подвижников братий во едино собравшии; радуйтеся, монахов в подвизех укрепляющии и великих светильников Церкве воспитавшии; радуйтеся, злыя замыслы врагов разрушающии; Радуйтеся, преподобнии отцы Афонстии, истиннии пастырие и учителие народа грузинскаго!
Егда в Греции возмутися Склир и возста на юных царей, тогда писаша Иоанну и великому Афанасию: «Во брани несть нам помощника разве Давида Куропалата; ныне молим вас, да великий военачальник Иоанн, бывший Торникий, пойдет к нему»; ты же не хотел еси, преподобне, от обители отлучитися, но умилосердился еси над юными цари и благословением отцев пошел еси в Тао; тако и ныне тя, воина Небеснаго Царя, в помощь и ходатайство подвизаем и ко Господу вопием: Аллилуиа.
Пришедшу тебе пред Давида Куропалата и все бедствие их поведавшу, абие постави тя военачальником, блаженне Торникие-Иоанне, и с избранным воинством посла тя во Грецию; ты же, совлекши одежду монашескую, облекся еси в броню железную и, изшед на брань со возставшими, помощию Божиею низложил еси их; тогда возрадовашася достойно цари греческия и «верхния земли» Куропалату дароваша, тебе же честь синкелла даровавше, храбрый, яко воину Христову непобедимому, благодарственную похвалу принесоша:
Радуйся, мужеством твоим христолюбивое воинство укрепляяй и милуяй; радуйся, всех обидимых и угнетенных покровителю; радуйся, благоверных властей благословителю и скорый послушниче; радуйся, воинской храбрости учителю и мужества возбудителю; радуйся, послушания ради отцев меч крепкий подъявый; радуйся, коварных и мстительных посрамителю; радуйся, от веры и отечества отступивших прещением казнящий; радуйся, превознесшагося Склира отразивый и низложивый; радуйся, бедствие, на греческих царей находящее, укротивый и скипетр их утвердивый; радуйся, духовнаго мужества иверов укрепителю; радуйся, в небеснаго воина вписанный, мзду победы приобретый; Радуйтеся, преподобнии отцы Афонстии, истиннии пастырие и учителие народа грузинскаго!
Егда Торникий с великим богатством паки на Афон возвратися, волю свою всецело отсече и последова послушанию твоему; тогда умыслисте, отче Иоанне, создание обители грузинския и создасте лавру сию славную при мори; тако и ныне даруйте нам Божественную ревность об отечестве и мужество духа, да плачем о лишении обители сея и Иисусу, Избавителю нашему, поем духом и истиною: Аллилуиа.
Видя, святый отче, смирение и послушание великаго Торникия, и ты достойно чтил еси его и милостив бе к старости его; но блаженный он в бранех воспитан бе и любляше повествование о делах воинских; ты же умилосердился еси, мудре Иоанне, и рекл еси ему медоточивым языком: «Аще хощеши о мирских делах беседовати, повеждь избранному среди подвижников Гавриилу», иже безмолвствоваше в разселинах близ обители и в зимнее время пребываше в Иверстей обители; мы же хвалим толикое долготерпение твое и, пред иконами вашими стояще, вопием усердно:
Радуйтеся, духом единодушнии и плотию братие, яко просветисте имя родныя земли; радуйтеся, небоподобных церквей воздвигателие, яко на Афоне умножение грузин подвизастеся и место сие святое роду вашему утвердисте; радуйтеся, добрым деланием украшеннии, яко своих в чуждей земли поселисте и паче тамошних греков прослависте; радуйтеся, апостольския силы достигшии, яко сон духовный людей Господних разгнасте и на путь царский направисте; радуйтеся, к добродетелем и подвигом возбуждающии, яко всех по достоинству милосте и воздвигосте человеки на подражание вам; радуйтеся, многих душ пристанища, яко мнози стекахуся слышати от вас словеса Божия и с вами пребывати; радуйтеся, духом единодушнии и плотию крепчайшии, яко от Бога дадеся вам сила великая чудеса совершати; радуйтеся, всех грузинских добродетелей возвышателие, яко людей Божиих от потопления душепагубнаго спасосте; радуйтеся, яко добродетель ваша и достоинство не токмо в Грузии, но во всей Греции, во Иерусалиме и на Синаи разпространися; радуйтеся, яко хвалится Ивирон трудами вашими, в нем совершенными, и вопиет, яко грузинских братий жилище есть; радуйтеся, земнии Ангели и небеснии человецы, яко, аки орли быстрокрилатии, облетаете весь мир и всем почитающим вас паче солнца возсияваете дары помощи вашея; радуйтеся, иконы одушевленныя, яже имамы пред собою в образ святости и в мужество храбрости; Радуйтеся, преподобнии отцы Афонстии, истиннии пастырие и учителие народа грузинскаго!
Слышав сие бывший Торникий Иоанн, ужасеся и паде к ногама твоима и со слезами прощения прошаше; тогда любовию воздвигл еси его и именем Господним простил еси; он же сокрушение сердца и тишину ума с благоговением растворив и добрым старчеством совершився, предста пред Богом, причтеся к воинству небесному и с ними поет Создателю всех: Аллилуиа.
О превысочайшая благодать, Гаврииле Грузине, ибо из многих отцев избран был еси прияти честную икону Матере Божия, яко живу шествующую и безплотно по морю непотопляемо ходящую; егоже восприемник, отче дивный, по морю хождаше непогружаемо, и идеже вознесл еси икону Богородицы, тамо изыде источник чудотворный, иже паки источает исцеления; тако и ныне сподоби чада народа грузинскаго неотлучно служити всесвятей иконе Портаитиссы и воспевати тя и пети по силе своей:
Радуйся, Иоанну и Илии пустыннолюбием уподобивыйся, яко временное сие преходящее возненавидел еси и беседовал еси с Богом безмолвием и смирением; радуйся, яко совершен был еси добродетелию, благ и силен пасти души по воли Божией; радуйся, зрителю неизреченных таинств, яко чистотою сердца присно стяжал еси видение Божие, и язык, егоже не ведел еси, слышал еси; радуйся, яко огнепламенная икона явися прямо Святыя Горы; радуйся, зело любящий Богородицу, яко слышаша греки: «Гавриил Грузин есть износящий икону Всесвятыя, и той един старец достоин прикоснутися ей»; радуйся, Петра хождением по водам превзошедый, яко приблизился еси непогружаемо, и море, Царицу носящее, дивно дарова тебе икону Ея, огнем пламенеющую, и приял еси ю на перси; радуйся, яко по трех днех с литиею принесосте икону, язвою крове запечатленную, в обитель и со благоговением постависте во олтари, но скрыся и невидима бысть икона дивная, и по многом искании обретосте ю во вратех; радуйся, Матере Божия присный рабе, яко во сне явися тебе и рече: «Не хощу охранения вашего, но Аз есмь и хранительница и покровительница рода грузинскаго»; радуйся, яко поведавшу тебе богоносному Иоанну и преподобному Евфимию, создаша храм малый близ врат, и положиша в нем чудотворную икону оную, и нарекоша «Портаитисса»; радуйся, яко не пойде она в иную обитель, но в Иверстей изволи водворитися и наречеся «Мати Божия Иверская Вратарница»; радуйся, яко таковое явное чудо показася от Пресвятыя Богородицы за любовь ко народу, Ея жребию данному, егда дарова Ивирону дивную икону Свою; Радуйтеся, преподобнии отцы Афонстии, истиннии пастырие и учителие народа грузинскаго!
Егда на одре лежащий Иоанн горькия болезни мужественно терпяше, послушлив был еси повелениям его, блаженне Евфимие, и предстоятельством его управлял еси Иверскою обителию, и, яко иконом и попечитель, и великою лаврою Афанасиевою, и научал еси греческих обителей старейшин и игуменов; егда же хотяше скончатися отец твой, постави тя правителем над делами своими и с пением предаде дух свой Христу, Царю Небесному и Богу: Аллилуиа.
Пребыв четыренадесять лет в настоятельстве, многа чудеса сотворил еси и добре пасл еси стада твоя; но, возбраняем от перевода святых Писаний, настоятельство братий, по завещанию отца, вручил еси сродному его Георгию Варазвачэ и поставил еси его старейшиною и пастырем в Ивироне; тогда созда он церковь великую во имя Богородицы и наречеся Строителем; ты же паче силы твоея предался еси переводу Божественных книг и пребыл еси бодр до дне успения твоего; егда же скончался еси, о чудотворче Евфимие, вси, яко сироты, осташася без отца и, памятию твоею утешаеми, приношаху тебе таковое пение:
Радуйся, Пастыреначальника Христа учениче, стадо твое добре пасый и непорочныя души неуязвленно хранивый; радуйся, князей тьмы погубителю; радуйся, многоразличное попечение святогорцев на рамена твоя подъявый; радуйся, множеством чудес уповающих на тя просвещаяй и помышления противных упраздняяй; радуйся, строжайшим монашеским правилом монахов наставивый; радуйся, согрешших к покаянию обращаяй и непокоривых изгоняяй; радуйся, братий смущающих и противящихся страшным запрещением вразумивый; радуйся, присно власяницею и веригами облеченный и на престол кафоликоса Кипрской Церкве не восшедый; радуйся, от дерзких убийц мечем сечения и смерти дважды дивно избавленный; радуйся, в Преображение на горе Афонстей светлее солнца просиявый; радуйся, вторым Илиею нареченный, в годину засухи дождь низведый; Радуйтеся, преподобнии отцы Афонстии, истиннии пастырие и учителие народа грузинскаго!
Подвизаяйся в Божественней Иверстей обители, пресветло описа «Житие» ваше и «Подвиги» Георгий Святогорец, на пользу душ и на приобретение многих, хотящих спастися, и памятник веры воздвиже народу нашему, да не забвенна будет память ваша от родов грядущих; сам же возвести патриарху Антиохийскому чистоту веры грузинския и, изъяснив ему богословия, неудобь постижимая, разруши клевету монахов Симеоновых и утверди самостоятельство Церкве иверския; сего ради с вами хвалим оного делателя премудрости и приносим Богу благодарственную похвалу: Аллилуиа.
Церковь грузинская с чады своими светло украшается украшением святых книг ваших и с Евфимием хвалит Георгия, стоящих за нас молитвенниками и ходатаями пред Богородицею, яже Евфимию дарова здравие и язык благоглаголивый по-грузински, тебе же — премудрость и ведение во утверждение правыя веры; вы же просветисте землю Грузинскую, удел Ея, и даровасте всекрасная учения народу своему; тако и ныне принесите моление наше Всенепорочней Владычице, да до скончания века сохранит Иверию и народ Иверии, егоже паче всех родов избра, да в достоинстве и святыни ходим по отеческому пути и присно хвалим вас, Церкве и народа нашего подвижников:
Радуйтеся, правила и похвало священства; радуйтеся, монаси и игумени Иверския обители; радуйтеся, отцы и теплии покровителие Святыя Горы; радуйтеся, делателие премудрости и переводчицы святаго Писания; радуйтеся, богодвижимыя гусли словес Давидовых; радуйтеся, истиннии возрастителие богопознания; радуйтеся, образы духовнаго совершенства и сокровенных ведущия бездны разумения; радуйтеся, новии Златоусти, просветителие народа грузинскаго; радуйтеся, премудрии проповедницы учения апостол и отец; радуйтеся, пресекателие лютаго глада духовнаго; радуйтеся, от Христа венец победы приявшии; Радуйтеся, преподобнии отцы Афонстии, истиннии пастырие и учителие народа грузинскаго!
О пастырие благии и учителие духовнии: Иоанне и Гаврииле Грузинстии, бывый Торникий Иоанне, и Евфимие и Георгие Святогорцы! С верою припадающих к крепкому вашему ходатайству и отеческой благодати и помощи помилуйте и избавите от грехов злых и немощей и от многих сетей диавольских, да омыемся плотию и душею от скверны прелестей вражиих и направимся на путь заповедей, ведущий нас в жизнь очищенных, избранных Божиих, и с ними славим Пресвятую Троицу: Аллилуиа.
Сей кондак трижды, потом:
Силы небесныя удиви свыше дарованная вам благодать чудотворения, превосходящая человеческую силу и слово, и мы благодарение приносим Иисусу, Богу нашему, иже не презре народа сего нашего возлюбленнаго, ходатайством Матере Своея, и посла вам таковых отцев в научение и вразумление нам, да ревнители и подражатели добродетелей ваших будем и вопием благодарно:
Радуйтеся, от Афона возсиявшая светила Грузии; радуйтеся, мужественнии проповедницы Православия; радуйтеся, необоримыя стены благочестия; радуйтеся, пустыни любителие, подобно великому Предтечи; радуйтеся, подвига Григория Ханцтийскаго продолжателие; радуйтеся, столпи и утверждения монашескаго собора; радуйтеся, служителие Божии и вернии отечеству и царю; радуйтеся, уставы и каноны Церкве; радуйтеся, пресвятыя звезды Божественныя славы; радуйтеся, небеснии поборницы народа нашего; радуйтеся, недремлющии хранителие и защитницы земли иверской; Радуйтеся, преподобнии отцы Афонстии, истиннии пастырие и учителие народа грузинскаго!
Похвалами воспеваем с Евфимием великаго Георгия Святогорца, Иоанна-Торникия — воина Христова, и Иоанна и Гавриила Грузинских, и ко Богу посылаем вас ходатаи, да отвратит гнев, праведно подвигнутый за грехи наша, и разрушит дерзость безчисленных врагов наших, иже присно насильствуют и утесняют нас, и дарует безмятежное и разумное житие восхваляющим вас: Радуйтеся, преподобнии отцы Афонстии, истиннии пастырие и учителие народа грузинскаго!
О всечестнии и богоноснии отцы наши, Иоанне и Гаврииле Грузинстии, бывый Торникий Иоанне, и Евфимие и Георгие Святогорцы! Звезды пустыни пресветлыя, поста и молитвы столпи крепции, монахов похвало и подвижников украшение, просветителие грузин, нищих утешителие и всех немощных и отчаянных помощницы и предстателие!
О богомудрии отцы и учителие грузин, Иоанне и Гаврииле Иверстии, Торникие-Иоанне, и Евфимие и Георгие Святогорцы, о нас ходатаи премудрии подвижницы! Иже благодатию и милостию Божиею на Святую Гору достигосте в пристанище душ и во умножение рода нашего, отеческим милосердием вашим примирите нас благому Богу, да любовь Свою к нам и веру нашу к Нему обновит и род наш паки умножит в славней Иверстей обители, да покланяются и служат упованию всех христиан, паче же Церкве и народа нашего покровительнице — иконе Богородицы Иверския Вратарницы, Портаитиссою нареченней и чудотворней, ибо ни единаго грузина не обретается в обители сей вашей, юже великим подвигом создасте в жилище грузином. Умолите возлюбленнаго вами сладчайшаго Иисуса, да милостивно призрит на удел Матере Своея, народ наш, носящий на земли крест Господень, и царя христолюбива помажет и венчает на престоле всея Грузии, да добре управляет и печется о народе грузинском, и возставит единство отечества нашего, и возвысит достоинство и силу земли и рода нашего, да не рекут безчисленнии врази наши: где есть Бог их, на Негоже уповают? Укрепите Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего (имя), преосвященных митрополитов, архиепископов и епископов, весь священнический и монашеский чин и всех православных христиан.
О небеснии человецы и земнии Ангели: Иоанне и Гаврииле Грузинстии, славный бывый Торникий Иоанне, и Евфимие и Георгие Святогорцы! Не престаните молити Христа, преподобнии, да дарует церквам славу, пастырем нашим ревность и бдение о душах; властем — премудрость, силу и доброе пасение народа; судиям — правду нелицеприятную; воином мужество; наставником — разум и смирение; мирянам безгрешие и женам целомудрие; супругом — любовь и единомыслие; чадом — послушание; обидимым — терпение; обидящим страх Божий; скорбящим долготерпение; радующимся воздержание и дух разума и благочестия; нам же да простит суеверие и лжеверие, гордыню, лукавство, измену, зависть, ненависть, сребролюбие, неблагодарность, ропот, убийства, татьбы, блуды, безчиния, и да дарует нам жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с вами славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, благодатию и ходатайством святых отец и наставников наших Евфимия Святогорца и Георгия и иных преподобных и богоносных отец наших Афонских и всех святых, помилуй нас. Аминь.
Составила Тинатин Мчедлишвили
