Акафист святой равноапостольной матери нашей Нине
Служителей слова Божия сподвижнице и Андреевы проповеди продолжение, просветительнице грузин и гусли Святаго Духа, Нино, моли Христа Бога помиловати души наша.
Взбранной Воеводе, присной Помощнице нашей, тобою избавленнии от работы темнаго фараона, цвет похвал сплетаем тебе, цвете девства, Нино! Во Христово воинство вписаннии раби Царя Небеснаго, но яко присно споборствующую имущи высокую силу Его, присно победительна буди врагом нашим, воюющим на ны, и избави нас от страсти соблазна, да ангельскую песнь слагаем тебе: Радуйся, Духом Божественным освященная Божественная Невесто.
Ангел небесный послан бысть утвердити тя на течение апостольскаго пути и дал тебе словесныя заповеди, перстом Божиим написанныя. Ты же, в себе помышляющи о деле, превосходящем силу, последовала еси течению послушания мановению Божественному, темже удивляющеся вопием тебе:
Радуйся, еюже радость нам возсия; радуйся, еюже от клятвы первыя прелести освободихомся; радуйся, падших во тьму заблуждений грузин возставившая; радуйся, слезы скорби жен грузинских иссушившая; радуйся, помыслы идолослужителей к превыше слова разумению возведшая; радуйся, и Ангелом неведомое сокровенное таинство нам явившая; радуйся, седящаго на огневидных престолех нам возвестившая; радуйся, яко Носящаго всю тварь в девственней утробе коемуждо нам познати дала еси; радуйся, превыше звезд и светил свет на нас излиявшая; радуйся, Бога, во утробе девства вселившагося во обновление нас обветшавших, Создателем всех нам возвестившая; радуйся, еюже познахом Слово, Создателя всех и всяческая носящаго; радуйся, ты, всекрасная в женах, Божественная Невесто.
Видящи святая дева, апостол Нина, женскую немощь свою, дерзновенно отвещает Ангелу Божию: вельми невозможно является уму моему извещение твое, понеже глаголеши о жене, пасущей чуждыя языки и племена многая, да вопиют сице: Аллилуиа.
Откровения превыше ведения разума не могущи вместити, дева, блаженная Нина, отвеща Божественному служителю: языков не ведущей и немощное естество имущей, како возможно есть пойти и отвратившихся от тьмы зла дикарей к Богу, ко свету обратити? Мы же, совершенно зряще милость Царя, со страхом вопием ко апостолу Нине:
Радуйся, таиннице притчами Божественных откровений; радуйся, источниче, нектар небесныя веры нам источающий; радуйся, начало явления нам чудес Христовых; радуйся, превысшая главо возсияния нам Божественнаго закона; радуйся, мосте святый нестареемый, имже преходим от работы тьмы в работу Богу Живому; радуйся, лествице Божественная, еюже восходим от преходящих текущих к непреходящему на небесех царствию; радуйся, сило, темных бесов язвами и казньми изгоняющая; радуйся, небесный Божественный свет нам изливающая; радуйся, неразумных грузин небесною премудростию умудрившая; радуйся, премудрость Самоипостаснаго Бога нам подавшая; радуйся, премудростию Божественныя Троицы Бога к превысшему познанию нас возведшая; Радуйся, Духом Божественным освященная Божественная Невесто. Радуйся, ты, всекрасная в женах, Божественная Невесто.
Сила Вышняго помощницею бе тебе присно Духом Святым, иже неплодныя безчадныя язычники плодоносными показа; имже пожинаем сладость превысшаго ведения небеснаго сада, в немже присно да вопием Божественную песнь: Аллилуиа.
Имущи в себе Божественную благодать, изшла еси на север, помраченный тьмою идолопоклонства, к кедру; и абие, яко ощути пришествие твое, Армаз паде с воплем, и Заден с Гаимом и Гаци громом поражени быша, и опустеша заблуждения их; от работы и заблуждения их избавленнии картлосиане ликующе вопияху тебе:
Радуйся, лозо, Божественную сладость нам источающая; радуйся, земле святая, еюже присно питаеши нас, алчущих; радуйся, ты, сад Божественный, иже присно подаеши нам плод Божественный; радуйся, небесный вертограде, произрастивший различныя благодати; радуйся, апостольскаго Божественнаго течения делательнице; радуйся, небесным подвигом бывшая нам Божественным пристанищем, приемлющим жизнь нашу; радуйся, ты, трапезо духовная, еюже услаждаеши нас, грехом огорченных; радуйся, трудом твоим цвет Божественнаго наслаждения произрастившая; радуйся, дар, во ходатайство за нас грешных пред Царем вменяемый; радуйся, пластырю утешительный, нам, бременем вин отягченным; радуйся, нам, грехом погибшим, утешительницею и избавительницею посланная; радуйся, от многих грехопадений отпадших с Богом примиряющая; радуйся, ты, всекрасная в женах, Божественная Невесто.
Бурю внутрь имяше Божественная Нина, видящи варваров язычников, люте сатаною угнетаемых; диавол же недоумеваше, зря жену, Невесту Божественную; егда же позна падение свое всецелое и опустение прелестей своих, уразуме, яко от Святаго Духа есть апостольское течение ея, и со своими силами с воплем бежаше рыдая; мы же, от работы тьмы оныя избавленнии, вопием сице: Аллилуиа.
Слышавше пастыри, князи картлосиан, о лютом падении Армаза и Задена, уразумеша явление Бога на земли во плоти дебелой, и яко словесныя овцы разумно воспрянуша к Божественной пастырии Нине, юже видяще и воспевающе, песнь приношаху:
Радуйся, Божественная агнице и пастырю, к нейже поспешаем словесныя агнцы; радуйся, многогласныя песни гусли, еюже присно препровождаеши словесных овец на пажить заповедей на горе гор; радуйся, невидимаго страшнаго волка язвами прогоняющая; радуйся, врата рая и царствия небеснаго наслаждения нам отверзшая; радуйся, яко твоим ходатайством небесныя чины с нами соединяются пети Богу; радуйся, яко мы, рождения земли, со небесными песнословцы соединяемся в песнь Трисвятую богословствовати; радуйся, око недремлющее, присно зрящее, неумолчно проповедующая Божественная уста; радуйся, сило непобедимая, многомужественная, еюже помазуеши на добродетель верующих в тя; радуйся, на камени веры утвердившая нас, имже пребываем присно недвижими; радуйся, присно обнажающая во аде сильнаго велиара; радуйся, присно небесную Божественную благодать нам источающая; радуйся, совлекающая нас от тьмы и облекающая славою Царствия Небеснаго; радуйся, ты, всекрасная в женах, Божественная Невесто.
Боготечную странствующую звезду, свыше текущую, Божественную Нину, узревше Рипсимия и Гаиания с подругами своими, яко Божественному светилу и яко светильнику пресветлому последоваша, и тоею взыскаша пришедшаго взыскати грешных Царя Небеснаго; и обретше Божественное сокровище, бисер многоценный, банею пакибытия, радующеся духом пояху Царю царей песнь сице: Аллилуиа.
Видеша, како отроцы, младенцы безумнии, разумом армянстии, по внешнему образу красоту Рипсимии с Гаианиею прелестию лукаваго онаго коварника мняху уловити, духом неуловимых; они же устремишася к небеси, положивше души своя, предводительством Божественныя боготечныя звезды; с нимиже вопием благословенней Невесте:
Радуйся, от Божественныя луны мысленнаго Солнца нам возсиявшая, Божественная звездо; радуйся, денница пресветлая, предтечением возвещающая нам Матерь незаходимаго Солнца; радуйся, различно возжженную страсть начальника прелестей угасившая; радуйся, от власти мучителя человеконенавистнаго змия низложившая; радуйся, служащих право верою Троице Богу присно заступлением твоим хранящая; радуйся, Господа господствующих, человеколюбием нас ради вочеловечшагося Бога, апостольским трудом твоим нам подавшая; радуйся, от служения делом дикаго онаго темнаго идолопоклонства избавившая; радуйся, варварский оный неведомый суетный закон упразднившая; радуйся, огнепоклонство и иную темную прелесть поклонения низложившая; радуйся, пламень похотей страстей жезлом молитв твоих угасившая; радуйся, вместо персидских нечистот ангельскую чистоту нам даровавшая; радуйся, всех племен картлосовых к вечному веселию предводительнице; радуйся, ты, всекрасная в женах, Божественная Невесто.
Путем апостольскаго проповеднаго труда текущая, Духом облеченная Нина, первый плод в дар принесши Матери Божией святых жен, оттуду обратися к северу, смешанному вавилонскими беззаконными заблуждениями, начат учити язычников возвещенное ей Ангелом Божиим и делом проповеда предреченное ей патриархом слово — Божество Христово, обличившее сатану; имже избавленнии поем Царю Избавителю сице: Аллилуиа.
Возсиявши среди таргамосиан, египетским беззаконием омраченных, Божественный свет сей, носящий слово истины, прогнала еси тьму и мрак тамошняго идолопоклонства, ибо идоли их, не могуще понести зрения твоего, низвергошася: Армаза объят трепет неутешный, Заден же с подобными ему весь прах бысть; от прелести же их избавленнии вопияху тебе, Божественная апостоле, мати Нино:
Радуйся, возставляющая нас, грехом низверженных; радуйся, прельстителя сатану горем низвергающая; радуйся, ты, прелесть вкусов диавола и греха невидиму творящая; радуйся, ты, множества армазова идолопоклонства сокровенное коварство их явно обличающая; радуйся, ты, темнаго онаго фараона главу во глубине адова моря погребающая; радуйся, ты, камени, источающий воду живую, еюже кропиши в утешение трудящихся грехом; радуйся, ты, столпе Божественный, духом огненный, предводящий к небеси избавленных тобою от работы тьмы; радуйся, ты, грузин Божественное пристанище, покрове и облаче, каплющий росу утешительную; радуйся, ты, яже присно питаеши нас небесною манною, хлебом животным; радуйся, ты, служительнице внутрь Святая Святых небеснаго онаго ангельскаго наслаждения; радуйся, земле святая, небесным Делателем возделанная, яже от лета до лета приносиши нам дело веры и видения; радуйся, ты, всекрасная в женах, Божественная Невесто.
Егда хотяше царь Мириан, диаволу порабощенный, совлещи душу свою от тьмы прелести оныя, явилася еси ему, яко странная некая пленница, приходящая жена; облекшися же в свет небесный, Спасительницею и Избавительницею от пленения диаволя познана была еси ему, сего ради удивляшеся неизреченней премудрости твоей и апостольскому труду и, удивляяся, с тобою вопияше к Богу сице: Аллилуиа.
Новое и дивное, естества превосходящее начало показа нам небесная дева Нина, егда явися Создатель всех естеств от девическаго чрева, обновляя естество человеческое; сея превыше чудес чудеснейшаго видения подавшей нам блаженной Нине сплетем песнопения описание:
Радуйся, ты, цвете, различно красный, различно благоуханный запах испускающий; радуйся, венче, преблаженно прекрасный, воздержных подвижников; радуйся, нас, грехом падших, в образ воскресения небеснаго блаженства облекшая; радуйся, нам, преисподним, небесную ангельскую жизнь подавшая; радуйся, древо прекраснейшее, приносящее присно плод безсмертия; радуйся, насаждение богосозданное, многолиственное, под сению егоже собираемся Христовы; радуйся, зачавшая Божественную благодать, от неяже истекает источник воды живыя; радуйся, нам, избавленным тобою от темнаго разума, наставница бывшая к восхождению в небесную славу; радуйся, ты, ко грядущему со страшностию Судии тепле усердная Ходатаице; радуйся, нас, многими грехи отпадших, ходатайством твоим с милостивым Богом примиряющая; радуйся, нас, от работы тьмы обнаженных, Божественным светом облекшая; радуйся, грешных утешение, винами отягченных отрадо, превысшее желание; радуйся, ты, всекрасная в женах, Божественная Невесто.
В страну чуждую, омраченную, пришедшая к нам странницею, видехом тя, пришедшую к нам во образе пленения, от пленения мучителя велиара избавила еси нас, якоже высокий Царь, по-нашему человечески смирившийся, во образе раба обретеся, да образ Свой сокровенный взыщет; и нас, тобою избавленных от работы тьмы сатанины, преставлением на небо соединил есть с небесными в пение, имже вопием мы, земнии, небесную песнь сице: Аллилуиа.
Иже всесовершенно на земли явися, совершенно восприим человеческое тело, горняя и вся небесная всесовершенно исполняющий Царь, Иже в девственней утробе неописанно вселися, всю землю и вся преисподняя Той же исполняше; сего ради Рожденный от Девы даровал нам тебе, деву, в Избавительницу нашу, сего ради вопием тебе:
Радуйся, ты, Божественную благодать невместимаго Бога в себе вместившая; радуйся, сокровище, многия небесныя тайны в себе сокрывающее; радуйся, сатанинское злое сомнение неверных иссушающая; радуйся, веру и надежду православных в различный плод процвести сотворившая; радуйся, Седящаго на престолех превыше небес, пришедшаго взыскати нас, нам благовестившая; радуйся, почивающаго на Серафимех Бога среди нас, грешных, явившагося нам проповедавшая; радуйся, сатаною различно разделенных во едино в работу Богу приведшая; радуйся, со вселившимся в девственную утробу Богом нас соединившая; радуйся, избавившая нас от мучительныя работы темнаго велиара; радуйся, сокрушившая и разбившая ключи и затворы мучителя темнаго сатаны; радуйся, отверзшая и уготовавшая нам небесное оное наслаждение; радуйся, еяже упованием понуждаем понуждающих нас дебелыя вещи; радуйся, ты, всекрасная в женах, Божественная Невесто.
Всякое коварство и лукавство велиара удиви великий апостольский труд твой, ибо видяху тя странною в плен пришедшую, яко жену, немощную естеством, но гражданку, превыше человек превысшую, и от пленения чуждаго оного мучителя многих душ избавительницу; мы же, лукавство и прелесть их тобою попирающе, избавлением Избавителю нашему вопием сице: Аллилуиа.
Риторских многоглаголивых сложений и еллинскими силами искусно украшенных стихов немощными видим к подобающей тебе похвале, како жена, немощное естество имущая, крепкую силу сатанину победила еси и низложила строго, и апостольское течение совершила еси тщанием; сего ради, яко дивней милости Божией удивляющеся, вопием тебе:
Радуйся, превысшею премудростию твоею премудрость Самосущаго Бога нам явившая; радуйся, Божественная предустроения Его крестом многими дивными чудесы совершившая; радуйся, философския земныя суетныя сложения безумием обличившая; радуйся, пред тобою безгласни являются ученыя словесницы, тщащиися восхвалити тя; радуйся, многия ухищрения сатанины обезумившая и в неистовство вменившая; радуйся, баснословное идольское суетное действо иссушившая и упразднившая; радуйся, еллинское афинское прелестное сложение расторгшая; радуйся, Божественную мрежу небесных ловцев апостольским трудом твоим наполнившая; радуйся, души, в глубине безбожия потопленныя, к познанию Бога извлекшая; радуйся, тобою ко Христу верующих небесным ведением просветившая; радуйся, Божественная небесная ладие, преводящая от волн земли прибегающих к тебе; радуйся, пристанище тихое, приемлющее душею страждущих, к тебе прибегающих; радуйся, ты, всекрасная в женах, Божественная Невесто.
Всех жизни Хотящий Царь, восхотев спасения и обращения к покаянию зле погибших и омраченных душ картлосиан, тебе, Божественную сию матерь, в пастырство и подвиг людем, Матери Его в удел данным, посла, ибо бысть подобна нам и, странною пришедшая пленницею, от пленения злыя оныя тьмы избавила еси нас; тем вопием сице: Аллилуиа.
Стена еси адамантова непоколебимая всем таргамосианом верным, Божественная Дево Нино, иже в море суетнаго временнаго мира волнами искушений бием, присно к тебе, Заступнице нашей, прибегаем, ибо Творец небесе и земли Бог, в девственней скинии вселився, тебе, деву, Избавительницу нам посла, к нейже вопием сице:
Радуйся, ты, Божественнаго девства светильниче, девам, Нино, горящи предходящая; радуйся, человеком неведомое небесное оное ведение нам явившая; радуйся, благовестием твоим поклонение единому Божеству в триех Лицах нам даровавшая; радуйся, прельщенный прельстителем ум наш к познанию Божества Христова умудрившая; радуйся, заблудшия поклонники безсмысленнаго идола к разумному поклонению Творцу всех Богу возведшая; радуйся, душетленныя страсти, от невидимаго врага в чувствах наших всеянныя, ходатайством твоим невидимы творящая; радуйся, семена непорочнаго Божественнаго жития умножившая; радуйся, от Пренепорочнаго Жениха всеянная Невесто, призывающая нас к небесному чертогу; радуйся, различно прекрасное украшение православных картлосиан; радуйся, тамошних дев непотребство добротою превысшаго девства украсившая; радуйся, подвижников душам, яко одежда, близкий покрове; радуйся, ты, всекрасная в женах, Божественная Невесто.
Цвети песней, украшения псалмов и песнопений изнемогают, аще зело тщательни будем слагати тебе, Дево, ибо никоея достойныя мзды совершенныя не покажем тщанием хвалы за безчисленныя материя милосердныя милости, яже показала еси на нас, ибо избавила еси нас от тьмы, рождающия страсти, иже вопием сице: Аллилуиа.
Божественнаго света носителя, многообразно горящий светильник видим тя, святую Деву, во просвещение душ наших, нощми греха омраченных, ибо невещественным светом Божественныя веры предвела еси нас к познанию Царя Небеснаго, и присно предводиши, яко заря пресветлая, к приятию просвещения сияния великаго онаго Солнца; тобою глас вопля возсылаем сице:
Радуйся, нектаре сияния мысленнаго Солнца, от лица умов наших тьму греха отгоняющий; радуйся, ты, светильниче пресветлый, души наша, во тьме оставшияся, просвещающий; радуйся, молние духовная, отгоняющая от душ наших молниеподобныя страсти; радуйся, громе, злых духов устрашающий, иже присно низлагаеши прелести их; радуйся, избавленным от работы тьмы небесная просвещения возсиявающая; радуйся, реко воды живыя, присно источающая нам росу милости ходатайства твоего; радуйся, водою и Духом банею купели небесный образ в нас обновившая; радуйся, скверны греха от души нашея иссушающая; радуйся, купели, очищающия душу и тело, вторым рождением подающая; радуйся, помазующая нас миром благовонным различных дарований Духа; радуйся, растворяющая нам в престоле Божественнаго Духа радость пищ небесных; радуйся, присно учреждающая нас и угощающая вечерею таинства жизни; радуйся, ты, всекрасная в женах, Божественная Невесто.
Егда восхоте даровати благодать и просвещение всему миру Божественными сияниями учеников Своих, нам, от благодати оныя отчужденным, во обновление Избавительницею нашею явил тя есть и первыя оныя прелести долга змиева разрешительницею, яже растерзала еси рукописание первых вин наших и низложила еси прелестныя заблуждения безручных идолов; мы же сице вопием: Аллилуиа.
Воспевающе тебе, апостола и матерь нашу, слагаем и собираем духовное хваление цветов, юноши с девами, старцы с отроки, и восхваляем тя, яко святый храм Божественнаго Духа, и деву жену, Христова апостола, яже Содержащаго и Носящаго всю тварь во чреве Пренепорочныя Девы нас научила еси; мы же приносим тебе духовное пение сице:
Радуйся, скиние словесная, присно угощающая нас вожделенным апостольскаго подвига твоего; радуйся, Духом Божественным освященная палато, введшая нас во внутреннейшая Святая Святых; радуйся, ковчеже духовный, исполненный Божественных различных благодатей; радуйся, от небесной Божественной сокровищницы благодать Духа в пищу нам подающая; радуйся, христоверных царей картлосиан победы венцем процветающая; радуйся, тамошних православных и чистотою соблюдающих себе священников помощнице, ходатаице и похвало; радуйся, цвете, святыя церкви различно украшающий; радуйся, милостию ходатайства твоего разслабленныя руками и в отчаяние пришедшия умом к подражанию небесных возводящая; радуйся, закон Царства Христова, тобою первее Духом проповеданный, тамо ненарушимо сохраняющая; радуйся, возстающих на него супостатов врагов, сатаною воздвигаемых, присно силою твоею низлагающая и прогоняющая; радуйся, омраченнаго ума моего просвещение; радуйся, омраченныя и во отчаяние греха пришедшия души моея упование; радуйся, ты, всекрасная в женах, Божественная Невесто.
О духовная, многопетая Божественная Дево, мати Нино! Ко Пренепорочней Деве, Матери Слова Божия, Носящаго всяческая, в ходатайство за ны вменяемый даре! Приими от нас малое сие и худое песнопение, молебную лепту, и присно избави нас от искушений душевных и телесных, и от возстающих врагов видимых и невидимых, и от вечнаго осуждения исхити ходатайством твоим вопиющих сице: Аллилуиа. (Сей стих трижды.)
Ангел небесный послан бысть утвердити тя на течение апостольскаго пути и дал тебе словесныя заповеди, перстом Божиим написанныя. Ты же, в себе помышляющи о деле, превосходящем силу, последовала еси течению послушания мановению Божественному, темже удивляющеся вопием тебе:
Радуйся, еюже радость нам возсия; радуйся, еюже от клятвы первыя прелести освободихомся; радуйся, падших во тьму заблуждений грузин возставившая; радуйся, слезы скорби жен грузинских иссушившая; радуйся, помыслы идолослужителей к превыше слова разумению возведшая; радуйся, и Ангелом неведомое сокровенное таинство нам явившая; радуйся, седящаго на огневидных престолех нам возвестившая; радуйся, яко Носящаго всю тварь в девственней утробе коемуждо нам познати дала еси; радуйся, превыше звезд и светил свет на нас излиявшая; радуйся, Бога, во утробе девства вселившагося во обновление нас обветшавших, Создателем всех нам возвестившая; радуйся, еюже познахом Слово, Создателя всех и всяческая носящаго; радуйся, ты, всекрасная в женах, Божественная Невесто.
Взбранной Воеводе, присной Помощнице нашей, тобою избавленнии от работы темнаго фараона, цвет похвал сплетаем тебе, цвете девства, Нино! Во Христово воинство вписаннии раби Царя Небеснаго, но яко присно споборствующую имущи высокую силу Его, присно победительна буди врагом нашим, воюющим на ны, и избави нас от страсти соблазна, да ангельскую песнь слагаем тебе: Радуйся, Духом Божественным освященная Божественная Невесто.
Апостола, от Христа избранную, проповедницу слова Божия наученную, благовестницу жизни, предводительницу народа грузинскаго на путех правды, Матере Божия присную ученицу Нину восхвалим днесь вси ликованием, Божественную Заступницу теплую, Хранительницу недремлющую.
Приими всеблаголепно и строго о душах наших, материя подвижнице, дево, блаженная Нино, малый сей худый благодарственный дар от нас, нищих, недостойных рабов, с усердием и любовию тебе, царице и подвижнице нашей, принесенный! Изо всех родов жен Спасительницею и подвижницею душ наших, омраченных, и Избавительницею от работы тьмы диавольския от Бога нам в милость излиянный свете! Якоже прежде сего подвизалася еси за ны апостольским трудом твоим и материю милостию твоею, тако и ныне не престани подвизатися и ходатайствовати пред Царем Христом, Егоже ты благовестила еси нам апостольским трудом твоим, и избави души наша бедныя от работы тьмы диавольския и от многоразличных прелестей его, и из плена мерзостнейшия душеомрачающия страсти исхити ум и душу нашу! Возстани горнею оною крепкою помощию твоею на враги наша, возставшия на ны, и сокруши мышцы их варварския, многоухищренно на ны простертыя, и отъими силу и крепость их всемогущею силою непобедимаго Царя нашего Христа! И всецело отвращай, мати сладкая, преблаженная, множества язычников, за множество грехов наших день от дне находящих на ны губителей и вооружившихся пленити нас; и до скончания и собрания суеты мира сего пребывай с нами неотлучно, мати преблаженная, мати милостивая, с чады твоими, вин греховных ради отпадшими и страстию диавольскою плененными, и подвизайся с нами неотлучно о подвизаемой тобою Божественной православной всенепорочной вере, животворящею благодатию помощи Всесвятаго Духа! И до исхода малыя сея жизни нашея покрывай нас присно в непорочной вере непорочным жительством, да твоим ходатайством, помощию и покровом присно с поклонением неоскудно славим во всей жизни нашей Творца всех, Царя царей, Спасителя нашего Христа, со Отцем и Духом единобожественнаго и единосущнаго, от всех сущих покланяемаго, ныне и присно и в будущий век. Аминь.
