Акафист святому великомученику Шалве Ахалцихскому
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Крестом Христовым вооруженному мученику и непобедимому воину, страстотерпцу, вернии приносим похвалы Божественныя и моление сие тебе возсылаем: недостойное сие пение наше приими, блаженне, и не помяни злобы нашея, но просвети сердца восхваляющих тя и мрак грехов отжени от поющих тебе: Радуйся, мучениче прекрасный и воине пресветлый, Шалво Ахалцихский!
Яко звезда сияеши во отечестве твоем, пресветлый князю Ахалцихский Шалво, и покрываеши е от всякаго вреда вражия, и избавляеши от скорбей и волнений; сего ради милостиво призри на молящих тя и избави нас от недугов и болезней, и отжени мрак скорбей и искушений, да обрящем покой и непреходящее веселие, хвалами величающии тя:
Радуйся, Православием хвалимый; радуйся, благостию и добродетелию зело прославленный; радуйся, от Господа умудренный и укрепленный; радуйся, на небесех и на земли возвеличенный; радуйся, силою мужества и храбрости просиявый; радуйся, ранами биения и болезнию подвижническою украшенный; радуйся, в горниле лютых болезней искушенный; радуйся, радостию небесною исполненный; радуйся, с ликом безплотных вознесенный; радуйся, в украшение венца Церкве иверския явлейся; радуйся, во утешение Церкве и во украшение Иверии возсиявый; радуйся, от картлосиан присно поминаемый; Радуйся, мучениче прекрасный и воине пресветлый, Шалво Ахалцихский!
Егда в брани Шамхорской поставлен был еси предводителем победоноснаго воинства, имя Христово, яко щит, простерл еси и, укрепив воинство свое, безчисленных врагов прогнал еси и посрамил, и по победе блаженной царице Тамаре знамя халифа под ноги постлал еси; она же рукою твоею принесе е пред Хахульскую икону Богородицы в Гелати и, благодарение воздающи, молебный ямбик принесе Упованию всех христиан: Аллилуиа.
Егда явился еси преславным мужеством на земли в служении благоверным царем, сана мандатуртухуцеси сподобивыйся, царица Тамара и воеводою тя среди воинов постави; ты же, аще и юн бе возрастом, но мудрейший бяше старцев добродетельми и паче преуспел еси в благочестии и благотворении; сего ради хвалим предусмотрение и победы твоя на враги и воспеваем всехвальную доблесть твою:
Радуйся, за отечество наше во время нашествия иноплеменных непобедимый борче; радуйся, упованием на Бога изощренный меч вражий сокрушивый; радуйся, Крест Христов вземый и сарацин до основания низложивый; радуйся, подобно Давиду иноплеменники низлагаяй; радуйся, честности и мужества насадителю; радуйся, от многосплетенных оных козней вражиих избавляяй; радуйся, дерзость богоборцев низлагаяй; радуйся, ближних соединителю и врагов умиротворителю; радуйся, гордостию превознесшихся смиряяй; радуйся, смиренных сердцем возносяй; радуйся, верою твердою лукавых духов победителю и сокрушителю; радуйся, чтущих тя скорый помощниче и заступниче; Радуйся, мучениче прекрасный и воине пресветлый, Шалво Ахалцихский!
Егда попущением Божиим воздвижеся царь Хорасанский и Персидский, именем Джалал ад-Дин, и, бежа от монголов, с воинством безчисленным прииде пленити и опустошити землю Армянскую, тогда Двин держаше Иоанн атабек Мхаргрдзели, и сыновец его Шанше владяше Анисом; сего ради возвестиша царице Русудани и, яко от противников непобедимии, рекоша сию песнь победы: Аллилуиа.
Егда уведе Русудань нашествие хорезмийцев во царство свое, скоро призва всякаго мужа, могущаго носити оружие, и воеводою воинства постави престарелаго Иоанна атабека; он же по чину устрои воинство, и месхов, торели и обоих братий сих Ахалцихских, Шалву и Иоанна, передовым полком поставил есть вас; сего ради хвалимся вернии и пение сие приносим тебе:
Радуйся, светило земли и веры; радуйся, громе Божественныя проповеди; радуйся, рачителю истины; радуйся, образе Божественнаго воинства; радуйся, стено непоборимая мужества; радуйся, столпе непоколебимый храбрости; радуйся, щите, хранящий благочестие; радуйся, мечу, отсекающий злочестие; радуйся, низложителю вражиих ополчений; радуйся, храбрейший воине Вышняго Царя; радуйся, сило и славо скипетра царей; радуйся, прекрасное украшение Церкве иверския; Радуйся, мучениче прекрасный и воине пресветлый, Шалво Ахалцихский!
Егда станом стасте на месте, нарицаемем Гарни, знамением крестным оградистеся, мужественнии оны передовии борцы, и спешно ударисте на безчисленное воинство султаново; но Иоанн атабек и воинство грузинское стояху издалеча и, видяще неравную брань, не помиловаша единоплеменных и единоверных грузин; вы же, срамляющеся вспять обратитися, мужески бранистеся со враги вашими и, яко трие отроцы в пещи, единодушно славили есте Господа: Аллилуиа.
Во время ополчения и во время брани трижды послал еси весть и просил еси помощи, но атабек, завистию к вам побежденный, не восхоте помощи передовому полку и вражды ради двух человек всю Грузию предаде на опустошение; ты же, уразумев лукавый умысел старейшаго воеводы, не убоялся еси множества воинства султанова, но, яко лев, нападал еси и мужеством оным всеславным избивал еси храбрых и сильных; неведущим же дел сих победы твоея повествуем похвалы твоя:
Радуйся, любве ради отечества и верности ради народа себе предавый; радуйся, передовой полк на враги мужеством укрепивый; радуйся, воинской храбрости учителю; радуйся, многих на истинную веру обративый; радуйся, трудом и кровию добраго подвига подвизавыйся; радуйся, во Иерусалиме монастыря святаго Димитрия создателю; радуйся, ненавидящих всякую истину и правду посрамителю; радуйся, человеки на служение отечеству и ко благочинию приводяй; радуйся, всех тепле молящих тя спасаяй; радуйся, коварных и мстительных обличителю; радуйся, о отечестве и ближнем молящихся милующий; радуйся, верою, надеждою и любовию бодрствующих благословляяй; Радуйся, мучениче прекрасный и воине пресветлый, Шалво Ахалцихский!
Егда, зело утрудившеся от брани и помощи лишени, бежасте, тогда праздно стоявшее и великое оно непобедимое воинство побеже, и слава мужества грузин во всех безчестна бысть; ты же, великий мучениче Шалво, уготовался еси на подвиг, имже пришел еси в безсмертие, и ныне, Божественным причастием обоженный, ходатай еси поющих тебе: Аллилуиа.
О зависте, всех зол начало, предтече опустошения и оскудения отечества нашего, яже люте произведе погибель Картли и низложение Тбилиси от славы и красоты и умаление чести! Мы же, удивляющеся пременению естества онаго старейшаго воеводы Иоанна, возвещаем земли сие ужасное и всякий язык ко пению тебе подвизаем:
Радуйся, Божественнаго закона явный хранителю; радуйся, мужеством естества твоего гордость беззаконных низложивый; радуйся, печали и искушения утоляяй; радуйся, дерзостию восхищенных верою усмиряяй; радуйся, врагов наших, завистию человекоубийственною снедаемых, поражаяй; радуйся, желающих погибели нашея сокрушаяй; радуйся, от злаго небрежения и безстудия избавляяй; радуйся, согрешивших покаянием к молитве подвизаяй; радуйся, смрад безбожия отгоняяй; радуйся, мудрых и добре зрящих возносяй; радуйся, двоедушных и нераскаянных смиряяй; радуйся, приспособленцев и коварных посрамляяй; радуйся, последующих благому делу любяй; Радуйся, мучениче прекрасный и воине пресветлый, Шалво Ахалцихский!
Сокрушение мечей и копий, пешее оставление и обстояние родов оных мерзких яша тя и предаша в руце вражии; ты же, мудрый воеводо, не пощадил еси юности возраста твоего и чести княжеския и безстрашно изшел еси на поприще нетленнаго страдания; брат же твой Иоанн, сокрушив все оружие свое о враги, убиен бысть ударами копий; сего ради, храбрым и во бранех преименитым, приносим вам сию песнь победы: Аллилуиа.
Егда поставиша тя пред султаном Джалал ад-Дином, крепкия ради брани и мужества твоего прият тя с великою честию и, даровав грады и веси Адарбадаганския, почте тя со своими вельможи; ты же, довольствуяся наследственным твоим уделом, возложил еси упование на Бога, Создателя твоего; сего ради хвалимся вернии и собираемся принести сию Божественную похвалу:
Радуйся, светильниче пресветлый, мрак безбожия разгоняяй; радуйся, лучшее от худшаго и доброе от злаго разсуждаяй; радуйся, постом и бдением плоть изнуривый; радуйся, непрестанною молитвою искушения диаволя прогоняяй; радуйся, благодатию Божественною невежды умудряяй; радуйся, от мятежа и брани избавляяй; радуйся, от темниц и уз освобождаяй; радуйся, уязвленных невидимыми стрелами исцеляяй; радуйся, убогаго и утесненнаго защитниче; радуйся, разслабленный дух отечества оживляяй; радуйся, помраченный ум наш озаряяй; радуйся, богохранимый народ твой добре наставляяй; Радуйся, мучениче прекрасный и воине пресветлый, Шалво Ахалцихский!
По единем же лете нуждаше тя Джалал ад-Дин оставити закон Христов, и величайшия воинския почести беззаконный он царь с клятвою обещаваше тебе; ты же, мужественне, твердо стоял еси в правой вере и дерзновенно исповедал еси Сына со Отцем и славу воздал еси Святей Троице: Аллилуиа.
Разъяри мучителя слышание ответа твоего, но безумный скрываше в себе гнев и умножаше ласкательства; ты же, Божественныя премудрости исполнен, сице глаголал еси: «О царю, не призывай мя к таковому безумию, ибо аз христианин есмь и никогдаже отвергуся имене Его»; сего ради сынове Православныя Церкве с удивлением возглашаем и глаголем:
Радуйся, проповедниче правыя веры; радуйся, непоколебимый поборниче Православия; радуйся, адаманте мысленный терпения; радуйся, жилище истиннаго подвига; радуйся, мечу, отсекающий плевелы прелести Мухаммедовы; радуйся, верою твердою обличивый безбожие мучителей; радуйся, сладостно носяй иго Божественное; радуйся, розге истиннаго винограда Христова, плод благий приносящая; радуйся, неплененная врата Церкве иверския; радуйся, славо и крепосте отечества нашего; радуйся, на неверных врагов победоносный великий воине Христа Бога; радуйся, венец победы стяжавый; Радуйся, мучениче прекрасный и воине пресветлый, Шалво Ахалцихский!
Егда слыша гордый он и надменный царь словеса твоя премудрая, паки обещаваше тебе богатство и прещения лютых мук пред тобою полагаше; ты же, яко скала твердая в море, не колебался еси от волн насилия и от обещанных слав, но умом твоим псалмопевствовал еси и Животворящую Троицу непрестанно славил еси: Аллилуиа.
Тогда гордое оно царство его до безчестия прииде, и сладостию и лестию умышляше прельстити тя; ты же, мудрый воине, посмеялся еси мучителю и невозмутимым умом отвещал еси: «О Джалал ад-Дине, ни обещанием благ твоих, ни наведением на мя зол твоих не возможеши разлучити мя от Господа моего Иисуса Христа»; сего ради подобающе украшаем тя и по обычаю мужей отечества нашего с любовию чтим память твою:
Радуйся, упование твое на Бога возложивый; радуйся, Божественныя заповеди в сердце твоем напечатлевый; радуйся, правдою строптивость разрушаяй; радуйся, отроков от всякия скверны и порока избавляяй; радуйся, всякое благо и богоугодное насаждаяй; радуйся, носящих имя Христово воинств грузинских сподвижниче и покровителю; радуйся, мужеством врагов победителю и зловерных посрамителю; радуйся, неправедно собирающих и сребролюбию порабощенных обличителю; радуйся, всех к тебе прибегающих и с верою призывающих утешителю; радуйся, хулителей, прелюбодеев и татей ужасаяй; радуйся, лжи и клятвопреступления ненавистниче; радуйся, нищих заступниче и милостивче; Радуйся, мучениче прекрасный и воине пресветлый, Шалво Ахалцихский!
Разгнева убо мучителя твердость твоя и удиви безстрашный ответ, ибо в срам царства своего вменяше таковое дерзновение, и повеле совлещи с тебе одежды и бити немилостиво; ты же пригвоздил еси плоть твою страху Божию и уготовался еси Христа ради на муки и на претерпение смерти; сего ради подвиги твоя повествуем и с благодарением взываем Богу: Аллилуиа.
Тогда мучителие, имже повелено бе мучити тя, влачаху тя безчестно и, совлекше одежды, биша тя долгое время немилостиво; ты же мужественным и твердым помыслом глаголал еси себе: «Радуйся, о Шалво! Ибо с одеждою плоти ветхаго человека совлачишися и от тленных освобождаешися», и язвы мук и лютыя биения Божественным рачением претерпевал еси; сего ради дела твоя достойна суть хвалы и повествования другим:
Радуйся, временную красоту ни во чтоже вменивый; радуйся, премудростию духа лютыя муки мужественно претерпевый; радуйся, агнче святый и непорочный, Христа ради кровь пролиявый; радуйся, рекою крове твоея пламень прелести угасивый; радуйся, любовь к Богу, царю и отечеству насадивый; радуйся, коварствами человеческими и лестию вражиею погибающих избавителю; радуйся, от сетей сатанинских и от нашествия иноплеменных защитниче; радуйся, лютыя скорби скоро прогоняяй; радуйся, безбожием и беззаконием ослепленных вразумляяй; радуйся, непослушных отроков наставляяй; радуйся, с верою поющих тебе просвещаяй; радуйся, к молящимся милостиво приклоняяйся и чтущих тя ободряяй; Радуйся, мучениче прекрасный и воине пресветлый, Шалво Ахалцихский!
«Не помниши ли, Шалво, колькраты предавал еси на брань живот твой ради царя смертнаго, да приимем от него в награду славу среди человек? Тако и смерть Христа ради, безсмертнаго Царя, претерпим, Иже даст нам в награду безконечную жизнь с Ним» — сия глаголал еси себе самому и, постом и молитвою бодрствуя, славил еси Подвигоположника твоего: Аллилуиа.
Егда в темницу затвориша тя, многоразличными лютыми муками искушеннаго, совершил еси течение мученическое и в руце Божии предал еси дух твой; сего ради пресели тя Бог к Себе и небесною славою прослави святаго Своего, ибо, идеже погребоша многострадальное тело твое, почи тамо свет пресветлый, с верою же приходящии исцелевахуся от всякаго недуга, и хваляху тя вси собравшиися:
Радуйся, в мучениих апостольски проповедавый; радуйся, прелесть персидскую победно обличивый; радуйся, полки и воинства велико милуяй; радуйся, разсвирепевших богоненавистников победителю; радуйся, страстем Христовым подражателю и болезнь и смерть волею подъявый; радуйся, горняго ради Иерусалима муки претерпевый; радуйся, от скверны греха насилуемых избавляяй; радуйся, осужденных от смерти избавителю; радуйся, недуги многоразличныя и немощи прогоняяй; радуйся, клеветников и не чтущих родителей посрамляяй; радуйся, врагов картлосиан смиряяй и любящих их возносяй; радуйся, полк бесовский низлагаяй и всецело упраздняяй; Радуйся, мучениче прекрасный и воине пресветлый, Шалво Ахалцихский!
О, коликое величие стяжа тебе мужество твое, ублажаемый! Ибо скорби пременишася тебе в нетленную правду, смерть в безсмертие и страдания в причастие страданий Христовых; сего ради память твоя просвети днесь Церковь грузинскую и всех собра достойно пети тебе: Аллилуиа.
Добре красуется днесь земля наша, и возлюбленный народ ликует, яко венцем, тобою украшенный, и праздник памяти твоея светло просвещается, ибо засвидетельствова грузином истинное мученичество твое, яко Георгиево и Феодорово, с нимиже соединился еси в небесном воинстве, блаженне Шалво, и покровитель еси всех восхваляющих тя и с любовию поющих тебе:
Радуйся, славы Божия проповедниче и правды явителю; радуйся, Божественным подвигом твоим безплотныя чины удививый; радуйся, светом мученичества твоего мрак отечества озаряяй; радуйся, народ твой Божественным светом просвещаяй; радуйся, кровию твоею правую веру возвеличивый; радуйся, пламень страстей и лютыя недуги угашаяй; радуйся, и род сей грузинский превосходною радостию возносяй; радуйся, отвергающихся трудов отцев и дедов посрамляяй; радуйся, продолжающих подвиг предков наших благословляяй; радуйся, о вере и отечестве потрудившихся милуяй; радуйся, к тебе прибегающия страждущия души приемляй; радуйся, вместо преходящия славы свет непреходящий приявый; Радуйся, мучениче прекрасный и воине пресветлый, Шалво Ахалцихский!
Не покры тебе страшный гроб забвения, пресветлый княже, ниже течение времен возможе предати забвению дивная дела твоя, ибо летопись Картлийская предложи нам мужество подвигов твоих, великий мучениче, и хотящим слышати великодушныя победы твоя вернии возвещаем похвалы твоя: Аллилуиа.
Облекийся во Христа, яко в ризу, и благодатию Его посрамивый злых оных врагов, ныне принеси моление наше Избавителю и испроси нам, да низпослет силу, мужество, премудрость и одоление на всех врагов и утеснителей христолюбивым грузином, да не будем в поношение и посмех врагом нашим, но, любовию к Богу и ближнему во единомыслие связаннии, присно хвалим святых мучеников и ублажаем мужество твое:
Радуйся, от многообразных прелестей непобедимый, яко на поприще страдания явился еси совершенным воином; радуйся, оружием крестным огражденный, яко победил еси начала и власти тьмы и явился еси причастником Божественных страстей; радуйся, воином Создателя веков вписанный, яко пояс земнаго воинства оставил еси и с верою подвизался еси даже до пролития крове; радуйся, непобедимым подвигом пресветлый, яко возсиял еси на земли, яко звезда небесная светоносная; радуйся, красото лика мучеников, яко сугубым венцем прославился еси, яко непобедимый мученик и яко воин Христов; радуйся, пред Царем Небесным присно предстояй, яко на небо приял еси, и отверзошася тебе врата рая; радуйся, всесветлый светильниче народа грузинскаго, яко светиши всем концем земли нашея; радуйся, златокованный светилниче Церкве, яко блистание подвига твоего озаряет сердца мученолюбцев; радуйся, подъемлющих подвиг утверждение, яко даруеши в брани победу; радуйся, похвальный сыне отечества нашего, яко свет пресветлый вселися в тя и сотвори тя утверждением народа твоего; радуйся, славо мучеников и светлосте воинов, яко прослави подвиг твой прославивый тя Христос, и весть о сем достиже даже доныне; радуйся, непоборимый столпе грузин и стено неразрушимая, яко несть никогоже, иже призывая тя в скорбех, не обрящет скораго утешения; Радуйся, мучениче прекрасный и воине пресветлый, Шалво Ахалцихский!
О святый Божественный подвижниче и доброто всех грузин, пресветлый княже Ахалцихский Шалво! Понеже воинство земное возненавидел еси и небесныя славы возжелал еси, и биения, и язвы, и поношения подъял еси, и злую смерть, яко наслаждение, — ныне разсей мрак прегрешений и просвети души наша, да с тобою наслаждаемся во веки, с верою поюще тебе: Аллилуиа.
Сей кондак рцы трижды, потом:
Яко звезда сияеши во отечестве твоем, пресветлый князю Ахалцихский Шалво, и покрываеши е от всякаго вреда вражия, и избавляеши от скорбей и волнений; сего ради милостиво призри на молящих тя и избави нас от недугов и болезней, и отжени мрак скорбей и искушений, да обрящем покой и непреходящее веселие, хвалами величающии тя:
Радуйся, Православием хвалимый; радуйся, благостию и добродетелию зело прославленный; радуйся, от Господа умудренный и укрепленный; радуйся, на небесех и на земли возвеличенный; радуйся, силою мужества и храбрости просиявый; радуйся, ранами биения и болезнию подвижническою украшенный; радуйся, в горниле лютых болезней искушенный; радуйся, радостию небесною исполненный; радуйся, с ликом безплотных вознесенный; радуйся, в украшение венца Церкве иверския явлейся; радуйся, во утешение Церкве и во украшение Иверии возсиявый; радуйся, от картлосиан присно поминаемый; Радуйся, мучениче прекрасный и воине пресветлый, Шалво Ахалцихский!
Крестом Христовым вооруженному мученику и непобедимому воину, страстотерпцу, вернии приносим похвалы Божественныя и моление сие тебе возсылаем: недостойное сие пение наше приими, блаженне, и не помяни злобы нашея, но просвети сердца восхваляющих тя и мрак грехов отжени от поющих тебе: Радуйся, мучениче прекрасный и воине пресветлый, Шалво Ахалцихский!
О во бранех непобедимый воине пресветлый и в скорбех непостыдно руку подаваяй, молящих тя скорый помощниче и милости подателю, святый великомучениче, княже Шалво Ахалцихский!
О подвига победителю, великий мучениче Шалво Ахалцихский! Помяни нас пред Богом и сиянием святыни твоея покрый землю Иверскую от ереси и от закона чуждаго, всем же живущим в ней даруй, якоже тебе, теплоту веры, братскую любовь к ближнему и Божественную ревность об отечестве, и без препятствия возставь нам от корене Давидова помазанника Божия, иже верою твердою оградит вся пределы Грузии и вознесет и возставит высоту и крепость нашу от земли забвения, да будем едино стадо и Господь да будет Пастырь наш. Многомощною силою твоею укрепи Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священный и монашеский чин, военачальников и градоначальников, христолюбивое воинство, и благодетелей наших, и всех православных христиан, и тезоименитых тебе и молящихся тебе возвеличи. Моли, всесветлый мучениче, возлюбленнаго тобою сладчайшаго Иисуса, да простит нам отступления, разорения и осквернения церквей, убиения служителей Божиих, измену, зависть и безчиния, убиения младенцев наших во утробе и иная множества прегрешений наших.
О победою венчанный великий мучениче Шалво! Яко имея дерзновение велие, ходатайствуй пред Богом, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да возставит благочестие, правдолюбие, многочадие и милость ко вдовицам и сиротам; да дарует нам любовь ко святому житию, ненависть к непотребным делом и сокрушение сердца, со святыми венчание и наследие Царства Небеснаго, да и мы с тобою славим Отца и Сына и Святаго Духа, ныне и присно и во веки веков.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй (трижды),
Господи Иисусе Христе, Сыне Божий, молитвами Пречистыя Твоея Матере, великомученика Шалвы Ахалцихскаго и всех святых, помилуй нас. Аминь.
Автор-составитель: Тинатин Мчедлишвили
