Акафист преподобному отцу нашему Георгию Святогорцу
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Свыше дарованное утверждение православных и пастыря и учителя народа грузинскаго похвалами воспеваем и ходатая тя творим к милостивому Богу, да призрит на ны и до скончания века сохранит Иверию и народ Иверии, да не преклонимся к беззаконию и усердно восхвалим дела твоя, хвалы достойная: Радуйся, благочестия образе пресветлый, преподобне отче наш Георгие Святогорче!
Якоже царем израильским посылаше Господь по временом пророки, в стену закона и в помощь верным, тако призре милость Божия на род наш и яви тя, яко новаго Златоуста, в просвещение и возбуждение к добродетелем и подвигом; сего ради прибегаем под покров твой и благодарение приносим Богу, даровавшему тебе таковую благодать духовную, и ублажаем тя, яко светило пресветлое Церкве грузинския:
Радуйся, сосуде избранный, обителе Святаго Духа; радуйся, памятниче веры и проповедниче истины; радуйся, служителю Троицы и украшение священства; радуйся, подражателю Пастыря добраго, сладчайшаго Иисуса, и делателю винограда Его; радуйся, премудро изрекий тайны Духа, и богодвижимыя гусли словес Давидовых; радуйся, сило и утверждение скипетра царей; радуйся, пресвятая звездо пустыни и явное солнце, светило Грузии; радуйся, небесный поборниче народа грузинскаго; радуйся, златоструйный, отечество твое напаяющий; радуйся, основание и утверждение Церкве иверския; Радуйся, благочестия образе пресветлый, преподобне отче наш Георгие Святогорче!
Прежде зачатия твоего явися Ангел Господень матери твоей Марии и возвести: «Радуйтеся, яко родиши отроча, многое время от Бога испрашиваемое; нарцы его Георгий и, яко жертву благую, принеси его Тому, Емуже обещалася еси»; благочестивая же жена со страхом и радостию возвести видение сие Иакову, супругу своему, и в добродетелех преуспевающе, приношаху Господу пение достойное: Аллилуиа.
Родився, отроча, от Бога обетованное, от младенчества научен был еси учением духовным и седми лет в Самцхе, в обители, Тадзрисы нарицаемей, принесен был еси Богу; ты же, яко Ангел, красен бе образом и исполнен премудрости, и дары разума стяжал еси теплою молитвою; тако и ныне излий на нас благодать всечистыя молитвы твоея, да не впадем в сеть вражию и глаголем по силе нашей:
Радуйся, отроче дивный, от Господа предызбранный и благословенный; радуйся, яко Самуил, прежде зачатия Богу посвященный; радуйся, плоде сладкий, от честнаго корене прозябший; радуйся, от младенчества благодатию Божиею хранимый; радуйся, от юности от всяких позорищ и шалостей избавленный; радуйся, новосаждение прекрасное, при исходищах богодухновенных книг насажденное; радуйся, нектаром Духа напоенный; радуйся, в обучении Божественных Писаний возрастший; радуйся, любителю добродетели и искателю Царствия, сиянием его зде просвещенный; радуйся, сладостей века сего возненавидевый; радуйся, от мятежей мира отлучивыйся и горнею добротою уязвленный; Радуйся, благочестия образе пресветлый, преподобне отче наш Георгие Святогорче!
Видя усердие твое, враг жизни человеческия и борец святых разсвирепе, ибо от юности растяше в низложение силы его, и, устрашившися, люте нападаше на тя; но посланнии тебе от Бога в помощь Ангели предхождаху тебе и покрываху во вся дни жития твоего, и ныне присно с ними предстоиши пред Богом и можеши помогати всем, иже к ходатайству твоему прибегают и хвалят милость Его: Аллилуиа.
В отрочестве видел еси злаго духа во образе отрока, хотящаго погубити тя в водах, но хранитель твой Ангел не попусти тебе войти в реку; егда же завистию бесовскою огнь обитель объят, ты же, не ведый, спаше, тогда прииде Ангел, светло облеченный, и изведе тя невредима; тако и ныне ходатай буди о нас присно ко Господу, да силою Своею непобедимою Ангелы Своими отженет от нас всякое зло и избавит нас от всякия скорби и соблазна, да, невредимо сохранени, радуемся духом и ублажаем тя с желанием:
Радуйся, верный рабе Спаса всех, стопам Его последовавый; радуйся, молитвою очищенный и постом изнуренный; радуйся, к разумению силы святых Писаний умудренный; радуйся, мужеством ума и незлобием сердца вооруженный; радуйся, сладости Божественныя благодати исполненный; радуйся, разженныя стрелы лукаваго подвигом угасивый; радуйся, подобно Иоанну Милостивому нищих и требующих милуяй; радуйся, великодушне и светом богопознания просвещенне; радуйся, силою Христовою многажды над бесы победу стяжавый; радуйся, славу прельстителя и сети его непрестанною молитвою обличивый; радуйся, малодушным и нетерпеливым образ давый; радуйся, от истинныя Божественныя премудрости украшенный и светло облеченный; Радуйся, благочестия образе пресветлый, преподобне отче наш Георгие Святогорче!
Видевше тя премудростию и разумом совершенна, братия отца твоего приведоша тя в Хахули, великую лавру, и поручиша преподобному Иоанну Тваели, иже, яко от Бога данное возлюбленное чадо, прият тя и обучением к монашеству направи; ты же, бывый ревнитель и подвижник веры, день от дне подвизался еси во славу Божию и хвалил еси силу Его: Аллилуиа.
Егда сын Фериса Джоджикова и супруга его, дщерь царя Баграта, всякое дело духовное вручиша Георгию Писцу, тогда сродник твой взя тя с собою, яко помощника в служении; видевше же добрии оныи супрузи усердие твое к служению Божию, зело возрадовашася и крепкой молитве и подвигу твоему зело удивишася; тако и ныне душу мою сиянием благодати твоея просвети и сердце мое Божественною любовию исполни, да в премудрости хожду путем истины и непрестанно хвалю тя:
Радуйся, мужественне, красный образом и тезоимените делания; радуйся, отрасле плодоносная подвижничества; радуйся, проповедниче учения апостол и отец; радуйся, наставниче и светильниче истины; радуйся, любителю Божественныя премудрости; радуйся, гласе прекрасный богословия; радуйся, громе Божественнаго учения; радуйся, судие суда и правды; радуйся, служителю Божий и верный отечеству и царю; радуйся, недремлющий хранителю и поборниче земли иверския; радуйся, богодвижимыя гусли Церкве грузинския; радуйся, похвало и просветителю народа нашего; Радуйся, благочестия образе пресветлый, преподобне отче наш Георгие Святогорче!
Егда усекоша главу сыну Фериса Джоджикова повелением кесаря, и супругу его с домочадцы в Константинополь послаша, и тебе отведоша в царствующий оный град и на обучение премудрости даша монахом богобоязненным и риторам, ибо любитель учения бе и терпелив зело, и преуспел еси паче греков; тем ублажаху усердие твое и хваляху Умудрившаго тя Христа: Аллилуиа.
Егда дщерь царя Баграта прииде во отечество свое, и ты отшел еси в Хахули и последовал еси подвигу монашескому, но от всех бежати помыслил еси в рубищи нищенстем, да поклонишися святым местом, блаженне; и срет мужа, от бесов страждущаго, злым духом запретил еси именем Христовым и свободил еси его от трепета и скрежета зубов; тако и нам спутник буди и избави нас от сетей диавольских и от коварства человеческаго, да обрящем упокоение и наслаждение непреходящее, восхваляющии тя и поющии:
Радуйся, добродетельным житием безплотным уподобивыйся; радуйся, от истинныя Божественныя премудрости украшенный и светло облеченный; радуйся, неизреченною святостию священником образ давый; радуйся, превыше слова достигий и богословными усты паче риторов вещавый; радуйся, ожесточенная сердца умягчаяй и языки еретиков изнемогаяй; радуйся, от Господа власть над нечистыми духи приимый; радуйся, волшебством ума лишенных паки в разум приводяй; радуйся, подобно великому апостолу Петру знамением святаго креста волхвов чародейство разрушивый; радуйся, лукавство их победою обличивый; радуйся, в славу имене Христова требище бесовское низложивый; радуйся, от сетей сатаниных и от нашествия иноплеменных покрываяй; радуйся, молитвою твоею одержимых многоразличными недуги избавляяй; Радуйся, благочестия образе пресветлый, преподобне отче наш Георгие Святогорче!
Ищущи учителя духовнаго, достигл еси Антиохии, и восшед на Дивную Гору, обрел еси в пещере старца свята, от мира отлучившагося, Георгия Затворника, и был еси ученик великаго оного светильника народа грузинскаго; видев же тя блаженный старец духом непобедима и телом мужественна, схимою ангельскою облече тя и во Иерусалим посла; ты же, водительством Святаго Духа, взыде во святый град и, богатейшею благодатию святыя земли, возвратился еси на Дивную Гору благословением учителя, иже перевод книг Божественных с греческаго на грузинский возложи на тя и на Святую Гору, в Иверскую обитель, посла тя; тогда поспешил еси делом исполнити повеление учителя и принесл еси Господу славословие хвалы: Аллилуиа.
Се, помощь Вышняго творящим волю Его, ибо, шествуя путем, ведущим на Афон, не возмогл еси великия оныя реки чрез быстрину волн прейти; но в мученицех мужественный Георгий дарован бысть в хранителя и помощника подвижнику своему, егда на коне белом воссед, мирно пренесе тя и сам невидим бысть; ты же, пришед в лавру грузинскую, первее поклонился еси всесвятей иконе Портаитиссы и облобызал еси гроб святаго Евфимия, ибо подражая ему пустыннолюбием и подвигом великим, достигл еси великия меры; мы же, слышавше дивное и высокое подвижничество твое, в восхваление и пение отверзаем уста:
Радуйся, трубо и тимпане громогласный слова Божия; радуйся, гусли Христовы духовныя и языче благоглаголивый; радуйся, подобно пророку и боговидцу Моисею светом облеченный и лицем светлый; радуйся, добротою и светлостию подвига прекрасный; радуйся, святую ону гору Божественным помыслом обозревый; радуйся, храбрых афонских сокровища учениче и стопам их последовавый; радуйся, всех книг ветхаго и новаго закона славный переводчиче и философе, со верховными апостолы достойно воспеваемый; радуйся, правило и печате блаженная монашескаго жития; радуйся, адаманта тверже, от многоразличных прелестей непобедимый; радуйся, сокрытием добродетелей и чудес твоих князей тьмы погубивый; радуйся, от Ангелов радостный и среди человек прославляемый; радуйся, всех грузин предстателю, стено крепкая и тихое пристанище; Радуйся, благочестия образе пресветлый, преподобне отче наш Георгие Святогорче!
Подвизаяйся в Божественней Иверстей обители седмь лет, добре описал еси подвиги отцев, зиждителей обители, и памятник веры воздвигл еси сродником твоим; но не возмогл еси противитися воли учителя и, рукоположен во иерея без воли твоея, его предстательством и молитвою последовал еси стопам святаго отца Евфимия и начал еси переводити с греческаго помощию Святаго Духа; труды же твоя зело драгоценны и возлюбленны имяху царь и народ и хваляху и пояху Богу: Аллилуиа.
Видевше братия обители, яко путем заповедей Христовых непорочно хождаше и ангельски жительствоваше, возведоша тя на высокую лествицу настоятельства и посадиша на престоле святаго отца Евфимия; ты же вверенное тебе стадо пасл еси кротким и смиренным духом и добре управлял еси Иверскою обителию, яже ныне затворена есть грузином; и ты не умолкни ходатайствовати пред Богом, да благоволит призрение безмерныя милости Его, да сродницы наши во время служат в наследии оном отец наших, и, тобою хвалящеся, восхваляют тя, яко вернии ученицы возлюбленнаго учителя своего:
Радуйся, иерею святый и иных освящающий, грехолюбивых человек сладости воздержания научающий; радуйся, в образ и подобие добродетели грядущим родом жития великаго Евфимия описателю; радуйся, от святыя сея горы и лавры иверския потоки жизни по лицу земли и рода нашего изливаяй; радуйся, дивною премудростию неудобь постижимая богословия и силу глубины книг прекрасно изъяснивый; радуйся, всех песнопений и церковных канонов тщательный исчислителю; радуйся, во искушениих благодать помощи свыше приемляй; радуйся, богодухновенными учении и Божественными заповедьми монахов наставивый; радуйся, волнами мира поколебанная сердца на благочестие научаяй; радуйся, неискусных братий от страстных похотей покрываяй и нечистоты обличителю; радуйся, послушным сладкий и смиренный и нераскаянным вразумителю; радуйся, человеки к служению отечеству и к духовности приводяй; Радуйся, благочестия образе пресветлый, преподобне отче наш Георгие Святогорче!
Во дни оны бысть брань между землями грузинскими и греческими, и обрете тя Иверская обитель, яко богатство Божие, и с радостию прият тя; но уразумел еси, блаженне, яко перевод богодухновенных книг не преуспеваше, и отрекся еси настоятельства; но молением царицы Марии достигл еси Иерусалима и велие приношение дал еси Георгию-Прохору Шавшели на обновление Крестнаго монастыря и раздал еси церквам и нищим; мы же, аще и недостойни есмы грехов наших ради, помози, да паки вселятся грузины в славный Крестный монастырь и непрестанно воспевают Распятому за спасение всех человек Христу, Царю и Богу: Аллилуиа.
О деле сем высоцем и дивнем, иеромонаше Георгие, ибо, на Черную Гору пришед ради перевода святых книг с греческаго, подвиг и труд подъял еси и землю твою писаниями благочестия исполнил еси, имиже украсил еси Церковь грузинскую и с чады ея Божественным учением светло украсил еси; ныне умири сердца наша, волнами мира поколебанная и оскверненная, и Божественным бдением исполни, да и мы трудов твоих добрии изследователие будем и, тобою ободрени, ублажаем тя:
Радуйся, словес духовных и уставов законных непогрешимый списателю; радуйся, единоплеменников, во странствии сущих, от многоразличных волн избавителю; радуйся, козни врагов разрушивый; радуйся, святое Писание от скудословия и лукавства очистивый; радуйся, безупречно переведенными псалмы умы, яко медом, услаждаяй; радуйся, в Православии, от святых отец преданном, утверждаяй; радуйся, скверну суеверия омываяй; радуйся, переведенная Евфимием и недосугом не совершенная совершивый и подвиг его продолживый; радуйся, рукописи, злобою времен и от безумных повреждения, паки совершеннее и чище исправивый; радуйся, зрителей и свидетелей подвига твоего удививый; радуйся, многих добрых пастырей возсиявый; радуйся, среди неразумных и ненаученных Божественная учения распространивый; Радуйся, благочестия образе пресветлый, преподобне отче наш Георгие Святогорче!
Егда монаси Симеоновы изострили языки гневом и яростию на грузин и зряху их, яко еретиков, ты возвестил еси патриарху Антиохийскому чистоту Церкве иверския и всецело обличил еси клевету грузиноненавистных греков; тако и ныне упраздни страшныя козни тех, иже подвизаются о всецелом растлении и истреблении грузин, и Церковь сохрани от еретиков, да просияет Грузия миром и славою, и мы, вернии отечеству и раби вернии, присно славим Иисуса, Царя и Избавителя нашего: Аллилуиа.
Паки возмутишася греки и, лестию и коварством совещавшеся на грузины, с лукавством возвестиша Феодосию, патриарху Антиохийскому: «Ни един от двоюнадесяти апостол не прииде в землю Картлийскую, и подобает им пастися под властию твоею»; тогда принесл еси «Хождение апостола Андрея» и оттуду уверил еси собор отец: «Мы от Первозваннаго Андрея обращени есмы, и якоже Петру подобает покоритися призвавшему его и брату, тако и ныне праведно есть, да и вы покоритеся Церкви грузинстей»; и тако упразднил еси словеса греков помощию Божиею; Того моли, да умножит нам преподобныя отцы и мудрыя наставники, делом и словом украшенныя, да подобающе служат святей Церкви грузинстей и ублажают тя, подвигом твоим мужественни бывше:
Радуйся, Божественный таинниче, светом подвигов благодать прозорливости стяжавый; радуйся, благодать разрешения ума и вразумления отроков в дар приемый; радуйся, премудростию совершенный, сердец и помышлений истолкователю; радуйся, учением жизни неразумных умудряяй; радуйся, книгами твоими, яко рекою животворящею, церкви наша напаяяй; радуйся, копием истины бесоподобных клеветников низлагаяй; радуйся, языком огненным многосоставную ложь попаляяй и братий своих неповрежденно сохраняяй; радуйся, лукавство греков разрушивый и уста злоумышленников заградивый; радуйся, самостоятельство Церкве иверския утвердивый; радуйся, всех врагов картлосиан устрашаяй и смиряяй; радуйся, лютый глад духовный пресекий; радуйся, присно власяницею облеченный и на престол кафоликоса Церкве Картлийския не восшедый; Радуйся, благочестия образе пресветлый, преподобне отче наш Георгие Святогорче!
Стеною закона и образом святыни стяжа тя боголюбивый царь грузинский за силу словес твоих и за светлость жития твоего, и многажды писанием и молением умоляше тя прийти в царство его, да вси благословятся тобою и просветятся зрением твоим; ты же, видя веру и любовь к тебе царя Баграта, с великим трудом достигл еси Картли, еже обратити живущих в ней от прелести, и, яко Илия, безстрашно обличая царя, всех призвал еси к познанию и славе Божией: Аллилуиа.
Обновление благодати дадеся тобою апостольскому оному славному народу, от Нины Каппадокийския просвещенному, ибо богатейшею благодатию Божиею исполненная молитва твоя и слово и учение бысть кормчим и правителем царем и князем, священству и народу, и избави от потопления грехов; тако и ныне умудри князи и правители наша и миром огради ходатайством Богородицы, да ходим путями правды и истины и ублажаем тя, яко великаго отца и сына отечества:
Радуйся, душеполезным подвигом всех грузинских добродетелей возвышателю; радуйся, от беззаконных устрашенных христиан духовною радостию исполняяй; радуйся, сеяние апостола Андрея и Симона Кананита, погребенное, паки возрастивый; радуйся, царей о многих безчиниях нелицеприятно обличивый и в царственных судех наставивый; радуйся, делателю добрый, землю твою от плевел всецело очистивый и многия язвы народа твоего исцеливый; радуйся, иже во овчих одеждах, внутрь же волцы, служащих низложивый и разсеявый; радуйся, словом сладкий и беседою вожделенный, просветителю Церкве грузинския; радуйся, чистотою соблюдающих себе иереов и монахов почитателю и сребролюбцев посрамителю; радуйся, благоверных властей и воинств заступниче и безбожных сонма победителю; радуйся, мучителей человеконенавистных князей и судей посрамителю и от них неправедно осужденных милостивче; радуйся, сильных и храбрых, о богатстве мышцы своея хвалящихся и о множестве людей превозносящихся, прещением казнящий; Радуйся, благочестия образе пресветлый, преподобне отче наш Георгие Святогорче!
Егда милостивый Бог за множество беззаконий на весь восток глад наведе, кротостию ума твоего и чистотою сердца уподобился еси Царю твоему Христу, ибо многих сирот и нищих сугубою пищею воспитал еси и в дар честный привел еси святей Церкви, да процветает и приносит обильно плод во славу Божию и в пользу отечества; тако и ныне отверзи нам сокровища книг и направи уста наша во хвалу тебе и во славу Бога: Аллилуиа.
Уразумев время исхода твоего, подвижеся дух твой отыти на Святую Гору, и возвратився в Константинополь, царствующий град, множество оно сирот поставил еси пред кесарем и по Бозе предал еси в руце его; посем благословил еси ученики твоя и в праздник верховных апостол предал еси святую душу твою вожделенному твоему Христу; тогда со лики безплотных вознеслся еси пред Него и оставил еси Церкви нашей учение и честную память твою, юже совершающе, скоро притекаем ко святым иконам твоим, от нихже истекает Божественная река исцелений, и возглашаем похвалы твоя:
Радуйся, пастырю духовный, разсеянных овец собираяй и ко истинному Богу приводяй; радуйся, оскверненным душею и телом грешником покаянию научаяй; радуйся, многих душ от тяжкаго плена и от работы мучителей избавителю; радуйся, старцев укрепителю и немощных исцелителю; радуйся, алчущих питателю и нагих одеятелю; радуйся, сирот хранителю и отроков вразумителю; радуйся, юношей и дев от всякия скверны и порока избавителю; радуйся, чад к послушанию родителем наставниче; радуйся, пред кесарем непогрешимую веру грузин усердно защитивый; радуйся, в научение и вразумление нам на предателей грузин клятву и проклятие положивый; радуйся, молитвою дожди низводяй и бесов от человек прогоняяй; радуйся, всем родом грузинским отцем Православия причтенный и от любителей учения присно поминаемый; Радуйся, благочестия образе пресветлый, преподобне отче наш Георгие Святогорче!
Егда почил еси и отшел еси ко отцем твоим в старости честней, ученицы твои многострадальное тело твое во ковчег со излиянием слез положиша, и на колесницу поставиша, и шествующим им на Святую Гору со псалмы и пением, прослави Царь исход твой из тела знамении и чудесы, ибо на пути вонзеся терн в ногу младшему по возрасту ученику твоему Пантелеимону, и егда наклонися, абие страшная колесница пройде по хребту его, но тако дивно облегчи тяжкое оно колесо благодать святаго тела твоего, яко абие воста отрок той и славяше Бога, дивнаго во святых: Аллилуиа.
Слышав о преставлении твоем Константин, самодержец, скорбе зело и две грамоты дарова сиротам твоим, да никтоже дерзнет изгнати их из обители и да противятся, аще кто восхощет вредити святей лавре; и сии обе грамоты и свещи положиша на святых персех твоих и с честию погребоша тя в раце Георгия Строителя; «Житие» же твое описати потщася ученик твой, преподобный Георгий Мали, и, мужество твое усердно поведав, подвиже уста наша пети тебе:
Радуйся, живущих в Иверии сладкое утешение, радости спасительныя подателю; радуйся, в сердцах боголюбцев благодатную радость изливаяй; радуйся, мужеством и храбростию духа малодушным и нетерпеливым образ даяй; радуйся, души, в глубине неведения потопленныя, к познанию Бога возводяй; радуйся, грузин, от еллин варварами нарицаемых, Богом данною премудростию твоею с ними сравнивый; радуйся, к небесным видением восхищенный и красоты рая зрителю; радуйся, Божественному сиянию приближивыйся и со славным ликом отцев, за веру и землю живот положивших, соединивыйся; радуйся, ходатайством твоим двери Божественныя милости отверзаяй; радуйся, народу грузинскому сладость благочестия от Господа испрашиваяй; радуйся, и по смерти бесов прогоняяй и душевныя и телесныя страсти исцеляяй; радуйся, благих прошений исполнителю и злыя корени похотей всецело искореняяй; Радуйся, благочестия образе пресветлый, преподобне отче наш Георгие Святогорче!
О в отцех учением и чудес высотою славный и в подвижницех дивный, всеблаженне Георгие Святогорче! Призри на ны, с верою покланяющихся и с желанием лобызающих честную икону твою, и моли Бога, да покрыет нас от работы душепагубныя прелести, да дарует нам веру непоколебимую, чистоту жития и страх Божий, да, яко ты, в достоинстве и правде послужим отечеству и народу и, христианской кончины достигше, с тобою воспоем Богу: Аллилуиа.
Сей кондак трижды, потом:
Якоже царем израильским посылаше Господь по временом пророки, в стену закона и в помощь верным, тако призре милость Божия на род наш и яви тя, яко новаго Златоуста, в просвещение и возбуждение к добродетелем и подвигом; сего ради прибегаем под покров твой и благодарение приносим Богу, даровавшему тебе таковую благодать духовную, и ублажаем тя, яко светило пресветлое Церкве грузинския:
Радуйся, сосуде избранный, обителе Святаго Духа; радуйся, памятниче веры и проповедниче истины; радуйся, служителю Троицы и украшение священства; радуйся, подражателю Пастыря добраго, сладчайшаго Иисуса, и делателю винограда Его; радуйся, премудро изрекий тайны Духа, и богодвижимыя гусли словес Давидовых; радуйся, сило и утверждение скипетра царей; радуйся, пресвятая звездо пустыни и явное солнце, светило Грузии; радуйся, небесный поборниче народа грузинскаго; радуйся, златоструйный, отечество твое напаяющий; радуйся, основание и утверждение Церкве иверския; Радуйся, благочестия образе пресветлый, преподобне отче наш Георгие Святогорче!
Свыше дарованное утверждение православных и пастыря и учителя народа грузинскаго похвалами воспеваем и ходатая тя творим к милостивому Богу, да призрит на ны и до скончания века сохранит Иверию и народ Иверии, да не преклонимся к беззаконию и усердно восхвалим дела твоя, хвалы достойная: Радуйся, благочестия образе пресветлый, преподобне отче наш Георгие Святогорче!
О светозарная звездо пустыни и великий игумене Божественныя Иверския обители; собеседниче и сожителю Ангелов и просветителю грузин, царей утверждение, князей славо, немощных крепосте, сирот утешителю, многих чудес творче и всех немощных, отчаянных и тепле к тебе молящихся православных непостыдный пред Богом ходатаю, преподобне отче наш Георгие Святогорче!
О пастырю истинный стад Христовых и великий наставниче учителей, светильниче Церкве иверския и монахов богодухновенная красото, властителей нелицеприятный обличителю и жезлом учения наставниче, отче всечудный, преподобне Георгие Святогорче! Иже от всего рода грузинскаго причтен еси в поборника православных, отеческим ходатайством твоим примири нас благому Богу, да любовь Свою к нам и веру нашу к Нему паки обновит и род наш вселит в славной обители Иверстей, да присно покланяются и служат иконе, Портаитиссою нареченней, — Богородице Иверския Врат, ибо ни единаго грузина не обретается в обители, юже великим подвигом создаша Иоанн Ивир и Иоанн, бывый Торникий, в жилище грузином. Умоли возлюбленнаго тобою сладчайшаго Иисуса, да милостивно призрит на удел Матере Своея, народ наш, носящий на земли крест Господень, и царя христолюбива помажет и венчает на престоле всея Грузии, да добре управляет и печется о народе грузинском, и возставит единство отечества нашего, и возвысит достоинство и силу земли и рода нашего, да не рекут безчисленнии врази наши: где есть Бог их, на Негоже уповают? Укрепи Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан.
О во святых славный и во отцех благочестием просиявый, преподобне Георгие Афонский, не престани молити милостиваго Бога, да дарует церквам славу, пастырем нашим ревность и бдение о душах; властем — премудрость, силу и доброе пасение народа; судиям — правду нелицеприятную; воином мужество; наставником — разум и смирение; мирянам безгрешие и женам целомудрие; супругом — любовь и единомыслие; чадом — послушание; обидимым — терпение; обидящим страх Божий; скорбящим долготерпение; радующимся воздержание и дух разума и благочестия; нам же да простит суетную и лживую веру, гордыню, лукавство, измену, зависть, ненависть, сребролюбие, неблагодарность, ропот, убийства, татьбы, блуды, безчиния, и да дарует нам жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, преподобнаго и блаженнаго отца нашего Георгия Святогорца и всех святых, помилуй нас. Аминь.
Автор-составитель: Тинатин Мчедлишвили
