Акафист святому великомученику и победоносцу Георгию
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.
Господи, помилуй. (12 раз)
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Яко пленных свободитель и нищих защититель, немощствующих врач, царей поборниче, победоносче великомучениче Георгие, моли Христа Бога помиловати души наша.
Возделан от Бога, показался еси благочестия делатель честнейший, Георгие, добродетелей рукояти собрав себе: сеявый бо в слезах, веселием жнеши; кровь излияв, подвигом Христа приобрел еси, и ныне ходатайством твоим избавляеши от смерти души наша.
Взбранному и победоносному Георгию принесем похвалу, яко ходатаю нашему и скорому помощнику. Ты же, святый Георгие, имеяй дерзновение ко Господу, от всех страстей освободи нас, да поем ти: Радуйся, победоносче великомучениче Георгие!
Творец Ангелов и Создатель всея твари посла тя в Церковь яко непобедимаго подвижника веры и венценосна воина Своего, нас же, подвигом твоим просвещенных, научи пению сему:
Радуйся, всем сердцем, умом и душею твоею Иисуса Христа возлюбивый; радуйся, имене Его ради и душу с любовию положивый; радуйся, истинный исповедниче; радуйся, благодатию Господнею просиявый подвижниче; радуйся, Ангелов сожителю; радуйся, пророков сопричастниче; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Не преткнуло тя, боголюбче, мучение идолослужителей, но яко добрый воин Христов, нищим раздал еси богатство свое, волею предстал еси пред судищем беззаконных и Богу твоему, Вождю Христу, воспел еси: Аллилуиа.
Разумев Бога, в Троице богоприлично покланяемаго, твердым умом исповедал еси Его в сонмищи беззаконных и тем обличил еси слепое безумнаго царя поклонение тварем; мы же научихомся усердно пению сему:
Радуйся, православныя веры пред нечестивыми явителю; радуйся, прелестей идолослужения обличителю и низложителю; радуйся, Пресвятыя Троицы верный хранителю; радуйся, истиннаго Бога проповедниче; радуйся, боголепный учителю; радуйся, сокровище премудрости; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Во темнице биема посети тя сила Божия, просвещающая всякаго человека, грядущаго в мир; ибо смирением твоим премудрость стяжал еси и всякое тление века сего возненавидел еси, единому Христу служил еси и воином Его явился еси, сего ради сподобился еси со Ангелы выну пети: Аллилуиа.
Во славу имене Христова Божественною благодатию подвигся еси, премудрый Георгие, ибо имел еси сердце и ум, Духом Святым просвещенный; нелицемерный хранителю веры, кровь излиял еси и безбоязненно обличил еси превозносящуюся гордыню беззаконных. Сего ради величаем тя и поем ти:
Радуйся, мечу, во отсечение нечестия подъятый; радуйся, столпе веры; радуйся, стено непоколебимая Церкве Христовы; радуйся, неверным страх и трепет наводящий; радуйся, щите, в защищение благочестия данный; радуйся, избранный сосуде Святаго Духа; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Царь безумный тщашеся о смерти твоей, страстотерпче Георгие, и, яко волк алчущий, жаждаше крове твоея. Сего ради повеле на колесе мучити тя и лютым мукам предати; ты же, от Господа вся терпя, с надеждою твердо вопиял еси Богу: Аллилуиа.
Слышавше Диоклитиан и идолослужители словеса премудрости, гневом великим исполнишася, паче же разъярились тогда, егда рекл еси им: О царю злый, почто всуе мучиши мя, «мне бо еже жити — Христос, и еже умрети — приобретение». Неудобь есть тебе противитися пред силою Его. Сего ради вопием ти, радостотворный Георгие:
Радуйся, за истинную веру на колесе кровь излиявый; радуйся, кровию твоею веру возвеличивый; радуйся, апостолов ревнителю; радуйся, страстем Христовым подражателю; радуйся, истинныя веры непоколебимый хранителю; радуйся, многих мук терпелю, адаманта крепчайший; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Боготечней звезде уподобился еси, Георгие, от Ангела чудесно исцелен. От колеса невредим востав, неверных вере в Единосущную Троицу учил еси и с тобою пению к Ней: Аллилуиа.
Видяще людие беззаконнии чудотворную силу Божию, на тебе совершенную, со смирением приимаху учение Христово и гласом велиим вопияху: «Воистину велий Бог христианский!» Сего ради поем ти, преславный Георгие, хвалящии тя сице:
Радуйся, мученическим исповеданием идолослужителей обративый; радуйся, любви к Богу и отечеству человеком проповедниче; радуйся, с небесными воинствы водворивыйся; радуйся, воинов славо; радуйся, пресветлаго лика мучеников красото; радуйся, светоносным словом тьму неверия разсеявый; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Духом Святым просвещенный проповедниче истины, многих мук терпелю, ты, яко Иона во чреве китове, ввержен был еси в ров с известию, да прославиши дивное во святых имя Божие, и во рве, яко во храме, пребывая, разумно воспевал еси Богу: Аллилуиа.
Попратель ада и смерти, в третий день из мертвых воскресый Иисус Христос избави тя от вечнаго тления, мучениче Георгие. Егда и тебе, три дни во рве пребывающаго и к Богу с воздеянием рук поюща, видеша, убояшася и вострепеташа зело; мы же победную похвалу с радостию приносим тебе:
Радуйся, смирением твоим превознесшуюся гордыню диаволю в бездонную пропасть низвергий; радуйся, от Бога дивно от многих напастей избавленный; радуйся, лютость мучителей поправый; радуйся, негневливый, о злотворцех, яко Павел о евреех, пекийся; радуйся, сосуде избранный; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Безбожный мучитель всяким ухищрением тщашеся волшебством идолом поработити сердце твое, богоизбранне, ты же с Давидом глаголал еси: «О Боже мой, спасение и слава моя!» — и твердо воспевал еси Ему: Аллилуиа.
Умыслив новое мщение, служитель диаволь Диоклитиан, в угождение идолом, повеле ядом умертвити тя; ты же, исполнен веры и надежды, испил еси отраву и пребыл еси невредим, богувенчанне; сего ради поем ти:
Радуйся, яко упование на Бога Живаго не посрами тебе; радуйся, яко мучителей твоих ни во чтоже вменил еси; радуйся, бесов прогонителю; радуйся, волхвов чародейства разрушителю; радуйся, яко тобою Бог во святых видится; радуйся, яко подвигом твоим имя Христово во истине славится; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Странен и страшен бысть совет волхва Афанасия, иже внуши немилостивому царю повелети тебе мертваго воскресити во утверждение истины закона Христова; ты же, святый Георгие, без сомнения воспевал еси Тому, Иже «несть Бог мертвых, но живых»: Аллилуиа.
Возлюбленный тобою Преблаженный и Благий Иисус, слышав с верою теплую молитву твою, Георгие, во славу имене Своего и во утверждение верных вскоре повеле по слову твоему воскресению мертваго. Беззаконнии и неразумнии, видевше сие, вострепеташа зело и познаша Бога, сего ради вопием ти:
Радуйся, яко Господь силу дивну сотвори на тебе; радуйся, яко Господь тобою воскреси мертвеца из гроба; радуйся, земли удивление; радуйся, рода христианскаго славо; радуйся, волхвом, идолопоклонством ослепленным, свет веры даровавый; радуйся, за Христа мучимым путь Царствия показавый; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Лики ангельстии хвалят Бога, таковое мужество тебе даровавшаго, ибо и в темнице не престаял еси в молитве и бдении; сего ради, яко великий таинник Божий, сподобился еси, святый Георгие, видети Господа и главу неувядаемым венцем украсити; мы же с тобою научихомся взывати: Аллилуиа.
Ниже риторы многовещаннии могут изрещи подвига и страданий твоих, святый Георгие, яже волею подъял еси за Христа и Церковь Его; мы же, удивляющеся, хвалим тя и вопием сице:
Радуйся, яко мученическою смертию ветхий Адам в тебе распятся; радуйся, за страдание венец правды приимый; радуйся, благочестивых образе; радуйся, воистину нищий духом; радуйся, яко угодил еси Христу; радуйся, многих мук терпелю; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Восхотев, святый Георгие, спасения душ, во тьме идольстей погруженных, вшел еси в храм языческий и, Богу подражая, подобно святому Илии, изгнал еси оттуду бесы, сокрушил еси идолы, посрамил еси жрецы и, победитель их, со Ангелы воспевал еси Богу: Аллилуиа.
Не уразуме жестокосердый мучитель Бога, чудодействующаго тобою. Не остави он безумия своего, бысть глух, яко аспид, и повеле усекнути главу твою, яко великому злодею; ты же с радостию достигл еси кончины, аще и скорбел еси о погибели души его; сего ради с надеждою величаем тя, святый Георгие, и вопием сице:
Радуйся, светильниче, верою, надеждою и любовию возжженный; радуйся, во время скончания жития великая чудеса явивый; радуйся, в мире сем оружием Божиим украшенный; радуйся, славою и красотою на небесех хвалимый; радуйся, Христов безпримерный воине; радуйся, человече Божий; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Пресвятей Троице пение паче иных принесл еси, святый Георгие, не токмо словом и умом, но многим терпением и мученичеством твоим; положением души за ближняго уподобился еси Христу, Агнцу непорочному; сего ради с благодарением поем Богу: Аллилуиа.
Истиннаго света приемника знаем тя, светлый Георгие, иже просвещаеши сердце верных, ум их к Богу обращаеши и научаеши нас с радостию вопити тебе:
Радуйся, яко свету незаходимаго Солнца приобщаешися; радуйся, нищих защитниче; радуйся, пленных свободителю; радуйся, немощствующих врачу и царей непобедимый поборниче; радуйся, православнаго воинства помощниче; радуйся, о спасении грешных теплый ходатаю; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Благодатный поборниче наш, великомучениче Георгие, с радостию празднуем память твою и к чудотворней иконе твоей усердно прибегаем, всесильною о Бозе помощию твоею, яко стеною необоримою, ограждаемся; сего ради хвалим тя и с надеждою вопием Богу: Аллилуиа.
Воспеваем чудесное скончание твое, страстотерпче Георгие, имже прославился еси зело, яко богувенчанный воин Христов. Буди нам помощник во всяком деле и услыши усердное моление наше:
Радуйся, яко тобою верных Церковь просвещается; радуйся, яко имя твое во языцех со страхом славится; радуйся, истинных исповедников славо; радуйся, мучеников похвало; радуйся, болезней наших исцеление; радуйся, о душах наших ходатаю; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
О преблаженне, святый великомучениче Георгие, приими пение сие хвалебное и заступлением твоим к Богу избави нас от всякаго зла, да с тобою вопием: Аллилуиа, Аллилуиа, Аллилуиа. (Трижды)
Творец Ангелов и Создатель всея твари посла тя в Церковь яко непобедимаго подвижника веры и венценосна воина Своего, нас же, подвигом твоим просвещенных, научи пению сему:
Радуйся, всем сердцем, умом и душею твоею Иисуса Христа возлюбивый; радуйся, имене Его ради и душу с любовию положивый; радуйся, истинный исповедниче; радуйся, благодатию Господнею просиявый подвижниче; радуйся, Ангелов сожителю; радуйся, пророков сопричастниче; радуйся, непобедимый поборниче народа грузинскаго и покровителю Церкве нашея; Радуйся, победоносче великомучениче Георгие!
Взбранному и победоносному Георгию принесем похвалу, яко ходатаю нашему и скорому помощнику. Ты же, святый Георгие, имеяй дерзновение ко Господу, от всех страстей освободи нас, да поем ти: Радуйся, победоносче великомучениче Георгие!
О всеславный, богувенчанный мучениче Георгие, со Ангелы соединенный, со апостолы почтенный, мучеников исполнение, отцев славо, дев красото, всех молящихся скорый помощниче, прошений исполнителю и милости подателю; о всесветлый Христов мучениче Георгие, сиянием блистания святыни твоея озари и покрый богохранимый народ наш и державу его, святую Церковь Грузии, Святейшаго и Блаженнейшаго Католикоса-Патриарха всея Грузии, великаго господина, отца нашего Илию, преосвященных митрополитов, архиепископов, епископов, и весь священнический и монашеский чин, и всех православных христиан.
Умоли, святый мучениче Христов, возлюбленнаго тобою сладчайшаго Иисуса, да дарует нам благодать и безчисленную милость Свою; о всехвальный и честный святый мучениче Георгие, богопрославленными чудесы и знамении твоими освободи пленныя, исцели немощныя, избави в напастех сущих, спаси плавающих по морю, обрати грешныя и приведи ко Христу Богу, всех приемлющему, и всех прославляющих святое имя твое прослави и возвыси душею и телом, да славы Царствия и великолепнаго сияния Божия сподобимся вси, со Ангелы воспоем, со святыми прославим и с тобою увенчаннии благословим венчавшаго тя Отца, укрепившаго тя Сына и в тебе глаголавшаго Святаго Духа, Емуже подобает всякая слава, честь и поклонение, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем. Псалом 90.
Живущий под кровом Всевышнего под сенью Всемогущего покоится, говорит Господу: «прибежище мое и защита моя, Бог мой, на Которого я уповаю!» Он избавит тебя от сети ловца, от гибельной язвы, перьями Своими осенит тебя, и под крыльями Его будешь безопасен; щит и ограждение – истина Его. Не убоишься ужасов в ночи, стрелы, летящей днем, язвы, ходящей во мраке, заразы, опустошающей в полдень. Падут подле тебя тысяча и десять тысяч одесную тебя; но к тебе не приблизится: только смотреть будешь очами твоими и видеть возмездие нечестивым. Ибо ты сказал: «Господь – упование мое»; Всевышнего избрал ты прибежищем твоим; не приключится тебе зло, и язва не приблизится к жилищу твоему; ибо Ангелам Своим заповедает о тебе – охранять тебя на всех путях твоих: на руках понесут тебя, да не преткнешься о камень ногою твоею; на аспида и василиска наступишь; попирать будешь льва и дракона. «За то, что он возлюбил Меня, избавлю его; защищу его, потому что он познал имя Мое. Воззовет ко Мне, и услышу его; с ним Я в скорби; избавлю его и прославлю его, долготою дней насыщу его, и явлю ему спасение Мое».
Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых, помилуй нас. Аминь.
