Акафистное пение святителю Амвросию Исповеднику (Хелая)
Яко образ Солнца правды, возсиял еси Иверии, и сшедший на тя богодухновенный свет исполни сердца грузин, омраченныя беззаконием ближних; ныне же, пред Святою Троицею со светлым лицем предстоя, моли Бога, да дарует нам победу на вся прелести, и, словом Божиим очищеннии и умудреннии, да взываем тебе: Радуйся, правды ради изгнанный, святителю Амвросие исповедниче!
Запечатленный благодатию Божиею и правдою онаго Авеля, на угашение жизни твоея воздвигошася разсвирепевшии каиниты; мы же, силою и мужеством твоим хвалящиися, огнем веры разжженнии, сице поем тебе:
Радуйся, подвижников достойный потомче; радуйся, внутренняя твердосте и мужество; радуйся, брани духа явление; радуйся, силою Божиею сатану поправый; радуйся, превыше коварства и вероломства вознесенный; радуйся, венче, от Господа сплетенный; радуйся, из сердец обилие света изводяй; радуйся, мученичеством во святыни воссевый; Радуйся, правды ради изгнанный, святителю Амвросие исповедниче!
Страх Божий душу твою процвете, избра тя Христос насаждением плодоносным, и небесное благоухание подвига твоего по вертограду Божию разлияся: Аллилуиа.
Смирением и нищетою духа душу твою напоивый, Божественнаго ведения искателю и рачителю, учением любве закона всех удивил еси; и нам буди ходатай пред Богом, святе, да с разумом взываем тебе:
Радуйся, ветве богонаучения, плод благий приносящая; радуйся, воплощеннаго Слова верный учениче; радуйся, трость Православия, на пение изсеченная; радуйся, хартие, словеса Божия вмещающая; радуйся, учением твоим Пресвятую Троицу прославивый; радуйся, отечество твое святынею вменивый; радуйся, невидимыя славы добрый повествователю; радуйся, похвало православных христиан; Радуйся, правды ради изгнанный, святителю Амвросие исповедниче!
Суд Божий, человеку непостижимый, тако определи и супругу твою в вечное лоно приложи; ты же, человеческую скорбь упованием на Бога поправ, воспел еси Богу: Аллилуиа.
Честное священство твое познаша святии Ангели, и ходатайством их Бог определи тя в Казанскую духовную академию, ибо угоден бе Ему сосуд веры, исполненный питием ведения; возводим очи наша ко святей иконе твоей и возглашаем:
Радуйся, телесную скорбь с благодарением приемый; радуйся, земныя муки послушно претерпевый; радуйся, возлюбленную супругу земли предавый; радуйся, яко плачущии утешишася в Царствии Небеснем; радуйся, на познание Божественныя премудрости на чужбину отшедый; радуйся, разуму отечества внимаяй; радуйся, покрове святый, в Церкви положенный; радуйся, ниво зеленеющая, верных насыщающая; Радуйся, правды ради изгнанный, святителю Амвросие исповедниче!
Испытуемый учениками слова Божия с недоверчивым испытанием, помысл о неучености твоей отгнал еси от сердец их, и собрание, познавшее благородство и величие души твоея, возопи к Богу: Аллилуиа.
Красотою истиннаго камене драгоценнаго облеченный и многими добродетельми обладаяй, богомудрыя отцы и учители удивил еси и окрилил еси на хвалу тебе:
Радуйся, веяние христианства, из Иверии возвеявшее; радуйся, учености предков мужественный знаменосче; радуйся, зерно Духа Святаго, в тучную землю всеянное; радуйся, прежде от чуждих презренный; радуйся, по сем от них же хвалимый и величаемый; радуйся, к лику святых причтенный; радуйся, яко смирением твоим диавол побеждается; радуйся, святе, яко подвигом твоим злое отгоняется; Радуйся, правды ради изгнанный, святителю Амвросие исповедниче!
Во славу просветительницы народа грузинскаго и равноапостольныя святыя девы Нины в Казани на грузинском языке Божественную литургию совершил еси, святе, и дивность трехголоснаго пения разлияся во святом оном храме: Аллилуиа.
Дивным оным пением мир сотворил еси душе богохранимаго народа и сердцу теплоту и горение; даруй и нам сокрушение сердца, да хвалу приносим тебе, святе:
Радуйся, непрестанный к Богу молитвенниче; радуйся, в день святыя Нины на чужбине на грузинском языке Литургию совершивый; радуйся, казанцев на хвалу тебе подвигнувый; радуйся, гласе Вышняго, крепко возгремевый; радуйся, просветительницы грузин достойный учениче; радуйся, отечества возвеличителю; радуйся, в лоно Создателя твоего возвратившийся; Радуйся, правды ради изгнанный, святителю Амвросие исповедниче!
Преподобным и богоносным отцем и учителем нашим равный, наученный и исполненный благодати Святаго Духа, обилием искушений запечатленный и на амвоне, яко столп света, возвышенный, святителю Амвросие, оттуду проповедал еси пред уповающими на Господа: Аллилуиа.
Очесем твоим возсия свет с небесе, и от уст твоих, яко струи спасительныя, истекоша словеса истины, ибо не остави тебе Христос, но очисти тя и искуси, яко сребро, седмерицею, якоже псалмопевствует Давид; стадо же твое, богоизбранный проповедниче, со слезами пояше тебе:
Радуйся, во имя Господне велегласный проповедниче правды; радуйся, совершенства учительства восхождение; радуйся, словеснаго света обильное течение; радуйся, любве и мира на солнце возсияние; радуйся, учителю, вознесенный и Христом облеченный; радуйся, святе, от Господа знамении облеченный; радуйся, немощи нашея купеле; Радуйся, правды ради изгнанный, святителю Амвросие исповедниче!
Благословеннаго винограда отечества неутомимый делателю, светом Христовым просветився, подвизался еси в Челиши, и всякое честное дело твое во славу Божию гласяше: Аллилуиа.
Разсыпаннаго словеснаго сокровища искателю и разсеянных листов рукописи собирателю, святую книгу Евангелия явил еси; и ныне, сокровище Челишскаго Четвероевангелия имуще, чувством благодарности исполненнии, сплетаем тебе сию похвалу:
Радуйся, делателю, Божественною благодатию украшенный; радуйся, рукописи Евангелия обретателю; радуйся, древния славы собирателю; радуйся, подвигов святых отцев возгласителю; радуйся, древности оживителю; радуйся, веры кипение; радуйся, святаго и честнаго дара нерукотворенная чернильнице; радуйся, книго мира и любве; Радуйся, правды ради изгнанный, святителю Амвросие исповедниче!
От Царя славы благословенный и миропомазанный, видя горе народа твоего, всю Иверию вручал еси Вседержителю, и стадо твое, в лоне молитвы укрывшееся, с верою вопияше сице: Аллилуиа.
Перо, от святаго Илии Праведнаго дарованное, яко меч держай, духовнаго бодрствования звоне и погибельнаго дурмана лености обличителю, сон духовный от народа отгнал еси и козни видимаго и невидимаго врага низложил еси; сего ради вопием тебе:
Радуйся, на бодрствование духовное, яко звон, возгремевый; радуйся, святаго Илии Праведнаго достойный сподвижниче; радуйся, скорбию Грузии опечаленный и слезящий; радуйся, раны и боли роднаго народа ощущаяй; радуйся, болезни ближних твоих врачевати посланный; радуйся, врачу падших и грехами уязвленных; радуйся, искусный победителю прелестей и искушений; радуйся, во тьме явленный светильниче благословенный; Радуйся, правды ради изгнанный, святителю Амвросие исповедниче!
На свещнице Христовы Церкве светиши боголепным блистанием, и, зрением света онаго ужасаеми, подвизаются поющии подвиг твой: Аллилуиа.
Кознию Велиаровою чести священнослужения лишенный и от стада твоего удаленный, достигл еси Божественнаго блаженства и, от безбожных наказанный, отечество твое Богу вручил еси; сего ради с благоговением вопием тебе:
Радуйся, за автокефалию Церкве грузинския в изгнание осужденный; радуйся, в Рязанском монастыре о Иверии, жребии Богородицы, молившийся; радуйся, воине, за верность слову Божию от врагов мучимый; радуйся, от погибших поруганный; радуйся, серпе простоты; радуйся, благородный пастырю, по отечеству тоскующий; радуйся, Христовым терпением нападения диавола победивый; радуйся, дубе широковетвистый, молием изъеденный; Радуйся, правды ради изгнанный, святителю Амвросие исповедниче!
Услыша Бог вопль твой и труд твой не презре, но благоволи о посте твоем лютом, о молитве непрестанной, о сокрушении сердца и о гласе трепетном, имже моляше Господа: Аллилуиа.
Егда возсия на души твоей свет совершенства пастырства, достигл еси сана святительскаго. Печатию Духа Святаго запечатленный, теплою молитвою твоею просвети и согрей и наша сердца, сице вопиющих:
Радуйся, митрополитом Чкондидским и потом Цхум-Абхазским рукоположенный; радуйся, по сем на престол Католикоса-Патриарха возведенный; радуйся, пастырю всея Грузии; радуйся, столпе света, на благословенней земли Иверстей ставший; радуйся, свеще, на трапезе Господней возженная; радуйся, утешение стада твоего, от Утешителя дарованное; радуйся, сени богоустроенная; радуйся, масличие плодовитая; Радуйся, правды ради изгнанный, святителю Амвросие исповедниче!
Божественныя радости исполнися сердце твое, святе, егда, яко солнце, возсия свобода, и Церковь светоносная иверская, обновленная, воздвижеся, крестоносица; но погибельный Велиар свет сей ужасным безбожием омрачи, и слезное славословие плачущих до небесных чертогов взыде: Аллилуиа.
Страшным беззаконием опечаленный, обличитель безбожия врага, кровию пришедшаго, мечем гонения уязвлен был еси; и мы, видяще великое отеческое попечение твое, укрепляеми, вопием тебе сице: Радуйся, самовидче свободы Грузии;
Радуйся, свободы лишенныя Иверии плачущий печальниче; радуйся, за отечество пострадавый и узниче; радуйся, мечу Мессиин, на мучителей обращенный; радуйся, пожаре, страхования наша в пепел претворяющий; радуйся, вихре, созданная нами недостоинства низвергающий; радуйся, потоке мужества; радуйся, врата исповедничества; Радуйся, правды ради изгнанный, святителю Амвросие исповедниче!
Славо и похвало Церкве грузинския, по лествице Божественныя любве вознесенный над изнуренными злобою и ненавистию, за слово истины пострадал еси и на суде, от сатаны коварно устроенном, стал еси, славя Бога: Аллилуиа.
Благодатию Святаго Духа украшенный, многими подвиги славы Царствия достойный, облечением твоим во Христа побежден бысть змий, и глас правды тако изрече: «Душа моя Богу принадлежит, сердце — народу моему, а тело — палачем моим, яко враном». Просим помощи от Бога, да достойно величаем тя:
Радуйся, словом Божиим очищенный и убеленный; радуйся, от земнаго волнения в наслаждении Царствия водворившийся; радуйся, прекрасная резьбо Церкве Христовы; радуйся, песнопение, от земли Иверския возносимое; радуйся, святе, к небеси, яко фимиам, восходящий; радуйся, в служении истины послушно скончавыйся; радуйся, правдою Божиею во веки оправданный; радуйся, невечернею милостию совершенный; Радуйся, правды ради изгнанный, святителю Амвросие исповедниче!
О всеблаженне и всеславне, страдальче и угодниче Божий, святителю Амвросие исповедниче, от безбожных правды ради гонимый, приими от нас недостойных недостойное сие пение, яко от ничтоже имущих и нищих; моли возлюбленнаго тобою Бога, да сохранит нас от всякия бесовския прелести, и, от вечныя муки избавлении, и мы с тобою воспоем Ему сице: Аллилуиа.
(Сей кондак чтется трижды, затем икос 1 и кондак 1.)
О угодниче Божий, всехвальне и всеславне, святителю Амвросие исповедниче, с лики Ангелов соединенный, со апостолы почтенный, мученикам равный, красото Церкве и совершенство духовнаго пастырства, молитвою твоею просвети Грузию, жребий Богородицы. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов, монашеский чин и всех православных христиан. Моли Бога, да исцелит нас от немощей душевных и телесных, да неисчерпаемою милостию Своею изгладит беззакония наша, падших, да благодатию и милостию Господнею возстанем утешеннии и, страхом Божиим укрепляеми, мужественно противостанем нахлынувшим прелестем врагов видимых и невидимых; да будет нам духовным мечем вера обоюдоострая, бронею и шлемом — кротость, щитом же — правда, да и мы, якоже ты, святе Амвросие, право славим Бога, ибо Христу подобает слава со безначальным Его Отцем и Благим и Животворящим Его Духом, ныне и присно и во веки веков. Аминь.
