Акафистное пение святым ста тысячам мучеников, от хорезмийцев в Тбилиси за поклонение иконам пострадавшим
Господи Иисусе Христе, Сыне Божий, молитвами Пречистыя Твоея Матере и всех святых, помилуй нас. Аминь. Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. (Трижды)
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Мучеником истины и проповедником Православия, звездам Церкве многотысящным, вернии приносим похвалы Божественныя и моление сие вам возсылаем: приимите пения наша, мученицы, и не лишите нас помощи вашея, но светом сияний ваших просветите нас и мрак неведения отжените от поющих вам: Радуйтеся, сто тысяч мучеников, славы и венцы града Тбилиси!
Паки облечеся Церковь в красоту радости и блистанием крове вашея возложи на ся венец красоты и славы мужеством вашим, ибо, егда сечаху плоть вашу, неповинная кровь ваша приносимая бяше пред Богом, яко кровь праведнаго Авеля; сего ради место мученичества вашего присно источает исцеления и подвизает нас принести пение и хвалу:
Радуйтеся, братие и сестры дивнии, узами Христовыми во единомыслие связаннии; радуйтеся, жертвою безмездною Богу принесеннии; радуйтеся, единым святым изволением соединеннии; радуйтеся, рачением о благочестии утвержденнии; радуйтеся, силою Божиею добре вооруженнии; радуйтеся, от персов немилостиво умерщвленнии и потоками крове друг со другом смешеннии; радуйтеся, венцем мученичества украшеннии; радуйтеся, болезнию подвижническою возвеличеннии; радуйтеся, в лике мучеников просиявшии; радуйтеся, во утешение Церкве и во просвещение Иверии явльшиися; радуйтеся, в горниле лютых болезней искушеннии; радуйтеся, розы багряныя, Богом насажденныя; Радуйтеся, сто тысяч мучеников, славы и венцы града Тбилиси!
Егда Джалал ад-Дин, султан Хорасанский и царь всея Персиды, бежа от монголов, уведев твердость земли нашея и мужество рода грузинскаго, умысли быти мужем Русудани и царем себе поставити, возвестиша же сие государыне грузинстей, и она отвеща, яко ни слышати о сем не хощет, — тогда разсвирепе султан, яко лев лютый, и обступи Тбилиси, егоже стражие, ободрившеся на брань, взываху победную песнь: Аллилуиа.
Тогда вооружишася стражие града, и бысть брань крепка, и светлую победу показаша грузины; но врата града втайне отверзоша лукавии оны предатели, персы тбилисстии, и, вшедше хорезмийцы внутрь града, страшным истреблением без разбора избиваху всех; вы же, жителие Тбилиси, не поколебастеся, но уготовастеся на подвиг; сего ради хвалим вас и единогласно вопием вам:
Радуйтеся, жилища Святаго Духа; радуйтеся, светила земли и веры; радуйтеся, Божественнии столпи Православия; радуйтеся, звезды пресветлыя Солнца правды; радуйтеся, истиннии проповедницы благочестия; радуйтеся, мечи, отсекающии злочестие; радуйтеся, памятницы мужества и храбрости; радуйтеся, непобедимии полцы Небеснаго Царя; радуйтеся, немилостиво отсеченныя лозы винограда Христова; радуйтеся, неувядающии цвети мысленнаго рая; радуйтеся, неплененная врата земли иверския; радуйтеся, столпи, сило и твердосте Церкве; Радуйтеся, сто тысяч мучеников, славы и венцы града Тбилиси!
Не довольно бысть злочестивому разрушити купол Сиона и на нем престол поставити и воссести, но повеле иконы Господа нашего Иисуса Христа и Пресвятыя Девы Марии из Сиона принести, посреде моста Метехскаго лицем вверх положити и всем плененным христианом честныя иконы попрати, аще же не сотворят сего, главы им отсещи; вы же законоположения лживаго онаго Мухаммеда не прияли есте и, на краю моста стояще, с воздеянием рук Христа славили есте: Аллилуиа.
Тогда по повелению сотвориша мучителие и приведоша отцы с матерьми и нуждаху попрати святыя иконы; но множайшии вы, Христа ради плененнии, дивное мужество показасте и поругания святых икон и оставления закона не подъясте, но дерзновенно и мужественно исповедасте Христа Бога и вместо свободы и чести приясте венец мученичества; сего ради хвалимся вернии и сице вопием вам:
Радуйтеся, веру непорочно сохранившии; радуйтеся, Божественныя заповеди в сердцы вашем положившии; радуйтеся, сердце гордыни поправшии; радуйтеся, неправедныя суды разрушившии; радуйтеся, мужеством ума раны претерпевшии; радуйтеся, упованием на Бога изощренный меч вражий сокрушившии; радуйтеся, пещь скорбей и печалей угашающии; радуйтеся, к вам прибегающих на пути заповедей Господних утверждающии; радуйтеся, от коварств человеческих и от лести вражия избавляющии; радуйтеся, свещи, разумных просвещающия и безумных попаляющия; радуйтеся, разслабленных к благонравию подвизающии; радуйтеся, духов нечистых прогонителие; Радуйтеся, сто тысяч мучеников, славы и венцы града Тбилиси!
Во время оно вельможи народа и царие Грузии, их же грехов ради наказано бысть от Бога царство их, бесовскому жертвеннику Афродиты и Диониса поклонницы бяху и делы скверны прогневаша Создателя своего; сего ради, мученицы, тепле молим вас: будите нам ходатаи ко Христу, да умножит нам избранных и мудрых вождей и даст нам царя, иже, яко Давид, со смирением поет Богу: Аллилуиа.
Видяще предлежащия страшныя муки, преславнии избраннии, безстрашным умом отвещасте: «Не обезчестим мы образа Господа нашего Иисуса Христа и Нетленныя Матере Его, но с трепетом поклоняемся, Емуже подобает поклонение и честь», и простересте под меч выи ваша; сего ради сынове Православныя Церкве с удивлением возглашаем и глаголем:
Радуйтеся, Ангельских чинов подражателие; радуйтеся, оружием словес ваших мучителей уязвившии; радуйтеся, умыслы Велиаровы сокрушившии; радуйтеся, венец победы стяжавшии; радуйтеся, горечь и сладость страстей омерзити научающии; радуйтеся, от любве к сластем временным и скоропреходящим отвращающии; радуйтеся, добрии ходатаи и козней прогонителие; радуйтеся, от погибельнаго нерадения избавляющии; радуйтеся, уязвленных от врага исцеляющии; радуйтеся, верою твердою прелесть лжезакония разсеявшии; радуйтеся, души верных явственно просвещающии; радуйтеся, грешником у Бога милости испрашивающии; Радуйтеся, сто тысяч мучеников, славы и венцы града Тбилиси!
О блаженное ваше разумное стояние! Ибо не отвергостеся Христа страхом и ласкательством мучителей, но друг друга укрепляли есте: «Претерпим единою страшную смерть и приимем безсмертие безконечное со Иисусом Христом», и сладкогласно славили есте укрепляющаго вас Спаса: Аллилуиа.
Общницы бысте друг другу, мученицы блаженнии, и купно изыдосте на поприще страдания, не вси мужи, но нецыи и жены, обаче едино о Христе Иисусе, ибо во крестившихся в Него несть мужеский пол, ни женский; мы же уподобихомся языком иноплеменным, от Христа отступившим, и ниже можем противостати язычником и еретиком; но умилостивите о нас Господа, да направит нас на путь истины и сподобит пети вам:
Радуйтеся, струи многотысящныя единаго запечатленнаго источника; радуйтеся, избраннейшии сосуди святыни; радуйтеся, всесветлии поборницы истины; радуйтеся, вместилища Божественнаго сияния; радуйтеся, адаманти мысленнии терпения; радуйтеся, всенепоколебимии столпи мужества; радуйтеся, сладостно носящии иго Божественное; радуйтеся, победителие неверных врагов, безстрашнии воини Христа Бога; радуйтеся, носящии единое оное лютое искушение; радуйтеся, верою твердою обличившии безбожие мучителей; радуйтеся, помощницы и покровителие воинства грузинскаго; радуйтеся, славная украшения Церкве небесныя и земныя; Радуйтеся, сто тысяч мучеников, славы и венцы града Тбилиси!
Тогда нескудно излияся благодать Божия во устнах ваших, и тако ободрясте побежденных страхом: «О бедныя и окаянныя сограждане, не лишайте себе венца, егоже, се, предлежит нам прияти», и немолчным псалмопением и молитвою не престаясте славословити Бога: Аллилуиа.
Не единаго чина бысте, подвига победителие, но нецыи от вас епископи, иереи и монаси и служителие церковнии, инии же воини и судии народа, обаче вси себе самих принесшии на жертвеннике страдания Христу Богу; Того молите, всеблаженнии, да не удалит от нас помощи Своея и да сохранит Иверию, жребий Матере Своея, и народ Иверии, да в любви и мире спасаемся и ублажаем вас с верою:
Радуйтеся, благородство духа сохранившии; радуйтеся, упование ваше на Бога возложившии; радуйтеся, Крест Христов вземшии и сарацин до основания низложившии; радуйтеся, агнцы святии и непорочнии, Христа ради кровь пролиявшии; радуйтеся, неизменную любовь к Богу, отечеству и ближнему насадившии; радуйтеся, премудростию духа лютыя муки мужественно претерпевшии; радуйтеся, заблудших на пути истины утверждающии; радуйтеся, прелесть иноплеменных дерзновенно низложившии; радуйтеся, злыя помыслы попирающии; радуйтеся, верою просвещенных и добре шествующих премудростию хранящии; радуйтеся, от уз грехов наших разрешающии; радуйтеся, огрубевших сердцем к любви подвизающии; Радуйтеся, сто тысяч мучеников, славы и венцы града Тбилиси!
Ниже бысте единаго возраста, мученицы, но нецыи отроцы и юноши, нецыи же старцы и престарелии, обаче единством веры достигосте в меру возраста исполнения Христова; Того молите, да дарует нам честь достоинства и благодать милости, да поприще временнаго жития добре пройдем и подобающе восхвалим силу Его: Аллилуиа.
Блаженни есте вы, Христа ради плененнии, нецыи от князей, а нецыи от благородных и простых, обаче вси рождении Духом от Бога, имже победисте мир и, подражающе прежде вас пострадавшим мучеником, тщастеся на брак онаго прекраснаго и безсмертнаго Жениха; сего ради поем вам, мужественнии, и приносим вам сие победное славословие:
Радуйтеся, смирением сердца благость Божию славящии; радуйтеся, силою Креста облеченнии; радуйтеся, разсвирепевших богоненавистников победителие; радуйтеся, всех злых и нерадивых посрамителие; радуйтеся, с верою поющих вам благословляющии; радуйтеся, православным полком и воинством велико милующии; радуйтеся, всех тепле молящих вас спасающии; радуйтеся, приспособленцев и коварных, отвергающихся подвига предков наших, обличителие; радуйтеся, безценнаго бисера купцы; радуйтеся, творящих волю Христову помощницы и заступницы; радуйтеся, лукавых духов победителие и сокрушителие; радуйтеся, печали наша на радость претворяющии; Радуйтеся, сто тысяч мучеников, славы и венцы града Тбилиси!
Видя мучитель безстрашие ваше и слыша молитву, твердостию вашею разсвирепе и мучителей с обнаженными мечи постави люте сещи и истребити вас; вы же, мужественнии, ни во чтоже вменисте гнев беззаконных, ниже ужасостеся, но, на страдание идуще, Богу пели есте и Трисвятым пением хвалили есте: Аллилуиа.
Аще и бысте исповедницы правыя веры, но не вси грузины, но нецыи, от чуждаго закона пришедшии и, подражающе блаженным оным мучеником Шушанике, Раждену и Або, себе Христа ради принесшии; сего ради подвизаем вас на ходатайство к Нему, да не преклонимся к беззаконию по воле безбожных и вси ублажаем подвиг ваш:
Радуйтеся, непрестанною молитвою искушения диаволя прогоняющии; радуйтеся, пращею словес ваших учения безбожия и тьмы разсеявшии; радуйтеся, христиан, от беззаконных ужасшихся, духовно укрепляющии; радуйтеся, подвигом вашим Церковь просветившии; радуйтеся, призывания вражия разсеявающии; радуйтеся, многосплетенныя оны козни вражия упраздняющии; радуйтеся, чтущих вас просвещающии; радуйтеся, неживую и теплохладную веру нашу оживляющии; радуйтеся, от мятежа и брани избавляющии; радуйтеся, росою оною Божественною верных прохлаждающии; радуйтеся, оскверненный ум наш возставляющии; радуйтеся, подвигом вашим свет непреходящий приявшии; Радуйтеся, сто тысяч мучеников, славы и венцы града Тбилиси!
О единомыслие братий, о любы ближних, о единодушие отцев и матерей! Ибо гласи их друг ко другу простирахуся, и слышащая сие тма тем единогласно вопияше: «Господи Иисусе Христе, Сыне и Слове Божий, помилуй нас и управи течение сие наше и приими души наша в руце Твои», и, яко древле отроцы в пещи, с благодарением благословляху Бога: Аллилуиа.
Тогда безумнии христоборцы безстыдно нападоша на вы, яко на агнцы, и един другаго предваряше: инии мечем секаху, инии же копием и стрелами пронзаху и плоть вашу немилостиво сечаху, инии же ножи раздираху и телеса ваша под мостом в Куру ввергаху; егда же совершися мученичество ваше, венца неувядаемаго сподобистеся; и ныне оставления грехов и добраго жития испросите нам, да с радостию сердца ублажаем вас:
Радуйтеся, мужеством врагов победившии; радуйтеся, немилостивую смерть с благодарением приявшии; радуйтеся, Божественное поприще добре совершившии; радуйтеся, кровию вашею, яко агиасмою, окрестности Тбилиси освятившии; радуйтеся, подвигом вашим правую веру возвеличившии; радуйтеся, народ наш духовно просвещающии; радуйтеся, светом мученичества вашего мрак отечества озаряющии; радуйтеся, благодатию Божественною невежды умудряющии; радуйтеся, недуги и язвы исцеляющии; радуйтеся, одержимых сном лености ободряющии; радуйтеся, безбожием и беззаконием ослепленных вразумляющии; радуйтеся, чтущих вас скории заступницы; Радуйтеся, сто тысяч мучеников, славы и венцы града Тбилиси!
О, разум непорочный, иже прежде в чинех возсия и даже до последних продолжися: нецыих — жителей Исани, Калы и Тбилиси, нецыих же — во время искушения из окрестных весей, яко в крепчайшую твердыню, прибегших; сего ради поминаем вас, яко жителей престольнаго града, идеже купель втораго рождения возроди вас, множество тем, и принесосте Богу хвалу славословия: Аллилуиа.
Егда вода речная исполнися святых телес и обагрися, яко порфира, и глубина вод бысть гробом вашим, в нощь ону светлее солнца возсия окрест брегов реки той разлиянием немеркнущаго света, егоже вси видяху; сего ради во славную память вашу царствующий град наш невещественною радостию украшается и благословенным языком грузинским усердно взывает:
Радуйтеся, души ваша безмятежно Богу предавшии; радуйтеся, пролитием крове вашея мост оный и обители Метехския в место свято претворившии; радуйтеся, великую реку Куру освятившии; радуйтеся, недуги многоразличныя и немощи прогоняющии; радуйтеся, помраченный ум наш озаряющии; радуйтеся, разслабленный дух отечества оживляющии; радуйтеся, пламень страстей и лютыя недуги угашающии; радуйтеся, плодом мужества вашего верных ободряющии; радуйтеся, благодатию Божественною невежды умудряющии; радуйтеся, множество страстей, яко плевелы, исторгающии; радуйтеся, и род сей грузинский превосходною радостию возносящии; радуйтеся, умы наша на небо возводящии; Радуйтеся, сто тысяч мучеников, славы и венцы града Тбилиси!
Егда главы ваша отсеченныя на мосте оном катяхуся, близ места, идеже сожгоша тело святаго мученика Або, отонуду избавителие от безчисленных бед тбилисцев бысте; тако и ныне сохраните престольный град наш, иже ныне люте волнуется, и утолите волны страстей и пламень ересей, ибо вы есте похвала его, да не отступят власти и правители наши от святыя апостольския Церкве и присно славят Христа, Царя и Бога нашего: Аллилуиа.
О мужеством благочестия прославленныя, иже отгнавше немощь женскую и подвигу мужески и мужественно приступивше! Ныне угасите воздвигнутыя на народ наш умыслы злых, и матери и сестры наша, образы и печати бытия отечества, избавите от всепагубных страстей и от безстудия покрыйте, да с любовию и страхом Христовым, по обычаю шествия отеческаго, память вашу славят и непрестанно хвалят вас:
Радуйтеся, горняго ради Иерусалима муки претерпевшии; радуйтеся, от тления грехов избавляющии и страсти наша на себе приемлющии; радуйтеся, любовь Христову среди человек насаждающии; радуйтеся, сопротивных сил низложителие; радуйтеся, от злаго небрежения избавляющии; радуйтеся, чада к послушанию родителем и пастыреначальником наставляющии; радуйтеся, дерзость диаволю низлагающии и страшныя козни его упраздняющии; радуйтеся, завистников и клеветников смиряющии; радуйтеся, всякое земное попечение отложившии; радуйтеся, звоне духовнаго бодрствования; радуйтеся, язвы грехов наших утоляющии; радуйтеся, дерзостию восхищенных усмиряющии; Радуйтеся, сто тысяч мучеников, славы и венцы града Тбилиси!
Велия есть победа светлая, юже показасте, во плоти сущии, яко безплотнии, ибо Христа ради возжелесте смерти, еюже приидосте в безсмертие, и радостию подвига вашего Церковь грузинскую прекрасно обагрили есте; сего ради поклоняемся Христу, давшему таковых ходатаев и покровителей возлюбленному народу нашему, и поем и славим Его, яко Спаса нашего и Бога: Аллилуиа.
Мученическаго венца прияти возжелели есте и, благодать мужества свыше приявше, не уклонистеся от лютыя оныя муки и смерти, яко от наслаждения благаго, и усекновением глав, блаженнии, низложисте многоухищренное коварство вражие; сего ради, во искушениих и скорбех сущии, приемлем помощь пребывающия в вас Божественныя благодати и по силе нашей сплетаем вам сей венец похвал:
Радуйтеся, дивнии и воистину мужественнии воини Небеснаго Царя, иже гнев безбожных мужественно подъясте и славу Христову просветисте; радуйся, лике честный, яко множество телес ваших и всесвятыя крове вашея, во едину великую реку истекшия, силы небесныя удиви; радуйтеся, нетлением облеченнии, яко кроплением крове вашея угли прелести угасисте; радуйтеся, непобедимым подвигом пресветлии, яко с блаженным оным мучеником Або Тбилисским присно вы есте хранителие и покровителие града Тбилиси; радуйтеся, яко овцы закланнии, яко реки крове вашея напаяют Церковь грузинскую и освящают множество православных; радуйтеся, о вере и отечестве подвизавшиися, иже учителей лжезакония победисте; радуйтеся, светила незаходимая, яко светлее солнца возсиясте во Царствии Отца Небеснаго; радуйтеся, светилницы Православия, яко озаристе нощь персидския прелести; радуйтеся, пламеннейше за Христа себе предавшии, яко мзду оную трудов приясте; радуйтеся, православным с небесе дарованная твердосте, яко во ограждение даны есте народу нашему; радуйтеся, граждане вышняго града, яко мужество ваше ободряет грузин; радуйтеся, победы и славы отечества нашего, яко рекою исцелений и сокровищем чудес имать вас народ иверский; Радуйтеся, сто тысяч мучеников, славы и венцы града Тбилиси!
О роде избранный, царский и священный, Христа ради кровь пролиявший! Якоже блистание солнца и сияние луны просвещают мир, тако и память ваша, блаженнии, всех мученолюбивых грузин, ибо благодать исцелений подаете нам и просвещаете нас сиянием чудес; сего ради достойно украшаем вас, всехвальнии мученицы, и славим Бога, дивнаго во святых: Аллилуиа.
Сей кондак глаголется трижды, затем
Паки облечеся Церковь в красоту радости и блистанием крове вашея возложи на ся венец красоты и славы мужеством вашим, ибо, егда сечаху плоть вашу, неповинная кровь ваша приносимая бяше пред Богом, яко кровь праведнаго Авеля; сего ради место мученичества вашего присно источает исцеления и подвизает нас принести пение и хвалу:
Радуйтеся, братие и сестры дивнии, узами Христовыми во единомыслие связаннии; радуйтеся, жертвою безмездною Богу принесеннии; радуйтеся, единым святым изволением соединеннии; радуйтеся, рачением о благочестии утвержденнии; радуйтеся, силою Божиею добре вооруженнии; радуйтеся, от персов немилостиво умерщвленнии и потоками крове друг со другом смешеннии; радуйтеся, венцем мученичества украшеннии; радуйтеся, болезнию подвижническою возвеличеннии; радуйтеся, в лике мучеников просиявшии; радуйтеся, во утешение Церкве и во просвещение Иверии явльшиися; радуйтеся, в горниле лютых болезней искушеннии; радуйтеся, розы багряныя, Богом насажденныя; Радуйтеся, сто тысяч мучеников, славы и венцы града Тбилиси!
Мучеником истины и проповедником Православия, звездам Церкве многотысящным, вернии приносим похвалы Божественныя и моление сие вам возсылаем: приимите пения наша, мученицы, и не лишите нас помощи вашея, но светом сияний ваших просветите нас и мрак неведения отжените от поющих вам: Радуйтеся, сто тысяч мучеников, славы и венцы града Тбилиси!
О ароматы, мира безценная, благоухания Христова, светом Солнца правды землю вашу просвещающии; ходатаи и заступницы рода грузинскаго, и хранителие и покровителие града Тбилиси, числом сто тысяч мученицы!
О звезды многотысящныя просвещенныя, молящих вас скорыя помощницы и милости подателие, помяните нас пред Богом и народ наш, искушеньми и скорбьми обстояемый, избавите ходатайством вашим, да не вместо милости приимем наказание за дерзость, но паки обновите в нас, якоже в вас, теплоту веры, любовь к благочестивому царю и верность Богом дарованному отечеству, упитанному кровию вашею, и угасите воздвигнутую на возлюбленный народ наш тайну беззакония, иже есть святыню оскверняющая «мерзость запустения». Многомощною силою вашею покрыйте отечество наше — Грузию — от всякия скорби и будите нам присно поборницы на сопротивнаго борителя, на ны разсвирепевшаго, и сохраните престольный град наш от нашествия иноплеменных. Укрепите в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священный и монашеский чин, военачальников и градоначальников, христолюбивое воинство, и благодетелей наших, и всех православных христиан.
О собрание Божественное, единым святым изволением собранное, сто тысяч мучеников! Ходатайствуйте пред Богом, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да возставит благочестие, правдолюбие, многочадие и милость ко вдовицам и сиротам; да дарует нам любовь ко святому житию, ненависть к непотребным делом и сокрушение сердца, со святыми венчание и наследие Царства Небеснаго, да и мы с вами славим Отца и Сына и Святаго Духа, ныне и присно и во веки веков.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, святых ста тысяч мучеников и всех святых, помилуй нас. Аминь.
Автор-составитель: Тинатин Мчедлишвили
