Акафистное пение святому и блаженному отцу нашему Григорию Хандзтийскому
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. (Трижды)
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Хвалами поем похвалу иереев и славу Хандзты и ходатаем тя творим пред Богом, да отженет от нас всякое зло и избавит нас от всякия скорби и прелести, да избежим гнева, от Бога воздвигнутаго, и ублажаем тя по силе нашей: Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Игу благому Христову выю преклонил еси и, направив стопы твоя на служение Богу, словесных овец пастырь был еси и пасл еси их словом и делом Божественным; тако и ныне призри на нас и избави нас от веры неживыя и теплохладныя, да не преклонимся к беззаконию по воле безбожных и усердно восхвалим дела твоя, хвалы достойная:
Радуйся, человече, вожделение души; радуйся, избранный сосуде, жилище святыни; радуйся, неисчерпаемый источниче Божественныя премудрости; радуйся, благолепно возсиявый истинный служителю Христа Спасителя; радуйся, свыше посланный на освящение возлюбленнаго народа и на укрепление святаго царства; радуйся, органе, гуслями песнопений Церковь светло украсивый; радуйся, добрый делателю подвига благочестия; радуйся, добрый строителю подвижниче и пустыни во град претворителю; радуйся, обителей Кларджетских великий архимандрите и учителю всея Грузии; радуйся, утвердителю веры, от девы Нины возращенныя; радуйся, истинный образе благочестия предков наших; радуйся, славо и крепосте отечества нашего; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Создатель позна тя во утробе матерней и усвои тя от рождения твоего; от юности преуспевал еси паче сверстников твоих учением и любовию к Богу и, достигши верха совершенств, юноша, яко старец и мудрый, облеклся еси во образ иноческий и во священную ризу правды и благодати и день от дне подвизался еси во славу Божию; ныне испроси нам от Него оставление грехов и беззаконий наших, да сподобимся славы Его: Аллилуиа.
Поспешив Божиим подвижением, блаженне Григорие, оставил еси родителей и ближних твоих и, с тремя подвижниками оставив тленныя дела мира сего, любовию Христовою во единомыслие связаннии, знаменастеся знамением честнаго Креста и, руководством Святаго Духа достигше страны Кларджетския, опустошенныя Мурваном Глухим, вселистеся в Опизе с блаженным отцем Георгием и ревностно вступисте на поприще нетленнаго подвига; сего ради приносим тебе благодарственную сию похвалу:
Радуйся, подобно Самуилу пророку от чрева матерня Господу принесенный; радуйся, в дому державном великаго эристава Нерсеса свято и непорочно воспитанный; радуйся, от младенчества душу твою Христу в жилище усвоивый; радуйся, непрестанною молитвою и бдением искушения диаволя прогнавый; радуйся, многосплетенных оных ухищрений лютаго врага разрушителю; радуйся, многим коленопреклонением и святыми слезами неусыпных очей твоих Богу приносивыйся; радуйся, крепким духом просиявый; радуйся, и в книжности многих языков наученный; радуйся, Божественным Писанием искушенный и премудростию совершенный; радуйся, любовию к отечеству воспламененный и духом единства веры возгоревыйся; радуйся, медоточивым языком Божественныя учения источающий; радуйся, от чести епископства бежавый и лютые подвиги мужественно подъявый; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Превысочайшия оныя благодати сподобивыйся, не на песце положил еси основание иночества, но на камени твердости, иже есть Христос, ибо Крест Его на рамена твоя воздвигл еси и в пространстве пустынь разсеянных уединенно живущих отцев собрал еси, иже сопричтошася первым учеником твоим, блаженне, и, добре управляеми, пояху Господу: Аллилуиа.
Богомудр явился еси, благословенне силою Вышняго, и на месте каменистом и от человек непроходимом создал еси славную Хандзту во имя великомученика Георгия, во спасение душ и в пристанище отцев, и всех с милостию учил еси и милуял еси прибегающих к тебе с верою; ученицы же твои уподоблялися учителю благому, и бысте единодушни силою Христовою; ныне ходатайствуй о нас пред Ним, да насадит в нас страх и ненависть ко греху и любовь к добродетели, да помощию твоею хвалимся и ублажаем тя с усердием и любовию:
Радуйся, многообразныя скорби и печали Христа ради претерпевый; радуйся, святых отцев в пустыни посетивый и устроение коегождо их в сердцы твоем сохранивый; радуйся, добрыя нравы от уединенных пустынников и к Богу приближившихся собравый; радуйся, в лютейших пустынях вместо зверей равноангельныя человеки вселивый и многия добродетели насадивый; радуйся, послушных без ропота со смирением с радостию приемлющий и непокоривых отгоняяй; радуйся, богословствующими усты паче риторов глаголавый и учения небесная изрекавый; радуйся, Божественных книг совершителю и всех уставов истолкователю; радуйся, от многа времене беззаконными устрашенных христиан духом ободривый; радуйся, безсловесныя словесны творящий и немощныя укрепляяй; радуйся, благодатию честных словес твоих народ от сна духовнаго пробуждаяй; радуйся, разслабленный дух отечества оживляяй; радуйся, строжайшим иноческим уставом иноков наставляяй и во всяком благом деле испытуяй; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Излияся благодать во устнах твоих, и всежеланныя песни, сладости исполненныя, изрекл еси, и, благолепие богослужения украсив песнопеньми святых, книги духовныя сокровищствовал еси церквам нашим; видяще же Божественное твое жительство и реки богатейших учений, знамения и чудеса, тобою совершаемая, исполнишася сердца их любве к тебе, и благодаряху Бога, яко призре на возлюбленный народ Свой и посла им человека небесна, и славляху укрепляющаго тя: Аллилуиа.
Якоже благослови Господь дом праведнаго Ноя и патриарха Авраама, то же благословение водворил еси, блаженне, в доме князя Гавриила и теплым ходатаем явился еси пред Богом; Гавриил же дарова тебе многое богатство на созидание монастыря, ибо в велицей тесноте бесте; тако и ныне призри на нас и излий на ны благословения отеческаго твоего милосердия, да путь жития нашего добре пройдем и сподобимся принести пение:
Радуйся, звездо блистающая, ищущим спасения путь показующая; радуйся, любве к Богу и ближнему проповедниче; радуйся, на служение отечеству и Богу призывающий; радуйся, мужеством духа малодушным и разслабленным пример давый; радуйся, во искушениих благодать помощи с небесе приемлющий; радуйся, алчущих питателю и нищих милостивче; радуйся, клятвы разрешителю и благословения подателю; радуйся, реками премудрости твоея ожесточенная сердца умягчаяй и виновных к покаянию обращаяй; радуйся, послушным ревности Божественныя и благоговения учителю; радуйся, волхвов чародейство разрушаяй и насмешку их победою обличаяй; радуйся, гордых смиряяй и смиренных возносяй; радуйся, беззакония царей и немилосердие судей отсекаяй; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Достигша тя великия меры иночества, блаженне, венча тя Господь даром прорицания будущих, яко настоящих, и собеседования с Ангелы; ученицы же твои, трудом собраннии и духовно рожденнии, бяху подобни святым безплотным, и благоухание молитв ваших, яко кадило благовонное, присно восхождаше пред Бога: Аллилуиа.
Слышав благочестивый царь Ашот великохвальное имя твое, уразуме благодать достоинства твоего и, желая видети тя, с честию призва тя в Артануджи и со смирением срете тя; егда же узре сияние лица твоего, яко Моисея пророка, с радостию прият тя и представи тебе трех сынов своих, всеблагих и мужественных, да благословятся от тебе, и зодчих, и все, еже требовася тебе, принесе; мы же память твою из лета в лето совершаем и отверзаем уста пети тебе:
Радуйся, подобно Иоанну Крестителю ангеле пустыни и проповедниче покаяния; радуйся, учителю благоговения; радуйся, сокровенных ведущий, бездно разумения; радуйся, богомудрый врачу духовныя слепоты; радуйся, добре ведущий устав всех праздников; радуйся, громе Божественныя проповеди; радуйся, мужество терпения и чистоты; радуйся, щите, хранящий благочестие; радуйся, мечу, отсекающий злочестие; радуйся, непоколебимый столпе Православия; радуйся, украшение и славо Церкве иверския; радуйся, неусыпный хранителю и поборниче земли и вод картлосиан; радуйся, Божественный заступниче рода нашего; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Помянув род Ашота куропалата, помазанника Господня сыном исповедал еси и, провидя грядущая, обещал еси сродником его царствование до века; ныне моли Бога, да сподобит нас добраго исполнения пророчеств твоих и возставит нам помазанника от корене Давидова, да по обычаю предков наших служит народу и присно славит Христа Бога: Аллилуиа.
От Бога данную благодать, просвещающую души, светло приял еси и народ твой учением Божественным оградил еси; тобою же ободренный царь Ашот победи беззаконных агарян и царство Картлийское, нападеньми врагов поколебанное, паки возстави; тако и ныне ниспосли нам силу, мужество, премудрость и одоление на всех врагов и утеснителей, да, невредимо сохранени, хвалим тя, яко помощника и ходатая теплаго:
Радуйся, пределы Картлийския подвигом твоим украсивый; радуйся, из пустынь Кларджетских неоскудныя благодати излиявый; радуйся, подвижников в пустынях и разселинах каменных укрепляяй; радуйся, учением твоим безчиния исправляяй; радуйся, оскверненныя и многогрешныя души очищаяй; радуйся, от мятежа и брани мирския избавляяй; радуйся, мечем обличения служителей диавола поражаяй; радуйся, еретиков и законопреступников из Церкве изгоняяй; радуйся, зарею благочестия всех просвещаяй; радуйся, в Православии, от святых отец преданном, утверждаяй; радуйся, преподобных пустынников и великих святителей воспитателю; радуйся, удалившихся от власти Божия и человеческия власти ищущих ужасаяй; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Восхотев Царь явити Божественную славу твою, дарова тебе благодать исцеления недугов и изгнания и прогнания бесов; егда же слышал еси плач матере и узрел еси отроча ея, от врага страждущее, умилосердился еси зело и отгнал еси лукаваго онаго духа молитвою; и егда даровал еси исцеление, возрадовашася зело и благодарение исповедаша и славу принесоша Богу, дивному во святых: Аллилуиа.
Якоже царем израилевым посылаше Господь от времене до времене пророки в похвалу им, во ограждение закона и в ходатайство пред Ним, тако и тебе яви в похвалу Багратионов, дивнаго оного и славнаго, богоноснаго отца и блаженнаго подвижника, и подвизался еси за них духовно пред Богом, во избавление от искушений и во избежание всякаго вреда; царие же и князи с народы чтяху тя и хваляху тя, подвигом твоим ободреннии:
Радуйся, неизреченною святынею твоею священству пример давый; радуйся, женам духовныя твердости и благоговения учителю; радуйся, с матерью Февронией собеседниче Ангелов и всякаго скверножития изгладителю; радуйся, царей и князей на милость и приятие подвизаяй; радуйся, побежденных злым грехом прелюбодеяния обличителю; радуйся, бодренно и трезвенно жити научаяй; радуйся, благочестивыя семейства благословляяй и неверным супругом гнев наводяй; радуйся, необузданных укротителю и прелесть суеверия угашаяй; радуйся, незлобивых отроков и дев от всякия скверны и порока избавляяй; радуйся, неправедных судов разрушителю и ненавидящих правду посрамителю; радуйся, гордость мучителей и насмешку диаволю попираяй; радуйся, от сетей сатанинских и от нашествия иноплеменных покрываяй; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Изволением твоим и помощию Баграта куропалата создал еси Шатберди по Божественному откровению и вся обители соединил еси в братской любви и утвердил еси святым подвигом; епископи же и пустынницы с державными поставиша тя архимандритом пустыни Кларджетския, и, яко пастырь бодрый, добре подвизался еси о стадах твоих; тако и ныне умножи нам пастырей и вождей народа, делом и словом украшенных, да, якоже ты, достойно и праведно служат святей Церкви и народу и присно поют Христу, Царю и Богу: Аллилуиа.
Узре пономарь сияние света в жилище твоем и, мня огнь возгоревшийся в нем, скоро возвести архидиакону; той же многажды видяше Духа Благаго, почивающаго на тебе; егда же возре в скважню келлии и паки узре тя светлейша солнца, славу воздаде Богу, помогающему и возносящему любящих Его, и ублажаше тя, яко солнце грузинское, на высоте Церкве иверския лежащее:
Радуйся, человече дивный небесный и ангеле непорочный земный; радуйся, похвало иереев и всесветлое светило благочестия; радуйся, во свете боговидения просиявший жителю пустыни; радуйся, святый источниче богословия; радуйся, друже Христов, делателю винограда Его; радуйся, насаждение райское, плод благий приносящее; радуйся, великий ходатаю и заступниче собора старцев-иноков; радуйся, крестоносче и возставителю падшаго народа; радуйся, сило и утвердителю скипетра царей; радуйся, сподвижниче и соучастниче во всех путех благочестиваго царя Ашота; радуйся, благодатный вождю и непобедимый поборниче избраннаго народа; радуйся, светило земли и веры; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Егда насилием захвати престол Анчийский безстудный Цкири, присно обличал еси безчиние его; он же не послуша и повеле некоему мужу, крепкому стрельцу, пронзити тя копием; и той, ища тя убити, в видении узре столп света и крест, яко радугу, окрест тебе, и абие изсохша жилы мышцы его, с потоками слез припаде к тебе и прошаше прощения; ты же, уподобився Христу, исцелил еси его крепкою молитвою, и он с радостию благодари тя и хваляше Бога: Аллилуиа.
Яко мужественный и храбрый воин Христов, праздно показал еси многообразное коварство Цкириево, предрек ему Божественное отмщение и смерть, и сохранил еси от разрушения славный оный храм Хандзтийский; тако и ныне всецело упраздни коварства враждующих на многоподвижный народ наш, доселе смиренный и уничиженный, и низложи зле заблудших скверных еретиков, высокая глаголющих ложь, да радуемся, собор православных, и похвалами украшаем дела твоя:
Радуйся, пастырю добрый избранных агнцев; радуйся, правило общежительных монастырей; радуйся, наставниче отшельников и всех к небеси направляющихся; радуйся, избранность иноков и похвало постников; радуйся, с небесе дарованное утверждение православных; радуйся, духом крепкий, победителю державных, плотию сильных, и разрешителю страстей; радуйся, милостивче всех верных и помощниче святителей; радуйся, украшение подвижников и покровителю добре хранящихся иереев; радуйся, истинный отче всех, к тебе прибегающих, и питателю сирот; радуйся, падших скорый помощниче и на смерть осужденных исцелителю; радуйся, путешествующих утешителю и тихое пристанище обуреваемых; радуйся, благий ходатаю между Богом и человеки; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Видевше тя отцы Джавахетскаго собора, ужасошася от благодати святыни твоея, ибо риза твоя худая сияше светом неприступным, и на главе твоей бе, яко венец царский, украшенный камением и бисером; тогда со страхом послушаша тебе вси и, утвердивше католикосство великаго Арсения, иже явися правилом святителем и Божественную радость излия на Церковь иверскую, ублажаху тя, яко надежду народа нашего, и на всякое время славляху силу Христову: Аллилуиа.
Непорочно прешел еси житие временное, яко Ангел Божий, и присно молился еси Ему, да утолятся возмущения еретиков от стад Христовых; егда же возвестися тебе день исхода твоего от мира сего, собрал еси старцев Хандзтийских и наставлял еси и благословлял еси стадо твое, и, слышав глас вожделенный, яко в блаженную оную славу вселитися призывает тя Царь Небесный Христос, в старости доброй упитан, изшел еси от плоти и, с Ангелы и лики святых соединився, поеши Вседержителю; Того моли, да отвратит искушения и нападения бесов от чтущих тя и поющих:
Радуйся, христолюбивыя власти и воинства милуяй; радуйся, разсвирепевших богоненавистников победителю; радуйся, многих соблазняющих и вражду между братиями сеющих ужасаяй; радуйся, храмы поругающих и зверским гневом праведных убивающих изглаждаяй; радуйся, разорителем родныя земли и опустошителем отечества гнев наводяй; радуйся, иереев, во одеждах овчих пришедших, внутрь же сущих волков, низлагаяй и разсеваяй; радуйся, сребролюбцев и корыстолюбцев посрамляяй; радуйся, жестоковыйных и самочинных непокорство и неблагодарность упраздняяй; радуйся, гневливых прельстителей и лукаво губящих единоплеменников своих низлагаяй; радуйся, истинных пастырей и великих светил Церкве Божественне наставляяй; радуйся, народ от погибельнаго нерадения избавляяй; радуйся, истинное исповедание православных утверждаяй; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
По времени преставления твоего немощнии и одержимии нечистыми духи, прикоснувшеся святым костем твоим, исцелеша и исполнишася радости; от гроба же твоего исхождаше благоухание неизреченное, и вси исполнишася благодати и чудес, и вси немощнии приимаху исцеление и, возвеселившеся, пением и пении духовными славляху Бога чудес: Аллилуиа.
Оградою Божественною, утверждением и благим заступником стяжа тя земля иверская, и народ твой, жребий Богородицы, присно просит тобою помощи; ты же, святе, славный отче Григорие, иконами изображенный и молитвами поминаемый, паки исцеляеши прибегающих к тебе и скоро помогаеши сущим в печалех и узах и от искушений избавляеши поющих тебе:
Радуйся, от Господа власть над духи нечистыми приемый; радуйся, скорбящим и зло видевшим руку подаваяй; радуйся, от сокровищ Святаго Духа духовная дарования обильно подаваяй; радуйся, учением наставлений твоих многих отцев и епископов премудростию наставивый; радуйся, словом сладкий и советом вожделенный, смуты и прения утишаяй; радуйся, житием добродетельным безплотным уподобивыйся и чудеса обильно подаваяй; радуйся, Божественное поприще подвигом твоим добре совершивый; радуйся, венцем победы украшенный и авве Павлу и Антонию Великому соединенный; радуйся, знамении и чудесы твоими неверных смущаяй; радуйся, на растлевающих коварством народ Господень гнев наводяй; радуйся, всех, враждующих на иверов, ужасаяй и смиряяй; радуйся, во славу имене Христова дерзость богоборцев низлагаяй и нечистыя духи попираяй; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Боголепным онем отцем уподобился еси утверждением Божественнаго учения и народ твой вручал еси Богородице; тако и ныне представи нас матерней благодати Ея, да словеса Своя, яже изрече о жребии Своем, яко милостивая, исполнит и до скончания века сохранит Иверию и народ Иверии, да в любви и мире спасаемся и хвалим Бога духом и истиною: Аллилуиа.
Аще и пустыня Кларджетская умолкла, не можем забыти Божественнаго онаго жительства твоего, ибо хвалятся разрушенныя Хандзта и Шатберди трудами твоими, в них совершенными, и возвещают славу твою; но, ревностию Божественною распаляеми, скорбим о лишении обителей Кларджетских; ныне же сотвори о нас милость, якоже подобает святыни твоей, и моли Христа Избавителя, да возставит правду и во святых и богоугодных оных местех вселит род грузинский, да присно служим жилищу честных костей твоих и сладкогласным языком нашим глаголем «радуйся»:
Радуйся, иноче, Ангелом подражателю, ибо паче естества человеческаго есть светлое преуспеяние жития твоего; радуйся, внутренних оных сокровенных страстей обличителю, ибо многажды слышал еси глас от Ангела к равноангельному отцу и возрадовался еси зело; радуйся, царей и князей, стад Христовых, великий помощниче и учителю, ибо сотворил еси их причастниками труда твоего обильным даянием богатства и приношений; радуйся, брани без брани разрушивый, ибо молитвою твоею предаде Бог агарян в руце христиан; радуйся, мужеством иночества избранный и благодатию пророчества пресветлый, ибо помощь твоя невидимо бяше оружием паче воинств и полков; радуйся, верный рабе Христов, положивый камень краеугольный новому созиданию земли Картлийския; радуйся, непреклонный и мужественнейший подвижниче, вознесший венец православных; радуйся, всеблагий, научивый многих отцев и матерей чину супружества и мере благостыни; радуйся, иерее, избранный Христов, ибо сотворил еси милость погибающей оной жене, якоже подобаше святыни твоей, и был еси виною прежде обличения грехов и потом прощения; радуйся, Илии и Иоанну уподобивыйся пустынниче, ибо дела твоя повествует нам преподобный Георгий Мерчуле по преставлении твоем; радуйся, истинных христиан похвало и иноков радосте, имеяй благодать помогати верным; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
О во святых дивный отче и славный подвижниче, чудотворче Григорие Хандзтийский! Пения наша приими и принеси пред Христа Бога и испроси нам, да во прелестех и в пещи скорбей и нас окропит роса благодати твоея, да сердце наше не будет хладно слышати Божественная учения и славити и пети Богу: Аллилуиа.
Сей кондак рцы трижды, потом:
Игу благому Христову выю преклонил еси и, направив стопы твоя на служение Богу, словесных овец пастырь был еси и пасл еси их словом и делом Божественным; тако и ныне призри на нас и избави нас от веры неживыя и теплохладныя, да не преклонимся к беззаконию по воле безбожных и усердно восхвалим дела твоя, хвалы достойная:
Радуйся, человече, вожделение души; радуйся, избранный сосуде, жилище святыни; радуйся, неисчерпаемый источниче Божественныя премудрости; радуйся, благолепно возсиявый истинный служителю Христа Спасителя; радуйся, свыше посланный на освящение возлюбленнаго народа и на укрепление святаго царства; радуйся, органе, гуслями песнопений Церковь светло украсивый; радуйся, добрый делателю подвига благочестия; радуйся, добрый строителю подвижниче и пустыни во град претворителю; радуйся, обителей Кларджетских великий архимандрите и учителю всея Грузии; радуйся, утвердителю веры, от девы Нины возращенныя; радуйся, истинный образе благочестия предков наших; радуйся, славо и крепосте отечества нашего; Радуйся, всесветлый светильниче и пастырю народа грузинскаго, чудотворче отче Григорие Хандзтийский!
Хвалами поем похвалу иереев и славу Хандзты и ходатаем тя творим пред Богом, да отженет от нас всякое зло и избавит нас от всякия скорби и прелести, да избежим гнева, от Бога воздвигнутаго, и ублажаем тя по силе нашей: Радуйся, всесветлый светильниче и пастырю народа грузинскаго, чудотворче отче Григорие Хандзтийский!
О светозарная звездо пустыни, просветителю земли и вод Иверских и всех живущих в них, с небесе дарованное утверждение православных и великий архимандрите обителей Кларджетских, собеседниче и сожителю Ангелов и наставниче иноков, похвало отцев, славо князей и крепосте воинов, державных дерзновенно обличителю и жезлом учения наставниче, многих чудес делателю, преподобне отче наш Григорие Хандзтийский!
О всеблаженне отче и святый подвижниче, чудотворче Григорие Хандзтийский! Совершив течение твое и преставлься пред Бога, не оставил еси сирых учеников и любящих тя, но отеческим твоим ходатайством скоро помогаеши одержимым нечистыми духи и всем молящимся тебе подаеши утешение; ныне же князи беззакония воздвигошася на ны и подвизаются о растлении и истреблении народа нашего, мы же сну и разслаблению предахомся и не можем противостати им. Но имамы ходатайство твое ко Христу, да сподобит нас исполнения пророчеств твоих и даст нам царя верна и праведна, правителя и вождя, яко Давида Израилю, иже добре управит и попечется о народе нашем, жребии Богородицы, носящем Крест Господень на земли, и возставит единство отечества нашего и вознесет достоинство и крепость земли и рода нашего. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве, благодетелей же наших и всех православных христиан сохрани честным ходатайством твоим.
О пастырю истинный стад Христовых и великий наставниче отцев, светило Церкве иверския и заступниче и сило припадающих к тебе с верою, святый Григорие Хандзтийский! Помози нам изыти из глубины грехов и умиленно моли Бога, да дарует церквам славу, священству честность, властем доброе пасение народа, воинству мужество, мирянам безгрешие, женам целомудрие и чадом благовоспитание, нам же да паки возставит любовь к правде, мужество духа, многочадие, милость ко вдовицам и сиротам и взаимную поддержку; и да дарует нам любовь ко святому житию, ненависть к непотребным делом и сокрушение сердца, со святыми венчание и наследие Царства Небеснаго, да и мы с тобою славим Отца и Сына и Святаго Духа, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, ходатайством Пречистыя Твоея Матере, благодатию и молитвами преподобнаго отца нашего Григория Хандзтийскаго и всех святых, помилуй нас. Аминь.
Автор-составитель: Тинатин Мчедлишвили
