Акафистное пение святому священномученику Зотику пресвитеру, сиропитателю
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже. Аллилуиа, аллилуиа, аллилуиа, слава Тебе, Боже наш, слава Тебе.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Хвалим тя, подвижника, венцем священства и мученичества украшеннаго, и ходатая тя творим пред Богом, яко имаши дерзновение к Нему, да возжжет в сердцах наших огнь Божественныя ревности и дарует нам дух святыни и человеколюбия, да благо служим святей Церкви и народу, и не престанем хваляще и воспевающе тебе: Радуйся, любве ради к Богу и верности ради к ближнему душу свою положивый, святый Зотиче пресвитере!
Равноангельное житие показал еси на земли и, проповедуя веру истинную, стяжал еси благодать милосердия, и нарекся еси отцем вдовиц и сирот и заступником нищих; егда же священству сочетал еси честь мученичества, Христос прослави тя чудесы по смерти и яви тя теплейшим избавителем всех призывающих тя; ныне и о нас ходатайствуй пред Ним, да окропит нас росою благодати твоея, да возможем противостати злу и хвалим тя по силе нашей:
Радуйся, благолепно возсиявый истинный служителю Спасов; радуйся, верный иерею Церкве Христовы; радуйся, бездно неизследимая смирения и любве; радуйся, море неисчерпаемое человеколюбия и источниче независтный милосердия; радуйся, нелицеприятный судие правды; радуйся, кресте носителю обнищавшаго народа; Радуйся, любве ради к Богу и верности ради к ближнему душу свою положивый, святый Зотиче пресвитере!
Бывый зело нарочит царедворец Константина Великаго, последовал еси ему от Рима в Константинополь и верно служил еси благочестивому оному царю; избран же быв Христом в служителя Себе, исполнився ревности Божественныя, оставил еси славу мирскую и востал еси присоединитися к воинству Его; ныне и нам помози, блаженне, да вси православнии благопоспешаем и молитва наша да возыдет пред Бога: Аллилуиа.
Рукоположен быв во пресвитера, честно совершал еси священнослужение, блаженне, и, стаду твоему путь жизни показуя, умилением сердца на всяк день подвизался еси о мирном сохранении вдовиц и сирот, утешал еси печальныя и болящия и тайно помогал еси убогим и заточенным; тако и ныне ходатайствуй о нас пред Богом, да сохранит нас от немощей и ко покаянию наставит нас, восхваляющих и воспевающих тя:
Радуйся, древо многоплодное, насаждением подвижничества возрастшее; радуйся, сердцем очищенный и душею просвещенный; радуйся, благостию и человеколюбием украшенный; радуйся, милосердием, смирением и кротостию преукрашенный; радуйся, в сердце твоем страх Божий и любовь к ближнему насадивый; радуйся, скорбящих душ скорый помощниче и заступниче; Радуйся, любве ради к Богу и верности ради к ближнему душу свою положивый, святый Зотиче пресвитере!
Глаголя: «Служение человеком служение есть Богу», блаженне, и дом твой сотворил еси пристанищем вдовиц, сирот и нищих, яко независтно питал еси их и хранил еси от лютых грехов и немощей; прославился еси во иереех высотою милосердия, и человецы нарекоша тя сиропитателем; тако и ныне напитай душу мою хлебом разумения и даруй ми благообразно ходити в мире сем, да стоим твердо и непоколебимо на пути Христа Бога и восхваляем силу и державу Его: Аллилуиа.
Во царство Констанция царя, егда проказа свирепствоваше в царствующем граде, повеле всех прокаженных в море потопити; ты же, слышав немилостивое сие повеление, от силы свыше дерзновения исполнився, умыслил еси избавити их от неправедныя смерти и, представ пред самодержца онаго царя, испросил еси множество злата, яко бы на куплю драгих камений в сокровищницу его; сего ради пением благохвальным ублажаем тя, яко отца милостива и иерея истинна:
Радуйся, Божественный агнче, пасый словесныя овцы; радуйся, пастырю духовный, собирающий расточенныя овцы; радуйся, яко Авраам, странныя приемлющий; радуйся, нищих прибежище и нагих одеяние; радуйся, обидимых заступниче и скорый услышателю; радуйся, в сердцах боголюбивых благодатную радость изливающий; Радуйся, любве ради к Богу и верности ради к ближнему душу свою положивый, святый Зотиче пресвитере!
О дивное мужество и доблесть! Яко молитвою теплою Божественне вооружився, скоро достигл еси брега морскаго и, обреченныя на смерть прокаженныя царским сребром искупив, тайно вселил еси их в дом твой и питал еси, яко пастырь добрый; тако и ныне поручитель и ходатай буди нам пред Богом и облегчитель тяготы грехов, да вскоре возбнем, яко ниневитяне, и усердно соберемся вси пети Богу: Аллилуиа.
Быв учитель мудр, благосоветлив и Божественною ревностию украшен, не дал еси сна очима твоима, ни веждома твоима дремания, дондеже совершил еси дело оно богокрасное — воздвигл еси рай Христов, дом твой, яко Божественную скинию милосердия, в немже прокаженныя и немощныя укреплял еси благодатию исцелений твоих; ныне и нас сохрани от всякия скорби и от напрасныя смерти, да, благодати и знамений твоих множество восхваляюще, не умолкнем хвалити мужество и твердость твою:
Радуйся, любве Христовы исполнителю; радуйся, погибших неутомимый взыскателю и к Богу приводителю; радуйся, согрешивших к молитве подвизаяй и нераскаянных посрамляяй; радуйся, многия пороки во священнослужителех и в людех искореняяй; радуйся, причастников лжи обличителю и неправедных судов разорителю; радуйся, ненавидящих правду и злое за благо полагающих запрещение; Радуйся, любве ради к Богу и верности ради к ближнему душу свою положивый, святый Зотиче пресвитере!
По смерти Константина Великаго на престоле его вознесеся сын его Констанций, последовавый лжеучению ариан, и возненавиде тя верности ради истинной вере, яко с любовию научал еси всех, да удалятся злаго еретичества и пекутся о душах своих милостынею, молитвою и постом; и ныне моли Христа, Спаса нашего, да изведет достойныя делатели и деятели на жатву Свою, во просвещение всех, да славят Его, яко Царя и Бога: Аллилуиа.
Образ добродетели и благостыни явился еси, богоносне, и, не убоявся жестоковыйности царя еретика, избавитель был еси и дщери его, егда прокажена бысть, и ту взял еси в дом твой, яко отец благий, и по обычаю сладости твоея утешал еси и пекися о ней с великим состраданием; ныне и нам спутник буди и насади в сердцах наших страх и ненависть ко греху и любовь к добродетели, да путь временныя жизни добре пройдем и ублажаем тя с любовию и желанием:
Радуйся, прелести бесовския постом и теплою молитвою угасивый; радуйся, немилосердие властителей на главу твою низведый; радуйся, безпомощных и болящих от немилостивыя смерти избавивый; радуйся, многия души от погибели изъемый; радуйся, лишенных всякия человеческия помощи укрепителю; радуйся, самопожертвованием за единоплеменники твоя всех удививый; Радуйся, любве ради к Богу и верности ради к ближнему душу свою положивый, святый Зотиче пресвитере!
Егда объят царствующий град глад, оклеветаша тя еретицы, нарицающе тя виною всех бед, яко православна иерея и противника арианом, и возвестиша царю, како отец его даде тебе многое сокровище; егда же искаше тя яти, блаженне, умудрился еси священство на мученичество пременити и, безстрашно представ пред него, егда вопрошаше тя о сокровищи, ведый его в дом твой, показал еси, святе, прокаженныя и глаголал еси дерзновенно: «Се бисери, яже купих царским сребром», и славил еси Христа, умудрившаго тя: Аллилуиа.
Видев царь дом твой, яко упокоение безчисленных душ, достойныя милости прокаженныя вместо честных камений, бисеров и иакинфов, наипаче гневом разжжеся и повеле святыя ноги твоя привязати к мском необъезженным, да умертвят тя, влачаще по путем; ты же мужественнее бывал еси пред предлежащим подвигом и славил еси Бога вящшею теплотою; и ныне ходатай буди о нас пред Ним, да сокрушит дерзость тех, иже безбожием вооружишася на православныя, и на путь заповедей да наставит нас, чтущих и восхваляющих тя:
Радуйся, благодатию обличения твоего народ от духовнаго сна возбуждаяй; радуйся, неизследимою премудростию неразумных к разумению наставляяй; радуйся, окаменелая и жестокая сердца умягчаяй; радуйся, смирению Христову учителю; радуйся, ближних соединителю и враждующих умирителю; радуйся, великия доблести и добродетели твоя покрывый; Радуйся, любве ради к Богу и верности ради к ближнему душу свою положивый, святый Зотиче пресвитере!
О преславное мужество твое, блаженне! Егда влечаху тя мски по полю, плоть твоя, камением растерзанная, на них оставаше; ты же ни во что вменял еси страдание за Христа и святую душу твою предавал еси Христу Богу, иже сопричте тя лику мучеников и дарова ти благодать помощи чтущим тя; ныне призри на ны сладостию, да не уклонимся ко беззаконию и сподобимся славити Бога: Аллилуиа.
О, коликое чудо сотвори Бог о тебе! Яко безсловесныя скоты, яко человеки, провещати сотвори, и ими посрами Констанция за убиение твое; наипаче же удивишася царь и вси, иже с ним, егда на месте, идеже излияся святая кровь твоя, источник чудотворный истече, от негоже вернии, пиюще, приимаху душ и телес облегчение, лобызаху честныя язвы твоя со слезами и похвалами украшаху тя:
Радуйся, неуклонным мужеством подвижничества вооруженный; радуйся, звоне духовнаго бодрствования; радуйся, находящия искушения мужественно понесый; радуйся, поношения и мучения с молитвою претерпевый; радуйся, немощным естеством плотским лютыя муки приявый; радуйся, неистовствующих еретиков посрамителю; Радуйся, любве ради к Богу и верности ради к ближнему душу свою положивый, святый Зотиче пресвитере!
Видев царь чудеса сия, постыдеся зело и повеле погребсти тя с честию; многоподвижное тело твое помазаша благовонными масты и, положивше на месте подобающем, независтно источал еси исцеления и благодать истинную; болезньми же и напастьми стесняемии присно притекаху припасти ко гробу твоему, благодаряху тя, приемлюще облегчение, и славяху Христа, подвигоположника твоего: Аллилуиа.
Земное течение твое мужественно совершил еси и, отверзши двери священномученичества, светло украшен предстал еси Господу, иже и по смерти показа тя прокаженных и увечных милостивцем и обреченных помощником, егда созда царь больницу в память доблести твоея; житие же твое и дела дивная описаша любящии тя, да вси воспеваем тя, яко преславнаго и дивнаго мученика:
Радуйся, мужественный и непобедимый, душу свою за единоплеменники положивый; радуйся, потоком крове твоея ругание сильных угасивый; радуйся, беззаконный суд и гнев Божий удержавый; радуйся, пастырю добрый и бодренный, стадо твое невредимо сохранивый; радуйся, словом сладкий и советом вожделенный, ненависть и смятение утоляяй; радуйся, духом крепкий, плотию сильных властителей победителю; Радуйся, любве ради к Богу и верности ради к ближнему душу свою положивый, святый Зотиче пресвитере!
По всей земли разнесеся дивное твое самоотвержение, како пекийся о вдовицах, сиротах и прокаженных, и святую кровь твою излиял еси спасения их ради; ныне виждь сети безчисленных врагов, злокозненно распростертыя на род сей наш, и избави нас от взаимнаго насилия и междоусобныя брани, да, любовию Божиею единомысленно связани, присно побеждаем вся борющия ны и, подвигом твоим мужественни сотворени, восхваляем венчавшаго тя Христа Бога: Аллилуиа.
Быв честный иерей, Зотиче, подвизался еси паче немощи естества человеческаго и, возвеличив имя твое Божественным житием, праведно Церковь сопричте тя лику святых, яко не лишен был еси их ни верою, ни подвигом, ни дерзновением пред Богом; сего ради ходатая тя посылаем к Нему, да простит вся грехи и беззакония наша и сподобит нас хвалити и воспевати святыню твою:
Радуйся, мужественный иерею и мучениче, к храбрости подвизаяй; радуйся, учителю милосердия и долготерпения; радуйся, великий искусниче безбраннаго одоления врагов; радуйся, подвигом твоим Божественное течение добре совершивый; радуйся, истинный образе благочестия древних отцев; радуйся, красото светлаго лика мучеников; Радуйся, любве ради к Богу и верности ради к ближнему душу свою положивый, святый Зотиче пресвитере!
Благодать дадеся тебе, преподобне отче, от Бога исцеляти немощныя, разслабленныя, иссохшия и увечныя, ихже, яко друг Христов, приял еси; и теплая молитва их и горячее излияние слез вдовиц и сирот, святе, храм Божественный непорочен показа тя и отверзе ти врата Царствия; ныне светло радуешися пред Богом и избавляеши от напастей просящих с верою помощи твоея и славящих силу Его: Аллилуиа.
Знамении и по смерти проповедуеши непобедимую силу Божию, на чтущих Его явленную, отче; и ныне благодарение Ему должни есмы, яко тобою чаем избавления от всех скорбей, наипаче же от грехов и беззаконий наших, и уповаем на многую милость Его, да не отвержет нас ходатайством твоим, и даст нам победу на враги видимыя и невидимыя, и сподобит нас хвалити и воспевати тя:
Радуйся, подвиг богослужения добре потрудивыйся; радуйся, на зло ближним подвизающихся посрамителю; радуйся, многих от неизреченных скорбей избавителю; радуйся, болящих и недужных духовным мужеством укрепляяй; радуйся, нищих прибежище, скорбящих и злостраждущих заступниче; радуйся, напастей и волнений утолителю; Радуйся, любве ради к Богу и верности ради к ближнему душу свою положивый, святый Зотиче пресвитере!
Храм Всесвятаго Духа знаем тя, о преподобне отче Зотиче, яко, мужественнейшее подвигов любление показав, мученическую смерть подъял еси в чаянии жизни вечныя; и, царствуя пред Богом, испроси нам от Него избавление от сетей диавольских и от злобы человеческия, да в любви и мире живем и хвалим Бога духом и истиною: Аллилуиа.
Яко мужественный воин Христов явився на поприщи страдания, сияние мужества твоего озаряет сердца мученолюбцев, и молим тя, священномучениче Зотиче: помози нам пред Богом, да отвратит гнев, воздвигшийся на ны множества ради грехов наших, и, яко Лазаря, возставит отечество наше, Грузию, в первую славу, да не будем попрани от хищных иноплеменных язык и родов, и усердно ублажаем тя, сугубым венцем священства и мученичества украшеннаго:
Радуйся, от Господа власть на нечистыя духи приявый; радуйся, от сокровищ Святаго Духа духовная дарования обильно подаваяй; радуйся, звездо, ищущим спасения путь показующая; радуйся, молящих тя скорый помощниче и милости подателю; радуйся, к тебе прибегающия страждущия души приемляй; радуйся, благих прошений исполнителю и непотребных стремлений обуздателю; Радуйся, любве ради к Богу и верности ради к ближнему душу свою положивый, святый Зотиче пресвитере!
Яко Иова, возможе Бог избавити тя от всякия скорби, но, яко горел еси верою православия, яко злато честное, предаде тя в горнило мучения и красоту души твоея всем на видение возсия; ныне умилостиви о нас праведнаго Судию Господа, да не совратимся с пути правды и истины и славим Создателя земли и неба: Аллилуиа.
Не славы ради мирския положил еси главу и душу твою, о Зотиче блаженне, но стада ради Христова; ныне же волцы хищнии обыдоша нас растлити словесныя овцы; но ты помози нам, всехвальне, и, аще и недостойни есмы грех ради наших, яко священномученик испроси от Христа непоколебимое сохранение церквам, и Крестом победы подати народу нашему, утверждение верным и велию милость воспевающим и восхваляющим тя:
Радуйся, немощных крепосте и сильных низложителю; радуйся, буйствующих препинателю и безумия их угасителю; радуйся, честности и мужества насадителю; радуйся, твердым упованием злобу сопротивных погубляяй; радуйся, жестоковыйных и умом непокорных вразумляяй; радуйся, благоговейных иереев утешение и заступниче; Радуйся, любве ради к Богу и верности ради к ближнему душу свою положивый, святый Зотиче пресвитере!
О святый священномучениче Зотиче! Ведуще множество заступлений и милостей твоих, с любовию приносим ти благодарственное пение и молим тя с упованием помощи твоея: ныне отеческим дерзновением ходатайствуй о нас пред Богом, да не осудит нас по беззаконием нашим и невредимы сохранит от лютых грехов и немощей, да достигнем невечерняго света Божия и с тобою поем Богу: Аллилуиа.
Сей кондак трижды; потом икос 1 и кондак 1.
О всесладкий и милостивый Зотиче пресвитере, мученическою кровию украшенный и за ближняго кровь излиявый; отцев украшение, иереев венче и Ангелов собеседниче, болящих врачу и в скорбех непостыдный заступниче, ходатаю к Богу и всех убогих, отчаянных и к тебе прибегающих прибежище, стено и покрове!
О дивный и воистинну мужественный пресвитере Зотиче сиропитателю, иже житие твое благочестием утвердил еси и боголепно украсил еси кровию мученичества, ныне внемли молитвам нашим и мученическим дерзновением испроси нам от Господа, да сохранит народ наш от беды вражия и покрыет от ересей и от закона чуждаго, нам же да дарует, якоже тебе, теплоту веры, братскую любовь к ближнему и Божественную ревность об отечестве. Многомощною силою твоею укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов, и весь священный и монашеский чин, военачальников и градоначальников, христолюбивое воинство, и благодетелей наших, и всех православных христиан.
О подвига победителю, святый священномучениче Зотиче! Во время земнаго жития твоего покрывал еси от глада вдовицы, сироты и нищия, и, от смерти избавляя прокаженныя, многия грешники привел еси к покаянию и еретики — к истине; по смерти же на небесех наслаждаешися Царствием и присно зриши неизреченную благость Христову; и ныне ходатай буди о нас пред Ним, да дарует церквам славу, священству честность, начальником добре пасти народ, воином мужество, мирским безгрешность и женам целомудрие, нам же да возставит благочестие, правдолюбие, многочадие и милость ко вдовицам и сиротам; да дарует нам любовь к чистому житию, ненависть к непотребным делом и сокрушение сердца, венцы со святыми и наследие Царства Небеснаго, да и мы с тобою славим Отца и Сына и Святаго Духа, ныне и присно и во веки веков. Аминь.
Достойно есть яко воистинну блажити тя, Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй (трижды),
Господи Иисусе Христе, Сыне Божий, молитвами Пречистыя Твоея Матере, святаго священномученика Зотика пресвитера и всех святых, помилуй нас. Аминь.
Автор-составитель: Тинатин Мчедлишвили
