Акафистное пение святым мученикам, шести тысячам гареджийских иноков
Молитвами святых отец наших, Господи Иисусе Христе, Боже наш, помилуй нас. Аминь. Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Поем вам, во святых преславнии лики Божественных мучеников, и не престанем моляще вас: яко имущии дерзновение велие пред Богом, умилостивите о нас благость Его, да дарует покаяние и оставление грехов чтущим вас и поющим: Радуйтеся, мученическим подвигом просиявшии, преподобнии отцы Гареджийстии!
Бывше Ангели во плоти, преходящия сладости мира возненавидесте и пролитием крове наследовасте вечную обитель, к нейже желасте достигнути, идеже несть печаль, но радость, и со святыми иереи и мученики царствуете пред Богом; ныне не престаните моляще Его, да исхитит нас из рук Велиара, растлителя душ, и дарует победу на бесы и козни их восхваляющим и величающим вас:
Радуйся, святый лике и соборе избранный, Духом Святым украшенный; радуйтеся, Божественною благодатию собраннии; радуйтеся, братским единством сопряженнии; радуйтеся, духом единодушнии, советом Божественным утвержденнии; радуйтеся, упованием на Господа и мужественною крепостию вооруженнии; радуйтеся, агнцы Божии, стопам Пастыря добраго последовавшии; радуйтеся, на поприще подвига безстрашно вшедшии; радуйтеся, на жертвеннике закланий принесеннии; радуйтеся, честною кровию вашею Церковь иверскую украсившии; Радуйтеся, мученическим подвигом просиявшии, преподобнии отцы Гареджийстии!
Яко светила блистающая, возсиясте вы, блаженнии, егда умалена бе сила царства грузинскаго, и, оружием иночества вооружившеся, вся дни в святыни Богу служили есте и вручали есте Ему народ и отечество ваше; егда же угодно бысть Ему служение ваше, уготова вас нетленными агнцы Своими, да вси утвердятся подвигом вашим и подвигнутся на хвалу и пение Ему: Аллилуиа.
Егда с благоговением совершисте четыредесятидневный пост, Ангел Божий явися Арсению, игумену Давидовы лавры, и возвести ему грядущее избиение ваше мечем; он же, вся возвестив вам, преподобнии, даде вам избрати смерть Христа ради или избавление от врагов; и токмо два брата бежаша в горы, вы же не поколебастеся, но уготовастеся на подвиг; сего ради хвалимся и сице вопием вам:
Радуйтеся, любовию Божиею воспламененнии; радуйтеся, иго Христово сладостно носящии; радуйтеся, в смирение, яко в ризу светлую, облекшиися; радуйтеся, молитвою на всякое время непрестанно Бога славящии; радуйтеся, благоговением постническим очищеннии; радуйтеся, добрым житием украшеннии; радуйтеся, в совершенную меру добродетели достигшии; радуйтеся, во плоти сущии и, яко безплотнии, поживше; радуйтеся, мечи обоюдоострии, мрак безбожия отсекающии; Радуйтеся, мученическим подвигом просиявшии, преподобнии отцы Гареджийстии!
По обычаю собравшеся на утреннюю молитву в церкви Воскресения, начасте литию и свещами разгнасте мрак оный непроглядный; узреша же сияние множества свещей беззаконнии персы и устремишася истребити вас; вы же любве ради Божия избрасте смерть и хвалили есте Его непрестанно: Аллилуиа.
Егда приидоша воинства беззаконных в Гареджу, нападоша на вы в церкви и рекоша со гневом: «Оставите Христа, Егоже исповедуете, и приимите закон пророка нашего; аще ли не послушаете нас, истребим вас мечем»; вы же безстрашно отвещасте: «Се, готови есмы принестися Богу и стати пред жертвенником Его»; мы же дивимся любви вашей к подвигу и подвизаемся на пение:
Радуйтеся, оружием крестным огражденнии; радуйтеся, мира сего возненавидевшии; радуйтеся, нетленнаго онаго вечнаго богатства искателие; радуйтеся, святых и блаженных отцев подражателие; радуйтеся, правыя веры истиннии исповедницы; радуйтеся, пещь пустыни росою терпения угасившии; радуйтеся, дерзость богоненавистников смирившии; радуйтеся, крепостию духа немощь человеческую покрывшии; радуйтеся, умы наша на небо возводящии; Радуйтеся, мученическим подвигом просиявшии, преподобнии отцы Гареджийстии!
Обступиша вас нападающии они, отцы, и нуждаху погубити безсмертную оную жизнь ради суетныя; вы же дерзновенно глаголасте: «Мы законоположений лживаго онаго пророка вашего не приемлем и не оставим Христа, егоже имене ради, изшедше из мира, вселихомся в пустыни сей, и с верою славим Его»: Аллилуиа.
Богу последовавший прекрасный соборе подвига победителей, воистину Ангелы предводимый, молили есте человеческое милосердие магометан, да прежде причаститеся безсмертнаго и нетленнаго Тела Агнца непорочнаго, и обещавали есте волею предати себе в руце их; ныне молите Царя Небеснаго, да насадит в нас, якоже в вас, теплоту веры и язык наш подвигнет на хвалу мужества вашего и святыни:
Радуйтеся, благочестия хранителие бодрии; радуйтеся, непобедимым подвигом пресветлии; радуйтеся, дивною твердостию соединеннии; радуйтеся, силою Распятаго ободреннии; радуйтеся, во время нашествия иноплеменных воини непоборимии; радуйтеся, нищетою временною многое богатство на небесех собравшии; радуйтеся, грузином сладость благочестия от Господа испрашивающии; радуйтеся, блаженнии цвети иночества, Божественное благоухание источающии; радуйтеся, насаждения пустыни плодоноснии, отечество благодатию исполняющии; Радуйтеся, мученическим подвигом просиявшии, преподобнии отцы Гареджийстии!
О, дивное сие слышание! Ибо всенемилостивых преклони Бог на милость к вам и не попусти варваром на вы, дондеже не вкусисте животворящия оныя Пасхи; и, всесвятый дар приносяще Богу и с ним себе самих в жертву Божественную приводяще, причастившеся нетленнаго Тела и Крове Христа Бога, пели есте и хвалили есте силу Его: Аллилуиа.
Се, Божественный соборе, посреде церкве собраннии, егда уготовастеся приобщитися всесвятых Страстей Христовых, внидоша безбожнии мучителие и первее отсекоша главу игумену лавры, потом же изведоша вас из церкве, честных служителей Бога Слова, Емуже с молитвою припадали есте и вручали есте души ваша; ныне и нас вручите человеколюбию Его, да не удалит от нас помощи Своея, да в любви и мире спасаемся и ублажаем вас с желанием:
Радуйтеся, непобедимии полцы Небеснаго Царя; радуйтеся, мученицы истины; радуйтеся, образи благочестия предков наших; радуйтеся, рекою слез пустыню плодоносну сотворившии; радуйтеся, носящии единое оное лютое искушение; радуйтеся, избраннии Господни, безмятежно Ему души ваша предавшии; радуйтеся, немилостиво отсеченныя лозы винограда Христова; радуйтеся, славы Гареджи и похвалы Церкве; радуйтеся, неплененная врата земли иверския; Радуйтеся, мученическим подвигом просиявшии, преподобнии отцы Гареджийстии!
О безстрашное мужество, друзи добрии и братие прекраснии! Ибо егда начаша мучителие немилостиво избивати вас мечем, стоясте твердо посреде безбожных и, утешающе друг друга, очи ваша на небо возвели есте и купно славили есте Создателя всех: Аллилуиа.
Благоговением и постом изнуренных, егда закласта вас беззаконнии в церкви, исполнися кровию вашею жилище оно Божие; руце же безбожных убийц от тленнаго праха отрясоша души ваша, и за иноческие труды и мученичество от Христа Бога в награду приясте сугубый венец; ныне ходатайством вашим избавите нас от невидимых и видимых врагов, иже сию похвалу вам приносим:
Радуйтеся, овни словеснии, в жертву святую Христу Царю учиненнии; радуйтеся, во святилище храма и на святей трапезе Его ради закланнии; радуйтеся, в нощь Воскресения смертию смерть поправшии; радуйтеся, пред небесным жертвенником купно представшии; радуйтеся, священнолепнии отцы и братие, потоками крове друг ко другу соединеннии; радуйтеся, Царствия безконечнаго со святыми причастницы; радуйтеся, подвигом вашим безплотныя чины удивившии; радуйтеся, плодом мужества вашего духовное мужество иверов утверждающии; радуйтеся, сердца, волнами мира поколебанная, в благочестии наставляющии; Радуйтеся, мученическим подвигом просиявшии, преподобнии отцы Гареджийстии!
О соборе всечестный и стадо, пасомое от Агнца, седящаго на престоле Отчем! Егда обступиша вас волцы злии и растерзаша немилостиво — нецыих юных, нецыих же старцев, — не погибе ни един от вас, но вси единством веры достигосте в меру возраста исполнения Христова, ходатаи и заступницы народа вашего, и хвалили есте силу Его: Аллилуиа.
Егда избегосте сети два брата, узреста сходящия с небесе венцы пресветлыя, и понеже два между ними обретошася лишни, возвратистеся в обитель и, яша вас беззаконнии, яко овцы, закласта мечем; святая же телеса ваша разметаша в дебри, и благодатию вашею упитася земля она безводная, и прозябоша дивно насаждения розовая, многая лета свидетельствующая красоту подвига вашего и всех подвизающая пети вам:
Радуйтеся, в горниле лютых болезней искушеннии; радуйтеся, от беззаконных немилостиво пострадавшии; радуйтеся, яко Авель закланнии и яко Исаак благоприятно принесеннии; радуйтеся, лику других ваших соединеннии; радуйтеся, во Царствии Небесном вселившиися; радуйтеся, блистанием подвигов двема светилома мира уподобльшиися; радуйтеся, верным сладкий свет победы простирающии; радуйтеся, духовная дарования обильно подающии; радуйтеся, молящих и тепле призывающих вас помощницы; Радуйтеся, мученическим подвигом просиявшии, преподобнии отцы Гареджийстии!
Избивше служителей святыя обители безбожнии они, блаженнии, опустошиша и всецело разграбиша двенадесять обителей Гареджийских; егда же отъидоша во страну свою, копиями пронзенная телеса ваша, кровию обагренная, собраша братия оныя затворницы и, погребше, идеже приясте смерть Христа ради, ублажаху вас и славляху Подателя вам победы: Аллилуиа.
Прославив честныя кости ваша Господь Вседержитель, в безводной оной пустыни, кровию вашею обильно напоенной, многообразныя цветы прекрасныя обильно прозябе и благоуханием их ознамена святую багряницу честныя крове вашея; видящии же сие Христа славляху и глаголаху похвалы ваша:
Радуйтеся, иноцы, с небесе прославленнии, на поприща горняя тецыи; радуйтеся, мученицы Христовы, лютое оное искушение купно понесшии; радуйтеся, заблуждение безбожных дерзновенно посрамившии; радуйтеся, Божественное поприще добре совершившии; радуйтеся, приношения духовная, любве ради Христовы кровь пролиявшии; радуйтеся, совлекшеся тленнаго, в ризу безсмертия облекшиися; радуйтеся, святым иереем и блаженным отцем соединеннии; радуйтеся, единодушно пред Богом представшии; радуйтеся, от Него власть над духи нечистыми приявшии; Радуйтеся, мученическим подвигом просиявшии, преподобнии отцы Гареджийстии!
Приемше Божественную кончину, победою украшеннии, вознеслися есте на небо и, равныя чести и славы сподобльшеся, венчани бысте от десницы Божия; ныне ходатайствуйте о нас пред Ним, да насадит в нас страх и ненависть ко греху и любовь к добродетели, да достойно ходим путем предков наших и хвалим Создателя всех: Аллилуиа.
Кровь ваша, о мученицы дивнии, украси апостольскую Церковь грузинскую; честныя же и мироточивыя кости ваша, мечем изсеченныя, изнесоша с литиею и, создавше мученическую часовню близ церкве Воскресения Христова, положиша во святилищи — в каменном оном точиле; и вси, прибегающии тамо, приношаху вам благодарственную хвалу:
Радуйтеся, многоплоднии грезни горняго винограда, в точиле страдания изстиснутии; радуйтеся, небесных воинств собеседницы, пред Святою Троицею непостыдно предстоящии; радуйтеся, богоприятною кровию вашею Новый Завет украсившии; радуйтеся, принесением во святом храме в Церкви первородных вселившиися; радуйтеся, ходатайством вашим двери Божественныя милости отверзающии; радуйтеся, плодом мужества вашего одержимых сном лености укрепляющии; радуйтеся, словесная и святая насаждения, холмы Гареджийския и Многогорную украсившии; радуйтеся, силою мощей ваших духи нечистыя прогоняющии; радуйтеся, любовь Христову среди человек насаждающии; Радуйтеся, мученическим подвигом просиявшии, преподобнии отцы Гареджийстии!
Достохвально есть всечестное собрание ваше, не тленным сродством, но нетленным и ангельским единством избранное и освященное, иже в нощь Воскресения себе Богу принесосте; из дому же Его — из церкве Воскресения Христова — изшед источник всесвятыя крове вашея, блаженнии, напои пустыни Гареджийския и всех подвиже пети Богу: Аллилуиа.
Единство братства совершисте, себе Христа ради принесше; и благоволи Он явити Божественную славу вашу и кости ваша сотвори домом прибежища многим, даровав вам благодать исцеления и избавления от скорбей; Церковь же грузинская установи память вашу во вторник Пасхи, и весь народ, притекая приложитися ко всечестным мощем вашим, достойноблаженнии, приобщали есте радости и подвизали есте пети вам:
Радуйтеся, ароматы, мира безценная, благоухания Христова; радуйтеся, неувядаемии цвети мысленнаго рая; радуйтеся, всесветлии поборницы народа нашего; радуйтеся, памятницы веры и печати твердости; радуйтеся, теплии покровителие собора старцев-иноков; радуйтеся, твердии столпи и ограждения пустыни Давид-Гареджийския; радуйтеся, ходатаи и заступницы рода грузинскаго; радуйтеся, славы и крепости отечества нашего; радуйтеся, камени драгоценнии, светила Церкве иверския; Радуйтеся, мученическим подвигом просиявшии, преподобнии отцы Гареджийстии!
Благоизволи отец и наставник пустыни Гареджийския Давид положитися святым мощем вашим окрест гроба своего, якоже и святому оному и блаженному Додо; и се, и мы с верою притекаем во святую лавру его, да всю сию святыню тепле облобызаем и хвалим прославившаго вас Христа, Царя и Бога нашего: Аллилуиа.
Славное мученичество ваше возвещает пустыня Гареджийская, с радостию ликует Церковь и уставляет всем верным с молитвою совершати святую память вашу; и мы потщимся в Гареджу приложитися к раце мощей ваших, яже, яко источник благодати и множества знамений, непрестанно источает исцеление душ и телес, и молим вас: избавите нас от всяких недугов и прелестей, да, невредимо сохранени, ублажаем вас, яко великих ходатаев и заступников:
Радуйтеся, шесть тысяч мучеников, в пустыни Гареджийстей избиеннии; радуйтеся, от Христа венец победы купно приявшии; радуйтеся, великоименитии и славнии, имя безсмертия стяжавшии; радуйтеся, от святыя сея пустыни потоки жизни по земли нашей разливающии; радуйтеся, силою Божиею многая чудеса совершающии; радуйтеся, недуги многоразличныя и немощи прогоняющии; радуйтеся, в скорбех непостыдно руку подающии; радуйтеся, умы наша на небо возводящии; радуйтеся, от нас ублажаемии и с благословением поминаемии; Радуйтеся, мученическим подвигом просиявшии, преподобнии отцы Гареджийстии!
Всежеланно и радостотворно есть единое ваше ангельское жительство, о стадо словесных овнов, ни един бо от вас избеже меча врагов Христовых; ныне же имате дерзновение помогати чтущим вас и паче ходатайствуете о тех, ихже теплота ко Господу всели в пустыни и дебри Гареджийския, да присно подвигом и иноческим умом хвалят вас и поют Подвигоположнику вашему: Аллилуиа.
Якоже святый Давид принесе благодать из Иерусалима в Гареджу, тако и вы великою добродетелию и принесением себе Христа ради стяжасте благодать духовную и, в ризы, кровию обагренныя, облечени и копиями немилостиво пронзени, якоже в первых веках святии отцы и мученицы блаженнии, царствуете в безконечном благе, знамения и чудеса, от Бога данная, совершаете, преподобнии, и поборницы и покровителие бываете восхваляющим и величающим вас:
Радуйтеся, венцем мученическим и воинством Христовым явльшиися; радуйтеся, мученическою кровию, яко багряницею, просиявшии; радуйтеся, светильницы пресветлии, мрак безбожия разгоняющии; радуйтеся, пламень страстей и лютыя недуги угашающии; радуйтеся, правоверных утешителие и зловерных посрамителие; радуйтеся, в сердцах боголюбивых благодатную радость распростирающии; радуйтеся, бодрствовати научающии и грехов наших обличителие; радуйтеся, знамении безбожных и развращенных смущающии; радуйтеся, в пристанище вечныя жизни мирно вводящии; Радуйтеся, мученическим подвигом просиявшии, преподобнии отцы Гареджийстии!
О во святых преславнии лики Божественных мучеников, преподобнии отцы наши Гареджийстии! Чтим общия подвиги ваша и единую за Христа смерть, еюже прославистеся, и молим вас: управите житие наше к заповедем Его, да в воскресение всесвятых телес ваших возстанем с вами во сретение Господа и восхитимся на облацех на воздусе и присно с вами славим силу Его: Аллилуиа.
Сей кондак трижды; потом икос 1 и кондак 1.
О всехвальнии мученицы, в пустыни Гареджийстей пострадавшии, украшения старцев, похвало отцев, венцы иереев и собеседницы Ангелов, подателие исцелений и в скорбех непостыдно руку подающии, молящих вас скорыя помощницы и милости подателие!
О всесветлии мученицы Христовы, блаженнии и богоноснии отцы наши Гареджийстии, иже возревновасте о Бозе Вседержителе и, не удовлетворившеся единым крещением во оставление грехов, крестистеся и кровию! Ныне, присно к твердому вашему ходатайству и помощи припадающих, представите нас Христу Богу нашему, да безмерною милостию Своею призрит на народ наш, жребий Матере Своея, носящий Крест Господень на земли, и сохранит от сети врага невидимаго и видимаго и от вражды между братиями, веру же нашу к Нему паки обновит и дарует нам любовь к ближнему и верность Богом дарованному отечеству, упитанному кровию вашею. Многомощною силою вашею в служении укрепите Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, долгоденствием сохраните пасти народ наш во всякой истине и святыни. Просветите преосвященных митрополитов, архиепископов и епископов, честных иереев, служащих Христу диаконов и всех церковнослужителей, смиренным житием пребывающих, и христолюбивых мирян покрыйте ходатайством вашим.
О звезды многотысящныя просвещенныя, молящих вас скорыя помощницы и милости подателие, святии гареджийстии преподобномученицы, помозите нам пред Богом, да дарует земли нашей мир, церквам благолепие, священству честность и всем мирянам утверждение в добродетелех, да не обладает нами растлевающий дух века сего, и, небеснаго жительства сподобльшеся, с вами непрестанно славим Отца и Сына и Святаго Духа, Емуже подобает всякая слава, честь и поклонение, во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, святых мучеников шести тысяч гареджийских иноков и всех святых, помилуй нас. Аминь.
Составила Тинатин Мчедлишвили
