Акафист святому славному мученику благоверному царю Луарсабу
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Венцем царства и мученичества украшеннаго, мужественнаго Луарсаба, непобедимым подвигом пресветлаго, похвалами украшаем, к тебе прибегающии, и молим святыню твою: приими недостойное сие пение наше, славне, и не лиши нас помощи твоея, но ходатайство о нас принеси ко Избавителю и оставление грехов испроси с верою восхваляющим тя: Радуйся, добропобедный царю и мучениче, мужественный Луарсабе!
О всенеизреченная любовь твоя ко Христу, храбрый воине Божий, ибо вместо царства поругание, вместо престолов гонение и вместо венца биение приял еси и прелесть персидскую крепко посрамил еси; сего ради, совершающии всесветлую память твою, с верою и желанием вопием ти:
Радуйся, всесветлая похвало правыя веры; радуйся, обителе истиннаго подвига; радуйся, разумный адаманте терпения; радуйся, громе Божественнаго проповедания; радуйся, твердою верою мучителей нечестие обличивый; радуйся, щите, хранящий благочестие; радуйся, мечу, отсекающий злочестие; радуйся, лозо винограда Христова, плод мученичества принесшая; радуйся, цвете прекрасный светлаго вертограда Давидова; радуйся, поборниче и ходатаю воинства грузинскаго; радуйся, неплененная врата Церкве иверския; радуйся, славо и крепосте отечества нашего; Радуйся, добропобедный царю и мучениче, мужественный Луарсабе!
Егда лютый и кровопийственный шах Аббас сокруши и плени живущих в Кахетии и устремися на Картли, тогда оставил еси отечество и дом твой, пастырю добрый, и, подобно Избавителю, умыслил еси положити себе и душу твою во избавление христиан; сего ради подвизаем всяк язык ко славе и хвале твоей: Аллилуиа.
Не пощадел еси мужества юности твоея, ниже славы и чести царства, но паче скорбел еси и болезновал еси сердцем о поругании святых икон и крестов и о разорении святых церквей, и, уповая на Бога истиннаго и Царя Небеснаго, предстал еси пред немилостивым Аббасом и просил еси мира царству твоему; сего ради подвизается ныне ум наш светлою похвалою подвигов твоих:
Радуйся, от корене Иессеова прозябый; радуйся, благодатию Святаго Духа просвещенный; радуйся, от Господа умудренный и укрепленный; радуйся, силою мужества и храбрости явленный; радуйся, богочестием мученичества возсиявый; радуйся, сыном пророка Давида нареченный; радуйся, в пастыря и подвижника возлюбленнаго народа твоего посланный; радуйся, мужеством и храбростию подвига дедом твоим, великому Луарсабу и Симеону, уподобивыйся; радуйся, безмездною жертвою Богу принесенный; радуйся, узкими враты в Царство Небесное вшедый; радуйся, в лице мучеников украшенный; радуйся, среди святых Ангелов просиявый; радуйся, от иверов присно поминаемый; Радуйся, добропобедный царю и мучениче, мужественный Луарсабе!
Егда предстал еси, блаженне, пред безбожным оным ханом, первее словом ласкательства обещаваше тебе велию честь и милость и, призывая оставити закон Христов, лукаво мняше прельстити тя обратитися в закон свой; но суетно бысть лукавство его, и не успе во хотении сердца своего, ибо дерзновенно исповедал еси Сына со Отцем и славу воздал еси Святей Троице: Аллилуиа.
Словеса лжепророка не смутиша ума твоего, но вместо того отвещал еси: «Аще бы и вся земля моя была, не подъял бы послушания словесем твоим, но от Царя и Бога моего просвещение приях и на Него возложих упование мое, и разве Его иного бога не вем»; сего ради сынове Православныя Церкве с удивлением возглашаем и глаголем:
Радуйся, благородство души сохранивый; радуйся, хулителей креста Христова поразителю; радуйся, упованием на Бога изощренный меч врага сокрушивый; радуйся, честности и мужества насадителю; радуйся, от многих искушений одержимых и попечением обстоимых избавителю; радуйся, богохранимый народ твой добре пасый; радуйся, гнев Божий удержавый; радуйся, гордостию превознесшихся низложивый; радуйся, злыя помыслы попирающий; радуйся, верным честь подаяй; радуйся, двоедушных устрашаяй и смиряяй; радуйся, и род сей грузинский превосходною радостию возвышаяй; Радуйся, добропобедный царю и мучениче, мужественный Луарсабе!
Предуведав немилосердие мучителя онаго шаха Аббаса, повелел еси священником принести Тело и Кровь Животворящия и, воздев руце, возопил еси к Богу: «Тебе ради умерщвляюся, Христе Боже мой, яко овча заколения, и ныне сподоби мя причаститися святых Твоих Таин»; и, причастився со страхом и благоговением, благодарение принесл еси Создателю всех: Аллилуиа.
Слышав безбожный словеса твоя премудрая, исполнися гнева зело и повеле связати ноги и руце твои и в темницу всадити, да многообразным мучением обратит тя; ты же был еси, яко адамант, и непоколебим, яко камень, и безстрашен, яко лев в жилищи своем; сего ради память твоя просвети Церковь иверскую и всех нас собра воспевати тебе:
Радуйся, прелесть агарян победою обличивый; радуйся, постом горесть и сладость страстей возненавидети научаяй; радуйся, оружием словес твоих мучителей уязвивый; радуйся, временную красоту ни во чтоже вменивый; радуйся, всех правоверных утешителю; радуйся, злославных посрамителю; радуйся, ярости мучителей всецелый погубителю; радуйся, правыя веры возвысителю; радуйся, множество страстей, яко плевелы, искоренивый; радуйся, согрешших покаянием на молитву подвизаяй; радуйся, нечестивая учения Божественным дерзновением разрушивый; радуйся, силу видимаго и невидимаго врага сокрушаяй; Радуйся, добропобедный царю и мучениче, мужественный Луарсабе!
Егда в темницу всадиша тя, благословлял еси Бога и просил еси от Него помощи, да сподобит тя достигнути и наследити свет безконечный со всеми святыми, и наипаче подражатель и Божественный ревнитель был еси нарочитаго в царех и перваго мученика, мужественнаго Арчила; сего ради память ваша купно прославляется в Церкви: Аллилуиа.
Подражанием прежде пострадавшим царем твоим ни мало не поколебался еси от бранех вражиих, но мужеством души твоея и премудростию ума твоего облекся еси в веру, яко во броню, и по учению апостол дерзновенно проповедал еси Христа Бога; сего ради радуется народ грузинский о памяти твоей и сице вопиет ти:
Радуйся, нелживое оное обетование утвердивый; радуйся, крест Христов подъявый и сарацины до основания низложивый; радуйся, любве к Богу, царю и отечеству насадителю; радуйся, дерзостию восхищенных верою укротивый; радуйся, прелесть иноплеменников дерзновенно низложивый; радуйся, от всех вин и грехов наших избавителю; радуйся, разслабленных к благонравию возбуждаяй; радуйся, лютыя беды скоро прогоняяй; радуйся, обреченных на смерть избавителю; радуйся, полк бесовский низлагаяй и всецело упраздняяй; радуйся, сном уныния одержимых ободряяй; радуйся, духовнаго мужества иверов укрепителю; Радуйся, добропобедный царю и мучениче, мужественный Луарсабе!
Видевше мучителие прекрасное и светлое лице твое, яко злато, в горниле расплавленное, удивишася зело, ибо тело твое различными муками изнуриша, и не возмогоша поколебати непоколебимыя оныя твердости твоея; сего ради подобает нам возбудитися и вси со тщанием собратися принести пение: Аллилуиа.
По вся дни глаголаху тебе учителие лжезакония: «О царю, пощади юность и красоту твою и не буди непокорив повелению шаха Аббаса, да не умертвит тя смертию горькою, но остави веру твою и уверуй в Мухаммеда»; ты же прещения беззаконных ни во чтоже вменил еси, но всякий соблазн лукавых посрамил еси и разрушил еси; сего ради радуется народ твой о прозябении твоем в нем и сице вопиет ти:
Радуйся, упование твое на Бога возложивый; радуйся, многоразличныя муки естеством тленныя плоти претерпевый; радуйся, истиною ложь разрушивый; радуйся, скорби и напасти утоляяй; радуйся, многосоставныя козни вражия разрушивый; радуйся, духов нечистых прогонителю; радуйся, славы Божия проповедниче и правды явителю; радуйся, мужеством естества твоего гордыню беззаконных низложивый; радуйся, грешником от Бога милости испрашиваяй; радуйся, мужеством врагов победителю; радуйся, воинства и полки зело милуяй; радуйся, к тебе прибегающих на пути заповедей Господних поставляяй; Радуйся, добропобедный царю и мучениче, мужественный Луарсабе!
Изгнание и узы седмь лет подъял еси, чая венцев, и, горько утесняемый и в темнице заключенный, не помышлял еси о преходящем земном попечении, но размышлял еси о мужестве и подвизе святых мучеников, о венце и мзде их, и славил еси Царя всех: Аллилуиа.
Что речем начало мужества твоего или благородства твоего, о царю святый и избранный, ибо ни честию, ни поруганием не отлучился еси от любве Христовы, но гонение вменил еси с упованием скорым соединением с Ним и, присно молитвою ограждаемь, претерпел еси подвиг мученичества; сего ради языку нашему, немощно глаголющему, даждь силу подобающия хвалы:
Радуйся, всесветлый светильниче и пастырю народа грузинскаго; радуйся, проповедниче правыя веры; радуйся, неверие умолчавый; радуйся, непреклонная стено благочестия; радуйся, на неверныя враги великий и победоносный воине Христа Бога; радуйся, сладостно носящий иго Божественное; радуйся, мечу, отсекающий плевелы прелести Мухаммедовой; радуйся, христолюбиваго воинства грузинскаго укрепителю; радуйся, седмерицею искушенный, яко злато чистое; радуйся, венец победы приобретый; радуйся, сило и славо скипетра царей; радуйся, прекрасное украшение Церкве иверския; Радуйся, добропобедный царю и мучениче, мужественный Луарсабе!
Тогда исполнися злобы диавольския беззаконный он шах Аббас и повеле удавити тя вервию; ты же, уведав совершение подвигов твоих и исход из уз плоти, паче укрепился еси и рекл еси: «Оставите мя, да помолюся Господу, и потом исполните повеленное от безбожнаго оного», и, имея икону Пресвятыя Богородицы, помолился еси пред нею: Аллилуиа.
Егда, яко пси, обыдоша тя мучителие и скрежеташа зубы своими, тогда возвел еси, святе, очи на небо и возгласил еси: «Блажен бых, аще бы сподобил мя Христос не единою и не дважды, но многажды предати себе на смерть», понеже сердце твое желаше отити и быти со Христом, и скоро текл еси по поприщу нетленнаго подвига; сего ради в церковь собираемся и приносим ти глас Божественныя хвалы:
Радуйся, светом мученичества твоего тьму отечества озаривый; радуйся, в добродетелех утверждаяй; радуйся, от мятежа и брани избавителю; радуйся, пламень страстей и лютыя недуги утоляяй; радуйся, зарею чудес уповающих на тя просвещаяй; радуйся, любве Христовы среди человек проповедниче; радуйся, молящихся за отечество и веру милуяй; радуйся, разсвирепевших богоненавистников победителю; радуйся, персов обуздавый и вспять обративый; радуйся, верою, надеждою и любовию воспрянувших благословителю; радуйся, многих к истинней вере обративый; радуйся, Божественное поприще подвигом твоим добре совершивый; Радуйся, добропобедный царю и мучениче, мужественный Луарсабе!
Приим премудро оружие мужества, безстрашно изшел еси на смерть и сице глаголал еси мучителем: «Не весте ли, яко Духом Святым глаголет пророк Давид: воистину прославися Бог в членах святых мученик?» — и воздел еси подвигом облеченныя руце твои и воздал еси славу Укрепляющему тя Богу: Аллилуиа.
«Се, время благоприятно и день угоден Господень, ибо оставляю сей временный мир и отхожду к Царю моему, Егоже желах», — с благодарением изрекл еси, и предал еси душу твою и царство Господу; тогда приидоша немилостивии и удавиша тя тетивою лука, и тако совершивше мученичество твое, умерщвлен был еси, яко овча заколения, и, яко агнец очищенный, принесен был еси на небесный жертвенник, и ныне, соединен с собором святых, ходатай еси к тебе прибегающих и с желанием поющих:
Радуйся, болезни и смерть подъявый; радуйся, небеснаго Иерусалима ради муки претерпевый; радуйся, тельче святый и непорочный, за Христа кровь излиявый; радуйся, слезы скорби грузин иссушивый; радуйся, уязвленных от невидимых стрелцев исцеляяй; радуйся, благодатию Божиею неведущих умудряяй; радуйся, плодом мужества твоего верных ободряяй; радуйся, тьму безбожия разгонявый; радуйся, беззаконием ослепленных вразумляяй; радуйся, твердою верою злых духов сокрушаяй; радуйся, к тебе прибегающия страждущия души приемлющий; радуйся, от любве к наслаждениям временным и скоропреходящим отвращаяй; Радуйся, добропобедный царю и мучениче, мужественный Луарсабе!
Егда оставиша мучителие святое тело твое, тако видимо бысть от всех, яко свет пресветлый, и видящии сие обращахуся к вере во Господа нашего Иисуса Христа, прикасающиися же от всякаго недуга и немощи исцелевахуся и, знаменьми дивными мужественни бывше, духом укрепляхуся и Всесильному Богу громогласно пояху: Аллилуиа.
Якоже рече Спас наш Иисус Христос во святем Евангелии: «Пастырь добрый душу свою полагает за овцы», тако и ты не был еси наемник, еже оставити овцы твоя и бежати, но положил еси себе за землю и от опустошения избавил еси народ твой, ибо аще бы токмо ты избежал от рук их, тогда растленны и опустошенны быша святыни и места Картлийская; сего ради достойно тебе рещи «Радуйся» победное:
Радуйся, добрых добродетелей насадителю; радуйся, Божественныя заповеди в сердце твоем запечатлевый; радуйся, премудростию духа лютыя муки мужественно претерпевый; радуйся, свеще, мудрых просвещающая и безумных попаляющая; радуйся, от уз грехов наших избавителю; радуйся, душетлителей низложителю; радуйся, гордых смиряяй; радуйся, смиренных сердцем возвышаяй; радуйся, нищих предстателю и милостивче; радуйся, алчущих питателю и нагих одеятелю; радуйся, чтущих тя скорый помощниче и предстателю; радуйся, печали наша на радость претворяяй; Радуйся, добропобедный царю и мучениче, мужественный Луарсабе!
Якоже утолил еси лютыя беды, от персов на народ твой воздвигнутыя, тако и нас, с благочестием к тебе прибегающих, примири благому Богу, да ниспослет силу, мужество, премудрость и победу на вся враги и утеснители грузин, кровию Христовою искупленных, прославляющих память твою и с желанием поющих: Аллилуиа.
Иже в юности наслаждения и сладости мира, во ад низводящия и суетныя, ни во чтоже вменил еси и терпением мук многоухищренное коварство врага низложил еси, ныне от соблазна вражия освободи хвалящих тя и от всякаго искушения и зла избави нас, да, тишины достигше, присно поем тебе, славне, и непрестанно ублажаем тя:
Радуйся, кровию твоею правую веру возвеличивый; радуйся, народ твой Божественным светом просветивый; радуйся, Божественным подвигом твоим безплотныя чины удививый; радуйся, от всякия страсти и языка лукаваго избавителю; радуйся, недуги многоразличныя и немощи прогоняяй; радуйся, к молящимся милостиво приклоняяйся и уповающих на тя ободряяй; радуйся, омраченный ум наш просветивый; радуйся, росою Божественною верных прохлаждаяй; радуйся, оскверненный ум наш возставляяй; радуйся, вместо преходящаго царства непреходящий свет приемый; радуйся, со святыми Царство наследовавый и о спасении нашем пекийся; радуйся, яко память твою в наслаждение нам оставил еси; Радуйся, добропобедный царю и мучениче, мужественный Луарсабе!
Якоже изменил еси венец царства и порфиру багряную на сияние непреходящаго царства, тако подражанием тебе князи и воини, неродовитии и простии принесоша себе с радостию Христу Богу, Иже дарова таковаго царя и попечителя уделу Матере Своея, народу нашему, сице поющему: Аллилуиа.
Аще и смерть вина есть забвения, но ни изменение лет, ни обстояния времен не возмогоша забвению предати подвиги твоя, духом мужественне; но скорбим, яко ныне лежат святыя мощи твоя тамо, в крепости Ширазской, и радуемся, яко вечную наследил еси славу, и непрестанно молим Бога, да даруются нам мощи твоя во исцеление язв наших, да вси, с верою прибегающии, покланяемся блаженней раце твоей и достойно украшаем похвалами память твою:
Радуйся, похвало великая рода Багратидов, емуже вверися престол Давидов и скипетр Соломонь; радуйся, пастырю добрый и бодрый, иже кровию твоею сохранил еси паству твою; радуйся, стено непоколебимая верных таргамосиан, иже дом царей грузинских украсил еси кровию мученичества; радуйся, красный добротою и сиянием мученичества, яко престол царства твоего честным сотворил еси страданием твоим; радуйся, противящихся Христу борче, яко обезумил еси и в неистовство вменил еси многоухищреннаго онаго велиара; радуйся, благими делы просвещенный, яко вместо честнаго венца возложися тебе седмерицею неувядаемый венец небесный; радуйся, светило земли и веры, иже озарил еси нощь персидских прелестей; радуйся, подвижниче и храбрый, яко сиянию царства соединил еси венец победы; радуйся, всесветлый поборниче истины, яко сугубым венцем, яко непобедимый мученик, прославился еси, и яко воин Христов; радуйся, венче Церкве, яко светлее злата явился еси в горниле мученичества; радуйся, на небеси и на земли прославленный, яко блистание подвига твоего и сияние мужества озаряют сердца мучениколюбцев; радуйся, славо мучеников и сияние царей, яко мужество твое светлее злата просвещает имя царей и ободряет грузин; Радуйся, добропобедный царю и мучениче, мужественный Луарсабе!
О благолепием пресветлый царю и мучениче, мужественный Луарсабе! Прости недостойному сему и приими малое сие и худое пение, и, яко имеяй дерзновение велие, испроси ми у Христа Бога оставление грехов и милость, да умудренным умом сложим тебе явственное пение и принесем тебе: Аллилуиа.
Сей кондак рцы трижды, потом:
О всенеизреченная любовь твоя ко Христу, храбрый воине Божий, ибо вместо царства поругание, вместо престолов гонение и вместо венца биение приял еси и прелесть персидскую крепко посрамил еси; сего ради, совершающии всесветлую память твою, с верою и желанием вопием ти:
Радуйся, всесветлая похвало веры; радуйся, обителе истиннаго подвига; радуйся, разумный адаманте терпения; радуйся, громе Божественнаго проповедания; радуйся, твердою верою мучителей нечестие обличивый; радуйся, щите, хранящий благочестие; радуйся, мечу, отсекающий злочестие; радуйся, лозо винограда Христова, плод мученичества принесшая; радуйся, цвете прекрасный светлаго вертограда Давидова; радуйся, поборниче и ходатаю воинства грузинскаго; радуйся, неплененная врата Церкве иверския; радуйся, славо и крепосте отечества нашего; Радуйся, добропобедный царю и мучениче, мужественный Луарсабе!
Венцем царства и мученичества украшеннаго, мужественнаго Луарсаба, непобедимым подвигом пресветлаго, похвалами украшаем, к тебе прибегающии, и молим святыню твою: приими недостойное сие пение наше, славне, и не лиши нас помощи твоея, но ходатайство о нас принеси ко Избавителю и оставление грехов испроси с верою восхваляющим тя: Радуйся, добропобедный царю и мучениче, мужественный Луарсабе!
О всеславный, святый мучениче Христов, мужественно претерпевый, воине преименитый, во бранех непобедимый и в скорбех непостыдный, молящих тя скорый помощниче и милости подателю, богувенчанный царю Луарсабе!
О светлое и великое украшение мучеников и преславный царю грузинский, святый Луарсабе! Помяни нас пред Богом, Егоже ради любве кровь пролиял еси, славне, и сиянием святыни твоея угаси тайну беззакония, на возлюбленный народ наш воздвигнутую, и покрый нас от сонмища еретиков, еже есть «мерзость запустения»; даруй нам победу на ня и утверждение Православия от Христа Бога, веру же нашу ко Христу паки обнови и даруй нам неоскудную любовь к Богу, царю и отечеству, и возставь нам рог помазания, да не уподобимся скотом несмысленным, подобно идолослужителем оным и иным таковым неразумным, яко волею отступившим и забывшим жизнь вечную. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан.
О преславный, мужественный, именитый венценосче, храбрый Луарсабе! Милостию, подобною Иисусу Богу, ходатайствуй пред Ним, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Автор-составитель: Тинатин Мчедлишвили
