Акафистное пение святой благоверной царице Тамаре
Добродетелей улей собравшая и горнею порфирою и венцем украшенная, юже непрестанным пением воспевают христиане, яко всех верных учительница, исправи и наше сие косноязычие, да, ходатайства твоего требующии, приносим тебе сию похвалу: Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Стражу прекрасная, яже Божиею многою помощию выи беззаконных сокрушила еси, тебе, от Бога дарованному свету невечернему, сице величаем:
Радуйся, царице преславная; радуйся, невесто небесная доброзрачная; радуйся, наслаждения века сего победительнице; радуйся, Божественною благодатию осоленная; радуйся, лишенных Божия покрова сокрушительнице; радуйся, царю, от Бога победу приемшая; радуйся, требующих тебе надеждо; радуйся, души нашея процветание; радуйся, милости Божия стяжательнице; радуйся, молитвою украшенная; радуйся, яко посети Бог достояние Свое; радуйся, яко спасе Господь люди Своя; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Словом Божиим наученная и учением Божественным добре насажденная, благоуханием подвига твоего к небесем возносими, поем тебе: Аллилуиа.
Богоугоднаго царствия совершенство, яже чаянию нашему, исполненному надежды, возсияла еси, тебе, Богородице вручившейся царице, сице поем:
Радуйся, горняго царствия вожделевшая; радуйся, древо, при исходищах вод Царствия насажденное; радуйся, богопознанием поживая; радуйся, христианства утвердительнице; радуйся, злых семен истребительнице; радуйся, оком ума вся испытующая; радуйся, Ангелом подражательнице; радуйся, добрым делом просиявшая; радуйся, Духа Святаго исполненная; радуйся, светом Божиим украшенная; радуйся, духовнаго жития утешение; радуйся, праздничная стихиро доброгласная; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
На царском престоле возседшая, радости народа твоего заре, от хвалящих тя простираются пения венценосцев: Аллилуиа.
Богодарованнаго царства твоего неусыпная хранительнице мужественная, тебе, постом и молитвою окриленней и богоукрашенным смирением вознесенней, мы, непрестанно святых Божиих восхваляющии, сице глаголем:
Радуйся, богодухновенных словес добрая повествовательнице; радуйся, Сокрушившаго затворы смерти ученице; радуйся, царских законов установительнице; радуйся, от богоносных учителей наученная; радуйся, души наша на небо возводящая; радуйся, трудов святых царей собирательнице; радуйся, всякия нечистоты узде; радуйся, всякия добродетели цветение; радуйся, ныне хвалящих тя благословляющая; радуйся, храме несокрушимый; радуйся, еяже плод Бог умножи; радуйся, яже вся добре утвердила еси; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Церкве столпе непоколебимый, тебе, блаженным оным женам-мироносицам подражательнице и уподобившейся, вси чини христианстии воспевают: Аллилуиа.
Всечестных храмов обогатительнице и разрушенных святилищ возобновительнице, царицу, с Херувимы и Серафимы сопевающую, сице величаем:
Радуйся, церквей обогатительнице; радуйся, любви Божией пригвожденная; радуйся, святых храмов благодетельнице; радуйся, царскою щедротою монастырем плоды приносящая; радуйся, в зное века сего место, рудами богатое; радуйся, моления наша благоприемлющая; радуйся, Христова жезла держательнице; радуйся, помышлений наших очистительнице; радуйся, делательнице неутомимая; радуйся, победоносия провозвестнице; радуйся, яко Господь о тебе печется; радуйся, яко лицу твоему молятся князи людстии; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Беззаконных истребительнице крепкая, яже надменных оных мусульман посрамила еси, мы, Божию победу празднующии, поем тебе: Аллилуиа.
Разумы наша напаяющая, словесным твоим течением напоени и оживотворени, возглашаем к тебе сице:
Радуйся, разсвирепевших магометан победительнице; радуйся, стено непоборимая; радуйся, врата несокрушимая; радуйся, обителе пресветлая; радуйся, земле благословенная; радуйся, яже сопротивныя силы посрамила еси; радуйся, еюже Велиар уязвлен бысть; радуйся, наставнице богомудрая; радуйся, богословице дивная; радуйся, спасительнаго закона глашение; радуйся, души нашея бодрствование; радуйся, благостию совершенная; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Духа Святаго храме дивный, яже ныне на небесех Божественным пением глаголеши, славословим тя: Аллилуиа.
Худородных облагородительнице, юже, умом негордым к Богу восходящую, не возможе украсти мир, тебе, со Христом сраспятия рачительнице, сице поем:
Радуйся, богоугодным плачем украшенная; радуйся, дивных побед совершительнице; радуйся, духовнаго изощреннаго меча держательнице; радуйся, мечем оным страшным безплодие отсекающая; радуйся, плодоносная насаждения оживотворяющая; радуйся, сердцем очищенная; радуйся, умом просвещенная; радуйся, Божественным словом обогащенная; радуйся, сокровище неизреченное; радуйся, пище души нашея благословенная; радуйся, питие спасительное; радуйся, яже Божиею помощию ненавидящих Сиона посрамила еси; радуйся, от благочестивых величаемая; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Двоедушных наказательнице и сподвижников твоих милостивице, щедраго твоего суда хвалящии, поклоняемся тебе сице: Аллилуиа.
Велиару жертвующих истребительнице и неистовых умышлений их опустошительнице, яже в душах наших Божественнаго упования насаждения произрастила еси, тебе, Божественным умом на небеса вознесенней, сице величаем:
Радуйся, молитвы и бдения умножившая; радуйся, надежды противников угасившая; радуйся, над народом твоим богоукрашенными слезами облиянная; радуйся, ближних возставляющая; радуйся, врага неистоваго низлагающая; радуйся, рабов твоих надеждо; радуйся, солнце крове Давидовы; радуйся, в пределы Царствия достигшая; радуйся, в умах наших напечатленная; радуйся, на сердцах сих наших написанная; радуйся, яже Господа усладила еси; радуйся, юже хвалящии воспеваем; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Благочестивым в радость возсиявшая и духовный свет на ны нескудно простирающая, тебе, от человеческих видений отрешенной и Божественнаго света зрительнице, взываем: Аллилуиа.
Иноков Божественный покрове и от преславных иереев присно хвалимая, царице, из камене церкви и из сердец наших блаженство изсекающей, сице глаголем:
Радуйся, храмов и подворий украсительнице; радуйся, во Иерусалиме честнаго монастыря создательнице; радуйся, церквей сокровищницы исполняющая; радуйся, келлий иноческих безмолвие; радуйся, Богородицы Вардзийския рабо Божественная; радуйся, смирением и коленопреклонением вознесенная; радуйся, церковнаго Типикона сведущая; радуйся, с Божественным разумом непрестанно молящаяся; радуйся, Животворящаго Креста держательнице; радуйся, от младенчества твоего царским елеем помазанная; радуйся, яко двенадесять иереев в сотканное руками твоими облекоша; радуйся, яко тебе, венценосней, оды поют; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Скверны века сего неприкосновенная, яже мир сей неуклонно прешла еси, тебе, Царствия искательнице и непрестанным оным исканием запечатленней стражнице, поем: Аллилуиа.
По Христову спасительному чину поживая, яже оскудевшия сосуды нищих богоугодною милостию исполнила еси, тебе, добродетельми украшенному престолу прекрасному, сице величаем:
Радуйся, сирот и вдовиц питательнице; радуйся, богонаученных источников водных ученице; радуйся, образу пчелы уподобившаяся; радуйся, благотворением спасительным украшенная; радуйся, богоугоднаго подвига учительнице; радуйся, учителей образе светозарный; радуйся, блаженнаго онаго невечерняго жития стяжательнице; радуйся, умы наша к Богу возводящая; радуйся, повсядневно на делание бодрствующая; радуйся, яже первообразному образу подражала еси; радуйся, юже добродетели провозвещают; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Силою праведных усопшая и во Царствии очи отверзшая, певице Божия, окрилилася еси и тамо: Аллилуиа.
Со святыми цари собеседнице, добродетели твоя восхвалити подвигшеся, тебе, к Божию неиссякаемому источнику взывающей, возглашаем сице:
Радуйся, от волн века сего мирно избавленная; радуйся, благоухание, ныне к небесем возкуренное; радуйся, со Ангелы собеседнице; радуйся, в вертоград Божий внидшая; радуйся, моления наша благоприемлющая; радуйся, плотскаго наслаждения возненавидевшая; радуйся, хлебом духовным воспитанная; радуйся, трапезы Господни сотрапезнице; радуйся, изволения наша утверждающая; радуйся, разсеянный разум наш собирающая; радуйся, юже младенцы похвалами украшают; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Добраго делания образе высокий, юже многотысящнии требующии Бога о Божией помощи умоляют, тебе, со Ангелы ликовствующей, пение сие приносим: Аллилуиа.
Светом богопознания поживая, яже от дел твоих познаваешися, тебе, повсядневно подвигом благодати украшенной христианке, хвалим сице:
Радуйся, пресущественнаго света рачительнице; радуйся, невечерняго наслаждения праздновательнице; радуйся, ныне на небесех веселящаяся; радуйся, покрове матерний; радуйся, воздыхания наша разрешающая; радуйся, к Богу стремящияся умы питающая; радуйся, странноприимнице христиан; радуйся, любви Божественныя учительнице; радуйся, свеще пламенеющая; радуйся, светильниче неугасимый; радуйся, яко видением тебе христиане облекошася в правду; радуйся, яко на дом твой милость Божия прииде; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
Уме негордый, тебе, доброзрачней невесте Царствия и в радость Божию внидшей, псалмопевцы радости оныя неоскудныя взываем: Аллилуиа.
Искупивый нас честною Своею кровию и на Кресте грехи наша пригвоздивый, Той да настроит и органы наша пети сице:
Радуйся, неистоваго Велиара сокрушительнице; радуйся, возлюбленнаго народа твоего прославительнице; радуйся, храмы возсиявшая; радуйся, козни мусульман разрушившая; радуйся, мечу Мессиин отсекающий; радуйся, царице златописанная; радуйся, сокровище неокрадомое; радуйся, надеждо неразрушимая; радуйся, дивное течение твое добре совершившая; радуйся, престола Божия достигшая; радуйся, еяже преставление оплакаша христиане; радуйся, еяже подвигом вси удивляются; Радуйся, духовныя красоты неувядаемое цветение и богоугодным царствованием твоим вознесенная высото преславная, святая царице Тамаро!
О Божественным светом озаренная, святая царице Тамаро, моли Милостиваго Бога, да, от дивных грехов разрешени и невечерней славы достигше, и мы с тобою поем Господу: Аллилуиа.
(Сей кондак чтется трижды, затем икос 1 и кондак 1.)
О на земли царскою порфирою прославленная и ныне на небесех со Ангелы сопрестольная, святая царице Тамаро, скоропомощною молитвою твоею просвети богохранимый народ наш и власть его. Укрепи в служении и подвизе Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов, честных иереев, во Христе диаконов, весь монашеский чин и всех православных христиан.
О дивный образе благочестия, святая царице Тамаро, ходатайствуй о нас пред Богом, да, покаяние положити желающе и Божественными желаньми подвигнуты, и явныя плоды покаяния приносяще, и мы с тобою поем Богу, Начальнику спасения нашего, Егоже есть Царство, и сила, и слава, Отца и Сына и Святаго Духа, ныне и присно и во веки веков. Аминь.
