Акафист иконе Богородицы Иверии, именуемой «Грузинская»
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Избранная от всех родов Мати Божия и Царице неба и земли, мы, сподобившиися видети сию светлую икону твою, с верою поем тебе и украшаем тя похвалами Божественными; но, яко веси немощь естества нашего, приими моление наше и избави нас от всякия скорби и сети вражия, да поем тебе, Благословенная: Радуйся, Невесто Неневестная.
Лики Архангелов и Ангелов славословят тя, Дево Мати Божия, и соборы небесных сил немолчно величают и воспевают тя, яко Матерь Царя небеснаго воинства; мы же с верою лобызаем дивную икону твою, Пречистая, и по силе нашей сплетаем тебе пение:
Радуйся, во Святая Святых воспитанная, Невесто Отча и Духа Святаго обитель; радуйся, Слова Божия святое жилище; радуйся, православных крепкое оружие; радуйся, славы Божия духовный храме; радуйся, дев Предводительнице; радуйся, во чреве твоем безсмертнаго Бога вместившая; радуйся, граде Божий славный, на горе созданный; радуйся, ковчеже Ветхаго и Новаго Завета, в царствующем граде водворенный; радуйся, пророками Материю Божиею предвозвещенная; радуйся, лествице, Бога на землю низведшая; радуйся, мосте, человеки в горний мир возводящий; радуйся, Заступнице христиан, от Господа дарованная; Радуйся, Невесто Неневестная.
Когда несогласие грузин сделало дерзким шаха Аббаса, он в ярости вторгся в отечество наше, опустошил Кахетию, пленил, сжег и обогатился добычею; тогда похитили и одну икону Пречистой Матери, Девы Марии, и унесли в Персию; но когда поведали о благолепии иконы Стефану, жителю России, пребывавшему в Исфагане, он свыше помощию выкупил ее и воздал благодарение и славу Господу: Аллилуиа.
О слава чудес твоих, Богородице! Ибо во сне явилась ты любящему тебя Георгию, жителю Ярославля, и возвестила ему, что икону твою обретет у приказчика его, и рекла: «Хочу, чтобы тобою со славою препровождена была икона сия Моя в Черногорскую обитель»; богоугодник же, желая уразуметь таинство сего непостижимаго явления, возвестил о видении Патриарху и гласом благодарения приносил тебе хвалу:
Радуйся, пречистым рождеством человеческое естество обожившая; радуйся, сном лености одержимых укрепляющая; радуйся, прославлением чудес твоих умы верных умудряющая; радуйся, безплодную и неподвижную веру нашу оживляющая; радуйся, благодатию Божественною верных просвещающая; радуйся, растленное естество человеческое обновляющая; радуйся, слабую и колеблемую волю укрепляющая; радуйся, скорбящия души скоро озаряющая; радуйся, глубоко уснувшую и умолкшую совесть нашу пробуждающая; радуйся, недуги многоразличныя и немощи прогоняющая; радуйся, оскверненных и многогрешных душ Очистительнице; радуйся, от всякаго зла и от всякия козни диавольския избавляющая; Радуйся, Невесто Неневестная.
Когда победоносная икона твоя по благоволению твоему прибыла в пределы Архангельские, архиереи и народы со священниками встретили ее литиею и, ища от тебе защиты и милости, с верою поклонялись святой иконе твоей, Пречистая, и светлым гласом паче величали и благодарили Сына твоего и Царя Христа: Аллилуиа.
Подобно звезде, Богом путеводимой, прибыла икона твоя, из Иверии плененная, в пределы Двинские и дарована была Черногорской обители в залог милости и спасения; соборы же отцев и паствы их, с твердою надеждою ожидавшие честнейшаго сокровища, с радостию встретили его, Владычице, и превыше всех страстей бывали, с поклонением и пением пред пресветлою иконою твоею:
Радуйся, иконою, подвигом славных предков наших возделанною, северную страну просветившая; радуйся, безчисленными и дивными чудесами Черногорскую обитель прославившая; радуйся, иноков в подвигах укрепляющая; радуйся, иконе твоей новое жилище даровавшая; радуйся, любви к ближнему и благонравию научающая; радуйся, желающих спасения души Поборнице и Покровительнице; радуйся, общежительныя монастыри Божественным покровом покрывающая; радуйся, гладом утесненных дивно питающая; радуйся, в пустынях, горах и келиях живущих неусыпная и непобедимая Хранительнице; радуйся, молитвы, в келиях возносимыя, скоро услышающая; радуйся, непорочно живущих и богоугодно пребывающих любящая; радуйся, монашеское житие благословляющая; Радуйся, Невесто Неневестная.
Как ты — бездна исцелений и источник безконечных благ, так и икона твоя имела силу и благодать исцеления от Сына твоего; и когда явила ты скорую помощь твою подвизающимся в обители и притекающим туда на молитву, с того времени приняла дивную икону твою, именуемую Грузинскою, святая Церковь Российская и, ежегодно совершая день явления иконы твоея, подобающим богослужением приносила Господу сей глас Божественныя хвалы: Аллилуиа.
Сомнительными помыслами смутился старец Питирим, когда увидел сияние света, и помыслил, что это бесовское прельщение, ибо был он глух и слеп; тогда знамением честнаго креста оградил себя и, абие увидев чудотворную икону твою, Богородице, скоро уразумел, что отверзлись очи и уши его, и с трепетом поклонился тебе и изрек:
Радуйся, клятвы прародителей и рукописания грехов Изгладительнице; радуйся, к тебе прибегающих миром и любовию исполняющая; радуйся, Материнскую сладость присно источающая; радуйся, усердно молящимся тебе неоскудныя исцеления прозябающая; радуйся, оставленных врачами больных от одра возставляющая; радуйся, всех отчаянных надеждо и падших Возставительнице; радуйся, согрешивших покаянием к молитве подвигающая; радуйся, суетныя стремления обуздывающая; радуйся, злые и вредные обычаи отсекающая; радуйся, благие помыслы исполняющая; радуйся, и сей народ грузинский превеликою радостию возвышающая; радуйся, скорбь в радость претворяющая; Радуйся, Невесто Неневестная.
Услышав благоверный Государь всея России, что чудотворная икона твоя источает различныя исцеления, повелел носить ее из града во град и из веси в весь, да с верою молящиися получают исцеление душ и телес своих и с любовию прославляют рожденнаго от тебе Христа, Царя и Бога: Аллилуиа.
Когда в граде Москве свирепствовала черная язва и мор, чудотворную икону твою, Богородице, поставили во храме Триипостасныя Троицы, и избавился град оный тобою от бед и скорбей; тогда кремлевские иконописцы списали лик иконы твоея и умножили дары благодати, а ты и от них источала чудеса и паче солнца озаряла дары помощи твоея приступающих к ним и с любовию поющих:
Радуйся, огневицею одержимых воставляющая; радуйся, творящим волю твою двери Царствия Христова отверзающая; радуйся, благодати церковныя лишенных оживляющая; радуйся, от нечистых духов страждущих исцеляющая; радуйся, мглою неведения покрытых просвещающая; радуйся, полк бесовский низлагающая и всецело упраздняющая; радуйся, от смятения и брани избавляющая; радуйся, сети вражия обличающая; радуйся, Материнским ходатайством многих от погибели избавляющая; радуйся, неопытных и юных отроков от страстных похотей покрывающая; радуйся, от сетей сатаны и от нашествия иноплеменных хранящая; радуйся, добрыя добродетели насаждающая; Радуйся, Невесто Неневестная.
Тогда возсияла слава Божия от иконы твоея, Пречистая, ибо утесненные скорбьми и напастьми притекали к ней с теплою надеждою на помощь твою и, восхваляя множество благодатей и знамений твоих и высоту милости твоея, приносили славу Сыну твоему: Аллилуиа.
Видев серебряника Гавриила, непрестанно молящагося пред иконою твоею, ты умилосердилась над лежащим на одре болящим сыном его и абие исцелила его от язвы; тогда поклонились тебе, благословенная Мати и Дево, предстоящие окрест иконы твоея, с ними же и мы, верою соединенные, взываем к тебе, как к скорой Помощнице нашей и Заступнице:
Радуйся, с любовию и усердием приносимую тебе молитву милостиво приемлющая; радуйся, неверных человеков к вере приводящая; радуйся, Божественной ревности и благоговению научающая; радуйся, всех честных супругов благословляющая; радуйся, убогих Заступнице и Милостивице; радуйся, тьму богоборчества упраздняющая; радуйся, вверившихся тебе от темниц и уз освобождающая; радуйся, от волн морских невредимо избавляющая; радуйся, тяжко уязвленных исцеляющая; радуйся, скорбящих о чадах матерей Утешительнице; радуйся, отроков от всякия скверны и порока избавляющая; радуйся, их во всякое благо и богоугодное облекающая; Радуйся, Невесто Неневестная.
Желанием святыя иконы твоея разгорелся епископ Казанский и, повелев написать список ее, с великою честию препроводил в Раифскую обитель, тем благословив новосозданное в пустыни жилище иноков, и непрестанно просил тебя, Богородице, даровать обители той мир, паствам ее милость и очищение, тепле поющим Богу: Аллилуиа.
Как древле пришедшая из Иверии в Россию чудотворная икона твоя творила преславныя чудеса, так и иные списки иконы обильно источали предивныя исцеления и исполняли благия прошения; видевшие же благодать, от святых икон твоих прозябающую, приносили тебе хвалу:
Радуйся, источниче, всем воду жизни источающий; радуйся, Божественную любовь изливающая; радуйся, унывающих и скорбящих веселящая; радуйся, тьму греха и неведения озаряющая; радуйся, одержимых греховною скверною омывающая; радуйся, к молящимся милостиво приклоняющаяся и уповающих на тя ободряющая; радуйся, обреченных на смерть избавляющая; радуйся, лютыя беды скоро отгоняющая; радуйся, пламень страстей и лютые недуги угашающая; радуйся, дев непорочных неусыпная Хранительнице и Покровительнице; радуйся, от злаго безстрашия избавляющая; радуйся, душегубцев низлагающая; Радуйся, Невесто Неневестная.
Когда услышали грузины, что сугубыя чудеса над чудесами совершаются от Грузинской иконы, все вместе исполнились Божественной ревности и благословением честных иереев выписали списки отеческой иконы, да будет она Помощницею и Заступницею всем в скорбях сущим, и да научатся жители земли нашея во время искушения припадать к ней и воспевать Единороднаго Сына твоего: Аллилуиа.
Как даровала ты святую икону твою Российской Церкви в светлое украшение и в память святыни твоея, так и ныне укрась святую и апостольскую Церковь Грузинскую и таковыя благословения и благодати Материнскаго твоего милосердия даруй новонаписанным иконам твоим, да всякий притекающий к ним черплет неоскудно истекающие Божественные потоки и получает по вере прошение, почитающий икону твою возжжением свечи и приносящий тебе благодарственную хвалу:
Радуйся, зрением святыя иконы твоея всех нас услаждающая; радуйся, в сердцах наших упование и Божественную любовь насаждающая; радуйся, жаждущия души источником нетления и радости напаяющая; радуйся, необузданных и объядающихся укрощающая; радуйся, от сетей диавольских, от соблазна мира и насилия плоти избавляющая; радуйся, от разсвирепевших сынов Агариных хранящая; радуйся, Христоименитых воинств Покровительнице; радуйся, за веру и отечество трудящихся милующая; радуйся, рог неверных сокрушающая и лукавых и нерадивых посрамляющая; радуйся, раздор и вражду между единоверными любовию и миром заменяющая; радуйся, последующих добрым делам любящая; радуйся, злославных дерзость и коварство сокрушающая; Радуйся, Невесто Неневестная.
Как избавила ты, Пречистая, от всякия скорби и нападения вверенное иконе твоей стадо Российское, так и ныне насади в сердцах князей и правителей их любовь к народу, тебе в жребий данному, да мы, искупленные плотию и кровию Сына твоего и Бога нашего, в любви и мире спасаемся и трисвятым пением славим Святую Троицу: Аллилуиа.
Как хвалится земля Российская, лоно иконы твоея, так и ныне радуется народ наш, приемлющий подобие ея, ибо исцеление и благодать истинную и милость неоскудно источает новонаписанная икона твоя, яко источник неисчерпаемый; и се, достойно и праведно ублажаем тя, Дево Мати Божия, православно покланяющиися и с любовию тако поющии:
Радуйся, двере небесная и врата жизни; радуйся, жезле Ааронов святый, корене Иессеов; радуйся, невидимая Покровительнице чистоты и невинности; радуйся, источниче милости и море человеколюбия; радуйся, клеще Господняго угля; радуйся, стамно златая, Божественную манну носящая; радуйся, дискосе, Агнца Божия носящий; радуйся, сокровище честное безценнаго бисера; радуйся, звездо сияющая, день невечерний возвещающая; радуйся, облаче света, Солнце правды возсиявающее; радуйся, едина Мати Царя жизни и Победителя смерти; радуйся, естество человеческое украшающая; Радуйся, Невесто Неневестная.
Се, скорбящим свет и болящим Врач дарован нам, и икона сия животворящая возсияла жребию твоему паче света солнечнаго; сподобльшиися зреть ее лицем к лицу, окриляем очи души, возвышаем ум наш к первообразу твоему и чтим подобие твое и образ, Богородице, и Господу единогласно вопием: Аллилуиа.
Как древле светло радовался народ наш и чтил икону твою, так и ныне лобызаем, Пречистая, милующую нас благодатию и милостию, и черплем благодать исцелений, и освобождаемся от немощей душевных и телесных, ибо бывает она, яко источник безсмертия, для болящих и немощных и Подательницею милостей поющим тебе:
Радуйся, святейшая Херувим и Серафим и превысшая всех тварей; радуйся, завесо между Богом и человеки; радуйся, багрянице, Покровительнице верных и Милостивице монашествующих; радуйся, стено и упование благоговейных иереев; радуйся, сладкое упокоение труждающихся и обремененных; радуйся, надеждо отчаянных и тихое пристанище обуреваемых волнами житейскими; радуйся, неплодных и бездетных чадородием одаряющая; радуйся, невидимая Воспитательнице сирот и Питательнице вдовиц; радуйся, добродетельных супругов Украсительнице и Помощнице; радуйся, уязвленных грехом Приемлющая и врата спасаемых; радуйся, венче сияющий благочестивых царей; радуйся, скипетре православных государей; Радуйся, Невесто Неневестная.
По всей земле сияет свет святых и честных икон твоих, Грузинскими именуемых, ибо честь и слава образа, по словеси святаго Василия, на первообразное восходит; ныне же приими хвалу нашу, чтущих славное изображение всесвятаго лица твоего, Богородице, и покрый народ, Христа прославляющий: Аллилуиа.
Се, ныне соберемся вси вернии, единую святую и Пречистую Богородицею исповедующии, и изыдем в сретение благословенному изображению Святыя Марии, и облобызаем его со трепетом устнами и очами, да почерпнем из бездны благодатей и даров обильное исцеление и, якоже подобает Матери Божией и Царице верных, по силе нашей принесем пение:
Радуйся, жизни Предводительнице, благословения Подательнице; радуйся, по естеству многомилостиваго Бога на нас умилостивляющая; радуйся, разсеянным по земле грузинам утешение и спасение дарующая; радуйся, поклонению святым иконам научающая; радуйся, продолжающих подвиг предков благословляющая; радуйся, собирающих неправедную корысть и сребролюбию порабощенных обличающая; радуйся, всякую истину и правду ненавидящих посрамляющая; радуйся, людей к служению отечеству и ко благочинию приводящая; радуйся, неверных и развращенных человеков обращающая; радуйся, по-зверски разсвирепевших человеков укрощающая; радуйся, умысел возставших на нас безумных человек упраздняющая; радуйся, на Грузию руку поднимающих устрашающая и смиряющая; Радуйся, Невесто Неневестная.
Обещавшая быти с нами во веки, исполни сие, яко Мати Бога Благоутробнаго, и не посрами нас по делам нашим, но избави нас от всех скорбей и во время суда избави нас от вечных оных горьких мук, да, тобою путеводимии, достигнем горняго Иерусалима и сподобимся со всеми святыми славити Животворящую Троицу: Аллилуиа.
Благословенная в женах Марие, покрый покровом благодати твоея присно припадающих к Материнской благодати и помощи твоей и живущих в уделе твоем, да не рекут язычницы: где есть Богородица, на Нюже уповают? И отжени от нас врагов истины и сынов погибели, на нас возставших, и избави нас, Нетленная, от всякия скорби и напасти, с любовию поющих:
Радуйся, красото Иаковля, юже возлюби Бог; радуйся, Невесто неискусобрачная, Сына Божия неизреченно зачавшая; радуйся, предвозвещенная Мати Творца и Царице тварей, всех Жизнь и Спасителя млеком вскормившая; радуйся, едина Мати Сокрушителя ада, земныя с небесными безплотными соединившая; радуйся, одесную Царя предстоящая, ибо ты стена и чистота неописанная; радуйся, дщи Давида царя и пророка, ибо ублажают тя небесныя и земныя; радуйся, земле святая, без семене пшеницу, Божественное питание наше, прозябшая; радуйся, купино духовная, юже не опали огнь Божественный; радуйся, горо святая и тучная, от неяже отсечеся камень без руки; радуйся, розо богокрасная, ибо благоуханием девства облагоухала еси концы небес и исполнила еси светом; радуйся, сокровище благодатей и даров Божественных, ибо к тебе прибегаем и во благоденствии, и в тесноте жизни; радуйся, победоносная Скоропослушнице наша, ибо тобою побеждаем врага и спасаемся ходатайством твоим; Радуйся, Невесто Неневестная.
О Преславная Царице, Богородице Марие, скорбьми, печальми и напастьми утесненнии, к тебе прибегаем и тепле молим тя: приими, яко сладчайшая, сие худое пение, еже тебе со благоговением приносим, и испроси нам у Рожденнаго от тебе благодать, благословение и милость, да внидем в радость Божественную и в славу святых, Богу непрестанно поюще: Аллилуиа.
Сей кондак трижды, затем
Избранная от всех родов Мати Божия и Царице неба и земли, мы, сподобившиися видети сию светлую икону твою, с верою поем тебе и украшаем тя похвалами Божественными; но, яко веси немощь естества нашего, приими моление наше и избави нас от всякия скорби и сети вражия, да поем тебе, Благословенная: Радуйся, Невесто Неневестная.
Лики Архангелов и Ангелов славословят тя, Дево Мати Божия, и соборы небесных сил немолчно величают и воспевают тя, яко Матерь Царя небеснаго воинства; мы же с верою лобызаем дивную икону твою, Пречистая, и по силе нашей сплетаем тебе пение:
Радуйся, во Святая Святых воспитанная, Невесто Отча и Духа Святаго обитель; радуйся, Слова Божия святое жилище; радуйся, православных крепкое оружие; радуйся, славы Божия духовный храме; радуйся, дев Предводительнице; радуйся, во чреве твоем безсмертнаго Бога вместившая; радуйся, граде Божий славный, на горе созданный; радуйся, ковчеже Ветхаго и Новаго Завета, в царствующем граде водворенный; радуйся, пророками Материю Божиею предвозвещенная; радуйся, лествице, Бога на землю низведшая; радуйся, мосте, человеки в горний мир возводящий; радуйся, Заступнице христиан, от Господа дарованная; Радуйся, Невесто Неневестная.
О Всемилостивая Владычице, Дево Богородице, Бога плотию родшая, исполни всякое прошение с верою молящихся тебе: Церковь просвети, священство святостию украси, царство благочестием возвыси, власть боголюбием просвети, воинство мужеством укрепи, скорбящих мучение облегчи, немощным здравие даруй, уязвленным и расслабленным исцеление подаждь, болезни очес исцели, глухим слух возврати, от одержимых злых духов отжени, обидимым помози, грешникам прости, прокаженных очисти, младенцев помилуй, неплодным чадородие даруй, пленных от темниц и уз избави и всех на тя уповающих от видимых и невидимых врагов покрый, ибо ты имаши ходатайство ко Христу Богу и прощение грехов всем христианом.
О Пресвятая Богородице Марие, к Материнской благодати и помощи твоей присно припадающих благослови и освяти нас сиянием чудотворныя иконы твоея, и покрый землю Иверскую от ересей и чуждаго закона, а жителей ее от всякаго злострадания, ибо забыли мы благодеяния предков наших и уподобились народам иноплеменным и родам разсвирепевшим, любящим век сей и отступившим от Христа, от них же научились делам их и, подражая им, работаем похотем сердец наших, яко не имущии упования на Христа и забывшии жизнь вечную. Милостию твоею управи дни жизни нашея в добродетели и паки обнови в нас пламенную любовь к вере, к благочестивому царю и к Богом данному отечеству, и от семене Давидова возвыси рог помазания. Многомощною силою твоею укрепи великаго господина нашего, Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, и преосвященных митрополитов, архиепископов и епископов, и весь священнический и монашеский чин, благоверных, военачальников и градоначальников, и все христолюбивое воинство, и благодетелей наших, и всех православных христиан; умоли Сына твоего и Бога нашего, да простит нам отступления, разорение церквей, убиения служителей Божиих, измену, зависть и беззакония, убиения во чреве младенцев наших и прочее множество грехов наших.
О Боголучезарная Царице Марие, яко имущая Материнское дерзновение, умоли благостию прекраснаго и человеколюбием всесладчайшаго Сына твоего и Бога нашего, да утвердимся в вере, от святых отец преданной, до конца жизни нашея, и во всех заповедех Господних непреткновенно ходим, и во вся дни живота нашего спасаемся во святыни и благочестии, и угодим Рожденному от тебе, и сподобимся Царствия Его, еже уготова любящим Его, Емуже подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь. Господи,
помилуй (Трижды).
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Автор-составитель: Тинатин Мчедлишвили
