Акафист святому великомученику Або Тбилисскому
Молятся ему об избавлении от врагов видимых и невидимых, от плена, от козней бесов и злых духов, а также об исцелении страстей душевных и недугов телесных.
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Свыше призванный, верный мучениче Христов Або, приими благодарственное сие пение и испроси нам у Христа Бога мирное сохранение от сетей вражиих, да дарует душам нашим тобою, святе, оставление грехов и милость, да не по правде воздастся нам по делом нашим, иже с верою вопием тебе: Радуйся, великий мучениче Або, похвало народа нашего и хранителю града Тбилиси!
Оставив злое сарацинство, закон Евангелия единоплеменником твоим апостольски благовестил еси и мрак агарянской прелести подвигом твоим разсеял еси; тако и ныне угаси воздвигнутыя на народ наш умыслы злых и вся роды наследия нашего в Православии и единомыслии утверди, да, силою духа твоею вооружени, непрестанно ублажаем тя:
Радуйся, отрасле, от корений безводных прозябшая; радуйся, от юности премудростию и благоразумием избранный; радуйся, посреде беззаконных свято и непоколебимо поживый; радуйся, от Господа умудренный и укрепленный; радуйся, агнче святый и непорочный, от строптиваго стада и пастыря неистиннаго, злопасущаго и сквернаго, отлучивыйся; радуйся, овче прекрасная, Пастырю доброму, Христу Спасу, последовавшая и во дворех Его вселившаяся; радуйся, рукою безбожною Его ради закланный и напоследок во огнь вверженный; радуйся, жертво благоприятная, на трапезу небесную принесенная; радуйся, подвигом мученичества на небо взошедый; радуйся, на месте упокоения и в лоне Авраамли вселивыйся; радуйся, венцем великомученичества просиявый; радуйся, бывый исмаильтянине Або, от предков наших грузином нареченный и присно поминаемый; Радуйся, великий мучениче Або, похвало народа нашего и хранителю града Тбилиси!
Егда землю нашу держаху сарацины, эристав Картлийский призван бысть в Багдад пред амира-муминина и клеветою злых человек задержан тамо три лета; тогда служил еси Нерсесу, по закону исмаильтянин, промыслом Божиим, и, видев чин христианства и закон грузин, яко юноша разумный, услышал еси зов Божий: отвергл еси закон отеческий и возлюбил еси веру истинную, от апостолов проповеданную; сего ради святую память твою чтим и Христу вси поем: Аллилуиа.
Егда восхотеша беззаконнии отпустити Нерсеса, послаша его паки эриставом во страну его; ты же умудрился еси изыти, яко Авраам, от отечества и от дому, и сонмище скверн — Вавилон — возненавидев, вселился еси в Тбилиси, престольный град Картли; но не можаше явити себе христианином страха ради обладающих Картли сарацин, и, втайне слушая словеса Божественная и проповеди закона, превзошел еси от юности в благочестии воспитанных; тако и нам ныне даруй премудрость разсуждения добра и зла, да, совершенни во всяком благе, глаголем по силе нашей:
Радуйся, благое изволение в сердце положивый; радуйся, законы испытавый и лучшее от худшаго разсудивый; радуйся, землю твою оставивый и жребий Богородицы избравый; радуйся, гласу Божественному последовавый и заповеди Его в сердце твоем напечатлевый; радуйся, смрад безбожия отгнавый и иго лжи свергий; радуйся, прелесть отцев и дедов отвергий и образ жития пременивый; радуйся, ветхаго человека совлекийся и новаго оживотворивый; радуйся, истинною верою сердце твое добре очистивый; радуйся, среди единоплеменников твоих Божественная учения распространивый; радуйся, гонимыя от них веры исповедниче; радуйся, народ, под данию их томимый, возлюбивый; радуйся, мироварче, вместо благовонных мастей духовное благоухание распространивый; Радуйся, великий мучениче Або, похвало народа нашего и хранителю града Тбилиси!
Паки разгневашася сарацины на благовернаго эристава Нерсеса, но Господь сохрани его от рук их, ибо прошед врата Дарьяльская и пришед ко царю хазарскому, приятен бысть добре, яко беглец от сарацин; тогда крестился еси, блаженне Або, во имя Святыя Троицы и невозбранно пел еси Создателю всех: Аллилуиа.
Егда с Нерсесом шествовал еси в Абхазию, в пути постился еси, блаженне Або, и не престаял еси в молитве и псалмопении; егда же благодатию Божиею достигосте княжества онаго грузинскаго и видесте боголюбие всего народа того, плоть твою паче изнурил еси постом и движения страстей умертвил еси молитвою и бдением; и нас не забуди, ублажаемый, и избави нас от веры неживыя и теплохладныя, да, ревностию Божественною воспламеннии, принесем тебе благодарственную сию похвалу:
Радуйся, право исповедниче и поклонниче Святыя Троицы; радуйся, велегласный проповедниче гонимыя веры; радуйся, бездно премудрости и причастниче Божественныя любве; радуйся, мужество терпения и твердости; радуйся, сосуде благонравия и разума; радуйся, источниче утешения и радости; радуйся, море человеколюбия; радуйся, образе духовнаго совершенства; радуйся, непобедимый столпе смирения; радуйся, несокрушимый памятниче христианства; радуйся, светило, озаряющее Иверию; радуйся, бисере драгоценный Церкве грузинския; Радуйся, великий мучениче Або, похвало народа нашего и хранителю града Тбилиси!
Егда Стефан, сестричищ Нерсесов, поставлен бысть эриставом Картли, с радостию подвижеся Нерсес во страну свою; тебе же, яко сарацину, рече князь Абхазский: «Не исходи из сея земли, ибо царство Картлийское держат сарацины, да не како отвратят тя от веры Христовы»; тогда невозмутимым умом отвещал еси: «Ничтоже может разлучити мя от любве Господа моего», и Избавителю приносил еси дар хвалы: Аллилуиа.
Яко слышал еси от книг духовных о мужестве первых оных мучеников, иже являху храбрость Христа ради и претерпеваху муки, тако воспламенился еси желанием небесным и тщался еси пролитием крове уподобитися им; егда же с Нерсесом достигл еси престольнаго града Картли, христианином назвался еси и распространил еси Божественная учения среди сарацин; тако и ныне просвети ум мой, злыми помыслы помраченный, и сподоби мя принести пение:
Радуйся, закон, хитростию человеческою сплетенный, отвергий; радуйся, тьму оставивый и свет богопознания избравый; радуйся, страниче, от чуждаго закона пришедый и Христа, Бога нашего, познавый; радуйся, заповеди Его возлюбивый и сияние благодатей боголепно приявый; радуйся, премудровещанный и Божественных Писаний право исполнителю; радуйся, в жительстве истины законы Евангелия апостольски вновь распространивый; радуйся, ревности Божественныя и благоговения учителю; радуйся, непорочным житием твоим отступников от закона грузин посрамивый; радуйся, всякое благо и богоугодное насадивый; радуйся, поношение и укоризну Христа ради претерпевый; радуйся, сарацин во всякой истине наставивый; радуйся, душетленная учения низложивый; Радуйся, великий мучениче Або, похвало народа нашего и хранителю града Тбилиси!
Егда отсекошася единоплеменницы твои от надежды обращения твоего, по-зверски скрежетаху зубы, да предадят тя смерти, и рекоша амиру: «Во граде сем есть юноша един, иже оставил есть закон наш и безстрашно учит закону христианскому»; тогда яша тя и ввергоша в темницу, но эристав Картлийский испроси тя и свободи; ты же волею своею стремился еси к подвигом и явно и ведомо пел еси Христу Богу: Аллилуиа.
Тогда паче воспламенишася гневом безбожнии исмаильтяне и, мщением паки поставивше тя пред судиею, начат он ласкательно глаголати тебе: «Что сие на тя клевещут, Або, яко оставил еси отеческий закон и со христианы заблуждаеши?» — «Аще родителие мои исмаильтяне суть, аз раб есмь истиннаго Сына Божия», — твердо отвещал еси амиру и уготовал еси себе на искушение и смерть; сего ради народи Грузии приносим тебе пение достойное:
Радуйся, неверных на путь правды и истины приводяй; радуйся, мужество и непоколебимую твердость подаваяй; радуйся, премудрословием учения прелесть Мухаммедову победно обличивый; радуйся, всех правоверных утешителю и зловерных посрамителю; радуйся, мечем обличения служителей диавола поразивый; радуйся, благодатию Божественною невежды умудряяй; радуйся, маловерных в вере укрепляяй; радуйся, подвигшихся ко взысканию истины от путей погибельных отводяй; радуйся, народ Господень от сна духовнаго пробуждаяй; радуйся, безплодную и теплохладную веру нашу оживляяй; радуйся, от всякаго дела злаго и от движений плоти избавляяй; радуйся, страсти душ и телес нескудно исцеляяй; Радуйся, великий мучениче Або, похвало народа нашего и хранителю града Тбилиси!
«Аще скудости твоея ради последовал еси христианом, аз паче милость подам тебе», — глаголаше тебе лестию лукавый; ты же с большим дерзновением сице отвещал еси: «Не ищу даров твоих, ибо аз раб есмь Царя Небеснаго и мзды от Него чаю»; тогда со гневом повеле амир, подобно Избавителю, бити тя; ты же раны мужественно претерпевал еси и Укрепляющаго тя Христа сладкогласно славил еси: Аллилуиа.
Разгнева мучителя дерзновение твое, и злодейски, узами железными связав, вверже тя в темницу темную; ты же с радостию благодарил еси Бога, сподобльшаго тя ран и уз имене ради Христова, и чаял еси венца по обетованию мучеников, с нимиже ныне пред Ним с дерзновением предстоя, испроси непоколебимое сохранение церквам и дарование Крестом победы народу нашему, твердость верным и оставление грехов восхваляющим тя:
Радуйся, отечество твое оставивый и небесное отечество избравый; радуйся, в плене благородство духа сохранивый; радуйся, подвиги и искушения мужественно подъявый; радуйся, силою Божественною беззаконных исмаильтян посрамивый; радуйся, заблудших от путей истины обличивый; радуйся, лютейшия скорби в молитве и псалмопении претерпевый; радуйся, крепостию духа немощь человеческую покрывый; радуйся, мужеством ума немилостиваго Велиара низложивый; радуйся, страхом изнемогших и яко трость колеблемых ободряяй; радуйся, в темнице алчущих и скудных питавый и в благочестии наставивый; радуйся, коварствами человеческими и лестию вражиею погибающих избавителю; радуйся, лукавства разрушителю и бесов скорый прогонителю; Радуйся, великий мучениче Або, похвало народа нашего и хранителю града Тбилиси!
Тогда собрашася клеветницы твои и лжезакония учителие и глаголаху тебе словесы ласкательными: «Чадо, не погуби юности твоея, ибо огнь и меч уготовахом тебе, аще не обратишися к нам»; ты же, яко глух, не слышал еси и, яко нем, не отверзл еси уст твоих, но молча молился еси, великий мучениче, и песнь трех отроков в сердце твоем глаголал еси: Аллилуиа.
Егда возвести тебе Христос час кончины твоея, всехвальне, фимиам и свещи принесл еси церквам и молитвы и благословения испросил еси у священников, да не преткнешися от веры истинныя и сподобишися благодати оныя мучеников Христовых, с нимиже моли ныне Подвигоположника твоего, да никогдаже сподобятся человецы лживии и невернии, иже хулят Бога истиннаго и имут себе в поклонение мамону, владычества над народом нашим и расхищения православных грузин, но да умножатся нам народоначальницы, совершенни всяким грузинским благонравием, да пекутся о народе нашем и гласом благодарения ублажают мужество твое:
Радуйся, во время славы исмаильтян иго Христово приемый и Крест Его на раменах твоих понесый; радуйся, мужеством твоим малодушным и нетерпеливым пример давый; радуйся, в сердцах боголюбивых благодатную радость распростираяй; радуйся, окаменелая и жестокая сердца умягчаяй; радуйся, юношеское буйство и небрежение возненавидевый; радуйся, благоверныя власти и воинства благословляяй; радуйся, ненавидящих правду и злое благим полагающих обличаяй; радуйся, коварством народ Господень растлевающих посрамляяй; радуйся, на законоположников по своей воле, многих соблазняющих, гнев наводяй; радуйся, дерзостию восхищенных верою усмиряяй; радуйся, от веры уклонившихся и беззаконие творящих народоначальников и вождей низлагаяй; радуйся, гордостию превознесшихся смиряяй и мудрых и добре зрящих возносяй; Радуйся, великий мучениче Або, похвало народа нашего и хранителю града Тбилиси!
В нощь бдения Крещения Христова просиял еси духом и, возжег свещи в руках твоих, железом окованных, немолчно пел еси и псалмопевствовал еси, стоя неподвижно; егда же возсия десятый день заточения, пяток, день страдания Господа нашего, око мучеников Або, помазал еси главу твою елеем и, приим сладкое оное Причастие Христово, подобно блаженному оному разбойнику, взывал еси крепко: «Помяни мя, Спасе, во Царствии!» — и усердно и с любовию пел еси Создателю всех: Аллилуиа.
Паки приидоша к тебе сарацины и поставиша тя пред судиею; но волнение не смути сердца твоего, егда безбожный он обещаваше тебе муки и смерть, но похвалу мучителей мужеством презрел еси и обличил еси коварство насилием держащаго всю поднебесную; тако и ныне низложи жаждущих погибели нашея и сокруши воздвигнутую на народ наш тайну беззакония, да не впадем в сеть вражию и усердно восхвалим дела твоя, хвалы достойная:
Радуйся, похвало постников и прекрасное украшение мучеников; радуйся, подражателю страстей Христовых и приемниче обетованных оных наслаждений; радуйся, покровителю добре хранящихся иереев; радуйся, заступниче и милостивче нищих; радуйся, обличителю лживых и коварных; радуйся, неусыпный хранителю неповзрослых отроков и девиц; радуйся, питателю вдовиц и сирот; радуйся, посрамителю лживых судей и утешителю неправедно осужденных; радуйся, смирителю завистников и клеветников; радуйся, пристанище в море греха утопающих; радуйся, присно руку подаваяй мученолюбцем; радуйся, помощниче поминающих имя твое; Радуйся, великий мучениче Або, похвало народа нашего и хранителю града Тбилиси!
Мнящу всезлобному оному амиру прельстити тя, рече тебе: «Не разумееши ли, Або, яко словеса твоя бывают тебе ходатаи смерти?»; ты же ни во чтоже вменил еси ласкательство его и дерзновенно заградил еси уста хульному оному мучителю; тогда возгореся, яко огнь, гневом судия он лжи и повеле усекнути главу твою; ты же паче всех мужественнее показал еси подвигов любовь и принесл еси Богу благодарственное пение: Аллилуиа.
Егда изведоша тя мучителие во ограду четыредесяти мучеников и разрешиша от уз железных, не убоялся еси, достойно прославленный Або, видя меч трижды воздвигнутый, но мужественно преклонил еси выю твою и предал еси святую душу твою Господу; тогда рукою беззаконных заклан бысть, яко агнец, и принесен бысть жертвою пред Богом; у Негоже испроси, ублажаемый, народу нашему избавление от владычества иноплеменников и безмятежное и разумное житие восхваляющим тя:
Радуйся, Божественное поприще добре совершивый; радуйся, кончину твою с кротостию приемый; радуйся, немилостивую смерть с благодарением приявый; радуйся, со святыми в Царствии вселивыйся и о спасении нашем пекийся; радуйся, к тебе прибегающия страждущия души приемляй; радуйся, звездо, ищущим спасения путь показующая; радуйся, грехолюбивых человек сладости воздержания научаяй; радуйся, плодом мужества твоего картлосиан добре наставляяй; радуйся, подвигом твоим Церковь грузинскую, яко солнце, просветивый; радуйся, лютыя скорби скоро прогоняяй; радуйся, поколебанных бесовскими искушеньми и от утесняющих человек невредимо избавляяй; радуйся, уязвленных невидимыми стрелами исцеляяй; Радуйся, великий мучениче Або, похвало народа нашего и хранителю града Тбилиси!
Видяще завистницы, яко возвеличися имя мученичества твоего, честное тело твое, подобно мужественным оным святым четыредесяти, возложиша на колесницу и, прешедше мост, свергоша на месте, нарицаемем Плачевное, и сожгоша у темницы, на лице скалы; сожженныя же останки обвиша в кожу агнчую и вергоша в реку под мостом Метехским; тогда вернии отвергоша страх безбожных и, с упованием притекающе, искаху от тебе исцеления душ и телес; ты же абие явил еси помощь твою притекающим тамо на молитву, и вси воздаяху благодарение и славу Богу: Аллилуиа.
Тогда паче яви силу Свою Всесильный Бог и почти Своего мученика: низпосла с небесе звезду блистающую на место оно, идеже сожгоша тело твое, святе Або, яко светильник огненный; в нощь же вторую кости твоя обнаженныя под мостом оным возсияша, яко страшное блистание молнии, и вода изведе дивный свет, егоже видяше все множество града; тогда место оно жертвенное уподобися жертвеннику святаго Аарона сошествием огня с небесе; егоже видяще невернии, страх Божий объят я, безчисленный же народ, чудесы теми ободренный, исповедаше Христа и непрестанно ублажаше тя:
Радуйся, кроплением крове твоея Церковь грузинскую облагоухавый; радуйся, свеще, светом мученичества Тбилиси озарившая; радуйся, чудесы сарацин смутивый; радуйся, христолюбивыя народы, от них ужасшияся, духовною радостию исполнивый; радуйся, власть над духи нечистыми приемый и лукавых духов насмешку отгоняяй; радуйся, силою Божественною беснующимся здравие даруяй; радуйся, волшебныя козни и ухищрения разрушаяй; радуйся, сердца, волнами мира поколебанная и оскверненная, умиротворяяй; радуйся, неразумие чародеев и гадателей и скверныя их призывания угашаяй; радуйся, от плена бесовскаго и от козней злых духов избавляяй; радуйся, от сетей сатанинских и от нашествия иноплеменных защищаяй; радуйся, скверну суеверия изглаждаяй; Радуйся, великий мучениче Або, похвало народа нашего и хранителю града Тбилиси!
Якоже многоцелебныя кости всеблаженнаго отца Шио из глубокой пещеры под землею, яко на крилех, возношахуся на высоту, в заступление верным, и исцеляху души и телеса, тако и дивный во святых Бог чудотворением мощей твоих вся концы мира удиви, ибо кости твоя обнаженныя, со славою из воды изнесенныя, из лета в лето подаяхуся народу нашему во ограждение и хранение и нескудно подаваху исцеление и благодать истинную уповающим на тя; видящии же в тебе духовная дарования восхваляху венчавшаго тя Бога: Аллилуиа.
О, коликое величие стяжа тебе мужество твое, ублажаемый! Ибо егда во дни наша умыслиша на месте мученичества твоего создати малый храм, отсекоша сосну прекрасную, юже возрасти промысл Божий при бреге реки, и на срезе древа видеша нерукотворенный образ креста; тогда каменоделцы создаша храм сей с великим усердием, честнии же иереи с народом положиша тамо доску сию, Богом написанную, с великим торжеством, литиею и таковым пением:
Радуйся, поборниче благочестия; радуйся, непоколебимый столпе веры; радуйся, всехвальный делателю Божественныя благодати; радуйся, сокрушителю дерзости зловерных; радуйся, возрастителю падшаго христианскаго духа; радуйся, немилостиво отсеченная лозо винограда Христова; радуйся, насаждение райское, плод благий приносящее; радуйся, злато, огнем искушенное и безсмертному Жениху принесенное; радуйся, смирно, в миро принесенная безсмертному Царю; радуйся, фимиаме, возжженный на Божественном оном жертвеннике; радуйся, огню, попаляющий в сердце нашем всякое плевелие и терние; радуйся, неплененная врата Церкве иверския; Радуйся, великий мучениче Або, похвало народа нашего и хранителю града Тбилиси!
О, чудо всеславное и достойное! Ибо пролитием крове твоея освятил еси престольный град наш Тбилиси и Божественным промыслом уготовал еси место Метехское ста тысячам мучеников; они же не попраша икон Сионских и посреде Метехскаго моста от хорезмийцев без разбора избиени быша вси; сего ради от Господа купно дарованы бысте иверянам, яко душ и телес врачеве и хранителие неусыпнии; мы же, ведуще множество ходатайств ваших, пред иконами вашими с верою припадающе, тепле молим вас: сохраните царствующий град наш и вся грады и веси Иверии, да усердно ублажаем вас и будем присно хвалящии Христа: Аллилуиа.
Якоже предцы наши притекаху на место оно, идеже сожгоша тело твое, и с верою приимаху прошение, тако и ныне ко храму твоему скоро притекаем, блаженне Або, воздати благодарение Богу, поклонитися святому оному кресту и облобызати всечестную икону твою; ты же тепле молися о нас пред Господем Богом, да не отступим от веры истинныя и, тобою избавлени от лютых бед, подвигнемся восхвалити подвиг твой:
Радуйся, гражданине вышняго града, яко безумнии мучителие твои мечем и огнем паче пламене просветиша тя; радуйся, дивный отроче, победителей победительнейший явлейся, яко язычники ревностны сотворил еси работати Христу, нам же оставил еси память мученичества твоего; радуйся, яко явился еси звездою светлою, просвещающею Картли, и мужество твое паки ободряет всех живущих в ней; радуйся, розо, из терния избранная, благоухание дышащая всем концем земли нашея; радуйся, силою Божиею добре вооруженный, яко имамы чудеса твоя, яко стену непоборимую; радуйся, ста тысячам мучеников пример давый, яко мати-река наша бысть одеянием святых оных костей ваших и глубина Куры — гробом вашим; радуйтеся, словесныя овцы святаго стада Христова, яко блаженна есть земля, упитанная кровию вашею, и свята есть вода «Иордана грузинскаго» — великия реки Куры; радуйтеся, пламеннейше за Христа себе предавшии, яко место мученичества вашего присно источает бездну исцелений; радуйтеся, златокованнии светилницы Церкве, яко блистание подвига вашего озаряет сердца мученолюбцев; радуйтеся, нетлением облеченнии, яко ни пременение лет, ни обстояния времен не возмогоша забвению предати подвиги ваша; радуйтеся, сокрушителие силы видимаго и невидимаго врага, яко несть никогоже, иже призывая вас в скорбех, не обрящет скораго утешения; радуйся, яко во славную память твою град сей престольный грузинский невещественною радостию украшается и благословенным языком грузинским усердно взывает: Радуйся, великий мучениче Або, похвало народа нашего и хранителю града Тбилиси!
О подвига победителю, великий мучениче Або! Не токмо еще жив многих заблудших ко вере Христовой обратил еси и спасения сподобил еси, но и по смерти несказанна есть сила чудес твоих, ибо стяжал еси благодать от Духа Святаго исцеляти восхваляющих тя; сего ради всецело себе самих предаем Божественному покрову твоему, да мудре ходим путем истины и присно поем Благому, Всесильному Богу: Аллилуиа.
Сей кондак глаголется трижды, затем
Оставив злое сарацинство, закон Евангелия единоплеменником твоим апостольски благовестил еси и мрак агарянской прелести подвигом твоим разсеял еси; тако и ныне угаси воздвигнутыя на народ наш умыслы злых и вся роды наследия нашего в Православии и единомыслии утверди, да, силою духа твоею вооружени, непрестанно ублажаем тя:
Радуйся, отрасле, от корений безводных прозябшая; радуйся, от юности премудростию и благоразумием избранный; радуйся, посреде беззаконных свято и непоколебимо поживый; радуйся, от Господа умудренный и укрепленный; радуйся, агнче святый и непорочный, от строптиваго стада и пастыря неистиннаго, злопасущаго и сквернаго, отлучивыйся; радуйся, овче прекрасная, Пастырю доброму, Христу Спасу, последовавшая и во дворех Его вселившаяся; радуйся, рукою безбожною Его ради закланный и напоследок во огнь вверженный; радуйся, жертво благоприятная, на трапезу небесную принесенная; радуйся, подвигом мученичества на небо взошедый; радуйся, на месте упокоения и в лоне Авраамли вселивыйся; радуйся, венцем великомученичества просиявый; радуйся, бывый исмаильтянине Або, от предков наших грузином нареченный и нами присно поминаемый; Радуйся, великий мучениче Або, похвало народа нашего и хранителю града Тбилиси!
Свыше призванный, верный мучениче Христов Або, приими благодарственное сие пение и испроси нам у Христа Бога мирное сохранение от сетей вражиих, да дарует душам нашим тобою, святе, оставление грехов и милость, да не по правде воздастся нам по делом нашим, иже с верою вопием тебе: Радуйся, великий мучениче Або, похвало народа нашего и хранителю града Тбилиси!
О дивный и воистину мужественный мучениче Або Тбилисский! Свыше от Бога почтенный и безплотными силами приятый, во мучениках преславный, поста и молитвы столпе твердый, терпения непоколебимый граде, нищих утешителю и от всех нас врагов душевных и телесных прогонителю, недугующих врачу, алчущих пище, жаждущих питие, печальных веселие, отчаянных надеждо, неимущих одеяние светлое, грешных покаяние и всех молящихся тебе скорый помощниче и прошений исполнителю!
О всехвальный, великий мучениче Або, похвало народа нашего и хранителю града Тбилиси! Помяни нас пред Богом, Егоже ради любве кровь пролиял еси, ублажаемый, и, яко имея дерзновение велие, избави ходатайством твоим народ наш, искушеньми и скорбьми обстояемый, да не вместо милости приимем наказание за дерзость, ибо забыхом благотворение предков наших и дух древняго благородства, единодушие братий, послушание отцем, и дух мужества уклонися от нас. Вместо сего возлюбихом мирское наслаждение, усладихомся в сластолюбии, сердца наша исполнишася сребролюбия, и уподобихомся языком иноплеменным и родом разсвирепевшим, любителем века сего, отступившим от Христа, от нихже научихомся делом их и служим похотем сердец наших, подражающе им, яко не имущии упования на Христа и забывшии жизнь вечную. Сего ради любовь Христову к нам и веру нашу к Нему паки обнови и даруй нам Божественную ревность об отечестве, любовь к правде и мужество духа, исполни нас Божественнаго бодрствования и даруй нам чистоту жития и страх Божий. Моли, ублажаемый, возлюбленнаго тобою сладчайшаго Иисуса, да сохранит отечество наше от сети вражия и от вражды братий, и милостиво да призрит на народ наш, жребий Матере Своея, носящий Крест Господень на земли, и да не предаст наследия нашего в поношение врагом, да не рекут язычницы и еретицы: где есть Бог их, на Негоже уповаша? Укрепи в служении и подвизе Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, весь священный и монашеский чин и всех православных христиан. Просвети христолюбивыя власти и воинство их честным твоим ходатайством сохрани.
О истинный и богомудрый мучениче Або Тбилисский! Помози нам изыти из глубины грехов и покрый нас от глада, губительства, труса, огня, меча, нашествия иноплеменников и междоусобныя брани, от внезапныя смерти, от тлетворнаго ветра и от всякия смертоносныя язвы и от всякаго зла. Даруй мир и здравие рабом и рабыням твоим сим, православным христианом. Просвети ум наш и очи сердца нашего, да добрым житием сподобимся Царствия Небеснаго. Не преставай, подвига победителю, в ходатайстве твоем о молящихся тебе, иже из лета в лето притекаем восхвалити, воспети и поклонитися мученическому месту твоему! Не преставай в ходатайстве твоем пред Создателем всех, Емуже подобает всякая слава, честь и поклонение, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, святаго славнаго и всехвальнаго мученика Або Тбилисскаго и всех святых, помилуй нас. Аминь.
Автор-составитель: Тинатин Мчедлишвили
