Акафистное пение святой великомученице царице Кетеване
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Свыше победу приемшая, святая великомученице Кетевано, приими ныне хвалу величающих тя и не помяни зол наших, но помози нам, да Всеблагий Царь помилует народ сей наш и невредимо сохранит нас от всякия скорби и от сети вражия, блаженная, и оставление грехов дарует поющим тебе: Радуйся, великое светило грузин, святая царице Кетевано!
От корене царскаго прозябши, яко отрасль Давидова, к тому же корени привилася еси, дщи дома Багратионов, и страданием и смертию за Христа сокрушила еси главу гордаго змия; тако и ныне исцели многия язвы наша молитвою твоею и даждь нам Божественную ревность об отечестве, любовь к правде и мужество духа, да с большим усердием принесем тебе песнь сию хвалебную:
Радуйся, древо светлоплодное, в Иверии прозябшее; радуйся, от юности благочестием украшенная; радуйся, упованием на Господа и мужественною крепостию исполненная; радуйся, непрестанным псалмопением и молитвою вооруженная; радуйся, многими добродетельми, яко светлою одеждою, облеченная; радуйся, щитом благодати и копием креста огражденная; радуйся, от сонма лукавых обстоимая; радуйся, от ересей бежавшая и Православием огражденная; радуйся, немилостиво биенная и ужасных мук претерпевшая; радуйся, огнем истощенная и лютым подвигом упокоенная; радуйся, со славным ликом отцев, за веру и землю живот положивших, соединившаяся; радуйся, во святых всечудною славою просиявшая; Радуйся, великое светило грузин, святая царице Кетевано!
Любве ради ко Пресвятей Богородице и ко народу, Ей в удел данному, на Святей Горе, в Иверстей обители, малый храм иконе Вратарницы созда блаженныя памяти отец твой, Ашотан Мухран-батони; сего ради не умолкни ходатайствовати пред Богом, да сподобит нас паки вселитися грузином в Ивироне, трудом предков наших созданном, и в нем во веки поминати сродников твоих и воспевати Господу славу и хвалу: Аллилуиа.
Егда дева стыдливая и любомудрием славная, прекрасная дщи Ашотана Мухран-батони, обручена бысть сыну Александра, царя Кахетинскаго, Давиду, Иессее-Давидо-Багратиду, была еси мати чад, от нихже есть сын твой, государь Кахетинский Теймураз, непоколебимый столп мужества и необоримая стена храбрости; сего ради подобает тебе, славная, песнь сия хвалебная:
Радуйся, дщи и невесто Давидова; радуйся, образе стыдения женскаго; радуйся, громе Божественнаго проповедания; радуйся, судие суда и правды; радуйся, сосуде добраго нрава и разума; радуйся, Божественная чаше горняго жертвенника; радуйся, помощнице всякия мудрыя и мужественныя жены; радуйся, укрепительнице христолюбиваго воинства; радуйся, печальнице народа грузинскаго; радуйся, сило и славо скипетра царей; радуйся, бисере честный Церкве Христовы; радуйся, явное солнце Кахетии и похвало Картли; Радуйся, великое светило грузин, святая царице Кетевано!
Егда возвестиша беззаконному оному шаху Аббасу, яко умре юный царь Давид, лукавством вооружи брата его, Константина, магометанином бывшаго, и посла покорити Кахетию и убити престарелаго отца и брата; государь же Кахетинский Александр сретил младшаго сына своего и гласом радостным благодарение и славу возсылаше Богу: Аллилуиа.
В един день безбожный Константин умысли погибель души своея и смерть отца и брата, и повелением его убиша и царя, и Георгия; ты же с великою честию погребла еси в Алаверди телеса их, славная, и скверному оному прелюбодею укорила еси похищение наследия царей, ибо сын твой Теймураз пребываше в Персии у лукаваго оного шаха; сего ради дивимся дерзновению твоему, мужественная царице, и ублажаем тя пением:
Радуйся, добрых добродетелей насадительнице; радуйся, плоть постом и бдением изнурившая; радуйся, мирскою силою всуе хвалящихся посрамляющая; радуйся, христианскому воспитанию чад научающая; радуйся, строго наказующая неверных супругов и благочестивыя семейства благословляющая; радуйся, клеветников и поносителей родителей обличающая; радуйся, человеки к служению отечеству и к благочинию приводящая; радуйся, самоотверженных сынов отечества возлюбившая; радуйся, от веры и отечества отступивших прещением казнящая; радуйся, верным честь подающая и лживых и двоедушных поражающая; радуйся, злоумышленников и опустошителей земли устрашающая; Радуйся, великое светило грузин, святая царице Кетевано!
О ужасное слышание! ибо обладаше скверным Константином похоть безпричинная, и, подобно Иродиаде, призываше жену брата своего привести и пояти себе в жену; ты же, слышав дивное сие нечестие, просила еси помощи Господни и возвестила еси князем кахетинским умысл стоящаго ниже бесов; тогда они убиша подобнаго Ироду и пение победы принесоша пред Богом: Аллилуиа.
О сила человеколюбиваго Бога, Иже милостиво призре на теплую молитву твою и дарова дивную помощь воинству твоему; сего ради, слезами обливаема, благодарение приносила еси Богу и оттоле, в Греми пребывающи, царски управляла еси Кахетию; ныне же моли Христа, Спаса нашего, да не оскудеет вера в многоподвижном народе твоем, даже доселе униженном и отверженном, и да воздвигнет достойныя подвижники и делатели в винограде Своем во утверждение всех, да, силою духа твоего вооружившеся, подвигнемся пети тебе:
Радуйся, неправедных судилищ разорительнице; радуйся, вдовство твое, яко пророчица Анна, в целомудрии соблюдшая; радуйся, многосоставныя козни вражия разрушившая; радуйся, злыя замыслы врагов упразднившая; радуйся, зверскую ярость и лукавство прогнавшая; радуйся, мужеством духа твоего и премудростию ума землю управлявшая; радуйся, нищих питательнице и сирот и вдовиц посетительнице; радуйся, благоговейных иереев и монахов скорая помощнице и руку простирающая; радуйся, мудрых и добре зрящих возвышающая; радуйся, отвергающих уставы предков посрамляющая; радуйся, любви к отечеству научающая; радуйся, молящихся за народ и ближняго милующая; Радуйся, великое светило грузин, святая царице Кетевано!
Слышав шах Аббас о смерти Константина, узре отпадение кахетинцев и посла юнаго Теймураза царем и обладателем Кахетии; ты же благоразумием направила еси стопы его по следам отцев и дедов, и оттоле неизменным мужеством управляше он царством своим и храбро бранися с враги и двоедушными; тако и ныне милостиво призри на ны и путь наш царский направи народу, славящему Христа: Аллилуиа.
Егда люте свирепый царь персидский с безчисленным воинством прииде к Гандже и потребова у Теймураза старейшаго сына его в заложники, тогда царь младшаго сына Александра и всемудрую оную матерь свою, по понуждению князей кахетинских, посла в Ганджу; ты же, ради верности отечеству и мирнаго сохранения людей своих, предстала еси пред безбожным оным шахом и просила еси невредимости царства твоего; сего ради достойна еси, блаженная, принесения пения:
Радуйся, долгия узы и муки мужественно подъявшая; радуйся, пастырю добрый, душу за стадо твое положившая; радуйся, достоинства и честности народа твоего хранительнице; радуйся, свеще, мудрых просвещающая и безумных попаляющая; радуйся, от бесовских прелестей избавляющая; радуйся, мужества и храбрости насадительнице; радуйся, всякия злыя нравы и пороки крепко поправшая; радуйся, волны и мятежи укрощающая; радуйся, дерзость богоборцев низлагающая; радуйся, скорби и напасти утоляющая; радуйся, от коварства человеческаго и сетей сатаниных покрывающая; радуйся, ближних соединяющая и врагов примиряющая; Радуйся, великое светило грузин, святая царице Кетевано!
Видев вас пришедших к нему, злочестивый со гневом повеле привести Левана и, по заключении его, призва и Теймураза, но той позна лукавство скверного и не пойде; тогда шах Аббас опустоши Кахетию и, разъярився, посла тя со внуки в Шираз в заточение; ты же с болезненным сердцем моление приносила еси Христу, да дарует победу сыну твоему, мир уделу Матере Своея и милость поющим Ему: Аллилуиа.
Како изречем, коликия болезни постигоша сердце твое, святая царице, ибо, уведав шах Аббас о шествии Теймураза к султану, яко лев хищный и рыкающий, похити обоих прекрасных сынов его и оскопи их; ты же постом, бдением и лежанием на земли иный Иов была еси в искушении и иный Товия в премудрости; сего ради немощно глаголющему языку нашему даждь силу, да изречем хвалу сию славословную:
Радуйся, в плене честь царскую соблюдшая; радуйся, лютейшия скорби в молитве претерпевшая; радуйся, пламень прельстителя и сети его слезами угасившая; радуйся, за Христа живот положившая и коварство врага поразившая; радуйся, нечестивая учения Божественным дерзновением разрушившая; радуйся, коварства беззаконных мучителей упразднившая; радуйся, малодушных и разслабленных обличающая; радуйся, непорочно жительствующих и богоугодно живущих возлюбившая; радуйся, к тебе прибегающия страждущия души приемлющая; радуйся, о чадех опечаленных матерей утешительнице; радуйся, безстыдных и неразумных жен посрамляющая; радуйся, всех грузинских добродетелей возвышающая; Радуйся, великое светило грузин, святая царице Кетевано!
Егда возвестиша мучителю оному о новом покорении Кахетии Теймуразом, разгневався, повеле беглербегу Ширазскому, да обратит в магометанство матерь Теймуразову и, аще не сотворит хулы на Христа, да убиет тя лютым мучением; ты же, боящаяся Бога, презрела еси страх оного мучителя шаха, имущаго власть льва и образ лиса, и дерзновенно исповедала еси Сына со Отцем и Духом и воспела еси осанну победы: Аллилуиа.
Тогда многим ласкательством моляше тя князь Ширазский оставити закон Христов и обещаваше многия милости; ты же, имущи распятие Спасово, преклонила еси колена и вознесла еси молитву, слезы проливающи: «О Господи Иисусе Христе, посли ми Ангела, хранителя души моея, и приими душу мою и причти мя ко лику мученик Твоих»; сего ради дивимся теплому боголюбию твоему и приносим тебе песнь сию хвалебную:
Радуйся, благородство души сохранившая; радуйся, лживую веру мужественно посрамившая; радуйся, непрестанною молитвою тьму прелести разсеявшая; радуйся, плодом мужества твоего картлосиан добре научившая; радуйся, народ твой Божественным светом просветившая; радуйся, хладную веру оживляющая; радуйся, от мятежа и брани избавляющая; радуйся, недуги многоразличныя и немощи прогоняющая; радуйся, уязвленных от невидимых стрелцев исцеляющая; радуйся, от всякаго бесовскаго дела избавляющая; радуйся, непорочных дев и отроков от всякия скверны и порока избавляющая; радуйся, всех враждующих на иверов низлагающая; Радуйся, великое светило грузин, святая царице Кетевано!
Егда возвестиша шаху Аббасу неизменную твердость твою, удивися зело и призываше тя в жену и быти царицею персидскою, сыну же твоему, благочестивому царю Теймуразу, обещаваше паки вернути Кахетию; ты же, в законе совершенная, вопияла еси: «Невозможно есть ими изменити благочестие наше, еже приносим Богу нашему», и, от сродства отечества отлучена, ублажала еси умом еже быти мученицею Христовою и пела еси Ему с упованием и желанием: Аллилуиа.
Скончав молитву, призвала еси духовника твоего и, исповеданием очистившися, приобщилася еси нетленнаго Тела и Крове Христовы и рекла еси умиленно: «Господи Боже наш, не отступи от рабы Твоея и не остави мене в подвизе». Посем с желанием облобызала еси икону Пресвятыя Богородицы и, жаждущи смерти за Христа, повелела еси призвати мучителей; сего ради подобающе восхваляем тя и с желанием чтим память твою:
Радуйся, дщи небеснаго Иерусалима; радуйся, всенепоколебимый столпе мужества; радуйся, носительнице благаго ига Христова; радуйся, мудрая проповеднице правыя веры; радуйся, щите, хранящий благочестие; радуйся, мечу, отсекающий злочестие; радуйся, цвете прекрасный светлаго вертограда Давидова; радуйся, лозо винограда Христова, немилостиво обрезанная; радуйся, смирно, в миро принесенная безсмертному Царю; радуйся, ливане, возкуренный на Божественнем оном жертвенници; радуйся, светило, Иверию озаряющее; радуйся, врата несокрушимая Церкве грузинския; Радуйся, великое светило грузин, святая царице Кетевано!
Егда возжегоша мучителие шаховы огнь, блаженная, и разжегоша рожны и клещи, и венец медный, изсеченный, пред очима твоима, тогда и князь Ширазский слезы проливаше, зря страшныя оныя и ужасныя муки; насилием же мучителей и рабыни твоя отвергошася Христа и призываху и тебе; ты же с мольбою повелела еси, да и они приобщатся страданий твоих, и, изобразив святый крест, мужественная, благословенным языком грузинским славу принесла еси Богу: Аллилуиа.
В плене имела еси с собою два иерея, царице, от нихже един, Моисей, сподобися причастия мученических подвигов, Георгий же, мук устрашився, отвержеся Христа; ты же возгласила еси к окаянному оному иерею: «Почто тако трепещеши, отче, не помниши ли, что сотвориша Сыну Божию? Претерпим убо злая, да и мы приобщимся страданий Его», и безстрашным умом, яко лев, предала еси себе на лютыя муки; сего ради светло празднует Церковь грузинская, и народ наш воспевает подвиги твоя:
Радуйся, временную красоту ни во чтоже вменившая; радуйся, оружием словес твоих мучителей уязвившая; радуйся, помыслы велиаровы истребляющая и всякую скверну потребляющая; радуйся, во странствии сущих и мучением опечаленных утешительнице; радуйся, Христову смирению и любви научающая; радуйся, скверну суеверия омывающая; радуйся, от беззаконных устрашенных христиан ободряющая; радуйся, грешником от Бога милости испрашивающая; радуйся, бедных и скорбящих судящая; радуйся, духовнаго мужества иверов укрепительнице; радуйся, Материнским ходатайством многих от погибели избавляющая; радуйся, светом мученичества твоего тьму отечества озарившая; Радуйся, великое светило грузин, святая царице Кетевано!
Зело тяжко ми есть и скорблю поведати мучение, святая царице, како простроша мучителие руце твои, нищих питающия и свято к Богу воздеваемыя, и постлаша под тобою множество углей и гвоздей и сверху насыпаху многое; ты же, жена мужественныя души, вся долготерпеливо претерпевала еси и за терпение таковаго биения Господа славила еси: Аллилуиа.
О страшное чудо и всеужасное слышание, како безумнии они и всебеззаконнии дерзостно начаша пронзати от перси до хребта разжженными рожны, клещами же истерзаша сосцы твои и возложиша на главу твою раскаленный он венец медный; ты же, горько распростерта и всюду язвами объята, с упованием предала еси сына твоего и царство Господу и благочестивым дерзновением просила еси благодати исцеления немощных; сего ради чудеса присно источаеши и недуги исцеляеши верных, восхваляющих тя:
Радуйся, силою духа немощь человеческую покрывшая; радуйся, тельче святый и прекрасный, за Христа кровь излиявшая; радуйся, Божественное поприще подвигом твоим добре совершившая; радуйся, дар Божественнаго исцеления от Господа приявшая; радуйся, знамении и чудесы твоими неверных смущающая; радуйся, бодрому и трезвенному житию научающая; радуйся, мстительных и сребролюбцев прещением казнящая; радуйся, кающихся и сердцем сокрушенных возлюбившая; радуйся, суетным стремлениям узду налагающая; радуйся, от нападения и зол невидимых врагов покрывающая; радуйся, любве к Богу, царю и отечеству насадительнице; радуйся, всех правоверных утешение и злославных посрамление; Радуйся, великое светило грузин, святая царице Кетевано!
Аще и плоть твоя страдаше болезнию, но немилостивии и цепь положиша на тя, и разжженныя заступы на чело твое возложиша, и вервию удавиша тя; кровию же обагренное многострадальное тело твое сожгоша огнем и погребоша тайно; но помощию Божиею обретоша е латиняне, с великою честию сотвориша раку и кадяху многими благоуханиями, и ты исцеляла еси многих болящих; тогда проповедаша добродетели твоя и громогласно возвестиша во всех концех; сего ради подвигов твоих хвалу поведаем, вернии люди грузинския, и благодарственным гласом славим Прославившаго тя Бога: Аллилуиа.
Видевше монаси латинстии дивное и высокое мученичество, взяша святыя кости твоя с главою и принесоша сыну твоему, некия же части положиша в Индии, в католической обители в Гоа; тогда, якоже подобаше тебе, матери царице, царь Теймураз почти тя праздником великим и многоцелебныя мощи твоя положи в Алаверди под Божественною трапезою, во имя же твое начат созидати в Телави малый храм, да сподобимся благодати и милости ходатайством твоим и глаголем по силе нашей:
Радуйся, земный долг честно исполнившая; радуйся, помыслы еретиков упразднившая; радуйся, душу твою за Христа безмятежно предавшая; радуйся, земную честь оставившая и небесныя славы зрительнице; радуйся, скорбию и многим подвигом блаженную жизнь купившая; радуйся, вместо преходящаго царствия непреходящий свет приявшая; радуйся, святая царице, к Деве Царице приближившаяся; радуйся, свыше венцем победы облекшаяся; радуйся, приходящих ко гробу костей твоих зело милующая; радуйся, от Господа власть над нечистыми духи приявшая; радуйся, духовная дарования обильно подающая; радуйся, всех к тебе прибегающих и с верою призывающих утешительнице; Радуйся, великое светило грузин, святая царице Кетевано!
Язвы плоти твоея и ощущение болезней наследиша тебе наслаждение оно вечное светлое, в немже радуешися, мучеников красото Кетевано, и благодать исцелений подаеши с желанием приходящим в храм твой, святая, и избавляеши от всех страстей вражиих и болезней покланяющихся святым мощем твоим и тепле поющих Богу: Аллилуиа.
Светло празднует Церковь грузинская, и народ твой проповедует подвиг твой; ты же, яко имущая дерзновение велие, моли благаго Бога, да не предаст наследия нашего в поношение врагом, да не рекут вси: где есть Бог их, на Негоже уповают? — но да избавит нас от междоусобныя брани и от нашествия иноплеменных и дарует безмятежное и разумное житие поющим тебе:
Радуйся, дщи дома Багратидов, яко, подобно израильтянам, избранная Господня была еси; радуйся, добропрославленная царице, яко горела еси верою Православия и прелесть еретичества угасила еси; радуйся, древних мучеников сподвижнице, яко остроту железа и зной огня мужественно презрела еси и тем поправила еси козни вражия; радуйся, адаманта тверже, в терпении невредимая, юже пожаша безбожнии персы, якоже прежде пресветло венчаннаго царя Луарсаба; радуйся, от противных непобедимая, яко естеством женским победила еси насилие мужей; радуйся, непобедимым подвигом блистающая, яко Христос Бог украси тя венцы неувядаемыми; радуйся, благих прошений исполнительнице, яко от Царя всех прияла еси дар чудес, и нагия кости твоя источают исцеление; радуйся, звездо боголучезарная, яко светиши всем концем земли нашея; радуйся, благословенная мати грузин, яко свет пресветлый вселися в тя и утвердительницею народа твоего сотвори тя; радуйся, блаженная и с благословением поминаемая, яко от восток солнца до запад хвально имя твое; радуйся, Невесто Христова непобедимая, яко память твоя пресветло прославляет грузин; радуйся, недремлющая хранительнице земли твоея, яко народ твой с желанием лобызает боголепную икону твою и от лета до лета совершает память твою; Радуйся, великое светило грузин, святая царице Кетевано!
О всесветлая великомученице царице Кетевано, ныне излий на ны благодать молитвы твоея и не отвержи молящих тя, ибо согрешихом и беззаконновахом и не сотворихом, якоже заповеда нам Бог; но просвети твердым упованием скорбное житие наше и покрый нас от падения во грех, да твоею помощию достигнем невечерняго света Божия и с праведными поем Богу: Аллилуиа.
Сей кондак трижды, затем
От корене царскаго прозябши, яко отрасль Давидова, к тому же корени привилася еси, дщи дома Багратионов, и страданием и смертию за Христа сокрушила еси главу гордаго змия; тако и ныне исцели многия язвы наша молитвою твоею и даждь нам Божественную ревность об отечестве, любовь к правде и мужество духа, да с большим усердием принесем тебе песнь сию хвалебную:
Радуйся, древо светлоплодное, в Иверии прозябшее; радуйся, от юности благочестием украшенная; радуйся, упованием на Господа и мужественною крепостию исполненная; радуйся, непрестанным псалмопением и молитвою вооруженная; радуйся, многими добродетельми, яко светлою одеждою, облеченная; радуйся, щитом благодати и копием креста огражденная; радуйся, от сонма лукавых обстоимая; радуйся, от ересей бежавшая и Православием огражденная; радуйся, немилостиво биенная и ужасных мук претерпевшая; радуйся, огнем истощенная и лютым подвигом упокоенная; радуйся, со славным ликом отцев, за веру и землю живот положивших, соединившаяся; радуйся, во святых всечудною славою просиявшая; Радуйся, великое светило грузин, святая царице Кетевано!
Свыше победу приемшая, святая великомученице Кетевано, приими ныне хвалу величающих тя и не помяни зол наших, но помози нам, да Всеблагий Царь помилует народ сей наш и невредимо сохранит нас от всякия скорби и от сети вражия, блаженная, и оставление грехов дарует поющим тебе: Радуйся, великое светило грузин, святая царице Кетевано!
О явное солнце, светило Грузии, чудес обильная подательнице, милостивая, незлобивая, нищих заступнице и падших скорая помощнице, во святых славная и в женах благочестием просиявшая царице, всехвальная Кетевано!
О дивная и воистину мужественная мученице, подвигом победившая Кетевано! Материнскою милостию твоею примири нас благому Богу, да отженет вся враги и утеснители наша и дарует нам победу на них, веру же нашу ко Христу паки обновит и дарует нам неоскудную любовь к Богу, царю и отечеству, и возставит нам рог помазания, да не оскудеет царство сродников твоих в земли сей до скончания века, и да будут тверди паче твердых камений и славни во веки. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан. Именем твоим нарицаемых и молящихся тебе прослави. Умоли, всехвальная мужественная мученице, возлюбленнаго тобою сладчайшаго Иисуса, да простит нам отступления, разорение и осквернение церквей, убиения служителей Божиих, измену, зависть и беззакония, убиения во чреве младенцев наших и прочее множество грехов наших.
О в благочестии великая и в лице мучеников просиявшая, святая царице Кетевано! Милостию, подобною Иисусу Богу, ходатайствуй за ны пред Ним, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды).
Господи Иисусе Христе, Сыне Божий, молитвами Пречистыя Твоея Матере, святыя великомученицы, светила Грузии, царицы Кетеваны и всех святых, помилуй нас. Аминь.
Автор-составитель: Тинатин Мчедлишвили
