Акафист святой великомученице царице Кетеване
Уязвлена желанием Божественным, язвы многи подъяла еси и различныя муки мужественно претерпела еси, темже вместо преходящаго царствия Царствие Небесное наследила еси, треблаженная Кетевано; моли Христа Бога помиловати души наша.
Превыспренней подвижнице и избранней рабе Божией, царице Кетеване, светилу Кахетии, приносим смиренную хвалу: о царице, яже дерзновенно царствуеши пред Троицею, от всех страстей освободи нас, да поем ти: Радуйся, блаженная великомученице царице Кетевано, скорая помощнице и ходатаице душ наших.
Ангели с человеки служаху тебе, святая, и уготовляше тя Господь в царицу земную и мученицу небесную; нас же научи пению сему к тебе:
Радуйся, отрасле благая Давидо-Багратидов. Радуйся, от юности святыню и благоразумие избравшая. Радуйся, от Творца душею и телом добре растворенная. Радуйся, сосуде, Ангелы хранимый. Радуйся, царей грузинских украшение. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Видя благоразумие и твердость твою, вооружаше тя Дух Святый, царице, яко истинную воительницу, художеством спасения, и ты, присно на Господа уповающи, пела еси Богу: Аллилуиа.
Егда от беззаконнаго Константина, убийцы отца и брата, призвана была еси, подобно делом Иродиадиным, хранящи чистоту, просила еси помощи Божия, и суд Господень сокруши злаго; и мы, возвеселившеся, научаемся пети сице:
Радуйся, новая Анно, хранительнице непорочнаго вдовства. Радуйся, Есфирь, сокрушившая беззаконие. Радуйся, невесто Царя царей и царице Кахетии. Радуйся, помощнице всех родителей. Радуйся, христианских дщерей укрепительнице. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Сила Вышняго умудряше тя, благословенная, и покрываше благодать святыни твоея царство Кахетинское, и народ обильно прииимаше плод Божий и с тобою пояше Богу: Аллилуиа.
Божественное желание служения единому Небесному Царю пронзаше тя, святая, и умножала еси благая дела, тщащися стяжати небесная сокровища; возлюби тя безсмертный Жених и избра тя в удел избранный, и мы избранию твоему приносим пение:
Радуйся, путей Господних взыскательнице. Радуйся, священников милостивая и монахов покровительнице. Радуйся, церквей и обителей созидательнице. Радуйся, нищих и сирот приемлющая. Радуйся, о едином горнем сокровище пекущаяся. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Якоже ковчег среди волн, тако и тебе, царице, не одолеваху волны мира сего; утверждала еси веру и мир во царстве и Богу пела еси: Аллилуиа.
Слышав укрепление грузин христиан, сообщник диаволь Аббас хотяше низложити богоизбранное царство и умножаше злыя ухищрения; ты же, яко агница непорочная, приношашеся за народ твой; сего ради вопием ти:
Радуйся, небесная птице, под крилома твоима нас покрывающая. Радуйся, о нас неутомимая молитвеннице. Радуйся, от врагов видимых и невидимых нас хранительнице. Радуйся, зедаше небеснаго жертвенника. Радуйся, непоколебимая хранительнице Церкве и народа. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Боготечною звездою явилася еси, блаженная, грузином, в Ширазе укрепляющи всех христиан святым житием твоим, и народ, подражая царице своей, сохраняше истинный закон и Господа славляше пением: Аллилуиа.
Жаждущии узреша от тебе обилие благодати и милости и, яко к оазису в пустыни, стекахуся вси, ты же, царице, напаяла еси их упованием на Бога; сего ради вопием ти пение:
Радуйся, Духом Святым умудренная. Радуйся, безпримерная победительнице прелестей диавольских. Радуйся, тезоименитых тебе укрепительнице. Радуйся, ласковая мати всех к тебе прибегающих. Радуйся, финиче райский, сладость подающий. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Проповедала еси житием твоим распятаго Иисуса и, хвалимая делательница, волею святаго Царя понесла еси тяготы народа и была еси ходатаица всех грузин, и присно поеши Господу: Аллилуиа.
Уподобилася еси небесным святым и мужественно подвизалася еси в плене; все жены укрепляхуся подвигом твоим и величаху Бога, и мы, величающе, приносим пение победы:
Радуйся, плен в звание на вечерю Господа твоего приявшая. Радуйся, плоть постом и молитвою изнурившая. Радуйся, всех заключенных утешение небесное. Радуйся, немощных благодатию возставляющая. Радуйся, от Небесныя Царицы избранная приближенная. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Богоборный владыка умышляше преклонити тя пленом, но якоже злато искушается в горниле, тако и ты совершалася еси, присно ведущи словеса Божия: вси раби Господни уготовляют себе ко искушением, — уповала еси на Господа и пела еси Ему: Аллилуиа.
Дивная и новая дела бываху руками твоими, егда благодатию Господнею создала еси малую обитель во граде агарянском и присно возсылала еси молитву и славила еси Бога; и мы неутомимо возсылаем пение:
Радуйся, молящимся благодать молитвы подающая. Радуйся, богослужителей прошения исполняющая. Радуйся, веру твою человеком мира явившая. Радуйся, отчаянных твердо возставляющая. Радуйся, безпомощным победу дарующая. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Странное и страшное коварство умысли искуситель, егда обещаваше тебе царство персидское и требоваше оставления закона Христова; ты же, к небесному венцу славы тщащаяся и столп истинныя веры, обличила еси беззаконие и единому Богу пела еси: Аллилуиа.
Возлюбила еси Господа Иисуса Христа всею душею твоею и всем помышлением твоим, оставила еси все вещественное и последовала еси, яко апостоли, учению Божию, и сподобилася еси обручения блаженному Жениху; и мы поем ти:
Радуйся, подвижником блаженства испрашивающая. Радуйся, православных научающая. Радуйся, беззаконие разсеявшая. Радуйся, Кахетии свет изливающая. Радуйся, духовная дарования обильно подающая. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Лики ангельстии, видяще житие твое, возлюбиша тя и величаху Творца и неотлучно укрепляху тя во искушении; ныне с ними поеши Богу: Аллилуиа.
Якоже не может рыба безгласная глаголати, тако и любомудрия риторов — души твоея; мы же, восторгшеся, возсылаем тебе хвалу:
Радуйся, в добродетелех превознесенная. Радуйся, Божественною благодатию очищенная. Радуйся, подвижником отраду приносящая. Радуйся, свеще присно светящая. Радуйся, кимвале доброгласный, заповеди Господни славящий. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Всем спасения хотящая, егда видела еси уклонение спутников, мужественно призывала еси и молилася еси, и сатана, благодатию твоею побежден, со страхом бежаше, и вси, Божественною ревностию исполнившеся, с радостию приимаху мучение и славляху Бога: Аллилуиа.
Дивна суть терпения твоя, царице, егда трижды различныя муки наведе на тя мучитель: разделяхуся вси уды телесе, плоть болезноваше, душа же, яко солнце, сияше и стремляшеся к небеси, еже достигнути лона Господня; и мы, славу твою зряще, приносим тебе пение:
Радуйся, блаженства небеснаго Иерусалима зрительнице. Радуйся, украшение райское, златом искушенное. Радуйся, венцами трехстолпными украшенная. Радуйся, врата Православия твердо хранящая. Радуйся, гроздь благовидный от винограда Церкве Христовы. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Пресвятую Троицу прославила еси житием и мученичеством твоим и наследила еси обитель небесную; терпением и кровию совлекла еси первую Еву и уподобилася еси второй Еве, царствуеши со Ангелы и поеши Богу: Аллилуиа.
Заря еси светящая от собора святых, скоро ходатайствуеши о просящих тя и просвещаеши молящих тя; сего ради приносим ти похвалу:
Радуйся, ковчеже, небесных благоуханий исполненный. Радуйся, обоженная дщи Господня. Радуйся, обителе, от Троицы возлюбленная. Радуйся, отпадших во истину приводящая. Радуйся, луче, кающихся просвещающий. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Благодати твоея просяще, приемлем море милости Божия и, радующеся, празднуем святую память твою и, безчисленная чудеса твоя видяще, поем Богу: Аллилуиа.
Хвалим, святая царице, весь подвиг и мужество твое, ибо утвердила еси Церковь грузинскую и соединилася еси с торжествующими на небеси и еси ходатаица поющих тебе:
Радуйся, порфирою Царя царей украшенная венценосице. Радуйся, непобедимая хранительнице Церкве и народа. Радуйся, мучеников красото. Радуйся, неугасимая лампадо пред Троицею. Радуйся, бисере светлый в венце мучеников грузинских. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
О треблаженная великомученице царице Кетевано, приими благодарственное сие моление наше и испроси нам от Бога победу над враги видимыми и невидимыми, да, тобою мужественни бывше, поем Богу: Аллилуиа. (Трижды)
Ангели с человеки служаху тебе, святая, и уготовляше тя Господь в царицу земную и мученицу небесную; нас же научи пению сему к тебе:
Радуйся, отрасле благая Давидо-Багратидов. Радуйся, от юности святыню и благоразумие избравшая. Радуйся, от Творца душею и телом добре растворенная. Радуйся, сосуде, Ангелы хранимый. Радуйся, царей грузинских украшение. Радуйся, дщи Давидова и похвало Иверии. Радуйся, блаженная великомученице царице Кетевано, скорая помощнице и ходатаице душ наших.
Превыспренней подвижнице и избранней рабе Божией, царице Кетеване, светилу Кахетии, приносим смиренную хвалу: о царице, яже дерзновенно царствуеши пред Троицею, от всех страстей освободи нас, да поем ти: Радуйся, блаженная великомученице царице Кетевано, скорая помощнице и ходатаице душ наших.
О треблаженная святая великомученице царице Кетевано, пребывающая пред престолы Пресвятыя Троицы, яко святая царица и мученица верная Христова, яже соблюла еси апостольскую веру, подвигом добрым подвизалася еси, прияла еси венец правды и приобрела еси себе крепкое заступление за нас, ибо ты еси исполнительница прошений наших.
О всесветлая великомученице, рабо Христова, покрый и укрепи богохранимый народ наш и державе его даруй мудрость христолюбия и победу на враги. Просвети кормчаго святыя нашея Церкве, Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, и преосвященных митрополитов, архиепископов и епископов, весь священнический и монашеский чин, и укрепи христолюбивыя власти и воинское устроение, и всех православных христиан.
О порфироносная в мученицах царице Кетевано, дивным твоим ходатайством даруй делателем плодоносие, пленным отраду, в темницах сущим покаяние, болящим исцеление, путешествующим покровительство и всем нам, грешным, оставление; покрый нас от врагов видимых и невидимых, да, безчисленныя милости тобою приемлюще, со всеми святыми славим Пресвятую Троицу, ныне и присно и во веки веков. Аминь.
Акафист составил настоятель Гремской обители игумен Гавриил (Джамбазишвили).
