Акафист преподобному Шио Мгвимскому
Во имя Отца и Сына и Святаго Духа. Аминь.
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды, с тремя малыми поклонами)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу (Поклон). Приидите, поклонимся и припадем Христу, Цареви нашему Богу (Поклон). Приидите, поклонимся и припадем Самому Христу, Цареви и Богу нашему (Поклон).
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Ты, избранный ученик, оставив земная попечения, богоноснаго учителя твоего Иоанна Зедазнийскаго и Духа Святаго чудесною помощию последовал еси спасению души, просветителю Иверии; от Вседержителя испросил еси благословение на подвиг твой, и ныне молитвою твоею избави нас от всякия скорби, вопиющих тебе: Радуйся, преподобне отче Шио, великий чудотворче.
От юности Бога возлюбивый, преподобне отче Шио, с учителем твоим Иоанном Зедазнийским, подвизавшимся в пустыни Каппадокийстей, пришел еси поклонитися Животворящему Хитону Господню и, его благословением изшед от горы Зедазенской в пустыню близ Мцхеты, снизшел еси в пещеру на безмолвие. Сего ради, всехвальне, поем тебе:
Радуйся, отче иноков; радуйся, на духовную высоту возшедый; радуйся, силы лукавыя сокрушителю; радуйся, от Бога силу исцеления душевнаго и телеснаго приявый; Радуйся, преподобне отче Шио, великий чудотворче.
Молитвою учителя твоего Иоанна Зедазнийскаго дарована тебе бысть благодать исцеления одержимых бесы человек, и от него слышал еси глас оный: «Блажен еси, верный чадо мое Шио, яко возложил еси руку на рало и вспять не зрел еси, но добре управил еси бразду твою. Сего ради и ты без труда избавишися от всех браней вражиих, ибо всем упованием возлюбил еси Христа и твердою верою исполнил еси святыя заповеди Его». Преподобный Иоанн, видя твердое твое изволение приступити к великому подвигу, облече тя во ангельский образ, и лице твое просветися, яко лице ангела; сего ради и мы хвалами взываем Богу: Аллилуиа.
От благоверных и богатых родителей рождься и страхом Божиим воспитанный, слово Божие в себе утвердил еси и, ведением закона церковнаго вооружен, и нас умудрил еси словом твоим: «Аще кто не присно поучается в законе Божии, далече есть от Царствия и пленник есть диаволь». Ты, иже присно избавляеши нас от сети оныя лукаваго, приими молитву нашу:
Радуйся, от юности душу твою мудростию евангельских писаний утучнивый; радуйся, елеем словесе Божия умягченный; радуйся, втайне от родителей к преподобному учителю Иоанну изшедый; радуйся, от учителя похваленный; радуйся, пред всеми учениками преподобным Иоанном словом его благословенный: «Се, юношу сего избра Бог и исполни Духа Святаго, и будет сей отец многих душ»; радуйся, от учителя тако благословенный: «Чадо, блажен еси, яко велий будеши пред Богом»; Радуйся, преподобне отче Шио, великий чудотворче.
Свыше промыслом в Каппадокии, по двадесяти летех подвига преподобнаго Иоанна, среди богоизбранных учеников его Господь благоизволи быти и тебе, и с ними шествовал еси во утверждение веры, от святыя Нины в Картли насажденныя; сего ради с радостию вопием Господу: Аллилуиа.
В Картли от патриарха Евлогия благословен, с учениками преподобнаго Иоанна последовал еси подвигу на горе Зедазенской, идеже во славу Божию иноческий подвиг паче умножал еси. Сего ради и мы ублажаем тя:
Радуйся, иноческаго чина добрый хранителю; радуйся, ангельскаго подвига подъятелю; радуйся, силою победы возносимый; радуйся, яко учителя удиви сила, в тебе пребывающая; радуйся, сеть сатанинскую, яко паучину, разрушивый; радуйся, молитвою твоею одержимых многоразличными недуги избавляяй; радуйся, яко тобою первое оно чудо показа учитель на пути Зедазенском ходящим; Радуйся, преподобне отче Шио, великий чудотворче.
Странное и славное явися на пути горы Зедазенския, егда невозможно бяше преити реку Арагви. Тогда преподобный Иоанн повеле тебе, отче Шио, испросити от Бога помощь, да добре прейдут на другий брег реки. Ты же, отче Шио, послушанием учителю став лицем на восток, помолился еси с тремя великими поклонами и, знамение крестное сотворив, повелел еси реке: «Отец наш Иоанн повелевает тебе, остановися, водо, да прейдем на другий брег». И воды покоришася тебе; сего ради славим Бога: Аллилуиа.
Силы небесныя удиви свыше дарованная тебе благодать чудотворения, превосходящая силу и слово человеческое. И человецы, удивляющеся, хваляху Господа, даровавшаго рабу Своему таковую благодать благотворения во утверждение веры на радость. Сего ради и мы вопием тебе:
Радуйся, чудесы твоими человеки в вере утверждаяй; радуйся, по двулетнем пребывании на горе Зедазенской с благословением изшедый проповедати слово Божие; радуйся, егоже сопровождаше молитвенное благословение Иоанново; радуйся, на запад от Мцхеты на подвиг изшедый; радуйся, в место безводное, дикое, каменистое и безутешное пришедый; радуйся, в пещеру, исполненную зверей и ядовитых змий и скорпий, вшедый; радуйся, иже, обрет близ места сего малую пещеру себе в жилище, воздвиг руце, молил еси Бога: «О Иисусе Христе, Боже мой, сотвори место сие упокоением рабу Твоему, и благодать Твоя да будет помощница смирению моему, и молитвы отца моего Иоанна да будут мне покров и помощь»; Радуйся, преподобне отче Шио, великий чудотворче.
Избрал еси пещеру тесну, в нейже едва телом твоим вмещался еси, и, всецело на Бога уповая, не вкушал еси пищи на укрепление сил твоих. Сего ради сподобился еси от Господа благословения шестидесятидневнаго поста; враг же рода человеческаго не престаяше наводити на тя страшнейшая искушения и брани, аще и всяко ухищрение его тщетно бысть; ты же пел еси укрепляющему тя Господу: Аллилуиа.
Егда отразил еси брани лукаваго и в пещере постом и молитвою паче укреплялся еси, тогда полчища бесов, завистию подвигнутыя, с воплем обступиша пещеру твою, да отвлекут тя от молитвы. Ты же не послушал еси их и, егда молитву твою соверши, изшел еси безстрашно и возгласил еси к ним: «О окаяннии, не весте ли, яко идеже сила Христова, тамо ничтоже вами возможно есть? Се, толико дней есть, и при всем, еже творите, ниже приближитися ко мне возмогосте, ибо Христос Бог мой сила моя, и аз вас нимало не боюся. Но отныне отъидите и отступите от мене вси делающии беззаконие». Беси же, отходяще, с прещением глаголаху тебе: «Шио, гордый старче, се, князь наш грядет семо, ибо ныне отиде на брань и убиение учителя твоего Иоанна, а заутра умертвит и тебе». Ты же, по отшествии их, безстрашно стал еси на молитву в ту же нощь вне пещеры твоея; и мы сего ради со смирением приносим тебе хвалу:
Радуйся, от Бога небесным светом озаренный; радуйся, яко слышал еси глас Божий: «О Шио, верный рабе Сына Моего»; радуйся, яко сподобился еси видети пред собою Пресвятую Богородицу; радуйся, яко видел еси с Нею перваго оного пустынника Иоанна Крестителя; радуйся, яко видел еси небесных граждан, знамением крестным вооруженных; радуйся, яко слышал еси от них пение; радуйся, яко пред Божественным сим видением пал еси ниц; радуйся, яко Пресвятая Богородица повеле тебе востати; радуйся, яко сподобился еси от Нея прияти небесную пищу; Радуйся, преподобне отче Шио, великий чудотворче.
Егда приял еси благодать от Пресвятыя Богородицы во образе небесныя пищи, обеща тебе Она, яко и паки даст тебе Божественную сию пищу, яже разрушит всякую козню лукаваго и исполнит пустыню сию многими учениками твоими. Видением сим, блаженне отче, с радостию уразумел еси Божий и Богородичен покров над тобою и, приятием небесныя пищи неизреченною сладостию Божественныя благодати исполнен, с благодарением взывал еси Господу: Аллилуиа.
Блаженне отче, непрестанно благодарение приносил еси рождшемуся ради спасения всех человек Иисусу Христу, избавившему нас от работы лукаваго; и мы похвалу тебе приносим:
Радуйся, силою терпения утвержденный; радуйся, молитвою Пресвятыя Богородицы вечнаго блага сподобивыйся; радуйся, место сие слезами твоими напоивый; радуйся, яко на всяк день от голубя пищу приимал еси; радуйся, яко молитвою твоею из камений источник истече; Радуйся, преподобне отче Шио, великий чудотворче.
В подвизе утвержденный, преподобне отче Шио, на всяк день Богу хвалу возсылал еси: «Господи славы и Боже, всех Утешителю, буди имя Твое благословенно во веки». И мы, подражающе тебе, смиренно хвалим Бога: Аллилуиа.
Непрестанно пел еси молитву псалмопевца: «Господь просвещение мое и Спаситель мой, кого убоюся? Господь защититель живота моего, от кого устрашуся?.. Аще ополчится на мя полк, не убоится сердце мое; аще востанет на мя брань, на Него аз уповаю». Бог благоволи, да явишися ты, светило веры, просветитель земли Иверския; и мы, о спасении душ на тя уповающии, взываем тебе:
Радуйся, молитвою твоею ловца онаго, воеводу Евагрия, на место твое приведый; радуйся, яко сподобил еси его видети в пещере голубя, пищу тебе приносящаго; радуйся, яко открыл еси Евагрию подвиг твой; радуйся, давый жезл твой Евагрию на помощь; радуйся, отпустивый Евагрия с утешением: «Иди, чадо, и возьми сие, и егда приидеши к Куре, вложи его в воду, и помощию Господа нашего Иисуса Христа река даст тебе путь, и прейдеши посуху, и, пришед в дом свой, устрой все имение твое и паки возвратися ко мне»; радуйся, яко прорекл еси Евагрию, яко будет сосуд избранный Божий; Радуйся, преподобне отче Шио, великий чудотворче.
Преподобне отче Шио, егда научил еси Евагрия, како подобает бранитися с лукавыми духи, облекл еси его в иноческую одежду и показал еси ему пещеру вдали от тебе, да тамо совершает подвиг свой. По сем разнесеся имя твое по окрестным селом, и мнози прихождаху и вселяхуся близ Евагрия. Ты же не престаял еси в молитве и посте, не исходя из пещеры, и токмо в неделю поучал еси учеников твоих. Коль скорбен бысть, егда узрел еси плачущаго ученика твоего, емуже сокрушися сосуд, водою речною наполненный. Но видением Ангела, иже ударом жезла у подножия единыя скалы показа тебе место текущия воды, обрадован, абие утешил еси скорбящаго брата и поведал еси ему видение Ангела. Сего ради и мы взываем дивному во святых Богу: Аллилуиа.
Утешен видением Ангела, рекл еси брату твоему: «Не скорби, брате, ибо вместо слез твоих и за упование твое, се, Бог на месте сем изведе воду, да оттуду без труда почерпается питие братиям». По сих словесех изобильно истече источник, и пустыня она бысть яко Едем; сего ради и мы хвалою величаем имя твое:
Радуйся, яко умножил еси число братий твоих; радуйся, яко Божиим промыслом взошел еси на гору на востоке; радуйся, научивый учеников твоих воздевати руце свои к небеси; радуйся, повелевый им со слезами молитися пред Богом, да знаменует место к созданию храма; радуйся, положивый разженный угль на длань руки твоея и возложивый на него фимиам; радуйся, благоуханием сим благословлявый братию твою; радуйся, яко пели есте Богу: «Господи, помилуй»; радуйся, иже молитвою направил еси дым к небеси; радуйся, показавый братиям место к созданию храма; радуйся, иже столп фимиамный с востока на запад направил еси; радуйся, узревый дым фимиамный, яко вервь, над дебрию утвержденную; Радуйся, преподобне отче Шио, великий чудотворче.
Преподобне отче Шио, егда стал еси на горе, показал еси братиям твоим место к созданию храма Воздвижения Креста. Егда же снизшел еси с горы, фимиам с огнем вложил еси в кадильницу и, трижды ударив заступом, глаголал еси: «Слава Тебе, Боже, во Трех Лицах и единосущии славимый. На месте сем соверши храм славы Твоея». Над пещерою же, идеже ста столп дыма, по сем воздвигнут бысть храм святаго Иоанна Крестителя. Ты же, мало отшед, паки трижды ударил еси землю заступом оным, глаголя сице: «Пресвятая Богородице Марие, рождшая Слово Божие плотию, зде утверди дом во славу Твою». На сем же месте создан бысть храм Успения Пресвятыя Богородицы. Егда же Евагрий узре чудо сие, возгласи гласом велиим: «Отче святый, буди воля Божия и твоя, ибо Духом Божиим глаголют уста твоя, и всякую волю твою творит Бог». Сего ради на небеси и на земли поют Богу: Аллилуиа.
Царь грузинский Фарсман умышляше возвратити Евагрия в мир и сего ради прииде видети обитель ону, но отказом Евагриевым зело опечалися. Егда же узре лице благодатию облеченнаго преподобнаго Шио, удивлься, паде пред ногама его и испроси от него молитвы. Тако и мы припадаем тебе, преподобне отче, и ублажаем тя:
Радуйся, яко удиви царя ангельская благость твоя; радуйся, яко благодатию и святынею просиял еси; радуйся, яко царя привел еси пред тобою в поклонное смирение; радуйся, яко от царя приносимую тебе честь смирением твоим отвергл еси; радуйся, яко не забывал еси страха и гнева Божия на мир; радуйся, яко благословил еси царя, со слезами просившаго у тебе молитвы; радуйся, яко молитвою твоею отгнал еси от царя вся враги его, видимыя и невидимыя; радуйся, утвердителю царя онаго в вере и любви к Богу; радуйся, венец на главу царя возложивый; Радуйся, преподобне отче Шио, великий чудотворче.
Егда един от вельмож, с царем бывших, егоже око стрелою уязвлено и всецело угашено бяше, исполнен веры в исцеление, припаде к ногама твоима, преподобне отче, и абие исцеле, чудом сим удивлени вси славляху Бога. Царю же о милостынях, обители данных, смиренно отвещал еси: «Господи царю, сердца царей в руце Божией суть, и еже угодно тебе, сотвори». Егда же приношеньми царевыми совершися создание храмов, во праздник Мученичества освящени быша католикосом Макарием; в то же время, егда католикос умышляше рукоположити тя во иереи, ты, смирением и кротостию облечен, далече себе устранил еси. Мы же, ведуще сие, сокрушенным сердцем славим Бога: Аллилуиа.
Преподобный отец Шио звери, иже многу скорбь наношаху монастырю, молитвою своею всецело изгна и словом своим: «Отныне вашему и нашему Создателю повелено есть, да словесными человеки исполнятся вся пустыни сия; ныне отъидите, возлюбленнии мои, и взыщите место, идеже упокоитеся», — покорени, далече разбегошася, кроме единаго волка, егоже сам преподобный отец восхоте оставити, да будет пастухом ослов. Волк же он повиновашеся повелению твоему и на всяк день исполняше послушание свое, дондеже по смерти единаго осла старец Конон, опечалившися, люте обвини неповиннаго волка. Волк же, сего ради опечален, поведе Конона и иных братий и показа им осла Кононова, с камени низпадша. Преподобный же отец Шио словом благодарности освободи волка от служения и пастырство возложи на братию оных. Вси удивляхуся и славляху Бога, даровавшаго таковую благодать рабу Своему, яко и звери исполняху и повиновахуся словеси его; и мы хвалою да поем истинному рабу Его:
Радуйся, яко подвигом твоим и благодатию Господнею достигл еси в меру онаго святыни, егда вся тварь, звери и птицы, яко в раи Адаму, словеси твоему повиновахуся; радуйся, сподобивыйся посещения обители твоея от учителя твоего Иоанна; радуйся, яко приял еси благословение от преподобнаго Иоанна на затвор твой с молитвою и благословением католикоса; радуйся, послушанием игумену уподобивыйся апостолу Павлу; радуйся, бодрствуяй о душах наших; радуйся, приемый таковое благословение от католикоса: «Отче, иди сим добрым и тесным путем, вводящим в жизнь вечную, имже мали ходят, и сотвори пещеру ону лествицею, возводящею тя в Царство Небесное, и тьму, сущую в ней, — приводящею к свету невечернему, и временную сию скорбь — предвозвещающею вечное упокоение и непреходящую радость, еяже сподобитися имут вси, богоугодно совершающии житие свое»; радуйся, иже прежде затвора со слезами поучал еси братию твою; радуйся, иже братию твою смирением, послушанием и кротостию спасатися от козней сатанинских учил еси; радуйся, иже внушал еси им гнев попирати; радуйся, иже учил еси любовию приближатися к Богу, Иже есть любы; радуйся, иже учил еси посту, яко прогоняющему скверну земную; радуйся, иже нерастленным и твердым хранением ума отгоняти хульныя помыслы внушал еси; радуйся, учении сими сети сатанинския разрушаяй; радуйся, иже именем Господним обещавал еси им небесную вечную радость; Радуйся, преподобне отче Шио, великий чудотворче.
Преподобне отче Шио, учил еси братию твою присно поминати смерть и страшный суд и сим образом внушал еси, яко овии убо, тесным путем шествующии, в вечное упокоение достигают, инии же, иже в наслаждении и нерадении пребывают, от Царствия Небеснаго отлучаются. Уготовлься к затвору, по молению братий правителем обители поставил еси перваго ученика твоего Евагрия. Ты же словом и житием твоим всех призывал еси удалитися от земныя суеты; мы же, подобно братии оной, с благодарением поем Богу, даровавшему грузином таковаго учителя: Аллилуиа.
Дав жезл Евагрию, преподобне отче Шио, укрепленному многими наставлениями, како подобает ему хранити братию свою от всякаго зла, даровал еси ему учения «всепрекрасная и сладкая, имиже присно наставляется все собрание». Во время разлучения облобызал еси всех братий и внушал еси им бегати от всякаго зла и греха, и поминал еси словеса апостола Петра: «Трезвитеся, бодрствуйте, зане супостат ваш диавол, яко лев рыкая, ходит, иский кого поглотити», и еще приложил еси сие: «О всяком слове праздном дадите ответ в день судный», ибо слово сие изрече Сам Владыка Господь; и мы, словом сим со смирением наученнии, похвалою вопием тебе:
Радуйся, яко собор братий наставил еси; радуйся, великий угодниче Божий, иже на земли зрел еси свет небесный и сподобился еси прияти благодать чудотворения; радуйся, апостольских учений ревностный хранителю; радуйся, яко в пещерах обитель братий по учению преподобных и богоносных отцев устроил еси; радуйся, яко, аки солнце, возсиял еси в жилище зверей и вселил еси в нем человеки, подобныя Ангелом; радуйся, яко в пещере затвором соблюл еси себе, и никтоже по сем сподобися видети блаженнаго лица твоего; радуйся, яко, в пещере пребывая, вся страсти во плоти распял еси; радуйся, яко возрасте в тебе дух благий, яко злак; радуйся, яко земли предал еси себе на истление, умом же от небесе не отлучался еси; радуйся, иже присно чаял еси небесныя благодати, яко дождя, землю напояющаго; Радуйся, преподобне отче Шио, великий чудотворче.
В пещере ниц повергся, слезами землю омочал еси и глаголал еси: «Пришлец аз есмь у Тебе, Господи, и не остави мене изнемощи прежде отшествия моего». Восстав же, возводил еси очи твоя ко Господу и вопиял еси: «Да исправится молитва моя, яко кадило пред Тобою, воздеяние руку моею жертва вечерняя». На всяк день воду и хлеб, от единаго старца свыше спускаемыя, вкушал еси и с молитвою благодарение приносил еси Богу. Сего ради сподобился еси силою Божиею всецело умертвити страсти во плоти твоей и серафимскую песнь взывал еси Творцу: Аллилуиа.
Егда из Персиды приведен бысть недужный водянкою, паде пред пещерою преподобнаго отца Шио. Преподобный же Шио смирением своим прошаше Господа своего о исцелении его, веруя, яко Сам Бог исцелит его рукою ангела. Тогда Евагрий, взяв три власа от куколя преподобнаго отца, понесе недужному, да тем подастся ему исцеление. Но, о чудо! Недужный он обретеся всецело здрав, иже проповедаше пред всеми, како исцелися от преподобнаго отца Шио и како даде ему прекрасный юноша три власа старца некоего и повеле поглотити, и абие исцеле. Преподобный же Евагрий не обрете трех оных власов в руце своей и удивися, и вси славляху Бога. Исцеленный же он человек на всяко лето приношаше фимиам и елей братии обители. По сем сын единаго перса, слепый, исцеле молитвою преподобнаго отца Шио, и той многа приношения приношаше братии. В некое же время разбойницы ограбиша перса, и, от преподобнаго Шио незнаемии и ослепленнии, разбойницы на ослах приидоша ко монастырю и вся исповедаша, како от дуновения некоего старца ослепоша. Преподобный же отец Евагрий моли преподобнаго Шио о исцелении их, и приложением жезла преподобнаго отца и тии исцелеша. Чудесы сими удивленнии и мы с умилением припадаем тебе и хвалу приносим, преподобне отче Шио:
Радуйся, яко в пещере великим подвигом совершенства достигл еси; радуйся, яко постом, молитвою, бдением и многими трудами в пещере плоть твою изнурил еси; радуйся, исцеливый ослепленных и покаявшихся разбойников; радуйся, яко разнесеся имя твое чудотворением твоим во странах чуждих; радуйся, по преставлении от Ангел на небо возведенный; радуйся, иже по святом причащении воздел еси руце на небо, глаголя: «О Владыко! В руце Твои предаю дух мой»; радуйся, яко оставил еси нам пещеру твою хранити в ней мощи твоя, силою исцеления облеченныя; радуйся, яко гроб твой бысть украшением обители; радуйся, яко святыя мощи твоя отгоняют всякое ухищрение сатанинское; радуйся, яко исцеляеши одержимых; Радуйся, преподобне отче Шио, великий чудотворче.
О преподобне отче Шио, приими от нас недостойных малое сие моление и тепле помолися о нас пред Господем Богом. Ты, иже исцеляеши бесноватыя, обращаеши заблудших, помогаеши сущим во искушениих, пустынножителей покровитель еси, иноков наставляеши, ходатайства твоего и мы просим. О преподобне отче, избави нас от искушений и сетей, от глада и тесноты, от огня и меча, от междоусобныя брани, от всякаго зла и от всякаго нашествия. Моли Бога, да дарует нам духовное и телесное здравие, в кротости и смирении житие и на небеси вечное благо, да и нас Господь сподобит Небеснаго Своего Царствия, идеже ныне и ты упокоеваешися и вси святии хвалами славят Отца и Сына и Святаго Духа, и мы хвалу возсылаем Ему: Аллилуиа. (Сей кондак трижды.)
Затем икос 1 и кондак 1.
О великий угодниче Божий и чудотворче, преблаженне отче Шио! Ангелов сожителю, апостолов подражателю и, яко мученицы, подвизавыйся, иноческим житием мучителя пленивый, пустынножителей наставниче, молящих тя чудесною силою помощниче и темных и злых сил невидимый прогонителю.
О преблаженне отче Шио, молитвою твоею избави нас от всякаго зла и от сетей сатанинских, от воздушных стражей и мытарств, от огня геенскаго. Врачу одержимых лукавыми духи, избави нас от видимых и невидимых врагов и от всякия скорби и сети. Моли возлюбленнаго тобою Господа, да силою непобедимою Ангелов Своих отженет от нас всякое зло.
О пресвятая звездо Божественныя славы, ходатайствуй о нас пред Пресвятою Троицею, пред Неюже ныне предстоиши, да избавит нас от междоусобныя брани и дарует нам безмятежное и разумное житие, земли плодородие, воздуха благорастворение, Божественным светом озарение и с праведными водворение, яко Тому подобает слава, благодарение и поклонение от века и до века. Аминь.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых, помилуй нас. Аминь.
Из книги «Житие, акафист и параклис преподобнаго Шио Мгвимскаго» (Руставская епархия, 2004).
Напечатано по благословению Святейшаго и Блаженнейшаго Католикоса-Патриарха всея Грузии Илии II.
Допущено к изданию кафедрою богословия Тбилисской духовной академии.
Акафист составила монахиня Нина (Брегвадзе).
Редактор акафиста и параклиса: Эдишер Челидзе, доктор филологических наук, заведующий кафедрою богословия Тбилисской духовной академии.
