Акафист Животворящему Столпу и Хитону Господню
Взбранному Воеводе моему и Помощнику непобедимому, святому и боголучезарному Столпу, иже сияет над Господним и свыше тканным Хитоном, и молниеносно озаряет небоподобный престол, и поющих и празднующих его украшает, и утреннюю и сугубую радость дарует, похвалу приносящим: Радуйся, Столпе пресветлый.
Взбранный Воеводо наш и Помощниче непобедимый, Столпе святый и боголучезарный, иже сияеши над Господним и свыше тканным Хитоном, и молниеносно озаряеши небоподобный престол, и поющим и празднующим сугубое даруеши, приносящим тебе похвалу: Радуйся, Столпе пресветлый и Хитоне животворящий!
Се, соберитеся на праздник сей святый Господский, концы земли, и Ангели с человеки, вси купно единением духа: пророцы и праотцы, апостоли, мученицы и святители, лики отцев и дев. Потщитеся вси и прилетите, ликуйте, взывайте и возгласите; ударяй в гусли, пророче, и вси святая Писания разверзите, во еже восхвалити Столп животворящий, и глаголите:
Радуйся, Столпе святый и животворящий, ибо над Божественным Хитоном яко заря сияеши; радуйся, Столпе, концы небес просвещающий, душы безсмертием оплодотворяющий; радуйся, Столпе блаженный, присно светлым оком взирающий на святый Хитон; радуйся, молниеобразно блистающий и святое миро верным источающий; радуйся, Столпе Божественный, сладость душ вкушающий; радуйся, Столпе, собеседниче и таинниче великаго боговидца Моисея; радуйся, вождю и спутниче Израилев; радуйся, новаго закона предвозвестниче, на Фаворе и во Иордане послуживший Сыну Божию; радуйся, свете, свидетельствующий Света Сыном возлюбленным; радуйся, упование отцев, пустынных подвижников и святых подвижников, по временом видимое пресветлое; радуйся, солнцеобразными златовидными лучами сердца верных, яко стрелами, уязвляющий; радуйся, в Сионе над апостолы во дванадесять частей огненными языки сошедший; радуйся, паче же Пресвятыя Богородицы прообразе, от земли прозябшия и до небес возвышенныя, яже Богу нас соедини; Радуйся, Столпе пресветлый и Хитоне животворящий!
Небеса с землею, и земля с рождениями ея, и небо со светилы своими, солнце и луна со звездами, и паки земля со всеми рождениями своими, вкупе все воспойте! Скоти со зверьми польными, миритеся, растения же и древа различная, дивная польная и пустынная, плодоноснии плодами и благовоннии, благоухание издайте и вкупе соберитеся, пойте и хвалите! Со радостию и животная да взыграют, ибо Столп святый животворящий пресветло духом веселит и пищею безсмертия исполняет люди своя, поющия: Аллилуиа.
Яко Ангела пресветла и от горних сил хвалами воспеваема, всего же мира озарителя чудесы видяще и уразумевше, удивлением стояще, вопием тебе, глаголюще сице:
Радуйся, светлостию твоею сияющий под небесем; радуйся, дивностию твоею мир озаряющий; радуйся, солнце незаходимое, всесветлое; радуйся, свете, светила блистанием превосходящий; радуйся, яко над святым и блаженным Хитоном яко заря сияеши; радуйся, яко молниеобразно озаряеши престол Сына Божия; радуйся, оскудевшия веры обновление; радуйся, идольскаго зловерия погубителю, истинныя же веры явителю; радуйся, живущих на земли светом облекший; радуйся, беззаконных сынов агарянских победивший и рог спасения воздвигший; радуйся, непобедимый Воеводо христиан, Бога с человеки примиривый; радуйся, люди избранныя, род святый царский стяжавший; радуйся, имже покланяются Создателю; Радуйся, Столпе пресветлый и Хитоне животворящий!
Приидите, вси рождения света, сынове купели, любителие праздника, и узрим странное видение: Столп блистает и светло лучи молниеносно испущает, Хитон возсиявает, и сияния света яко солнце изливаются, небо церкви эфиром и светом сугубым твердь бывает, праздник же дышет благоуханием, и мы, вернии, веселимся радостно — о, стечение светов! — и чувственно поюще возвещаем: Аллилуиа.
О Божественная радость, о праздник препрославленный! О коликая сладость, душу обезсмертствующая! Ибо изобразителям Святыя Троицы — престолу Божию, Столпу света и святому Господню Хитону — люди верных поют и похвалу приносят, и с ними Ангели ликующе взывают:
Радуйся, престоле Бога Вышняго; радуйся, Хитоне, свет объемлющий; радуйся, Столпе живый и животворящий, егоже Свет безпредельный, светодержавный Сын Божий, яко свет блистающий и яко столп огненный воздвиже, просвещающий сердце народа грузинскаго, омраченное прелестию идольскою, неверных же яко огнь немилостиво поядающий, достойно воздающий за бегство от святаго света твоего; радуйся, о Хитоне Божественный, блаженно объявший во время оно огнь Божества, ибо паче всех дивно чудо сие тобою, егда огнем Божества облечен был еси и, неприкосновенно пребывая, упованием и утверждением рода нашего пребываеши до сего дне и до века, и несомненно Того же бысть сила, неизреченно хранящая святыню твою; радуйся, о треблаженный Хитоне Божественный; Радуйся, Столпе пресветлый и Хитоне животворящий!
Свет от Света посланный, святый Господень Хитон, и Столп животворящий, и престол Божий со страхом да восхваляются, и Виновнику светов воспоим, глаголюще: Аллилуиа.
Приидите убо, соберитеся, дивною любовию соединеннии, людие вернии, от Христа сосанием святаго мира воспитаннии, и за вкушение святыя оныя пищи, безсмертными творящия души наша, малое нечто воздадим и мы словесным восхвалением по силе:
Радуйся, о Церкви Божия, юже Зиждитель всех Бог на основании непоколебимой крепости святых апостол положи, по словеси Господню, якоже рече верховному апостолу Петру: «Ты еси камень, и на сем камени созижду Церковь Мою, и врата адова не одолеют ей», мученики же, яко сосцы, привеси, от нихже нектар крове сосуще, безсмертия пристанища достигаем и радуемся во веки; радуйся, о Столпе светлый, иже над светлым Хитоном света яко око солнечное свыше сияеши, емуже блистания молний лучей огненных подаются, яже сугубо дивно сияют, яко сугубыя молнии среди зари; радуйся, о покрове Божий, руками человеческими неуготованный, егоже превосходство имя «свыше тканный» явственно сотвори, егоже едина благословенная Пресвятая Мати Божия сподобися святыма рукама служащи прикоснутися, ибо, егда со страхом и благоговением облачаше Сына Своего и Бога, сугубое блаженство даровашеся тебе благодатию Сына и Матере, прикосновения обоих ради: о треблаженный Хитоне Божий и Спаса нашего Иисуса Христа; радуйся, о Соборная Церкви, воистину собрание всякаго блага, понеже Глава всех благ и сокровищ, Создатель и Бог всех, в тебе обитает: сего ради и нарицаешися собранием, ибо вси вернии в тебе облекаемся во свет Христов, и в тебе просим избавления от грехов, и в тебе будет вечное жилище наше по разрешении от телес сих человеческих в надежде благих, да непостыдно с радостию возстанем в последний великий день суда и речем: Радуйся, Столпе пресветлый и Хитоне животворящий!
Светы, от Света возжженныя, светлейшия его и преславныя во вселенней, превыше да восхваляются, и чада Соборныя Церкве, возгласите, глаголюще: Свят престол превознесенный и превысочайший, свят Хитон блаженный, свят еси ты, Столпе животворящий, аллилуиа.
Подвигнем органы и мусикийския орудия словесе, и изобильно да источит язык сквозь устне нектар, веселием услаждающий душевный слух, и речем словеса хвалы сице:
Радуйся, о Столпе живый и святый, издревле прославленный чудесы и различными знамении украшенный, егда пред людьми израильскими шествуя, непогрешительно водил еси их, аможе восхоте тобою Творец всех светов, и твоими чудотворениями прославляшеся Бог в пустыни четыредесять лет вкупе с великим Моисеем, великими подвиги стражем бывый в помощь людем израильским, иноплеменников же и Амалика истребитель; радуйся, о Хитоне Сына Божия, иже чудно послужил еси Тому, Егоже небеса вместити не могут неописанием безпредельнаго естества Божества, и в тебе чудно вместися пресветлое тело Божества, еже яко молния блисташе в тебе, и от излиявшагося из него света весь мир неоскудно просвещашеся; Радуйся, Столпе пресветлый и Хитоне животворящий!
Трубы, возгремите в концах земли, и силы небесныя, иже в вышних есте, яко молния блистайте и летайте непрестанно, и ко всем племенем глаголите и со воздыханием ликуйте: потщитеся вси, ибо Сын Божий праздник и брак уготовляет в жилищи Своем, и Столп Пресвятый посреде его, яко сосец, всем подает и безсмертием напаяет нас миром неистощимым; мы же вопием: Аллилуиа.
Не удержимся благопомышлением, но еще любовию подвизаемся к совершеннейшему приложению, и паки мало глаголем, понеже ползу словесе нашего уздою связахом немощию предшествия, и речем:
Радуйся, о престоле Божий, ибо в тебе соединяются небесная и земная, горняя с дольними снисхождением и дольняя с горними возвышением, и ликующе воспевают Создателю своему Богу непрестанно сладкогласным славословием, яко: Свят Господь Саваоф, исполнь небо и земля славы Его, осанна в вышних, благословен Грядый и Вселивыйся в престоле славы Своея на земли, Иже пребывает во веки веков; радуйся, о Столпе живый и животворящий, о немже святыя души многажды радуются, ибо видением твоим оплодотворял еси жизнь безсмертия, егда по временом являлся еси душам святых, в пустынях и в разселинах каменных подвизавшихся, и мучеником, многими подвиги украшенным, иже видением твоим укрепляхуся, взирающе с надеждою на будущих воздаяний благолепие; радуйтеся, сугубии свети и близнии очеса, солнца светлейшая, яже взаимно друг на друга сияете и блистаете, яко молния в эфире, и солнце в огне, и заря в денницы, ибо, егда Столп свыше сияет на Хитон и Хитон снизу на Столп, взаимно срящутся сугубии свети оныя; чияже убо души не возрадуются о блаженном оном видении, деле Сына Божия; радуйся, о Церкви святая, яже во утробе своей имаши, яко сосец, Столп святый светлый, питающий не млеком, но святым миром, безсмертными творящим души, иже неоскудно источает нектар безсмертия, вкушаемый душами всех людей, во Христа облеченных; Радуйся, Столпе пресветлый и Хитоне животворящий!
Престол Божий высокий, небесем уподобленный, иже имеет Столп во утробе, яко мати, чада своя блистанием веселит, и бездну благодати, святое миро и златонектар, росу духовную, источает глаголющим: Аллилуиа.
Всесветлый и светотворящий и просветителю сердца и ума всех уповающих на тя! Якоже дивно явил тя есть Бог, тако и ты дивно спасаеши всех и избавляеши от напастей призывающих имя твое и глаголющих:
Радуйся, о столпе, объемлющий свет неприступный, егоже, яко алавастр, имамы, иже носит внутрь благоухание святое и освящающее, обоняние святых душ; ибо, егда сокрушаше жена алавастр, мажущи миром нозе Господни, подвизашеся, нынешний же сей образ бывает тебе преподаяние святаго мира, аще и несокрушен пребываеши ныне и во веки; радуйся, о Хитоне Божественный, иже во стража и покровителя дарован еси роду нашему грузинскому от Сына Божия, покрываяй и объемляй не токмо тело Божества, но паче наготу душ наших грехом; ибо в искупление и залог спасения нашего предпосла тя Премудро всем Строящий, да благим оным и блаженным стражбою благоправно ведеши души наша путем истины; Радуйся, Столпе пресветлый и Хитоне животворящий!
Якоже два проповедника, подобие рек, великий Андрей и преподобная Нина, потопиша всю мерзость идольскую страны грузинския, сице и сии две реки плод духовный напаяют непрестанно и потопляют всякую скверну поющих: Аллилуиа.
Две сии реки, отсюду и оттуду потопляющия прелесть и очищающия скверны, веселятся и украшают праздник, и с нами гласом воздыхают, и Столп животворящий восхваляют, глаголюще:
Радуйся, о престоле, небесем подражающий, ибо чрево твое святое носит превысочайшую и превосходнейшую святыню, красоту и цветение украшения светов, в тебе сущих; ибо, егда Столп животворящий и Хитон Господень взаимно сретаются блистанием, яко солнце и луна, иерее же и диакони различное сияние являют, яко звезды, освященным служением непорочных, и херувимски и серафимски устнами над Жертвою Господнею сладкогласно поюще, с благоговением предстоят, тогда сущия уравниваются достоинству блаженства твоего, о престоле, небесем подражающий; радуйся, Столпе светлый, иже Сыну Божию и славе Божества дивно свидетель был еси, егда на Фаворе блисташе над Светодержавным Иисусом Богочеловеком, второе пришествие возвещая, ибо сияние славы твоея верховныя апостолы, на Сына Божия странно зрящия, яко бездыханны сотвори, ужасшияся вкупе от света славы твоея и от гласа Моисеева и Илиина; и паки во Иордане, егда в водах грех человечь потопляше, всякая же слава от Того Бога видяшеся; радуйся, о Хитоне, неизреченный хвалою языков человеческих, ибо аще рабов пелены тако прославляются, якоже известно есть о одеждах Аароновых, о покрывале лица Моисеова, о милоти Илииной и Иоанновой, о сударях и убрусах Петра и Павла, кто убо возможет восхвалити славу твою, Егоже небеса не вместят, Сам Бог Создатель всех в тебе благоволением вместися; радуйся, о треблаженный Хитоне Божественный, ибо едино сие достойно есть тебе в похвалу — нарицатися Хитоном Самаго Бога, Хитоне Божественный и Господень; Радуйся, Столпе пресветлый и Хитоне животворящий!
Днесь Премудрость Божия и Слово Отчее уготова престолу Своему славу непостижимую и всебезпредельную, и Столп животворящий, иже светлым оным светом сияет и исполняет весь мир благоуханием Божественным, празднует и просвещает душу и сердце поющих: Аллилуиа.
Егда на капищи идольстем отроцы закалахуся, сатана веселяшеся; зде же, пред Столпом, егда отроцы от купели просвещаются, сатана рыдает, Ангели же радуются, и мы Христа да величаем, глаголюще:
Радуйся, о престоле Бога Вышняго, ибо зде к превысшей и преблаженнейшей песни песней понуждаюся восхвалити тя: ничтоже равняется блаженству сему; о, радуйся убо, радуйся хвале и славе твоей, понеже наречением престола Божия и вмещением Бога в тебе прообразом бываеши Превысшей всех тварей, превосходнейшей всякия похвалы Пресвятей Богородицы и Приснодеве Марии, Матере Божией, в Нейже вместися: коея убо славы еще, кто возможет восхвалити тя, о треблаженный, ибо довлеет тебе в похвалу и славу уподобление Ея, Еяже ради Бог на землю сниде и небесная и земная соедини, мы же, вкушающе Тело и Кровь Сына Ея, тем радуемся во веки веков; Радуйся, Столпе пресветлый и Хитоне животворящий!
Богом воздвигнутому Столпу сему, воздухи разсекающему и на высоту эфира молниеносно восходящему и паки к нам милостиво во веки возвращающемуся и посреде нас стоящему, воспоим с дивным Давидом и речем: Благословен Грядый к нам во имя Господне, Иже присно пребывает и сияет во веки. И паки взываем: Имени Твоему подобает святыня, Господи, в долготу дний; спаси нас, Иже в вышних сый: Аллилуиа.
Боже, Иже в Сионе Духа Святаго излиял еси на апостолы и огненными языки явил еси их попаляющими плевелы еретиков и жертвенники капищ, и премудрости исполнил еси их, тако и нам накапи премудрость, яко каплю огня, да достойно украсим праздник пением Божественным и речем:
Радуйся, о Столпе светлый и просвещающий всех уповающих на тя, ибо и в тебе превысшую и превосходнейшую хвалу и блаженство приносити уготовляю, яко всем благим добрый конец и пристанище: ибо и ты прообразом честь имаши Всеблагословенныя оныя Матере Божия, ибо воистину Столпом света предызображенным от святых Писаний знаем наречение Ея, от земли до небес досязающим, от земли убо прозябшим, до небес же вознесшимся, в Нейже вселившийся Господь во веки пребывает, и Бог Ею посреде нас; сего ради коль превыше слова воспоминание и хвала восхваления твоего, Столпе светлый, прообразе превысшаго онаго Столпа света, Блаженныя Девы; Радуйся, Столпе пресветлый и Хитоне животворящий!
Днесь Христос, Сын Божий, препресветлую и блаженную радость уготовляет невесте Своей, Церкви, яже во утробе своей, яко святый светильник, имеет Столп животворящий, и блистает яко молния, и просвещает весь мир, и концы земли веселит; и мы, чада Церкве, с силами небесными взываем и глаголем: Аллилуиа.
Чины ангельстии, невидимо окрест тебе поющии, Столпе животворящий, видими бывают нами; и мы с ними славим украсившаго Бога и глаголем:
Радуйся, Столпе животворящий, иже святое и освящающее миро источаеши душам верных и обожаеши всех, к тебе прибегающих; радуйся, Столпе животворящий, солнца светлейший и видения эфира превысший; радуйся, светы зари и молнии помрачающий; радуйся, свете, красотою твоею очесем сим плотским невидимый; радуйся, руками человеческими неприкосновенный и неиспытанный; радуйся, о Хитоне преблаженнейший паче всех блаженств, ибо многочисленная и безпредельная и о тебе богословствую: аще бы кто собрал всех богословов, и риторов, и превысшее любомудрие имущих, кто возможет достоинство блаженств и похвал твоих изрещи, понеже непостижимых похвал сугубых чести сподобился еси, егда естество Божества, в теле сущее, тобою объемлемо бяше, и паки всеблагословенныя и блаженныя персты Пресвятыя Матере Его с желанием и любовию милостиво служаху тебе; Радуйся, Столпе пресветлый и Хитоне животворящий!
О блаженная мати Нино, похвало апостолов и славо жен, яже подвигом и трудом твоим, всегдашнею молитвою и постом, сподобилася еси блаженнаго видения, единым Ангелом подобающаго, ибо руками человеческими неприкосновенный Столп, вознесенный на небо, узрела еси, и паки нектаром слез твоих низшедший, между небом и землею и неприступен вещем человеческим пребывает во веки, и покрывает души и телеса поющих: Аллилуиа.
О неизреченное и дивное блаженство твое, Господняя и Божественная пелено света, молниями пресветлая, Хитоне святый, покрове тела Сына Божия! В заключение убо общее и единое «Радуйся» слагаю вам, Трие нераздельнии, раздельно разделяемии и нераздельно единосветлии и единосиятельнии, прообразы Святыя Троицы:
Радуйтеся убо, радуйтеся, и паки реку в честь Троицы образ числа вашего; радуйся, престоле святый, Столпе светлый и Хитоне Божественный, яко блаженно и треблаженно воспоминание и похвала святыни вашея; наипаче же и превыше сего, ибо прообразование ваше являет всецелое сообщество Пресвятыя Богородицы: престолом бывшая Богом, в тебе вселившимся, Церкви святая, и Столпе светлый, эфирным сиянием просвещающий род человеческий, светлый Столпе, и объятием естества Божества покрывающий, Хитоне Божественный, источайте убо нам присно, источайте златонектар и неоскудно изобильно истекайте святое миро, безсмертное вкушение души, и даруйте нам благодать Божественную обильно, и оставление грехов помощию Самыя Матере Божия, с упованием любящим милость Ея, понеже заповедь есть Сына Ея, яко: толцыте, и отверзется вам, ищите, и обрящете; Радуйся, Столпе пресветлый и Хитоне животворящий!
(Сей стих глаголется трижды, и потом икос 1 и кондак 1.) Составитель — Николай Гулаберидзе (вторая половина XII века), поэт, переводчик, историк, книжник, церковный деятель (Патриарх Грузии в 1176–1190 годах).
