Акафист святому благоверному царю Давиду Строителю
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.
Господи, помилуй (12 раз). Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Взбранному непобедимому и непостыдному помощнику благочестия людие паствы твоея подвизаем тя ко Богу в помощника и ходатая; ты же не умолкни ходатайствовати пред Ним, да дарует нам победу над враги и соблазны и на путь заповедей Своих направит уповающих на тя и хвалящих тя: Радуйся, мечу Мессиин и образе победоносия грузин, благоверный царю Давиде!
Свыше победу приемый над враги и двоедушными, дивно сохранил еси стадо твое от всех скорбей и печалей; ныне же виждь сети безчисленных врагов, лукаво на род наш наведенныя, и моли Всесильнаго Бога, да низложит борющих и утесняющих нас, враждующих на многоподвижный народ твой, да не рекут: где есть Бог их, на Негоже уповают? — и да отженет искушения и бесовския нападения от восхваляющих и хвалящих тя:
Радуйся, отрасле Иессеова, сыне Давидов, подобно ему рогом силы помазанный; радуйся, от корене благочестивых царей Багратидов прозябший; радуйся, древо светлоплодное, в Иверии произрастшее; радуйся, Давиде, избранниче Божий, свыше призванный во освящение народа твоего и во укрепление Иверии; радуйся, богопроповедниче верный, Духом Святым глаголавый и, яко великий Антоний, святыню стяжавый; радуйся, от Бога царем праведным и воином избранным благословенный и роду, в удел Деве Святей данному, дарованный; радуйся, царю-пресвитере и философе мудрый, Моисеевою кротостию исполненный; радуйся, царю-воине и учителю, духовною высотою и премудростию верха всякаго учения достигий; радуйся, пастырю бодрый, во времена господства беззаконных явленный; радуйся, человеколюбием просиявый и делы Православия прославленный; радуйся, мечем обличения и помощию брани над возлюбленным народом поставленный; радуйся, винограда отеческаго благословеннаго делателю неутомимый, тяготу дне понесый и данный тебе талант умноживый; Радуйся, мечу Мессиин и образе победоносия грузин, благоверный царю Давиде!
От юности превзошел еси сверстники твоя учением и любовию Божиею и, присно молитвою уязвляемый, дадеся тебе премудрость от Святаго Духа и превосходный дар зрения сокровенных; ныне и нам буди наставник жизни и ходатай ко Христу, Спасу нашему, да оставит нам вины и беззакония наша и в день суда сподобит нас славы Своея: Аллилуиа.
Егда бысть ти шестьнадесять лет, помазаша тя в Кутаиси и возложиша венец на юношу прекраснаго, яко премудростию и мужеством всех превосходящаго, ибо чаяху тобою избавления народа от безчисленных врагов; ты же, видя опустошение отечества, собрал еси воинство верное и непрестанно обучал еси мужественных воинов, уготовляя воинство к брани, и начал еси сокрушати нападающих; сего ради подвизается язык наш восхвалити светлый подвиг твой:
Радуйся, от Георгия Чкондидели словом веры и добрым учением воспитанный; радуйся, в юности старческую премудрость обретый; радуйся, обучением Божественных Писаний ум твой очистивый; радуйся, сокровенное от мудрых и разумных познавый; радуйся, яко пророк Давид милость и кротость стяжавый; радуйся, славу прельстителя и сети его молитвою и псалмопением угасивый; радуйся, упованием на Господа и мужеством христолюбивое воинство твое укрепивый; радуйся, иверов, от многаго времене беззаконными устрашенных, духом ободривый; радуйся, бесовския песни и богомерзкия сквернословия во воинстве твоем пресекий; радуйся, храбрый нрав предков возрастивый; радуйся, мужественных в бранех воинов возлюбивый и робких укорявый; радуйся, верных и храбрых вместо двоедушных и недостойных возвеличивый; Радуйся, мечу Мессиин и образе победоносия грузин, благоверный царю Давиде!
Воспитан от юности великими учители Православия, не преклонился еси к сладостем и наслаждением, но бегал еси похотей юности и стремился еси ко всякому делу благу; тако и ныне народ наш избави ходатайством твоим и умножи нам вождей народа, делом и словом украшенных, да, яко ты, в достоинстве и правде служат святей Церкви и народу, и, путем истинным текуще, присно славят Бога: Аллилуиа.
Юноша, яко старец и мудр, прежде всех уразумел еси дело, имже умилостивил еси зело прогневаннаго Бога, ибо недостойнии и безчиннии обладаху епископствы и народ учаху беззаконию вместо закона; ты же благодатию Божиею и благословением учителя твоего собрал еси богодухновенныя отцы и законоведцы в Руис-Урбниси, идеже уврачевасте великия язвы народа и устависте деяние соборное; тако и ныне волцы хищнии обыдоша словесныя овцы твоя растлити и лукаво подвизаются отторгнути их от пути праваго и отчуждити от веры; но ты ходатайствуй за нас пред Богом, да послет нам мудрыя наставники и учители Божественнаго слова, да положат душу за неоскверненность закона и народа и ублажают тя, истиною умудрени:
Радуйся, с Арсением старцем и предстоятелем собора, Иоанном, католикосом Картлийским, дела церковная изследовавый и кривое отвергий; радуйся, в проповедь и учение каноны седми Вселенских Соборов во едино собравый; радуйся, во исправление царства своего плевелы, в земли твоей посеянныя, искоренивый; радуйся, священство и всех человек к благочинию и добродетелем направивый; радуйся, по земли твоей святыню и благодать Божию распространивый; радуйся, Церковь от вертепа разбойников очистивый; радуйся, твердою верою тьму безбожия разсеявый; радуйся, достойных милости помиловавый и безчинно живущих епископов в пустынях учинивый; радуйся, в обителех подвизающихся высокодостойных отцев во епископы призвавый; радуйся, вместо мздою поставленных пастырей истинных и богоугодных пастырей поставивый; радуйся, гордыню мучителей и прелесть диаволю поправый; радуйся, богатством и мышцею своею хвалящихся и множеством людей превозносящихся прещением казнивый; Радуйся, мечу Мессиин и образе победоносия грузин, благоверный царю Давиде!
Якоже древнии летописцы поведают нам, никтоже от царей наших подобен тебе бысть, о делателю дивный, иже тако украшен бе мужеством и всяким благочестием, скверны не терпящий и ближняго любящий зело, за беззаконие обличал еси не терпящих соблазна и учил еси хранити заповеди Божия, да вси во святыни служат и поют Богу: Аллилуиа.
Подъяв предводительство браней и управление царством, паче всех Багратидов превосходный и мужественнейший всех царей, водил еси грузин, яко Моисей израильтян, и во лютых бранех не издалеча взывал еси к воинству твоему, но, уповая на непобедимое оружие, знамение креста, сам пред ними шествовал еси и ободрял еси, и мышцею крепкою, яко Голиаф, низлагал еси храбрых; сего ради просим тобою от Бога милости, да даст нам мужество, мудрость и силу попрати козни вражия и избавление от напастей дарует восхваляющим и поющим тя:
Радуйся, достойно хвалимый учениче богоугоднаго онаго учителя — Арсения Икалтойскаго; радуйся, наставниче благочестия, яко Илия утвердивый умаленную веру; радуйся, учителю нелукавыя и непоколебимыя истины; радуйся, мудрый проповедниче догмат апостол и отец; радуйся, мужественный проповедниче Православия и утверждение Церкве; радуйся, органе премудрости и правды; радуйся, неоскудный источниче милости и сокровище благости; радуйся, столпе мужества непоколебимый; радуйся, стено храбрости необоримая; радуйся, небесною благодатию просиявый праведный судие избраннаго народа; радуйся, мечу обоюдоострый Господень, поражающий неверие; радуйся, славо и крепосте отечества нашего; Радуйся, мечу Мессиин и образе победоносия грузин, благоверный царю Давиде!
Призре Бог милостию на народ грузинский и, даровав державу твою, по временом даяше тебе победы дивныя; ты же избранным воинством побеждал еси враги и двоедушныя, и созидал еси и укреплял еси крепости и грады необоримыя во мирное хранение людей твоих; ныне моли Бога, да разрушит насилие видимых и невидимых врагов наших, да всем православным благоуспеется и молитва наша взыдет пред Бога: Аллилуиа.
Егда ста в Тао великое множество турок, по обычаю своему надеяхуся на лютость зимы и на неприступныя горы, но ты, имея от Бога непобедимую силу, предшествовал еси воинству и, нападши на безстрашно седящих, мечем отмщал еси нечестивым и избавлял еси народ грузинский от плена и истребления; егда же подвигом твоим возрасте царство твое, весь собор священства и народа с радостию хваляше и ублажаше тя, яко великаго царя и сильнаго самодержца:
Радуйся, сосуде избранный добродетелей и обителе благих дел; радуйся, народы таргамосиан во едино мудрование и едину душу связавый; радуйся, духом мужественный, плотию сильных победителю; радуйся, вождю и крестоносче иверов; радуйся, венче и славо царей Багратидов; радуйся, порфиро, покровителю христолюбивых властителей; радуйся, мужеством твоим беззаконных посрамивый; радуйся, паче всех страшный и ужасный врагом и двоедушным; радуйся, недремлющий хранителю и утешителю уповающих на тя; радуйся, помощниче и предстателю православных; радуйся, наставниче и светильниче трудящихся за народ и отечество; радуйся, солнце грузин, на высоте Церкве иверския сияющее; Радуйся, мечу Мессиин и образе победоносия грузин, благоверный царю Давиде!
Странен и дивен есть подвиг твой, великий царю, ибо многи престолы и обители создал еси и исполнил еси великою милостию не токмо в своем царстве, но и во всех святых местех; егда же послал еси Арсения Икалтойскаго в Палестину с великим богатством ради обновления и украшения Крестнаго монастыря и паче гроба Господа нашего Иисуса Христа, паки возвратися в Грузию, и день от дне подвизастеся во славу Божию и воспевасте силу и крепость Его: Аллилуиа.
Православным бысть утверждение и дары разума стяжал еси теплою молитвою, и не совратился еси с пути правды и истины, но, простотою души уподобившися сроднику твоему Давиду, царю Израилеву, сокрушенным сердцем сподобился еси прияти благодать покаяния подобно ему, ибо, премудростию свыше исполнен, в основание твердое и непоколебимое, во образ смирения сотворил еси нам «Песнопения покаянная», имиже показал еси нам путь спасения и жизни, ведущий к Богу, да отступит всякая дерзость и гордыня от омраченнаго ума моего, и, бдение стяжав, глаголю усердно:
Радуйся, яко пророк Давид милость и кротость стяжавый; радуйся, сокровенное таинство, яко явно зрящий; радуйся, стада твоя нелицеприятным судом судивый; радуйся, от пагубнаго нерадения народ твой избавивый; радуйся, светом смирения Христова, яко ризою, облекийся; радуйся, от праведнаго стяжания нищим день от дне милостыню тайно подаваяй; радуйся, падшим руку простираяй и вдовиц и сирот питаяй; радуйся, пленных избавителю и немощных верою укрепителю; радуйся, странноприимниц и богаделен основателю и собранных в них немощных и болящих утешителю; радуйся, всех грузинских добродетелей возвышателю; радуйся, грехом низверженных возставляяй и нераскаянных посрамляяй; радуйся, ходящих в советех нечестивых пресекаяй; Радуйся, мечу Мессиин и образе победоносия грузин, благоверный царю Давиде!
Умиротворив землю, яко избранный Божий, святый и возлюбленный, начал еси созидание Гелатския обители и, положив в ней икону Богородицы, из Хахули принесенную, собрал еси тамо богомудрыя отцы и ученыя в учителей учености и в научение всякому благу; ныне же врази истины подвизаются ввергнути народ твой в бездну неведения и претворити в народ тьмы, мы же сну и разслаблению предахомся и не можем противитися злу; но умилостиви на нас праведнаго Судию Господа, да укрепимся и оживем душею и телом и благословенным языком грузинским сподобимся пети Богу: Аллилуиа.
О благодать и премудрость, данная тебе от Бога, царю Давиде, ибо, за малочисленность воинства твоего, вывел еси воинство кипчаков и, клятвою верности утвердив их, истребил еси безчисленных турок их содействием; егда же умыслиша измену, Христос, камень крепости, дивно покры тя, ибо уразумел еси коварство их и избегл еси, якоже псалмопевец Давид из рук двоедушных; тако и ныне и мы, многими враги и напастьми обстояни, просим тобою помощи, да, под отеческим твоим покровом сохранени, благодарим тя и хвалим усердно:
Радуйся, светило явное зело прекрасное, народ твой просвещающее; радуйся, яко Соломон храма Божественнаго созидателю и Гелатския академии, «другия Афины» и «втораго Иерусалима», явителю; радуйся, великих светильников Церкве и Духом Божиим просвещенных монахов тамо собравый; радуйся, ищущих истины на путь Господень направляяй; радуйся, обители и священники от всякия тяготы и подати освободивый; радуйся, премудрость распространивый и душеполезная учения умноживый; радуйся, возлюбленный народ твой богопознанием просветивый; радуйся, богохульная учения и всякия ереси упразднивый; радуйся, от язычников оскверненныя церкви в дом Божий очистивый; радуйся, мучителей человеконенавистных князей и судей обличителю; радуйся, от них неправедно гонимых царскою милостию судивый; Радуйся, мечу Мессиин и образе победоносия грузин, благоверный царю Давиде!
Воспитав боголюбиваго сына твоего Димитрия, силою и мужеством подобнаго тебе, царем поставил еси его, и, мышцею львиною сотворше брани дивныя, купно истреблясте всех нападающих и утесняющих народ; егда же услыша султан победы ваша, подвижеся на мщение и повеле всякому исмаилтянину, могущему воевати, всецело истребити Грузию; ты же не надеялся еси на силу твою, но в помощь призывал еси Господа Иисуса Христа и хвалил еси силу Его: Аллилуиа.
Егда лютии они врази, яко песок морский, приидоша в Триалети и Манглиси и начаша опустошати и избивати христиан, ты же, безстрашный, яко безплотный, облеклся еси в силу Божию, яко во броню, и, ободряя воинство именем Иисусовым, мужественно ударили есте предводительством креста Его и множайшую часть их истребили есте при Дидгори; о помощь Божия творящим волю Его! ибо страх и трепет нападе на беззаконныя, видящия великомученика Георгия, воюющаго одесную тебе, воини же твои возопиша: «Святый Георгий с нами!» — и вси благодарение и славу воздаясте Богу; и ныне помяни нас пред Ним, да до скончания века сохранит Иверию и народ Иверии, да в любви и мире спасаемся и ублажаем тя с верою:
Радуйся, храбрый воине Господень, противящихся Ему ужасаяй; радуйся, упованием на Бога гнев Господень на немилостивыя враги наведый; радуйся, во славу имене Христова превознесшихся беззаконных прогнавый; радуйся, премудростию Божиею отечество твое от всех иноплеменных покрывый; радуйся, мужественным царствованием коварных и завистливых смиривый; радуйся, всех враждующих на иверов устрашивый и низложивый; радуйся, явным противником и тайным коварником не простивый; радуйся, Божественную силу всем явную сотворивый; радуйся, святый град Иерусалим от чаемаго опустошения избавивый; радуйся, царство твое умиротворивый и разрушенныя села, грады и крепости воздвигнувый; радуйся, поругателей церквей и убийц праведных истребивый; радуйся, знамя Горгасалово превыше вознесый; Радуйся, мечу Мессиин и образе победоносия грузин, благоверный царю Давиде!
Егда разгласися по земли победа оная дивная, силу твою Божественную и премудрость уразумеша вси цари и народы; ты же, обрет время вожделенное, совершил еси благое намерение твое и взял еси град Тбилиси, четыреста лет содержимый агарянами, иже всякое зло творяху народу нашему, и смирил еси их под ноги христиан; темже радовахуся и восхваляху тя и славляху Бога: Аллилуиа.
Егда взяша турки царствующий град Армении, жители его с мольбою писаша тебе, да избавиши их от погибели; ты же вскоре пошел еси и, без труда взяв Ани и крепости его, сокрушисте, ибо кровию христиан обагриша храм Божий, егоже созда царица Катранида Гречанка; и егда пошел еси освятити собор, в мечеть обращенный, со священством, чин сотвориша царице, и трижды возгласил еси ко гробу: «Радуйся, святая царице, яко избави Бог собор твой от рук беззаконных», — и се, абие издаде глас гроб: «Слава Господу»; и уразумеша вси, яко удиви Господь преподобнаго Своего; Того моли ныне, преподобне, да сокрушит дерзость тех, иже безбожием вооружишася на православных, и разрешение многих грехов испроси восхваляющим и хвалящим тя:
Радуйся, богувенчанный царю, делом и мужеством победителем явленный; радуйся, злыя замыслы и коварства врагов упразднивый; радуйся, непрестанныя набеги турок-сельджуков пресекий; радуйся, хищников и сребролюбцев укротивый; радуйся, богоборцев и грузиноненавистных сарацин смиривый; радуйся, град Тбилиси паки в царствующий град поставивый; радуйся, покровом благодати твоея стольнаго сего града нашего хранителю и покровителю; радуйся, язычников в сыны святыя купели приводяй и во благоверии утверждаяй; радуйся, монофизитов еретиков, армянских епископов и наставников их, в богословских прениях явно победивый; радуйся, яко великие учители, тертеров и мулл богословским ведением посрамивый и немощными сотворивый; радуйся, мужественным бдением оскудевший народ твой ожививый; радуйся, победителю победителей и милостивче, царскую державу, толико униженную, зело возвысивый; Радуйся, мечу Мессиин и образе победоносия грузин, благоверный царю Давиде!
Силою Божиею абие взыде, яко орел, и, взяв вся крепости Сомхити, освободил еси Лоре-Ташири, Кола-Джавахети и Карнипору с Басиани от врагов, и, победив, пришел еси в Триалети, благодаря за толикия свыше милости и победы, трисвятою песнию славил еси и осанну победы воспевал еси Богу: Аллилуиа.
Многа лета добре управлял еси народом твоим и от Никопсии до Дербента распространил еси пределы царства твоего; но дивнее есть сие, царю, како в непрестанных походех и бранех подъял еси стяжание премудрости и присно тщался еси всякое учение совершенно в главе своей собрати; дивно же проповедуя, просвещал еси не токмо подданныя твоя, но и доныне научаеши нас, ленивых и недостойных и нарицатися иверами, да присно подвизаемся за закон и отечество и ублажаем тя, богоблагословеннаго царя и истиннаго отца народа нашего:
Радуйся, в законе совершенный, подобно Павлу и великому Константину благодать апостольства приявый; радуйся, временное царство премудро управивый и царство твое дивно распространивый; радуйся, бедствие, на все народы христианския находящее, укротивый и от великих нашествий турок избавивый; радуйся, неистовых препинаяй и безумие волхвов угашаяй; радуйся, оружие православных и разсвирепевших богоненавистников победителю; радуйся, в отчаянии сущих христиан утешителю и милостивче; радуйся, обреченных предстателю и помощниче непостыдный; радуйся, монахов утешение и душевредных учений смирителю; радуйся, Икалтойския академии основателю; радуйся, с богословскими учениями и многим художеством юношей тамо научивый; радуйся, премудростию и мужеством духовную жизнь среди грузин возрастивый; радуйся, достоинство и славу народа твоего возвысивый; Радуйся, мечу Мессиин и образе победоносия грузин, благоверный царю Давиде!
О чудеса Божия, Иже хранит прославляющих Его! Ибо, егда пустиша на тя, в едину срачицу облеченнаго, стрелу, в мире сохрани тя, ударившую в малую икону Архангела, на выи твоей висящую; егда же в Мухнари конь твой пал бе под тобою в ловитве зверей, три дни недвижим пребывающа, яко бездушна, воздвиже тя Христос Бог, и, исполнен благодарения, не умолкал еси в молитве и пении Ему: Аллилуиа.
Разболевся, треблаженне, устроил еси всякую пользу души твоея и, благословляя паству твою, предал еси честную душу твою Господу; егда же преставился еси в небесныя обители, тогда исполнишася вси слез болезненных, и многострадальное тело твое погребоша во вратех Гелатских по завещанию твоему, да ни един поклонник обители не избежит благословения твоего и да возопиет благодарственную сию похвалу:
Радуйся, в скиптродержцех преславнейший, яко Сын Божий, поставив тя обладателем земли нашея, утвердил еси царство Его в Иверии; радуйся, Божественной премудрости причастниче, яко, горнему Царствию тепле желанием служа, служил еси Царю и Богу всех; радуйся, гнева Божия удержателю, яко неуклонно ходил еси посреде, путем царским, и направил еси народы к заповедем Божественным; радуйся, человече Божий и рабе благий, добрый и верный, иже отгнал еси тьму греха и просветил еси исполнение верных Христовых; радуйся, благодатию победоносия облеченный, яко мышцею львиною сотворил еси брани дивныя и посрамил еси вся враги Божия; радуйся, мужественный духом и мужественнейший умом, яко во всем сила свыше покрываше тя от врагов твоих и никогдаже предаде тя в руки их; радуйся, воине непобедимый в полцех безчисленных безбожных, яко не сечаше тебе меч, но, яко камень твердый и яко столп крепкий, стоял еси недвижим; радуйся, образе духовнаго совершенства, яко коварство врагов и лютость браней не отъяша от тебе умиления сердечнаго; радуйся, безпримерный, яко, открывшимся тебе от Господа тайнам сокровенным, был еси зело страшен врагом и грозен на злотворцы; радуйся, многомилостиве, яко создал еси церковь отцем лавры Шиомгвимския за верность их и, даровав самостоятельство и великое сокровище, проклял еси нападающих на обитель ту; радуйся, с предки, за отечество и закон живот положившими, соединивыйся, яко, отшед пред Судию, управив царство по воли Его, отверзошася тебе врата небесныя и внидеся в радость Господа твоего благаго; радуйся, славо престолов и самодержче, яко гроб твой стяжахом в силу и узы крепости и хвалимся, яко сокровище имуще, ибо неоскудно источает благодать истинную; Радуйся, мечу Мессиин и образе победоносия грузин, благоверный царю Давиде!
По смерти твоей возвещает о подвизех твоих славный Гелати и громогласно проповедует Шиомгвиме о теплых молитвах твоих; мы же, поминающе безчисленныя и дивныя подвиги твоя, усердно притекаем в Гелатскую обитель, идеже имамы всечестный гроб твой, изображающий неизреченную любовь твою, и, с коленопреклонением припадающе, приносим тебе моление: от всех ересей покрый нас ходатайством твоим и даруй нам чистоту жития и страх Божий, да не будем предателями похвалы нашея — Православия, и хвалим Бога духом и истиною: Аллилуиа.
Прославился еси премудростию и созиданием, и дом Багратидов исполнил еси благодати и славы, нам же завещал еси любовь к Богу и ближнему и показал еси путь служения отечеству; и по смерти имаши благодать пред Богом, да насадит в нас страх и ненависть ко греху и любовь к добродетели, да не преклонимся к беззаконию, но уразумеем правду и суд Божий и сподобимся принести тебе пение:
Радуйся, светлый победы возставителю за имя Христово, емуже вверися престол Давидов и печать Соломоня; радуйся, царем и вождем таргамосиан нареченный, иже прославился еси, яко воин избранный, и венчался еси, яко царь благочестивый; радуйся, памятниче мужества несокрушимый, яко мужество твое и достоинство не токмо в Грузии, но во всей земли разгласися; радуйся, подвижниче храбрых оных воинов, яко подвиги обрел еси наслаждение нетленное и мужеством венец победы; радуйся, благодатию Духа бодрый, яко превзыде подвиги многих царей истинная похвальность дел твоих; радуйся, пастырю добрый, яко Гелати и Шиомгвиме имамы в утверждение и похвалу стад твоих, истинных христиан; радуйся, всесветлый свете, звездо царствия неприступная, иже паче солнца просвещаеши землю нашу и из гроба твоего проповедуеши Христа Бога; радуйся, двема венцема почтенный, царства и подвижничества, яко скипетр твой самодержавный имамы стену необоримую; радуйся, в подвизе славный, яко во упование, утверждение и похвалу святую и честную икону твою стяжахом и требуем помощи твоея; радуйся, о царю дивный, яко радуется Церковь иверская и благодарит Бога о тебе, яко дарован еси в утверждение Православия народу нашему и можеши помогати всем, иже к ходатайству твоему прибегают; радуйся, отче сладчайший, яко не забудем тя, присно поминающе мужество твое и непобедимое оное царствование; радуйся, благочестивый и богохранимый царю абхазов и грузин, ранов, кахов и армян, яко веселятся вернии Христовы и ублажают величие твое; Радуйся, мечу Мессиин и образе победоносия грузин, благоверный царю Давиде!
О в царех мужественнейший и непобедимый, святый Давиде Строителю! Приими ныне похвалу величающих тя, и не помяни зол наших, но помози нам теплым ходатайством пред Богом, да помилует народ сей наш и невредимо сохранит от всякия скорби и от работы душепагубныя прелести, да вместо милости не приимем наказания за дерзость, но до последняго издыхания стоим твердо и непоколебимо на пути истины и, от вечных мук избавленнии, присно с тобою славим и благословим Троицу Единосущную, Творца Бога Безначальнаго: Аллилуиа.
Сей кондак трижды; потом икос 1 и кондак 1.
О славный царю и дивный среди человек подвижниче, святый Давиде Строителю, мечу Мессиин и Божественный столпе Православия; Церкве непоколебимый столпе и непобедимый поборниче народа грузинскаго; воинов славо и утверждение благочестивых царей; милостивый; нищих заступниче и в скорбех сущих скорый помощниче и предстателю!
О подвигом облеченный и непобедимый царю Давиде! Сиянием святыни твоея буди нам ходатай ко Христу Богу нашему, да милостивно призрит на удел Матере Своея, народ наш, носящий на земли крест Господень, и сохранит от сетей вражиих и от братоненавидения, ибо князи мира сего подвизаются о растлении и истреблении его, мы же ищем способа избавитися от насилия их и уповаем на помощь твою, да не оскудеет вера в народе грузинском, в земли же нашей власть сродников твоих, благословенных и миропомазанных, творящих суд и милость равно на всех, и, силою креста окружая вся пределы Грузии, да возвысят и возставят высоту и силу нашу от земли забвения, да будем едино стадо и Господь да будет нам Пастырь. Многомощною силою твоею укрепи Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, и преосвященных митрополитов, архиепископов и епископов, и весь священнический и монашеский чин, благоверных военачальников и градоначальников, христолюбивое воинство и всех православных христиан.
О в царех мужественный подвижниче, святый Давиде Строителю! Истины хранителю и песнопений покаяния творче, моли всемилостиваго, да дарует церквам утверждение, пастырем нашим ревность и бдение о душах; властем — премудрость, силу и доброе пасение народа; судиям — правду нелицеприятную; воином — мужество и крепость духа; наставником — разум и смирение; мирянам безгрешие и женам целомудрие; супругом — любовь и единомыслие; чадом — послушание; сильным — страх Божий; скорбящим — долготерпение; радующимся — воздержание и дух разума и благочестия; нам же да простит суеверие и лжеверие, гордыню, лукавство, измену, зависть, ненависть, сребролюбие, неблагодарность, ропот, убийства, татьбы, блуды, безчиния, и да дарует нам, яко тебе, пламенность веры, Божественную ревность об отечестве и братскую любовь к ближнему, любовь к правде и украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды).
Господи Иисусе Христе, Сыне Божий, молитвами Пречистыя Твоея Матере, святаго царя Давида Строителя и всех святых Твоих, помилуй нас. Аминь.
Автор-составитель: Тинатин Мчедлишвили
