Акафист святому славному мученику благоверному царю Арчилу
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас (трижды).
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Первому в царех мученику и воину преславному, избраннику Христову, славному Арчилу, мужественному и непобедимому, хвалу сию благодарственно приносим тебе и молим тя: якоже обещал еси нам во время кончины твоея, буди помощник и покровитель с верою восхваляющих тя: Радуйся, за веру и отечество подвизавыйся, славный мучениче, царю Арчиле!
Двери мученичества твоего отверзл еси, светоносне, мучениче Христа Избавителя, и путь сотворил еси к течению последующих царей, по немуже безстрашным умом, яко исполини, на течение изыдоша мужественнии Димитрий и Луарсаб, с нимиже, благочестивыми цари, и с лики мучеников всецело причастник явился еси и радостию просвещаеши сердца наша, иже к тебе прибегаем и пение сие приносим тебе:
Радуйся, сило и славо скипетра царей; радуйся, всесветлый поборниче истины; радуйся, столпе правыя веры, до небес досязающий; радуйся, неверных врагов победителю, безстрашный воине Спасов; радуйся, процветшая отрасле благочестия и святыни; радуйся, сладостно носящий иго Божественное; радуйся, христолюбиваго воинства укрепителю; радуйся, разумный адаманте терпения; радуйся, твердою верою мучителей нечестие обличивый; радуйся, вождю народа грузинскаго; радуйся, неплененная врата Церкве иверския; радуйся, славо и крепосте отечества нашего; Радуйся, за веру и отечество подвизавыйся, славный мучениче, царю Арчиле!
Егда беззаконный Мурван Глухий пройде весь Кавказ и сокруши множайшия крепости пределов Картлийских, тогда вы, царие картлийстии, отшедше во Абхазию, пребысте в крепости Анакопийской, идеже приидосте и с верою припадосте к нерукотворенней иконе Пресвятыя Богородицы и, милости просяще, возсылали есте глас Божественныя хвалы: Аллилуиа.
О дивное мужество и храбрость и десница Господня! Ибо в нощи оной явися тебе Ангел Господень и возвести, яко посла на беззаконныя оны враги ваша лютую губительную язву, и повеле вам ударити на них; тогда изыдосте с упованием на Бога и силою Его посрамисте злочестивыя оны агаряны; сего ради дерзаем пети тебе:
Радуйся, от родителей богочестивых прозябый; радуйся, благодеянием благодати просвещенный; радуйся, твердостию и мужеством избранный; радуйся, Православием хвалящийся; радуйся, в пастыря и подвижника избраннаго в сыны Божия народа посланный; радуйся, мужественным подвигом и богочестием мученичества явленный; радуйся, во утешение Церкве и во украшение Иверии возсиявый; радуйся, в лице мучеников украшенный; радуйся, на небеси и на земли прославленный; радуйся, стеною и хранителем Церкве нареченный; радуйся, сугубым венцем царства и мученичества украшенный; радуйся, от иверов присно поминаемый; Радуйся, за веру и отечество подвизавыйся, славный мучениче, царю Арчиле!
Егда возвестися царю греческому, что сотворися от Бога рукою вашею, помяну благородство пресветлых родом родителей ваших и, с радостию послав два венца славные, мужество души вашея и премудрость ума вашего нелицеприятно прославил есть: Аллилуиа.
Егда отяготе брат твой, царь Мир, от язвы, юже прият в брани оной, даже до смерти, тогда возвести тебе, идеже погребе отец ваш царское сокровище, и вручи тебе царство Картлийское и дщери своя; ты же, духом умудренный, дал еси братаничны твоя эриставом картлийским и милостию Божиею мирно царствовал еси время многое; сего ради похвалами хвалим еси от верных:
Радуйся, семена Евангелия Христова в тебе возрастивый; радуйся, множество страстей, яко плевелы, искоренивый; радуйся, храмов и обителей созидателю; радуйся, согрешших покаянием на молитву подвизаяй; радуйся, от многих искушений одержимых и попечением обстоимых избавителю; радуйся, душетлителей низложителю; радуйся, хулителей креста Христова поразителю; радуйся, честности и мужества насадителю; радуйся, истинною верою ложь разрушивый; радуйся, разсвирепевших богоненавистников победителю; радуйся, верою, надеждою и любовию воспрянувших благословителю; радуйся, единых православных воинов и воинства зело милуяй; Радуйся, за веру и отечество подвизавыйся, славный мучениче, царю Арчиле!
Егда воста род беззаконный, лютый, свирепый и кровопийственный на народ твой, тогда умыслил еси, пастырю добрый, положити себе и душу твою во избавление христиан, и, уповая на Бога истиннаго и Царя Небеснаго, предстал еси пред немилостивым Асимом и просил еси мира земли твоей; сего ради языку нашему, немощно глаголющему, даждь силу восхвалити подвиг твой: Аллилуиа.
Тогда начат лукавый ласкательно глаголати, ибо обещаваше тебе многия дары и призываше оставити закон Христов и обратитися в сарацина; ты же, храбрый воине Божий, знаменал еси себе знамением честнаго креста и дерзновенно проповедал еси Христа Бога пред беззаконными мучители; сего ради по силе нашей приносим ти хвалу:
Радуйся, благородство души сохранивый; радуйся, упование твое на Бога возложивый; радуйся, премудростию духа лютыя муки мужественно претерпевый; радуйся, любовь Христову среди человек насадивый; радуйся, пещь скорбей и печалей угасивый; радуйся, свеще, мудрых просвещающая и безумных попаляющая; радуйся, нечестивая учения Божественным дерзновением разрушивый; радуйся, гнев Божий удержавый; радуйся, дерзостию восхищенных верою укротивый; радуйся, гордостию превознесшихся низложивый; радуйся, злыя помыслы попирающий; радуйся, безбожием и беззаконием ослепленных вразумляяй; Радуйся, за веру и отечество подвизавыйся, славный мучениче, царю Арчиле!
Словеса лжепророка не смутиша ума твоего, ибо твердо стоял еси в вере и искал еси смерти за Христа: «Аще послушаю тебе, умру смертию и мучен буду во веки, аще же ты убиеши мя, воскресну, яко Бог наш, и с Ним прославлюся», — тако глаголал еси и Укрепляющему тя Христу сладкогласно пел еси: Аллилуиа.
Егда поприще оно мужества и мзда нетленныя победы уготовася тебе Божественным предустроением, тогда царство на мученичество изменити мудро разсудил еси любомудрием, соблазн презрел еси и гордыню беззаконнаго оного Чичнаума низложил еси мужеством естества; тако и ныне низложи коварство врага нашего и исцели многия язвы народа грузинскаго, да в любви и мире спасаемся и вопием:
Радуйся, всесветлая похвало веры; радуйся, обителе истиннаго подвига; радуйся, мечу, отсекающий плевелы прелести Мухаммедовой; радуйся, седмерицею искушенный, яко злато чистое; радуйся, венец победы приобретый; радуйся, розо прекрасная небеснаго вертограда; радуйся, лозо винограда Христова, плод мученичества принесшая; радуйся, образе Божественнаго воинства; радуйся, щите, хранящий благочестие; радуйся, мечу, отсекающий злочестие; радуйся, непреклонная стено благочестия и Церкве; радуйся, язвы грехов наших утоляяй; Радуйся, за веру и отечество подвизавыйся, славный мучениче, царю Арчиле!
Слышав сия вся беззаконный и видев неизменную твердость твою, удивися зело и повеле яти тя и в темницу всадити, да многообразным мучением обратит тя; ты же окрилил еси ум твой к Богу и, благодатию Божиею прохлаждаем, яко отроцы древле в пещи, благословлял еси, славне, Господа пением: Аллилуиа.
Егда в темнице заключен был еси от беззаконных, не убоялся еси прельстителя врага, но лук и стрелы бесовския сокрушил еси теплою молитвою и язык ядовитый безбожных язычников заградил еси силою Божиею; ныне же избави нас от козней и прелестей лукаваго диавола, хотящаго погибели нашея, да веселимся с тобою во веки, восхваляющии тя грузины:
Радуйся, славы Божия проповедниче; радуйся, прелесть агарян победою обличивый; радуйся, плод добрый принесый и всех лукавых и ленивых посрамляяй; радуйся, исповедников Христовых утешителю; радуйся, злославных и еретиков посрамителю; радуйся, единых православных воинов споборниче и покровителю; радуйся, от любве к наслаждениям временным и скоропреходящим отвращаяй; радуйся, оружием словес твоих мучителей уязвивый; радуйся, помыслы велиаровы истребивый; радуйся, верным честь подаяй; радуйся, двоедушных устрашаяй и смиряяй; радуйся, и род сей грузинский превосходною радостию возвышаяй; Радуйся, за веру и отечество подвизавыйся, славный мучениче, царю Арчиле!
Тогда исполнися злобы диавольския некий князь гардабанский, в сарацина обратившийся, яко прежде Иуда предатель, и возвести Асиму, яко ты еси сын Стефанов и сродник великаго царя Вахтанга и Мириана, и с лукавством рече: «Той и весть, идеже погребе отец его царское сокровище»; ты же вся сети вражия силою духа сокрушил еси и воспел еси осанну победы: Аллилуиа.
Божественною премудростию исполнен, глаголал еси мучителем: «Мал бех возрастом, егда отец и брат мой скрыша в крепости оной сокровища; аз же не оставлю Бога моего, ниже продам непреходящую оную славу за сию скоропреходящую», и всякий соблазн лукавых посрамил еси и разрушил еси; сего ради радуется народ наш о прозябении твоем в нем и сице вопиет ти:
Радуйся, подвигом твоим Церковь Христову озаривый; радуйся, омраченный ум наш просветивый; радуйся, уязвленных от невидимых стрелцев исцеляяй; радуйся, души верных явно просвещаяй; радуйся, благодатию Божиею неведущих умудряяй; радуйся, к молящимся милостиво приклоняяйся и уповающих на тя ободряяй; радуйся, тьму безбожия разгонявый; радуйся, вдовицам руку простираяй и обидящим их воздаяй; радуйся, нищих предстателю и милостивче; радуйся, всех обидимых и угнетенных покровителю; радуйся, неправедных судилищ разорителю; радуйся, от уз грехов наших избавителю; Радуйся, за веру и отечество подвизавыйся, славный мучениче, царю Арчиле!
Паки вопрошаше безумный: «Ты ли убо бысть при падении сарацин во Абхазии?» — ты же, огнем веры просвещен, сице глаголал еси: «Аз бех тогда, егда низложи их Бог», и Создателю всех громогласно пел еси: Аллилуиа.
Слышав мучитель словеса твоя премудрая, исполнися гнева зело и рече ти: «Кий Бог низложи сарацины?»; тебе же даяшеся изобильно Духом Отчим ответ пред мучители, и сице глаголал еси: «Бог Живый, Иже есть Творец небесе и земли, Той убо низложи и смири их», и прелесть их обличал еси; сего ради тебе, мужественнаго, крестом вооруженнаго воина Христова, хвалим вси собраннии:
Радуйся, Божественныя заповеди в сердце твоем запечатлевый; радуйся, многоразличныя муки естеством тленныя плоти претерпевый; радуйся, скорби и напасти утоляяй; радуйся, утеснителей наших низлагаяй; радуйся, от всякаго неправеднаго озлобления избавителю; радуйся, многих душ избавителю; радуйся, духов нечистых прогонителю; радуйся, пределы Картлийския подвигом твоим украсивый; радуйся, печали наша на радость претворяяй; радуйся, силу видимаго и невидимаго врага сокрушаяй; радуйся, алчущих питателю и нагих одеятелю; радуйся, творящих волю Христову помощниче и предстателю; Радуйся, за веру и отечество подвизавыйся, славный мучениче, царю Арчиле!
Тогда разгневася неразумный он и рече: «Егоже бог смертен есть и упование жизни на смертнаго имать, подобает и ему умрети», и даде повеление мечником, да усекновением главы убиют воина Христова; ты же, святе, с упованием предал еси душу твою и царство Господу и благочестивым дерзновением просил еси дара исцеления немощных; сего ради приносим ти глас Божественныя хвалы: Аллилуиа.
Аще и связан ведом был еси тамо, мужественный царю, не рыдал еси, яко пленник, но с радостию преклонил еси главу твою мучителем и вступил еси на путь святых, ибо смерть и страдание в радость вменил еси и, подобно Избавителю твоему, стремился еси к подвигом даже до смерти, еяже достигл еси и предстал еси пред Богом, и ныне, сугубым венцем украшен, покровитель еси всех, к тебе прибегающих и с желанием поющих:
Радуйся, болезни и смерть подъявый; радуйся, небеснаго Иерусалима ради муки претерпевый; радуйся, тельче святый и непорочный, за Христа кровь излиявый; радуйся, мужеством врагов победителю и ярости мучителей всецелый погубителю; радуйся, добрых добродетелей насадителю; радуйся, к тебе прибегающих на пути заповедей Господних поставляяй; радуйся, прелесть иноплеменников дерзновенно низложивый; радуйся, плодом мужества твоего верных ободряяй; радуйся, зарею чудес уповающих на тя просвещаяй; радуйся, вместо преходящаго царства непреходящий свет приемый; радуйся, со святыми Царство наследовавый и о спасении нашем пекийся; радуйся, твердою верою злых духов сокрушаяй; Радуйся, за веру и отечество подвизавыйся, славный мучениче, царю Арчиле!
Егда скончался еси, славный царю и мучениче, в нощь ону взяша тело твое мучениколюбцы и, помазавше с великою честию, погребоша в Нодокре, в богосозданной твоей церкви, и мужество мученичества твоего поведаху всем, да вси, с верою прибегающии, покланяются честной раце твоей и достойно украшают похвалами память твою: Аллилуиа.
Якоже венец царства и порфиру багряную изменил еси на сияние непреходящаго царства, тако подражанием тебе царие и князи, воини и простии принесоша себе с радостию Христу Богу; сего ради радуется Церковь грузинская о памяти твоей и уставляет всем верным на славу и хвалу подвига твоего и непобедимаго мужества:
Радуйся, Божественный закон неоскверненно сохранивый; радуйся, богохранимый народ твой добре пасый; радуйся, любве к Богу, отечеству и царю насадителю; радуйся, крест Христов подъявый и сарацины до основания низложивый; радуйся, упованием на Бога изощренный меч врага сокрушивый; радуйся, слезы скорби грузин иссушивый; радуйся, от пагубнаго нерадения избавителю; радуйся, разслабленных к благонравию возбуждаяй; радуйся, недуги многоразличныя и немощи прогоняяй; радуйся, обреченных на смерть избавителю; радуйся, полк бесовский низлагаяй и всецело упраздняяй; радуйся, народ наш духовно озаряяй; Радуйся, за веру и отечество подвизавыйся, славный мучениче, царю Арчиле!
Светло есть имя твое и славна память твоя, о царю святый и избранный, ибо многоухищренныя агарянския лютыя беды, находящия на народ твой, утолил еси; сего ради, пришедши во храм твой, людие призваннии, вернии, радующиися о светлой памяти твоей, поведают подвиги твоя и славу приносят Богу: Аллилуиа.
Безпримерное страдание показал еси, в царех начало мученичества положивый, и в подражание тебе воздвигл еси преемники твоя, с нимиже прославился еси, яко воин избранный, и венчался еси, яко царь благочестивый; сего ради радуемся мы, собор сей боговоздвигнутый, и святую память твою чтим, всехвально взывающе:
Радуйся, светом мученичества твоего тьму отечества озаривый; радуйся, духовнаго мужества иверов укрепителю; радуйся, кровию твоею правую веру возвеличивый; радуйся, росою Божественною верных прохлаждаяй; радуйся, оскверненный ум наш возставляяй; радуйся, от мятежа и брани избавителю; радуйся, пламень страстей и лютыя недуги утоляяй; радуйся, лютыя беды скоро прогоняяй; радуйся, сном уныния одержимых ободряяй; радуйся, неживую и хладную веру нашу оживляяй; радуйся, Божественное поприще подвигом твоим добре совершивый; радуйся, грешником от Бога милости испрашиваяй; Радуйся, за веру и отечество подвизавыйся, славный мучениче, царю Арчиле!
Якоже древле показал еси дивное покровительство твое народу нашему и теплым предстательством покрыл еси его от злаго врага, тако и ныне, пред Богом дерзновенно предстоя, яко мученик, примири нас благому Богу, да молитва наша не в укоризну вменится нам, но всем православным благоуспеется и принесется пред Бога: Аллилуиа.
Величие твое кто изречет, о честный и премудрый государю, ибо Церковь грузинскую пресветло украсил еси Божественным страданием твоим, еже за Христа подъял еси мужественно и радостно; сего ради усердно притекаем во храм твой прекрасный и к раце пресветлой, да исцеления исполнимся, хвалящии тя:
Радуйся, рода Вахтангова украшение, емуже вверися престол Фарнавазов и скипетр Мирианов; радуйся, свыше дарованное православным утверждение, иже в старости гнев безбожных мужественно подъял еси и славу Христову просветил еси; радуйся, стено непоколебимая верных таргамосиан, иже кровию твоею сохранил еси паству твою; радуйся, пресветлаго лика мучеников красото, яко вторицею приял еси крещение кровию твоею и очистил еси душу твою; радуйся, рабе благий, добрый и верный, иже достойно приял еси от Христа мзду победы; радуйся, поборниче благочестия, яко ты отверзл еси двери мученичества царем мучеником; радуйся, жительством мужественный, подвигом победивый, безстрашный умом, яко престол царства твоего честным сотворил еси страданием твоим; радуйся, мудрый в царех и царю в мудрых, иже обезумил еси и в неистовство вменил еси многоухищреннаго онаго велиара; радуйся, блистающим непобедимым подвигом пресветлый, емуже вместо венца возложися седмерицею неувядаемый венец небесный; радуйся, благочестиво Богу послуживый, яко подвигом обрел еси наслаждение нетленное и мужеством венец победы; радуйся, нетлением облеченный, яко ныне, в наслаждении рая соединен, со Ангелы радуешися и царствуеши со Христом во веки; радуйся, живущих в Иверии сладкое утешение, яко чудеса твоя имамы, народ грузинский, стену необоримую; Радуйся, за веру и отечество подвизавыйся, славный мучениче, царю Арчиле!
О всеславный и чудесы хвалимый, мужественный мучениче, царю Арчиле! Иже житие твое благочестием утвердил еси и дом царей грузинских боголучезарно украсил еси кровию мученичества, ныне, яко источник исцеления, дарован еси народу твоему, но токмо тем, иже с верою просят от тебе исцеления и, видяще в тебе духовныя благодати, славят Благодетеля, всех милующаго: Аллилуиа.
Сей кондак рцы трижды, потом:
Двери мученичества твоего отверзл еси, светоносне, мучениче Христа Избавителя, и путь сотворил еси к течению последующих царей, по немуже безстрашным умом, яко исполини, на течение изыдоша мужественнии Димитрий и Луарсаб, с нимиже, благочестивыми цари, и с лики мучеников всецело причастник явился еси и радостию просвещаеши сердца наша, иже к тебе прибегаем и пение сие приносим тебе: Радуйся, сило и славо скипетра царей;
Радуйся, всесветлый поборниче истины; радуйся, столпе правыя веры, до небес досязающий; радуйся, неверных врагов победителю, безстрашный воине Спасов; радуйся, процветшая отрасле благочестия и святыни; радуйся, сладостно носящий иго Божественное; радуйся, христолюбиваго воинства укрепителю; радуйся, разумный адаманте терпения; радуйся, твердою верою мучителей нечестие обличивый; радуйся, вождю народа грузинскаго; радуйся, неплененная врата Церкве иверския; радуйся, славо и крепосте отечества нашего; Радуйся, за веру и отечество подвизавыйся, славный мучениче, царю Арчиле!
Первому в царех мученику и воину преславному, избраннику Христову, славному Арчилу, мужественному и непобедимому, хвалу сию благодарственно приносим тебе и молим тя: якоже обещал еси нам во время кончины твоея, буди помощник и покровитель с верою восхваляющих тя: Радуйся, за веру и отечество подвизавыйся, славный мучениче, царю Арчиле!
О Церкве прекрасное украшение, мучеников похвало, царей радосте, во бранех непобедимый и в скорбех непостыдный, молящих тя скорый помощниче и милости подателю, богувенчанный царю Арчиле!
О славный мучениче Христов, мужественно претерпевый, воине преименитый, верных помощниче, храбрый царю, святый Арчиле! Помяни нас пред Богом, Егоже ради любве кровь пролиял еси, блаженне, и сиянием святыни твоея угаси тайну беззакония, на возлюбленный народ наш воздвигнутую, еже есть «мерзость запустения». Даруй нам победу на ня и утверждение Православия от Христа Бога, веру же нашу паки обнови и даруй нам неоскудную любовь к Богу, царю и отечеству, и возставь нам рог помазания, да не уподобимся скотом несмысленным, подобно идолослужителем оным и иным таковым неразумным. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан.
О подвигом победивый мужественный мучениче, царю Арчиле! Милостию, подобною Иисусу Богу, ходатайствуй пред Ним, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Автор-составитель: Тинатин Мчедлишвили
