Акафистное пение святому благоверному царю Вахтангу Горгасалу
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй (трижды),
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство…
Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Мужественнаго в подвизе царя и воина великоименитаго, избраннаго Христова, славнаго Вахтанга Горгасала, храбраго и непобедимаго, вернии хвалами украшаем и благодарственное пение приносим; ты же, яко имея дерзновение к Богу, помощию твоею исцели нас, достойне, и путь непогрешительный, к небеси возводящий, покажи поющим тебе: Радуйся, в человецех дивный царю и славный подвижниче, святый Вахтанге Горгасале!
Вверену тебе престолу Фарнавазову и скипетру Мирианову, царствовал еси благоразумно и возносил еси крест Божественныя победы, имже погубил еси враги, борющия Христа, и в мире утвердил еси истинную веру православных; ныне же врази истины подвизаются народ твой, святый и возлюбленный, явити народом тьмы; ты же утоли разсвирепевшее волнение искушений и сохрани нас от ереси и закона чуждаго, да, правою верою бодрствующе, сподобимся принести пение:
Радуйся, от младенчества твоего Святым Писанием возрастный; радуйся, богодухновенными книгами наученный; радуйся, во святыни воспитанный и духовныя премудрости исполненный; радуйся, любовию к родной земли воспламененный; радуйся, упованием на Господа и мужественною крепостию вооруженный; радуйся, Православием огражденный; радуйся, от юности твоея царским елеем помазанный; радуйся, от Господа благословенный и вознесенный; радуйся, Божественным и человеческим любомудрием паче риторов умудренный; радуйся, милостию освященный и помыслом просвещенный; радуйся, царей таргамосиан вождем и отцем нареченный; радуйся, сугубым венцем царства и преподобномученичества украшенный; Радуйся, в человецех дивный царю и славный подвижниче, святый Вахтанге Горгасале!
Вверену тебе престолу отцев и дедов, аще и юн бе летами, безпримерное мужество показал еси и сам предводил еси передовым воинством, но не своею силою хвалился еси, но силою Божиею, и, якоже Давид Голиафа, тако и ты победил еси величайших паче иных исполинов осетинских, Тархана и Бакатара; по сем воззвал еси к воинству твоему и, в лютейших бранех победив осетин и хазар, сестру твою, от них плененную, избавил еси и славу воздал еси Святей Троице: Аллилуиа.
Быв муж дщере шаховы и сестричищ Вараз-Бакура, эристава Ранскаго, с ними пошел еси на брань на греков, ибо с великим мужеством искал еси Эгриси и Абхазии, от них плененных; но егда повелел еси воинству твоему ниже прикасатися церквам и всем служителем их, во сне в видении предста тебе равноапостольная Нина Каппадокийская, просветительница грузин, и возвести тебе, да не бранишися с правоверными; ты же, премудре, свыше внушение прием, ходатайством пресвитера Петра и старца Самуила мир с греками возставил еси; сего ради хвалим и славословим тя:
Радуйся, подвиги и искушения мужественно подъявый; радуйся, Крест Христов на рамена твоя подъявый; радуйся, на рамех твоих вооруженнаго коня из Мцхеты на Армази возшедый; радуйся, красный видом и крепкий силою, пеш еленя постигавый; радуйся, мужеством духа малодушным и разслабленным пример давый; радуйся, воинской храбрости учителю; радуйся, злоумышленником и опустошителем земли ужас наводяй; радуйся, богатырю Эльбруса, исполине, гору Кавказскую преклонивый; радуйся, храбрый и непобедимый, врата Дарьяльская затворивый; радуйся, гордость и дерзость осетин и хазар смиривый; радуйся, упованием на Бога изощренный меч вражий сокрушивый; радуйся, силу надменных оных варваров сокрушивый; Радуйся, в человецех дивный царю и славный подвижниче, святый Вахтанге Горгасале!
Тщася искоренити всеянное в царстве твоем плевелие, юноша, яко старец и мудрый, собрал еси всеблаженный собор служителей Божиих и капища маздеан в Мцхете низложил еси, всех же зловерных, яко волков, отгнал еси и стадо твое нерастленно сохранил еси; тако и ныне угаси возмущение злых и языки еретиков обезсили, православных же венец вознеси и народу нашему мир даруй, да мудре ходим путем истины и непрестанно поем Господу: Аллилуиа.
Слышавше беззаконнии сродницы твои, яко огнепоклонников изгнал еси, разсвирепеша на тя гордостию и с безчисленным воинством ополчишася, хотяще покорити грузин; ты же, уразумев злый умысл их, не устрашился еси страха персидскаго, но ободрил еси дружину львоподобных мужей и, вооружен и укреплен на брань, четыре месяца бранился еси с беззаконными; тако и ныне избави нас, святе, от всех племен, на брань с нами собравшихся, и покрый нас от многих сетей видимых и невидимых врагов, да с благодарением сплетем тебе явное пение и принесем тебе:
Радуйся, во славу имене Христова требища бесовская низложивый; радуйся, капищ дикости дерзновенно разрушителю; радуйся, мрак разслабления прогнавый; радуйся, учителей лжезакония изгнавый; радуйся, огнепоклонников маздеан посрамивый; радуйся, среди единоплеменников твоих мрак язычества разсеявый; радуйся, чародейства и волхвования волхвов разрушителю и насмешку их победою обличивый; радуйся, мечем обличения служителей диавола поразивый; радуйся, закон, хитростию человеческою сплетенный, мужественно обличивый; радуйся, от смрада беззакония очистивый; радуйся, многия души от плена и порабощения насильником избавивый; радуйся, многия язвы народа твоего исцеливый; Радуйся, в человецех дивный царю и славный подвижниче, святый Вахтанге Горгасале!
Сотворив с персы брань славную, мечем адамантовым люте избивал еси воинство их, яко лев онагров, и победил еси упованием на Распятаго; они же вопияху друг ко другу: «Дур аз горг-аслан», еже есть: «Блюдитеся главы волчия», ибо образ волко-льва бяше на шлеме твоем златом, и оттоле нарекся еси, в царех непобедимый, Горгасалом, знамя же картлосиан наречеся «Вахтангово-Горгасалово»; сего ради радости исполняемся и Божественное сие пение приносим Богу: Аллилуиа.
Во время ополчения и во время брани яша персы воспитателя супруги твоея, единоплеменника своего Раждена, иже многих исполинов персидских в брани уби, и повелеша ему отрещися веры; он же двери мученичества безстрашно отверзе и путь сотвори последующим мучеником к течению; ты же обрел еси честное тело его, иереем тайно погребенное в Цроми, и с литиею и пением положил еси в созданной тобою епископской церкви в Никози, да присно будем хвалящии славнаго в первомучениках Раждена и ублажающии мужество твое:
Радуйся, звездо, ищущим спасения путь показующая; радуйся, персов обуздавый и праведно вспять обративый; радуйся, упованием твердым злобу противников погубивый; радуйся, хулителей Креста Христова низложивый; радуйся, ненавидящих правду и злое благим полагающих посрамивый; радуйся, православных воинств присный сподвижниче и покровителю; радуйся, безпомощных праведный судие и вдовиц и сирот предстателю; радуйся, нищих заступниче и нагих одеятелю; радуйся, бодренно и трезвенно жити научаяй; радуйся, род таргамосиан во единомыслие, единодушие и единоволие связавый; радуйся, вражду и ненависть между единоверными любовию и миром претворивый; радуйся, врагов и противников твоих во други обративый; Радуйся, в человецех дивный царю и славный подвижниче, святый Вахтанге Горгасале!
Царствуя свыше благодатию, яко мужественный подвижник и крепкодержавный, вооружил еси и мышцы на истребление противящихся Богу и народ твой, святый и царский, безстрашно сохранил еси, Кларджети же и Абхазию паки присоединил еси к земли твоей и пределы Иверии разширил еси; но ныне постиже нас скорбь велия, и зело устрашихомся и боимся, ибо ополчишася на ны врази грехов ради наших и расхитиша исконныя области; ты же собери разсеянныя отчины и от взаимныя вражды избави правоверныя народы, да не будем в посмех безбожным и язычником и не преклонимся к беззаконию, с верою хвалящии Бога: Аллилуиа.
О неизреченная любы твоя ко Христу, царей и подвижников красото Вахтанге! Ибо сердце твое желаше поклонитися всем святым местом, идеже стоясте нозе Господни, и, достигши святыя Голгофы и матери церквей Сиона, великое богатство даровал еси церквам и нищим; обшед же монастыри пустынныя и живущих при Иордане, многое утешение даровал еси им; тако и ныне помози нам и вся грады и веси Иверии от нашествия иноплеменных сохрани, да радуемся духом, святе, и силу твою крепкую хвалим:
Радуйся, на пасение и подвиг народа твоего посланный; радуйся, силою Божиею зловерных посрамляяй и злоумышления врагов прогоняяй; радуйся, немощных крепосте и сильных низложителю; радуйся, честности и мужества насадителю; радуйся, пещь скорбей и печалей угашаяй; радуйся, искушения и волны утишаяй; радуйся, душетленныя учения низлагаяй и гнев Божий удерживаяй; радуйся, смиренных возносяй и гордых смиряяй; радуйся, ближних соединителю и врагов поразителю; радуйся, от коварств человеческих и лести диаволи избавляяй; радуйся, осужденных от смерти избавителю; радуйся, жестоковыйных и непокоривых умом наставляяй; Радуйся, в человецех дивный царю и славный подвижниче, святый Вахтанге Горгасале!
Воистину дивна есть высота благодатей и милостей твоих, в царех велий Вахтанге Горгасале, ибо желание святаго царя Мириана достойно исполнил еси и во Иерусалиме монастырь Крестный боголепно воздвигл еси; пришед же в землю твою, создал еси храмы и монастыри славныя, и церковь Апостольскую, Столп Животворящий, обновил еси и украсил еси; тако и ныне призри на нас и исполни нас Божественнаго бодрствования, да плачем о множестве грехов наших и Христа непрестанно хвалим: Аллилуиа.
Православною верою уязвлен, писал еси кесарю и испросил еси Петра католикосом Картли, да сам управляет апостольскою Церковию грузин, и Самуила епископом поставил еси в Мцхете во славу Божию; егда же слыша сие старейший святитель Михаил, забы страх Божий и, гордостию превознесеся, прокля тебе и все воинство твое; ты же, аще и неповинен бе, царю Вахтанге, пришел еси к нему, да со смирением припадеши к ногам архиепископа, он же ногу приложи ко устом твоим и дерзостно сокруши зуб твой; тогда неизреченное безчестие дивно претерпел еси и лютаго святителя в Константинополь на суд послал еси, тамо же осудиша немилостиваго онаго и абие послаша в монастырь неусыпающих; сего ради хвалим великодушное человеколюбие твое, блаженне, и с любовию вопием:
Радуйся, падшаго христианскаго духа возрастителю; радуйся, христиан, от безбожных ужасшихся, духовною радостию исполняяй; радуйся, самостоятельности и силы Церкве возставителю; радуйся, неприступныя врагом и непоборимыя столпы и грады-крепости воздвигнувый; радуйся, на высоких скалах и во святых оных местех церкви и монастыри создавый; радуйся, утешение иноков и душевредных смиряяй; радуйся, во Иерусалиме единоплеменников твоих вселивый; радуйся, любовь ко святым местом среди грузин насадивый; радуйся, епископских престолов умножителю; радуйся, благодетелю священства и приносителю церквам; радуйся, грехолюбивых человек сладости воздержания научаяй; радуйся, в сердцах боголюбивых благодатную радость распростираяй; Радуйся, в человецех дивный царю и славный подвижниче, святый Вахтанге Горгасале!
Царство твое, Богом благословенное, возвеличил еси Божественным жительством и Церковь Картлийскую подвигом твоим светло украсил еси; сего ради возвеличи Бог победы и благоуспеяния твоя и утверди благоденствие народа твоего, якоже речено есть: блажен народ царя премудраго; невредимо же сохраненный народ твой, благодарный Всемилостивому Богу, хваляше тя и возсылаше Божественное сие пение: Аллилуиа.
Ни пременение лет, ни обстояния времен не возмогоша забвению предати трудов твоих, ибо не давал еси покоя себе и основал еси Тбилиси, град наш славный, и в основание духовное положил еси святыя церкви по подобию Иерусалима: Гефсиманию — на скале Метехской, Святаго Креста, яко Голгофу, Вифлеем — на Нарикале и Сион — на правом брегу реки Куры; сего ради подвизает нас любовь твоя, и молим тя, достойне, да сподобимся пети тебе:
Радуйся, поругателей Креста обличителю; радуйся, народ твой от путей погибельных избавляяй; радуйся, благоверныя власти и воинства благословляяй; радуйся, насильников, человеконенавистных начальников и судей обличителю и неправедно гонимых от них милостивче; радуйся, заблудших на путь истины обращаяй; радуйся, жестокости и коварства ненавистниче; радуйся, окаменелая и жестокая сердца умягчаяй; радуйся, человеки на служение отечеству и ко благочинию приводяй; радуйся, на народоначальников и вождей, от веры уклонившихся и беззаконие творящих, гнев наводяй; радуйся, осквернителей святыни и развратителей христианства сокрушаяй; радуйся, разсвирепевших богоненавистников победителю; радуйся, отступника от закона отеческаго и изменника Варскена питиахша поразивый; Радуйся, в человецех дивный царю и славный подвижниче, святый Вахтанге Горгасале!
Егда Кавад-шах призва тя на брань с греки, не восхотел еси, воине Христов мужественне, истребления христиан и уготовался еси противостати ему; тако и ныне виждь сети безчисленных врагов, зле простертыя на род наш, и избави нас от взаимнаго насилия и внутренняго предательства, ибо укрепление народа требует единства, да, любовию к Богу и отечеству во единомыслие связаннии, присно хвалим Создателя всех: Аллилуиа.
Егда возвестиша вещь сию беззаконному оному мучителю, исполнися гнева зело и с безчисленным воинством прииде на землю твою, ибо желаше смерти твоея и погибели Иверии; но Господь дарова тебе помощь, и, собрав твердыя народы, яко пардус мужеством и яко лев рыканием, ударил еси на надменных оных маздеан и возставил еси победу грузином; тако и ныне тщетны сотвори страшныя козни тех, иже подвизаются злых на вред наш, и неприкосновенно сохрани нас от ополчений и нашествия врагов, да обрящем покой и непреходящее веселие, хвалами величающии тя:
Радуйся, похвало и славо скипетра царей; радуйся, непоколебимый столпе праведнаго суда; радуйся, добрый делателю подвига благочестия; радуйся, свыше посланный на освящение народа твоего и на укрепление Иверии; радуйся, проповедниче веры, от апостола Андрея насажденныя; радуйся, утвердителю веры, от девы Нины возращенныя; радуйся, всякаго благонравия и богоугоднаго жития насадителю; радуйся, щите, хранящий благочестие; радуйся, мечу обоюдоострый, отсекающий злочестие; радуйся, падшаго народа возставителю; радуйся, отвечаяй за врага и друга; радуйся, образе победоносия предков наших; Радуйся, в человецех дивный царю и славный подвижниче, святый Вахтанге Горгасале!
Пролитие крове вожделеннее тебе бысть, агнче Христов, нежели престол царствия, и ты облеклся еси ради Его в венец мученичества от руки бывшаго раба твоего, иже во время брани пусти в тя стрелу в подпазушие кольчуги; ты же, яко лев из львов и исполин из исполинов, в перси уязвлен, паки бранился еси по-горгасаловски; егда же отяготел еси зело от ран, заповедал еси дому твоему и народу: любовь и неразлучие с греки, да твердо стоят в вере и ищут смерти за Христа; сего ради радуемся, собрание сие верных, и пение приносим Создателю всех: Аллилуиа.
Егда скончался еси в Уджарме, о всесладкий и вожделенный царю грузин, многоподвижное тело твое с плачем облиша и с великою честию положиша в «матери всех церквей — Светицховели»; и, возложивше на гроб твой исполинский камень, изсекоша на нем образ твой, храбре, и мужество подвига твоего повествоваху всем; оттоле лики священников и сонмы верных с любовию припадают ко гробу твоему и с верою просят от тебе помощи; мы же благословенным языком грузинским приносим тебе радостотворный дар:
Радуйся, подвигом твоим мрак отечества озаряяй; радуйся, звоне духовнаго бодрствования; радуйся, любве к Богу и отечеству насадителю; радуйся, всякия злыя нравы отсекаяй; радуйся, скверну суеверия изглаждаяй; радуйся, от сетей сатанинских и от нашествия иноплеменных защитниче; радуйся, неразумие волхвов и гадателей и скверная их призывания угашаяй; радуйся, верным честь подаваяй и двоедушных смиряяй; радуйся, братоненавистников и корыстолюбцев обличителю и крепко попирающий; радуйся, душу твою прежде за Христа и потом за отечество положивый; радуйся, ко славному лику отцев, за веру и землю живот положивших, приложенный; радуйся, вместо преходящаго царствования непреходящую от Христа славу стяжавый; Радуйся, в человецех дивный царю и славный подвижниче, святый Вахтанге Горгасале!
Лишившеся богоблагословеннии иверяне и вси живущии в Грузии отца крепкаго и мужественнаго царя, мужественно прияша и усердно исполниша богодухновенный завет, егоже оставил еси народу твоему, и избраша паче смерть за Христа, нежели жизнь; мы же забыхом завет твой и уподобихомся языком иноплеменным, от Христа отступившим; но ты возстави нас, страстьми падших, и избави нас от веры неживыя и теплохладныя, да молитва наша не в поношение вменится нам, но принесена будет пред Богом: Аллилуиа.
Се, источник благодати и множества знамений, неоскудно богатый, — мученическая усыпальница костей твоих — имамы, вернии, в стену твердости, в сокровище благодати и в прогонителя бесов; сего ради, требующе помощи твоея, желаем притещи в Светицховели, да с милотию Илииною, Хитоном Господним и Животворящим Столпом поклонимся и гробу твоему, да святыню сию тепле облобызаем и исцеления почерпнем, хвалящии тя:
Радуйся, победо и славо Иверии; радуйся, непоколебимая стено благочестия; радуйся, столпе правыя веры, до небес досязающий; радуйся, державче и воеводо, несокрушимый памятниче мужества; радуйся, великий искусниче победы над враги; радуйся, столпе непоколебимый храбрости и образе Божественнаго воинства; радуйся, храбрый, избранный воине, возбудителю мужества; радуйся, подвигом твоим Божественное поприще добре совершивый; радуйся, вместо честнаго онаго венца небесный венец возложивый; радуйся, со святыми в Царствии вселивыйся и о спасении нашем пекийся; радуйся, покровом благодатей твоих хранителю и покровителю града Тбилиси; радуйся, непобедимый поборниче народа грузинскаго и покровителю Церкве нашея; радуйся, в человецех храбрый царю и славный подвижниче, святый Вахтанге Горгасале!
Праведен бе и боящийся Бога, о дивновысокий державче, и благодать Его почи на тебе, яко на Давиде праотце, и, яко Соломону, дарова тебе премудрость превосходную, и непреложным мужеством добре управлял еси народом и царством твоим; народ же твой, подражанию тебе подвигнутый, славляше Христа, даровавшаго таковаго царя и господина народу, жребию Матере Своея; сего ради ублажаем древнюю славу и крепость грузин и славим укрепляющаго вас: Аллилуиа.
Бодрым пастырем явился еси народу твоему и жезлом премудрости твоея и теплым попечением направил еси его к Божественным заповедем; ныне же волцы хищнии обступиша словесное стадо твое, да растлят его; но ты помози нам, достойне, и, аще и недостойни есмы грехов ради сих наших, моли Избавителя нашего, да даст нам пастыря верна и праведна, угодна царя и вождя стадом Своим, да достойно и праведно печется о народех, вверенных ему, и всяким духовным и телесным благом возращает нас, поющих тебе:
Радуйся, пастырю добрый, разсеянных овец собираяй и к истинному Богу приводяй; радуйся, пресветлых побед Фарнавазовых возставителю; радуйся, святынею хранящихся иереев почитаяй и нерадивых обличаяй; радуйся, стадо твое от многообразных волн избавляяй; радуйся, сердца, волнами мира поколебанная, в благочестии наставляяй; радуйся, плодом мужества твоего последующих тебе царей ободряяй; радуйся, святителей, во одеждах овчих пришедших, внутрь же сущих волков хищных, низлагаяй и разсеваяй; радуйся, от многосплетенных оных козней вражиих избавляяй; радуйся, свеще, разумных просвещающая и безумных попаляющая; радуйся, всех, враждующих на иверов, ужасаяй и смиряяй; радуйся, народу твоему сладость благочестия от Господа испрашиваяй; радуйся, от картлосиан присно поминаемый; Радуйся, в человецех дивный царю и славный подвижниче, святый Вахтанге Горгасале!
О, коликое величие стяжа тебе мужество твое, ублажаемый! Ибо древния летописи Картлийския возвещают нам, како подвизался еси во славу Божию и во возращение Иверии; ныне же ходатайствуй о нас ко Христу и испроси нам, да отвратит гнев, воздвигнутый на ны множества ради грехов наших, и, яко Лазаря, да возставит отечество наше — Грузию — в первую славу, да не будем в попрание разорителем, иноплеменником и родом чуждым, и святыми песньми и аллилуиею невозбранно украшаем Троицу нераздельную и неслиянную: Аллилуиа.
Ныне веселится народ, ликует Церковь и радуется земля наша трудами твоими, в ней совершенными; мы же, поминающе дивное мужество твое и храбрость духа, тепле молим тя: представи нас Христу, Царю нашему, Единому Многомилостивому, да призрит на народ Свой, не имущий ответа пред Ним, и дарует нам премудрость разсуждения добра и зла, и даст нам силу прощения, да сподобимся благодати и милости ходатайством твоим и, невредимо сохранени, глаголем по силе нашей:
Радуйся, красото светлаго лика царей, ибо помаза тя Бог елеем радости; радуйся, ибо десница Вышняго бысть тебе помощница; радуйся, ибо возложил еси на главу твою венец премудрости и в руку взял еси, яко скипетр, твердость ума, в порфиру же Божественную облеклся еси веру; радуйся, силою мужества просиявый, ибо безстрашен бе, яко безплотный, и сокрушил еси всякое оружие лютыя брани; радуйся, похвальный сыне отечества нашего, ибо к сиянию царства присовокупил еси венец победы; радуйся, светилниче Православия, ибо озарил еси нощь персидския прелести; радуйся, ибо престол царства твоего страданием твоим почтил еси и вознесл еси рог помазания; радуйся, с мученики Христовыми сочтенный, ибо святую кровь твою принесл еси безсмертному Христу, яко благоухание всечестное, и приял еси мзду оную трудов; радуйся, с небесе православным дарованное утверждение, ибо доныне стяжал еси имя безсмертия; радуйся, небеснаго жительства достигый, ибо прославился еси, яко избранный воин, и венчался еси, яко благочестивый царь; радуйся, ищущих истины вождю и светильниче, ибо светиши всем концем земли нашея излиянием неугасимаго света; радуйся, в скорбех непостыдно руку подаваяй, ибо всем припадающим к тебе даруеши обильный дар от источника неоскудныя благодати; Радуйся, в человецех дивный царю и славный подвижниче, святый Вахтанге Горгасале!
О Божественною благодатию просиявый, святый царю Вахтанге Горгасале! С верою припадающих к твердому твоему ходатайству и отеческой благодати и помощи избави от многих сетей видимых и невидимых врагов, и во время суда избави нас от вечных оных горьких мук, да, тобою путеводими, достигнем горняго Иерусалима и сподобимся с тобою славити Пресвятую Троицу: Аллилуиа.
Сей кондак трижды, затем
Вверену тебе престолу Фарнавазову и скипетру Мирианову, царствовал еси благоразумно и возносил еси крест Божественныя победы, имже погубил еси враги, борющия Христа, и в мире утвердил еси истинную веру православных; ныне же врази истины подвизаются народ твой, святый и возлюбленный, явити народом тьмы; ты же утоли разсвирепевшее волнение искушений и сохрани нас от ереси и закона чуждаго, да, правою верою бодрствующе, сподобимся принести пение:
Радуйся, от младенчества твоего Святым Писанием возрастный; радуйся, богодухновенными книгами наученный; радуйся, во святыни воспитанный и духовныя премудрости исполненный; радуйся, любовию к родной земли воспламененный; радуйся, упованием на Господа и мужественною крепостию вооруженный; радуйся, Православием огражденный; радуйся, от юности твоея царским елеем помазанный; радуйся, от Господа благословенный и вознесенный; радуйся, Божественным и человеческим любомудрием паче риторов умудренный; радуйся, милостию освященный и помыслом просвещенный; радуйся, царей таргамосиан вождем и отцем нареченный; радуйся, сугубым венцем царства и преподобномученичества украшенный; Радуйся, в человецех дивный царю и славный подвижниче, святый Вахтанге Горгасале!
Мужественнаго в подвизе царя и воина великоименитаго, избраннаго Христова, славнаго Вахтанга Горгасала, храбраго и непобедимаго, вернии хвалами украшаем и благодарственное пение приносим; ты же, яко имея дерзновение к Богу, помощию твоею исцели нас, достойне, и путь непогрешительный, к небеси возводящий, покажи поющим тебе: Радуйся, в человецех дивный царю и славный подвижниче, святый Вахтанге Горгасале!
О непоколебимый столпе Церкве и Божественный столпе Православия, мучениче истины, за Христа и за отечество кровь пролиявый, похвало воинов, утверждение царей, славо князей, крепосте немощных, возносителю смиренных, обогатителю нищих, во бранех непобедимый и в скорбех непостыдный, молящих тя скорый помощниче и милости подателю, святый, благоверный, праведный и великий царю Вахтанге Горгасале!
О подвигом облеченный великий царю, святый Вахтанге Горгасале, благочестивым дерзновением моли Христа Бога, да сохранит отечество наше от сети вражия и от вражды братий и милостиво призрит на народ наш, жребий Матере Своея, носящий Крест Господень на земли, веру же нашу паки обновит и дарует нам, якоже тебе, теплоту веры, братскую любовь к ближнему и Божественную ревность об отечестве, упитанном кровию твоею, и без препятствия возставит нам от корене Давидова помазанника Божия, иже верою твердою оградит вся пределы Грузии и вознесет и возставит высоту и крепость нашу от земли забвения, да будем едино стадо и Господь да будет Пастырь наш. Укрепи в служении Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, великаго господина, отца нашего Илию, преосвященных митрополитов, архиепископов и епископов, честных иереев, во Христе диаконов и весь монашеский чин, причастников Православныя Церкве и всех правоверных христиан.
О свыше от Бога венчанный, святый Вахтанге Горгасале! Яко имея силу, от Бога дарованную, ходатайствуй пред Богом, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да дарует жизнь в добром жительстве, украшение милосердием, просвещение святою молитвою, очищение исповеданием, озарение причащением, честное преставление, наследие Царствия, со Ангелы пение, со святыми царствование и с тобою славу и благодарение, яко Ему подобает всякая слава, честь и поклонение, со Отцем и Святым Духом, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, святаго благовернаго царя Вахтанга Горгасала и всех святых, помилуй нас. Аминь.
Автор-составитель: Тинатин Мчедлишвили
