Акафист Дидубийской иконе Божией Матери
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй благодатию Твоею, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Помилуй меня, Боже, по великой милости Твоей, и по множеству щедрот Твоих изгладь беззакония мои. Многократно омой меня от беззакония моего, и от греха моего очисти меня, ибо беззакония мои я сознаю, и грех мой всегда предо мною. Тебе, Тебе единому согрешил я и лукавое пред очами Твоими сделал, так что Ты праведен в приговоре Твоем и чист в суде Твоем. Вот, я в беззаконии зачат, и во грехе родила меня мать моя. Вот, Ты возлюбил истину в сердце и внутрь меня явил мне мудрость [Твою]. Окропи меня иссопом, и буду чист; омой меня, и буду белее снега. Дай мне услышать радость и веселие, и возрадуются кости, Тобою сокрушенные. Отврати лице Твое от грехов моих и изгладь все беззакония мои. Сердце чистое сотвори во мне, Боже, и дух правый обнови внутри меня. Не отвергни меня от лица Твоего и Духа Твоего Святаго не отними от меня. Возврати мне радость спасения Твоего и Духом владычественным утверди меня. Научу беззаконных путям Твоим, и нечестивые к Тебе обратятся. Избавь меня от кровей, Боже, Боже спасения моего, и язык мой восхвалит правду Твою. Господи! отверзи уста мои, и уста мои возвестят хвалу Твою: ибо жертвы Ты не желаешь, – я дал бы ее; к всесожжению не благоволишь. Жертва Богу – дух сокрушенный; сердца сокрушенного и смиренного Ты не презришь, Боже. Облагодетельствуй, [Господи,] по благоволению Твоему Сион; воздвигни стены Иерусалима: тогда благоугодны будут Тебе жертвы правды, возношение и всесожжение; тогда возложат на алтарь Твой тельцов.
Ширшая небес Дево и Херувимов вышшая, Богородице, ты еси упование и похвала нас, верных, иже лобызаем икону твою и тя Ходатаицу приносим к Сыну твоему и Богу всех нас, да покрыет нас от вреда душевнаго и телеснаго и сподобит нас подобающе приносити пение: Радуйся, Пресвятая Богородице Дидубийская, Взбранная Воеводо и Заступнице народа грузинского!
Тебе поет, Мати Христова, лик небесных безплотных, яко превысшей всех начал и властей, и с ними хвалит тя всяк язык человеческий; мы же с верою притекаем к чудотворной иконе твоей и молим тя, уповающе на всесильное заступление твое: милостива буди к нам и избави от всякия скорби и от сетей вражиих нас, иже на хвалу твою подвигохомся и по силе нашей воспеваем:
Радуйся, святая Мати Иисуса, Сына Божия; радуйся, врата небесная и престоле Царев; радуйся, прозябший жезле Ааронов; радуйся, вместилище Бога и носительнице Солнца правды; радуйся, обителе истины и мерило веры; радуйся, колеснице святыни и лествице Божия сошествия; радуйся, неизследимо родившая Творца Ангелов; радуйся, вине Адамова избавления и избавительнице Евиной печали; радуйся, упование всеобщаго воскресения и поручительнице вечныя жизни; радуйся, покровительнице и поборнице народа Картлосова; радуйся, ходатаице и попечительнице наследия отечества нашего; радуйся, стено необоримая и хранительнице града Тбилиси; Радуйся, Пресвятая Богородице Дидубийская, Взбранная Воеводо и Заступнице народа грузинского!
О чудо всепреславное! Егда пастырь пасяше стадо вне Тбилиси, в окрестностех Дидубе, явися ему Ангел во сне и возвести, идеже лежаше икона Пресвятыя Богородицы; и абие уразуме, яко дадеся им икона оная в залог милости и спасения, и, исполнився радости, благодаряше и воспеваше Христу, единому Человеколюбцу: Аллилуиа.
Избранный от многих пастырь оный для обретения честныя иконы твоея поведа видение свое священству и людем, и в день второй, в понедельник, егда взыскаша честнейшую икону твою в окрестностех Дидубе, удивишася, яко ты держала еси в деснице скипетр царский, яко оружие, Сын же твой и Бог держаше державу златую, крестом украшенную, в знамение самодержавия; и, воздвигше икону твою с литиею и пением, поставиша ю во храме, близ лежащем, и воспеваху и ублажаху тя, яко Взбранную Воеводу и истинную Царицу народа нашего:
Радуйся, Невесто Неневестная, престоле царский Отчий и обителе Святаго Духа; радуйся, граде одушевленный великаго Царя; радуйся, скиние, пространнейшая небесе и земли; радуйся, Херувимов превысшая, носящая Создателя; радуйся, едина благословенная, обителе святыни; радуйся, Дево, родившая Еммануила Бога; радуйся, Мати Созидателя Царствия и рая и Сокрушителя ада; радуйся, основание Божественнаго закона; радуйся, Богом дарованная Царице рода грузинскаго; радуйся, утверждение скипетра Багратидов; радуйся, непоколебимый столпе святыя Христовы Церкве; радуйся, тихое пристанище, ходатаице и подвижнице всего мира; Радуйся, Пресвятая Богородице Дидубийская, Взбранная Воеводо и Заступнице народа грузинского!
Егда дадеся грузином дивная икона твоя, соборы отцев и паствы их стекахуся видети и поклонитися ей, недугами же одержимии припадаху и глаголаху: помилуй нас, Владычице, — и вскоре исцелевахуся и благодаряху Иисуса, Сына твоего и Бога. Не престани, Дево, молити Его, да избавит нас от грехов наших и сподобит нас наследити Царствие Его и выну воспевати: Аллилуиа.
Слышав муж слепорожденный множество чудес, исполнися сердце его упования и возжела поклонитися иконе, но не обрете вожатая, да сподобится приближитися к дивной оной святыни, но с коленопреклонением и слезами моляшеся: «Буди ми Ходатаица, Мати Божия, пред Сыном твоим, да светом Своим просветит и мене, грехом омраченнаго, и сподобит мя видети икону твою и пред нею воспевати»:
Радуйся, жезле царствия, от корене Давидова прозябший; радуйся, от праотец Богородицею проповеданная; радуйся, Дево, от неплодныя прозябшая и Херувимов превознесшаяся; радуйся, горо Божия, превыше небес вознесенная; радуйся, от Соломона в Песни песней Материю света нареченная; радуйся, престоле огненный и лествице, до небесе досязающая; радуйся, храме царский созданный; радуйся, цвете, неувядаемо процветший; радуйся, Мати Неневестная, в девстве зачавшая и Царя небеснаго без семене родившая; радуйся, Невесто, болезней матерних непричастная; радуйся, Сыном твоим от всея твари небесныя и земныя прославленная; радуйся, от всех племен рода Адамова восхваляемая; Радуйся, Пресвятая Богородице Дидубийская, Взбранная Воеводо и Заступнице народа грузинского!
Показавши скорую помощь твою мужу оному, света всецело лишенному, отверзла еси абие очи его; и, исполнився радости, егда узре свет дневный, скоро потече поклонитися иконе и принесе тебе «Радуйся»; мы же, ведуще множество милостей твоих, притекаем к тебе, яко к Ходатаице пред Сыном твоим, и не престаем славити Его: Аллилуиа.
Призревши благоутробно на люди, удел твой, святый образ твой дивно явила еси пастырю, да вместо тебе икона твоя пребывает хранительницею иверов, и ослепленныя очи слепому отверзла еси; подобне ему и нам отверзи очи душевныя, иже предстоим пред иконою твоею, да не живем по обычаю нечестивых, но о тебе радуемся и, яко Богородицу, воистину ублажаем тя:
Радуйся, Мати Бога, Творца всех, Неневестная, брака неискусная; радуйся, Ангелов и человеков едино стадо сотворившая; радуйся, Царице вечная и Промысле неоскудный; радуйся, ковчеже ветхаго и новаго закона, во граде царском водворенный; радуйся, лозо новаго винограда, грозд благословения произрастившая; радуйся, Божественныя любве явительнице; радуйся, прославлением знамений и чудес безплодную и хладную веру нашу оживляющая; радуйся, скорбящих и печальных веселящая; радуйся, свеще неугасимая, во тьме седящих и отчаявшихся просвещающая; радуйся, прибегающих к тебе от темниц и уз освобождающая; радуйся, сном уныния одержимых ободряющая; радуйся, обветшавшее грехом естество наше обновляющая; Радуйся, Пресвятая Богородице Дидубийская, Взбранная Воеводо и Заступнице народа грузинского!
Тогда мнози прихождаху на молитву и просяху исцеления: слепии прозираху и видяху и зряху прекрасное лице твое, глусии слышаху, хромии хождаху, и прокаженнии очищахуся, одержимии же от духов нечистых исцелевахуся, и вси с радостию славляху Бога: Аллилуиа.
Возлюбивше грузины икону сию твою, воздвигоша ей в честь моленный знак, и лобызаху и величаху ю, яко стену, Заступницу и Покровительницу свою; тако и ныне мы, ведущии честная твоя чудеса, людие законнии, купно радуемся и, всецело паству твою составляюще, исповедуем тя Богородицею и в пении вопием:
Радуйся, поклонению святым иконам научающая; радуйся, с любовию и усердием приносимую тебе молитву милостиво приемлющая; радуйся, немощным здравие подающая; радуйся, уязвленным и расслабленным исцеление дарующая; радуйся, неверных человек к вере приводящая; радуйся, всех честных супругов благословляющая; радуйся, утрудившихся упокоевающая и обидимых милующая; радуйся, спасения души хотящих споборнице и покровительнице; радуйся, от сетей сатаниных и от нашествия иноплеменных избавляющая; радуйся, неплодным чадородие возвращающая; радуйся, истинная Мати, осиротевших младенцев невидимо воспитывающая; радуйся, непорочных дев и юношей от страстных похотей покрывающая; Радуйся, Пресвятая Богородице Дидубийская, Взбранная Воеводо и Заступнице народа грузинского!
Видяще страшную силу иконы твоея, множество верных и чудеса безчисленная, яже бываху благодатию твоею, создаша тамо храм прекрасный и, положивше святую икону твою, Пречистая Марие, в понедельник уставиша праздник иконы, еюже покрыла еси нас, под сению ея прибегающих душею и телом, и сподобила еси пети Богу: Аллилуиа.
Возсия благодать твоя во храме Дидубийском, ибо, егда пресветлая доброю икона твоя водворися в дому Божии, архиерее и иерее с людьми празднуют пении и песньми духовными; святая же царица Тамара притекаше в храм сей, иже во имя Рождества твоего наречен есть, и, яко к тихому пристанищу прибегающи, хваляше тя и восхваляше песнию песней:
Радуйся, Невесто безсмертнаго Жениха и нетленно родившая Отроча, прежде век сущее; радуйся, Дево пребывшая и знамение Божества Его явившая; радуйся, дщи Давидова, родившая Князя мира; радуйся, Евину клятву преслушания разрешившая и благословение даровавшая; радуйся, Царице, соединившая небо и землю; радуйся, небеснаго Жениха Невестою нареченная и вино спасения нашего; радуйся, живоносный источниче неисчерпаемыя благодати; радуйся, сокровище честное безценнаго бисера; радуйся, лозо Божественная, грозд жизни носящая; радуйся, место святыни и земле пшеницеродная, пищу безсмертия подающая; радуйся, звездо утренняя, весь мир просвещающая; радуйся, славо и украшение рода Картлосова; Радуйся, Пресвятая Богородице Дидубийская, Взбранная Воеводо и Заступнице народа грузинского!
Се, воистину дивная милость Матере Божия, ибо таковое явное чудо показася за материнскую любовь ея к людем, ей в удел данным, егда дарова икону свою, яко светлое украшение, христолюбивому народу нашему; мы же, сие слышаще, с верою припадаем к покрову ея и Иисусу, Избавителю нашему, поем духом и истиною: Аллилуиа.
Цари Картлосовы чтяху икону твою, яко утверждение царства своего, и, созидающе палаты своя на поле Дидубийском, тамо собираху воинства своя и поручаху тебе, яко Взбранной Воеводе народа грузинскаго; и се, людие наши, возлюбленнии, паки объяты суть множеством искушений и скорбей, но ты веси немощь нашу и даждь нам силу, мужество и мудрость низложити козни вражия, да пою ти: Мати Божия, слава заступлению твоему:
Радуйся, от святых икон материнскую сладость присно источающая; радуйся, род грузинский превосходною радостию возвышающая; радуйся, отчаянных упование и падших простирающая руку; радуйся, суетным стремлениям узду налагающая; радуйся, жен духовной крепости и целомудрию научающая; радуйся, очес болезни исцеляющая; радуйся, заблудших взыскающая и умерших оживляющая; радуйся, от ненасытныя жажды сребролюбия освобождающая; радуйся, тьму греха и неведения озаряющая; радуйся, стесненныя души скоро просветляющая; радуйся, от мятежа мира и брани избавляющая; радуйся, глубоко уснувшую и умолкшую совесть нашу пробуждающая; Радуйся, Пресвятая Богородице Дидубийская, Взбранная Воеводо и Заступнице народа грузинского!
О промысле твоем о нас, Владычице! Ибо дивно даровала еси икону твою народу, во Христа облеченному, да избавится тобою от всякия скорби и вреда; и ныне о нас ходатайствовати не престани и умоли Всесильнаго Бога, да дарует нам правителя и вождя, пастыря верна и праведна, якоже Давида Израилю, да с любовию пасет вверенных ему и чистым сердцем славит Бога: Аллилуиа.
Якоже икона сия паче солнца озаряше дарами помощи твоея предков наших, тако и ныне нас, к Материнской благодати и помощи твоей присно припадающих, благослови и освяти сиянием чудотворныя иконы твоея, да покаяние наше разрешит искушение разорения, якоже ниневитян, и вси вернии ублажаем тя, яко присную Покровительницу нашу:
Радуйся, икона, всю небесную девственную красоту изображающая; радуйся, солнце пресветлое, верным сладкий свет победы изливающее и просвещающее; радуйся, прославлением чудес твоих Дидубийскую церковь озаряющая; радуйся, священство святостию украшающая; радуйся, царство благочестием возвышающая; радуйся, власти боголюбием умудряющая; радуйся, воинства грузинская мужеством укрепляющая; радуйся, от одержимых злых духов отгоняющая; радуйся, скверною греха одержимых омывающая; радуйся, делателей плодоносными творящая и алчущих питающая; радуйся, от всякия козни диавольския избавляющая; радуйся, к молящимся милостиво приклоняющаяся и уповающих на тя ободряющая; Радуйся, Пресвятая Богородице Дидубийская, Взбранная Воеводо и Заступнице народа грузинского!
Якоже отцы и деды наши веселяхуся благочестием о пречудней иконе твоей, тако и мы о ней радуемся и хвалим, Нетленная, память твою; но ты даждь нам сердце разумно и мудро, еже разумевати благое и лукавое, и даруй нам честь достоинства и благодать милости, да не совратимся с пути правды и истины, но стезю временнаго жития добре пройдем и со страхом и трепетом воспоем Спасителю душ наших: Аллилуиа.
Се, все упование наше на тя возлагаем, в женах Блаженная, Богородице, ибо благодать чудотворныя иконы твоея многоразличныя недуги исцеляет и духи нечистыя прогоняет, и припадающим к ней даруеши душ и телес исцеление, да с радостию ублажаем тя и приносим тебе благодарственное пение:
Радуйся, ширшая небес и превысшая миров; радуйся, многоочитых Херувимов вышшая; радуйся, шестокрилатых Серафимов превосходнейшая; радуйся, Мати и Царице всея твари; радуйся, даре и похвало Ангелов и человеков; радуйся, радосте живых и умерших; радуйся, стено крепкая священства, добре себе блюдущаго; радуйся, православных щедро венчающая; радуйся, оружие непобедимое царей и князей; радуйся, крепосте и мужество воинств; радуйся, свыше дарованная поборнице и упование всех обремененных; радуйся, благодатию твоею недремлющая хранительнице и стражу пределов Иверии; Радуйся, Пресвятая Богородице Дидубийская, Взбранная Воеводо и Заступнице народа грузинского!
Воспоминающе Рождество твое от стараго Иоакима и неплодныя Анны, праздник сей совершаем усердно и, со страхом приступающе принести смиренныя моления наша, покланяемся иконе твоей и просим помощи и милости, да Святую Троицу, неописанную, силам небесным непостижимую, во истине познаем и возопием: «Слава в вышних Богу»: Аллилуиа.
Радуйся и веселися, Дево, Святая Марие, ибо Боголепную икону твою, яко сокровище, даровала еси людем, тебе в удел данным, в упование и предстательство царствующаго сего града, и сподобила еси нас припадати к ней; паки хранит она покровом своим всех живущих в нем; сего ради притекаем в обитель твою, да святыню оную тепле облобызаем и возопием усердно:
Радуйся, зрением пресветлыя иконы твоея всех нас услаждающая; радуйся, в сердцах наших упование и Божественную любовь насаждающая; радуйся, жаждущия души источником нетления и радости напаяющая; радуйся, живущих в уделе твоем от врагов видимых и невидимых покрывающая; радуйся, гладом стесненных чудесно насыщающая; радуйся, прелесть суеверия угашающая; радуйся, нечестивых укрощающая и волхвов чародейство разрушающая; радуйся, чрез богомудрых подвижников паству твою добре пасущая; радуйся, от нападения врагов невидимых и видимых избавляющая; радуйся, высоких и гордых смиряющая и падших возставляющая; радуйся, скорбящих мучение облегчающая; радуйся, люте уязвленных исцеляющая; Радуйся, Пресвятая Богородице Дидубийская, Взбранная Воеводо и Заступнице народа грузинского!
Призре Христос, Сын твой, на народ грузинский, носящий хитон Его, и неизменный образ Свой, на плате изображенный, дарова ему, яко утверждение, силу и славу царства сего; ты же не забыла еси обета твоего, имже обещалася еси иверам, и даровала еси нам икону твою во избавление от всех страстей и нашествий вражиих; сего ради припадаем под покров твой и воздаем славу Богу нашему, Спасителю и Избавителю верных: Аллилуиа.
Благодаряще, недостойнии раби твои благословим тя, благодарим, воспеваем и славим благоутробие твое, ибо ты еси великая Помощница рода грузинскаго, икона же сия твоя паки неоскудно творит исцеления и чудеса, и идеже аще призывают тя и молят во время болезней и искушений, скоро подаеши исцеление и помощь; сего ради прибегаем к заступлению твоему и вопием усердно:
Радуйся, жизни Предводительнице, благословения Подательнице; радуйся, благоверных властей и воинств благословляющая; радуйся, за веру и отечество трудящихся милующая; радуйся, отступивших от власти Божия и власти человеческия ищущих обличающая; радуйся, любовию к родной земле пламенеющих возлюбляющая; радуйся, на Грузию руку поднимающих устрашающая; радуйся, распри и вражду между единоверными любовию и миром заменяющая; радуйся, противящихся истине и покоряющихся лжи прещением наказующая; радуйся, насильствующих человеконенавистных правителей смиряющая и обидимых ими защищающая; радуйся, прелестников лютых и лукаво губящих единоплеменных своих низлагающая; радуйся, неправедных и мздоимных судей смиряющая; радуйся, воюющих на благословенный язык наш и искоренить его подвигшихся сокрушающая; Радуйся, Пресвятая Богородице Дидубийская, Взбранная Воеводо и Заступнице народа грузинского!
Сияет преславными чудесы икона твоя Дидубийская и благодатию просвещает с верою прибегающих; мы же усердно припадаем к святыни сей, яко к стражу недремлющему и Избавительнице от скорбей, и молим тя: избави нас от порабощения злых бесов и от козней человеческих, да с радостию ублажаем тя и благодарение приносим Богу: Аллилуиа.
Приидите, вси вернии, во святый сей храм Рождества Богородицы, воистину скинию славы Божия, юже воздвигоша иконе Дидубийской, и припадем к Материнской благодати ея: «О Всеблагая Владычице, низложи нападающих и противящихся христианству и покрый землю Иверскую от ересей и чуждаго закона, а живущих в ней от всякаго злострадания, да невредимо сохраняеми хвалимся и глаголем по силе нашей:
Радуйся, святый хитон твой народу нашему в силу и узы крепости даровавшая; радуйся, кающихся приемлющая и погибших взыскующая; радуйся, покаяние приносящая и грехов оставление испрашивающая; радуйся, света и благословения Подательнице; радуйся, всякаго блага и радости Дательнице; радуйся, по-зверски разсвирепевших человеков укрощающая; радуйся, рог неверных сокрушающая и лукавых и нерадивых посрамляющая; радуйся, Божественной ревности и благоговению научающая; радуйся, разсеянным по всей земле грузинам утешение и спасение дарующая; радуйся, Материнским ходатайством многих от погибели избавляющая; радуйся, народу грузинскому сладость благочестия от Господа испрашивающая; радуйся, умысел возставших на нас безумных человек упраздняющая; Радуйся, Пресвятая Богородице Дидубийская, Взбранная Воеводо и Заступнице народа грузинского!
О Марие, Пресвятая Дево Дидубийская и Мати Света, призри на нас, иже пением и песньми духовными покланяемся дивной иконе твоей и с мольбою просим у тебе: избави нас от страстей, от скорбей и теснот, и разруши наветы невидимых и видимых врагов и супостатов наших, да всем православным благоуспеется и молитва наша принесена будет пред Бога: Аллилуиа.
Сей кондак трижды, затем
Тебе поет, Мати Христова, лик небесных безплотных, яко превысшей всех начал и властей, и с ними хвалит тя всяк язык человеческий; мы же с верою притекаем к чудотворной иконе твоей и молим тя, уповающе на всесильное заступление твое: милостива буди к нам и избави от всякия скорби и от сетей вражиих нас, иже на хвалу твою подвигохомся и по силе нашей воспеваем:
Радуйся, святая Мати Иисуса, Сына Божия; радуйся, врата небесная и престоле Царев; радуйся, прозябший жезле Ааронов; радуйся, вместилище Бога и носительнице Солнца правды; радуйся, обителе истины и мерило веры; радуйся, колеснице святыни и лествице Божия сошествия; радуйся, неизследимо родившая Творца Ангелов; радуйся, вине Адамова избавления и избавительнице Евиной печали; радуйся, упование всеобщаго воскресения и поручительнице вечныя жизни; радуйся, покровительнице и поборнице народа Картлосова; радуйся, ходатаице и попечительнице наследия отечества нашего; радуйся, стено необоримая и хранительнице града Тбилиси; Радуйся, Пресвятая Богородице Дидубийская, Взбранная Воеводо и Заступнице народа грузинского!
Ширшая небес Дево и Херувимов вышшая, Богородице, ты еси упование и похвала нас, верных, иже лобызаем икону твою и тя Ходатаицу приносим к Сыну твоему и Богу всех нас, да покрыет нас от вреда душевнаго и телеснаго и сподобит нас подобающе приносити пение: Радуйся, Пресвятая Богородице Дидубийская, Взбранная Воеводо и Заступнице народа грузинского!
О Всемилостивая Владычице, Богородице Дидубийская, вышшая небес и светлейшая солнца, Невесто, Рабо и Мати Избавителя, Покровительнице и Поборнице народа грузинскаго и непобедимая Воеводо Грузии!
О Владычице, Мати человеколюбиваго Бога, Пренепорочная Дево Марие! Святую сию икону твою Дидубийскую, различно украшенную ризою багряною и златотканым покровом, имамы, яко воистину безмездную Врачевницу телес и Целительницу душ, и с воздетыми руками молим тя пред нею: буди нам, грешным, теплая Предстательница пред Сыном твоим, да упразднит страшныя козни тех, иже о лукавых и суетных подвизаются во вред народу нашему, тобою яко собственный избранному, и да сохранит нас от всякия скорби и соблазна, веру же нашу паки обновит и дарует нам неоскудную любовь к Богу, к ближнему и к отечеству. Многомощною силою твоею укрепи Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, и преосвященных митрополитов, архиепископов и епископов, и весь священнический и монашеский чин, благоверных, военачальников и градоначальников, и все христолюбивое воинство, и благодетелей наших, и всех православных христиан.
О в женах Блаженная, похвало наша, Богородице, умоли Сына твоего, Спасителя мира, да дарует церквам славу, священству честность, властем доброе пасение народа, воинству мужество, мирянам безгрешие и женам целомудрие, нам же да возставит благочестие, правдолюбие, многочадие и милосердие ко вдовицам и сиротам. Да дарует нам любовь к житию во святыни, ненависть к делам непотребным и сокрушение сердечное, венчание со святыми и наследие Царствия Небеснаго, да и мы с тобою славим Отца и Сына и Святаго Духа, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитв ради Пречистыя Твоея Матере и всех святых, помилуй нас. Аминь.
Составила Тинатин Мчедлишвили
