Акафистное пение преподобному отцу нашему Додо Гареджийскому
Похвалами поем пресветлое светило народа грузинскаго, великаго подвижника Додо, избранника Божия, и молим тя с упованием на всесильное ходатайство твое: малое сие пение наше приими и представи нас Благому Богу, да отженет от нас всякое зло и на путь заповедей Своих направит восхваляющих тя: Радуйся, святый равноангельный отче, преподобне Додо Гареджийский!
Ангела земнаго и человека небеснаго ведим тя, святе Додо, и молим тя усердно: не лиши нас силы и помощи святыни твоея, но, яко имея дерзновение велие, моли Христа Бога нашего, да дарует нам победу на безчисленныя враги и на власти тьмы, да обрящем покой и непреходящее веселие, хвалами величающии тя:
Радуйся, от юности во святыни воспитанный и духовныя премудрости исполненный; радуйся, теплою молитвою Божественне вооруженный; радуйся, душу твою Христу в жилище усвоивый; радуйся, подобно Иоанну Крестителю пустыню возлюбивый; радуйся, непорочным священством Христу последовавый; радуйся, Крест Его на рамена твоя вземый; радуйся, невидимыя глубины Божественныя благодати испытавый; радуйся, учения небесная паче риторов изрекавый; радуйся, лютыя подвиги и искушения мужественно подъявый; Радуйся, святый равноангельный отче, преподобне Додо Гареджийский!
Рождься от благочестивых в стране Кахетинстей, от юности Христу последовав, всецело непорочно исполнял еси вся добродетели и, молитвою и постом достигши верха совершенств, юноша, яко старец и мудрый, облеклся еси во образ иноческий и слезами и бдением день от дне подвизался еси во славу Божию: Аллилуиа.
Ревнитель быв благочестия, облеклся еси во священную ризу правды и благодати и в Ниноцминде начал еси подвизатися паче естества; ныне призри на нас с милостию и избави нас от веры неживыя и теплохладныя, народ же наш покрый от ереси и закона чуждаго, да не преклонимся к беззаконию и, правою верою бодрствующе, сподобимся принести пение:
Радуйся, отрасле боголепная, от корений благочестивых оных вельмож прозябшая; радуйся, древо прекрасное, плодом безсмертия и насаждением подвига возрастшее; радуйся, плотию изнуренный и духом украшенный; радуйся, богатством Божественныя благодати исполненный; радуйся, лествице добродетелей, от земли до небесе досязающая; радуйся, Православием огражденный и в Троице единаго Божества поклонению научаяй; радуйся, чародейства и волхвования волхвов разрушителю; радуйся, насмешку их победою обличивый; радуйся, от смрада беззакония очищаяй; Радуйся, святый равноангельный отче, преподобне Додо Гареджийский!
Во время оскудения святых не презре Христос народа нашего, ходатайством Матере Своея, и посла из Сирии Иоанна Зедазнийскаго с двенадесятию учениками на наставление и вразумление рода нашего; ты же, мужественне, слышав, како един от тринадесяти, блаженный Давид, подвизается с Лукианом, подвиглся еси видети пастыря онаго добраго и с радостию благодарил еси Бога и славил еси промысл Его: Аллилуиа.
Сердцем твоим возлюбил еси безмолвное житие и, отвергшися суеты мира сего, отче, пошел еси видети блаженнаго онаго старца; и, сретшеся друг с другом, беседовасте о Божественном учении и молили есте Христа Бога, да покрыет от всякия сети народ грузинский, жребий Матере Своея; ныне испросите нам от Него избавление Иверии от нашествия врагов и непоколебимое сохранение Церкве от всякия ереси, да просияет Грузия верою, и мы подвигнемся на хвалу боголепнаго подвига вашего:
Радуйтеся, всехвальнии отцы — Давиде, столпе подвижничества, и Додо, благодатию светло просвещенный; радуйтеся, славнии проповедницы любве; радуйтеся, непоколебимии памятницы мужества; радуйтеся, единым духом жительствующии и злой умысл врагов упраздняющии; радуйтеся, необитаемую пустыню во град духовный претворившии; радуйтеся, учителие непорочныя веры; радуйтеся, стены и утверждения Церкве; радуйтеся, пресветлая светила мира; радуйтеся, небеснии поборницы и крестоносцы народа нашего; Радуйся, святый равноангельный отче, преподобне Додо Гареджийский!
Видев тя преподобный ревнующа о делех Божественных, с радостию тя возлюби и, показуя скалу противолежащую, рече тебе: «Иди, брате Додо, с иными оными братиями и сотвори обитель и церковь во имя Пресвятыя Богородицы»; ныне тепле помолитеся о нас пред Нею, да дарует нам дух милосердия, святыни и правды, да избежим грешнаго жития и не престанем хвалити и благодарити Бога: Аллилуиа.
Егда изшел еси на рог он, преподобне, стал еси в тесной оной разселине скалы, единаго токмо человека вмещающей, и, постом и присною молитвою изнуряя тело, благоухание подвига твоего, яко кадило благовонное, присно восхождаше пред Бога; Того моли ныне, блаженне, да дарует нам премудрость разсуждения добра и зла, да достойно и свято ходим путем предков наших и приносим тебе сие хваление и пение:
Радуйся, духом крепкий, в велицей нищете подвиги и труды подъявый; радуйся, постниче Господень и разрешителю страстей; радуйся, землю нашу благоуханием молитв исполнивый; радуйся, начальниче иноков и сосуде добродетелей; радуйся, истинный отче прибегающих к тебе; радуйся, милостивче и благодетелю нищих; радуйся, помощниче и заступниче заблудших; радуйся, тихое пристанище обуреваемых; радуйся, странных приемлющий и пришельцев утешителю; Радуйся, святый равноангельный отче, преподобне Додо Гареджийский!
Служа Богу на месте оном лютом и каменистом, не убоялся еси нападения бесов, иже великую брань воздвигоша на тя, но козни их отразил еси именем Иисуса Христа и силою Креста Его; ныне и нам буди ходатай пред Богом, да дарует победу на бесы и козни их чтущим тя православным, да радуемся духом, отче, и хвалим силу Его: Аллилуиа.
Егда разнесеся слава чудес твоих и сияние добродетелей, аще и место оно бяше всеконечно безутешно и исполнено гадов, стекашеся множество народа, оставляющаго мир сей, и, изсекающе пещеры в скалах, бываху иноцы, и учил еси их хранити заповеди Божия; ходатайствуй ныне о нас пред Ним, да сохранит Церковь нашу и священники с народом утвердит непоколебимо, да вси купно подвизаемся во славу Божию и ублажаем тя по силе нашей:
Радуйся, друже Божий и утверждение собора иноков; радуйся, в пустыни огнь неугасимыя любве возжегий; радуйся, правило непорочнаго жития; радуйся, зерцало священническаго подвига; радуйся, достойный служителю Божественнаго жертвенника; радуйся, непоборимая стено благочестия; радуйся, огнезрачный столпе Церкве иверския; радуйся, светило явное Гареджи и солнце Кахетии; радуйся, истинный отче и покровителю народа нашего; Радуйся, святый равноангельный отче, преподобне Додо Гареджийский!
Аще и равноапостольная Нина просвети землю сию грузинскую, но многия области остапохуся необращенны, и нецыи пребываху в язычестве; обратися же к Давиду князь Руставский, варвар Бубакар, восхотев обратитися в правую веру, он же со сродники посла его к тебе, ибо иерей бе, жертву приносяй; и, научив его боголепному закону Христову, совершил еси святым крещением; ныне и нас окропи росою благодати твоея, да сердце наше не будет хладно слышати Божественная учения и славити и пети Богу: Аллилуиа.
День от дне, яко реку, молитву возсылал еси со слезами и, присно бодрствуя, зрел еси оком духовным единаго Бога, на высоких живущаго, и молил еси Его о оставлении грехов, о укреплении братий и о избавлении от всех скорбей земли твоея, ибо народ оный новое насаждение бяше и требоваше учений законных; ныне и нас не остави без помощи и ходатайствуй о нас к Богу, да дарует нам теплоту веры и любовь к ближнему, да горит сердце наше огнем Божественныя ревности и изречем благодарственную сию похвалу:
Радуйся, ангеле среди человек, на пасение и подвиг народа твоего посланный; радуйся, подвигом противнаго онаго борителя врага посрамивый; радуйся, от многа времене беззаконными устрашенных христиан духом ободривый; радуйся, благодатию честных словес твоих народ от сна духовнаго пробуждаяй; радуйся, тьму идолослужения прогонителю; радуйся, неразумных и несмысленных умудряяй; радуйся, притекающих к тебе духовною сладостию питаяй; радуйся, учеников твоих строжайшим иноческим уставом наставляяй и в добродетелех возвышаяй; радуйся, подвижников в пустыни, яко птиц, умноживый; Радуйся, святый равноангельный отче, преподобне Додо Гареджийский!
Прославляющий Его прослави тя Бог чудотворцем, ибо, подобно апостолом Его, творил еси безчисленная знамения и исцеления: молитвою укреплял еси немощных и очи слепым отверзал еси, духи нечистыя изгонял еси призыванием Христа Бога и глухих и немых исцелял еси прикосновением Креста Его; тако и ныне покрый нас от вреда душевнаго и телеснаго, да обновленною душею и непостыдными усты хвалим Иисуса, укрепляющаго тя: Аллилуиа.
Егда, яко солнце, просияша силы чудес, тобою в Гаредже совершенных, зело умножися собор любителей пустыни, и изсекосте храм во славу Пресвятыя Богородицы, идеже многая веки прибегаху царие со священники и народы, яко ко пристанищу тихому, и, водворшеюся тамо благодатию ободреннии, ублажаху тя, святе, яко великаго подвижника Церкве:
Радуйся, в смирение, паче адаманта твердое, облеченный; радуйся, рекою слез пустыню плодоносну сотворивый; радуйся, непоколебимая скало благоговения; радуйся, сокровище премудрости, богопознания учителю; радуйся, внутренния оныя сокровенныя страсти прозираяй; радуйся, всех желания сердечная видяй; радуйся, грехолюбивых человек сладости воздержания научаяй; радуйся, образе благочестия предков наших; радуйся, славо и крепосте отечества нашего; Радуйся, святый равноангельный отче, преподобне Додо Гареджийский!
Чистым умом и незлобием рук присно благоговейно пребывая в служении священства, великим трудом распялся еси, безгрешен всецело, яко прежде Адам в раи, и умножил еси обители и, исполнив их отцы подвижники, пустыню ону, стан зверей и жилище бесов, сотворил еси жилищем старцев, с нимиже в нищете со смирением подвизался еси и очищенными устнами славил еси Бога: Аллилуиа.
Прошед вся пути добродетели, во многих подвизех искушен, пребыл еси пятьдесят лет в игуменстве и, достигши глубокой старости, благодатию Духа предуведев исход твой от плоти, собрал еси учеников и, утвердив их молитвою, причастился еси нетленных Таин Христовых и преставился еси в вечныя оныя обители, идеже есть упокоение потрудившихся и подвизавшихся, и, стяжав честь по трудом твоим и теплому подвигу, с ними радуешися пред Богом; Того моли ныне, да утишит волны страстей наших и в пристанище жизни наставит восхваляющих тя:
Радуйся, совершенство отцев и добрый наставниче пустынников; радуйся, добродетелию в совершенную меру достигый учителю грузин; радуйся, Божественный агнче, пасущий словесныя агнцы; радуйся, чудесы просиявый и просветителю грузин; радуйся, неразрушимая стено верных; радуйся, умножителю душеполезных учений; радуйся, старцев жезле и юных насаждений посохе; радуйся, славо Гареджи и похвало христиан; радуйся, благий ходатаю между Богом и человеки; Радуйся, святый равноангельный отче, преподобне Додо Гареджийский!
Слышавше преставление твое, прииде собор подвижников и, многоподвижное тело твое черными покровы покрывше, погребоша в келлии твоей по всему чину схимническому; на гробе же положиша камень и оставиша отверстие для руки, да почерпают персть во благословение, да прикасающиися ей приимут благословение и благодать тобою и хвалят Бога духом и истиною: Аллилуиа.
По смерти твоей «Додорка» нарекоша святую оную обитель твою и украсиша славно, келлию же оную, из камене изсеченную, сотвориша церковию, образ твой изсекоша на камени гробнем и вознесение твое от Ангел на небо изобразиша на стене храма, да вси последующии им станут твердо и непоколебимо на пути заповедей Христовых и, силою духа твоею вооружени, ублажают тя, яко великаго отца и наставника:
Радуйся, премудрый проповедниче учения апостолов и отцев; радуйся, столпе непоборимый и образе нелицемерныя правды; радуйся, подвигом твоим Божественное поприще добре совершивый; радуйся, избранниче Господень, безмятежно Ему душу твою предавый; радуйся, сило и утверждение Православия; радуйся, радосте Церкве иверския; радуйся, отче и теплый покровителю святыя «Додорки»; радуйся, великий старче-наставниче небоподражательныя Гареджи; радуйся, неусыпный хранителю отечества твоего; Радуйся, святый равноангельный отче, преподобне Додо Гареджийский!
Егда святую обитель твою и церковь многажды опустошиша нападающии беззаконницы, гроб твой бысть неприступен, и угасе лампада пред ним; но обрести святыя мощи твоя и перенести их в пустынь Давидову положи на сердце инок Михаил-Гоброн Сабинин, ведый чудеса, тобою в пустыни совершенная, и, возвестив дело сие отцем лавры, по достоянию ублажаху тя и хваляху Вседержителя: Аллилуиа.
Егда достигоша Додорки Михаил-Гоброн и диакон Спиридон с тремя иеромонахами лавры, совершиша параклис и, молящеся о помощи, усердным искании обретоша храм твой; и егда отвалиша камение гроба, изыде благоухание дивное, еже течаше от всечестных мощей твоих, и, ужасшеся, со слезами ублажаху тя, преподобне, и славу воздаваху Богу; ныне ходатаем тя посылаем к Нему, да умножит нам учителей и наставников закона, да велегласно проповедуют истинную веру и хвалят тя, подражающе слову и делу твоему:
Радуйся, подвига благочестия добрый делателю; радуйся, стадо твое к истинному Богу приводяй; радуйся, от Христа венец победы приемый; радуйся, силою Божиею многая чудеса совершивый; радуйся, многих отцев отцем и наставником нареченный; радуйся, достойно поживый и в правде состаревыйся; радуйся, из земныя обители в небесную восхищенный; радуйся, небесных воинств собеседниче, пред Святою Троицею непостыдно предстояй; радуйся, в пристанище вечныя жизни мирно вводяй; Радуйся, святый равноангельный отче, преподобне Додо Гареджийский!
Егда отверзоша гроб твой, яко сокровище благодати, узреша человека небеснаго и ангела земнаго, во вретище облеченна, и не престаяху славити Бога и хвалити подвиг твой; егда же изнесоша честныя мощи твоя, блаженне, яко алавастр Божественный обильно источаху благоухания, и, принесше их в пустынь Давидову с пением и кадилом, срето их и отцы со звоном колокольным, и, положивше во храме, хваляху Бога, творящаго чудеса: Аллилуиа.
Прешедше нощь ону в молитве, совершиша отцы Божественную литургию и восхотеша погребсти тя близ сподвижника твоего, ибо был еси, блаженне, и наставник святаго Давида; но явишася вскоре противницы доброму сему делу, и честныя мощи твоя погребоша в ограде лавры; по сем же, изнесше по воле Божией, положиша во храме, имиже обогатиша обитель ону сугубою благодатию и всех подвигоша на сплетение венца похвал:
Радуйтеся, пастырие словесных овец, Божественным словом и делом пасущии; радуйтеся, в сердца язычников любовь Христову насаждающии; радуйтеся, наставницы наши богоблагословеннии, святыни и смирению учащии; радуйтеся, мужеством духа малодушным и разслабленным пример давшии; радуйтеся, души человеческия Христу приобретающии; радуйтеся, подвижников заступницы и укрепителие; радуйтеся, в келлиях возсылаемыя молитвы скоро услышающии; радуйтеся, чтущим вас небеснаго венца испрашивающии; радуйтеся, с любовию празднующих вас веселящии; Радуйся, святый равноангельный отче, преподобне Додо Гареджийский!
С радостию хвалим тя, пастырю истинный стад Христовых, и притекаем к жилищу мощей твоих, да святыню сию тепле облобызаем и благодарение и славу воздаем Богу; ныне буди нам наставник жития и ходатай ко Христу, да дарует сердцем нашим чистоту и сокрушение, и присно славим святое имя Его: Аллилуиа.
Яко свеща пресветлая, на свещнице вознесенная, светил еси земли твоей и благодатною молитвою твоею и учением Божественным в правоверии утверждал еси народ грузинский; по смерти же причтен еси ко святым Церкви иверския и имаши благодать пред Богом, да паки вооружит нас непобедимою силою Своею на врагов видимых и невидимых, да путь временнаго жития добре пройдем и хвалим тя с любовию:
Радуйся, иноче, Ангелом подражателю, иже в вере утверждал еси народ грузинский; радуйся, всеблаженне, преподобне старче-наставниче, иже терпением подвигов стада твоя принесл еси Богу жертвою духовною; радуйся, премудрый и духоносный, иже, представ престолу Господню, восхитил еси Царство, уготованное Им любящим Его; радуйся, отче бодрый и боголюбивый, удивися всякий полк Ангелов подвигу твоему, святе, ибо подвизался еси плотию и на небеси просиял еси духом; радуйся, красото Церкве иверския, ибо гроб твой богато источает благоухание благодати и исцеления; радуйся, Илии и Иоанну уподобивыйся пустынниче, ибо «Додорка» возвещает подвиг твой и велегласно проповедует труды твоя; радуйся, мужественнейший подвижниче, ибо гроб честных костей твоих имамы, вернии, яко богатство духовное, сокровище благодати и прогонителя бесов; радуйся, ибо радуется Церковь грузинская и благодарит Бога о тебе, отче святый Додо; радуйся, небесный поборниче народа нашего, ибо можеши помогати всем, иже на молитвы твоя уповают и к ходатайству твоему прибегают; Радуйся, святый равноангельный отче, преподобне Додо Гареджийский!
О угодниче Божий и чудотворче, преподобне отче наш Додо Гареджийский! С верою к твердому твоему ходатайству и отеческой благодати и помощи припадающих помилуй и сохрани от лютых грехов и немощей и от многих сетей диаволих, во время же суда, егда предстанем безсмертному оному престолу, избави нас от страшнаго и трепетнаго оного наказания, да, тобою путеводими, невозбранно достигнем Царствия Небеснаго и присно славим Пресвятую Троицу: Аллилуиа.
Сей кондак (трижды), затем икос 1 и кондак 1.
О светозарная звездо пустыни, преподобне отче наш Додо Гареджийский, великий игумене Божественныя обители «Додорки» и похвало возлюбленнаго народа нашего; памятниче подвига и твердая скало веры; наставниче отцев и прекрасное украшение Церкве Христовы; многих чудес делателю и ходатаю наш пред Спасителем и Пречистою Его Материю!
О в отцех благочестием просиявый, великий чудотворче Додо Гареджийский! Иже свыше Божиим промыслом пришел еси в пустыню Гареджийскую во пристанище душ и во умножение обителей, совершил еси ангельское течение твое на земли и, вознесся от плоти пред Христа Бога и Спаса, даровал еси всехвальныя мощи твоя святей Церкви, во свет и венец благодатей, и поклоняемся им и молим тя: буди нам ходатай пред Ним, да благодать Свою и милость обновит народу нашему, жребию Матере Своея, носящему Крест Господень на земли, и сохранит нас от сети вражия и от насмешки и насилия антихристова. Многомощною силою твоею покрый и укрепи Святейшаго и Блаженнейшаго Католикоса-Патриарха всея Грузии, Архиепископа Мцхетско-Тбилисскаго и Митрополита Бичвинтскаго и Цхум-Абхазскаго, отца нашего Илию, преосвященных митрополитов, архиепископов и епископов и весь священный и монашеский чин. Укрепи служителей Божиих и всех православных христиан.
О пустыни безводныя во грады претворивый и добрый строителю подвижниче, преподобне отче наш, святый Додо Гареджийский! Избравый житие ангельское и облекийся во святую оную схиму иноческую, ныне помяни нас пред Богом, яко имаши дерзновение велие к Нему, да дарует церквам благолепие, священству честность, властем и правителем нашим доброе пасение народа, воинству мужество, мирянам безгрешие и женам целомудрие, нас же да возрастит, умножит и исполнит духом премудрости, взаимною любовию и Божественным разумением, да возставит нам правдолюбие, многочадие и милость ко вдовицам и сиротам; да дарует нам любовь ко святому житию, ненависть к непотребным делом и сокрушение сердца, да не обладает нами растлевающий дух века сего, и, небеснаго жительства сподобльшеся, с тобою поем, благословим и славословим Пресвятую Троицу, Ейже Единой подобает всякая слава, честь и поклонение, Отцу и Сыну и Святому Духу, ныне и присно и во веки веков. Аминь.
Достойно есть яко воистину блажити тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу тя величаем.
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Господи Иисусе Христе, Сыне Божий, молитвами Пречистыя Твоея Матере, преподобнаго и богоноснаго отца нашего Додо Гареджийскаго и всех святых, помилуй нас. Аминь.
Автор-составитель: Тинатин Мчедлишвили
