Праздничное последование преподобному отцу нашему Зенону Икалтойскому
— «Приидите, поклонимся» — поется.
— «Благослови, душе моя, Господа» (псалом 103) — поется.
— «Блажен муж» — 1-й антифон 1-й кафизмы.
— «Господи, воззвах» (поется на 5-й глас).
— Преподобному Зенону.
Славу мирскую тленную оставил еси, Зеноне, красото Икалтойская, дивный, и, по тесному пути спутник быв учителю твоему Иоанну, истину имели есте наставницею пути онаго страннаго; и, с миром достигшим вам страны Картлийския, срете вас избранный святитель Христов Евлавий, Духом извещенный, и, купно с ним приимше огненныя языки, благословением его и молитвою теплою достигосте, преподобнии, совершенной меры добродетелей: помолися ныне ко Христу и испроси, преподобне, ниспослати Церквам единство, мир и велию милость.
Пастыря овец обретаем тя и добре подвизающагося молитвенника, бесов же, тобою низложенных, видим, Зеноне, красото Икалтойская, дивный, сияние Божественныя любве и просветителю живущих в Кахетии; столпе непоколебимый терпения; утверждение и древо Церкве; светильниче всесветлый и светило всея Грузии; сокровище добродетелей и святою молитвою твоею ходатаю всех почитающих тя: помолися ныне ко Христу и испроси, преподобне, ниспослати Церквам единство, мир и велию милость.
Воистину добрый подвижник и столп непоколебимый явився в горах Кахетинских, Зеноне, красото Икалтойская, дивный, вселился еси в Икалто и тамо премудро верных собрал еси и возвел еси на высоту духовную; помолися, всеблаженне, о нас, совершающих честную память твою, да ниспослет Церквам единство, мир и велию милость.
Радуется ныне обитель Икалтойская, сокровище имущая святых мощей твоих, похвало подвижников и утверждение правыя веры, Святыя Троицы избранный служителю, ангелом подобниче, от земли на небо вознесенный и Царствия наследниче, Зеноне, красото Икалтойская, дивный: помолися ныне ко Христу и испроси, преподобне, ниспослати Церквам единство, мир и велию милость.
Восхваляются присно от православных христолюбцев Божественныя добродетели твоя, Зеноне, красото Икалтойская, дивный: чистота, кротость, и смирение, и милость к нищим; ныне и мы, не неведуще подвигов твоих и трудов, тепле молим тя: помолися ныне ко Христу и испроси, преподобне, ниспослати Церквам единство, мир и велию милость.
Блаженни суть живущии во обители твоей, Зеноне, красото Икалтойская, дивный, даров многих сокровище и сосуде, хранящий девственную чистоту, благодати пристанище, исцелений источниче, недужных безмездный врачу, истинных постников помощниче и печальных утешителю, возмущенным страстьми мира сего тихое пристанище: помолися ныне ко Христу и испроси, преподобне, ниспослати Церквам единство, мир и велию милость.
Во день памяти твоея радуемся, собори православных грузин, Зеноне, красото Икалтойская, дивный, и гласом велиим вопием ти: любве ради Христовы оставил еси красоту мира и, благословением учителя твоего вселився во страну Кахетинскую, основал еси обитель Икалтойскую и водительством Божиим стадо, вверенное тебе, пасл еси кротким и смиренным духом: помолися ныне ко Христу и испроси, преподобне, ниспослати Церквам единство, мир и велию милость.
Празднует Церковь грузинская память твою и повелевает нам воспети подвиг твой, Зеноне, красото Икалтойская, дивный, со ангелы соединенный храме таинств, бездно разума, зрителю неизреченных, отче старцев, похвало иноков и наставниче отшельников, иже пред Пресвятою Троицею радуешися, многим сиянием просвещен, и помощник еси молящих тя: помолися ныне ко Христу и испроси, преподобне, ниспослати Церквам единство, мир и велию милость.
Слава Отцу и Сыну и Святому Духу.
Сокровенная таинства, яко явная, зрел еси, святый старче, грядущая же верно ведал еси, и вся реченная тобою истинна суть; ныне даждь нам сердце разумно и мудро, во еже разумевати добро и зло, да от пагубных путей избежим и направимся на путь истинный.
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим.
— Вход с кадилом.
— Прокимен дне
— Паремии — 3 чтения преподобному (ищи 28 сентября, в службе святому Харитону).
— На литии стихира храма — 1.
— Таже преподобнаго Зенона.
Сей достопамятный, дивный и всехвальный отче наш Зеноне, прозябл еси от земли Месопотамския, близ Антиохии, и, во отечестве своем начав иночество, жительствовал еси во всяком смирении и подвизе; учитель же твой Иоанн творяше от Бога многоразличная знамения и чудеса и исцеляше недуги и болезни. Ныне и нам помозите и покрыйте нас от всех немощей и скорбей.
Блаженный сей учитель твой и светлое светило Иоанн, яко светлая звезда, возсия во тьме неведения заблуждшим душам и ко свету невечернему наставник им бысть; но бегаше славы временныя сея и, оставив место, идеже пребываше, отиде в дальнюю пустыню и седе в пещере со двенадесятию ученики своими, в нихже сочтен, блаженне Зеноне, достигл еси меры великия.
Молитвою и бдением стяжавше от Спаса благодать Святаго Духа, всякия плотския сласти и вкусы презирасте, постом и присною молитвою истощавасте тело и всякими тесноты изсушавасте и изнемогасте мучительство его; и жилища вашего многое время никтоже ведяше, но прослави вас Бог, прославляемый вами, и паки яви рабы Своя земли.
Егда пройде слух о вас по Антиохии и по всей Месопотамии, приношаху на одрех недужныя и бесноватыя ко Иоанну, и вси исцеляхуся силою Божиею и молитвою его; но бегаше отец оный почестей мирских и умысли отити в странствие, и рече своим учеником, в нихже и ты пребывал еси, святе Зеноне, да на том же месте подвизаетеся и молитеся и о нем; вы же тако связани бесте любовию духовною, яко глаголасте ему: «Не оставим тебе единаго, ибо ты еси наставник душ наших, и благодатию твоею чаем от Бога милости».
Оставивше землю и отечество ваше, гласом Господним призвани, приидосте в землю, жребий Богородицы, ибо тамо проповедася святое Евангелие Христово великим апостолом Андреем вместо Матере Божия; и последи, егда послана бысть Ею святая дева Нина, крестися царь и весь народ во имя Святыя Троицы; но во владычество Персидское умножися прелесть еретиков и язычников, и нецыи уклонишася от правыя веры.
…ко Мцхете, престольному граду, в то время превосходящему прочия грады. И, вшед пред Животворящий Столп купно со ученики своими, поклонися Господу, пад на помост и слезами омочая землю, и долго моления приносяше благому и сладчайшему Царю.
Во царствующий град Мцхету вшедше, приступисте к Животворящему оному Столпу, егоже царь Мириан множеством безчисленных людей не возможе воздвигнути три дни, и воздвиже его Бог молитвою просветительницы и обратительницы грузин, матере и апостола нашего Нины; и, коленопреклонением и слезами омочающе землю, просисте помощи от благаго и сладчайшаго Царя, да наставит вас истиною Своею к месту, в немже благоугодно Ему в безмолвии скончаете останок дней жития вашего.
Бог, не презираяй моления рабов Своих, показа ему гору на севере от града Мцхеты и Честнаго Креста и возвести, да взыдет на верх горы тоя; и, прешедше Арагви, взыдосте поклонитися Честному Кресту и помолистеся; и, егда взыдосте на гору ону, на нейже язычницы столп создаша и беси зело вселишася и служими бяху дымом жертв, узрев сие учитель твой, блаженне Зеноне, яко угодно бяше ко уединенному безмолвию, рече учеником своим: «Аз зде вселюся, да молитвою очистится место сие и будет украшением Церквам и окрестным народом грузинским».
აღირჩია რაჲ მარტოდ მყოფობაჲ ღმერთშემოსილმან მამამან ჩუენმან, წმიდამან იოვანე, გაკურთხათ იწროსა გზასა მას ზედა მონაზონებისასა სრბად წმიდითა ჯუარითა თჳსითა, და განგსწავლიდათ თჳსთა მოწაფეთა და გეტყოდათ: „შვილნო, სარგებელისათჳს ამის ქუეყანისა წარმოგუავლინნა უფალმან ჩუენმან იესუ ქრისტემან და აქა მოგჳძღუა, რამეთუ ახალ ნერგ არს ქუეყანაჲ ესე, ამისთჳს-ცა წარვედით, რაჲთა განამტკიცებდეთ ქრისტეს სამწყსოთა, მრავლითა საცთურითა დაბრკოლებულთა და სპარსთა მაზდეანთა და ერთბუნებიანთაგან ჰაოსიანთა ცთუნებულთა.“ და წარგზავნასა მას თქუენსა ამიერ და იმიერ მხარეთა და უდაბნოთა საქართველოჲსათა, მოგცათ ნაწილთაგან წმიდათა მოწამეთაჲსა, და მათითა მადლითა იცვებოდით ყოველთაგან-ვე საფრჴეთა ეშმაკისათა, და გაქუნდათ ნუგეშინის-საცემელად სულისა და ჴორცთა.
Вселився пустынелюбивая сия горлица на горе Зедазенской, обрете тамо пещеру некую малу и жесточайшими труды подвига, постом и непрестанною молитвою и стоянием, всячески изнуряше и изнемогаше плоть и вся нападения и козни прелестнаго диавола; тебе же, блаженне Зеноне, егда посылаше святый оный в Кахетию, разлучистеся от учителя вашего и друг от друга, отцы святии двунадесяте, и уединистеся, якоже благоизволи Дух Святый; тогда прихождаху вернии Христовы и, вами научени и духом созидаеми, отхождаху восвояси; и исцеления велия творясте помощию Божиею, еюже нападения врагов низложисте в Иверии и утвердисте веру сию православных.
Слава Отцу и Сыну и Святому Духу.
Оставив премудраго оного учителя твоего, взял еси крест, имже похвалился еси, треблаженне, и водительством Святаго Духа и извещением Иоанновым исправил еси шествия твоя путем истинным; и, достиг предел Кахетинских, умножал еси учения душеполезная, и изгонял еси духи лукавыя, и исцелял еси недужныя: тако и ныне ходатай буди нам к Богу, да избавимся всех сетей и одолеем злыя козни невидимаго и видимаго врага.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
— На стиховне стихира. (Глас 8).
Вселившися в тя благодати Божией, возненавидел еси славу века сего и возлюбил еси смирение и странничество, молитву умиленную, бдение и стояние с воздеянием рук, безплотным уподобльшееся; и, скончав течение твое, с радостию предстал еси Христу. Святый старче Икалтойский, блаженне Зеноне, и ныне испроси нам от Него велию милость.
Стих: Честна пред Господем смерть преподобных Его.
Умертвил еси похоть и возлюбил еси святое девство, и, яко свет, облеклся еси в чистоту, и, яко горлица, кротостию служил еси Христу умом непорочным, святе Зеноне, блаженне, украшенный Божественным разумом. Сего ради хвалим тя и ублажаем благохвальным пением.
Стих: Блажен муж, бояйся Господа, в заповедех Его восхощет зело.
Украси тя Бог, святе Зеноне, светом чудес и сиянием Божественных дарований, и исполни душу твою премудрости, и, яко источник живый и кладязь неоскудеваемый, источал еси учения Божественная ко возращению стада Христова.
Слава Отцу и Сыну и Святому Духу.
Рабе благий и верный, добрый делателю винограда Христова, ты мужественно и доблественно тяготу дне понесл еси и данный тебе талант умножил еси; сего ради со Иоанном, учителем твоим, сопричтен еси и с братиею духовною вшел еси в радость Господа твоего благаго: ныне ходатайствуй непрестанно о хвалящих тя.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
— «Ныне отпущаеши».
— По «Отче наш»:
— Тропарь преподобнаго: В тебе, отче, известно спасеся еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней; темже и со Ангелы срадуется, блаженне Зеноне, дух твой. (Дважды)
— Или ин тропарь: Радуется во праздник твой народ грузинский и поклонение приносит Христу Богу, даровавшему таковаго отца и ходатая народу нашему, жребию Матере Своея; и, тобою приемлюще от Бога милость, гласом радости восхваляем похвалу старцев и славу Кахетии, богомудраго отца нашего Зенона Икалтойскаго. (Дважды)
— «Богородице Дево» — единожды.
— Благословение хлебов.
— «Бог Господь» (поется на 4-й глас).
— Тропарь преподобнаго: «Радуется во праздник твой народ грузинский…» (Дважды)
— «Слава», «И ныне» — Богородичен воскресный отпустительный (по гласу тропаря):
Еже от века утаенное и ангелом несведомое таинство, Богородице, тобою сущим на земли явися: Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
По 1-м стихословии седален, глас 1:
Подвизаяся ко ангельскому подвигу, оставил еси мир водительством Иоанновым, подобно Иоанну Крестителю, и, с двунадесятию сподвижники вселився в Иверии, язык твой богословесный, преподобне, землю Кахетинскую учением, яко рекою, исполни и, напоив сердца невеждей, приведе их в богопознание, и спасахуся духовне: и ныне ходатай буди нам пред Богом, да сохранит нас, православныя люди, от сетей сатаны и избавит уповающих на тя от суетных смятений и лютых напастей. (Дважды)
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
— По 2-м стихословии седален. (Глас 4).
Добродетельми обогатился еси, отче, и паче всего возлюбил еси нищету, и странничеству предал еси себе, и странствовал еси в Иверии, якоже и учитель твой Иоанн; укрепляяй же тя Христос Бог яви мужество подвигов твоих и распростре е во вся концы Карталинии и Кахетии; сего ради радуется собор грузин, и хвалится тобою, и веселится радостию, научен от святых тринадесяти сирийских отец. (Дважды)
Слава Отцу и Сыну и Святому Духу, и ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
— «Полиелей», 19-я кафизма (псалмы 134 и 135).
— «Величание» преподобному (с избранными стихами из Псалтири).
— «Седален» по «Полиелеи»:
Плоть умертвил еси подвигом и Божественною ревностию твоею Святей Троице благоугоден явился еси; сего ради лику тринадесяти сирийских отец сочетался еси, святе Зеноне, и от сладостей временных на высоту возвел еси народы грузинския; богоносне, моли Христа Бога даровати оставление грехов любовию почитающим память твою. (Глас 8) (Дважды)
Слава Отцу и Сыну и Святому Духу, и ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
— 1-й антифон 4-го гласа (воскресной утрени).
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
— Прокимен (утренняго Евангелия): «Честна пред Господем смерть преподобных Его». (Глас 7).
Стих: Что воздам Господеви о всех, яже воздаде ми?
— Утреннее Евангелие: Лк., зач. 24; 6, 17–23.
— «Слава» — «Молитвами святаго отца нашего Гавриила…»
— «И ныне» — «Молитвами Богородицы, Милостиве…»
— «Помилуй мя, Боже…» (малый стих).
По 50-м псалме стихира.
Якоже учитель твой, тако и ты, святе Зеноне, не токмо своя плоды принесл еси Богу в жертву благовонную, якоже Авель праведный, егоже жертву обоня Бог, Создатель всех, в воню благоухания, но и иныя безчисленныя души принесл еси Христу и привел еси Ему плоды зело прекрасныя и благовонныя и агнцы непорочныя и чистыя; сего ради имаши дерзновение пред Богом: мира испроси миру и душам нашим велия милости.
— «Спаси, Боже, люди Твоя…»
Чтутся два канона.
1-й канон — Богородицы (ирмос дважды) — на 6 (см. в конце Параклитика каноны Богородицы: «Колесницегонителя фараона…» или «Воду прошед…»).
— 2-й канон — преподобнаго (без ирмоса) — на 8. (Глас 8).
— Катавасия: рядовая.
— Малая ектения — «Поим Господеви».
Ирмос: Колесницегонителя фараона погрузи, чудотворяй иногда, Моисейский жезл, крестообразно поразив и разделив море, Израиля же бегуна, пешеходца, спасе, песнь Богу воспевающа: яко славно прославися.
Святый преподобный отче Зеноне, моли Бога о нас.
Обычай имамы, людие православнии, радоватися памяти всех святых, паче же днесь веселимся во праздник твой, добре подвизавыйся Зеноне Икалтойский, столпе и утверждение собора иноческаго, и единодушно почитаем святую память твою.
Святый преподобный отче Зеноне, моли Бога о нас.
Чистотою сердца быв жилище Святаго Духа, послан был еси от Бога светилом Кахетии, преподобне, и даде ти благодать бесы прогоняти и немощныя исцеляти: ныне покрый стадо твое от всех страстей томящих и от прелестей бесовских.
Святый преподобный отче Зеноне, моли Бога о нас.
Достиг предел Кахетинских, проповедал еси всенепорочную веру православия и, многих научая, учил еси хранити заповеди Божия. Того моли ныне, блаженне старче, да избавит и нас от веры неживыя и теплохладныя.
Святый преподобный отче Зеноне, моли Бога о нас.
Новый апостоле страны Кахетинския, богодухновенных учений возвестителю и пути благочестия сего показателю, благоухание молитв твоих, яко фимиам добрый, присно возношашеся к Богу. Того моли ныне, да избавит нас от всех скорбей и напастей.
Слава Отцу и Сыну и Святому Духу.
Был еси свыше дарованное утверждение православия и радость Церкве Иверския, ибо жезлом веры отгнал еси злаго волка и от расхищений его невредимо сохранил еси стадо твое, силою Троицы укрепляемь.
И ныне и присно и во веки веков. Аминь.
Преславная глаголашася о тебе в род и род, Дево, приявшая во чрево Слово Божие и пребывшая Девою, Богородице Марие; сего ради вси величаем тя, по Бозе избавительницу нашу обретшуюся, яко славно прославилася еси.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Святый преподобный отче Зеноне, моли Бога о нас.
Научен быв от Иоанна, учителя твоего, послан был еси им в Кахетию, понеже оскудеша в то время светила православия в земли нашей, и прогонял еси тьму оную неведения светом проповеди твоея.
Святый преподобный отче Зеноне, моли Бога о нас.
Ревность крепкую имел еси, якоже Илия, честный отче Зеноне, ибо возгорелся еси, яко огнь Божественный, на еретики и попалил еси языки их: буди ходатай о почитающих праздник твой.
Святый преподобный отче Зеноне, моли Бога о нас.
Талант, вверенный тебе, преподобне, не скрыл еси в земли, но умножил еси, яко раб верный, и многосугубо принесл еси Богу; благодать же чудес в дар приял еси, во еже исцеляти недуги с верою почитающих тя.
Святый преподобный отче Зеноне, моли Бога о нас.
Аще и восхотел еси сокрыти себе, блаженне, но не возмогл еси сокрытися, и пройде слух о тебе по земли нашей, яко невозможно есть возжегшему светильник поставити его под спудом, но на свещнице, да светит человеком.
Слава Отцу и Сыну и Святому Духу.
Радуйся, преподобне отче Зеноне, прекрасное украшение Кахетии, уставе и правило иноков; моли Христа Бога, да дарует оставление грехов нам, иже с любовию празднуем память твою.
И ныне и присно и во веки веков. Аминь.
Вселился еси во чрево Девы, Господи, и явился еси человеком плотски, якоже благоволил еси, и показал еси ю воистинну Богородицу, Едине Человеколюбче, и помощницу всем верным.
— По «Утверждение» (песни 3-й):
Седален: Быв во двунадесятих учениках Иоанна Зедазенскаго, от него научился еси зело и, просветився благодатию Божественною, и иных просветил еси, и обитель создал еси в Икалто, в нейже умножишася иноцы и даже доныне стоит во спасение душ и прославление Бога: Того моли ныне избавити от страстей и скорбей нас, богоблаженне Зеноне, иже совершаем память твою.
Слава Отцу и Сыну и Святому Духу.
Во всю землю нашу изыде глас подвига твоего, богомудре отче Зеноне, блаженне, ибо смирил еси высоко глаголавшия лжу, зле заблуждшия злочестивыя еретики, иже, несмысленнии, не вероваху Спасу во двух естествах, и возвысил еси праведную и истинную веру, научая многих неслитному соединению Божества и человечества. И ныне даруй мир властем и воинству нашему верному, и люди, славящия тя, избави от чуждих учений и прелестей.
И ныне и присно и во веки веков. Аминь.
Ко спасению народа нашего Духом Святым умудренную отроковицу, деву Нину Каппадокийскую, на апостольский путь пославшая, святая Дево, Мати Богородице, Тобою данным крестом от лозы виноградныя ею в Мцхете требища низложившая и в земли нашей апостольскую Церковь утвердившая, яже по многих летех ко утверждению народа нашего, от персов умаленнаго, и распространению веры Христовы от Ассирии в Иверию тринадесять отец послала еси и ими созданием обителей весь народ наш на камени веры твердо утвердила еси, Мати Слова, и ныне не престай молящи Бога о нас, уповающих на Тя.
Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недр Отчих и нашу нищету посетивый; темже с пророком Аввакумом зову Ти: силе Твоей слава, Человеколюбче.
Святый преподобный отче Зеноне, моли Бога о нас.
Вселився в пределех Кахетинских, сиял еси, яко светильник на высоком свещнице иночества, всеблаженне Зеноне; видящии же и слышащии святое житие твое славляху Бога, дивнаго во святых.
Святый преподобный отче Зеноне, моли Бога о нас.
Егда молитва твоя возношашеся пред Бога, добра ненавистницы беси, не терпяще подвига твоего, воздвигошася и нападоша на тя, святе Зеноне, и начаша брань многими и различными кознями.
Святый преподобный отче Зеноне, моли Бога о нас.
Козни безбожия не возмогоша поколебати твердости веры твоея, ибо не убоялся еси лукавых оных, коварных и лживых духов, но знамением Честнаго Креста и молитвою теплою разрушал еси безчисленныя сети их.
Слава Отцу и Сыну и Святому Духу.
Радуется Церковь с чады, исполнена светло Божественныя оныя премудрости, память твою совершает и хвалами славит Христа Бога: Того моли ныне, блаженне Зеноне, да отженет от молящих тя напасти, от диавола воздвизаемыя.
И ныне и присно и во веки веков. Аминь.
Языцы человечестии изнемогают изрещи таинство нетленнаго рождества твоего, Неневестная Невесто, верою же исповедуют тя Материю Света.
Ирмос: Не отрини мене от лица Твоего, Свете незаходимый, да не покрыет мене тьма непросвещенная, но обрати мя и к свету заповедей Твоих пути моя направи, молюся.
Святый преподобный отче Зеноне, моли Бога о нас.
Ревнитель был еси древних оных великих иноков, постом и подвигом просиявших, преподобне, и вся дни жития твоего иждивал еси в молитве, слезах и бдении.
Святый преподобный отче Зеноне, моли Бога о нас.
Просвещен сиянием благодатей духовных, яко столпом огненным, рассекл еси моря напастей, всеблаженне Зеноне, и основал еси обитель в Икалто, и добре скончал еси поприще жития сего.
Святый преподобный отче Зеноне, моли Бога о нас.
На сие духовное собрание всепетое, Духом Святым призвани, усердно собравшиися людие, воспоим и возрадуемся достойно памяти богоноснаго отца нашего, подвижника Зенона!
Святый преподобный отче Зеноне, моли Бога о нас.
Дивна суть таинства Твоя, Христе Боже, ибо послал еси нам, яко светильник огнегорящий, преподобнаго Зенона, православным грузинам подвижника и молитвенника, и славу и утверждение страны Кахетинския.
Слава Отцу и Сыну и Святому Духу.
Ныне кто изочтет подвиг твой дивный? Ибо воистину явился еси постников украшение и молитвенник Богу непостыдный. Того моли ныне избавити нас от всякаго недуга и от напасти лютыя.
И ныне и присно и во веки веков. Аминь.
Дерзновение матернее к Сыну твоему стяжала еси, Пренепорочная; не престани помогати нам пред Ним, молим тя, яко имаши к Нему ходатайство и оставление грехов всех христиан.
Ирмос: Молитву пролию ко Господу и исповем согрешения моя присно, яко зол душа моя исполнися, и крепость моя аду приближися, и, яко Иона, вопию: возведи мя, Боже мой.
Святый преподобный отче Зеноне, моли Бога о нас.
Хвалится Месопотамия, земля ваша, со своими жители вами, всехвальнии, ибо оттуду прозябосте, святии Иоанне и Зеноне блаженнии, и со инеми единонадесятьми просвестисте род грузинский.
Святый преподобный отче Зеноне, моли Бога о нас.
Прелести не терпя и зело любя народ, жребий Богородицы, обличал еси грузин за нечестие, да не приидет на них суд Божий.
Святый преподобный отче Зеноне, моли Бога о нас.
Мраз нощный и зной дневный един претерпел еси в странствии и был еси храм Слова Божия; достигл же небеснаго Иерусалима, ходатай еси о поющих тя.
Святый преподобный отче Зеноне, моли Бога о нас.
Соединился еси с ликом святых отец, от Ассирии в Иверию пришедших, и с учителем вашим Иоанном, на горе Зедазенской подвизавшимся, и единодушно радуетеся пред Богом: Того молите ныне, да избавит нас от грехов и беззаконий.
Слава Отцу и Сыну и Святому Духу.
Хвалится прекрасно праздник твой от любящих тя, праведне Зеноне, и ангели пение поющих приносят пред Бога: Того моли ныне, да покрыет нас от сети вражия и от вражды братий.
И ныне и присно и во веки веков. Аминь.
Избави нас от соблазна грехов наших молением твоим, Богородице Дево, к Сыну твоему, рождшемуся от тебе паче естества, Сыну Божию безначальному.
— По «Возопих» (песни 6-й):
Кондак: Хвалится ныне народ наш и веселится святая обитель Икалтойская, ибо мнози вернии спешат в день сей в недра ея, да возвеличат великое украшение грузин, отца и учителя Божественныя премудрости, во многих душах насадителя благонравия и скораго врача всех недужных и одержимых; сего ради вопием ти: молитвами твоими спаси нас, преподобне отче наш Зеноне Икалтойский!
Икос: Веселися ныне, страно Кахетинская; ликуй, обителе Икалтойская, и празднуй, земле картлосиан, ибо милостию посети нас Христос Бог и дарова нам святых тринадесять сирийских отец, в нихже пребываеши ты, блаженне Зеноне; и, егда утвердисте народ наш во благочестии, оттоле никогдаже уклонися земля сия грузинская от святыя и правыя веры, ниже уклонимся во веки благодатию Святыя Троицы и предстательством Всесвятыя Владычицы Богородицы, надежды и покровительницы нашея.
Ирмос: Отроцы еврейстии в пещи по огню хождаху дерзновенно и, орошаеми, вопияху, глаголюще: благословен еси, Господи Боже, во веки.
Святый преподобный отче Зеноне, моли Бога о нас.
Безмерная милость, и превысшая сладость, и смирение быша тебе наставницы на пути истиннем, и всех учил еси, подобно Христу, да раздают щедро нищим и помогают скудным.
Святый преподобный отче Зеноне, моли Бога о нас.
О всем мире, паче же о грузинех моление возсылал еси, да противящияся истине одолевают правою верою и присно победу стяжавают над коварным врагом.
Святый преподобный отче Зеноне, моли Бога о нас.
Ныне просвещается Церковь Иверская славою твоею и повелевает всем верным ублажати тя, ревнителя теплаго и страстей самодержца, нищих предстателя и грешных душ наставника.
Святый преподобный отче Зеноне, моли Бога о нас.
Исцели напоенныя страстьми похоти наша, яже раздражают ум наш, и утиши волны злаго недостоинства; сердца же наша, изнемогшая от попечений мира сего, укрепи, отче Зеноне, да во веки славим Христа.
Слава Отцу и Сыну и Святому Духу.
Многих обличал еси и научал еси брани на враги невидимыя и видимыя и ко вниманию в молитве наставлял еси. Ныне же утвердился еси святым Церкве Иверския и имаши благодать помогати нам.
И ныне и присно и во веки веков. Аминь.
Радуйся, дщи Адамова; радуйся, Невесто Божия; радуйся, Мати Спасова, вместившая Творца твоего; заступи нас присно.
Ирмос: Седмерицею пещь халдейский мучитель богочтецем неистово разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Святый преподобный отче Зеноне, моли Бога о нас.
Якоже Давид смири себе и рече сокрушенным сердцем: «Аз же есмь червь, а не человек, поношение человеков и уничижение людей», тако и ты показал еси высоту смирения, и возлюбил еси Бога, богатство некрадомое, имже прославился еси вовеки: к Нему ходатай буди о нас, иже днесь величаем память твою.
Святый преподобный отче Зеноне, моли Бога о нас.
Ныне радуется и веселится собор верных, воспоминающий подвиг твой, и просит твоего ходатайства к Богу, да мрак неведения, от греха бываемый, отженет от нас и безстрастием, верою и радостию облечет всех, преподобне, иже почитают славную память твою.
Святый преподобный отче Зеноне, моли Бога о нас.
Яко солнце светлое, сиял еси на тверди Церкве грузинския, быв учитель истинный всем, к тебе прибегающим, и Богородице велий молитвенник о народе нашем, и зело любяй люди жребия Ея, Иверию, и молитвенник о иверех и о преуспеянии их.
Святый преподобный отче Зеноне, моли Бога о нас.
Егда создал еси обитель Икалтойскую, по многих летех обнови и распространи ю святый отец наш Арсений и собра тамо богомудрыя отцы и мужи ученыя в наставление учености и во училище всякаго добра; и, егда нарече ю Икалтойскою академиею, в ней научашеся народ наш многи веки.
Слава Отцу и Сыну и Святому Духу.
აწ მტერნი იგი ჭეშმარიტებისანი იღუწიან, რაჲთა ღმრთივდაცული ერი ჩუენი შთასთხინნეს უფსკრულსა უმეცრებისასა და გარდასახნეს ერად ბნელისა, ხოლო ჩუენ ძილის დაჴსნილებასა მივცემივართ და ვერცაღა ძალგვიძს წინააღმდგომად ბოროტისა, არამედ მოწყალე-ჰყავ ჩუენ ზედა მართლ-მსაჯული იგი უფალი, რაჲთა განვსძლიერდეთ და განვცხოველდეთ სულითა და ჴორცითა და კურთხეულითა ენითა ქართულითა ღირს-ვიქმნეთ გალობად ღმრთისა.
И ныне и присно и во веки веков. Аминь.
Трие отроцы в Вавилоне в пещи Троице поклонишася и образ златый презреша, и, росою окропляеми, песнию вопияху: вся дела, благословите днесь Бога и Господа, пойте и превозносите Его во веки.
Хвалим, благословим, покланяемся Господеви, поюще и превозносяще Его во вся веки.
— По «Благословим» (песни 8-й): — «Честнейшую».
Ирмос: Тя, Юже неискусобрачную Матерь и безневестную, Юже паче естества рождшую Безначальнаго, Иже есть Создатель, Бог истинный, немолчными песньми величаем.
Святый преподобный отче Зеноне, моли Бога о нас.
Возвещен бысть тебе день исхода от века сего, и молился еси, и, предав стадо и народ наш, таже и душу твою Господу, соединился еси со множеством святых, и погребоша тя в обители Икалтойской, тобою основанней.
Святый преподобный отче Зеноне, моли Бога о нас.
Видяще грузины гроб твой, источающий исцеления, и чудеса безчисленная, благодатию твоею бываемая, велегласно прославиша тя, яко чудотворнаго отца, и в память и во веки ублажение и хвалу тебе уставиша нам.
Святый преподобный отче Зеноне, моли Бога о нас.
Честь святыни и смертию даже доныне не отступи от тебе, преподобне отче Зеноне, ибо гроб твой бысть немощным, яко сокровище благодати и источник исцелений.
Святый преподобный отче Зеноне, моли Бога о нас.
Уповающии на тя и любящии тя даже доныне спешат во обитель ону, в нейже святый гроб, мощи твоя содержащий, яко источник неоскудеваемый, обильно источает благоухание благодатей и исцеление дарует почитающим его.
Слава Отцу и Сыну и Святому Духу.
Не токмо святыя оныя обители житель еси, блаженне, но и всея земли грузинския, и молитвенник и скорый помощник, и всесильный и непобедимый покровитель и ходатай всех православных.
И ныне и присно и во веки веков. Аминь.
Ветхий закон прообразует тя, Дево Святая, и новый исповедует тя Богородицу, Неневестная, и мы, вернии, с верою глаголем: Родительнице Слова, не престай молитися Богу о уповающих на тя.
— По «Величит» (песни 9-й): — «Достойно есть» — не поется.
«Светилен»: Свет безплотный просвети тя, о блаженне Зеноне, и возсия тя от Месопотамии, и распростре сияние на землю сию, грехом омраченную, и всякий мрак тьмы отгна, и, тобою просвещени, познахом Бога безначальнаго, в Трех Лицех покланяемаго, и тебе ходатая творим пред Ним. (Дважды)
Слава Отцу и Сыну и Святому Духу.
Христос даде тебе благодать и чудеса творити и тако почте тя в веце сем, по смерти же твоей паче прославился еси пред Ним и, благою любовию соединен со учителем твоим и духовною братиею, предстоиши пред Богом: ныне испроси всему миру мирное сохранение, и народу нашему победу на враги и угнетатели даруй, и поющим тя велию милость.
И ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор преподобных, с нимиже восхваляем тя, Дево.
— «Всякое дыхание» — поется.
— На «Хвалитех» стихиры — на 8.
Подвиг твой, яко сокровище златое, светло облече Церковь Божию, и, яко венец царский, светло украшенный многоценными камении, возложи его на главу свою, да светит всем, иже с радостию входят в ню. Сего ради вопием ти, преподобне: моли Христа Бога, да отженет всякое кичение и гордыню от омраченнаго ума моего, и народ наш, именем Христовым нарицаемый, да избавит от сетей бесовских и от прелести и соблазна антихристова.
Сиянием благодати твоея просвети славящия тя, богоносне отче Зеноне, ибо, подобно светилом великим, испущающим светлыя лучи, озаряеши вся празднующия память твою и Божественную благодать изливаеши на души верных, иже с верою и любовию хвалим праздник твой светлый и хвалы достойный.
В день сей духовнаго торжества верных, в праздник преподобнаго отца Зенона, тому возопиим: радуйся, небесный человече и земный ангеле; радуйся, многих на путь спасения наставивый; радуйся, праведных славо и народа нашего утверждение; ходатай буди нам пред Богом, да сохранит нас, православныя люди, от сетей сатаны и от нашествия иноплеменник и дарует нам мир и милость.
Приидите, о людие грузинстии, и похвалами духовными воспоим святаго и доблестнаго воина Христова Зенона, подвижника Икалтойскаго, иже зело потщався о народе нашем духовне пред Богом, во избавление от напастей и во избавление от всякия страсти; ныне же помолимся святыни его, да насадит в нас страх и отвращение от греха и любовь к Богу и ближнему.
Аще и гроб покры тя, отче Зеноне, возсиянием чудес блистаеши от святыя оныя обители по всей земли и духовная благоухания изливаеши на души и умы наша; сего ради спешим во Икалто, в жилище мощей твоих, да почерпнем исцеление душам и телесем нашим.
Стих: Честна пред Господем смерть преподобных Его.
Аще и безчисленная чудеса твоя изумляют нас, богоносне Зеноне дивный, но паче дивимся подвигу твоему и любви к Богу и ближнему, еюже страну сию Кахетинскую просветил еси чудесы, и присно помогаеши тепле к тебе прибегающим: непрестанно моли ныне Христа Бога о нас, почитающих всеблаженную память твою, во избавление от всех скорбей и напастей.
Стих: Блажен муж, бояйся Господа, в заповедех Его восхощет зело.
И ныне призри на ны свыше, богоносне, и утиши возстания невидимых и видимых страстей, отжени напасти и бесовская нападения от стад сих твоих и поющих тя, предстоящих пред гробом мощей твоих, и принеси моление наше с Материю Божиею пред Христа, соспешествующим небесным воинствам, Предтечи и Иоанну Богослову.
Слава Отцу и Сыну и Святому Духу.
Вострубим трубою песней, и возыграем, и возвеселимся, радующеся во всесвятый праздник всехвальнаго Зенона Икалтойскаго. Соберитеся, о вернии грузины, и духовными похвалами украсим и восхвалим блаженнаго отца нашего, яко реки учения нам источившаго, и воспоим: немощнии — недугов врачу, скорбящии — избавителю, согрешившии — теплому ходатаю, печальнии — утешителю, путешествующии — спутнику, плавающии — кормчему, и вси всюду, всех надежду с верою величающе, глаголем: ходатай буди нам, богоносне, да молитвами твоими и прошением вооружит нас Господь Бог силою Своею непобедимою на вся видимыя и невидимыя враги наша и спасет нас. (Глас 5).
— «И ныне и присно и во веки веков. Аминь» — «Богородице Дево, ты еси лоза истинная, прозябшая грозд жизни; тебе молим, Благодатная: со апостолы ходатайствуй о спасении душ наших.»
— «Славословие великое» — поется.
— Тропарь преподобнаго: «Радуется во праздник твой народ грузинский…» (Глас 4).
— «Слава», «И ныне» — Богородичен воскресный отпустительный (по гласу тропаря):
Еже от века утаенное и ангелом несведомое таинство, Богородице, тобою сущим на земли явися: Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
— Тропарь преподобнаго.
— Кондак преподобнаго.
— «Изобразительныя антифоны» — при пении «Блаженн» вставляются
«Во Царствии Твоем» — на 8:
— от 3-й песни преподобнаго — 4 тропаря (с ирмосом).
— от 6-й песни преподобнаго — 4 тропаря, со своими «Слава» и «И ныне».
Апостол — преподобному: Гал., зач. 213; 5, 22 — 6, 2.
Евангелие — Мф., зач. 43; 11, 27–30.
На входе:
Тропарь преподобнаго.
Кондаки — «Слава» — преподобнаго
И ныне — «Упование и прибежище…»
«Прокимен»: «Честна пред Господем смерть преподобных Его». (Глас 7).
Стих: Что воздам Господеви о всех, яже воздаде ми?
«Аллилуиа»: «Блажен муж, бояйся Господа, в заповедех Его восхощет зело». (Глас 6).
Стих: «Сильно на земли будет семя его, род правых благословится».
Причастен: В память вечную будет праведник, от слуха зла не убоится.
Последование составила Тинатин Мчедлишвили.
