Праздничное последование преподобному отцу нашему Серапиону Зарзмскому
— «Приидите, поклонимся» — поется.
— «Благослови, душе моя, Господа» (псалом 103) — поется.
— «Блажен муж» — 1-й антифон 1-й кафизмы.
— «Господи, воззвах» (поется на 5-й глас).
— Преподобному Серапиону Зарзмскому — стихиры на 8.
— Богоносне отче, блаженне Серапионе, любителю Божий и исполнителю Божественных заповедей Его, паче подобает нам слышати дивная сия дела твоя и славити Бога, даровавшаго нам таковаго отца и учителя, и вопити: радуйся, яко имя твое написано есть на небесех. Христа моли ныне ниспослати Церквам единство, мир и велию милость.
— Богоносне отче, блаженне Серапионе, ангелом собеседниче и сожителю и причастниче пророков, святых апостолов и мучеников, и сонаследниче Света непреходящаго, иже сияеши сиянием Божественным, яко пред Ним стоиши, благодатию просвещен, дерзновенно, и зриши присно славу Его, и наслаждаешися непрестанно благостию Его: Христа моли ныне ниспослати Церквам единство, мир и велию милость.
— Богоносне отче, блаженне Серапионе, звездо пустыни, сияние Божественныя любве и просветителю иноков, столпе непоколебимый терпения, утверждение и древо Церкве, светильниче всесветлый и светило всего мира, сокровище добродетелей, иже град сотворил еси пустыню праздную и яко рай сию показал еси: Христа моли ныне ниспослати Церквам единство, мир и велию милость.
— Богоносне отче, блаженне Серапионе, похвало иноков и утверждение правыя веры, Святыя Троицы избранный служителю, ангелом подобниче, от земли на небо вознесенный наставничеством иноков, Царствия наследниче, ангельским пением небесный гражданине, со святыми венценосием во свете Божия видения просвещенный и святою молитвою твоею всех почитающих тя ходатаю: Христа моли ныне ниспослати Церквам единство, мир и велию милость.
— Богоносне отче, блаженне Серапионе, со ангелы соединенный храме таинств, бездно разума, зрителю неизреченных, отче отцев, главо иноков и наставниче отшельников, иже пред Пресвятою Троицею радуешися, многим сиянием просвещен, и помощник еси молящих тя: Христа моли ныне ниспослати Церквам единство, мир и велию милость.
— Ина стихира, глас 2: «О, венцы…».
— Кими похвальными венцы увенчаем Церкве Христовы утверждение и всех просвещающаго учением, владык нелицемерно обличителя и всех заступника и помощника, всех скорбящих утешителя и всех в напастех сущих прибежище, благочестия столпа, верных поборника, всехвальнаго Серапиона, имже Христос востания врагов низложи, имущаго велию милость. (Дважды)
— Кими похвальными песньми воспоем подобнаго Боголучезарней звезде, в пустыни вселением просиявшаго, и сад райский, плод благий приносящий, великаго помощника и учителя, всех лукавых и ленивых обличителя, егоже ради Христос востания их низложи, имущаго велию милость.
— Кими похвальными пении воспоем пастыря и учителя иверов, обители Зарзмския основателя и церквей создателя и украсителя, иже яко солнце явися народу твоему и научаше любви к Богу и отечеству, на негоже возлагаем упование наше, да единством веры и любовию исповедуем его яко наставника и утверждение народа нашего, имущаго велию милость.
Слава Отцу и Сыну и Святому Духу.
— Ныне возвеселитеся, празднолюбцы, и хвалебными песньми воспоим и восхвалим священников похвалу и Зарзмы славу, источник чудес и верных великаго ходатая и заступника: Радуйся, Самцхе хранителю неусыпный и пустынь праздных градотворче; радуйся, светильниче всесветлый, иже концы мира чудесы просветил еси; радуйся, скорбящих Божественная радосте и в напастех сущих теплый заступниче, преподобне и чудотворче отче Серапионе, моли непрестанно Христа Бога о нас, с верою и любовию почитающих присно радостную и всеблаженную память твою. (Глас 6).
И ныне и присно и во веки веков. Аминь.
— Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим. (Глас 6).
— Вход с кадилом.
— Прокимен дне
— Паремии — три чтения преподобному.
1. Премудрости Соломони чтение. (Праведных души в руце Божией…)
2. Премудрости Соломони чтение. (Праведницы во веки живут, и в Господе…) Писано под 9 марта.
3. Премудрости Соломони чтение (Праведник, аще постигнет скончатися, в покои будет…). Писано под 7 мая.
— На литии стихира храма — 1.
— Таже преподобнаго самогласен. Глас 2.
— Прозябл еси в земли Кларджетской от родителей преподобных и честно живущих, иже от труда своего богато питаху нищих и по силе подаваху немощным руку помощи и в кротости и смирении пребываху, по пророческому словеси: «На кого воззрю, токмо на кроткаго и смиреннаго»; иже таковый изнесоша плод, якоже Господь глаголаше: «Не может древо добро плодов злых творити».
— Родившим вас трием сыном родителем и возрадовавшимся о чадородии, якоже Псалмопевец пишет: «Матерь о чадех веселящуюся», родившая вас на свет ко свету непреходящему преставися; воспитавшу же вас отцу вашему Киприану, скончася и той, и вы остасте трие отроцы, подобно отроком вавилонским, и во пламени нищеты ввержени, уповасте на единаго Бога.
— Взял еси крест, имже хвалился еси, треблаженне, и, оставив мир наставлением Святаго Духа, имел еси с собою брата юнаго возрастом, и предасте себе великому Михаилу Парехскому, яко отцу душ и питателю сирот; блаженный же он имяше и иных многих учеников, и воспита вас, и возведе в совершенство добродетели.
— Сопричтен быв с братом к лику учеников, яко образ благий зрясте учителя и, благодати от него приемлюще, созидасте на основании учений его не сено и трость, но злато, сребро и камения многоценная; и возлюблени бысте от него, яко добре приемлющии учения его, и, многое время пред ним пребывше, по силе подвигостеся к подражанию великому оному учителю и пастырю вашему.
— Егда же приспе время, святе отче наш, яко достойный, повелением Михаиловым совершен был еси честию священства и достоинством служитель Божественнаго жертвенника; священною одеждою украшенный богоприлично, подвизался еси во славу Божию; Того моли ныне, да избавит нас от всякия скорби и зла.
— Егда великий оный отец и учитель Михаил стояше на нощней молитве, ужас нападе на него, и восхищен бысть на небо, и глаголаше ему священнолепно облеченный в видении, да наученныя им ученики, иже суть Серапион и брат его Иоанн, абие пошлет в землю Самцхийскую, и показа знамения некая, на коем месте, егда приидут, обрящут чудо и тамо начнут созидати обитель.
— Тогда вместо словес множество слез излиял еси и рекл еси: «Аще угодно есть пред тобою, отче, помолися о мне Богу, да не разлучит мене от святаго собора твоего и от присно зрения святаго лица твоего». Он же отвеща и рече: «Да не лишишися Божественнаго венца послушных, отселе прекрати словопрения и уготови себе в путь шествовати, и спутника себе сотвори брата твоего Иоанна и двоих от братии».
— Благословением Михаила Парехскаго со сподвижники шел еси во страны Самцхийския и несосте с собою живоносную икону Преображения в помощь и упование всем христианом; путь же ваш, яко в царских палатах, без печали шествовасте, дондеже достигосте места оного и видесте, яко пустыня бе, лесы и дебрьми обдержимая; и, обретше знамения и чудеса, возвещенная великим оным учителем, возрадовастеся, яко не тщетен и не суетен бысть путь трудного шествия вашего.
— Слава Отцу и Сыну и Святому Духу. Глас 7.
— Тогда посреде источника и холма уготовасте место и создасте тамо малую кущу, яже бысть вам приятелище странничества вашего, да живоносная икона тамо от вас покланяется; помощию же великаго князя Самцхийскаго Георгия Чорчанели создав в пустыни церковь Зарзмскую во спасение душ и во пристанище многим, воздвигосте в ней икону оную на поклонение и во отгнание недугов и немощей и во избавление душ многих.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
— На стиховне стихира. (Глас 8).
— Словом и делом прославил еси Бога славнаго и в заповедех Его поучался еси присно, день и нощь, умом чистым, и яко столп светлый, светлая молитва твоя восхождаше на небо, блаженне отче Серапионе; испроси нам у Христа велию милость.
Стих: Честна пред Господем смерть преподобных Его.
— Умертвил еси похоть и оживотворил еси чистоту, и возлюбил еси святое девство, и яко свет облеклся еси в чистоту, и яко горлица кротостию работал еси Христу умом непорочным, блаженне Серапионе, украшенный Божественным разумом.
Стих: Блажен муж, бояйся Господа, в заповедех Его восхощет зело.
— Украси тя Бог светом чудес и сиянием благодатей Божественных, треблаженне Серапионе, и исполни душу твою премудрости, и, яко источник живый и око неоскудное, источаеши учения Божественная на возращение стада Христова.
Слава Отцу и Сыну и Святому Духу.
— Множество иноков наставника тя исповедует, богоносне отче, яко исполняются Божественных благодатей, яже оставил еси, и наслаждаются памятию твоею, сподвижниче святых отец; с нимиже моли Христа Бога, да помилует души наша молитвами твоими.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
— «Ныне отпущаеши».
— По «Отче наш»:
— Тропарь преподобнаго: «Пустыни гражданин, и во плоти ангел, и чудотворец явился еси, богоносне отче, святе Серапионе; постом, бдением и молитвою благодать с небесе стяжал еси и исцеляеши недужных недуги и души, с верою к тебе прибегающих. Слава Давшему тебе крепость, слава Венчавшему тя, слава Действующему тобою всем чудеса». (Глас 1).
— «Богородице Дево» — единожды.
— Благословение хлебов.
— «Бог Господь» (поется на 1-й глас).
— Тропарь преподобнаго: «Пустыни гражданин, и во плоти ангел…» — дважды (глас 1).
— «Слава», «И ныне» — Богородичен воскресный отпустительный (по гласу тропаря): «Гавриилу вещавшу тебе, Дево, радуйся, со гласом воплощашеся всех Владыка в тебе, святем кивоте, якоже рече праведный Давид; явилася еси ширшая небес, поносивши Зиждителя твоего. Слава Вселившемуся в тя, слава Происшедшему из тебе, слава Свободившему нас рождеством твоим».
По 1-м стихословии седален, глас 1:
«Ангельския силы…»
Житие благочестно на земли совершил еси и явился еси правило иноков и светило пресветлое всего мира, богоносне отче Серапионе, и просвещаеши скоро к тебе прибегающих; ныне возсияй в сердцах наших свет истинный и ходатай буди непрестанно хвалящим тя. (Дважды)
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
— По 2-м стихословии седален. (Глас 4).
«Явился еси днесь…»
Светом неприступным сияеши, и яко звезда возсиял еси в пустыни Кларджетстей, и умножил еси стадо Христово, преподобне отче; память же твою совершающим избавление испроси прегрешений, яко предстоя Богу. (Дважды)
Слава Отцу и Сыну и Святому Духу, и ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
— «Полиелей», 19-я кафизма (псалмы 134 и 135).
— «Величание» преподобному (с избранными стихами из Псалтири).
— «Седален» по величании: глас 8. Премудрость.
— От юности освятился еси, приснопамятне преподобне Серапионе, яко воистину просвещенный, и на земли, яко ангел, жительствовал еси, яко плоть умертвил еси подвигом и Божественною ревностию твоею Святей Троице благоугоден явился еси; сего ради лику иноков сопричтеся и от временных сластей на высоту возвел еси люди верныя, богоносне; моли Христа Бога прегрешений оставление даровати любовию почитающим память твою. (Дважды)
Слава Отцу и Сыну и Святому Духу, и ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
— 1-й антифон 4-го гласа (воскресной утрени).
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
— Прокимен (утренняго Евангелия): «Честна пред Господем смерть преподобных Его». (Глас 7).
Стих: Что воздам Господеви о всех, яже воздаде ми?
— Утреннее Евангелие: Лк., зач. 24; 6, 17–23.
— «Слава» — «Молитвами святаго отца нашего Гавриила…»
— «И ныне» — «Молитвами Богородицы, Милостиве…»
— «Помилуй мя, Боже…» (малый стих).
— По 50-м псалме стихира — самогласен. Глас 6.
— Во всю землю изыде вещание исправлений твоих, на земли ангеле и на небесех человече Божий, мира добре украсителю и сладостию благий, богомудре отче Серапионе; сего ради на небесех обрел еси мзду трудов твоих, и бесов полки погубил еси, и ангельскаго чина достигл еси, ихже житию непорочно поревновал еси, святе Серапионе; дерзновение имея к Богу, мира проси душам нашим.
— «Спаси, Боже, люди Твоя…»
Чтутся два канона.
1-й канон — Богородицы (ирмос дважды) — на 6 (см. в конце Параклитика каноны Богородицы: «Колесницегонителя фараона…» или «Воду прошед…»).
2-й канон — преподобнаго (без ирмоса) — на 8. (Глас 1).
— Катавасия: рядовая.
— Малая ектения — «Поим Господеви».
Ирмос: Чудесем спасе люди Господь, и море волнующееся словом изсуши древле, и днесь нетленно родися от Девы и возведе нас на небо, естеством равный Отцу, Емуже воспоим.
Образ Божественный от юности сохранил еси любовию нас ради Младенцем бывшаго, уязвився сердцем, богоносне Серапионе, и с возрастом возвышался еси от силы в силу совершенством духа.
Ветвь плодовита был еси, богомудре Серапионе, прозябшая от корений боголюбцев, насаждена при исходищих Божественных Писаний, и принесл еси плод сладкий — разумение их.
Движение страстей от юности попрал еси под нозе души, блаженне Серапионе, и сладость чувств льстивая отнюдь не усладила тебе чаянием непреходящих оных сладких наслаждений, святе.
Поучался еси от юности в книгах богодухновенных и возшел еси на верх совершенства, егда ум очистил еси от страстей и чистотою души твоея был еси жилище Духу Всесвятому.
Слава Отцу и Сыну и Святому Духу.
Начало премудрости стяжал еси, преподобне, и страхом Господним пригвоздил еси плоть твою, святе, и оттуду возшел еси в любовь оную безстрашную святых и просиял еси благодатию Божиею.
И ныне и присно и во веки веков. Аминь.
Душу мою, падшую от многих болезней, о Богородице всеславная, исцели, да благодарственным гласом усердно величаю тя присно.
Ирмос: Боже, призри на пение раб Твоих и смири дерзость прелестника, и превознеси днесь Церковь, и утверди непоколебимо в православии уповающия на Тя.
Был еси ученик великаго оного и преславнаго Михаила Парехскаго и Божественным повелением от него в пустыню послан был еси, да созиждеши ограду словесных овец.
Егда услыша о пришествии вашем князь, обладающий всеми теми странами и местами, возрадовася и изыде видети вас; вы же абие изыдосте во сретение князю оному, и, сошед с коня, припаде к живоносной иконе и от вас благословися.
Первее поклонися живоносной иконе, и потом святым лицем вашим; ты же, блаженне Серапионе, исполнился еси Духа Свята и, подобно реце, источал еси медоточивым языком учения Божественная.
Яко река Едемская, источахуся златоструйнии потоки из уст твоих, ихже ради удивися князь оный и вси предстоящии, иже припадоша к ногама твоима и глаголаху ти: «Яко единаго от апостолов, Христос посла вас мне помощниками, ибо дела сия, яже глаголете, не совершатся без мене.
Слава Отцу и Сыну и Святому Духу.
Невозможно зряшеся князю в местех оных праздных и неделанных создати обитель, моляше вас переменити место»; ты же, подобно апостолу, глаголал еси: «Аще бы и ангел благовестил нам паче, еже благовестихом, не веруем.
И ныне и присно и во веки веков. Аминь.
Провиде тя дверь света Иезекииль, еюже пройде Царь, якоже весть, Дево Нетленная; сего ради молю тя: отверзи ми двери покаяния, вводящия в Царствие.
— По «Утверждение» (песни 3-й):
Седален: Просветил еси дни твоя, блаженне, в пустыни крепким подвигом, имже приближился еси к сиянию Божественному, отче Серапионе; и оставление безчисленных грехов наших испроси от Христа празднующим память твою.
Ирмос: Прежде возвести пророчески спасение человеков Аввакум и глаголаше: во гневе помянул еси милость; от гор приосененных пришел еси, Спасе, Слово, Создатель людей сих.
Невозможно есть, да противимся Божественному повелению и место сие на ино пременим, яко знамения и извещения на месте сем свидетельствуют»; тако глаголал еси князю, он же призва слугу и рече: «Понеже месту сему усердствуют, иди со святыми сими, и заутра от разсвета даже до вечера, елико обойдут, дах им.
Князь оный боголюбивый глаголаше вам: «Дерзайте, яко помощник вам есмь и попечитель всею силою»; и возвещаше всем, яко свободно и по воли созидаете обитель во владении Чорчанелов.
Тогда зело возрадовастеся и благодарение воздасте князю оному; он же нощь ону на камени оном пребысть и видение ангела виде, иже укрепляше его и усердно трудитися повелеваше.
Слава Отцу и Сыну и Святому Духу.
Тогда сотворил еси два креста, святе, и на камени оном водрузил еси во имя святых архангелов, идеже и малый евктирий создася, и знамения и исцеления недужных бываху благодатию Божиею святых оных архангелов.
И ныне и присно и во веки веков. Аминь.
Дева родила еси и матерски не истлела еси, но Мати была еси и Девою пребыла еси; сего ради воспеваем ти: радуйся, Богородице.
Ирмос: Соблазнов темных нощи во оставление пришел еси, Христе; утреннююще приносим Тебе песнь, якоже достоин еси, да наставиши нас на путь мирен, внити в Царствие, еже обещал еси нам.
Езеро оно, вина смятений и убийств, изсше молитвою твоею, и слышавшии удивишася, ужас нападе на ня, и славляху Бога; боголюбивый же князь оный страха и радости исполнися и поиде видети чудеса и знамения оныя, и вси подвластнии его с ним и окрестная места тех стран.
Слышавшии же великое сие чудо абие собрашася во множестве на место оно, идеже бесте святии; ты же, святе, чужд был еси тщеславия и глаголал еси: «Не мните, князи и людие, яко нашею некоею силою сотворишася чудеса сия, но яко прослави образ лица Своего Христос Бог, да уверуете, яко не ложна и суетна суть дела сия, яже видите».
С молитвою и литиею взыдосте на холм, повелением же князя уравниша место оно; и инии князи окрестных мест, пришедше, каждо хваляху вам иная места обителей и умиленно припадаху и зваху вас, да тамо созиждете.
С молитвою и пением препроводисте нощь ону, и заутра целоваша святых оных и с радостию отъидоша в домы своя. Место же оно наречеся Зарзма от людей оных, иже объяти бяху ужасом и страхом неизреченным.
Слава Отцу и Сыну и Святому Духу.
Начавшим вам искати места на создание церкве, восхотел еси, да на холме оном высочайшем созиждеши, но бысть прение между братиями, и исполнисте две кандилы равным елеем и постависте на местех прения: кандило Иоанново постави сам Иоанн в малом оном дольце, на холме же поставил еси ты, святе Серапионе; и оба, на молитве стояще, моляхуся Богу.
И ныне и присно и во веки веков. Аминь.
Освяти Бог чрево твое всесвятое, Невесто, егда святостию вселися в не, и на Кресте вознесенный создания с Собою вознесе.
Ирмос: Сниде Иона во глубину морскую и вопияше к Богу молебно: возведи мя от потопления, Господи; аз же, Христе, к Тебе вопию: презри множество прегрешений моих.
Заутра видесте кандило твое угасшее, кандило же Иоанново светяше даже до полудне; сие бо бысть Божие смотрение, да не вскоре, но зело благолепно во время свое созиждется храм на высоцем оном месте.
Сие видевше, всем утвердисте, да тамо начнут созидати церковь; ты же рекл еси брату твоему медоточивым оным языком: «Брате Иоанне, Бог показа тебе чудо сие преславное, яко виде скудость разума твоего; но сие веждь, яко вскоре на месте сем созиждется храм прекрасный».
Уготовавшим вам место оно, прилагашеся число братии, яко привлекаше слава твоя, человече Божий Спиридоне, и, яко от реки, напаяхуся от сладких словес твоих.
Яко новому Моисею повелено бысть тебе вождение новаго Израиля, и, начавше созидати церковь, положисте основание на месте, Иоанном избранном; и помощию князя совершися церковь по трех летех и украсися всяким чином, еже подобаше тогда, и поставиша в ней животворящую икону Преображения, и келлии создаша братии.
Слава Отцу и Сыну и Святому Духу.
Страстей тайных и явных нападения крепкий поборниче, Серапионе блаженне, дерзновение имея к Богу, испроси помощь, да избежим врага душ наших.
И ныне и присно и во веки веков. Аминь.
Новаго Отрока родила еси нам, Преждевечнаго, безлетно со Отцем соседящаго, Богородице, Иже Крестом обетшавшия грехом человеки обнови и Божества причастники сотвори.
— По «Возопих» (песни 6-й):
Кондак: Святостию духа Божественно вооружився, непрестанную молитву, яко копие, в руку прием, дерзновенно прободл еси полк бесовский, чудотворче отче Серапионе; моли Бога непрестанно о всех нас.
Икос: Богоносне отче, святе Серапионе, явился еси начальник иноков и пустынь праздных градотворец, и исцеляеши страсти немощи нашея, с верою поющих тя: Радуйся, востока звездо всесветлая и иноков просветителю, светильниче и пастырю; радуйся, благодеянием постников похвало и всего мира радостное сияние; моли о поющих тя.
Ирмос: Любовию всех Спаса ни во чтоже вмениша отроцы ярость мучителя богоненавистнаго и, во огнь ввержени, не опалишася и тако вопияху: отец наших Боже, благословен еси.
Собрася собор мног братии, яко благодать Духа и слава твоя привлекаше всех, глаголет бо Господь: «Идеже бо еста два или трие собрани во имя Мое, ту есмь посреде их». Колико паче со многими, собранными на служение Богу?
Даде вам вся потребная благочестивый Георгий: мски и стражи, и елико требоваше множеству братии, и селы; ты же устроил еси чины и правила церковная, имиже напаяхуся Божественною благодатию.
Мнозем начавшим подражати тебе, якоже древле скинии Моисеовой драгия камени и бисер и иная вещества на создание скинии, тако и по силе показаху приношение новой сей скинии, яже есть Церковь Христова.
Вси исполняющеся Божественныя благодати, бесов полки посекосте, богоносии, яко доблии воини Спасовы, мечем трудов, и пожгосте, яко огнем, станы их пещию молитв ваших: отцев наших Боже, благословен еси.
Слава Отцу и Сыну и Святому Духу.
Празднуют людие твои, блаженне, память твою и вопиют к тебе: призри на ны, о отче блаженне, с небесе и избави нас от волн мирских непотопляемы, иже научил еси нас пети: отцев наших Боже, благословен еси.
И ныне и присно и во веки веков. Аминь.
Благодатию молитвы твоея, святе, хвалимся усты и душею, славне, яко тобою от напастей и волн, и тяжких печалей, и страстей греховных избавляемся вси.
Ирмос: Отроцы в Вавилоне неопалимии прежде образ тебе быша, Дево преславная, егда от тебе родися огнь Божества и сохрани тя неврежденну, непорочну; вси людие присно благословят тя.
Возсия тя Христос, яко молниезарное светило святыя Церкве, да, яко звезда, сияеши пред лицем всего мира и к подражанию Божественнаго жительства устрояеши сердце верных.
Видяще Божественное оное жительство твое, и реки богатейших учений, и знамения и чудеса велия, тобою совершенная, по смерти твоей описаша ученицы твои.
Посла к тебе Михаил, учитель твой, двух учеников и написа тебе послание, блаженне Серапионе, и брату твоему Иоанну скоро приити к нему, ибо ведяше время исхода своего, да увидите друг друга и да подробно уведает, како бысть созидание места оного, свыше возвещеннаго.
Яко послушлив быв повелению учителя, скоро пришел еси с братом твоим, и, узревше друг друга великий Михаил и Серапион, возрадовастеся, якоже подобаше, веселием и слезами купно благодаряху Бога и прияша благословение вси братия друг от друга
Благословим Отца и Сына и Святаго Духа, Господа.
Вопрошающу великому Михаилу о спешении дела, начал еси от начала и вся поведал еси о чудесех оных великих, и како помощник вам бысть Георгий Чорчанели, и вся приключшаяся вам; слышав же сие святый он, благословляше князя онаго и славляше Бога.
И ныне и присно и во веки веков. Аминь.
Избавила еси человеческое естество от клятвы рождеством твоим, Дево Нетленная, яко родила еси единаго Благословеннаго, Благословляющаго нас, исполняющаго благодатию небо и землю.
Хвалим, благословим, покланяемся Господеви, поюще и превозносяще Его во вся веки.
— По «Благословим» (песни 8-й): — «Честнейшую».
Ирмос: Подобает молчание, понеже не можем достойно восхвалити тя днесь, Богородице; обаче не умолчим страха ради, но по немощи нашей принесем хваление, имже величаем тя.
Божиим смотрением бяше в стене церковней ветвь финиковая многолетняя, и взя ю рукою своею отец Михаил и, дав тебе, святе, рече: «Чадо, насади сию близ церкве, и, аще прозябнет, иди и созидай усердно».
Насадившу тебе в землю, вскоре прозябе и, ветви распростерши, проповедаше преславное оное чудо; и егда видеша вси, удивишася и славляху Бога; и егда слышано бысть чудо сие окрест пустынь оных, вси ужасошася и воздаша славу Богу, чудеса творящему святыми Своими.
От небесных сил слышал еси глас блаженный, служителю Бога Вышняго, яко земнаго ангела и небеснаго человека призываше тя Царь небесный Христос, и отшел еси с радостию и с Господем радуешися во веки.
Честных благовоний благоухание исполни келлию твою, преподобне отче, и с веселием ангельский собор прият душу твою непорочную, с нимиже наслаждаешися, богоносне.
Не может язык человеческий исповедати подвиги твоя, святе, угодниче Божий, яко прешел еси мир сей достойно, славне, и ныне, наслаждению райскому соединився, со ангелы радуешися и царствуеши со Христом во веки.
Повелев брату твоему на ином месте созидати обитель, показа место оно, и вся грядущая предрече вам, и отпусти вас, слез паче исполненных, яко не надеястеся паки видети его.
Слава Отцу и Сыну и Святому Духу.
Пришедшим вам в великую пустыню Кларджетскую, в Опизу, сретоша вас отцы и с радостию благодаряху Бога; Того моли ныне, преподобне, всему миру мирное сохранение, и народу нашему — победу и утверждение православия от Христа Бога, и душам нашим обильно велию милость.
И ныне и присно и во веки веков. Аминь.
Носиши убо Носящаго всех святыма рукама твоима; Егоже моли, святая, от чуждаго злодейства невредимо жити нам.
— По «Величит» (песни 9-й): — «Достойно есть» — не поется.
«Светилен» Явился еси яко образ светлый и приял еси Духа Святаго, преподобне отче, имже очи душевныя Божественным видением просветил еси, и, просвещен, провидя грядущая, вся до конца глаголал еси с чистотою Божественною; ныне же ходатай буди нам пред Богом, святе Серапионе. (Дважды)
Слава Отцу и Сыну и Святому Духу, и ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор преподобных, с нимиже восхваляем тя, Дево.
— «Всякое дыхание» — поется.
— На «Хвалитех» стихиры — на 6. Глас 8. «О преславнаго чудесе…»
— Богоносне отче, святе Серапионе, се, изволением Божиим возсиял еси, яко новое светило, и наставник, и учитель, якоже в ветхом Илия и Иоанн, и по них Павел Фивейский и великий Антоний, Макарий, Евфимий, Савва и Герасим, и вси подобнии и подражателие их, иже тщанием прошедше узкий и прискорбный путь, вводящий во град небесный, егоже художник и Создатель Бог есть; Того моли ныне помиловати души наша.
— Богоносне отче, святе Серапионе, яко смирен и непревозносим был еси, святый, сладостно и с орудием в руце видим бываше стоящ с церковными зодчими, ибо был еси, со прочими добродетельми, сведущ в законах церковнаго созидания и зело украшен искусством зодчества. Узре же тя некий, гордостию и дерзостию одержимый, и глаголаше: «Се, великий и славный Серапион яко безсловесен и безгласен зрится и всячески таковых почестей недостоин есть». Сия глаголющу ему, исполненному зависти бесовския, — о дивных чудес Твоих, Христе! — пред всеми падеся человек оный безгласен лежа, и испусти язык опухший, и страшно трепетал и валяшеся; но покаяся окаянный, и ты, сладкий отче, моля Бога, абие утолил еси велию оную лютость языка его; и видевшии удивишася и славляху Бога. Того моли ныне помиловати души наша.
— Богоносне отче, святе Серапионе, утучнився старостию доброю и в Божественном разуме яко младенец и незлобив быв, призвал еси собор братии и многа поведал еси, святе, златоструйными усты твоими учеником твоим и паки рекл еси: «Се, братие, аз отхожду по малых днех, вы же взыщите отца и игумена, иже возможет пасти вас, яко чада и братию».
— Богоносне отче, святе Серапионе, поручил еси стадо твое Георгию, мужу добрыми добродетельми светлому и сладкому словом и делом, и, устроив вся, елика требоваху служителие церковнии, и учредив собор оный Божественными и зело благолепными уставы, причастился еси Тела и Крове Христовы и предал еси дух твой в руце Божии, егоже присно желал еси. Того моли ныне помиловати души наша.
— Богоносне отче, святе Серапионе, с верою собравшиися грузины почитаем тя, яко великаго подвижника, и с верою вопием ти: о святому Антонию уподобивыйся пустынниче, иже с радостию изшел еси в пустыню непроходимую и вместо зверей вселил еси человеки, ангелом равныя, ходатай буди пред Богом, да спасет нас.
— Богоносне отче, святе Серапионе, явился еси правило иноков и похвала православных, услаждающее и светлое светило всего мира, и немощным искуснейший и честный врач, яко не убоялся еси страха прелестнаго врага, и луки и стрелы бесовския сокрушил еси, и лютыя сети их изнемощил еси Божественным учением твоим. О дарований твоих данных, блаженне, имиже злых бесов посрамил еси и прославил еси славу Христову!
— «Слава Отцу и Сыну и Святому Духу». Вострубим трубою песней, и возыграем, и возвеселимся, радующеся во всесвятый праздник всехвальнаго учителя нашего. Соберитеся, о вернии грузины, и духовными похвалами украсим и восхвалим блаженнаго отца нашего, яко реки учения нам источившаго, и воспоим: немощнии — недугов врачу, скорбящии — избавителю, согрешившии — теплому ходатаю, печальнии — утешителю, путешествующии — спутнику, плавающии — кормчему, и вси всюду, всех надежду с верою величающе, глаголем: ходатай буди нам, богоносне Серапионе, да молитвами твоими и прошением вооружит нас Господь Бог силою Своею непобедимою на вся видимыя и невидимыя враги наша и спасет нас. Глас 5
«И ныне и присно и во веки веков. Аминь». Богородичен Димитрия, царя грузинскаго, Багратиона.
Богородица и всечестная, Мати Дева, лилия прекрасная, ей благовествова ангел крылатый; тобою веселится Царь венценосный, и Тому служат царие многоподданнии.
— «Славословие великое» — поется.
— Тропарь преподобнаго: «Пустынный житель и в телеси ангел…» (глас 1).
— «Слава», «И ныне» — Богородичен воскресный отпустительный (по гласу тропаря): «Гавриилу вещавшу Тебе, Дево, радуйся, со гласом…».
— Тропарь преподобнаго.
— Кондак преподобнаго.
— «Изобразительныя антифоны» — при пении «Блаженн» вставляются
«Во Царствии Твоем» — на 8:
— от 3-й песни преподобнаго — 4 тропаря (с ирмосом).
— от 6-й песни преподобнаго — 4 тропаря, со своими «Слава» и «И ныне».
Апостол — преподобному: Гал., зач. 213; 5, 22 — 6, 2.
Евангелие — Мф., зач. 43; 11, 27–30.
На входе:
Тропарь преподобнаго.
Кондаки — «Слава» — преподобнаго
И ныне — «Упование и прибежище…»
«Прокимен»: «Честна пред Господем смерть преподобных Его». (Глас 7).
Стих: Что воздам Господеви о всех, яже воздаде ми?
«Аллилуиа»: «Блажен муж, бояйся Господа, в заповедех Его восхощет зело». (Глас 6).
Стих: «Сильно на земли будет семя его, род правых благословится».
Причастен: В память вечную будет праведник, от слуха зла не убоится.
Составила Тинатин Мчедлишвили
