Праздничное последование святым ста тысячам мучеников, в Тбилиси от хорезмийцев умученным
Поем «Блажен муж», 1-й антифон.
На «Господи, воззвах» стихиры
на 8, глас 5.
Святым мучеником.
О многославнии мученицы, егда по повелению сотвориша вся мучители и приведоша отцы с женами и нуждаху тако творити, вы же, множайшии Христа ради ятии, дивное мужество показасте и поругания святых икон и оставления закона не подъясте, но дерзновенно и мужественно исповедасте Христа Бога и вместо свободы и чести венец мученичества приясте.
О блаженное ваше разумное пребывание! Яко прещением и ласканием мучителей не отвергостеся Христа, Творца нашего и Господа, но друг друга укрепляху, глаголюще: «Претерпим единою страшную смерть и восприимем со Спасом нашим Иисусом Христом безсмертие безконечное», имже и хвалимся мы, собор сей Богособранный, и память вашу чтим, всехвальными нарицающе.
О мужеством благочестия славнии, от ятых Христа ради не единаго возраста бысте, но ови от вас отрочата, ови юноши, ови мужи, ови старцы и ови старейшины, вси же достигосте единством веры в меру возраста исполнения Христова; сего ради воспеваем вас, единство, соединенное Духом Святым.
О от многих тем собраннии, сомученицы бысте и причастницы друг другу и единодушно приидосте на поприще страдания, не вси мужие, но нецыи и жены, но едино о Христе Иисусе: во Христа бо крестившимся и во Христа облекшимся несть мужеский пол, ни женский; сего ради единодушно восхваляетеся в Церкви.
ჵ, უძლეველითა ღუაწლითა ბრწყინვალენო, რომელთა უძლურებაჲ დედობრივი განიოტეთ და ღუაწლსა მამაკაცებრ ახოვნად შეკადრნეთ, აწ დაშრიტეთ ერსა ჩუენსა ზედა აღძრულნი უკეთურთა ზრახვანი და დედანი და დანი ჩუენნი, ხატნი და ბეჭედნი მამულისა ყოფისანი, იჴსენით ვნებათაგან ყოვლად წარმწყმედელთა და ურცხვინოებისაგან დაიფარეთ, რაჲთა ქრისტჱს სიყუარულითა და შიშითა, ჩუეულებისაებრ მამულისა სლვისა, ჴსენებასა თქუენსა ადიდებდენ და კურთხეულითა ენითა ქართულითა დაუცხრომელად გნატრიდენ.
Слава Отцу и Сыну и Святому Духу.
რომელთა მრავალ-სახენი ტანჯვანი მოითმინეთ და კეთილად სრულ-ჰყავთ სრბაჲ თქუენი, მარტჳლნო, და ესრეთ გჳრგჳნი ძლევისაჲ დაუჭნობელი მოიხუენით, აწ მოუვლინეთ რისხვაჲ ღმრთისაჲ ჩუენზედ აღძრულთა მათ უშჯულოთა მტერთა ჩუენთა, უფლისა განმარისხებელთა და მშჳდობაჲ და წყალობაჲ თქუენი აღურაცხელი მოჰმადლეთ სჯულდებულსა ერსა, მართლმადიდებელსა და მართლაღმსაარებელსა, ჴსენებისა თქუენისა კეთილად აღმასრულებელთა და სურვილით პატივის-მცემელთა.
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим.
1. Пророчества Исаиина чтение. Глава 43. (Тако глаголет Господь: вси языцы собрашася вкупе…)
2. Премудрости Соломони чтение. (Праведных души в руце Божией…)
3. Премудрости Соломони чтение (Праведницы во веки живут, и в Господе…)
Не под единым чином ятии бысте, подвига победителие, но ови от вас епископи, ови иереи, ови диакони и служителие церковнии, ови иноцы и мнишествующии, ови судии и правители народа, ови в воинстве начальствующии и ови воини, но вси приносящии себе на жертвеннике страдания Христу Богу; сего ради со страхом припадаем к честней иконе вашей. И егда безумнии христоборцы безстрашно нападоша на вы, яко на агнцы, и друг друга предваряху, ови мечем сечаху, ови копием и стрелами прободаху и плоти ваша немилостиво уязвляху, ови же ножами разсекаху и под мостом в Куру ввергаху, тогда совершися мученичество ваше и венца неувядаемаго сподобистеся; ныне же оставления грехов и благаго жития просите нам, да с радостию сердечною ублажаем вас.
Победою венценосцы мученицы, егда главы ваша отсеченныя на мосту оном валяхуся, и багряность крове вашея окрестная места Метехи украшаше, идеже пролияся всесвятая кровь ваша, тогда души ваша, очищенныя, в руце небеснаго праотца купно восхождаху.
Кровию багрянороднии, егда погребоша копиями разсеченная святая телеса ваша во глубине реки, близ места, идеже сожгоша плоть святаго славнаго мученика Або, оттоле безчисленных бед тбилисцев многажды избавителие бысте; сего ради молим вы, мученицы: ходатаи будите нам ко Христу ниспослати Церквам единство, мир и велию милость.
Слава Отцу и Сыну и Святому Духу.
Аще и бысте вы праваго исповедания исповедницы, но не вси грузины, но нецыи иноплеменницы, от иныя веры пришедшии и Христа, истиннаго Бога, познавшии, и блаженным онем мучеником — Шушанике, Раждену и Або — подражающе, Его ради себе принесосте; сего ради людие Грузинстии ко храму вашему притекаем и хвалим вы, вси собравшиися.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
О всечестнии мученицы, и мене непостыдно представите пред престол Христов, идеже венценосцы водворяетеся вы, да обрящем упокоение и наслаждение непреходящее, восхваляющии вас и память вашу добре совершающии.
Стих: Честна пред Господем смерть преподобных Его.
ღუაწლით შემოსილნო მოწამენო ათნო ბევრნო, მარადის უფლისა მვედრებელნო, აწ მომწყდართა თქუენთა თანა ევედრენით ქრისტესა ღმერთსა, რაჲთა განაბნიოს მტერნი ჩუენნი ურიცხვი, და შეგვკრიბოს განბნეული ერი ქართველთაჲ.
Стих: Блажен муж, бояйся Господа, в заповедех Его восхощет зело.
Мучеников честная память приспе днесь, веселящая мучениколюбивыя грузины, да приимем исцеление, яко сии от Бога прияша благодать Святаго Духа во исцеление душ наших.
Слава Отцу и Сыну и Святому Духу.
Добре украшается днесь земля наша, и народ грузинский веселится, яко венцем украшенный вами, о многославнии мученицы, праздник же памяти вашея светло просвещается.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
ღუაწლით შემოსილნო მოწამენო ათნო ბევრნო, ევედრენით ყოვლად სახიერსა ღმერთსა, რაჲთა მოჰმადლოს ქართველთა სარწმუნოებაჲ თქუენებრი, და დაიფაროს ქუეყანაჲ ივერიისა წვალებისაგან და სჯულისაგან უცხოჲსა, ხოლო მკჳდრნი ტფილისისანი ყოვლისაგან ძვირისხილვისა.
Находящия на вы напасти кто возможе понести, стотысящный лике мучеников? Ибо от вопля и рыдания страшных гласов колебашеся все; вы же повеления беззаконных не послушасте и честных икон не попрасте, но положисте души ваша за Христа. Жертву сию благоприя Бог и возложи на вы свет; сего ради память ваша с похвалами совершается.
«Богородице Дево…» — единожды.
Соберемся верою, празднолюбцы грузины, и возопиим вси с восплесканием рук в предлежащий сей праздник ста тысяч мучеников, да с небесными воинствы возрадуемся. (Дважды)
Слава… И ныне…
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
Вас заклаша немилостиво мечем, яко овцы: овем прободоша чрево, овых на полы разсекоша, овым же сокрушиша главы и тако скончаша вас, якоже Ирод младенцы незлобивыя и якоже Захарию, неповинно убиеннаго; сего ради, собравшеся, почитаем вас и восхваляем вси вернии. (Дважды)
Слава… И ныне…
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
Ныне излийте на ны благодать молитвы вашея, стотысящнии, и не отрините просящих вас, но испросите у Христа, помощницы неразлучнии и непобедимии, да низложит враги наша коварныя и победу подаст народу нашему, избранному во сыноположение Божие, кровию Христовою искупленному и свобожденному и в люди избранныя назнаменанному и вписанному. (Дважды)
Слава… И ныне…
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава… И ныне…
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Честна пред Господем смерть преподобных Его.
Стих: Что воздам Господеви о всех, яже воздаде ми?
«Всякое дыхание…» Евангелие от Матфея, глава 10, стих 16 (Рече Господь Своим учеником: се, Аз посылаю вы…); конец — до стиха 23 (…той спасен будет).
По 50-м псалме стихира.
Бодраго пастыря стяжахом вас, всесвятии, стотысящный лике мучеников, Божественное собрание, яко врагов злое умышление удобь отгоняете и Церкви мир подаете, подвига победителие; сего ради мы вси, во праздник сей ваш праздновати собравшиися, непрестанно ублажаем вас.
Ирмос: Колесниц множество со всадники в глубину моря Чермнаго низвергл еси крепостию мышцы, Христе, и спасл еси израильтяны, и победную песнь нову воспеваху.
Святии сто тысяч мучеников, молите Бога о нас.
Светом Троицы просветистеся, всехвальнии, и со ангельскими чинами сопричтостеся, с нимиже радуетеся и веселитеся присно, стотысящнии мученицы, и чудотворением явно исцеляете.
Святии сто тысяч мучеников, молите Бога о нас.
О мученицы велицыи, подвигом облеченнии, с любовию поющих вас избавите от грехов лютых, и от недуг, и напастей, да сподобимся Царствия Небеснаго.
Святии сто тысяч мучеников, молите Бога о нас.
Иже единому Господу приобщистеся, и едину веру неукоризненно сохранисте, и едино Крещение, и сыноположения Божия не поработисте, ныне двери милости отверзите нам молитвами вашими, молим вы.
Слава Отцу и Сыну и Святому Духу.
Молитвенницы молящих и прославляющих вас, за веру Христову пострадавшии, честнии мученицы стотысящнии, ходатайством вашим покрыйте нас, верных.
И ныне и присно и во веки веков. Аминь.
Лик пророческий прежде предвозвести тя горою божественною и дверию непроходимою; сего ради молим тя: двери покаяния божественныя отверзи нам, Дево.
Ирмос: Основавый землю на водах и плодоносие ей всецело даровавый, на камени заповедей Твоих непоколебимем, Христе, утверди Церковь Твою, Едине Благий и Человеколюбче.
Святии сто тысяч мучеников, молите Бога о нас.
Телесным разсечением телесным язвам Спаса нашего приобщистеся, доблии, Крестом вооруженнии воини Христовы, и сияние доброты и венец правды от праведнаго Судии приясте.
Святии сто тысяч мучеников, молите Бога о нас.
Ни во чтоже вменисте ярость Джалал ад-Дина, нудящаго вас к поруганию святых икон, но благоговейно поклонистеся, мученицы, светлым иконам Христа Царя и Пресвятыя Матере Его.
Святии сто тысяч мучеников, молите Бога о нас.
Не избрасте, мученицы преславнии, временныя сея чести, ниже отвергостеся имене Христова, егоже ради и пострадасте и положисте души ваша за Него; ныне же грузинския народы покрываете и избавляете присно.
Слава Отцу и Сыну и Святому Духу.
Вы, страданием и смертию Христа ради, сокрушисте главу гордаго змия; сего ради языку нашему, немощно глаголющему, дадите силу, да сплетем вам песнь сию славы и победы.
И ныне и присно и во веки веков. Аминь.
Одесную Христа стоящая, яко Царица, облеченная, Богообрадованная, в ризы позлащенныя, Царствия Небеснаго испроси нам молитвами твоими, Дево Всесвятая.
Подвигом добрым подвизастеся верою, честнии мученицы, от многих тем собраннии, и мучителей нечестие обличисте, мужественнии, темже венец правды достойно приясте и жертвою благоугодною Богу принесостеся; святым ходатайством вашим подаете всем прощение грехов.
Слава… И ныне…
Се, в небесней славе вселистеся, и дано вам Царство вечное, и причастием Божественным обожени есте, стотысящнии мученицы; помяните ныне поющих вас и память вашу прославляющих.
Ирмос: Слыша славное пришествие Твое, Христе, удивися Аввакум и со страхом вопияше: изшел еси во спасение людей Твоих, спасти помазанныя Твоя.
Святии сто тысяч мучеников, молите Бога о нас.
Троицы любителей божественных мучеников, числом ста тысяч, похвалами украшаем вернии и всецело себе самих вручаем божественному покрову вашему.
Святии сто тысяч мучеников, молите Бога о нас.
Упразднисте вы вся врага кознодейства, подвига победителие, и брани его лютыя, яко имеясте от Бога силу непобедимую.
Святии сто тысяч мучеников, молите Бога о нас.
Ныне пред престолы с ликом мучеников предстоите, мученицы, исполнени Божественнаго совершенства венцев, и непрестанно ходатайствуете о всех нас.
Слава Отцу и Сыну и Святому Духу.
მარადის უფლისა მვედრებელნო, აწ მომწყდართა თქუენთა თანა ევედრეთ ქრისტესა ღმერთსა, რაჲთა განაბნიოს მტერნი ჩუენნი ურიცხვი და შეგვკრიბოს განბნეული ერი ქართველთა.
И ныне и присно и во веки веков. Аминь.
Помози ми, Святая Богородице, плотскими сластьми присно погружаемому, иже стеню повсядневно, на одре уныния лежа.
Ирмос: Одеяйся светом, яко ризою, к Тебе прибегаю и Тебе зову: душу мою омраченную просвети, яко Един Многомилостив.
Святии сто тысяч мучеников, молите Бога о нас.
Яко звезды пресветлыя возсиясте, всехвальнии, и тьму безбожия отгоняете от верных, и зной страстей разгоняете благодатию.
Святии сто тысяч мучеников, молите Бога о нас.
Якоже блистание солнца и сияние луны просвещает мир, тако и вы просветисте Церковь Христа Бога кровию подвигов ваших, яко багряницею.
Святии сто тысяч мучеников, молите Бога о нас.
Возсиясте яко светила в мире, всеславнии мученицы, и разгнасте мрак прелести; сего ради ныне возвеличися имя мученичества вашего.
Слава Отцу и Сыну и Святому Духу.
Явистеся светила пресветлая, числом сто тысяч мученицы, и просвещаете Божественными лучами с верою вопиющих вам: молите о нас Христа Царя.
И ныне и присно и во веки веков. Аминь.
Егоже ум постигнути не может, плоть облечеся, Благодатная, и тя в жилище Себе прият и спасе человеки.
Ирмос: Обышедше мя волны, и бысть ми гроб чрево китово, и вопию Ти: избави мя, Человеколюбче, и спаси мя, Многомилостиве Господи.
Святии сто тысяч мучеников, молите Бога о нас.
Исповеданием правым прияли есте посреде себе Христа, мудрии, и кровь вашу соединисте с кровию мучеников и с ними приясте венец славы.
Святии сто тысяч мучеников, молите Бога о нас.
Заколением и кровию стяжасте благодать духовную, мученицы; днесь о памяти вашей радуемся и хвалим Создателя, даровавшаго вам таковыя благодати, помощницы наши.
Святии сто тысяч мучеников, молите Бога о нас.
Православия столпи тверди, преткнувшагося сего и на землю поверженнаго воздвигните мя, да обрящу согрешений моих прощение.
Слава Отцу и Сыну и Святому Духу.
Ныне с небесе милостиво призрите, многоподвижницы, на молящих вас и избавите нас от недуг и болезней, и страстей, скорбей и напастей.
И ныне и присно и во веки веков. Аминь.
Сердце твое пройде оружие, егда узрела еси на кресте Сына твоего, Непорочная Дево, и божественное ребро Его копием прободенно, и рыдала еси горько.
Славнии мученицы стотысящнии, блаженна есть земля оная, яже упитася кровию вашею, и свята есть вода великия оныя реки Куры, яже бысть вам одеянием и гробом; тамо гордыню Джалал ад-Дина низложисте и себе самих принесосте Христу Богу; Того, яко Блага, молите помиловати души наша.
Ирмос: Препрославленный отцев наших Бог пещь пламенную отроком угаси, и тии вопияху: Боже, благословен еси.
Святии сто тысяч мучеников, молите Бога о нас.
Не отвергостеся Создателя и не бысте неблагодарни благодеянию Его, но возложисте упование на Бога и возопиясте: «Боже, благословен еси».
Святии сто тысяч мучеников, молите Бога о нас.
Тверди и пресветлии лицы ста тысяч мучеников на судищи безбожных вопияху: «Боже, благословен еси».
Слава Отцу и Сыну и Святому Духу.
Лик мучеников, святителей и иереев, святых отцев и матерей, светлое собрание, благодарственно вопияху: «Боже, Ты благословен еси».
Святии стотысящнии мученицы, молите…
Мужеством подвигов ваших и исповеданием Христа Бога, блаженнии, показасте всем непобедимое дерзновение ваше и возгласисте: «Боже, Ты благословен еси».
И ныне и присно и во веки веков. Аминь.
Возсия нам тобою Солнце незаходимое, облаче светлый, Христос Бог наш, просвещаяй сущия во тьме неведения, Богородице.
Ирмос: Тебе, единому всех Творцу, песнь духовную отроцы вопияху: вся дела, Господа пойте и превозносите Его во веки.
Святии сто тысяч мучеников, молите Бога о нас.
Егда мучители воздвигоша десницы своя, да крепко поразят выи ваша, тогда и вы возгласисте: «Превозносим Тя, Боже, во веки».
Святии сто тысяч мучеников, молите Бога о нас.
Ходатаи будите нам присно ко Господу, мученицы, яко вы есте помощницы всем верным, иже благословят Христа и превозносят Его во веки.
Святии сто тысяч мучеников, молите Бога о нас.
Иже бесов победисте и мучителя посрамисте, ныне даруйте и нам сердца сокрушение, да присно возглашаем: «Превозносим Тя, Боже, во веки».
Слава Отцу и Сыну и Святому Духу.
Ныне испросите у Спаса умиленно избавление народу нашему от всякия скорби молитвами вашими и принесите Господу пение наше: «Превозносим Тя, Боже, во веки».
И ныне и присно и во веки веков. Аминь.
Тобою нас ради воплотивыйся Бог тя, Святую и Всенепорочную, всему роду нашему божественную заступницу показа, Дево; сего ради вернии велегласно воспеваем тя.
Ирмос: Исаие, ликуй: Дева име во чреве и роди Сына безначальнаго Еммануила, Бога же и Человека, Восток имя Ему; Егоже величаем, и Рождшую Его ублажаем.
Святии сто тысяч мучеников, молите Бога о нас.
Безпримерное страдание показасте подражанием Христу, яко и младенцы безвозрастнии и жены немощныя мужественни бысте и естество забысте; сего ради благодарным сердцем приносим вам хвалу.
Святии сто тысяч мучеников, молите Бога о нас.
Ныне разрешите узы грехов поющих вам, подвигом облеченнии мученицы, и утолите волны страстей и зной мучения предстательством вашим.
Святии сто тысяч мучеников, молите Бога о нас.
Иже кровию мученическою сияете во вселенней, избавите нас от всякия скорби, мученицы, и оградите, непобедимии, всех достойно собравшихся.
Слава Отцу и Сыну и Святому Духу.
Лик непорочный, воинство Божественное, полк избранный, стан святый, воинство крепкое, множество треблаженное молит Тя о нас, Христе Боже: тех ради даруй нам прощение грехов.
И ныне и присно и во веки веков. Аминь.
Тя светильником светлым пророк прежде виде, Всенепорочная, имущую Христа, мысленную свещу, Имже просветихомся мы, во тьме страстей лежащии; сего ради ублажаем тя, Богородице Приснодево.
Церкве непоколебимыя твердыни и православия Божественнии столпи, за веру Христову пострадавшии стотысящнии мученицы, всенепобедимии, венчавшаго вас Иисуса молите, да дарует поющим вас мир и почитающим вас велию милость.
Слава Отцу и Сыну и Святому Духу.
რომელთა მეორედ მიიღეთ ნათლისხღებაჲ სისხლითა თქუენითა, და განსწმიდეთ სულნი თქუენნი, მოწამენო, აჰა, ქართლოსიანნი გევედრებით: ოხაჲ ჩუენი შესწირეთ მჴსნელისა მიმართ და გჳთხოვეთ, შეჰმუსროს მტერნი ჩუენნი ურიცხუნი, შურითა მკულელებრითა შეჭმულნი, და დაამხოს უკეთურებითა და ზაკუვით მოსრულნი ბოროტნი თანამზრახველნი მათნი, აღსპობისა ჩუენისა მსურველნი.
И ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор стотысящных мучеников, с нимиже восхваляем тя, Дево.
Приидите, собори мучениколюбцев, православнии грузины, возрадуемся и память мучеников Христовых с похвалами совершим, яко прекрасна и светла всехвальная память их.
Празднует царствующий град наш светоносную память вашу, и радостно веселится Церковь, и зовет всех верных воспевати и восхваляти вас.
О сродницы наши, картлийцы, иже кровию мученическою сияете на земли, помозите нам, яко на месте мученичества вашего благословенным языком грузинским молим вас и лето от лета совершаем память вашу.
О стадо словесных овец, егда обступиша вас волцы злии и растерзаша немилостиво, якоже Ирод младенцы незлобивыя и якоже Захарию, неповинно убиеннаго, тогда обретосте, аможе желасте приити, идеже несть скорби, но радость.
ვითარცა მრავალ-გზის ურიცხუთა ჭირთა ტფილისელთასა დამჴსნელ იქმენით, ეგრეთვე გარე წარაქციეთ ყოველნი მტერნი და მაჭირვებელნი ჩუენნი, რომელთა განიგდეს წილი სამკჳ-დრებელსა ჩუენსა ზედა და აღგვიდგინეთ მამული ჩუენი პირველსავე დიდებასა.
Ныне веселися, земле Грузинская, яко в тебе пролияся кровь ста тысяч мучеников, от хорезмийцев в Тбилиси пострадавших, иже положиша души своя по подобию Избавителя и ныне пред Троицею радуются и молятся непрестанно о всех нас.
Слава Отцу и Сыну и Святому Духу.
Велия есть победа светлая, юже показасте, во плоти сущии, яко безплотнии, ибо Христа ради желасте смерти, еюже приидосте в безсмертие, и радостию подвига вашего Церковь грузинскую прекрасно обагристе; сего ради благоверный, мучениколюбивый народ грузинский песньми восхваляет вас и вопиет усердно.
И ныне и присно и во веки веков. Аминь.
Богородичен Димитрия, царя грузинскаго, Багратиона.
Богородица и всечестная, Мати Дева, лилия прекрасная, ей благовествова ангел крылатый; тобою веселится Царь венценосный, и Тому служат царие многоподданнии.
Славословие великое и отпуст.
На литургии: на блаженных от канона святых песнь 3-я и 6-я.
Прокимен, глас 4: Святым, иже суть на земли Его, удиви Господь вся хотения Своя в них.
Стих: Предзрех Господа предо мною выну, яко одесную мене есть, да не подвижуся.
Апостол: к Ефесеям, глава 6, стих 10 (Братие, возмогайте о Господе…); конец — стих 18 (…еже есть глагол Божий…).
Аллилуиа, глас 4: Воззваша праведнии, и Господь услыша их.
Стих: Многи скорби праведным.
Евангелие от Луки, глава 21, стих 12 (Рече Господь Своим учеником: блюдитеся от человек, да не возложат на вы руки своя…); конец — стих 20 (…стяжите души ваша…).
Причастен: Радуйтеся, праведнии, о Господе.
Автор-составитель: Тинатин Мчедлишвили
