Праздничное последование чудотворной иконе Пресвятой Богородицы «Нечаянная Радость»
Поем «Блажен муж», 1-й антифон.
На «Господи, воззвах»
стихиры на 8, глас 5:
Господи Вседержителю, преславное чудо явил еси всем верным Твоим, яко не токмо сладчайшей Матери Твоей, Марии Богородице, но и пречистей иконе ея, на доске написанней, даровал еси сию дивную силу и благодать чудотворения, да во веки не постыдимся, ею хвалящиися и на ню все упование возлагающии, и хвалим силу Твою.
Приидите, вернии, и обстоим честную икону Пресвятыя Матере, нечаянныя радости Подательницы, с любовию облобызаем и воспоим: Радуйся, Пресвятая Дево; радуйся, Мати Вышняго Бога; радуйся, Избавительнице и Покровительнице прибегающих к тебе грешных; буди ныне Заступница почитающим тя.
Припадаем к тебе, Богородице, с любовию зряще святую икону твою, и вопием ти: помилуй нас, Мати Благая, якоже помиловала еси грешнаго оного человека, присно молившагося пред иконою твоею, егда глаголаше словеса архангельская: «Радуйся, Благодатная, Господь с тобою!»
Якоже древле пред честною иконою твоею многажды молящагося грешника не возгнушалася еси и даровала еси ему нечаянную радость покаяния, умилостививши о нем Сына твоего и Бога, тако и ныне даруй нам сокрушение сердца и познание своих грехов.
О преславнаго чудесе! Егда человек оный спешаше на совершение беззакония, по обычаю помолися пред иконою твоею и ужасеся, узрев образ твой и Отрочате твоего яко живы движущася, у Отрочате же Бога на руках и ногах язвы отверзошася, яко на Кресте страдания.
Узрев беззаконник от язв безначальнаго Сына твоего истекающую струю крове, со страхом возопи к тебе, яко к Матери Его: «О Владычице, кто сие сотвори?» И се, ты рекла еси ему скорбным гласом: «Вси вы, грешницы, якоже иудеи, паки распинаете Сына моего».
«Помилуй мя, о Мати милосердая!» — возопившу грешнику, отвещала еси: «Аще и нарицаеши мя милосердою Материю, но присно исполняеши мя скорби»; и припаде к тебе окаянный он и возопи ти: «Ни, Владычице, да не превозможет грех мой неизреченныя твоея благодати и милости, ибо ты еси надежда всех грешных; умоли о мне Сына твоего и Бога моего».
Тогда вознесла еси молитву, преблагословенная Мати: «Сыне и Боже мой, любве ради ко мне помилуй грешника сего и прости вся злая дела его». И се, сладчайший глас и ходатайство твое пред Богом возбудиша покаяние в грешнице оном, и нечаянная радость дадеся ему от иконы твоея, яже и избави его от погибели.
Слава…
О Мати Благая, слышавше жителие Царствия избавление погибшаго грешника молитвою твоею, величаху милосердую Владычицу небесе и земли; и мы, слышавше чудо сие, не престанем молити тя: ныне и нам да дарует прощение грехов ходатайством твоим Сын и Бог твой, Иисус Христос.
И ныне…
О преславное явление иконы твоея, яже сияет чудесы и тихим пристанищем является плавающим посреде волн житейскаго моря, и тобою хранит кающихся пред Богом грешников! Вернии же нарекоша ю Подательницею нечаянныя радости.
Бытия чтение, глава 28 (10–17)
Иаков же вышел из Вирсавии и пошел в Харран, и пришел на одно место, и остался там ночевать, потому что зашло солнце. И взял один из камней того места, и положил себе изголовьем, и лег на том месте. И увидел во сне: вот, лестница стоит на земле, а верх ее касается неба; и вот, Ангелы Божии восходят и нисходят по ней. И вот, Господь стоит на ней и говорит: Я Господь, Бог Авраама, отца твоего, и Бог Исаака; не бойся. Землю, на которой ты лежишь, Я дам тебе и потомству твоему; и будет потомство твое, как песок земной; и распространишься к морю и к востоку, и к северу и к полудню; и благословятся в тебе и в семени твоем все племена земные; и вот Я с тобою, и сохраню тебя везде, куда ты ни пойдешь; и возвращу тебя в сию землю, ибо Я не оставлю тебя, доколе не исполню того, что Я сказал тебе. Иаков пробудился от сна своего и сказал: истинно Господь присутствует на месте сем; а я не знал! И убоялся и сказал: как страшно сие место! это не иное что, как дом Божий, это врата небесные.
Исхода чтение, глава 3 (1–5)
Моисей пас овец у Иофора, тестя своего, священника Мадиамского. Однажды провел он стадо далеко в пустыню и пришел к горе Божией, Хориву. И явился ему Ангел Господень в пламени огня из среды тернового куста. И увидел он, что терновый куст горит огнем, но куст не сгорает. Моисей сказал: пойду и посмотрю на сие великое явление, отчего куст не сгорает. Господь увидел, что он идет смотреть, и воззвал к нему Бог из среды куста, и сказал: Моисей! Моисей! Он сказал: вот я, Господи! И сказал Бог: не подходи сюда; сними обувь твою с ног твоих, ибо место, на котором ты стоишь, есть земля святая.
Исхода чтение, глава 13 (18–22)
И обвел Бог народ дорогою пустынною к Чермному морю. И вышли сыны Израилевы вооруженные из земли Египетской. И взял Моисей с собою кости Иосифа, ибо Иосиф клятвою заклял сынов Израилевых, сказав: посетит вас Бог, и вы с собою вынесите кости мои отсюда. И двинулись сыны Израилевы из Сокхофа и расположились станом в Ефаме, в конце пустыни. Господь же шел пред ними днем в столпе облачном, показывая им путь, а ночью в столпе огненном, светя им, дабы идти им и днем и ночью. Не отлучался столп облачный днем и столп огненный ночью от лица всего народа.
Богородице Дево, крепкая Помощнице, ныне всяк верный тобою хвалится и радуется, яко имать тя Предстательницу непостыдную, стену неразрушимую, основание непоколебимое и хранительницу недремлющую; темже не престани молитвами твоими, Владычице, присно избавляти грешнаго человека, и вся уповающия на тя избавляеши от видимых и невидимых врагов.
Надежду даруй в напастех сущим рабом твоим и рог верных возвыси, Владычице; избави молитвами твоими народ сей наш и вся грады и веси Грузинския, укрепи в служении вся священныя и иноческия чины, всем же верным, восхваляющим тя, Покровительница буди и избави нас от потопления во гресех.
Всесвятая икона твоя, Дево Богородице, есть Подательница нечаянныя радости, к нейже приближающеся и со страхом и верою покланяющеся тебе, Пречистая, образ твой лобызаем, и благодать исцелений почерпаем, и свобождаемся от душевных и телесных недуг.
Воистину превосходит ум человеческий любовь твоя ко христианом, Богородице, яко не утрудилася еси ходатайствовати о человеце беззаконнем, явивши чудо иконою твоею и возбудивши покаяние в сердце его; тако и ныне и нам, недостойным, помози и избави нас от лести диавольския и от коварства человеческаго.
Зряще тя яко непреклонную Заступницу грешных, Мати Бога Вышняго, и умягчение ожесточенных душ, ныне едиными слезами воспеваем тя и молим: имущи милость неизреченную, свободи нас от всех бед и грехов.
Якоже предстательством твоим избавляла еси уповающих на тя, Божия Мати, и отгоняла еси вся печали их, и избавляла еси от коварства злых человек, тако и ныне благо устрой жизнь нашу и избави нас от всякия неправды и злобы.
Якоже многими молитвами ходатайствовала еси о человеце, присно согрешающем, но любящем икону твою, тако и ныне мы, напастьми обстояеми, с любовию воспеваем тя и приносим ти песнь: Радуйся, святою иконою твоею всех нас Утешительнице; радуйся, всех похвало и утверждение; радуйся, спасительнице душ наших.
Слава… И ныне…
Нечаянную радость подающи верным твоим, и ныне нам даровала еси чудотворную сию икону твою, в скорбех помощницу, в печалех утешение, в недузех врачевство и от страстей избавление, всем же верным подает велию милость.
Прославление всехвальныя иконы твоея днесь славословим, Всесвятая, и предстательство твое празднуем, яко ты, Мати Жизни, молиши о нас Сына твоего, Христа Царя, иже возложихом на тя твердую надежду, истинная Наставнице жизни нашея.
Стих: Помяну имя твое во всяком роде и роде.
Молитвы всех христиан приемлющая, Владычице наша Богородице, и самаго отчаяннаго грешника моления не отвращающаяся, и о нем пред Сыном твоим ходатайствовавшая, и разрешением уз греховных нечаянную радость подавшая: ходатайством твоим и ныне мы приимем милость Божию.
Стих: Слыши, дщи, и виждь, и приклони ухо твое.
Се, икона твоя, Божия Мати, явися нам во очищение грешных, ибо руку помощи простирает всем, к тебе с верою и надеждою прибегающим и единем сердцем и едиными усты вопиющим: покрый нас, Владычице, от всех скорбей и напастей.
Слава…
О неизреченныя благости, Владычице! Яко молитвами твоими скоро отвращаеши праведно находящий на ны гнев и святою сею иконою твоею присно исцеляеши вся душевныя и телесныя недуги.
И ныне…
Радуйся, радость всея земли возрастившая, Пречистая Мати Божия, яко приносиши Богу о нас усердную молитву твою, и от всех скорбей и печалей избавляеши нас, и исполняеши благая прошения наша.
— «Ныне отпущаеши».
— По «Отче наш»:
Празднуем днесь, вернии, и радуемся духом, величающе теплую Заступницу рода христианскаго, и ко святей иконе ея прибегающе, вопием: О всемилостивая Владычице Богородице, даруй нам нечаянную радость, во гресех и печалех впадшим, умоли Сына твоего, да избавит нас от всякаго зла и спасет души наша. (Трижды).
— Благословение хлебов.
«Бог Господь»
Тропарь праздника дважды, Слава, и ныне, и тропарь (тот же)
По 1-м стихословии седален, глас 1:
Пресветлыя иконы твоея чудеса нечаянную радость подают всем верным, и уповающим на ню дарует хранительницу недремлющую и от бед избавительницу; темже воспеваем тя, Всесвятая: присно покрывай нас покровом твоим.
Слава… И ныне…
Всех призывающих святое имя твое Помощнице и грешных на путь правый Обратительнице, Пресвятая Богородице, ходатаица буди нам, грешным.
По 2-м стихословии седален, глас 3:
Не отрини нас, смиренных рабов твоих, приносящих недостойная моления пред всесвятою иконою твоею, да, избежавшия бездорожия заблуждения, наставиши нас ко вечному жилищу.
Слава… И ныне…
Веселятся днесь вернии и сплетают песни многи, с любовию почитающе святую сию икону твою, яже зарею богопознания просвещает благочестно поющих ю.
Прежде величания седален, глас 8:
Величия твоя кто исповесть, Богородице? Яко чудом иконы твоея удивила еси вся православныя, умягчивши сердце злаго человека; мы же, просвещени сиянием милости твоея, воспеваем тя, яко Предстательницу жизни нашея.
Слава… И ныне…
Всесвятая Невесто, просвети и освяти помысл и душу мою, молю тя, и отжени мглу безумия моего и тьму грехов моих, да достойно воспеваю тя, Нетленная.
Величание
Величаем тя, Пресвятая Дево, Богоизбранная Отроковице, и чтим святую икону твою, еюже источаеши исцеления всем, с верою к тебе прибегающим. (Трижды).
Степенна, 1-й антифон 4-го гласа;
Прокимен и Евангелие (см. 8 сентября)
По 50-м псалме стихира по Евангелии.
Дивныя милости дарование беззаконному человеку проповеда нам святый Димитрий Ростовский, иже, собирая великая и преславная дела Божия, писанием предаде избавление онаго человека тобою, в назидание и надежду всем верным, да в гресех, скорбех и бедах сущии коленопреклонно припадают ко иконе сей твоей, Богородице, и молят помощи пред Богом.
Ирмос: Колесницегонителя фараона погрузи чудотворящий иногда Моисеов жезл, крестообразно поразив и разделив море Чермное, Израиля же бегуна пешеходца спасе, песнь Господу воспевающа, яко славно прославися.
В знамение водительства твоего явилася еси идущему путем греховным и избавила еси его от погибели; и ныне наше приими, о Владычице, смиренное сие моление и даруй ми избавление грехов моих.
Благодать Божественная, истекающая от иконы твоея, Божия Мати, попаляет полк иконоборцев, и сладкий свет побед верным простирает и утверждает нас.
От недуга телеснаго и от греха душевнаго исцели, Богородице, уповающия на тя и припадающия ко иконе твоей, яко ты едина еси, Владычице, прославлена по всей земли.
Слава Отцу и Сыну и Святому Духу.
Се, преукрашенныя списки иконы твоея, умножившеся по всему христианству, с великою честию во храмех поставиша — в помощь и утешение в печалех, во врачевство недугов и во избавление от страстей.
И ныне и присно и во веки веков. Аминь.
В скорбех и напастех заключенна, призрения твоего и попечения сподоби мя, Богородице, яко благаго Бога Мати, благая и милостивая.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Утверди сердце мое во упование на тя и отжени всякое буйство и гордыню от помраченнаго ума моего, да вопию: Пречистая, несть свят, якоже Господь, и несть праведен паче Бога нашего.
Поручительница еси грешных избавления пред Богом и воздвизаеши падших, и избавляеши уповающих на тя от всех скорбей и грехов; ныне воздвигни мя, окаяннаго, и отдали мя, убогаго, от растления греховнаго.
Зряще икону сию твою очима телесныма, ум и сердце на небо возводим и молим тя: призри милостиво на ны, Богородице, и избави нас от глада, огня, меча и бед.
Слава Отцу и Сыну и Святому Духу.
Силою молитвы твоея пред Сыном твоим и Богом, якоже веселия исполнила еси человека онаго грешнаго, тако и ныне и нас избави от сетей греховных и угаси пламень страстей наших.
И ныне и присно и во веки веков. Аминь.
Лютыми болезньми и страстьми злыми искушаюся; помози ми ты, Дево, Врачу душ и телес наших, яко сокровище всех благ и недугов потребительницу знают тя соборы верных.
Ужасеся страшным видением человек оный беззаконный, егда припаде ко иконе твоей с молитвою, и благодатию твоею отселе житие свое богоугодно измени; тако и нам помози, да, зряще сия Божественная дела, удалимся суеты земныя и, ум и сердце на небо возводяще, хвалу возсылаем Пресвятей Троице.
Слава Отцу и Сыну и Святому Духу, и ныне и присно и во веки веков. Аминь.
Приспе днесь светлый праздник, Владычице, святыя иконы твоея, всем нечаянную радость подающия; радуются вси православнии, яко вси зрят твое матернее милосердие на небеси и на земли, и молят тя о избавлении от всех грехов, напастей и зол.
Ирмос: Ты еси, Христе, Бог мой, Ты сила моя, Ты Господь мой и похвала жизни моея, не оставль недр Отчих на небеси и явивыйся нищете моей; темже с пророком Аввакумом глаголем: силе Твоей слава, Человеколюбче.
О благословенная в женах, Богородице Марие, якоже древле явила еси дивное покровительство человеку оному грешному и посрамила еси диавола, тако и ныне не забуди нас, Благая Владычице, и всех, к иконе твоей прибегающих, избави от всякаго находящаго соблазна.
Зряще ангели, хранители христиан, како помогла еси молитвою человеку оному, погибнути хотящему, и направила еси его на путь заповедей Христовых, радовахуся и ублажаху тя, яко Честнейшую Херувим и славнейшую без сравнения Серафим.
Якоже древле мнози украшахуся благодатию иконы твоея, тако и паче солнечнаго света просияет народ наш благодатию твоею, ибо дивныя сия списки ея бывают яко источницы безсмертия недужным и немощным и всем подательницы великих милостей.
Слава Отцу и Сыну и Святому Духу.
Разумеюще святыню и величие иконы сея твоея, молим тя: ныне призри, сладкая Мати Царя Христа, на избранный тобою народ и благоволи возрастити, умножити и исполнити нас духа премудрости, взаимныя любве и Божественнаго разумения.
И ныне и присно и во веки веков. Аминь.
Ты еси крепость и сила моя, Богородице, яко в день скорби моея тобою упокоюся и тобою же вознесуся в небесное наследие от мира сего и возрадуюся со Царем и Богом, Избавителем моим.
Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма окаяннаго? Но обрати мя и к свету заповедей Твоих пути моя направи, молюся.
Виждь, Святая, от нощи утреннюющий народ твой, стадо твое, еже обстоит преславную икону твою, «Нечаянныя радости Подательницу», и просит грехов оставления и Божественныя славы причастия.
Песньми духовными Божественней иконе твоей покланяемся, просим прощения и спасения душ наших; ты же, Владычице, Невесто Неневестная, яко Врач наш, вся сия даруй нам.
Явльшейся чудотворней иконе твоей, Владычице, яко избавительнице от греха и беззакония, и мы ныне радуемся и молим тя: даруй нам благодать различения добра и зла.
Слава Отцу и Сыну и Святому Духу.
Не отрини нас от лица твоего, Мати Невечерняго Света, яко имамы тя Заступницу теплую, и прибежище великое, и Покровительницу крепкую, и Споборницу, и Надзирательницу.
И ныне и присно и во веки веков. Аминь.
Реку сладости, полноту потока, небесную манну, обилие и благодать присно прозябающую стяжахом тя, Отроковице, живущии во обители сей, и воспеваем Рождество твое.
Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже мой, возведи мя.
Вскоре помози, святая Родительнице неизреченная Сына Божия, и до скончания века сохрани Иверию и люди Иверския, яже избрала еси, и от работы бесовския и идолослужения избави.
Бездна недостойных согрешений обыде мя, и потопляется душа моя; но даждь ми, Владычице, крепкую мышцу твою, и якоже человека онаго грешнаго, тако и мене, прибегающаго к иконе твоей, невредима соблюди.
Искушений нападения отгониши и страстей нашествия разрешаеши, Пресвятая Мати наша Богородице, Надеждо отчаянных и грешных нечаянная Радосте, да воспеваем ти: «Слава помощи твоей, Божия Мати».
Слава Отцу и Сыну и Святому Духу.
Не остави мене погрязнути в бездне беззакония, Владычице, но изведи мя от тины страстей, да удалится от тления живот мой, и принесу тебе благодарственное пение.
И ныне и присно и во веки веков. Аминь.
Имый оскверненный сей телесный храм, дерзновенно прибегаю ко всечистому храму превечнаго Слова, пред святою иконою твоею принести смиренная моления моя; но ты, яко милостивая, очисти мя благоутробием твоим.
Не имамы иныя помощи, не имамы иныя надежды, разве тебе, Богородице. Ты нам помози, Владычице, на тебе надеемся и тобою хвалимся, твои бо есмы раби, да не постыдимся.
Ин кондак, глас 8:
По Сына твоего смотрению подвизавшися о христианех, во успении твоем вознеслася еси на небо пречистою плотию твоею, но не отлучилася еси от земли, ниже оставляеши грешных, но чудотворною иконою твоею избавляеши от погибели и подаеши радость нечаянную.
Икос, глас 8:
Не ввери мя человеческому предстательству, Пресвятая Богородице, но приими моление раба твоего: скорбь бо обдержит мя, и не могу стрел бесовских терпети, покрова не имам, ниже где прибегну, окаянный, присно побеждаемь, и утешения не имам, разве тебе, Владычице мира, едина надеждо и предстательство верных, не презри моления моего, но милостиво призри и исполни во благое.
Ирмос: Отроцы еврейстии в пещи по огню хождаху дерзновенно и, орошаеми, вопияху, глаголюще: благословен еси, Господи Боже, во веки.
Всесвятая икона твоя «Нечаянная Радость» врачевство есть верным, и мы с благоговением покланяемся ей, Пречистая, и свобождаемся от недуг.
Согрешихом пред Богом и беззаконию причастницы быхом; но, Владычице наша Богородице, яко благая Мати и Покровительница наша, угаси огнь Божественнаго гнева.
Божественными песньми, Дево Богородице, Божественней иконе твоей покланяемся, просим прощения и спасения душ наших, яко поручительницу спасения нашего.
Слава Отцу и Сыну и Святому Духу.
Благодать Божественная, исходящая от иконы твоея, Божия Мати, попаляет полк иконоборцев, и сладкий свет побед верным простирает и утверждает нас.
И ныне и присно и во веки веков. Аминь.
Недужен лежу на одре болезней, и несть исцеления плоти и костем моим, Дево, рождшая Врача недугов, воздвигни мя от тления.
Ирмос: В горе Моисею собеседовавый купиною, образ изобрази безстрастнаго от Девы рождения; Того вси благословим и превозносим во веки.
Воспевает тя ангельский лик, Пресвятая Дево, и превозносит род человеческий; и мы ныне веру имамы несумненную к тебе и молим тя: сохрани народ наш, да не возрадуются безчисленнии врази наши.
Вопием ти, Владычице: о сладкая Мати Царя Христа, буди Покровительница земли нашея, радость всем христианом и поручительница вечнаго спасения.
Воспевают тя иноцы и мирстии, Пречистая, и благословят тя, яко Благую Владычицу, яже реку чудес источаеши благодатию чудотворныя сея иконы твоея.
Слава Отцу и Сыну и Святому Духу.
Всей земли простирающей неоскудныя благодати иконе твоей, Пречистая, с желанием, благоговением и любовию лобызаем ю и молим тя: Владычице, даруй мир и умирение всем православным.
И ныне и присно и во веки веков. Аминь.
Несть меры широте, глубине или высоте, идеже не достиже крепкая помощь десницы твоея, Божия Мати, на нюже уповающе, отроцы благословят, священницы воспевают и людие превозносят Сына твоего во веки.
Ирмос: Ужасеся о сем небо, и земли удивишася концы, яко Бог явися человеком плотски, и чрево твое бысть пространнейшее небес; темже тя, Богородице, Ангелов и человеков чиноначалия величают.
Призревшая на смирение наше Пресвятая Богородица и показавшая нам бездну милости явлением чудныя иконы своея ныне красно украшает Церковь Христову, яко невесту, и призывает всех духовно праздновати.
Всесвятая икона твоя бесы отгоняет, яко, не могуще зрети силы ея, бежат и потопляются; мы же с любовию покланяемся и лобызаем ю и тя, Богородицу, непрестанно величаем.
Приидите вси, поклонимся и припадем ко святей иконе Матере Христовы, еюже многа знамения и чудеса видехом вернии, и вси почитающии ю приемлем от нея благодать безчисленную, благословение и велию милость.
Слава Отцу и Сыну и Святому Духу.
Не может достойно воспети язык человеческий, ни ангельский, яко ты еси всея твари честнейшая и всех сущих на земли славнейшая; но, о Владычице, приими от нас сие моление и спасай нас присно, яко упование наше на тя возлагаем.
И ныне и присно и во веки веков. Аминь.
Ныне утоли, Всесвятая, Пречистая Дево, нападения злых и советы их разруши, между же православными народы мир и любовь утверди, да, на тя упование возложившии, не постыдимся во веки.
Посети нас Восток свыше и, яко зарю пресветлую, дарова нам Пресвятую Матерь Свою; и грешным Предстательница бываеши, Богородице, и всем в печалех подаеши нечаянную радость.
О преславнаго чудесе! Восхотевши избавити человека онаго от беззаконнаго жития, страшное видение показала еси ему от честныя иконы твоея, Благословенная, да покается и, из глубины греха твоего милостию возставший, присно благодарит и славит Господа.
О твоего, Владычице, о нас промышления! Яко милостиво даровала еси благословенную икону твою, яко хранительницу недремлющую, ныне преложи в радость всю печаль нашу и избави нас от нашествия всех врагов и недоброхотов.
Воспевающе неизреченное матернее милосердие твое ко человеку грешному, хвалим тя, вернии, яко твердую Предстательницу грешных, и молим тя: во искушениих и в пещи скорбей и нас, Божия Мати, окропи росою благодати твоея.
Глаголы твоя, яже рекла еси, Нетленная, о доставшихся тебе в жребий, исполни, яко милостивая, и умоли Сына твоего и Творца нашего, да избавит нас от всех врагов и завистников и умирит жизнь нашу.
Ныне паки излей на род наш милости твоя, Владычице, и буди нам Мати, да постыдятся врази наши и уразумеют вси, яко часть твоя есмы мы, род грузинский.
О Всесвятая, милостивая, христиан Помощнице, испроси нам милость от Сына и Бога твоего, да не погибнем без милости и без покаяния, но присно под покровом твоим с радостию благодарим тя и присно славим Спаса нашего Бога.
Слава Отцу и Сыну и Святому Духу.
О благословенная Мати и Дево, с любовию припадаем ко иконе твоей, пред неюже человек оный беззаконный усердно творяше молитву; и ты вскоре сотворила еси чудо оное дивное и умолила еси о нем Сына твоего, и Той вскоре услыша моление твое и отпусти грехи его, покаянием подвигнутаго; сего ради и мы молим тя, яко великую Заступницу, да простит нам грехи наша Христос, яко Человеколюбец.
И ныне и присно и во веки веков. Аминь.
Славословие великое и отпуст.
На литургии: см. 8 (21) сентября.
Составила псаломщица Тинатин Мчедлишвили.
О спасении ближних моих: псаломщица Тамара; Михаил, Кетеван; Шалва; Наталия; Алексий; Нуца-Нино; Залико; Георгий; Давид; Ирина; Марина; Давид.
О здравии: Тинатин, Зураб; Нона; Давид; Арчил; Марина; Ироди; Натия; Нана; Майя; Мзия; Лия — с семьями
