Праздничное последование преподобному и богоносному отцу нашему Прохору Грузину
Поем «Блажен муж», 1-й антифон.
На «Господи, воззвах» стихиры
на 8, глас 5.
Преподобнаго Прохора Грузина
Святе богоносне отче Георгие-Прохоре Грузине, кто возможет исповедати добродетели твоя и паче восхвалити славный подвиг твой в Палестине? Ибо, достиг высоты настоятельства, яко пастырь добрый, пасл еси чада твоя: Ныне и о нас моли Бога даровати оставление грехов празднующим святую память твою и ходатай буди ниспослати Церквам единство, мир и велию милость.
Святе богоносне отче Георгие-Прохоре Грузине, любителю Божий и исполнителю Божественных заповедей Его, небесный поборниче и похвало народа нашего и светильниче, Иверию озаряяй: ныне и о нас моли Бога даровати оставление грехов празднующим святую память твою и ходатай буди ниспослати Церквам единство, мир и велию милость.
Святе богоносне отче Георгие-Прохоре Грузине, похвало подвижников и столпе непоколебимый терпения, Церкве нашея украшение и великий старейшино и учителю подвизавшихся во Иерусалиме иверов, Божественное течение твое добре совершивый и вселивыйся во Царствие Христа Бога: ныне и о нас моли Его даровати оставление грехов празднующим святую память твою и ходатай буди ниспослати Церквам единство, мир и велию милость.
Святе богоносне отче Георгие-Прохоре Грузине, со ангелы служителю и зрителю неизреченных, главо иноков и настоятелю Крестной обители грузин во Иерусалиме, иже пред Пресвятою Троицею радуешися, многим сиянием просвещен, и помощник еси молящих тя: ныне и о нас моли Его даровати оставление грехов празднующим святую память твою и ходатай буди ниспослати Церквам единство, мир и велию милость.
Какими похвалами достойно восхвалим, или коим пением воспоем всеблаженнаго Прохора, светильника Грузии всесветлаго и светило Иерусалима, иже создал еси славную обитель вне града, на месте, купленном царем Мирианом, идеже посечено бысть древо честное, из негоже сотвориша Крест страстей Христа, Иже тобою нападения вражия низложи и подает нам велию милость.
Какими похвалами достойно восхвалим, или коим пением воспоем всеблаженнаго Прохора, учителя духовнаго и наставника и отца отцев, похвалу иноков и небеснаго предводителя грузин? Вселил еси новую обитель на разоренной обители Крестной, созданной Горгасалом, и добре потрудился еси о стаде твоем, да возрастут в духовных и телесных благах и благоугодят Богу, Иже тобою нападения вражия низложи и подает нам велию милость.
Какими похвалами достойно восхвалим, или коим пением воспоем всеблаженнаго Прохора, Церкве Христовы утверждение и всех просвещающаго учением? Ибо, быв учитель духовный и наставник иноков, плоть истощил еси подвигом и, с безплотными предстоя, нас, грузин, покрываеши свыше пред Богом, Иже тобою нападения вражия низложи и подает нам велию милость.
Какими похвалами достойно восхвалим, или коим пением воспоем всеблаженнаго Прохора, подобнаго Боголучезарней звезде, в пустыни вселением просиявшаго, и сад райский, плод благий приносящий, великаго помощника и учителя, всех лукавых и ленивых обличителя и к Богу обратителя, Иже тобою нападения вражия низложи и подает нам велию милость.
Слава Отцу и Сыну и Святому Духу.
Какими похвалами достойно восхвалим, или коим пением воспоем всеблаженнаго Прохора, светило мира и похвалу народа грузинскаго, паче же Иерусалима, идеже подвизался еси благоугодно Богу, и научал еси стада, и умножал еси рукописания и Божественныя собрания во славу Божию? Ныне помолися к Нему даровати оставление грехов празднующим святую память твою и ходатай буди ниспослати Церквам единство, мир и велию милость. (Глас 6).
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим. (Глас 6).
На входе прокимен дне
Паремии — чтения преподобному.
1. Премудрости Соломони чтение. (Праведных души в руце Божией…)
2. Премудрости Соломони чтение. (Праведницы во веки живут, и в Господе…)
Писано под 9 марта.
3. Премудрости Соломони чтение (Праведник, аще постигнет скончатися, в покои будет…). Писано под 7 мая.
На литии стихира храма.
Таже преподобнаго Прохора.
მამად და წინამძღურად აღგიარებს სიმრავლეი მონაზონთაი, ღმერთშემოსილო პროხორე, და იშუებს სახსენებელსა შენსა, რამეთუ აღაშენე სავანეი წმიდასა მას ცხოველსმყოფელისა ჯუარისა ადგილსა ნათესავისა შენისათვის მეფეთა ჩუენთა შეწევნითა, და მერმეცა მფარველობდენ რაი საძმოსა მისსა, შესწირვიდენ დიდთა საფასეთა და მამულთა, არა ხოლო თუ მკვიდრობასა მას შინა ქართველთასა, არამედ შემდგომთაცა მფლობელთა მისთა, გარნა აწ არცაღა უდევთ წილი მსახურთა შორის მისთა ქართველთა, და შეგვეწიე წინაშე ღმრთისა, რაითა შენ მიერ მონაღვაწები იერუსალიეიმისა ჯუარისა მონასტერი კუალად ჰყოს ქართველთა მამათა სამკვიდრებელად.
მაუწყებელ-არს საკვირველისა მის ღუაწლისა შენისა დიდებული მონასტერი ჯუარისაი იერუსალეიმსა, და ხმა მაღლად ჰქადაგებს რაი ლოცვათათვის შენთა მხურვალეთა, აწ ჩუენცა სიხარულითა მოვისწრაფით წმიდასა მას ტაძარსა, და ლოცვითა შეგვედრებთ ერსა ჩუენსა, განბნეულთა ყოველსა ქუეყანასა ზედა, და უფროის ისრაელსა შინა ცხორებულთა ქართველთა, რაითა უკუნ იქცენ სამშობლო ქუეყანასა და კეთილდღეობითა ცხოვნდებოდენ და მადლობდენ ღმერთსა, დამბადებელსა და შემოქმედსა ყოველთასა.
Премудростию Божественною дивно исполнен быв в жестоком оном подвизе настоятельства, с великими книжники Иоанном Двали, и Иоанном Черным, Михаилом, сыном Гвиргвина, и Гавриилом Сакварели, и иными подвижники не престал еси умножати богодухновенныя книги во славу Божию: Того молите, да умножит нам богомудрыя пастыри, учители и иноки, да, якоже ты, достойно служат святей Церкви и народу и хвалят силу Его.
Ныне веселися, народе грузинский, и празднуй, соборе верных, ибо милостию посети нас Христос Бог и дарова нам подвизавшихся в Крестной обители Иерусалимской отцев: якоже создателя и первейшаго игумена ея Прохора Грузина, тако и по нем — Луку Иерусалимскаго, Николая Двали, и вся мученики и преподобныя отцы наша, помощники в скорбех, утешение в печалех, врачи недугов и избавители от страстей.
Слава Отцу и Сыну и Святому Духу.
Богомудр явился еси, о великое светило грузин, и, отцы, по пространству Палестины расточенныя, собрав во обитель твою, единодушно подвизастеся и возвысисте венец правоисповедников; сего ради Церковь грузинская, яко сокровище многоценное, обрете тя и с радостию прия.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
— На стиховне стихира. (Глас 8).
Во Христовых заповедех поучаяся присно, день и нощь, умом чистым, любовию пасл еси стадо Его и учил еси хранитися от страстей: ныне и нас возстави подражати добродетелем твоим, отче блаженне, да бегаем злых обычаев и страстей.
Стих: Честна пред Господем смерть преподобных Его.
Быв добрый плод земли Иверския, в странствии сыновним усердием служил еси родному народу, иже ныне почитает тя отцем своим, преподобне Прохоре; и молим твоего ходатайства пред Богом, ибо не имамы ответа пред Ним, да избавит нас от грехов лютых и многообразных напастей.
Стих: Блажен муж, бояйся Господа, в заповедех Его восхощет зело.
Ангела земнаго и небеснаго человека вемы тя, о всеславне отче отцев, и сосуд избран Христа Бога; исполнив душу твою премудрости, яко источник живый и кладязь неоскудеваемый, источал еси учения Божественная ко возращению стада Христова.
Слава Отцу и Сыну и Святому Духу.
Мужественно понесл еси тяготу дне, данный талант умножил еси, о рабе благий и верный, и вшел еси в радость Господа твоего: ныне испроси нам от Него мирное сохранение миру, и утверждение православия, и возрождение народа нашего, и душам нашим милость.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, Всенепорочная, подающая всем прощение грехов, и наше моление ныне приими и испроси нам, да приимем от Него ходатайством Твоим прощение прегрешений и жизнь душам нашим, Нетленная.
Благочестия свещниче и Церкве утверждение, иноков похвало и учителю, богоносне Прохоре, Крестныя обители во Иерусалиме основателю, помяни нас пред Богом, да невредимы сохранит нас от напастей и сподобит нас Царствия Своего.
Слава Отцу и Сыну и Святому Духу.
Быв Божественных оных дел поспешник, преподобне Прохоре, яко светильник сиял еси на высоком свещнице настоятельства и всем образ был еси премудрости, смирения и богочестия: ныне и нам буди наставник жития и ходатай к Богу, да отвратит гнев, праведно на ны движимый грех ради наших, и избавит нас от невидимых и видимых врагов.
И ныне и присно и во веки веков. Аминь.
«Богородице Дево…» — единожды.
— «Бог Господь» (поется на 4-й глас).
— Тропарь 1. «Слава…»
— Тропарь 2. «И ныне…»
Богородичен воскресный отпустительный (по гласу тропаря):
Еже от века утаенное и ангелом несведомое таинство, Тобою, Богородице, сущим на земли явися Бог, в несливном соединении воплощаемь, и крест волею нас ради восприим, имже воскресив первозданнаго, спасе от смерти души наша.
По 1-м стихословии седален, глас 1:
Праздник радости возсия всем — память твоя, треблаженне отче Прохоре, и собрашася вкупе на похвалу дел твоих, и со священники вернии единодушно славим укрепившаго тя Господа; и ныне, имея дерзновение, моли Его помиловати души наша. (Дважды)
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
— По 2-м стихословии седален. (Глас 4).
Житие благочестно на земли скончал еси и явился еси правило иноков и светлое светило народа твоего: ныне возсияй в сердцах наших свет истинный, богоносне Прохоре, и ходатай буди всем празднующим святое имя твое. (Дважды)
Слава Отцу и Сыну и Святому Духу, и ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
Яко светильник на высоком свещнице сияя во Иерусалиме, присно молился еси к Богу, да утихнут нападения невидимых и видимых врагов от народа твоего: и ныне, якоже древле, сотвори милость о нас и моли Бога, да избавит нас от грехов лютых и многообразных напастей. (Дважды)
Слава Отцу и Сыну и Святому Духу, и ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Прокимен, глас 7
Честна пред Господем смерть преподобных Его.
Стих: «Что воздам Господеви о всех, яже воздаде ми?»
«Всякое дыхание…» Евангелие от Луки, глава 6, стих 17 (Во время оно ста Иисус…); конец — стих 23 (…мзда ваша многа на небесех…).
Ты иго Христово на выю твою взял еси, всеблаженне отче, и, премудро носяй крест твой, на святей оной земли создал еси обитель иверов, и, собирая в ней грузинских пустынников и богодухновенных отцев, возращал еси книжность грузинскую и был еси народу нашему, яко неоскудный источник благодати.
Канон Богородицы, на 6
ищи 28 сентября
Канон преподобнаго, на 8. Глас 1
Ирмос: Мановением Твоим, Боже, естества текущая стеною воздвигл еси и посреде их провел еси люди израильтяны посуху, и пояху песнь победную.
Прииде праздник святаго и блаженнаго Прохора и призывает люди воспети и восхвалити боголучезарныя оныя подвиги, яже соверши им Бог.
Святая память твоя, пресветлый отче, призывает нас украсити тя похвалами, и славим Бога, избравшаго тя сосудом избранным и органом, вмещающим благодати Его.
Несть праведно грузином забвение дел твоих, преподобне, но на всяко лето подобает нам совершати память твою достойно, якоже достоин еси, и просити отеческаго благословения.
Не может язык наш изрещи дел твоих, отче премудре, ибо паче силы нашея превзыде слава твоя; но приими от нас, недостойных, по силе пение и испроси нам от Бога оставление грехов наших.
Имея тя предстателя и ходатая пред Христом Богом, представи нас благости Его, да непоколебимо сохранит святую Церковь Свою от нападения врагов.
Слава Отцу и Сыну и Святому Духу.
Паче солнца сияющу Господу в сердце твоем, преподобне, благодать, от Него данную, умножил еси премудростию и непрестанно трудился еси во славу Его.
И ныне и присно и во веки веков. Аминь.
Владычице тварей, Создателя всех моли, да сохранит народ наш, егоже избра, и победу на враги и сопротивныя дарует ему, яко Всесильный.
Ирмос: Боже Спасе наш, всех Создателю, словом утвердивый небеса высокая со всею силою их, и Духом божественным утверди нас единством на камени веры.
Родився, святе, от благочестивых вельмож — Иоанна и Риануши — в Шавшети, во святыни воспиташа тя блаженнии родителие твои, славне, и научиша тя книгам Божественным и разумению Бога Вышняго.
От юности возлюбил еси чистоту, блаженне, и, исполнен страха Божия, благодать Его вселися в тя и сотвори тя сосуд избран и зрителя невидимых дел. Ныне испроси нам от Него оставление грехов и беззаконий наших, да сподобимся славы Его.
Ни во что же вменил еси сладости века сего и красоту мира; еще отроком отшел еси в обитель Цкаростави, идеже подвизашеся брат твой, и, учеником быв отцу Арсению, научашеся от него подвигу.
Зело преуспевающа тя духом, ученика себе прият великий отец наш Евфимий «Долгий», и оттоле напаялся еси от него, яко древо насажденное при исходищих вод Святаго Духа. Ныне и нас сподоби благодати Его, да даруется нам бодрость души и здравие тела.
Подвизаяся ко ангельскому подвигу, образ иноческий облеклся еси от учителя твоего и не престал еси славити Бога: Того моли, да покрыет нас от всякаго зла.
Слава Отцу и Сыну и Святому Духу.
Видяще тя духом непобедима и телом доблественна, рукоположиша тя во иерея, всеблаженне, и благоухание молитвы твоея, яко фимиам добрый, присно возношашеся пред Бога. Того моли ныне даровати оставление грехов любовию почитающим святую память твою.
И ныне и присно и во веки веков. Аминь.
Спасе наш Иисусе, молитвами Рождшия Тя мир миру даруй, и победу Крестом подаждь боголюбивому народу нашему на враги неверныя, и верныя сподоби прощения.
Приидите, о людие грузинстии, соборы отцев и лицы иноков со святители, богатии и убозии и всякаго возраста, да восхвалим создателя и первейшаго игумена Крестныя обители Иерусалимския, великаго Прохора Грузина, духовнаго наставника и отца народа нашего, да ходатай нам будет пред Богом, да вооружит нас силою Своею непобедимою и сохранит нас от напастей невидимых и видимых врагов.
Ирмос: Не Ангел, но Сам Господь, от Девы воплотивыйся Бог, пришел еси к нам и всецело спасл еси нас, вопиющих: слава силе Твоей.
Яко инок достойный, рукоположен быв во иерея, предал еси себе жесточайшему подвигу паче перваго: ныне и нас окропи росою благодати твоея, да сердце наше не будет хладно ко слышанию Божественных учений и ко пению Богу.
Егда учитель твой от Бога возжела бежати во святая места, был еси спутник добраго течения его, преподобне, и потекосте во Иерусалим, аможе настави Бог обоих, и подвизастеся подвигом безсмертия, благоугодным Богу.
Со учителем пришедшим вам во святый град, отче, прияша вас в лавре Саввы, идеже зело подвизастеся и не престаясте молитися и пети Богу: испроси нам от Него оставление грехов и беззаконий наших, да сподобимся славы Его.
В лавре той и церковь имеясте грузины, по завещанию Саввы, ибо любляше род наш Каппадокийский оный подвижник, и на языце грузинском совершасте богослужение.
Просияв делы иноческими, преподобне, от времене до времене подвизался еси и в пустыни, но никогдаже оставлял еси учителя и немощныя братии и служил еси им со смирением.
Слава Отцу и Сыну и Святому Духу.
Егда умножишася грузины в лавре, умыслил еси создати обитель на святей оной земли и собрати тамо пустынники и отцы, расточенныя по пространству Палестины, якоже древле святый царь Вахтанг Горгасал.
И ныне и присно и во веки веков. Аминь.
Истинная Мати Божия, моли Единороднаго Сына Твоего, да наставит нас в тихое пристанище и избавит от потопления грехов наших.
Ирмос: Дух спасения, Господи, иже зачаша в сердцах первии пророцы и родиша на земли, возвести нам пришествие Твое на землю в живот верных, и ныне просвещеннии песньми величаем Тя.
Ведый на западе от Иерусалима разоренную обитель Крестную, созданную Горгасалом на месте, купленном царем Мирианом, начал еси тамо основание собрания отцев благословением учителя твоего.
Помощник бысть тебе ко созданию обители, якоже царь наш Баграт, тако и мати его, царица Мариам, принесе тебе велие имение рукою Георгия Святогорца, егда посла его на поклонение святым местам во Иерусалим.
Егда сретостеся, два блаженнии святии отцы наши, на святей оной земли, тепле облобызастеся друг друга, и молил еси Георгия Святогорца прислати книги Божественныя, и ими обогатил еси обитель Крестную.
Прежде создав и украсив церковь иконами и святынями, пронесеся во всех множество добродетелей твоих, премудре, и начаша грузины приходити и умножатися; и совершасте богослужение на языце грузинском.
Быв пастырь словеснаго оного стада, блаженне, премудро управлял еси обителию и уставил еси чин и правило подобно святей лавре Саввы. Ныне и нам даруй премудрость различати благое и злое.
Слава Отцу и Сыну и Святому Духу.
Веселится народ наш, преподобне отче Прохоре, и воспоминает дивный оный подвиг твой; силы же небесныя невидимо поют усердно, и полк иноков радуется, хвалящийся трудами твоими, в пустыни совершенными,
И ныне и присно и во веки веков. Аминь.
Небо и земля просветишася тобою, Неневестная Мати Иисусова, ибо возсияла еси нам Свет неугасимый, Бога всех, Иже во тьме заключенныя избави и Небеснаго Царствия жители яви нас.
Ирмос: Погружен волнами искушений мира сего, с корабля греховнаго впад и зверю душегубному вержен, вопию Ти: якоже Иону избавил еси от тления и смерти, тако избави и мене, Христе.
Быв пастырь стада Христова, воспитал еси их ведением, и от греческаго языка преводисте Божественная писания и новая твористе во славу Божию: Того молите ныне, да ниспослет на нас благодать Свою и просветит ум наш познанием истины Своея.
Радовашеся достойно полк иноков и верных о тебе, святе, егда создал еси дом странноприимный и велий покой стяжал еси поклонником Иерусалима, избавив их от безчисленных сетей и скорбей.
Дар служения и рассуждения духов имея от Бога, был еси отец многих душ и добрый хранитель чина иноческаго, и присно молился еси о иверех и о благом преуспеянии их.
Быв пастырь добрый, молитвенник к Богу о народе твоем и стаде, ныне и нас представи Богу, да умножит нам богодухновенныя отцы и наставники во избавление от всякия прелести.
Тщаливый быв благоугождати Богу, присно жительствовал еси в чистоте плоти и в незлобии сердца: ныне и нам помози пред Ним, иже память твою совершаем, богоносне, и испроси нам избавление от злых обычаев и страстей.
«Слава Отцу и Сыну и Святому Духу»
Быв добрый плод земли Иверския, в странствии сыновним усердием служил еси родному народу, иже ныне почитает тя отцем своим, святе Прохоре; и молим твоего ходатайства пред Богом, да избавит нас от всех прегрешений и беззаконий.
И ныне и присно и во веки веков. Аминь.
Предзнаменова таинство твое, Дево, древле кивот закона, приемый божественная писания, и стамна златая, вместилище манны, и жезл.
Наставник быв тебе безмерная любы к Богу и народу твоему, преподобне Прохоре Грузине, великим трудом и помощию царей наших вселил еси обитель на святей оной земли, и двери ея, вместо Едема, яко рай отверз еси роду твоему, и явился еси правило иноков и светлое светило Грузии.
ღმრთისა მიერ გამოირჩიე რაი აღშენებად წმიდისა სავანისა ქართუელთათვის იერუსალეიმსა შინა, ადგილსა მას წმიდასა, სადა იგი მოკვეთილ იქნა ხეი პატიოსანი, რომლისა მიერ შექმნეს ჯუარი ქრისტეს ვნებისაი, ყოვლითურთ განასრულე მეფეთა ჩუენთა შეწევნითა, და შეჰკრიბე მას შინა ღმრთივსულიერნი მამანი და მეცნიერნი ძმანი, და ერთობითა აღაორძინებდით მწიგნობრობასა ქართულსა. აწ შეგვაწყნარე ღმერთსა, ეკლესიაი თვისი დაიცვას, და ვიდრე აღსრულებადმდე საუკუნისა დაიფაროს ივერიაი და მკვიდრნი მისნი ყოვლისაგან ბოროტისა, აღმოგვიყვანოს უფსკრულთაგან ცოდვათაისა, და ლავრაი ეგე შენი უკუნ სცეს კუალად თვისტომთა შენთა, რაითა სიხარულითა ღაღადვჰყოთ: „იერუსალეიმის ჯუარისა მონასტერი ქართუელთა ძმათა სამკვიდრებელია“.
Ирмос: Отроцы в Вавилоне в пещи росою свыше орошени, к Богу вопияху и глаголаху: благословен еси, Господи отец наших, Боже, во веки.
Паче солнца сияют дела твоя, паче же скорби и труды, яже подъял еси Христа Бога ради, и ныне вселился еси со всеми святыми пред Ним.
Премудро настоятельствуя над братиею, богоносне отче, в старость глубоку достигл еси и изнемогл еси и всю власть над стадом твоим предал еси Георгию, ученику твоему.
Возжелав безмолвнаго жития, с двема верными братиями отшел еси в пустыню близ горы Нево и, в кротости и посте пребывая, непрестанно молился еси.
Пастыря овец обретаем тя и добре подвизающагося молитвенника, и бесов, тобою низложенных, видим, Прохоре, красото Иерусалимская, дивный, святою молитвою твоею ходатаю наш и заступниче.
Слава Отцу и Сыну и Святому Духу.
Был еси светильник светлый подвизавшимся в Палестине грузином и, яко столп света, народу твоему, жребию Богородицы; пребывая на святей земли, возращал еси всякое дело грузинское, и нарицаху тя наставником.
И ныне и присно и во веки веков. Аминь.
Радуйся, дщи Адамова, радуйся, Невесто Божия, вместившая Создателя Твоего; избави и нас от напастей вражиих и сподоби нас воспевати Тебе: благословен еси, Господи Боже отец наших, во веки.
Ирмос: Купина в Синаи несгораемая Бога яви гугнивому и косноязычному Моисею, и ревность божественная отроки от пещи избави, и в песни вопияху: вся дела, благословите днесь Бога и Господа, пойте и превозносите Его во веки.
Велие есть смирение твое, преподобне, и паче того благодать, ибо себе нарицал еси нищим и зело грешным рабом Божиим и никогдаже оставлял еси молитвы, поста и рукоделия, и вопиял еси: вся дела, благословите днесь Бога и Господа, пойте и превозносите Его во веки.
Присно зря очима душевныма на высоте живущаго Бога единаго, преподобне Прохоре, молил еси о оставлении грехов, о укреплении братии и о избавлении от всех скорбей святыя оныя земли и народа твоего: ныне и нам помози, да избавит нас от страстей душевных и телесных.
Зело просия подвиг твой, якоже в Палестине и Иверии, тако и во всей земли; и, видяще ангельское оное жительство твое, зело радовахуся грузины и вопияху: вся дела, благословите днесь Бога и Господа, пойте и превозносите Его во веки.
Приспевшу времени кончины твоея, отче, благословил еси стадо и народ твой Богу предал еси: ныне и нам буди поручитель и ходатай к Нему и облегчитель тяготы грехов наших, да во благоденствии живем и хвалим благость Его.
Во святыни прешед житие, яко ангел Божий, молился еси к Нему, да утихнут возстания злаго от стада твоего: ныне и нас представи благости Его, да от всех находящих недугов, скорбей и теснот избавит нас ходатайством твоим.
Слава Отцу и Сыну и Святому Духу.
Молитвою очищен и трудом изнурен, в мире предал еси душу твою Господу; тогда приидоша лицы ангельстии и возведоша тя пред Бога. Того моли ныне, всеблаженне Прохоре, да сохранит нас, поминающих тя, от всех скорбей и печалей.
И ныне и присно и во веки веков. Аминь.
Трие отроцы в Вавилоне в пещи Троице поклонишася и образ златый презреша, и, росою окропляеми, песнию вопияху: вся дела, благословите днесь Бога и Господа, пойте и превозносите Его во веки.
Хвалим, благословим, покланяемся Господеви, поюще и превозносяще Его во вся веки.
Ирмос: Неискусобрачная, нетления хранительница, Слово Творца в естество облекла еси. Прииди, Пречистая Дево Богородице, с рожденным от тебе научи верныя, да сподобимся славити тя.
О множества трудов твоих, всеблаженне Прохоре, имиже радуешися пред Богом, преселившим тя в небесныя обители и даровавшим тебе благодать помощи! Ныне и нас не забуди множества ради грехов, богоносне, и удали нас от всех дел беззакония.
Аще и гроб покры тя, блаженне, честь святыни ниже смертию отступи от тебе, ибо с верою к тебе прибегающим подавал еси благодати и исцеления: ныне и нам помози к Богу, да покрыет нас от сетей лукаваго.
С небесе призри, отче, на собравшияся сия и с любовию празднующия святую сию память твою, преподобне Прохоре, и моли о нас Господа, да дарует сердцем нашим чистоту и сокрушение и сподобит нас хвалити тя.
С тобою воспоминаем, преподобне отче Прохоре, не токмо Николая Двали и Луку Иерусалимскаго, но и в Крестней обители подвизавшихся преподобных отцев наших, к небесному святому лику грузин причтенных, и славим Бога.
Зело просия подвиг ваш, о благодатнии отцы Иерусалимстии, и пронесеся по земли нашей; се, ныне призрите милостиво на поющия память вашу и молящия вас: покрыйте нас от грехов и немощей.
Слава Отцу и Сыну и Святому Духу.
Безмерная милость, и превысшая сладость, и смирение быша вам наставницы на пути Царствия: ныне совершающим память вашу испросите, о преподобнии отцы наши Иерусалимстии, оставление согрешений, яко предстояще Богу.
И ныне и присно и во веки веков. Аминь.
Ветхий закон предызображает Тя, Дево Святая, и новый исповедует Тя Богородицею, Неневестная, и мы, вернии, с верою глаголем: Мати Слова, не престай моляще Бога о уповающих на Тя.
Достойно есть яко воистинну блажити тя, Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Присно просвещен быв бодрствованием, всеблаженне Прохоре, многих призывал еси к покаянию и светом оным Божественным, славне, просвещал еси сердца их, да познают Бога единаго, освобождающаго их от грехов. (Дважды)
Ублажаем тя, преподобне отче Георгие-Прохоре, и почитаем святую память твою, ибо подвигом твоим возрасти собрание грузин во Иерусалиме; премудро водил еси стадо твое, и Богу предавасте народ грузинский.
Прииде праздник твой, яко заря светлая, и веселит сердце верных; ныне и мы хвалим дела твоя, преподобне отче Прохоре, и похвалами духовными украшаем боголучезарное житие твое, ибо слово изнемогает и ум изумевается трудов, скорбей и подвигов твоих, и славим укрепившаго тя Христа.
Хвалятся днесь от христолюбцев Божественныя добродетели твоя: чистота, кротость, и смирение и трудолюбие дивное, святе, треблаженне отче Прохоре; и, мужественни быв подвигом твоим, молим тя: не престай ходатайствовати пред Богом о уповающих на тя, да дарует всем христолюбивым грузином победу на бесы и на вся козни их.
Во Христовых заповедех поучаяся присно, преподобне отче Прохоре, день и нощь, умом чистым, любовию пасл еси стадо Его и учил еси всех пещися о душе своей милостынею, постом и молитвою: и о нас ныне моли человеколюбиваго Бога, да умножит нам истинныя наставники и отцы во оставление грехов и во избавление от всякия печали и прелести.
Церковь Иверская с чады своими светло украшается множеством подвигов ваших; ныне и мы припадаем ко святым иконам вашим, преподобнии отцы Иерусалимстии, и, мужественни быв подвигом вашим, молим вас, яко славных ходатаев и врачей уповающих на вы: избавите нас от страстей душевных и телесных и исполните нас Божественныя ревности.
Твердость веры показал еси, о преподобне отче наш Прохоре, и, во святыни служа Богу, яко злато, очищен был еси в горнилех напастей; сего ради с любовию лобызаем святыя иконы твоя и молим тя, яко любящаго отца нашего, да покрыеши нас от обстоящих лютых скорбей и прелестей.
აღაშენე რაი სავანეი ნათესავისა შენისათვის ცხოველსმყოფელისა ჯუარისა ადგილსა, აღავსე მოღუაწეთა მიერ და მამათა და ჰყავ იგი ერისა ჩუენისათვის წყაროდ მადლისა და სულიერებისა, ამისთვისცა ვმწუხარებთ დაკარგვისათვის საუნჯისა მის ჩუენისა და გევედრებით: კეთილმსახურებრითა კადნიერებითა შენითა შეგვეწიე, რაითა ვძლოთ ყოველი დაბრკოლებაი, აღძრული წინააღმდგომთაგან დამკვიდრებისათვის მამათა ჩუენთა მოწესეთა სავანესა მას შენსა, წარსამართებელად სულიერისა ცხორებისა ჩუენისა, და სადიდებელად ღმრთისა.
Много время сияше славная икона твоя, с иконою Луки Иерусалимскаго, на стене храма, но изсечены быша и продани в чужую землю; Божиим же промыслом возвестися о сем Патриарху нашему, и, благословением его искуплены быв, дарованы быша Светицховели. Се, ныне и мы припадаем к славной оной иконе вашей и молим вас: ходатайствуйте о нас пред Царем Небесным во оставление грехов и во избавление от мучительства и прелести антихристовы.
Слава Отцу и Сыну и Святому Духу.
Быв возлюблен от всех законности ради и смирения твоего, паче подобает нам, преподобне отче Прохоре, всем поведати сия дивная дела твоя и славити Бога, даровавшаго таковаго попечительнаго отца и дивнаго подвижника подвизавшимся в Палестине грузином: ныне и о нас моли Бога даровати оставление грехов празднующим святую память твою и ходатай буди ниспослати Церквам единство, мир и велию милость.
И ныне и присно и во веки веков. Аминь.
Богородичен
…
Славословие великое и отпуст.
На литургии: на блаженных от канона преподобнаго песнь 3-я и 6-я.
Прокимен, глас 7: Честна пред Господем смерть преподобных Его.
Стих: «Что воздам Господеви о всех, яже воздаде ми?»
Апостол: 1 Коринфяном, глава 12, стих 7 (Братие, коемуждо же нас…); конец — стих 12 (…разделяя властию коемуждо, якоже хощет…).
Аллилуиа, глас 6: Блажен муж, бояйся Господа.
Стих: Сильно на земли будет семя его.
Евангелие от Матфея, глава 11, стих 27 («Рече Господь Своим учеником…»); конец — глава 12, стих 1 («…бремя Мое легко»).
Причастен: В память вечную…
Составила Тинатин Мчедлишвили
Посвящаю почившим членам семьи моей — псаломщице Тамаре, Шалве, Наталии, Михаилу и Кетеван.
