Праздничное последование преподобному отцу нашему Серафиму Саровскому чудотворцу, месяца января во 2 (15) день; обретение мощей июля 19 (1/IX)
На малой вечерни
На «Господи, воззвах», глас 4
Во день сей народ христианский хвалебным пением украшает тя, земнаго ангела и небеснаго человека, и тепле воспевает ти: о блаженне отче Серафиме, велия похвало постников, моли Бога о нас, с любовию совершающих святую и честную память твою.
Девства и кротости от юности любителю, святый Серафиме Саровский, чистотою ума и сердца любве Христовы обретателю и к Нему приближивыйся, Того моли ныне, блаженне, да избавит нас от скорбей наших, с верою празднующих память твою.
Во день сей собор верных Христовых покланяется святым мощем твоим, всехвальне отче Серафиме, и, исполнен радости, ублажает тя и молит тя, да подаси здравие души и исцеление тела с верою приступающему к святыни твоей.
Радуйтеся, жителие Сарова, яко тамо возсия новое светило, наставник и учитель, просветитель земли Российския; ныне веселися и радуйся и ты, Церкве Христова, яко им многим радость подаваше и празднующих во храме укрепляше, темже венец духовных цветов сплетаху и с Давидом вопияху: честна пред Господем смерть преподобных Его.
Слава, глас 6
Хвалится ныне земля Российская и веселится святая обитель Саровская, безчисленное же множество поклонников течет днесь в Дивеевскую женскую обитель, да возвеличат великое украшение России, отца и учителя Божественныя премудрости, во многих душах насадителя благонравия и грехолюбивым человеком учителя сладости воздержания, велиаровых умышлений сокрушителя и скораго врача всех недужных; сего ради уповающии на тя и любящии тя вопием ти: молитвами твоими спаси нас, преподобне Серафиме, Саровский чудотворче!
На стиховне, глас 1
Сила благодати от юности покрываше тя, всехвальне Серафиме, ибо, упадша с высоты, Господь дивно сохрани тя; болезнию же изнемогшу явися тебе Сама Царица небесе и земли и дарова ти исцеление; мати же твоя, видящи стремление твое ко иночеству, уразуме святую Божественную волю Господню и благослови тя на тесный путь иночества святым своим крестом.
Честна пред Господем смерть преподобных Его.
Изшед из града твоего, преподобне Серафиме, достигл еси Киева поклонитися святыням Печерским и приял еси повеление из уст преподобнаго Досифея: «Иди в Саровскую пустынь», яко прозре благодать Божию на тебе.
Блажен муж, бояйся Господа, в заповедех Его восхощет зело.
Оставив мир, подобно Иоанну Крестителю, вселился еси в Саровскую обитель, блаженне, и вся дни твоя провождал еси в молитве, посте и бдении; изшед же в пустынное оное место, преподобне, тамо исполнился еси духовныя премудрости и, взошед на высоту добродетелей, был еси храм Святаго Духа. И ныне оживотвори душу мою, от грехов умерщвленную, и просвети сердце и ум уповающаго на тя.
Слава…
В совершении иноческаго подвига, преподобне Серафиме, непрестанною молитвою и псалмопением отгоняя диавольская прелщения, угашал еси лютыя его сети и удивлял еси братию терпением и любовию; и ныне не престани о нас всех, во еже избавитися от обстоящих нас напастей и от всякаго соблазна.
И ныне, Богородичен.
Поем «Блажен муж», 1-й антифон.
На «Господи, воззвах» стихиры
на 8, глас 5.
Преподобному Серафиму.
О преславнаго чудесе! Егда добрый подвижник-молитвенник явися в Саровской пустыни, Серафим, великий чудотворец, послан бысть нам — теплый молитвенник пред Богом; радуйся ныне, Дивеевская обителе, сокровище имущая святых мощей преподобнаго; радуйтеся, благовернии, требующии помощи его, яко избавляет нас от скорбей, и тому возопиим: радуйся, светильниче доброты, иже тьму отгнал еси; моли Бога, да подаст мирови мир и душам нашим велию милость.
О преславнаго чудесе! Воистину добрый подвижник и столп непоколебимый, блаженный Серафим, вселився в Саровскую обитель, тамо премудро верных собра и возведе на духовную высоту; мы же тому преподобному припадаем, да молит Бога, да подаст мирови мир и душам нашим велию милость.
Дивна суть таинства Твоя, Христе Боже, яко послал еси нам светильника пламенна, преподобнаго Серафима, хранителя и покровителя верных людей, старца и молитвенника о православных христианех и славу и утверждение святыя сея обители; сего ради вопием Ти, Господи: даруй мирови мир и душам нашим велию милость.
Егда пришел еси, преподобне, в Саровскую пустынь, абие своея воли отвергся еси и всем показывал еси твердое послушание, яко с радостию терпел еси скорбь и уныние, и биения и раны от злых человек терпел еси, и о них же молился еси достойно; мы же, прославляющии честную память твою, вопием ти: отче, моли Бога, да подаст мирови мир и душам нашим велию милость.
Обитель твоя зело прославляется и хвалится трудами твоими, уповающии же на тя, почитающии святыя мощи твоя и зрящии безчисленная чудеса, тобою совершаемая, славят прославившаго тя Господа; Того моли ныне, преподобне Серафиме, да подаст мирови мир и душам нашим велию милость.
Блаженни суть живущии во обители твоей, преподобне отче, даров многих сокровище и сосуде, хранящий девственную чистоту, благодати пристанище, исцелений источниче, недужных безмездный врачу, истинных постников помощниче и печальных утешителю, возмущенным страстьми мира сего тихое пристанище: помолися, всеблаженне, о нас, совершающих честную память твою, да подаст Бог мирови мир и душам нашим велию милость.
Во день памяти твоея радуются лики и соборы православных, богоносне отче Серафиме, иже гласом велиим вопиют ти: любве ради Христовы оставил еси красоту мира и, вселився в Саровскую пустынь, подвигом жестоким страсти умертвил еси и ни во чтоже вменил еси сопротивление злых; и ныне моли Бога, да подаст мирови мир и душам нашим велию милость.
Приидите, вернии, и хвалебным пением дивнаго отца возвеличим и единогласно возопиим: преподобне отче Серафиме, иже Божественному житию воистину приобщился еси и подвиг подвижнический с молитвою и богословием растворил еси, непорочное же житие твое, яко жертву святую, духом очищенным Христу принесл еси и от Него приял еси венец нетленныя оныя славы; Того моли ныне, преподобне, да подаст мирови мир и душам нашим велию милость.
Слава, глас 8:
Звездо пустыни, сияние Божественныя любве и просветителю иноков, столпе непоколебимый терпения, утверждение и древо Церкве, светильниче всесветлый и светило всего мира, сокровище добродетелей, хвалим тя, богоносне отче, блаженне Серафиме, иже просветил еси дни твоя в пустыни крепким подвигом, имже приближился еси к сиянию Божественному, и оставление безчисленных грехов наших испроси от Христа празднующим память твою и велию милость.
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим.
На входе прокимен дне
Паремии — чтения преподобному.
Премудрости Соломони чтение. Глава 3 (1–9)
А души праведных в руке Божией, и мучение не коснется их. В глазах неразумных они казались умершими, и исход их считался погибелью, и отшествие от нас – уничтожением; но они пребывают в мире. Ибо, хотя они в глазах людей и наказываются, но надежда их полна бессмертия. И немного наказанные, они будут много облагодетельствованы, потому что Бог испытал их и нашел их достойными Его. Он испытал их как золото в горниле и принял их как жертву всесовершенную. Во время воздаяния им они воссияют как искры, бегущие по стеблю. Будут судить племена и владычествовать над народами, а над ними будет Господь царствовать во веки. Надеющиеся на Него познают истину, и верные в любви пребудут у Него; ибо благодать и милость со святыми Его и промышление об избранных Его.
Премудрости Соломони чтение.
Глава 5 (16–24); глава 7
А праведники живут во веки; награда их – в Господе, и попечение о них – у Вышнего. Посему они получат царство славы и венец красоты от руки Господа, ибо Он покроет их десницею и защитит их мышцею. Он возьмет всеоружие – ревность Свою, и тварь вооружит к отмщению врагам; облечется в броню – в правду, и возложит на Себя шлем – нелицеприятный суд; возьмет непобедимый щит – святость; строгий гнев Он изострит, как меч, и мир ополчится с Ним против безумцев. Понесутся меткие стрелы молний и из облаков, как из туго натянутого лука, полетят в цель. И, как из каменометного орудия, с яростью посыплется град; вознегодует на них вода морская и реки свирепо потопят их; восстанет против них дух силы и, как вихрь, развеет их. Так беззаконие опустошит всю землю, и злодеяние ниспровергнет престолы сильных. Итак, слушайте, цари, и разумейте, научитесь, судьи концов земли! Внимайте, обладатели множества и гордящиеся пред народами! От Господа дана вам держава и сила — от Вышняго. Желание ваше, о люди, да будет к премудрости; возжелайте научиться, ибо начало ее — любовь и соблюдение закона. Почтите премудрость, чтобы вам царствовать вовек.
Премудрости Соломони чтение.
Глава 4 (7–15)
А праведник, если и рановременно умрет, будет в покое, ибо не в долговечности честная старость и не числом лет измеряется: мудрость есть седина для людей, и беспорочная жизнь – возраст старости. Как благоугодивший Богу, он возлюблен, и, как живший посреди грешников, преставлен, восхищен, чтобы злоба не изменила разума его, или коварство не прельстило души его. Ибо упражнение в нечестии помрачает доброе, и волнение похоти развращает ум незлобивый. Достигнув совершенства в короткое время, он исполнил долгие лета; ибо душа его была угодна Господу, потому и ускорил он из среды нечестия. А люди видели это и не поняли, даже и не подумали о том, что благодать и милость со святыми Его и промышление об избранных Его.
На литии стихира храма, таже преподобнаго Серафима, глас 1
Каким венцем славы облечем великаго подвижника, преподобнаго Серафима? Он бо есть учитель благий, твердостию веры и благочестием явленный, иже богодухновенному учению и апостольскому житию учаше всех к нему притекающих и души безчисленны воздвизаше к подражанию ему; сего ради вопием ему: моли, преподобне, Христа Бога, да утвердит православие и спасет души наша.
Приидите, старцу иноку хвалу вознесем и честно возвеличим, иже есть истинный ученик Спасов, красоты мирския оставитель, иго Христово на рамена своя вземый и бесов сокрушитель; тому возопиим: не забуди нас, преподобне Серафиме, совершающих святую память твою.
Великим оным отцем, постом и подвигом просиявшим, ревнитель был еси, преподобне, и вся дни жития твоего провождал еси в молитве, слезах и бдении, и, пустыню праздную плодовиту сотворив напоением слез твоих, просвещен сиянием благодатей духовных, яко столп огненный, разсекл еси моря напастей, всеблаженне Серафиме, и, совершив течение твое, благодать чудес в дар приял еси во исцеление недугов с верою почитающих тя.
ვნატრით ღმრთეებრივსა და ნათელსა ჴსენებასა შენსა, ღმერთშემოსილო სერაფიმე, რამეთუ ყოველნი განაკჳრვე, ოდეს ვითარცა უჴორცომან, ხილულნი და უხილავნი მტერნი შენნი არცხვინე და დაამჴუე სილაღჱ ღმრთისმებრძოლთაჲ, ამისთჳსცა იქებიან მხარჱ იგი ტამბოვისაჲ და წმიდაჲ სავანჱ საროვისაჲ და იქადის დივეევოს დედათა სავანჱ წმიდათა ნაწილთათჳს შენთა, რომლისა მიერ სიმრთელჱ მიეცემის ყოველთა რწმენით შენდამი მოლტოლვილთა, და შენ მიერ განათლებულნი, გიღაღადებთ შენ, ნეტარო, აწ დაშრიტე ერსა ჩუენსა ზედა აღძრულნი უკეთურთა ზრახვანი და მწვალებელთა ენანი მოაუძლურენ ძალითა ქრისტჱსითა.
Слава…, глас 5
გიხაროდენ, ნეტარო სერაფიმე, რომელმან იღუაწე სადიდებლად ღმრთისა, ერსა შენსა ანდერძად მიეც დამარხვაჲ ჭეშმარიტისა რწმენისაჲ, და სიყუარული ღმრთისმშობლისა წილხვედრისა ერისა და ქუეყანისაჲ, ამისთჳსცა ევედრე ქრისტესა ღმერთსა, ორნივე ესე მართლმორწმუნენი ერნი აღგვძრას ბილწთა მათ მძლავრთა ბრძოლად და ბოროტთა განზრახვათა მათთა წინააღმდგომად, რაჲთა რომელნი ესე ჴორცითა და სისხლითა თჳსითა მოგჳყიდნა, სიყუარულითა და მშჳდობით ვცხონდებოდეთ და ვაქებდეთ მას დაუცხრომელად.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
На стиховне стихиры, глас 5
Сила Вышняго от юности покрываше тя, блаженне Серафиме, и, упадша с высоты, невредима сохрани тя; болезнию же изнемогшу явися тебе Сама Царица небесе и земли и дарова ти исцеление; ты же от мятежей мира сего бежал еси любве ради Божия и, изшед из града твоего, пришел еси во град Киев поклонитися святыням Печерским и из уст преподобнаго Досифея приял еси повеление: «Иди в Саровскую пустынь».
Стих: Честна пред Господем смерть преподобных Его.
Стремяся к ангельскому подвигу, оставил еси мир, подобно Иоанну Крестителю, и, вселився в Саровскую обитель, духовно жительствовал еси и едино попечение имел еси, святе, да угодиши Богу; и ныне ходатай буди пред Ним, да сохранит православныя народы от сетей сатаниных и избавит уповающих на тя от суетных смятений и злых напастей.
Стих: Блажен муж, бояйся Господа, в заповедех Его восхощет зело.
Облекшися во образ иноческий, вселился еси в пустыню уединенную и непрестанною молитвою отгонял еси диавольская прелщения, и чтением и пением Евангелия угашал еси лютыя его сети; видящии же и слышащии святое житие твое зело удивишася и прославиша Бога, дивнаго во святых Своих.
Слава Отцу и Сыну и Святому Духу.
Ныне кто изочтет подвиг твой дивный и тесноту, или кто изречет жестокое житие твое пустынное, пост и затвор, уст безмолвие и присную молитву и бдение? Воистину явился еси постников украшение и непостыдный молитвенник к Богу; сего ради вопием ти: радуйся, святаго жития насадителю; радуйся, печальных и скорбящих велие утешение, Серафиме, всех уповающих на тя теплый покровителю; ходатай буди пред Богом, преподобне, да отженет от нас враги истины, возставшия на ны, и избавит нас от междоусобныя брани и измены.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам благодать и милость.
На благословении хлебов тропарь преподобнаго Серафима Саровскаго дважды и «Богородице Дево» единожды.
От юности возлюбил еси Бога и Тому единому служил еси желанием пламенным, пустыню праздную возделал еси непрестанною молитвою и подвигом, и любовь Христову сердцем сокрушенным восхитил еси, пением же уподобился еси небесному серафиму, к тебе с любовию прибегающим премилостивый, и явился еси возлюбленный избранник Матере Божия; сего ради воспеваем ти: спаси нас молитвами твоими, радосте наша, теплый к Богу ходатаю, блаженне Серафиме!
არა ვითარცა მრისხანე სერაფიმი ჴრმლითა ცეცხლოვანითა, არამედ ვითარ სასოებითა და ნუგეშინისცემით აღსავსე მდაბალი ბერი, ესრეთ მოხვალ ჩუენდა და შეგვეწევი, მჴურვალეო მეოხო ჩუენო, ტკბილო მამაო სერაფიმე, განწმედილითა გულითა ბოროტ სულთა შემმუსრველო, სასოებასა ჩუენსა დავდებთ შენზედა და გვრწამს, ვითარმედ ერი შენი მარადის მართლსარწმუნოებასა ზედა დამტკიცნების, ხოლო შენ მიერ შეყუარებულისა დედისა ღმრთისა წილხდომილი ქუეყანაჲ ჩუენი ივერიაჲ, აწ დაცემული და ვიდრე ჟამადმდე დამდაბლებული, წმიდითა ლოცვითა შენითა ლაზარესაებრ აღდგების და წინაჲსწარმეტყუელებაჲ შენი აღსრულდების: რამეთუ სთქუ: „მზაკუვარი იგი ანტიქრისტჱ ივერიასა შინა ვერცაღა გამეფდების, ხოლო ქუეყანაჲ ესე უკანაჲსკნელსა ჟამსა მას განბრწყინდების, და ტრაპეზსა ზედა უფლისასა ღჳნოჲ მიერითგან იქმნების“.
Пустыни гражданин, и во плоти ангел, и чудотворец явился еси, богоносне отче, святе Серафиме; поста, бдения и молитвы благодать с небесе стяжал еси и исцеляеши недужных недуги и души, с верою к тебе прибегающих. Слава Давшему тебе крепость, слава Венчавшему тя, слава Действующему тобою всем чудеса.
Богородице умиленно припадем, грехми уязвлении, облобызаем чудотворную икону Ея, «Умиление» нарицаемую, и умиленно воспоем: Владычице, приими молитвы недостойных раб твоих и даруй нам, молящим тя, велию милость.
На утрени «Бог Господь»
Тропарь преподобнаго.
Слава Отцу и Сыну и Святому Духу.
Ин тропарь
И ныне и присно и во веки веков. Аминь.
Еже от века утаенное и ангелом несведомое таинство, Богородице, тобою сущим на земли явися: Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
По 1-м стихословии седален, глас 4
Силою животворящаго Креста и молитвою теплою разгнав лукаваго прелести, постом и бдением угодил еси Господу и сподобился еси во храме со ангелы и архангелы видения Христа Бога; ныне же на небеси паки блаженствуеши таковым видением и слышиши сладкогласное пение ангельских чинов; помолися ныне о нас пред Богом, да отверзет очи душевныя, грехами ослепленныя, и сердца огрубелыя подвигнет ко пению и славе Его. (Дважды)
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
По 2-м стихословии седален, глас 1
На камени многия дни коленопреклоняяся, руце воздевал еси ко Господу, святый старче, и, молитвою и бдением благодать Святаго Духа от Спаса стяжав, исцелил еси телесе недужныя и просветил еси души верных и кротких; сего ради вопием ти, преподобне: моли Христа Бога, да отженет всякое буйство и гордыню от помраченнаго ума моего и народ наш, Христовым именем нарицаемый, избавит от бесовских сетей и от прелести и соблазна антихристова.
(Дважды).
Слава Отцу и Сыну и Святому Духу, и ныне и присно и во веки веков. Аминь.
Матерь Божию молим вси воистину и призываем милость Ея, иже с любовию прибегаем ко иконам Ея, и надеемся на Ню, яко на Покровительницу милосердую, и в напастех Ея ради стяжаваем спасение и жизнь.
Величание: Ублажаем тя, чудотворче, преподобне отче Серафиме, и чтим святую память твою, наставниче монахов и собеседниче ангелов.
По величании седален, глас 7
Возсия житие твое, добре подвизавшееся, в земли Российстей, и от всех прославляешися хвалебным пением, яко на колесницу благочестия взошел еси, якоже Илия, и егда духовно вознеслся еси на небеса, тамо возложен бысть на тя светлый венец правды; сего ради благодарственно вопием ти, блаженне Серафиме: моли Христа Бога, да иконами твоими ниспослет мне росу благодати твоея и даст ми премудрость различения добра и зла и силу прощения.
(Дважды).
Слава Отцу и Сыну и Святому Духу, и ныне и присно и во веки веков. Аминь.
Стено необоримая христианом, Богородице Дево, иже прежде согрешихом, ныне же на тя надеющиися и уповающии невредими пребываем, милостивая, благодарственно вопием ти: радуйся, всех нас радосте радостотворная!
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Прокимен, глас 4
Честна пред Господем смерть преподобных Его.
Стих: Что воздам Господеви о всех, яже воздаде ми?
Всякое дыхание…
Евангелие от Матфея, зачало 10 (4, 25 — 5, 12).
По 50-м псалме:
Во день сей духовнаго торжества верных, во праздник преподобнаго отца, иже добре радуется, ныне тому возопиим: радуйся, преподобне Серафиме, небесный человече и земный ангеле; радуйся, многих на пути спасения поставивый; радуйся, праведных славо и рода российскаго утвердителю; ходатай буди пред Богом, да сохранит православныя народы от сетей сатаниных и от нашествия иноплеменник и дарует нам мир и милость.
Канон Богородицы, на 6
ищи 28 сентября
Канон преподобнаго, на 8, глас 6
Ирмос: Невредимо море прошед Израиль, яко землю пространную, и гонителя фараона виде потопляема безднами, и победную песнь Тебе, Боже, пояше.
Преподобне отче Серафиме, моли Бога о нас.
Господи, отверзи недостойная моя устне и даждь ми слово разумно, да с радостию восхвалю и достойно украшу преподобнаго Серафима, яко дивнаго чудотворца.
Преподобне отче Серафиме, моли Бога о нас.
Во время юности изнемогл еси, и ничтоже пользова тебе усердие врачев, но мати твоя поручи тя Богородице, и, явльшися, светлоодеянная Царица исцели тя и избави от болезней.
Преподобне отче Серафиме, моли Бога о нас.
От юности твоея непорочное житие твое, яко жертву святую, принесл еси Христу, желая же спасения души твоея, вселился еси в Саровскую пустынь и вступил еси в подвиг зело трудный и жестокий.
Слава Отцу и Сыну и Святому Духу.
Любовь, смирение и кротость, молитву и бдение и веру твердую с надеждою стяжал еси, со всем ликом добродетелей, и, взошед на верх совершенства, образ благий был еси единоплеменником твоим.
И ныне и присно и во веки веков. Аминь.
Богородичен: Преблагая Владычице, Преблагаго Бога плотию Родшая, очисти сердце мое, страстьми огрубелое, да с верою и любовию величаем тя.
Ирмос: Воду прошед яко сушу и египетскаго зла избежав, израильтянин вопияше: Избавителю и Богу нашему поим.
Преподобне отче Серафиме, моли Бога о нас.
Мраз нощный и зной дневный един претерпел еси в пустыни и был еси храм Божия Слова; достигнув же небеснаго Иерусалима, молишися о нас единому Человеколюбцу.
Преподобне отче Серафиме, моли Бога о нас.
Возсылая моления ко Богородице, многажды сподобился еси видети Ю, яко живу ходящую и со апостолы телесно шествующую; Тую моли ныне, да не оставит уповающих на святыню твою.
Слава Отцу и Сыну и Святому Духу.
Чини ангельстии удивишася, зряще тя, инока затворника; явися тебе Мати Божия и повеле тебе отверсти келлию и не возбраняти православным народом.
И ныне и присно и во веки веков. Аминь.
Богородичен: С верою и любовию к тебе прибегающих и со страхом вопиющих молитвы глас услыши, Владычице.
Ирмос: Несть свят, якоже Ты, Господи Боже наш, вознесый днесь рог христиан; утверди нас единомыслием на камени веры.
Преподобне отче Серафиме, моли Бога о нас.
Смирением последовав повелению Богородицы, всех учил еси благочестию и отверзал еси очи душевныя, грехами ослепленныя.
Преподобне отче Серафиме, моли Бога о нас.
Молитвою твоею со ангелы пред Господем предстоя, о всем мире моление возсылал еси, да сопротивных истине одолевают правою верою и присно победу стяжавают на коварнаго врага.
Преподобне отче Серафиме, моли Бога о нас.
От юности верою и любовию приближился еси ко Царю вышних сил, святе Серафиме, и, яко солнце возсияв в Саровской пустыни, был еси присно сладкое утешение с верою к тебе прибегающим.
Слава Отцу и Сыну и Святому Духу
Явился еси, преподобне, столп непоколебимый молящим, и, ходатай быв молящимся, умножил еси стадо Христово и святостию наставник был еси подвижником.
И ныне и присно и во веки веков. Аминь.
Богородичен: Слыша Ева, всех мати: «в болезнех родиши», ты же, Пресвятая Дево, слышала еси: «Радуйся, Господь с тобою», и гласом радостным разрешила еси печаль первыя оныя матере.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Преподобне отче Серафиме, моли Бога о нас.
Видяще тя новаго избранника Божия, течаху к тебе, ты же не отгонял еси напастьми опечаленных; был еси невеждам советник благий, заблуждшим учитель, недужным врач и хромым исправитель.
Преподобне отче Серафиме, моли Бога о нас.
Разнесеся слух сей по всей земли: «Саровский чудотворец велий явися, утешает печальныя, милует убогих и всем молящим его подает дары своея помощи».
Слава Отцу и Сыну и Святому Духу.
Избавлял еси обитель от злых клевет и, исполнен любве и благодати Божественныя, не помышлял еси о преходящем земном попечении, но на небо возносил еси молитвою твоею сердце и ум твой.
И ныне и присно и во веки веков. Аминь.
Богородичен: О Мати Божия, очистилище всех грешных, ты отверзи нам двери милости твоея и печали наша претвори в радость, Благословенная, яко ты еси веселие всего мира, Благодатная.
Пустынное жительство возлюбил еси паче временныя сладости и, победив страсти мира сего, преподобне Серафиме Саровский, вшел еси в пристанище безмятежное и явился еси сосуд терпения и чистоты; сего ради Господь даде тебе силу на духи лукавыя, и изгонял еси их, и ихже мучаху, свобождахуся и с радостию славляху силу Христову; и ныне не престани о всех нас, во еже избавитися от обстоящих напастей, да хвалебным пением ублажаем тя, пастыря великаго и отца истиннаго.
Слава, и ныне, Богородичен:
Грехи моя превзыдоша главу мою, Владычице, и осквернен есмь, и несть исцеления плоти моей; но ты, Вино всех благ, даруй души моей слезы покаяния во очищение грехов и от телесных недуг исцели мя, Врачевнице всех и Мати Господня.
Ирмос: Христос мой Бог, Господь — сила моя, — гласом высоким глаголет Церковь и по воле Божией радуется верою божественною радостию.
Преподобне отче Серафиме, моли Бога о нас.
С радостию веселится днесь Серафимо-Дивеевская обитель о памяти твоей, и притекают вернии поклонитися честным мощем твоим и просят от тебе исцеления.
Преподобне отче Серафиме, моли Бога о нас.
Яко финикс процвел еси подвигом твоим, и словом плодоносным и непорочным житием многих исполнял еси блаженства; и ныне нам испроси милость от Христа.
Слава Отцу и Сыну и Святому Духу.
Молитвою твоею моли Бога, да греховную мглу неведения отженет от нас и безстрастием, верою и радостию облечет всех, преподобне, иже чтут славную память твою.
И ныне и присно и во веки веков. Аминь.
Богородичен: Радуйся, Богородице Дево, Церкве красото, честных человек крепосте и похвало; присно моли Христа Бога, да избавит нас от всякия тесноты молитвою твоею.
Ирмос: Услышах, Господи, смотрения Твоего неизреченнаго таинство, разумех дела Твоя и исповедах Твое Божество.
Преподобне отче Серафиме, моли Бога о нас.
Не токмо святыя оныя обители житель еси, блаженне, но и всея земли Российския, и молитвенник, и скорый помощник, и всесильный и непобедимый покровитель и ходатай всех православных.
Преподобне отче Серафиме, моли Бога о нас.
В посте велик был еси, преподобне, и жестокий оный подвиг иноческаго жития прошел еси в пустыни, и стадо, вверенное тебе, пасл еси кротким и смиренным духом.
Слава Отцу и Сыну и Святому Духу.
Безмерная милость и превеликая сладость и смирение быша тебе наставницею на пути истиннем, и был еси отец сиротам и питатель алчущим, и всех учил еси, подобно Христу, щедро раздаяти нищим и помогати скудным.
И ныне и присно и во веки веков. Аминь.
Богородичен: Пресвятая Богородице, ты еси пристанище и прибежище наше; моли Сына твоего и Бога нашего, да отженет напасти и бесовская нападения от всех верных.
Ирмос: Светом Твоим божественным, Преславне, души утреннюющих Тебе с радостию просвети, да познают Тя, Бога, Единаго Избавителя от грехов их.
Преподобне отче Серафиме, моли Бога о нас.
Яко солнце, просияша силы чудес, тобою в пустыни совершенных благодатию Божественною, еюже возвеличился еси, преподобне, не токмо во всей земли Российстей, но и во всем мире.
Преподобне отче Серафиме, моли Бога о нас.
Был еси истинный наставник всем к тебе прибегающим и велий молитвенник ко Богородице о народе твоем, и зело возлюбил еси жребий Ея, народ иверский, и молился еси о иверах и о преуспеянии их.
Слава Отцу и Сыну и Святому Духу.
В молитве полунощней, преподобне, по обычаю разжжеся диавол на брань с тобою, но ты, воине Христов доблий, посекл еси прелесть его и станы их пожегл еси, яко огнем, пещию молитв твоих.
И ныне и присно и во веки веков. Аминь.
Богородичен: Мати Божия, Пресвятая Марие, испроси у Христа жребию твоему избавление от безчисленных бед.
Ирмос: Просвети нас светом Твоим, Господи, и мышцею высокою мир Твой свыше даруй нам, верным, Человеколюбче.
Преподобне отче Серафиме, моли Бога о нас.
Вси вернии текут во обитель оную, в нейже святая рака, мощи твоя содержащая, яко источник неоскудный, богато источает благоухание благодатей и исцеления подает почитающим ю.
Преподобне отче Серафиме, моли Бога о нас.
Собор верных Христовых купно хвалит тя, блаженне Серафиме, яко еси тихое пристанище скорбящим и обуреваемым и скорый врач душевных и телесных недугов.
Слава Отцу и Сыну и Святому Духу.
Присно приносивый жертву молитвы ко Господу, не престани о нас ходатайствовати пред Ним, да избавит нас от многих сетей вражиих.
И ныне и присно и во веки веков. Аминь.
Богородичен: Утоли ум мой, Владычице, многими страстьми обдержимый; спаси нас, Богородице, к тебе прибегающих, иже иныя помощи, святая, разве тебе не вемы.
Ирмос: Волна греховная обыде мя, и ко многим щедротам Твоим прибегаю: возведи мя, Блаже, от потопления, Боже мой, молю Тя.
Преподобне отче Серафиме, моли Бога о нас.
Слышав народ твой, яко стезями Божественными, путем заповедей Христовых, непорочно шествовал еси и ангельски жительствовал еси, начат приходити и учения твоя добре услаждатися.
Преподобне отче Серафиме, моли Бога о нас.
Научив стадо твое и народ правой вере и сохранив их непорочны от ереси, и ныне нас избави от бесовскаго мучительства и соблазна, иже зле умерщвляют сердца наша.
Слава Отцу и Сыну и Святому Духу.
Велий есть подвиг твой в пустыни, такожде и просвещение народа, яко многих к тебе прибегающих просветил еси и научил еси пению Единосущныя Троицы.
И ныне и присно и во веки веков. Аминь.
Богородичен: И ныне к тебе прибегаю, Всесвятая, спаси мя молитвою твоею и сохрани мя, яко хощеши и можеши, яко еси Мати Всемогущаго.
Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже мой, возведи мя.
Преподобне отче Серафиме, моли Бога о нас.
Нищетою богатство и скорбию радость восхитил еси и тоже щедро раздавал еси к тебе прибегающим; и ныне, в молитвах поминаемь, твориши чудеса и покровитель бываеши уповающим на тя.
Преподобне отче Серафиме, моли Бога о нас.
Ископав в пустыни кладязь, напаял еси, преподобне, всякаго жаждущаго и водою тою исцелял еси многих недужных; и ныне множество чудес твоих напаяет концы земли.
Преподобне отче Серафиме, моли Бога о нас.
Дивное житие твое явися нам, преподобне, исполнено таинственныя премудрости и богатства благодати, и ныне уповающим на тя подаеши утешение и мужество.
Слава Отцу и Сыну и Святому Духу.
Воистину блаженную кончину преподобных приял еси со радостию о Христе, пред кончиною узрев Богородицу, яже возвести тебе грядущее изшествие души твоея и отшествие ко Господу.
И ныне и присно и во веки веков. Аминь.
Богородичен: Истинную Матерь Божию, воистину Богородицу исповедуем тя: рождеством твоим тления нас избавила еси и благоутробию Человеколюбца Бога и нетленной жизни приобщила еси.
Красоту мира сего и вся в нем тленная оставив и вселився в Саровскую обитель, ангельски жительствовал еси и многим показал еси путь спасения; сего ради возвеличи тя Христос и дар исцелений и чудес дарова тебе; темже вопием ти: радуйся, Серафиме, преподобне отче наш!
Разум свыше дарован бысть тебе, святче Божий, и от юности непрестанно помышлял еси о небесном и, оставив дом отца твоего, вселился еси в Саровскую пустынь и, яко безплотный, подвизался еси и взошел еси на верх совершенства, в молитве уподобився серафимом, с нимиже ходатай буди нам и даруй нам слово премудрости, да ублажаем тя с любовию: радуйся, небесный человече и земный ангеле; радуйся, в любви Христу уподобивыйся и жилище Духа Святаго; радуйся, отчаянных велия радосте и источниче исцелений; радуйся, скорбящих душ сладкое утешение; радуйся, иноков тихое пристанище и мудрый наставниче; радуйся, рода российскаго велия похвало; радуйся, преподобне отче наш Серафиме, Саровский чудотворче!
Ирмос: Отроки святыя в пещи ороси Ангел Спасов, халдеи же опали повеление Божие, мучителя же научи пети, и рекоша: благословен еси, Господи Боже отец наших.
Преподобне отче Серафиме, моли Бога о нас.
Крепость непобедимую Христос Бог дарова тебе и укрепи тя на одоление злых помыслов; ныне ходатай буди пред Ним, да избавит нас от искушений и злых похотей.
Преподобне отче Серафиме, моли Бога о нас.
Исцели страстьми уязвленныя похоти наша, яже возмущают ум наш, и утиши волны лукаваго недостоинства, сердца же наша, попеченьми мира сего изнемогшая, укрепи, преподобне, да во веки славим Христа Бога.
Слава Отцу и Сыну и Святому Духу.
Множество людей днесь, отче Серафиме, покланяется святым мощем твоим, и от них вси исцеление приемлют, иже присно ублажают тя и Господа славят: благословен еси, Господи Боже отец наших.
И ныне и присно и во веки веков. Аминь.
Богородичен: Богородице Дево, родившая Слово, паче всякаго слова, всех Творца, Того моли с преподобным Серафимом о душах наших.
Ирмос: Не убояшася в Вавилоне отроцы, в пещь ввержени, но, росою окропляеми, посреде огня вопияху: благословен еси, Господи Боже отец наших.
Преподобне отче Серафиме, моли Бога о нас.
Помилуй нас, Господи, и покрый нас от всякаго душетленнаго зла молитвами святаго Твоего, преподобнаго Серафима, иже тепле вопием Ти: благословен еси, Господи Боже отец наших.
Преподобне отче Серафиме, моли Бога о нас.
Кто не удивится и не прославит неизследимую глубину милости Твоея, Господи, яко явил еси миру святаго Твоего Серафима, теплаго нашего молитвенника, иже вопием Ти: благословен еси, Господи Боже отец наших.
Слава Отцу и Сыну и Святому Духу.
Моли, блаженне, Христа Спаса нашего, да избавит нас от глада и скорби, от внезапныя смерти, от греха и злаго умышления, да чистым сердцем возопием Ему: спаси нас молитвами святаго Серафима.
И ныне и присно и во веки веков. Аминь.
Богородичен: Страсти души моея уврачуй сладостию, всепетая, утиши житие и просвети душу мою и направи мя на пути Божественныя, Владычице, да присно благословлю тя.
Ирмос: В пещь отроком еврейским снизшедшаго и пламень в росу преложившаго Бога, благословите, вся дела Господня, Господа и превозносите во веки.
Преподобне отче Серафиме, моли Бога о нас.
По заповедем Царя нашего Христа, тесный и прискорбный путь прошел еси, преподобне, вводящий в Царствие Небесное, широкий же и пространный путь возненавидел еси и учил еси: хвалите, вся дела Господня, Господа и превозносите Его во веки.
Преподобне отче Серафиме, моли Бога о нас.
Радуется ныне святая Церковь памяти твоей и повелевает всем верным, да борющих истину одолеваем правою верою и всяким делом хвалим Господа и превозносим Его во веки.
Слава Отцу и Сыну и Святому Духу.
Благодатию Святаго Духа исполненный Серафиме, нам, совершающим святую память твою, благочестивым дерзновением испроси оставление грехов, да присно воспеваем Господа и превозносим Его во веки.
И ныне и присно и во веки веков. Аминь.
Богородичен: Заступление Предстательницы явися нам, Владычице, Мати Царя и Спаса нашего; сего ради молим тя: утиши житие и просвети душу мою и направи мя на пути Божественныя, Пречистая, да присно благословлю тя.
Хвалим, благословим, покланяемся Господеви, поюще и превозносяще Его во вся веки.
Ирмос: В горе Моисею собеседовавый купиною, образ изобрази безстрастнаго от Девы рождения; Того вси благословим и превозносим во веки.
Преподобне отче Серафиме, моли Бога о нас.
Пекийся о Дивеевской обители повелением Богородицы, обещавшей тебе процветание ея и умножение подвижниц, пасл еси инокинь и дев и направлял еси их на путь незаблудный, на небо возводящий.
Преподобне отче Серафиме, моли Бога о нас.
В видении возвести тебе Богородица, како возлюби Дивеевскую обитель и Киево-Печерскую лавру и сотвори их жребием Своим после Афона, емуже дарова нетленную икону Вратарницы рукою Гавриила Грузина, и в знамение водительства Своего в последняя времена дарует благодать Иверии, жребию Своему.
Слава Отцу и Сыну и Святому Духу.
Якоже молния блистает под небесем, тако и вести о чудесех твоих, преподобне, обходят весь мир; мы же, удивляющеся славе твоей, вопием: хвалите, благословите, пойте Господа и превозносите Его во веки.
Благословим Отца и Сына и Святаго Духа, Господа.
Коленопреклонно моляся пред иконою Пресвятыя Матере, предал еси душу твою Богу, и возгореся огнь от пламене свещи, по прозрению твоему, и смерть твоя явися учеником твоим.
И ныне и присно и во веки веков. Аминь.
Богородичен: Радуйся, престоле огненный Господень; радуйся, зари невечерней сияние; радуйся, облаче, Солнце возсиявший — Христа Спаса нашего, Егоже величаем во веки.
Ирмос: Бога человеком невозможно видети, на Негоже не смеют чини ангельстии взирати; Тобою же, Дево, явися человеком Слово воплощенное, Егоже благословяще с безплотными, и Тя днесь песньми величаем.
Преподобне отче Серафиме, моли Бога о нас.
Очищенным житием уподобився Христу Царю, житие оно добре скончал еси и взошел еси, отче Серафиме, в вечныя обители и со ангелы присно зриши Господское оное сияние.
Преподобне отче Серафиме, моли Бога о нас.
Вознесшися от плоти к вожделенному тобою Богу, не оставил еси уповающих на тя, но от напастей избавляеши в скорбех и узах сущих и отраду подаеши просящим; сего ради ходатая тя посылаем ко Христу, да избавит нас от всякия скорби
Преподобне отче Серафиме, моли Бога о нас.
Яко украшение царское, мощи твоя прият обитель твоя, имиже украшается и хвалится, и всему миру богатство благодатей твоих разделяет, и вопиет: Иисусе Всесильне, слава милостем Твоим.
Слава Отцу и Сыну и Святому Духу.
Прославлением святых мощей твоих радости исполняется обитель Саровская, и вси славят Бога; ходатай буди ныне пред Ним, да насадит в нас страх и ненависть ко греху и любовь к добродетели, да помощию твоею хвалимся и присно хвалим благость Его.
И ныне и присно и во веки веков. Аминь.
Богородичен: Ты еси утверждение наше, слава и радость наша, хранительница наша и покровительница, пристанище и предстательство непобедимое, Пресвятая Богородице; покрый рабы твоя.
Ирмос: Тя, Юже неискусобрачную Матерь и безневестную, Юже паче естества рождшую Безначальнаго, Иже есть Создатель, Бог истинный, немолчными песньми величаем.
Преподобне отче Серафиме, моли Бога о нас.
Недостойными усты нашими воспеваем тебе малое величание, преподобне, не презри его, но приими и всех величающих тя избави от скорби, печали и вечныя муки, присно тя воспевающих.
Преподобне отче Серафиме, моли Бога о нас.
Ныне предстоя престолу Божию, преподобне, поручаеши землю твою, христолюбивым же народом просиши утверждения в вере и избавления от прелести антихристовы и от злаго соблазна.
Слава Отцу и Сыну и Святому Духу.
რომელი ჟამსა ქუეყნიერისა ცხორებისასა იყავ მოყუარულ ერისა ამის ჩუენისა, ღმრთისმშობლისა წილხვედრისა, ანდერძად დაუდე ერსა შენსა, რაჲთა არცაღა ჰბრძვან მას, რაჲთა არა განარისხონ დედაჲ ღმრთისაჲ. აწცა მოეც გულისჴმისყოფაჲ წინამძღუართა ერთა ამათ ურთიერთას განდგომილთასა, და ერთ-ზრახვად შეამტკიცე სიყუარულითა ღმრთისაჲთა.
И ныне и присно и во веки веков. Аминь.
Богородичен: Со Святою Троицею Единороднаго Слова и Сына Мати, Всесвятая Дево, со преподобными и праведными Его Того моли о рабех твоих, иже с верою просят оставления грехов.
Ныне приидите, вернии, восхвалим скораго помощника и преславнаго чудотворца святым пением, светлое светило земли Российския, иже ныне со ангельским собором предстоя радуется и непрестанно воспевает Бога. (Дважды)
Слава Отцу и Сыну и Святому Духу, и ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор преподобных, с нимиже восхваляем тя, Дево.
Наслаждающеся честным сим праздником Саровской обители, памятию преподобнаго Серафима, тако вопием: радуйся, постников светильниче и утвердителю; звездо пресветлая иноков, яже, яко волхвом, показуеши путь к небесней обители; священников славо, и любве и девства источниче неисчерпаемый, благодатию прозорливости обогащенный и многими чудесы от Господа прославленный; радуйся, подвига непреложным мужеством вооруженный!
Упоен есмь грехом, молитвы же твоя, преподобне Серафиме, яко кадило благовонное, восходят пред Бога; сего ради молим тя: волнующееся в мире сем море злаго неверия утоли и спасения душ наших испроси у Христа, Царя и Бога нашего.
О блаженне отче Серафиме, от юности твоея был еси усердный хранитель чистоты души и тела, многих привлекал еси человеколюбием и добротою, и святостию и смирением многим был еси учитель добродетельнаго жития во утверждение православныя веры и в знамение безсмертия.
В скорбех и недузех к тебе прибегаем, преподобне отче, и из глубины души нашея вопием ти: буди нам тихое пристанище и скорый врач недугов наших, и избави нас от всех скорбей и напастей, да присно ублажаем тя.
Тебе, проповедника истины и всесветлое светило мира, похвалами украшаем и молим Давшаго тебе знамения дивная, да в напастех и в пещи скорбей и нас окропит росою благодати твоея, да сердце наше не хладно будет ко слышанию божественных учений и ко славлению и воспеванию Бога.
Слава Отцу и Сыну и Святому Духу.
Глас 6
Приидите, соберемся, иноцы и постницы, и потщитеся, вси людие христианстии, да святых заповедей Спасовых вернаго хранителя пением почтем и возопием: радуйся, благочестия столпе непоколебимый, таинственныя премудрости и богатства благодати исполненный; радуйся, молитвою сердца и ума твоего утверждающий и молящих тя от напастей избавляющий; радуйся, дарованием пророчества украшенный и грядущая, яко настоящая, зрящий; моли, преподобне Серафиме, о тех, иже с верою и любовию чтут и светло празднуют святую память твою.
И ныне, Богородичен.
Славословие великое протяжно и тропарь преподобнаго отца
И ныне, Богородичен: «Еже от века…»
И отпуст.
На часах 1-м, 3-м и 6-м: Слава; тропарь преподобнаго отца;
И ныне, Богородичен часа. Кондак преподобнаго отца.
На литургии: на блаженных от 1-го канона песнь 3-я, на 4; от 2-го канона песнь 6-я, на 4.
На входе:
1. Аще храм Спасов или Богородичен:
Тропари храма и преподобнаго отца.
Кондаки:
Слава — преподобнаго отца; И ныне — храма.
2. Аще храм святаго:
Тропари: святаго; святаго храма.
Кондаки: святаго храма. Слава — преподобнаго отца.
И ныне — «Упование и прибежище…»
Прокимен преподобнаго, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?
Апостол: к Галатом, зачало 213; 5, 22 — 6, 2.
Аллилуиа, глас 2: Блажен муж, бояйся Господа, в заповедех Его восхощет зело.
Стих: Сильно на земли будет семя его.
Евангелие от Луки или от Матфея, зачало 43; 11, 27–30.
Причастен: В память вечную будет праведник, от слуха зла не убоится.
Праздничное последование преподобному Серафиму перевела с церковнославянскаго псаломщица Кетеван Кахниашвили;
переложила на древнегрузинский язык и переработала Тинатин Мчедлишвили.
