Праздничное последование святому великомученику Або Тбилисскому, месяца января в 8-й день
На великой вечерни
Поем «Блажен муж», 1-й антифон.
На «Господи, воззвах»
Стихиры праздника на 3:
Творение Иоанна Конкозисдзе, глас 4:
Создатель тварей Бог, неописанный и непостижимый, невидимый и неизреченный, Иже премудростию сотвори и созда от вод землю сию со всею силою ея и твердь, и возсия в ней свет сей солнечнаго блистания, и человеком дарова жизнь сию, восхоте паки от вод жизнь нашу обновити, и гремит гласом свыше обновления ради душ наших.
Творение Стефана Сананоисдзе, глас 4:
Исполнити всякую правду пришел еси, Слове Единородный; облекий небо облаки, обнажился еси во Иордане, креститися со смирением пришел еси, Сам Светило, несозданный Свет; Емуже подобно обнажися мученик Твой Або и излиянием крове принесеся в жертву Тебе.
Творение Григория Хандзтийскаго, глас 5:
Радуйся, Предтече и Божественнаго пришествия проповедниче! Се, днесь прииде от Галилеи во Иордан Христос, Агнец Божий, Агнец святый, за ны уготованный умрети волею на Кресте, иже взят грехи мира; уготовися ныне, Иордане, омыти пречистое тело Его, Емуже не требе бе омовения во очищение, но хощет очистити воды; Сему поклонимся, от Негоже обрете мир днесь велию милость.
Стихиры святаго на 5:
Творение Иоанна Конкозисдзе
Истощил еси тело твое, святе, постом и очистил еси душу твою, тогда благодати Божия исполнился еси и течаше на мучение, яко телец в жертву Богу во всесожжение, и исповедал еси дерзновенно пред мучители, и нарекл еси себе христианином, и рекл еси: не боюся мук ваших, безбожнии, и покланяюся Богу моему, в Троице познаваемому.
Егда уведел еси скончание подвигов твоих, святе, и исход от уз телесных и отшествие к Богу, тогда паче укрепился еси и начал еси пети, якоже поют над умершим, и с разбойником вопиял еси: помяни мя, Иисусе, во втором пришествии Твоем со славою; и принесл еси себе в жертву, яко иерей по чину, и сподобился еси Царствия безконечнаго.
Велия благодать дарований Твоих, Владыко, яже сотворил еси святым Твоим, иже, Христе, угодиша Тебе достойно; иже явил еси днесь мученика Твоего Або ниспосланием огня с небесе и показал еси всем человеком славу подвизающихся Тебе ради; ныне молим Тя: молитвами их даруй нам мир и Твою милость, да присно воспеваем имя Твое.
Творение Стефана Сананоисдзе
Обнажился еси во Иордане, креститися со смирением пришел еси, Сам Светило, несозданный Свет; Емуже подобно обнажися мученик Твой Або и излиянием крове принесеся в жертву Тебе.
აგარის ნათესავთა, ძირთა მათ უნაყოფოთა, ნერგთა მათგან ეკლოვანთა, ვითარცა ვარდი შუენიერი ფერითა მეწამულითა, გამოჩნდა, ნეტარი აბო, და სულნელყო ეკლესიაჲ ქართველთაჲ ნელსაცხებელთა წილ, სხურებითა სისხლთაჲთა, ამას შინა მორწმუნენი ვაქებდეთ ღუაწლთა მათ მისთა.
Слава Отцу и Сыну и Святому Духу.
Радуйся, исканием истины подвигнутый и лучшее от худшаго различивый; радуйся, землю твою оставивый и жребий Богородицы избравый; радуйся, истинною верою сердце твое добре очистивый и во время славы измаильтян Крест Христов на рамена твоя вземый; радуйся, гонимыя ими веры исповедниче, народа же, под данию их томимаго, возлюбивый; радуйся, среди единоплеменник твоих Божественная учения распространивый; моли о нас, прославляющих тя, блаженне Або.
И ныне и присно и во веки веков. Аминь.
Преклонил еси днесь главу Предтечи и сокрушил еси главы змиев, пришел еси в реку и просветил еси всех, да величаем Тя, Спаса и Просветителя душ наших.
1. Пророчества Исаиина чтение. Глава 43. (Тако глаголет Господь: вси языцы собрашася вкупе…)
2. Премудрости Соломони чтение. (Праведных души в руце Божией…)
3. Премудрости Соломони чтение (Праведницы во веки живут, и в Господе…)
Творение Григория Хандзтийскаго.
Явился еси яко звезда светлая, просветитель Картли, блаженне, и подвиг твой паче света солнечнаго светло явися, яко молния, мудре, знаем превыспренним мирам, видим всем концем небесным, егда образом был еси Господня Крещения и, обнажен, сошел еси в купель света и дважды крестился еси водою и кровию, мужественне Або! Моли ныне Бога даровати душам нашим днесь велию милость.
Наследником обетования возсиял еси и сыном небеснаго звания наречен еси, чадом Авраамовым был еси, блаженне! Яко вторый Исаак, волею приведенный на заклание в жертву Господу, яко благоухание духовное позна тя, преподобне, Церковь; и языком чад своих вопиет о мужестве подвигов твоих, яже ныне украсися яко багряницею и светло облечеся кровию твоею, мучениче! Моли ныне Бога даровати душам нашим днесь велию милость.
Творение Стефана Сананоисдзе
По светоносном сем дни, Господском празднике Крещения Христа Господа, приспе светлая память мученика Або; облобызаем с любовию мужество подвигов его и украсим святую память его.
Изнемогает язык поведати подвиги твоя, святе, яко в последнее запечатление гонения обрелся еси равен первым мучеником излиянием крове, мужественне, и с ними радуешися во Царствии, преподобне; ныне и нас направи на путь мира к вожделенным онем обителем, блаженне Або.
Слава Отцу и Сыну и Святому Духу.
Творение Иоанна Конкозисдзе
Спасе, Крещением Твоим святым научихомся соединению Духа от вод, егоже исполнься днесь всехвальный Або, чашу смерти с Тобою испи; и якоже Иорданским Крещением просветил еси, и ныне дух премудрости обнови во мне, достойно украшающем праздник Избавления и мученика по достоинству почитающем.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
Творение Иоанна Конкозисдзе
Стих: Честна пред Господем смерть преподобных Его.
Невозможно бе прикоснутися неприкосновенному невещественному оному углю Божества, сего ради воплотися Сын и Единородный, омытися Безгрешный, Емуже принесеся днесь Або.
Стих: Блажен муж, бояйся Господа, в заповедех Его восхощет зело.
Соединился еси духом, блаженне, с сынами обетования на пути небеснаго звания, сего ради венец победы дарова ти свыше Спас, мужественне Або,
Слава Отцу и Сыну и Святому Духу.
Добре украшается днесь земля наша, и град Тбилиси веселится, яко венцем украшенный тобою, о многославный мучениче Або, праздник же памяти твоея светло просвещается.
И ныне, праздника
Радуйся, избранный от Вышняго Бога Отца и Сыном Единородным призванный, Духом Святым озаренный, с небесными безплотных лики совокупленный, в мучениках и праведных восхваляемый, церквей прекрасное украшение, мучеников похвало, царей радосте, верных помощниче, мужественный подвижниче Або; Бога моли ныне даровати душам нашим велию милость.
Слава, и ныне, праздника
По 1-м стихословии:
Творение Василия Хандзтийскаго:
Исповедницы Троицы, вернии человецы, празднующии сей Господень день, светом облеченный, Божественным песнопением воспоим память Або, новаго мученика.
Естеством Превысший, облеклся еси в естество мое, Божие Слове Единородный, и крестился еси плотию, Безгрешне, Емуже подобно крестися мужественный Або водою и излиянием крове.
უვარისმყოფელთა ქრისტეანეთა, უშჯულოთა ისმაიტელთა, ნაშობთა შორის ბნელისაჲთა ვარსკულავად მნათობად გამოჰბრწყინდი, მჴნეო მოწამეო აბო, და საღმრთოჲთანათლითა განანათლენ ქართლისა მყოფნი.
По 2-м стихословии седален праздника; по величании седален святаго (см. в Праздничной Минее)
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Слава…
Ненавидящии Сиона, посрамитеся от Господа, и яко траву изсохшую поядет вас геенна.
И ныне…
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Прокимен, глас 7: Честна пред Господем смерть преподобных Его.
Стих: Что воздам Господеви о всех, яже воздаде ми?
«Всякое дыхание…» Евангелие от Матфея, глава 10, стих 16 (Рече Господь Своим учеником: се, Аз посылаю вы…); конец — до стиха 23 (…той спасен будет).
По 50-м псалме стихира святаго (см. в Праздничной Минее).
1. Песнопения Просвещения и облеченнаго подвигом непобедимаго мученика Або, бывшаго измаильтянина, грузина, творение Иоанна Конкозисдзе
2. Песнопения Просвещения и Або, бывшаго измаильтянина, грузина, творение Стефана Чкондидели, Сананоисдзе
3. Песнопения Крещения и святаго мученика Або, творение Григория Хандзтийскаго.
Иоанна Конкозисдзе, глас 4
Ирмос: Непроходимое море, еже твердая земля бысть древле повелением Твоим, неизреченный Боже, прият люди Израилевы, иже уготоваша Тебе песнь победную.
Иорданским Крещением просветивый мя, и ныне дух премудрости обнови во мне, достойно украшающем праздник Избавления и мученика по достоинству почитающем.
Спасе, Крещением Твоим святым научихомся соединению Духа от вод, егоже исполнься днесь всехвальный Або, чашу смерти с Тобою испи.
Слава Отцу и Сыну и Святому Духу.
შეგინებულისა მის სარწმუნოებისა მოძღუართა სამსჯავროდ მიგცეს, ღირსო, ვითარცა პავლე ჰრომედ ჰურიათა მათ და უშჯულომან მძლავრმან განაჩინა შენთჳს სიკუდილი საწადელი.
И ныне и присно и во веки веков. Аминь.
Кадильница златая, и стамна манны, и жезл Ааронов о тебе предвозвещаху, и кивот Божественных словес образ тебе бяше, Мати Божия.
Ирмос: По волнам Чермнаго моря шествоваше древле Израиль, и Моисей, руце крестообразно распростер, силу Амаликову в пустыни низложи.
Иисусе, Слове Божий, научи нас слову премудрости восхвалити святое Крещение Твое и достойно воспети непобедимыя подвиги мученика Або, добраго подвижника.
Обнажившагося днесь во Иордане плотию ради, блаженный мученик Або совлечеся ветхаго человека с деяньми его и облечеся в силу Христову.
Вси языцы, приидите днесь со живущими в Картли и видите подвига победителя Або, светло украшеннаго кровию мученическою, и достойно воспоим его песньми.
Трисветлой Троице поклонился еси крещением — кровию, огнем и духом, преславный мучениче Або, и молишися о душах наших.
Богородичен
Матери Света предал еси душу твою, мучениче, любве ради Сына Ея кровь твою пролиявый, Або преславне.
Ирмос: Колесниц множество со всадники в глубину моря Чермнаго низвергл еси крепостию мышцы, Христе, и спасл еси израильтяны, и победную песнь нову воспеваху.
На Просвещение: Аще и Зиждитель Слово Божие облечеся в человечество и тем крестися нас ради, но не слияшася естеством Божество и человечество, но соединишася.
Аще и яко голубь видим бысть днесь телесно невидимый Дух во Крещении Христове, но не естеством имяше телеснаго образа, но подобием.
Або ради: По великом оном дни праздника просветительнаго Крещения Господня украсим ныне, людие, и подвижника, новаго мученика Або память.
Егда прииде в Вавилон князь Картлийский, тогда блаженный Або, законом измаильтянин, прият его промыслом Божиим и от него уразуме силу Христову.
განიზრახა გულისჴმის-ყოფით მედგრობაჲ შჯულისა თჳსისა მამაულისაჲ ქრისტჱსმოყუარემან აბო და მყის დაუტევა სიცბილი იგი პირველი, და აღიარა ქრისტჱს ღმრთეებაჲ.
Богородичен
Лик пророческий прежде предвозвести тя горою божественною и дверию непроходимою; сего ради молим тя: двери покаяния божественныя отверзи нам, Дево.
Ирмос: Естеством милосерд быв, Спасе, естество наше немощное, еже облеклся еси, Божеством укрепил еси, и вопиет: несть свят, яко Ты, Человеколюбче.
Свободна бе от греха плоть Твоя, соединенная Божеству святостию, но Крещением устроил еси человеком совлечение греха от вод, Спасе.
Служители Троицы невидимии предстояху Крещению Спасову окрест Божественныя купели, святолепно хваляще Единороднаго Сына, плотию нас ради крестившагося.
Гласом Отчим, и сошествием Духа, и возвращением Иордана проповеда Тя Предтеча Сына Божия, Его ради устремися днесь к смерти блаженный Або.
Подобно патриарху, изшедшему от земли Халдейския, и мученик страстей Христовых, достойно славишися похвалами верных, всехвальне,
Богородичен
Явилася еси нивою несеянною, умножающею пшеницу, и тобою пожахом клас жизни, и причащающиися от него приемлем безсмертие.
Ирмос: Веселится о Тебе Церковь, Христе, и сице вопиет: Ты мое упование, утверди мя, Создателю.
Со Спасом крестился еси, сошед в купель подвига, якоже Избавитель наш во Иордан, и излиянием крове омыл еси тело твое, егда заклан был еси немилостиво мечем.
Кровию твоею, яко багряницею, украсил еси Церковь от язык, воине Христов непобедимый, и собрал еси в ней во единство вся воспевающия подвиги твоя.
არცხვინე, ნეტარო, ნაშობთა მათ მჴევლისაჲთა უღმრთოთა და დაუყუენ პირნი მათნი მგმობარნი საღმრთოჲთა მით სიბრძნითა ზეგარდამოჲთა, რაჟამს ჰქადაგე სამებაჲ ერთ-ღმრთეებაჲ.
Богородичен
Тя молим, Божия Мати, молитвами святаго мученика: к покрову твоему прибегающия присно избави от соблазна вражия.
Ирмос: Основавый землю на водах и плодоносие ей всецело даровавый, на камени заповедей Твоих непоколебимем, Христе, утверди Церковь Твою, Едине Благий и Человеколюбче.
На Просвещение: Бога позна Христа Иордан и ужасеся силы всенепоколебимыя, утишися от шума, молчанием научися со благоговением омыти Владычнюю плоть Создателя всех Бога.
Служители Троицы невидимии предстояху Крещению Спасову окрест Божественныя купели, святолепно хваляще Единороднаго Сына, плотию нас ради крестившагося.
Або ради: Из темных воздухов облаков безплодных, яко звезда небесная, возсия мученик Христов; и в странах северных, яко солнце, просия блаженный Або и светит живущим в Картли.
Цвет благоуханный от корений безплодных явися цветом багряным, и Дух Святый восхити его умом на небо, и тамо показа ему наслаждение святых в раи цветоносном.
მჴეცთა მათ მძჳნვარეთა და სისხლისა მჭამელთა, მარადის მტერთა სულისა წმიდისათა, რაჟამს გულისჴმა ყვეს სარწმუნოებაჲ მიუქცეველი, რომელი აქუნდა ნეტარსა აბოს, განიზრახეს მათ წარწყმედაჲ მისი.
Богородичен
Одесную Христа стоящая, яко Царица, облеченная, Богообрадованная, в ризы позлащенныя, Царствия Небеснаго испроси нам молитвами твоими, Дево Всесвятая.
По преславном Богоявлении Христове приходит святая память твоя, яко временнаго онаго собора последующий собор, лето от лета светло приходящий, воине Христов, непобедимый Або; сего ради, духовно в нем собравшеся, славословим Бога Всесильнаго, Иже избра тя, яко розу благовонную, и мученика Своего яви, и венцем победы украси, и тако тебе вопием: моли Христа Бога оставление грехов даровати празднующим любовию святую память твою. (Дважды)
Слава, и ныне, праздника
Ирмос: Совет таинственный, рождество Твое от Девы, Создателю, егда виде, удивися Аввакум и со страхом вопияше: слава силе Твоей, Господи.
Иже со Христом спогребохомся, Крещением уподобляемся Ему; от растленных помыслов удалимся и тако сохраним печать просвещения, разрешающую смерть.
Иже внутренняя очеса Божественным видением очистивый, Предтече, от тебе крестившемуся днесь усердно последова Або и Его ради смерть претерпе.
Возлюбил еси закон духовный, иже свободи тя от осуждения смерти, и подобием Крещения Христова воистину сын был еси Аврааму.
Богородичен
Тя, Приснодеву, воистину Богородицу воспеваем, еяже образ бысть купина, юже виде Моисей на горе Синайстей, горящую огнем.
Ирмос: Видевши Церковь Солнце правды на Кресте возвышено, ста в чину своем достойно и тако вопияше: слава силе Твоей, Господи.
Уза любве связа ум мученика ко терпению безчисленных мук, имже низложи похвалу безбожных.
Мятеж отеческаго упорства оставил еси и Христу последовал еси, святе, и подъятием страданий уподобился еси Ему, преблаженне.
Чужд был еси и пришлец законом Божественным, мужественный мучениче, но потщался еси и присный был еси заповедем Его, преподобне.
Последовал еси гласу Божества и заповедь Его напечатлел еси в сердце твоем, святый Або; моли Его о оставлении прегрешений наших.
Богородичен
Солнца незаходимаго Родительнице, Дево Марие, молитвами блаженнаго мученика сохрани нас от враг видимых и невидимых, в тесноту горькую преданных.
Ирмос: Слыша славное пришествие Твое, Христе, удивися Аввакум и со страхом вопияше: изшел еси во спасение людей Твоих, спасти помазанныя Твоя.
На Просвещение: Зубы змиины уязвиша первозданнаго, по образу Божию созданнаго, Христос же во Иордане омовением паки убели образ
Яко виде Креститель безначальный Свет, грядущаго креститися Христа, Бога позна и Агнцем нарече, иже заклатися имяше за мир.
Або ради: Искаху беззаконнии яти мученика Христова, он же волею предадеся в руце их, якоже Избавитель на смерть в руки враг Своих.
«Мне бо еже жити — Христос, и еже умрети — приобретение», — тако вопиял еси, Христов мучениче, пред беззаконными мучители, и того ради пролиял еси кровь твою.
Научашеся от книг и учителей достойно вере и уставу закона святый Або и с радостию славляше Отца с Сыном и Духом Святым.
Богородичен
Помози ми, Святая Богородице, плотскими сластьми присно погружаемому, иже стеню повсядневно, на одре уныния лежа.
Ирмос: Часть моя еси, Христе, яко Ты един избавил еси мя от тьмы мрака безумия светом Божества, и к Тебе вопию: мир Твой даруй нам.
Течение естества законов утишися, егда неописанный Бог Крещением дарова сокровенных скверн омовение человеком и паки блаженство даде нам от святыя купели.
Глас Божественнаго Слова, проповедник покаяния, радуется о Бозе вочеловечшемся во исполнение таинства спасения нашего, Егоже ради мученик Або второе рождение стяжавает кровию своею.
Ум твой, преподобне, благ Божиих познавателя сотворил еси, и слово твое — проповедника Христова, и очищением души украсил еси образ Божий, егоже ради радуешися, украшен венцем неувядаемым.
Богородичен
Исполнишася на тебе пророческая речения, яко во чреве зачала еси, Преподобная, Создателя и родила еси нам плотию Сына Безначальнаго, Иже есть Еммануил святый, Податель мира.
Ирмос: Ты, Господи, Свет еси, грядый в мир, просвещаяй сердца верных Твоих, покланяющихся Тебе.
Ты, Господи, во Иордане посрамил еси прелестника, Ты и укрепил еси сердце мученика Або, исповедавшаго Тя.
Ят был еси яко злодей, Або блаженне, но избавлял еси души, порабощенныя от лукаваго врага.
Трое крещение стяжал еси, мучениче, водою, духом и кровию, и по сих огнем возсия подвиг твой.
Постом истощился еси подобно великому Антонию, святе Або, и умертвил еси плоть, и сподобился еси венца мученическаго.
Богородичен
Предвождаше тя Дева Мария путем, в Картли ведущим, и сотвори тя учителем людей верных, блаженне Або; сего ради не престани молитися о восхваляющих тя.
Ирмос: Одеяйся светом, яко ризою, к Тебе прибегаю и Тебе зову: душу мою омраченную просвети, яко Един Многомилостив.
На Просвещение: Отверзый хляби небесныя и воды превыспренния низведый на землю днесь омывается плотию водами Иордана.
Сотворивый море сие великое и пространное, Егоже руце создаша сушу, днесь крещается — Свет невечерний, самосветлое Существо.
Або ради: Глаголаше Або сродником своим: добро есть оставити тьму и потщатися ко свету Боговедения, работати Троице.
ესმა რაჲ ესე ერსა ისმაიტელთასა, აღეგზნეს ცეცხლებრ გულისწყრომითა და მჴეცებრ იღრჭენდეს კბილთა, რაჲთა მისცენ იგი მოსიკუდიდ, აბო ქრისტჱს მოწამჱ.
Ни во чтоже вмени ярость беззаконных и ниже ужасеся всячески, яко любляше Христа, и не престаяше чтения Божественных книг.
Богородичен
Егоже ум постигнути не может, плоть облечеся, Благодатная, и тя в жилище Себе прият и спасе человеки.
Ирмос: В глубину греха погрузиша мя, яко Иону в бездну морскую, и вопию к Тебе, Благий и Человеколюбче: возведи мя, якоже онаго, от истления.
Сын Божий по естеству братию нарече нас по благодати, егда естество наше прият и очищения нашего ради очищение подъят Безгрешный от Предтечи.
Воистину начало спасения мира есть праздник сей: глас Отчий и сошествие Духа вочеловечшагося Бога нам возвещают, Егоже ради Або смерть подъемлет.
Иже бысть Первенец из мертвых и путь смерти источником жизни сотворивый верным, днесь Тебе ради прият чашу оную животворящую мечем мученик Або.
Богородичен
Была еси жилищем Божиим, Дево Неневестная; Егоже лицы безплотных не могут воззрети, Того чрево твое преславно вмести.
Ирмос: Вопияше пророк Иона из бездны и образ тридневнаго погребения предзнаменова, глаголя: избави мя от тли, Иисусе, Царю сил.
ღაღადებდა კადნიერად სანატრელი აბო და ეტყოდა უშჯულოთა ისმაიტელთა: განმეშორენით მე, ჵ, უკეთურნო, და გამოვიძინე ღმრთისა მცნებანი.
Обнажился еси стяжанием добродетелей, преподобне, и процвел еси венцем совершеннаго подвига, и тако возгласил еси, мужественне: упование мое Христос Бог.
В подвизе совершенном мужественно явися мученик Або, и исполни Церковь благоухания мира, и освяти люди, божественною благодатию избранныя.
Научашеся от книг и учителей достойно чину веры и закону блаженный Або и с радостию славляше Отца и Сына и Святаго Духа.
Богородичен
Якоже Дева «Радуйся», тако приял еси глас небесный о страданиих твоих, и яко агнец от земли принеслся еси Агнцу безсмертному.
Ирмос: Обышедше мя волны, и бысть ми гроб чрево китово, и вопию Ти: избави мя, Человеколюбче, и спаси мя, Многомилостиве Господи.
На Просвещение: С небесе возгласи над бездною Иорданскою Отец бездне премудрости, Сыну воплощенному; и сие слыша Иордан: Сей есть Сын Мой по естеству и равное Существо безначальное.
Днесь молчат реки и шумят воздуси, облацы тверди каплют росу оную Божественную; совокупишася глаголивый и безгласный, Иоанн и Иордан, и со страхом омыша плоть Избавителя безгрешную.
Або ради: Егда приспе Або время подвига, абие приидоша слуги беззаконнаго судии, яша мученика Христова и, связана узами, предаша на суд без суда и бияху подобно Избавителю.
Возрадовася блаженный, в темнице без суда биен Христа ради, и начат непрестанно со воздыханием взывати ко Христу: «Се, с радостию полагаю душу мою за Тя, приими, Спасе!»
Возвести ему Христос час кончины, даде мужество сердцу его и крепость уму его; тогда рече сущим с ним: «Ктому не узрите мене, желаю бо разрешитися и со Христом быти».
Богородичен
Сердце твое пройде оружие, егда узрела еси на кресте Сына твоего, Непорочная Дево, и божественное ребро Его копием прободенно, и рыдала еси горько.
Празднует днесь Церковь честную память твою и собирает чада купели на похвалу и славу подвига твоего и непобедимаго мужества, око мучеников Або.
Икос, глас 4 (см. в Праздничной Минее)
Ирмос: Не послужиша твари Богоносии паче Создавшаго, но огненное прещение поправше, тако глаголаху: превозносимый отцев Боже, преблагословен еси.
У купели избавления, днесь у реки животворящей Иордана, чини безплотных предстояху, воспевающе Крестившагося: веков Владыко Боже, благословен еси.
Крещение водою и Духом с Тобою соверши мученик, и чашу страданий Твоих испи, и с пением возопи: превозносимый отцев Боже, преблагословен еси.
Умом преселился еси к превысшему житию, ко святых соединению, и зол стяжание безумием вменил еси и рекл еси: превозносимый отцев Боже, преблагословен еси.
Богородичен
От словес духовных научихомся силе Троицы, и исповедуем вси едино Божество, и с пением глаголем: превозносимый отцев Боже, преблагословен еси.
Ирмос: В пещи Авраамстии отроцы, волхвами связани Божественных ради законов, совокупишася и во пламени вопияху: благословен еси, Боже, во храме святыни Твоея.
მოიძულე შენ, სიცრუვით შეთხზული იგი ისმაიტელთა მოძღურებაჲ და შეიყუარე ქრისტჱს მცნებაჲ და სიხარულითა ღაღადებდი: კურთხეულ ხარ შენ, უფალო, ღმერთო მამათა ჩუენთაო.
Был еси, блаженне, добрый смеситель благовонных масл, и скоро оставил еси, и шел еси с желанием во след мира Христова, и текл еси, подобяся страданием Его.
Глаголаше тебе мучитель с ласканием: почто оставил еси закон наш и противишися нам законом, егоже мы не научихомся? И ныне изнурится тело твое многими муками.
Ни во чтоже вменил еси ярость их, блаженне Або, ниже ужаснулся еси всячески, яко любил еси Христа и, разжегся ревностию Божественною, стопам Его скоро последовал еси.
Богородичен
Богородице Дево, святый Або молит тя: сохрани люди верныя от всякаго нашествия врагов и победу даруй народу нашему.
Ирмос: Препрославленный отцев наших Бог пещь пламенную отроком угаси, и тии вопияху: Боже, благословен еси.
На Просвещение: Раскаяся Создатель о создании человека и гневом потреби водою при Нои роды, ныне же тоюжде водою Избавитель потреби грехи наша.
Удица Божества облечеся в естество, яко червь от земли, и тем улови в водах змия, блюдущаго пяту нашу.
აბოჲსთჳს: აღეგზნეს გულისწყრომითა უღმრთონი ისმაიტელნი ჰაბოჲსათჳს მოღუაწისა და ეტყოდეს მსაჯულსა: „წარწყმიდე მაცთური ესე, მჴდომი შჯულისა ჩუენისაჲ!“
Ведяшеся, яко агнец, волею на заклание Христа ради путем мученическим: веселяшеся радостно, преклони выю мечу, предаде дух Господу.
Сына исповедник, Отца славитель, Духа хвалитель, руками завистников заклан был еси, яко агнец, и принеслся еси жертва Богу; Того моли помиловати души наша.
Богородичен
Возсия нам тобою Солнце незаходимое, облаче светлый, Христос Бог наш, просвещаяй во тьме неведения сущих, Богородице.
Ирмос: Отроки светлыя от пещи древле избави Рождшийся от Девы, иже спасение наше от прелести прообразиша, и, светом облечени, с ними глаголем: Господа пойте вся и превозносите Его во веки.
Пещи опаление Божие Слово в прохладу претвори отроком, днесь же Крещением естеству вод даде грехов попаление крещаемым, иже вопиют: Господа пойте вся и превозносите Его во веки.
О благосердие Творца! Яко твари ради предвари и путь, к жизни приводящий, первее Сам соверши, да обновльшиися Крещением жизни причастницы будут; сего ради тепле потщася Его ради на смерть мученик Або.
Тело твое, трудами очищенное, соединением Божественнаго огня, преподобне, возгорашеся, завистницы же огнем сожгоша е; егоже почитаем, глаголюще: Господа пойте вся и превозносите Его во веки.
Богородичен
Существо первое, Вину всякаго создания, вемы Бога безначальнаго и проповедуем Родителя равнаго Слова и Изводителя Духа, и глаголем: Господа пойте вся и превозносите Его во веки.
Ирмос: Избавителю всех, Боже крепкий, во огнь ввергнутыя отроки избавил еси, егда оросил еси, из пещи вопияху: благословите днесь, дела Господня, Господа.
Мира славу и наслаждение презрел еси, мужественне, подвига победителю, и возлюбил еси Христа, и ныне с Ним водворяешися; моли о нас, молящих тя, блаженне.
Имел еси оружие Крест Христов, упование твердое и любовь, и тою верою укрепился еси, и возопил еси: благословите Бога, дела Его.
ხრიდეს თავთა გულის წყრომით ღმრთის მბრძოლნი იგი აბოჲსთჳს და ეტყოდეს მსაჯულსა: მოკალ განდგომილი იგი და შემაჩუენებელი მუჰმედ მოციქულისა.
Просветился еси духом, мужественне, возжегл еси свещи и пел еси, яко приносяй, чистых жертв иерей поющий, и самому себе с радостию спутник был еси.
Богородичен
Жертвою благоприятною принесеся святый Або любве ради Сына твоего, Дево Марие; его молитвами от сетей сатаниных покрый землю Иверскую.
Ирмос: Тебе, единому всех Творцу, песнь духовную отроцы вопияху: вся дела, Господа пойте и превозносите Его во веки.
На Просвещение: Иордан, яко превысший всех рек, восхвалим, яко освяти его днесь Дух Святый и купель бысть Божественней плоти Христовой.
Создал еси, Христе, Адама по образу светла, прелестник же прельсти и помрачи; но пришел еси и паки светла сотворил еси Крещением, и прелестника помрачил еси.
Або ради: Страх безбожных отвергоша вернии и с любовию лобызаху непорочнаго мученика, егда видеша его скончавшагося за Христа добрым исповеданием.
Явися с небесе звезда блистающая в нощи темней, светило, яко солнце светлое, над телом мученика Христова, в честь подвигов мужественнаго подвижника Або.
Собраша кости мужественнаго Або и ввергоша в великую реку Куру, они же сияху в водах, яко звезды всесветлыя.
Богородичен
Тобою нас ради воплотивыйся Бог тебе, святую и всенепорочную, всего рода нашего Божественную Предстательницу яви, Дево; сего ради вернии велегласно воспеваем тя.
Ирмос: Вся племена земная радуются днесь духом, и празднуют лицы небесных безплотных со славою зачатие Пренепорочныя и глаголют: радуйся присно, Дево Марие, во Царствии.
Прозябением изшел еси от корене Иессеова во святыни, днесь же во Иордане победою сокрушил еси главу змиеву и изшел еси оттуду, яко лев, по Писанию, имеяй начальство над роды, имже уподобился еси вочеловечением.
Обещанных Христом наслаждений ради смерть с радостию приял еси и шел еси с Ним царствовати, яко причастник страданий Его, мучениче; воистину возвещает нам достоинство твое свет оный небесный, в честь тебе пришедший.
Исповедую Тебе, Иисусе, немощь мою, яко недостойни есмы прияти Тя, Божия Премудросте, но словом отжени язву сердечную и хвалителя мя яви днесь Господскаго праздника и мученика Або торжества.
Любовию твоею подвижеся ум наш, мучениче; сего ради приими малый сей дар, егоже по силе нашей принесохом: прости дерзновение и испроси нам днесь от Христа избавление, иже песньми достойно величаем тя.
Богородичен
Не презри люди Твоя, убогия и уничиженныя, но помощница да будет десница Твоя, крепкая и высокая, Рождейся от Девы, и избави нас от порабощения врагов наших, и победу даруй народу нашему.
Ирмос: Рождество твое нетленно, Дево; Бог из чрева твоего произыде воплощен и с человеки поживе; темже тя, Богородице, вси присно величаем.
Давидовым гласом вопиял еси, Або, и с благоразумным разбойником взывал еси крепко: помяни мя, Спасе, во Царствии! Ныне заступи воспевающих тя.
Егда приидет сладкий оный Судия и сядет на престолех Царствия Своего, мучениче, тогда умоли Его о нас, поющих, в прощение прегрешений.
Недостойное пение наше приими, блаженне, и не помяни злобы нашея, но просвети сердца восхваляющих тя и тьму грехов отжени от поющих тя.
Богородичен
წინაშე ძისა შენისა, ქალწულო, ჰღაღადებს სისხლი წმიდისა აბოჲსი. შეისმინე ოხაჲ მისი და შემოგჳკრიბენ მამულნი განბნეულნი, და უჩინე მზღუარი, ყოველთა კაცთაგან უსარჩლელი.
Ирмос: Исаие, ликуй: Дева име во чреве и роди Сына безначальнаго Еммануила, Бога же и Человека, Восток имя Ему; Егоже величаем, и Рождшую Его ублажаем.
На Просвещение: Собравый воды в собрание едино Божественным повелением и положивый во сокровищих влажныя бездны — Божие Слово — водою крещен бысть от Предтечи.
Безначальнаго Солнца Света Крещением смиришася и помрачишася во веки вреднии дуси лукавии, и яко солнце светят крещении человецы.
Або ради: Свыше призванный верный мученик Христов, светильник блистающий, блаженный Або, телом зде сокрыт бысть измаильтяны, Христом же душею светит во Царствии.
უვარის-მყოფელნი შენნი და მომსრველნი მართალთანი, სიცრუვისა მოქმედნი და ურწმუნონი ისმაიტელნი, ჵ, ქრისტე, მისცენ მწარესა მას საუკუნესა სატანჯუელსა დაუსრულებელსა.
Непобедимый мучениче, течение добре совершил еси и ныне водворяешися во свете неизреченном: моли Бога, да низложит враги наша коварныя и победу подаст благочестивому народу нашему.
Богородичен
Тя светильником светлым пророк прежде виде, Всенепорочная, имущую Христа, мысленную свещу, Имже просветихомся мы, во тьме страстей лежащии; сего ради ублажаем тя, Богородице Приснодево.
«Кровию мученическою…» (см. в Праздничной Минее)
Иоанна Конкозисдзе
Приидите днесь, вернии, видите мироносца, иже принесе себе в жертву Пострадавшему нас ради и излиянием крове облагоуха Церковь паче всех ароматов, и ныне молит Царя всех, Бога нашего, о спасении душ наших от всякия напасти.
Место оное жертвенное, на немже сожжено бысть всесвятое тело твое, блаженне, славо мучеников, уподобися олтарю святаго Аарона сошествием свыше огня, явственно, преподобне, светом блистающим; зряще сие, невернии удивишася, вернии же радовахуся о подвизех твоих Божественными похвалами.
Творение Григория Хандзтийскаго.
Егда простре мученик Христов, подвига победитель, выю свою мечу Христа ради, тогда возгласиша свыше безплотнии: взыди к нам, зовет тя Господь, и радуйся пред Ним; он же егда предаде дух Господу, небесная воинства с радостию предшествоваху ему, возведоша с пением на небо, и праотец Авраам срете и прият его в недра своя.
Иже убиша тя без суда, блаженне Або, осуждени быша на муку вечную, во ад и тьму кромешную, ты же сияеши пред Богом во свете во веки. И егда приидет Судия Благий и сядет судити на престолех Царствия Своего, тогда ходатай нам буди, доблественне, пред Богом.
2 стиха Антония Католикоса (см. в Праздничной Минее)
Слава Отцу и Сыну и Святому Духу.
ვითარცა წინაპარნი ჩუენნი მიისწრაფდეს ადგილსა მას, სადაცა დაწუეს გუამი შენი, ნეტარო აბო, ეგრეთვე აწ ტაძრად შენდა მყის სრბად მოვიწევით: მადლის მიცემად ღმრთისა, თაყუანისცემად ჯუარისა მის წმიდისა და ამბორისყოფად ყოვლად პატიოსნისა ხატისა შენისა, ხოლო შენ ძალითა ქრისტჱსითა დაიფარე ქუეყანაჲ ივერიისაჲ წვალებისაგან და სჯულისაგან უცხოჲსა, და მკჳდრნი მისნი ყოვლისაგან ძჳრისხილვისა.
И ныне, праздника
Славословие великое и отпуст.
На блаженных: от канона праздника песнь 1-я — на 4; и святаго песнь 6-я — на 4.
Прокимен, глас 7: Возвеселится праведник о Господе и уповает на Него.
Стих: Услыши, Боже, глас мой.
Апостол: 2 Тимофею, глава 2, стих 1 — Чадо Тимофее, возмогай во благодати…; конец — стих 11 — со славою вечною.
Аллилуиа, глас 4: Праведник, яко финикс, процветет, яко кедр, иже в Ливане, умножится. Стих: Насаждени в дому Господни
Евангелие от Иоанна, глава 15, стих 17 — Рече Господь Своим учеником: сия заповедаю вам…; конец — глава 16, стих 3 — службу мнится приносити Богу…
Причастен: В память вечную…
Из собрания Михаила Модрекили извлекла и составила псаломщица Тинатин Мчедлишвили.
