Последование обретения мощей преподобнаго и богоноснаго отца нашего Сергия Радонежскаго, игумена и строителя Троицкия лавры
Поем «Блажен муж», 1-й антифон.
На «Господи, воззвах» стихиры
на 8, глас 5.
Преподобному Сергию.
Радуется днесь светло, преподобне отче, Церковь Христова, просвещенная мощами твоими, о жизнию облеченный Сергие, и с верою похвалами празднует собор верных обретение мощей твоих, и благодарит Бога, подавшаго тобою велию милость.
От приснотекущих и неоскудных источников Святаго Духа почерпл еси, богоносне, обильно благодати исцелений, и кончина жития твоего честна бысть пред Христом Царем, и ныне обретение мощей твоих славно и преславно бысть во всех человецех, Сергие.
Яко украшение царское, мощи твоя прият днесь, преподобне отче Сергие, обитель твоя, имиже украшается и светло хвалится, и всему миру радости приобщает, и богатство благодатей твоих разделяет, и вопиет: Иисусе Всесильне, слава милостем Твоим.
Яко Солнце правды, сияет в тебе Христос Бог и во обретении мощей твоих паче разума просвещает; сего ради вопием ти: светлый светильниче и блистающий света ангеле, ходатай буди о спасении и просвещении душ наших.
Возвеселися таинственно славная Церковь обретением мощей твоих, отче, яже сохрани, яко камения многоценная, и поющим тя неоскудно дарует ходатайством твоим благодать исцелений.
Слава Отцу и Сыну и Святому Духу.
Ныне возвеселитеся, иночества любителие, и хвалебными песньми воспоим и восхвалим священников похвалу и России славу, нищих питателя и богатых законна правителя, жезл стоящих и падших возставителя, словом врача душевных страстей, утверждение и силу унылых, жития добраго кормчаго, и плодами безплодныя души обогатителя, и учением исполнителя; обретение честных мощей его вси восхвалим и святую раку костей его возвеличим, да молитвами его подаст нам Христос Бог днесь велию милость.
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим.
1. Премудрости Соломони чтение. (Праведных души в руце Божией…)
2. Премудрости Соломони чтение. (Праведницы во веки живут, и в Господе…) Писано под 9 марта.
3. Премудрости Соломони чтение (Праведник, аще постигнет скончатися, в покои будет…). Писано под 7 мая.
На земли ангеле и на небесех человече Божий, мира добре украсителю и сладостию благий, отче Сергие, хвалим тя, иже явился еси начальник иноков и пустынь праздных градотворец, и исцеляеши страсти немощи нашея, с верою поющих тя: Радуйся, севера звездо всесветлая и иноков просветителю, светильниче и пастырю; радуйся, благодеянием постников похвало и земли Российския радостное сияние; моли о поющих тя.
Оставил еси, святе, мир и взял еси крест, имже хвалился еси, треблаженне отче Сергие, и наставлением Святаго Духа и Божиим предведением направил еси стопы твоя во страну Радонежскую и воздвигл еси в пустыни обитель и церковь во имя Святыя Троицы во спасение душ и во пристанище многим; собраннии же в ней братия смирением своим достигоша меры великия, и изгоняху духи лукавыя, и исцеляху вся недужныя, и благохвальным пением воспеваху тя, яко пастыря великаго и проповедника веры.
Яко солнце, просияша силы чудес, преподобне отче Сергие, тобою в пустыни совершенных благодатию Божественною: скоти, яко словеснии, повиновахуся тебе, и зверие прещением отгоняхуся, человецы же, тобою исцеляеми, славляху Бога.
Мощи твоя святыя дашася Церкви твоей, всемудре, богоносне Сергие, подвигами просвещенныя и благоуханныя, и празднику изшествия твоего бысть нам предвозвестник, и радостию и светом духовным исполниша тепле восхваляющих тя.
Аще и возвысился еси от плоти к вожделенному тобою Богу, но не оставил еси сиры чад и любителей твоих, яко даровал еси нам благословение честных мощей твоих, ихже обретение празднуем и молим тя: причастники нас сотвори радости и светлости твоея.
Слава Отцу и Сыну и Святому Духу.
Аще и возвысился еси от плоти к вожделенному тобою Богу, но не оставил еси сиры ученики и любители твоя, отче Сергие, яко даровал еси Церкви всехвальныя Божественныя мощи твоя во свет и венец благодатей, и покланяемся им, иже в долготу времен сокровенни бяху в лавре твоей, но явил еси их дивным видением во отгнание духов лукавых; ихже обретению лето от лета празднуем и молим тя: яко имеяй дерзновение пред всемилостивым Царем, нас, отеческой благодати и помощи твоей присно припадающих, помяни пред Ним и народ наш, напастьми и скорбьми обстоимый, избави ходатайством твоим.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
В пустыни уединенней вселился еси и душу твою непорочно сохранил еси, блаженне Сергие, и Святыя Троицы явился еси служитель, и храм воздвигл еси во славу Ея, и лавру преславную возвел еси в житие собору иноков, в нейже лежат святыя мощи твоя и присно восхваляется память твоя, преподобне; и мы с ними вопием ти, всеблаженне: покрый нас от зол и низложи враги наша невидимыя и видимыя.
Стих: Честна пред Господем смерть преподобных Его.
Приидите, пустыни любителие и Божественнаго жития рачителие, приидите, украсим преподобнаго отца Сергия Радонежскаго, иже бесовскую лесть дерзновенно мужеством умертви и, прешед пучину прелести, достиже Божественнаго пристанища, и ныне светом чудес добре просвещает мощи своя.
Стих: Блажен муж, бояйся Господа, в заповедех Его восхощет зело.
Богатство духовное и сокровище Божественное имамы гроб твой, в немже сокровенны суть мощи твоя, Сергие славне, крепосте и похвало иноков; Христа Бога моли, да подаст всем православным народом мир и души наша избавит от мук, яко милостив и Человеколюбец.
Слава Отцу и Сыну и Святому Духу.
Радуется ныне страна Радонежская, и паче веселится лавра Святыя Троицы о вселении твоем в ней, яко присно напаяшеся слезами твоими, богоносне Сергие, и ныне кости твоя лежат в ней и богато источают исцеления душ и телес.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
Добродетелию подвизался еси, яко воин Христов добропобедный, и презрел еси всю суету мира, но молитвою и бдением образ был еси учеником твоим и явился еси правило иноков и светлое светило всему миру; ныне молим тя, яко имеяй дерзновение пред Пресвятою Троицею, непоколебимо сохрани весь православный народ, преподобне отче Сергие, радующийся светлой памяти твоей.
Пустыни житель и во плоти ангел, и чудотворец явился еси, богоносе отче Сергие; поста, бдения и молитвы благодать с небесе приял еси и исцеляеши недуги немощных и души, верою к тебе притекающих. Слава Давшему ти крепость, слава Венчавшему тя, слава Действующему тобою всем чудеса.
Тропарь преподобнаго. Слава… Тойже. И ныне…
Еже от века утаенное и ангелом несведомое таинство, Богородице, тобою сущим на земли явися: Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
Житие благочестно на земли совершил еси и явился еси правило иноков и светило пресветлое всего мира, богоносне отче, и просвещаеши скоро к тебе прибегающих, святе Сергие; ныне же возсияй в сердцах наших свет истинный и ходатай буди непрестанно хвалящим тя.
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
Светом неприступным сияеши, и яко звезда возсиял еси в пустыни Радонежстей, и умножил еси стадо Христово, преподобне отче; мощи же твоя почитающим избавление испроси прегрешений, яко предстоя Богу.
Слава Отцу и Сыну и Святому Духу, и ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
Подобно Иоанну Крестителю в пустыни вселился еси, преподобне, и нестяжанием жительствовал еси, яко отнюдь не имел еси, блаженне, пищи телесныя, но питался еси Духом Святым; темже в подражание тебе воздвигл еси души безчисленныя и собрал еси во славословие Богу и во благодарение мужества твоего. Пустыни Радонежския славо, моли Христа Бога, да дарует оставление грехов с любовию празднующим обретение честных мощей твоих.
Слава Отцу и Сыну и Святому Духу, и ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Честна пред Господем смерть преподобных Его.
Стих: Что воздам Господеви о всех, яже воздаде ми?
«Всякое дыхание…» Евангелие от Луки, глава 6, стих 17 (Во время оно ста Иисус…); конец — стих 23 (…мзда ваша многа на небесех…).
Любовию Христа Спаса разжегся, к жизни безпечальней потщался еси и вшел еси в Божественный покой, днесь же мощи твоя даровал еси нам во ограждение и утверждение, во отгнание духов лукавых и во изгнание всех болезней.
Ирмос: Чудесем спасе люди Господь, и море волнующееся словом изсуши древле, и днесь нетленно родися от Девы и возведе нас на небо, естеством равный Отцу, Емуже воспоим.
Река мироточная прозябе нам днесь, и источник благоухания, и поток сладостей излияся на ны, и бездна благодатей — всехвальныя Божественныя мощи твоя, богомудре Сергие.
Творец ангелов предуведе тя усерднаго исполнителя воли Своея и, во утробе матерней сущу, троекратным возглашением твоим возвести всей земли, яко будеши истинный служитель Троицы.
Начало премудрости стяжал еси в самом начале юности твоея, преподобне отче, и страхом Господним пригвоздил еси плоть твою, святе Сергие, и оттуду возшел еси в любовь оную безстрашную святых и благодатию Божиею просиял еси.
Светлое обретение мощей твоих празднует днесь весь православный народ и лавра твоя, юже поручил еси Пресвятей Матери Божией.
Сокровище, прежде сокровенное в недрах земных, явися и мир исполни богатства дарований, и Церковь обогати благоуханием благодатей, великий наставник земли Российския.
Слава Отцу и Сыну и Святому Духу.
Источник Божественный чудес знаем тя и исцеления недугов обильно приемлем, иже с верою покланяемся всечестным мощем твоим, всехвальне Сергие.
И ныне и присно и во веки веков. Аминь.
Душу мою, падшую от многих болезней, о Богородице всеславная, исцели, да благодарственным гласом усердно величаю тя присно.
Ирмос: Боже, призри на пение раб Твоих и смири дерзость прелестника, и превознеси днесь Церковь, и утверди непоколебимо в православии уповающия на Тя.
Провиде Бог, Зритель умов, чистоту души твоея, преподобне, сего ради просвети ум твой и исполни тя премудрости Божественныя, и вещание сокровенных таинств дарова тебе.
Яко священник Божественный, светло облеклся еси в священную одежду правды и благодати; сего ради веселится обретением мощей твоих Церковь, юже украсил еси подвигом твоим Божественным.
Постом плоть оградил еси, блаженне, и страстей движения умертвил еси молитвою и бдением; сего ради сила Святаго Духа вселися в тя и светилом краев небесных яви тя.
Со ангелы совершал еси службу на земли, и со ангелы почте тя Христос, Сергие славне, и со апостолы и святыми сопричте тя.
Всесвятыя мощи твоя, преподобне отче Сергие, светила мира, днесь дарованы быша Церкви во свет, и сияние, и венец благодатей, и богатство, и воспевает их усердно.
Слава Отцу и Сыну и Святому Духу.
Ветвь плодовита был еси, богоносне, прозябшая от корений боголюбцев, насаждена при исходищих Божественных Писаний, и принесл еси плод сладкий — разумение их.
И ныне и присно и во веки веков. Аминь.
Провиде тя дверь света Иезекииль, еюже пройде Царь, якоже весть, Дево Нетленная; сего ради молю тя: отверзи ми двери покаяния, вводящия в Царствие.
Просветил еси дни твоя, блаженне, в пустыни крепким подвигом, имже приближился еси к сиянию Божественному, богоносне отче Сергие; и оставление безчисленных грехов наших испроси от Христа празднующим обретение мощей твоих.
Ирмос: Прежде возвести пророчески спасение человеков Аввакум и глаголаше: во гневе помянул еси милость; от гор приосененных пришел еси, Спасе, Слово, Создатель людей сих.
Не утаи Бог трудов твоих, но знамении и чудесы возвести сияние подвигов твоих и во всех вожделенно сотвори слово и видение твое, богоблаженне отче Сергие.
Егда виде тя ученик твой со ангелом сослужаща во олтари, тогда отверзе безмолвная уста, преподобне отче, и Прославившаго тя велегласно прославляше.
Был еси, блаженне, подобен Богу, отец сирым и питатель алчущим, одеяние нагим и немощным и врач недугов болящих, отче Сергие.
Тебе, яко оружие мужества и терпения, отче, имеют стада Христова, и тобою на подвиги укрепляются; мощи же твоя дарованы быша нам во исцеление язв наших, и ты на небесех духом присно сияеши пред Богом.
Тьмою греховною покровенным душам свет незаблудный был еси и мглу похотей отгонял еси от них светом, и поручитель и примиритель к Богу был еси, и облегчитель тяготы трудов.
Слава Отцу и Сыну и Святому Духу.
Светильником светлым сущим в мире возсия тя Свет Отчий, и блистание добродетелей твоих простерл еси до краев небесных, яко сияние Его, преподобне отче Сергие; сего ради благоволи всесвятыя мощи твоя днесь престолом Своим положити.
И ныне и присно и во веки веков. Аминь.
Дева родила еси и матерски не истлела еси, но Мати была еси и Девою пребыла еси; сего ради воспеваем ти: радуйся, Богородице.
Ирмос: Соблазнов темных нощи во оставление пришел еси, Христе; утреннююще приносим Тебе песнь, якоже достоин еси, да наставиши нас на путь мирен, внити в Царствие, еже обещал еси нам.
Яко звезда возсиял еси в пустыни Радонежстей и с верою к тебе прибегающим скоро помогаеши; сего ради ублажаем тя и, яко теплаго заступника, песньми величаем.
Источник Святаго Духа в сердце твоем стяжал еси, таинственныя премудрости и богатства благодати исполнився, о треблаженне отче; почитающия тя избави от скорбей и напастей.
Стадо, вверенное тебе, кротким и смиренным духом пасл еси, святе отче Сергие, и, подобно Христу, всех учил еси преходящее богатство расточати, блаженне, да раздают нищим щедро, мудре, и насыщают чрева скудных.
По обычаю своему разжжеся диавол на брань с тобою, преподобне, но ты, просвещен сиянием благодатей духовных, яко столп огненный, разсекл еси моря напастей, блаженне Сергие, и совершил еси течение твое.
Господь, силою крепкий, даде ти, Сергие, силу на духи лукавыя, и изгонял еси их, и ихже мучаху, свобождахуся и гласом благодарения славляху силу Христову.
Слава Отцу и Сыну и Святому Духу.
Якоже непоколебимо сохранил еси землю твою, нападеньми врагов поколебанную, преподобне отче Сергие, тако и ныне избави весь православный народ, восхваляющий тя и на ходатайство твое с надеждою уповающий.
И ныне и присно и во веки веков. Аминь.
Освяти Бог чрево твое всесвятое, Невесто, егда святостию вселися в не, и на Кресте вознесенный создания с Собою вознесе.
Ирмос: Сниде Иона во глубину морскую и вопияше к Богу молебно: возведи мя от потопления, Господи; аз же, Христе, к Тебе вопию: презри множество прегрешений моих.
Житие благочестно на земли совершил еси и явился еси правило иноков и светило пресветлое всего мира, богоносне отче, и просвещаеши скоро к тебе прибегающих.
Великий пустынниче славных пустынь Радонежских, и ныне не умолкни подвизатися о нас ко Христу, яко всячески можеши помогати всем, иже на молитвы твоя уповают и к ходатайству твоему прибегают.
Со ангелы радуешися и с преподобными веселишися и славу Подвигоположника Бога пресветло зриши, преподобне отче Сергие; ныне о нас молитися не престани и испроси нам благодать, благословение и милость.
В долготу времен сокровенны бяху всенепорочныя мощи твоя, о всехвальне Сергие, днесь же явил еси их дивным видением во отгнание духов лукавых; ныне и в сердцах наших возсияй свет истинный и ходатай буди почитающим мощи твоя.
Слава Отцу и Сыну и Святому Духу.
Слышав плач отца и видев отроча его, от недуга умершее, умилосердился еси о бедном оном, со слезами к тебе припадшем, подобно Христу, и помолился еси тепле пред Ним; тогда услыша бездна милосердия, и воскреси отроча, и дарова ему жизнь.
И ныне и присно и во веки веков. Аминь.
Новаго Отрока родила еси нам, Преждевечнаго, безлетно со Отцем соседящаго, Богородице, Иже Крестом обетшавшия грехом человеки обнови и Божества причастники сотвори.
Явлениями свыше, яко солнце светлое, возсиял еси нам из гроба сокровище честное — святыя мощи твоя, богатство безценное, неистощимое, и злато боголучезарное, и радостию божественною исполнил еси землю твою и весь православный народ, святая же рака мощей твоих, яко источник неоскудный, источает благоухание благодатей и исцеление подает почитающим ю. Не забуди нас, величающих тя, отче, помяни нас пред Пресвятою Троицею и испроси нам мир, да зовем: радуйся, богомудре отче Сергие!
Ирмос: Любовию всех Спаса ни во чтоже вмениша отроцы ярость мучителя богоненавистнаго и, во огнь ввержени, не опалишася и тако вопияху: отец наших Боже, благословен еси.
Прослави Бог святую память твою, и паче раку честных костей твоих, яко святителями и князьми достойно с честию покланяется, поющими: отцев наших Боже, благословен еси.
Корень злых отсекл еси секирою словес твоих и насадил еси в душах Божественную премудрость, преподобне Сергие; сего ради пресветлых мощей твоих обретение похвалами величаем и ко Господу вопием: отцев наших Боже, благословен еси.
Бесов полки посекл еси, богоносне, яко доблий воин Спасов, мечем трудов, и пожегл еси, яко огнем, станы их пещию молитв твоих: отцев наших Боже, благословен еси.
Мощей твоих сила бесы отгоняет, яко, не могуще зрети силы, бежат и потопляются; мы же с любовию покланяемся и лобызаем я и ко Господу вопием: отцев наших Боже, благословен еси.
Слава Отцу и Сыну и Святому Духу.
Источник Божественный чудес знаем тя и исцеления недугов обильно приемлем, иже с верою мощей твоих касаемся и душею и телом здравие приемлем.
И ныне и присно и во веки веков. Аминь.
Благодатию молитвы твоея, святе, хвалимся усты и душею, славне, яко тобою от напастей и волн, и тяжких печалей, и страстей греховных избавляемся вси.
Ирмос: Отроцы в Вавилоне неопалимии прежде образ тебе быша, Дево преславная, егда от тебе родися огнь Божества и сохрани тя неврежденну, непорочну; вси людие присно благословят тя.
Разрушитель волхвований явился еси, отче, якоже великий апостол Петр, знамением святаго креста, и посрамил еси вся враги Божия, и от богомудрых прославился еси.
Матерь Божию, яко живу ходящую и со Иоанном и Петром телесно шествующую, зрети избра тя кивот оный нетленный, Бога вместивший, между многими отцы, Сергие богоизбранне; не престани, преподобне, молитися о восхваляющих тя.
Принеси моление наше Матери Божией пред Христом, соспешеством небесных воинств и Петра и Иоанна апостолов, блаженне отче Сергие; миру мира испроси и душам нашим велию милость.
Волны напастей утоляет сила мощей твоих, преподобне и богоносне Сергие, и проповедует великое дерзновение твое, еже имаши к Богу.
Не имам слова, достойнаго украсити светлыя добродетели твоя, блаженне, но прости недостойному сему и приими малое и немощное пение, и вместо сего благодать твою даждь ми, преподобне отче Сергие.
Благословим Отца и Сына и Святаго Духа, Господа.
Егда собрася лик учеников твоих при преставлении твоем, блаженне, радости исполнился еси видением их, и благословил еси всех, и верно и явственно научил еси пети сице: благословите, вся дела, Господа и превозносите Его во веки.
И ныне и присно и во веки веков. Аминь.
Избавила еси человеческое естество от клятвы рождеством твоим, Дево Нетленная, яко родила еси единаго Благословеннаго, Благословляющаго нас, исполняющаго благодатию небо и землю.
Хвалим, благословим, покланяемся Господеви, поюще и превозносяще Его во вся веки.
Ирмос: Подобает молчание, понеже не можем достойно восхвалити тя днесь, Богородице; обаче не умолчим страха ради, но по немощи нашей принесем хваление, имже величаем тя.
Утверждение и похвала церквам явился еси, богомудре Сергие, и чудесы Божественных мощей твоих присно утверждаеши ум верных.
Царствуя пред Христом, блистанием Духа просвещенный и великих подвигов твоих твердостию украшенный, призри на ны свыше, богоносне отче Сергие, и утоли движения невидимых и видимых страстей, и отжени от нас напасти и бесовская нападения.
Отгоняются множества бесов, Сергие всеблаженне, от всечестных костей твоих; темже зело от них страждущий, егда гроба твоего с верою коснуся, абие свободу обрете.
Яко зерцало светлое, в писании оставил нам «Житие» твое ученик твой Епифаний премудрый и зрители нас сотвори сияния твоего, егоже причастник бе духом и подражатель тебе добродетельми, блаженне Сергие.
Не может язык человеческий исповедати подвиги твоя, о святе, угодниче Божий, яко прешел еси мир сей достойно, отче дивный, и ныне, наслаждению райскому соединився, со ангелы радуешися и царствуеши со Христом во веки.
Слава Отцу и Сыну и Святому Духу.
Испроси, преподобне, всему миру мирное сохранение, и благочестивому народу нашему — победу и утверждение православия от Христа Бога, и душам нашим обильно велию милость.
И ныне и присно и во веки веков. Аминь.
Носиши убо Носящаго всех святыма рукама твоима; Егоже моли, святая, от чуждаго злодейства невредимо жити нам.
Се, источник благодати и множества знамений неоскудный, богато — гроб костей твоих имамы, вернии, во ограждение крепости, в сокровище благодати и во отгнание бесов; сего ради радуются днесь лики иноков и веселятся чини отцев в праздник твой, и проповедуют благодать благодеяний твоих, и приносят Господеви хвалу.
Слава Отцу и Сыну и Святому Духу.
Празднует ныне святая Церковь, блаженне, обретение мощей твоих и вопиет к тебе: призри на ны, о отче блаженне, с небесе и избави нас от волн мирских непотопляемы.
И ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор преподобных, с нимиже восхваляем тя, Дево.
Богоносне отче, святе Сергие, ты иго Христово на выю взял еси и мужеством нападения врагов сокрушил еси и пустыни градом показал еси; сего ради ублажаем тя и с верою вопием ти: о прекрасная Радонежа славо, тебе Христос водвори с безплотными, ходатай буди нам.
Богоносне отче, святе Сергие, ныне разреши мрак прегрешений и страстей и даруй благодать и милость любящим тя, и ко спасению вечному направи ходатайством твоим почитающих тя и святым мощем твоим с любовию покланяющихся.
С верою собравшиися вернии почитаем тя, яко игумена великаго, богоносне отче, святе Сергие, и с верою молим тя: о святому Антонию уподобивыйся пустынниче, иже с радостию изшел еси в пустыню непроходимую и вместо зверей вселил еси человеки, ангелом равныя, ходатай буди пред Богом, да спасет нас.
Богоносне отче, святе Сергие, явился еси правило иноков и похвала православных, услаждающее и светлое светило всея России, и немощным искуснейший и честный врач, яко не убоялся еси страха прелестнаго врага, и луки и стрелы бесовския сокрушил еси, и лютыя сети их изнемощил еси Божественным подвигом твоим. О дарований твоих данных, блаженне, имиже злых бесов посрамил еси и прославил еси славу Христову!
Слава Отцу и Сыну и Святому Духу.
Вострубим трубою песней, и возыграем, и возвеселимся, радующеся во всесвятый праздник всехвальнаго учителя нашего. Соберитеся, о вернии, и духовными похвалами украсим и восхвалим блаженнаго отца нашего, яко реки учения нам источившаго, и воспоим: немощнии — недугов врачу, скорбящии — избавителю, согрешившии — теплому ходатаю, печальнии — утешителю, путешествующии — спутнику, плавающии — кормчему, и вси всюду, всех надежду с верою величающе, глаголем: ходатай буди нам, преподобне отче Сергие, да молитвами твоими и прошением вооружит нас Господь Бог силою Своею непобедимою на вся видимыя и невидимыя враги наша и спасет нас.
И ныне и присно и во веки веков. Аминь.
Богородичен Димитрия, царя грузинскаго, Багратиона.
Богородица и всечестная, Мати Дева, лилия прекрасная, ей благовествова ангел крылатый; тобою веселится Царь венценосный, и Тому служат царие многоподданнии.
Славословие великое и отпуст.
На литургии: на блаженных от канона преподобнаго песнь 3-я и 6-я.
Прокимен, глас 7: Честна пред Господем смерть преподобных Его.
Стих: Что воздам Господеви о всех, яже воздаде ми?
Апостол: 1 Коринфяном, глава 12, стих 7 (Братие, коемуждо же нас…); конец — стих 12 (…разделяя властию коемуждо, якоже хощет…).
Аллилуиа, глас 6: Блажен муж, бояйся Господа.
Стих: Сильно на земли будет семя его.
Евангелие от Матфея, глава 11, стих 27 (Рече Господь Своим учеником…); конец — глава 12, стих 1 (…бремя Мое легко есть…).
Причастен: В память вечную…
