Праздничное последование святым исповедником отцем нашим Иоанну и Георгию-Иоанну Бетанийским
— «Блажен муж», 1-й антифон.
— На «Господи, воззвах» стихиры (поются на 5-й глас).
— На 8. (Глас 5).
Преподобным Иоанну и Георгию-Иоанну
Богоносныя отцы, блаженнии Иоанне и Георгие-Иоанне исповедницы, великии архимандриты и небоподражательныя Бетании старцы-духовницы, Христа ради потрудившиися, знамении и чудесы безплодную и теплохладную веру оживотворившии; ангелом собеседницы и Света непреходящаго со святыми апостолы и мученики причастницы и сонаследницы, иже сияете сиянием Божественным, яко пред Ним стоите, благодатию просвещени, дерзновенно, и зрите присно славу Его, и наслаждаетеся непрестанно благостию Его: Христа молите ниспослати Церквам единство, мир и велию милость.
Богоносныя отцы, блаженнии Иоанне и Георгие-Иоанне исповедницы, златокованнии светильницы благочестия и сило и утверждение собора иноческаго, честию священства украшеннии и достойно служившии Божественному жертвеннику, огнепальнии столпи Церкве иверския; небеснии поборницы и крестоносцы народа нашего; иноков просветителие и столпи непоколебимии терпения, утверждение и древо Церкве, светильницы всесветлии и светила народа грузинскаго, сокровища добродетелей: Христа молите ниспослати Церквам единство, мир и велию милость.
Богоносныя отцы, блаженнии Иоанне и Георгие-Иоанне исповедницы, иноков похвало и утверждение правыя веры, Святыя Троицы избраннии служителие, духовнаго рая — Бетании — насадителие и оттуду истины проповедницы, ангелом подобницы, от земли на небо вознесеннии, Царствия наследницы, ангельским пением небеснии гражданове, со святыми венценосием во свете Божия видения просвещеннии и святою молитвою вашею всех почитающих вас ходатаи: Христа молите ниспослати Церквам единство, мир и велию милость.
Богоносныя отцы, блаженнии Иоанне и Георгие-Иоанне исповедницы, отцы отцев, главы иноков и наставницы отшельников, житием вашим непобедимость Церкве явившии, благодатию учения вашего народ от сна духовнаго возбудившии и духовное мужество иверов укрепившии, законом православия и Божественным учением многих научившии, иже пред Пресвятою Троицею радуетеся, многим сиянием просвещени, и помощницы есте молящих вас: Христа молите ниспослати Церквам единство, мир и велию милость.
Ина стихира (глас 2)
«О, венцы…»
Кими похвальными венцы увенчаем Церкве Христовы утверждения и всех просвещающих учением, апостольския силы достигших и из Бетании истину проповедавших, помощников и учителей христиан и ходатаев их пред Богом, всехвальных отцев наших Иоанна и Георгия архимандритов, имиже мнози хождаху путями истины и славляху Христа, имущаго велию милость. (Дважды)
Кими похвальными песньми воспоем саждения райская, плод благий приносящая, со ангелы служителей, бездны разума, неизреченных зрителей, великих помощников и учителей, всех лукавых и ленивых обличителей и трезвенных священников и иноков укрепителей, ихже подвиги Христос благослови, имеяй велию милость?
Кими похвальными пении воспоем церквей украсителей и пастырей и учителей иноков, иже во времена оныя владычества безбожных явишася народу иверскому и научаху любви к Богу и отечеству и наставляху на молитву, на нихже возлагаем упование наше, да единством веры и любовию исповедуем их яко наставников и утверждение всех православных, имущих велию милость.
Слава Отцу и Сыну и Святому Духу.
Ныне возвеселитеся, иночества любителие, и возрадуйтеся во всесвятый праздник Рождества Богородицы; соберитеся, о вернии, и духовными похвалами украсим и восхвалим блаженных отцев наших и учителей славных Иоанна и Георгия Бетанийских, ихже память празднуем в той же день, и хвалебным пением воспоим священников похвалы и грузин славы, источники чудес и верных великих ходатаев и заступников: Радуйтеся, светильницы всесветлии, иже концы Грузии чудесы просветисте; радуйтеся, скорбящих Божественная радости и в напастех сущих теплии заступницы, преподобнии и чудотворцы отцы Иоанне и Георгие-Иоанне Бетанийстии, непрестанно молите о нас Христа Бога, с верою и любовию почитающих присно радостную и всеблаженную память вашу. (Глас 6).
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим.
(Глас 6).
На входе прокимен дне
— Паремии — чтения преподобным — 3.
1. Премудрости Соломони чтение. (Праведных души в руце Божией…) 2. Премудрости Соломони чтение. (Праведницы во веки живут, и в Господе…) Писано под 9 марта. 3. Премудрости Соломони чтение (Праведник, аще постигнет скончатися, в покои будет…) Писано под 7 мая.
— На литии стихира храма — 1.
Таже преподобным отцем. Самогласен. (Глас 2).
В духовном сем всепетом собрании, Духом Святым призваннии, усердно собравшиися людие, воспоим и возрадуемся достойно памяти богоносных отцев наших, в Бетании подвизавшихся, Иоанна и Георгия-Иоанна архимандритов, во время оно владычества безбожных многих к Богу обративших и уповающих на них помощников и ходатаев.
На земли ангели и на небесех человецы Божии, мира добре украсителие и сладостию благии, преподобнии отцы наши Иоанне и Георгие-Иоанне исповедницы, духовнаго рая — Бетании — насадителие и оттуду истины проповедницы, хвалим вас, иже бысте яко две души во едином теле и молитвою и молением припадасте ко Иисусу и просисте от Него народу вашему спасения и милости.
Оставили есте, святии, мир и взясте крест, имже хвалистеся, треблаженнии отцы, и наставлением Святаго Духа направисте стопы ваша к Богу и, смирением вашим достигше меры великия, изгоняли есте духи лукавыя и исцеляли есте недужныя; вознесшеся же пред Бога, яко два столпа огненная, молитвою и молением припадаете ко Иисусу и просите от Него народу нашему спасения и милости, душам же нашим оставления грехов и спасения.
Яко пастырие велицыи и проповедницы веры, боголепно проповедасте Евангелие Царствия и святую Церковь иверскую обогатисте подвигом Божественным; имже ныне просвещеннии величаем вас, небесных человек и земных ангелов, мира украшения и подвижников очи, иже умножисте стадо Христово и правдою и святостию наставницы бысте подвижником, и молитеся Богу о душах наших.
Бывше истиннии служителие Троицы, обильно приясте от Нея дары разума и, умудрившеся разумети силу святых писаний, достигосте обители Бетанийския во спасение душ и во пристанище многим, и во время глада делателей плодоносны твористе и питасте алчущих; ныне же возсиянием чудес блистаете от святыя оныя обители по земли нашей и духовная благоухания простираете на души и умы наша.
Память ваша во веки пребывает, пастырие добрии, и, аще и отшедше от нас, не отступисте от нас, но, благою любовию соединени друг со другом и с Богом и сожителие ангелом на небесех, исцеляете страсти немощи нашея и уповающим на вас обильно подаете благодать и милость.
Слава Отцу и Сыну и Святому Духу.
Небеснии человецы и земнии ангели, благодатию и милостию Божиею достигше Бетании во пристанище душ и в просвещение рода нашего, и ныне ходатайствуйте пред Богом, да не прогневается на ны по беззаконием нашим, но возрастит и умножит и исполнит нас духа премудрости, взаимныя любве и Божественнаго разума, да избежим всех сетей и одолеем злыя козни невидимаго и видимаго врага.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
— На стиховне стихира. (Глас 8).
Имели есте житие высокое от юности, свидетельством святых писаний утвержденное, отцы, веру истинную и сердце милостивое, смирение и благоговение, очи ума, всецело разумно зрящия, иноков правила и похвалы, треблаженнии отцы Иоанне и Георгие исповедницы!
Стих: Честна пред Господем смерть преподобных Его.
Яко звезды возсиясте во святей обители Бетанийстей, силою Крестною укрепляхуся и всячески посрамисте прелесть богохульников, и основание бысте кающимся.
Стих: Блажен муж, бояйся Господа, в заповедех Его восхощет зело.
Весела есть Церковь грузинская обретением мощей ваших, яже сохрани, яко камения многоценная, и неоскудно дарует нам ходатайством вашим исцеление душ и телес,
Слава Отцу и Сыну и Святому Духу.
Множество иноков наставников вас исповедует, богоносныя отцы наши Иоанне и Георгие Бетанийстии, яко исполняются Божественных благодатей, яже остависте, и наслаждаются памятию вашею, сподвижницы; молите Христа Бога, да помилует души наша молитвами вашими.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
— «Ныне отпущаеши».
«Отче наш»: Тропарь: Бетанийстии отцы дивнии, ангелы нарицаемии от всех ведущих вас: Иоанне, от юности делателю украшения обители Божия; Георгие, дарованием пророчества украшенный; во тьме беззаконий возженнии светильницы православия, молите Христа Бога помиловати души наша. — Дважды. (Глас 6).
— «Богородице Дево» — единожды.
— Благословение хлебов.
— На «Бог Господь» тропарь преподобных. — Дважды.
«Слава», «И ныне» — Богородичен воскресный отпустительный по гласу тропаря: «Иже блаженну нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя ангелом: срадуйтеся Мне, яко обретеся погибшая драхма. Вся премудростию устроивый, Боже наш, слава Тебе». (Глас 6).
— По 1-м стихословии седален. (Глас 1).
Житие благочестно на земли совершисте и явистеся правило иноков и светила пресветлая всего мира, святии исповедницы отцы Иоанне и Георгие, и просвещаете скоро к вам прибегающих, блаженнии; ныне возсияйте в сердцах наших свет истинный и ходатаи будите хвалящим вас. (Дважды)
Слава Отцу и Сыну и Святому Духу.
По пророчеству Гавриила юродиваго, егда изнесоша от гроба сокровище честное — святыя мощи ваша, богатство безмездное, неоскудное, и злато богосветлое, — радости Божественныя исполнися земля наша и святый православный народ.
И ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
— По 2-м стихословии седален. (Глас 4).
Яко звезды возсиясте во странах Бетанийских, преподобнии отцы наши, блаженнии, и умножисте стадо Христово во время владычества безбожных; и ныне память вашу совершающим избавление испросите прегрешений, яко предстояще Богу.
Слава Отцу и Сыну и Святому Духу.
Провиде Бог, Зритель умов, чистоту души вашея, и просвети ум ваш, и исполни вас премудрости Божественныя, и вещание сокровенных таинств дарова вам; и ныне ходатаи будите пред Богом, да даст нам сердце разумно и мудро, во еже разумевати добро и зло.
И ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
— 19-я кафизма — избранные псалмы.
— По величании седален. (Глас 8).
Приидите, вернии, подвижника Христова Иоанна единодушно украсим, богомудраго учителя, благодатию украшеннаго, веры поборника непобедимаго, стену неразрушимую, органа духовнаго и покаяния премудраго писателя, светило Божественным светом украшенное и светильника всех концев небесных, верных украшение и утверждение закона; того воспоим, да ходатай будет душам нашим.
Слава Отцу и Сыну и Святому Духу.
Приидите, вернии, подвижника Христова Иоанна единодушно украсим, богомудраго Иоанна, бездну благодати, реку премудрости, источник воды живыя, сокровище Божественнаго богатства, главу и начало богословия, светильник явленный, всячески неоскудно светящий церквам Христовым, закона предел и вернаго пастыря и учителя; того воспоим: богоносне отче, ходатай буди о душах наших.
И ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
— Степенна, 1-й антифон, глас 4
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Слава…
Ненавидящии Сиона, посрамитеся от Господа, и яко траву изсохшую поядет вас геенна.
И ныне…
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Прокимен: «Честна пред Господем смерть преподобных Его». (Глас 7).
Стих: «Что воздам Господеви о всех, яже воздаде ми?»
«Всякое дыхание…» Евангелие от Луки, глава 6, стих 17 (Во время оно ста Иисус…); конец — стих 23 (…мзда ваша многа на небесех…).
По 50-м псалме стихира.
Самогласен. (Глас 6).
Во время оно владычества безбожных, егда в земли нашей обладаху христоненавистницы, изыде слава подвига вашего, богомудрии, и мнози спешаху видети и слышати святыню вашу; сего ради на небесех обретосте мзду трудов и достигосте ангельскаго чина, ихже житию непорочно поревновасте, преподобнии отцы Иоанне с Георгием; дерзновение имуще к Богу, мира просите душам нашим.
1-й канон Богородицы, на 6 (ищи 28 сентября).
2-й канон преподобных, на 8. (Глас 1).
Ирмос: Поем Тебе, Господи Боже наш, Иже провел еси люди Твоя сквозе море и потопил еси во глубине колесницы фараоновы и силу его.
Преподобнии отцы Иоанне и Георгие Бетанийстии, молите Бога о нас.
От юности возлюбил еси Господа и, уразумев святую Божественную волю Его, блаженне Иоанне, начал еси течение по тесному пути иночества.
Преподобнии отцы Иоанне и Георгие Бетанийстии, молите Бога о нас.
Дворянин славный, от древних благородных родов, имел еси любовь к народу и отечеству и вместо воинскаго дела избрал еси служение Господу, всеблаженне Георгие.
Преподобнии отцы Иоанне и Георгие Бетанийстии, молите Бога о нас.
Бегая мятежей мира, любовию Христовою уязвлен, двунадесятилетен облеклся еси во крест Его, святе Иоанне, и, последуя стопам Его, отшел еси в Бетанию.
Преподобнии отцы Иоанне и Георгие Бетанийстии, молите Бога о нас.
Видением свыше оставив дом родителей твоих, вселился еси на месте непроходимем, еже никтоже весть, разве Бога, и непрестанною молитвою отгонял еси диавольская прелщения и угашал еси лютыя его сети.
Слава Отцу и Сыну и Святому Духу.
Радуется ныне Церковь грузинская памяти вашей и повелевает всем верным ублажати вас, ревнителей пламенных и грешных душ путеводителей.
И ныне и присно и во веки веков. Аминь.
Владычице тварей, моли всех Творца, да славы отец сподобит хвалами величающих и с желанием воспевающих тя.
Ирмос: Ты, Христе Боже наш, укрепляяй уповающия на Тя, на камени веры утверди нас, уповающих на Тя.
Преподобнии отцы Иоанне и Георгие Бетанийстии, молите Бога о нас.
Пребывая в послушании у игумена Бетании, непрестанно трудился еси, Иоанне, о возстановлении разоренныя обители и жестокий оный труд со смирением носил еси.
Преподобнии отцы Иоанне и Георгие Бетанийстии, молите Бога о нас.
Юноша, яко старец и мудрый, жестокость пустынническую избрал еси паче мирския чести и, вселився в обитель Хирсийскую, преподобне всеблаженне Георгие, вступил еси в подвиг трудный и жестокий.
Преподобнии отцы Иоанне и Георгие Бетанийстии, молите Бога о нас.
Достигнув Афонския горы, вселился еси в грузинскую обитель Иоанна Богослова и елеем подвигов и трудов, блаженне Иоанне, напитал еси светильник девства.
Преподобнии отцы Иоанне и Георгие Бетанийстии, молите Бога о нас.
Постригшися священномучеником Назарием митрополитом в ангельскую схиму, имел еси Христа споборника на брань со врагом; сего ради моли Его, всеблаженне Георгие, да избавит нас от безчисленных грехов.
Слава Отцу и Сыну и Святому Духу.
Ходатаями ко Богу посылаем вас, сугубых подвижников — мужественнаго Иоанна с Георгием, — да отженет напасти и бесовская нападения от уповающих на вас.
И ныне и присно и во веки веков. Аминь.
Эфира пресветлейшая Дево Марие, Владыку сущих Бога девственно неизреченно рождшая, Того моли о помиловании душ наших.
Подвигом страсти плотския духу покористе и, крилома безстрастия окрилившеся, приясте благодать Святаго Духа, и недуги человеческия исцеляете, и бесы отгоняете, и избавляете молящих вас; сего ради собор иноков ублажает вас, святии отцы наши, в Бетании подвизавшиися Георгие и Иоанне Афонский, и почитает память вашу. — Дважды.
Слава Отцу и Сыну и Святому Духу, и ныне и присно и во веки веков. Аминь.
Мужество терпения и труд во святости, Господу благоугодный, и множество чудес ваших в земли нашей многажды описашася, да поведаются от рода в род сыном рода нашего; мы же, во праздник памяти вашея возвеселившеся, песньми хвалим и величаем Христа, Царя и Бога нашего.
ძლისპირი: სიყუარული წყალობისაი, ძეთა კაცთათვის ჯუარსა ზედა აღმაღლდი და დაბრმეს ჰურიანი, ვითარმედ შენ ხარ, ქრისტე, სიბრძნეი ღმრთისაი და მადლი.
Преподобнии отцы Иоанне и Георгие Бетанийстии, молите Бога о нас.
Постригше тя в малую схиму, преподобне, нарекоша тя именем возлюбленнаго ученика Спасова, и благоухание молитв твоих, яко фимиам, присно восхождаше к Богу.
Преподобнии отцы Иоанне и Георгие Бетанийстии, молите Бога о нас.
Стрелы лукаваго разженныя угасил еси постом и бдением, треблаженне Георгие, и, рукоположен быв во иеромонаха, облеклся еси во священную одежду правды и благодати и возшел еси на степень архимандрита.
Преподобнии отцы Иоанне и Георгие Бетанийстии, молите Бога о нас.
Рукоположен быв во иеромонаха, совершал еси богослужение и во время молитвы собирал еси ум твой пред Богом; ныне испроси у Него прощение, преподобне Иоанне, грехов и беззаконий наших.
Преподобнии отцы Иоанне и Георгие Бетанийстии, молите Бога о нас.
Во время оно мучительства безбожных мнози нуждею совлекошася иноческаго образа, ты же, блаженне Георгие, избрал еси течение тесным путем и непоколебимо стоял еси во правом исповедании.
Слава Отцу и Сыну и Святому Духу.
Ангельскаго жития подражателие бысте, всеблаженнии, и ныне со ангелы присно предстоите пред Богом; ходатаи будите нам к Нему, да избавит нас от козней вражиих и от волн греховных.
И ныне и присно и во веки веков. Аминь.
Умиленно молим тя, Дево святая Марие: молитвами богоносных отцев Бетанийских даруй отраду душам нашим, да величаем тя, Владычице.
Ирмос: Свет Твой, Господи, низпосли на ны и избави от тьмы нас, грешных, и милость Твою, Благий, с небесе низпосли нам.
Преподобнии отцы Иоанне и Георгие Бетанийстии, молите Бога о нас.
მიტაცებულ აქუნდათ რაი ივირონი ბერძენთა, შურითა ქართველთაითა აღძრულნი არა დასცხრებოდენ ბოროტებად თქუენდა და შემდგომად მრავლისა შეურაცხებისა განგდევნეს ათონითგან.
Преподобнии отцы Иоанне и Георгие Бетанийстии, молите Бога о нас.
Велию скорбь и тесноту наведше церквам и верным в земли нашей, богоборцы совлекоша с тебе священную одежду, старче Георгие, и биша, и остригоша браду исповеднику Христову.
Преподобнии отцы Иоанне и Георгие Бетанийстии, молите Бога о нас.
ვერცაღა დააცხრეთ რაი ჭირთა მძვინვარებანი, ბერძენთა მიერ აღძრულნი ივერიელთა ზედა,მოსაგრეთა თანა უკუნ იქეც სამშობლოს ქუეყანასა, ათშვიდმეტსა წელსა დამყოფელი ათონსა.
Преподобнии отцы Иоанне и Георгие Бетанийстии, молите Бога о нас.
Многажды приключашеся тебе от домашних поругание, преподобне Георгие, дондеже, пришедшу тебе в дом твой, идеже живяху братия твоя неверующии, остригоша браду тебе спящему и на главу свою навлекоша гнев Божий.
Слава Отцу и Сыну и Святому Духу.
Ангели удивишася чистоте вашей, человеки же к подражанию вам воздвигосте, яко всячески дивная показасте дела, преподобнии отцы наши, блаженнии.
И ныне и присно и во веки веков. Аминь.
Осанна вопием Тебе, Господи Саваоф: молитвами Девы Марии сочетай поющих Тебе безплотным силам, Господи.
Ирмос: Богословцы собра во мгновение ока облаком от конец небесных в Сион послужити телу Богоприимному в день сей.
Преподобнии отцы Иоанне и Георгие Бетанийстии, молите Бога о нас.
Любовию Христовою уязвлен, вселился еси в Армазскую обитель, егда дерзко обладаху безбожнии благословенною Богом землею нашею и бранию гоняху христиан.
Преподобнии отцы Иоанне и Георгие Бетанийстии, молите Бога о нас.
Дом родителей твоих, яко чужий, имел еси, Георгие, и долготерпеливо сносил еси лишения Божественныя ради любве; ныне умилостиви Творца во избавление наше от зол.
Преподобнии отцы Иоанне и Георгие Бетанийстии, молите Бога о нас.
Егда зверски разсвирепевшии безбожнии уязвиша тя пулею, Христос исцели тя; и, пришед в обитель Марткопскую, не даша тебе тамо подвизатися, но прият тя католикос Амвросий, сам в дому заключенный.
Преподобнии отцы Иоанне и Георгие Бетанийстии, молите Бога о нас.
Имея милость и кротость, яко Давид пророк, воине Христов Георгие, многажды разжжеся лукавый бес на брань с тобою, но ты силу его пожигал еси, яко огнем, пещию молитв твоих.
Слава Отцу и Сыну и Святому Духу.
Ни скорбь, ни теснота, ни гонение, ни страх смерти не возмогоша разлучити вас от любве истиннаго Бога; Того молите ныне во избавление наше от всякия болезни и злыя напасти.
И ныне и присно и во веки веков. Аминь.
Упование всех христиан, всеми небесными воспеваемая, с ликом святых заступи нас, Владычице, да присно величаем тя.
— Кондак (глас 4). В гонениих совершители таинств закона явистеся, надежда верных, многобиеннии и уничиженнии от ненавидящих Христа, сосуди благости и премудрости, врачеве недугов многоразличных, святии исповедницы отцы Иоанне и Георгие, на духовную высоту взошеднии и просиявшии, светила православия.
— Икос. Сугубый святый лик Божественный песньми почитаем, яко, братолюбным умом во едино собравшеся, Господних людей сон духовный отгнасте и на путь царский направисте; и ныне о нас ходатайствовати не престаните, великоименитии отцы дивнии, и всех Божественнаго бодрствования исполните, да вопием вам: радуйтеся, преподобнии отцы наши, в Бетании подвизавшиися, Иоанне и Георгие исповедницы!
Ирмос: В пещь авраамстии отроцы, от волхвов связани божественных ради законов, ввержени быша и во пламени вопияху: благословен еси, Господи, во храме сем святыни Твоея.
Преподобнии отцы Иоанне и Георгие Бетанийстии, молите Бога о нас.
Козни безбожия не возмогоша поколебати твердости веры твоея, и шел еси в Бетанию, святе Иоанне, идеже паки подвизашеся иеромонах Спиридон, учитель юности твоея.
Преподобнии отцы Иоанне и Георгие Бетанийстии, молите Бога о нас.
Безчисленныя напасти подъял еси, преподобне Георгие, и, яко злато, искусился еси в горниле болезней; ныне и мене от погибельных путей избави и настави мя в пристанище Божественнаго покаяния.
Преподобнии отцы Иоанне и Георгие Бетанийстии, молите Бога о нас.
Гонения от богоборцев не претерпе Спиридон и отиде в дом свой, ты же не оставил еси святыя оныя обители, и власти поставиша тя стражем ея, яко древняго памятника.
Преподобнии отцы Иоанне и Георгие Бетанийстии, молите Бога о нас.
Пришед в Бетанию, обрел еси преподобнаго блаженнаго старца Иоанна, и смирение бысть вам наставником на пути истиннем, и возлюблени бысте от всех добродетелей ваших ради.
Слава Отцу и Сыну и Святому Духу.
Тщашеся ратник подвижников, о двоице святая и избранная, изгнати вас из обители, но не разруши силы молитвы и единства благодати, ниже умали святыни и подвига вашего.
И ныне и присно и во веки веков. Аминь.
Дево Марие Богородице, вдовицам и сиротам руку милости простри, нищих помилуй и всех купно сподоби небесныя безпечальныя славы.
Ирмос: Христа Бога, явльшагося поющим во образе ангельстем в пещи, отроцы, хвалите, священницы, воспойте, людие, превозносите во веки.
Преподобнии отцы Иоанне и Георгие Бетанийстии, молите Бога о нас.
Яко едина душа во двою телесу подвизастеся и, проповедницы от Господа поставлени, возрастисте веру православных и научисте неведущих Богопознанию.
Преподобнии отцы Иоанне и Георгие Бетанийстии, молите Бога о нас.
Подвизающим вам верных к подражанию вашему, незлобивый сердцем и безропотно смирением послушливый Василий прииде к вам, и, постригше его во иночество, бысте подобни святым безплотным.
Преподобнии отцы Иоанне и Георгие Бетанийстии, молите Бога о нас.
Видяще народ ваш в неверии погруженный, разгорестеся любовию Христовою и многих участе брани на невидимыя и видимыя враги.
Преподобнии отцы Иоанне и Георгие Бетанийстии, молите Бога о нас.
Авраамову страннолюбию подражал еси, блаженне, и щедро питал еси нищих и убогих; и нас воздвигни к подражанию тебе, да бежим сребролюбия, злыя страсти.
Преподобнии отцы Иоанне и Георгие Бетанийстии, молите Бога о нас.
Егда учеником твоим бысть Гавриил старец, преподобне Георгие, научил еси его благочестию, еже подобает верным христианом, паче же инокам, и укрепися, и от Христа дадеся ему благодать ведения незримых и сокровенных.
Слава Отцу и Сыну и Святому Духу.
Изнемог, Иоанне, лето едино терпел еси лютыя болезни и, чая скончания, приобщился еси Христовых Таин и с радостию предал еси дух твой Богу.
И ныне и присно и во веки веков. Аминь.
По обычаю благости твоея умилостиви на ны Сына твоего, Мати Божия, да и мы сподобимся Царствия ходатайством твоим, Пречистая.
Хвалим, благословим, покланяемся Господеви, поюще и превозносяще Его во вся веки.
— «Честнейшую» — поется.
Ирмос: Рождество твое нетленно, Дево; Бог из чрева твоего произыде воплощен и с человеки поживе; темже тя, Богородице, вси достойно величаем.
Преподобнии отцы Иоанне и Георгие Бетанийстии, молите Бога о нас.
Бременем добродетелей обогащен, предстал еси пред Бога, преподобне блаженне Иоанне; погребоша тя в Бетании, и, егда Георгий возгласи во гроб твой «Христос воскресе!», мертвый издал еси глас радости: «Воистину воскресе!»
Преподобнии отцы Иоанне и Георгие Бетанийстии, молите…
По смерти Иоанна пострижен был еси в великую схиму и наречен еси Иоанн, подобно духовному брату твоему; дворянин же славный, в нестяжании жительствовал еси и питался еси трудом рук твоих.
Преподобнии отцы Иоанне и Георгие Бетанийстии, молите…
Посети тя Богородица, подвижниче Георгие, дух премудрости и разума обильно дарова тебе и здравие подаде избранному своему; моли Ю, да насадит в нас ненависть ко греху и любовь к добродетели.
Преподобнии отцы Иоанне и Георгие Бетанийстии, молите…
Непорочно прешел еси житие, яко ангел Божий, и, егда от ангела возвещено ти бысть время исхода от плоти, вся уразуме Гавриил старец и, пришед в Бетанию, причасти тя святых Христовых Таин.
Слава Отцу и Сыну и Святому Духу.
Плачущу Гавриилу о разлучении твоем, благословил еси и утешил еси его отеческою сладостию и, поручив народ твой, потом же и дух твой Христу, Георгие, ныне, великих подвигов твоих твердостию украшен, царствуеши пред Ним.
И ныне и присно и во веки веков. Аминь.
Воистину Богородицу исповедуем тя, Дево Марие, с ликом ангельским величаем тя; святаго стана сподоби молящих тя, Владычице.
— Светилен: Се, источник благодати и множества знамений неоскудный, богато — гроб костей ваших имамы, вернии, во ограждение крепости, в сокровище благодати и во отгнание бесов; сего ради радуются днесь лики иноков и веселятся чини отцев в праздник ваш, и проповедуют благодать благодеяний ваших, и приносят Господеви хвалу.
Слава Отцу и Сыну и Святому Духу.
Празднует ныне святая Церковь, блаженнии, обретение мощей ваших и вопиет к вам: призрите на ны, о отцы блаженнии, с небесе и избавите нас от волн мирских непотопляемы.
И ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор преподобных, с нимиже восхваляем тя, Дево.
— На «Хвалитех» стихиры
განგეხუნეს რაი ბჭენი ზეცისანი, ღირსნო, შეხუედით თქუენ სიხარულსა უფლისასა, ხოლო აწ მეოხ-გუეყავ მაქებელთა შენთა დაუცხრომელად, რაითა წმიდაი ეკლესიაი ჩუენი შეუძრველად დაიცვას კუეთებისაგან მტერთაისა და მძლე ჰყოს მწვალებელთა ზედა, რამეთუ მბრძოლნი იგი ჭეშმარიტებისანი ზაკულითა განზრახვითა შეთქუმულ არიან მართლმორწმუნეთა ზედა და ძალითა და ნიშნებითა სიცრუვისაითა იღუწიან, რაითა ქრისტეის მოსახელენი ერნი განხრწნეს და გამოაჩინეს ერად ბნელისა.
Егда погребени бысте в Бетании, ангелоподобное подвижничество ваше с любовию описа ученик ваш Гавриил, святый и блаженный, и зрители нас сотвори сияния вашего, егоже причастник бе духом и подражатель вам добродетельми; сего ради во Святая святых Царствия пред Христом прославляетеся венцем и, иконами изображаеми и в молитвах поминаеми, паки исцеляете прибегающих к вам, и скоро помогаете в скорбех и узах сущим, и от напастей избавляете всех.
По пророчеству ученика вашего Гавриила юродиваго, прежде его сопричтоша вас лику святых, и мощи ваша изнесоша прежде святаго онаго старца; изыде от гроба вашего дух благоухания непостижимый, и вси исполнишася благодати, и немощнии приимаху исцеление.
Во свет и венец благодатей даровашася Церкви нашей всехвальныя мощи ваша, подвигами просвещенныя и искушеньми искушенныя; во время обретения их отгнаша множество бесов, чудотворцы отцы; ныне же почерпаем неоскудное исцеление душ и телес наших.
Весела есть Церковь грузинская обретением мощей ваших, яже сохрани, преподобнии, яко камения многоценная, и неоскудно подает нам ходатайством вашим отраду; собор же верных с похвалами празднуем и благодарим Бога, подавшаго вами велию милость.
Всехвальныя мощи ваша, подвигами просвещенныя и искушеньми искушенныя, во свет и венец благодатей даровашася Церкви нашей; во время обретения их отгнаша множество бесов и светом духовным исполниша безчисленныя лики мирских и священных.
Ныне веселится и радуется Бетания о вселении вашем в ней, всечудныя отцы наши, и паче ликует храм оный Рождества Богородицы, яко присно напаяшеся слезами вашими; и ныне и мы притекаем к жилищу мощей ваших, да сугубый сей праздник торжествуем и приложимся к ракам святыни вашея, да почерпнем исцеление душ и телес наших.
ღირსნო მამანო ჩუენნო და მოძღუარნო ქართველთანო, იოვანე და გიორგი-იოანე აღმსარებელნო! ევედრენით თქუენ მიერ შეყუარებულსა ტკბილსა იესუს, რაითა წყალობითა მოხედოს დედისა თვისისა წილხდომილსა ერსა ჩუენსა, მტვირთველსა საუფლოისა ჯუარისაისა ქუეყანასა ზედა, და ყოველთაგან ერთა, ბრძოლად ჩუენდა შემოკრებულთა გვიხსნნეს და დაგვიფარნეს ანტიქრისტეს ხიბლისაგან და საცთურისა.
Слава Отцу и Сыну и Святому Духу.
Вострубим трубою песней, и возыграем, и возвеселимся, радующеся во всесвятый праздник Рождества Богородицы, и в той же день поминаем всехвальных отцев и учителей славных Иоанна и Георгия Бетанийских, яко реки учения нам источивших, и воспоим: немощнии — недугов врачем, скорбящии — избавителем, согрешившии — теплым ходатаем, печальнии — утешителем, путешествующии — спутником, плавающии — кормчим, и вси всюду, всех надежды с верою величающе, глаголем: ходатаи будите нам, преподобнии, да молитвами вашими и прошением вооружит нас Господь Бог силою Своею непобедимою на вся видимыя и невидимыя враги наша и спасет нас.
И ныне, Богородичен.
— «Славословие великое» — поется.
Тропарь: «Бетанийстии отцы дивнии, ангелы нарицаемии от всех ведущих вас: Иоанне, от юности делателю украшения обители Божия; Георгие, дарованием пророчества украшенный; во тьме беззаконий возженнии светильницы православия, молите Христа Бога помиловати души наша.» (Глас 6).
«Слава», «И ныне» — Богородичен воскресный отпустительный по гласу тропаря: «Иже блаженну нарекий Твою Матерь, пришел еси на страсть вольным хотением, возсияв на Кресте, взыскати хотя Адама, глаголя ангелом: срадуйтеся Мне, яко обретеся погибшая драхма. Вся премудростию устроивый, Боже наш, слава Тебе». (Глас 6).
— «Изобразительныя антифоны» — при пении «Блаженн» вставляются «Во Царствии Твоем» — на 8:
— от 3-й песни преподобных отцев — 4 тропаря (с ирмосом).
— от 6-й песни преподобных отцев — 4 тропаря, со своими «Слава» и «И ныне».
Прокимен, глас 7: Честна пред Господем смерть преподобных Его.
Стих: «Что воздам Господеви о всех, яже воздаде ми?»
Апостол: 1 Коринфяном, глава 12, стих 7 (Братие, коемуждо же нас…); конец — стих 12 (…разделяя властию коемуждо, якоже хощет…).
Аллилуиа (глас 6): «Блажен муж, бояйся Господа».
Стих: Сильно на земли будет семя его.
Евангелие от Матфея, глава 11, стих 27 (Рече Господь Своим учеником…); конец — глава 12, стих 1 (…бремя Мое легко есть…).
Причастен: В память вечную будет праведник, от слуха зла не убоится.
Последование составила псаломщица Тинатин Мчедлишвили.
