Праздничное последование Иверской иконе Божией Матери, именуемой Портаитисса
На малой вечерни на «Господи, воззвах» стихиры, глас 1:
Приидите, вси вернии, и возвеличим Владычицу Богородицу, Покровительницу рода нашего, обстоим честную икону ея, с любовию облобызаем и воспоим: Радуйся, Пресвятая Дево; радуйся, Мати Вышняго Бога; радуйся, Избавительнице и Покровительнице душ наших; радуйся, горо Афонская, слава Господня на тебе возсия, яко звезда светоносная прииде от востока на запад: на столпе огненнем явися нам икона Божия Матере, яже пришествием своим озари Афон.
Якоже иногда Моисею явися на Синаи купина, огнем сияющая и невредимо сохраняемая, тако и сия всенепорочная икона огнем облачается и пребывает неопальна, освящая верою зрящих ю.
Даровавшая многочестную икону твою Ивирону, тако и живущих во жребии твоем не остави безутешных, Дево, и дондеже приидет время, вместо ея лобызаем чудныя списки ея, покровом твоим прославленныя.
Приидите, людие грузинстии, почерпим неоскудную оную благодать от иконы Божия Матере, яже яко огнь сияет, и насладимся верою и любовию, ибо она со славою дарована есть народу нашему во ограждение и хранение и покровительница нам бывает от видимых и невидимых врагов.
Слава… И ныне…, глас 5:
Приидите радостно и поклонимся чудотворней и всечестней иконе Божия Матере, яже дарована бысть обители Иверстей в хранение недремлющее и непобедимое, ибо хранит она покровом своим святую сию обитель и вся живущия во Афоне и дарует обильный дар от источника неисчерпаемыя благодати всем почитающим сию дивную икону. Темже воспеваем Богородице: Радуйся, Помощнице мира и Утешительнице душ наших.
«Свете тихий». Без входа.
Прокимен: Бог наш на небеси и на земли, вся, елика восхоте, сотвори;
и «Сподоби, Господи»;
Непорочное жилище Света Пресвятаго, Богородице, величаем тя и воспеваем рабы твои, яко явлением пресвятыя иконы твоея очищаеши нас;
Стих: Воскресни, Господи, в покой Твой, Ты и кивот святыни Твоея.
Слава Тебе, Христе Царю, слава многому милосердию Твоему к нам, яко даровал еси нам икону Пречистыя Матере Твоея, яже подает нам поток неоскудныя своея благодати.
Стих: Клятся Господь Давиду истиною, и не отвержется ея.
Благовернии людие, днесь возрадуемся и светло празднуем таинственное пришествие иконы Божия Матере, и, яко верою исповедуем ю хранительницу нашу, ко Богородице возопиим: покрый нас от всякаго зла и спаси души наша.
Слава… И ныне…
Приступим к тихому пристанищу и Покровительнице народа нашего, Деве Марии, поклонимся ангелы почтенному образу ея и умиленно возгласим: призри, благоутробная Мати, на лютыя скорби, обстоящия нас, и исцели немощи душ наших.
Дерзость ненавидящих икону Господню и мучительство нечестивых безбожников немилостиво водворися в Никеи, и приидоша мучити вдовицу, благоговейно почитающую икону Богородицы; она же с сыном своим предаде икону ту морю и тако возопи: Слава тебе, Святая, море волнующееся помощник тебе бысть; слава шествию твоему, Нетленная.
Слава Отцу и Сыну и Святому Духу.
От святыя иконы твоея, о Владычице Богородице, здравия и исцеления обильно подаются всем, с верою и любовию к ней прибегающим; сего ради и на мою немощь призри и помилуй душу мою, Благая, и тело мое исцели благодатию твоею, Всесвятая.
И ныне и присно и во веки веков. Аминь.
Преславная и всесвятая икона твоя, яко поручительница избавления нашего, промыслом дарована бысть нам, Нетленная; юже егда обитель Иверская яко сокровище стяжа, избавися тобою от всякаго вреда, и с нею исполняются, Дево, надежды неотъемлемыя вси, иже к тебе приходящии.
Ектения малая и отпуст.
Поем «Блажен муж», 1-й антифон.
На «Господи, воззвах»
стихиры на 8, глас 5:
Просветися, горо Афонская, радуйся и веселися, обителе Иверская, се бо грядет, ангелы морем путеводима, дивная икона Божия Матере, светом неизреченным блистающая, тьму бед и скорбей отгоняющая и сиянием милости своея всех просвещающая.
Припадаем к тебе, Владычице, иноцы и соборы постников, и с любовию зряще святую икону твою, вопием ти: прииди к нам, Мати Благая, помилуй почитающих тя и даруй нам святую икону твою в залог милости и спасения.
О преславнаго чудесе! Якоже иногда на Синаи виде Моисей купину, огнем сияющую и невредимо сохраняемую, тако и ныне икона сия Божия Матере огнем облачается и пребывает неопальна, во тьме же сущих нас просвещает и невредимы соблюдает от скорбей и печалей.
Богородице Дево, крепкая Помощнице, ныне обитель Иверская тобою хвалится и радуется, яко имать тя Предстательницу непостыдную, стену неразрушимую, основание непоколебимое и хранительницу недремлющую; темже не престани молитвами твоими, Владычице, присно избавляти обитель сию твою и вся люди от нашествия врагов.
Надежду даруй в напастех сущим рабом твоим и рог верных возвыси, Богородице; избави молитвами твоими обитель сию и вся грады и веси Грузинския, укрепи в служении вся священныя и иноческия чины, всем же верным рабом, восхваляющим тя, Покровительница буди.
Всесвятая икона твоя, Дево Богородице, есть врачевство всего мира, к нейже приближающеся и со страхом и верою покланяющеся тебе, Пречистая, образ твой лобызаем, и благодать исцелений почерпаем, и свобождаемся от душевных и телесных недуг.
Ныне обитель Иверская, светом облеченная, украшается днесь во праздник явления твоего, и паче солнечнаго света просиявает благодатию Святаго Духа, и бывает яко источник безсмертия недужным и немощным и всем подательница безчисленных милостей.
Слава… И ныне…, глас 8:
О Мати Благая, Владычице Богородице Дево, не отрини нас, смиренных рабов твоих, приносящих недостойная моления пред всесвятою иконою твоею; буди нам, грешным, теплая Предстательница пред Сыном твоим, избави нас от всех скорбей и напастей, да присно воспеваем тя с радостию: Радуйся, Благая Вратарнице, двери райския верным отверзающая.
1. Бытия чтение, глава 28 (10–17)
Иаков же вышел из Вирсавии и пошел в Харран, и пришел на одно место, и остался там ночевать, потому что зашло солнце. И взял один из камней того места, и положил себе изголовьем, и лег на том месте. И увидел во сне: вот, лестница стоит на земле, а верх ее касается неба; и вот, Ангелы Божии восходят и нисходят по ней. И вот, Господь стоит на ней и говорит: Я Господь, Бог Авраама, отца твоего, и Бог Исаака; не бойся. Землю, на которой ты лежишь, Я дам тебе и потомству твоему; и будет потомство твое, как песок земной; и распространишься к морю и к востоку, и к северу и к полудню; и благословятся в тебе и в семени твоем все племена земные; и вот Я с тобою, и сохраню тебя везде, куда ты ни пойдешь; и возвращу тебя в сию землю, ибо Я не оставлю тебя, доколе не исполню того, что Я сказал тебе. Иаков пробудился от сна своего и сказал: истинно Господь присутствует на месте сем; а я не знал! И убоялся и сказал: как страшно сие место! это не иное что, как дом Божий, это врата небесные.
2. Исхода чтение, глава 3 (1–5)
Моисей пас овец у Иофора, тестя своего, священника Мадиамского. Однажды провел он стадо далеко в пустыню и пришел к горе Божией, Хориву. И явился ему Ангел Господень в пламени огня из среды тернового куста. И увидел он, что терновый куст горит огнем, но куст не сгорает. Моисей сказал: пойду и посмотрю на сие великое явление, отчего куст не сгорает. Господь увидел, что он идет смотреть, и воззвал к нему Бог из среды куста, и сказал: Моисей! Моисей! Он сказал: вот я, Господи! И сказал Бог: не подходи сюда; сними обувь твою с ног твоих, ибо место, на котором ты стоишь, есть земля святая.
3. Исхода чтение, глава 13 (18–22)
И обвел Бог народ дорогою пустынною к Чермному морю. И вышли сыны Израилевы вооруженные из земли Египетской. И взял Моисей с собою кости Иосифа, ибо Иосиф клятвою заклял сынов Израилевых, сказав: посетит вас Бог, и вы с собою вынесите кости мои отсюда. И двинулись сыны Израилевы из Сокхофа и расположились станом в Ефаме, в конце пустыни. Господь же шел пред ними днем в столпе облачном, показывая им путь, а ночью в столпе огненном, светя им, дабы идти им и днем и ночью. Не отлучался столп облачный днем и столп огненный ночью от лица всего народа.
Приидите, празднолюбцы и соборы постников, с верою зде собравшиися! Принесем песни хвалебныя Деве Марии, яко днесь есть светлый праздник явления честныя иконы ея «Портаитиссы», и мы, обстояще со страхом и любовию, воспоим Богородице: Радуйся, всем неизреченная радосте; радуйся, святою иконою твоею всех нас просвещающая; радуйся, всех похвало и утверждение; радуйся, спасительнице душ наших.
Что тя наречем, Богородице Дево? Столпа ли огненнаго, яко наставляеши нас ко вечному жилищу; или стену крепости, яко ты храниши нас, православных; или хранительницу недремлющую, яко соблюдаеши и спасаеши обитель сию? Темже, от находящих бед избавлени, воспеваем ти, Владычице: Радуйся, благодатей Подательнице; радуйся, христиан Надеждо.
Слава… И ныне…
Радуйся, горо Афонская, веселися, обителе Иверская, и празднуй, земле Грузинская, яко милостию посети нас Божия Мати и дарова нам чудотворную икону свою, в скорбех помощницу, в печалех утешение, в недузех врачевство и от страстей избавление, всем же нам подает велию милость.
Явление преславныя иконы твоея днесь славословим, Пречистая Богородице, и предстательство твое празднуем, яко ты, Мати Жизни, молиши Христа Царя о нас, иже возложихом на тя твердую надежду, истинная Наставнице жизни нашея.
Стих: Помяну имя твое во всяком роде и роде.
Оставим, вернии, печаль, се бо вторая купина огнепальная — икона Божия Матере, юже зрят иноцы Афонстии, является ныне во очищение грешных.
Стих: Слыши, дщи, и виждь, и приклони ухо твое.
В знамение водительства твоего столпом огненным явися нам, Мати Света, путем сим спасения шествующим, да, избежавшия бездорожия заблуждения, наставиши нас ко вечным обителем.
Слава… И ныне…
Приидите, вси иноцы и мирстии, да возвеличим Всенепорочную Деву Богородицу, яко без волнения по волнам плавающая икона, столпом огненным облеченная, прейде от Никеи ко Афону морем Понтийским и пришествием своим благодать свою верным дарова; и мы, просвещени сиянием милости ея, Предстательницу жизни нашея ублажим.
По 1-м стихословии седален, глас 1:
Пресветлаго образа твоего явление радость подает всем верным, обители же Иверской дарует хранительницу недремлющую и от бед избавительницу; темже воспеваем тя, Всесвятая: присно покрывай нас покровом твоим. Слава… И ныне…
Сей день Господень, радуйтеся, людие, се бо светом облеченное облако на небеси чудно простреся и столпом огненным явися Афону, едина, Единаго на руках матерних носящая, Христа, мира Творца, Спаса душ наших.
По 2-м стихословии седален, глас 3:
Светло веселятся днесь стада Афонская, сплетают песни многи, с любовию почитающе Всенепорочную, и украшаются славою свыше, данною им пришествием святыя иконы, яже зарею богопознания просвещает благочестно поющих ю.
Слава… И ныне…
Чудо преславное зрится днесь: како в водах огнем горящая икона Божественнаго Отрочате является, и знамение сияния простирает, и подвиг постников чудесно украшает; сего ради и мы благодарственно воспеваем: Радуйся, Благодатная.
Величия твоя кто исповесть, Богородице? Яко явлением иконы твоея удивила еси вся православныя, ибо множество немощей врачуеши и недуги отгониши. О всемилостивая Владычице, не лиши нас помощи твоея, но покрый нас молитвами твоими, и спаси благочестивый народ наш, и христолюбивое воинство силою твоею сохрани, да, тобою хвалящиися и на тя все упование возложившии, не постыдимся во веки.
Слава… И ныне… Тот же.
Величаем тя, Пресвятая Дево, Богоизбранная Отроковице, и чтим святую икону твою, еюже источаеши исцеления всем, с верою к тебе прибегающим.
(Трижды).
По 50-м псалме стихира по Евангелии.
Егда бысть явление чудныя иконы твоея, тогда отцы Афонстии, зряще в мори столп огненный, ужасошася страхом; Гавриил же, яко вторый Петр, по водам хождаше и со слезами вопияше ти: О Всесвятая, прииди и покрый достояние твое от врагов невредимо.
Ирмос: Колесницегонителя фараона погрузи чудотворящий иногда Моисеов жезл, крестообразно поразив и разделив море Чермное, Израиля же бегуна пешеходца спасе, песнь Господу воспевающа, яко славно прославися.
Пресвятая Богородице Вратарнице, сохрани и покрый нас.
О Всенепорочная, приими от скверных устен моих хваление сие, якоже иногда Сын твой и Бог мой Господь прият две лепте вдовицы, и избавление грехов моих даруй ми, да присно величаю тя, Дево.
Пресвятая Богородице Вратарнице, сохрани и покрый нас.
Тебе подобает пение ангельское, Божия Мати, яко ты сама родила еси чудно Творца их; но и наше приими, о Владычице, смиренное сие моление, да воспеваем Царю: славно прославился еси в немощех наших.
Пресвятая Богородице Вратарнице, сохрани и покрый нас.
Огнь Божественный, исходяй от иконы твоея, Мати Божия, попаляет полки иконоборцев, сладкий же свет побед на верныя изливает и утверждает нас.
Слава Отцу и Сыну и Святому Духу.
Утишишася воды, укротишася и волны морския, имиже носима бяше икона твоя, Богородице; утверди и поколебанное сердце мое на камени заповедей Христовых.
И ныне и присно и во веки веков. Аминь.
Помощница и Покровительница была еси, Дево, обители Иверской, егда потопила еси в мори воины амировы с кораблями их; и ныне потопи в пучине милости Сына твоего вся страсти и безчисленная согрешения моя.
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Пресвятая Богородице Вратарнице, сохрани и покрый нас.
Се, пречудное изображение Вратарницы прииде от Афона во Тбилиси и с великою честию водворися в храме Богородицы, преславнем Сиони, в помощь во скорбех, в утешение в печалех, во врачевание недугов и во избавление от страстей.
Пресвятая Богородице Вратарнице, сохрани и покрый нас.
Утверди сердце мое во упование на тя, Божия Мати, отжени всякое буйство и гордыню от помраченнаго ума моего, да воспеваю ти: несть свят, якоже Господь, и несть праведен паче Бога нашего.
Пресвятая Богородице Вратарнице, сохрани и покрый нас.
Лица твоего пресвятаго и нетленнаго образ есть врачевство всего мира, к немуже приближающеся и со благоговением поклоняющеся тебе, Пречистая, благодати исцелений исполняемся и от немощей свобождаемся.
Слава Отцу и Сыну и Святому Духу.
Воздвигни мя, Владычице, от земли, окаяннаго, отдали мя, убогаго, от растления греховнаго и даждь молитву молящемуся, да ублажаю заступление твое, Дево Портаитиссо.
И ныне и присно и во веки веков. Аминь.
Неплодный ум мой плодоносен сотвори, благословенная Дево, от неплодных рожденная, яко ты паче плодоносна творищи во благое всякаго ниспосланием иконы твоея.
Приспе днесь светлый праздник Покровительницы нашея, радуются вси православнии и веселятся соборы человеческия, яко призывает нас святая Богородица наша видети огнесветлую икону свою, сиянием милости всех просвещающую; и мы, сему радующеся, вопием: избави, Владычице, от глада, огня, меча и бед почитающих явление иконы твоея.
Слава…
Радовашеся обитель Иверская во праздник явления твоего, яко таковое чудо явлено бысть в помощь ради любве к людем, тебе в жребий доставшимся, егда ангелы морем наставляемая светозарная икона твоя не прииде во ину обитель, но во Иверской благоволи вселитися рукою Гавриила Грузина, и тем благословила еси новосозданную во Афонской пустыни обитель грузин.
И ныне…
Заступница теплая, и прибежище великое, и Покровительница крепкая, и Споборница, и Надзирательница еси ты, Портаитиссо, ищущим помощи твоея; сего ради избави их от всякия сети, якоже обещала еси, Всенепорочная, рабом твоим.
Ирмос: Ты еси, Христе, Бог мой, Ты сила моя, Ты Господь мой и похвала жизни моея, не оставль недр Отчих на небеси и явивыйся нищете моей; темже с пророком Аввакумом глаголем: силе Твоей слава, Человеколюбче.
Пресвятая Богородице Вратарнице, сохрани и покрый нас.
Уготовляющу пути чудотворныя иконы твоея, даде бездна глас свой, подвижеся солнце, и бысть сияние иконы яко свет; и ныне ты, Владычице, прииди во спасение человеком и явися Спасительница достоянию твоему.
Пресвятая Богородице Вратарнице, сохрани и покрый нас.
Слышавше весть о пришествии твоем, ужасошася иноцы, уразумевше же дела твоя, удивишася; и смущенную душу мою милостию помяни, Владычице, да воспеваю ти: слава помощи твоей, Божия Мати.
Пресвятая Богородице Вратарнице, сохрани и покрый нас.
Благодать подати хотящи народу нашему, паки явила еси нам образ твой, к немуже приближающеся, подобию твоему покланяемся и молим тя: се, прииди ныне и собери разсеянныя отчины наша и покажи предел, от всех человек неоспоримый.
Слава Отцу и Сыну и Святому Духу.
Якоже стада обители иверския украшахуся благодатию иконы твоея, тако и народ наш паче света солнечнаго просвещается благодатию твоею, яко дивный сей список иконы бывает, яко источник безсмертия, недужным и немощным и всем подаятель великих милостей.
И ныне и присно и во веки веков. Аминь.
Ты еси крепость и сила моя, Богородице, яко в день печали моея тобою упокоюся и тобою вознесуся от мира сего в небесное наследие и возрадуюся со Царем и Богом, Избавителем моим.
Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма окаяннаго? Но обрати мя и к свету заповедей Твоих пути моя направи, молюся.
Пресвятая Богородице Вратарнице, сохрани и покрый нас.
Виждь, Святая, от нощи утреннюющий народ твой, стадо твое, еже обстоит преславную икону твою и просит грехов оставления и Божественныя славы причастия; не отрини нас от лица твоего, Мати Невечерняго Света.
Пресвятая Богородице Вратарнице, сохрани и покрый нас.
Ныне призри, сладкая Мати Христа Царя, на избранный тобою народ и благоволи возрастити, и умножити, и исполнити нас духа премудрости, взаимныя любве и Божественнаго разума.
Пресвятая Богородице Вратарнице, сохрани и покрый нас.
Душею и умом нашим стаду твоему весьма сочетавшеся, псалмы и пении и песньми духовными Божественней иконе твоей покланяемся, просим прощения и спасения душ наших; ты же, Владычице, Невесто Неневестная, яко Врач наш, вся сия даруй нам.
Слава Отцу и Сыну и Святому Духу.
Храм твой, Дево, яко иный рай ныне предстоит, ибо яко древо жизни имать икону доброты твоея, юже вси с желанием, благоговением и любовию лобызаем и глаголем: Владычице, даруй нам мир и покрый нас, яко разве тебе иныя утешительницы не вемы.
И ныне и присно и во веки веков. Аминь.
Реку сладости, полноту потока, небесную манну, обилие и благодать присно прозябающую стяжахом тя, Отроковице, живущии во обители сей, и воспеваем Рождество твое.
Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже мой, возведи мя.
Пресвятая Богородице Вратарнице, сохрани и покрый нас.
Скоро помози нам, святая Мати неизреченная Сына Божия, и до скончания века сохрани Иверию и народ иверский, да не рекут безчисленнии врази наши: где есть Богородица, на Нюже уповают?
Пресвятая Богородице Вратарнице, сохрани и покрый нас.
Веру имамы непостыдную к тебе, Дево Вратарнице, и молим тя: подаждь нам руку помощи и сохрани землю, юже избрала еси и от работы бесовския и идолослужения избавила еси, да постыдятся врази наши.
Пресвятая Богородице Вратарнице, сохрани и покрый нас.
Бездна недостойных согрешений обыде мя, и потопляется душа моя; но даждь ми, Владычице, крепкую мышцу твою, и якоже Гавриила, тако и мене, прибегающаго к иконе твоей, невредима соблюди.
Слава Отцу и Сыну и Святому Духу.
Не отвержи мене до конца от лица твоего, Мати Избавителя, и не остави мене погрязнути в бездне беззакония, но изведи мя от тины страстей, да удалится и от тления живот мой, и принесу тебе хвалу и исповедание.
И ныне и присно и во веки веков. Аминь.
Имый оскверненный сей телесный храм, дерзновенно прибегаю ко всечистому храму превечнаго Слова, пред святою иконою твоею принести смиренная моления моя; но ты, яко милостивая, очисти мя благоутробием твоим.
Аще и ввержена бысть в море святая икона твоя, Богородице, вдовицею, не могущею сокрыти ю от враг, но явися она покровительницею Афона и вратарницею обители иверския, страхом врагом, православным же христианом, чтущим тя, избавительницею от всех страстей и нашествий.
Узрев собор иноков Иверских посреде столпа огненнаго икону Божия Матере, возопи: о Владыко, сподоби нас обрести икону Матере Твоея; ты же, Гаврииле, вниди в море и приими в недра сокровище, нам явленное, да будет нам хранительница недремлющая, всем же христианом покров и радость.
Ирмос: Отроцы еврейстии в пещи по огню хождаху дерзновенно и, орошаеми, вопияху, глаголюще: благословен еси, Господи Боже, во веки.
Пресвятая Богородице Вратарнице, сохрани и покрый нас.
Согрешихом и беззаконновахом пред Богом, и беззаконию и лжи причастницы быхом; но, Владычице наша Богородице, яко благая, теплым предстательством твоим угаси огнь Божественнаго гнева, да воспеваем Ему: Отче наш и Боже, благословен еси.
Пресвятая Богородице Вратарнице, сохрани и покрый нас.
Во искушениих и в пещи скорбей и нас, Божия Мати, окропи росою благодати твоея, да постыдятся врази наши и уразумеют вси, яко ты едина еси, Владычице, прославлена по всей земли.
Пресвятая Богородице Вратарнице, сохрани и покрый нас.
Воспеваем тя яко престол Царя славы, Честнейшую Херувим, одушевленный храм, в немже вселися Господь, твердь небесную, из неяже возсия Солнце правды Христос; тя воспеваем, Божия Мати, и превозносим во веки.
Слава Отцу и Сыну и Святому Духу.
Огнь Божественный, исходяй от иконы твоея, Мати Божия, попаляет полки иконоборцев, сладкий же свет побед на верныя изливает и утверждает нас.
И ныне и присно и во веки веков. Аминь.
Ты еси радость живущих в пустыни Святыя Горы, и утешение и похвала и града сего царствующаго, Дево Марие, юже воспеваем и превозносим во веки.
Ирмос: В горе Моисею собеседовавый купиною, образ изобрази безстрастнаго от Девы рождения; Того вси благословим и превозносим во веки.
Пресвятая Богородице Вратарнице, сохрани и покрый нас.
Пресветлаго образа твоего явление радость подает всем верным, земли же нашей дарует хранительницу недремлющую и от бед избавительницу, и благоухающа творит души и умы наша.
Пресвятая Богородице Вратарнице, сохрани и покрый нас.
Воспевают тя ангельския силы, превозносит род человеческий, благословит всякая тварь, Пресвятая Дево Богородице; приими и ныне от мене, недостойнаго, приносимую сию хвалу.
Пресвятая Богородице Вратарнице, сохрани и покрый нас.
Воспойте, иноцы Афонстии, благословите, Иверстии, превозносите, вся земля, Благую Владычицу, яже реку чудес источает чудотворною иконою своею; сего ради, Богородице, хвалим, благословим, покланяемся, воспеваем и превозносим тя во веки.
Слава Отцу и Сыну и Святому Духу.
От обители Иверския отвсюду простирает неоскудныя благодати икона твоя, Богородице, землю же, тебе в жребий уделенную, присно храниши и покрываеши ходатайством твоим пред Сыном и Богом твоим, Егоже отроцы благословят, священницы воспевают и людие превозносят во веки.
И ныне и присно и во веки веков. Аминь.
Несть меры широте, глубине или высоте, идеже не достиже крепкая помощь десницы твоея, Божия Мати, на нюже уповающе, отроцы благословят, священницы воспевают и людие превозносят Сына твоего во веки.
Ирмос: Ужасеся о сем небо, и земли удивишася концы, яко Бог явися человеком плотски, и чрево твое бысть пространнейшее небес; темже тя, Богородице, Ангелов и человеков чиноначалия величают.
Пресвятая Богородице Вратарнице, сохрани и покрый нас.
Глубина таинства Рождества твоего ужасает умы ангельския, Дево, и всесвятая икона твоя бесы отгоняет, яко, не могуще зрети силы ея, бежат и потопляются; мы же с любовию покланяемся и лобызаем ю и тя, Богородицу, величаем.
Пресвятая Богородице Вратарнице, сохрани и покрый нас.
Приидите вси, поклонимся, припадем и превознесем Матерь Божию, яже призре на смирение наше, яже алчущия исполняет благ и положи нам обетование милостей явлением чудныя иконы своея.
Пресвятая Богородице Вратарнице, сохрани и покрый нас.
Ныне утиши, Пресвятая, Пренепорочная Дево, нападение злых и советы их разруши, в людех же правоверующих мир и любовь утверди, да не постыдимся во веки, на тя упование возложившии.
Слава Отцу и Сыну и Святому Духу.
Божественными песньми, о святая Вратарнице, Дево Богородице, Божественней иконе твоей поклоняемся, прося прощения и спасения душам нашим, яко у поручительницы спасения нашего.
И ныне и присно и во веки веков. Аминь.
О Всесвятая, милостивая, христиан Помощнице, не может достойно воспети язык человеческий, ни ангельский, яко ты еси всея твари честнейшая и всея земли славнейшая; но, о Владычице, приими милостиво приносимое от нас сие моление и спасай нас присно, яко упование наше на тя возлагаем.
Всечестную икону твою приим Гавриил в недра своя, вопияше ти, Владычице: о сладкая Мати Царя Христа, буди Покровительница обители твоея, радость всем христианом и поручительница вечнаго спасения.
О неизреченныя благости, о преславнаго явления иконы Божия Матере, яже сияет чудесы и просвещает благодатию с верою притекающих! Юже с радостию приемлюще, святую Богоотроковицу подобает пением благодарити и почитати.
О твоего, Владычице, о нас промышления! Яко послала еси нам чудную икону твою и милостиво даровала еси хранительницу недремлющую и утешение жизни нашея; сего ради, ведущии честная чудеса твоя, песньми тя величаем.
О преславнаго чудесе! Како огненосная икона по волнам морским, яко на колеснице, шествует и светлыми лучами просвещает умы человеческия; мы же, почитающии праздник ея, пением Богородице возсылаем славу.
ჵ, დედათა შორის კურთხეულო, ღმრთისმშობელო მარიამ, ვითარცა ძუელად აჩუენე საკჳრველი მფარველობაჲ ერსა ჩუენსა, ეგრეთვე აწცა ნუ დაგჳვიწყებ, და ამაო ჰყვენ საშინელნი მზაკუვარებანი მათნი, რომელნი უკეთურთა და ამაოთა იღუწიან სავნებელად ერისა ჩუენისა, აღრჩეულისა შენ მიერ, ვითარცა საკუთარისა.
Глаголы твоя, яже рекла еси, Нетленная, о доставшихся тебе в жребий, исполни, яко милостивая, и не предаждь достояния нашего в поношение врагом, но излей на род наш милости твоя и буди нам Мати, да уразумеют вси, яко часть твоя есмы мы, род грузинский.
Слава Отцу и Сыну и Святому Духу.
Исполнитель повелений твоих, Божия Мати, преподобный Гавриил, стопами неуклонными хождаше по водам морским и, приим святую икону твою, устрои лики и праздник со постники Афонскими учреди, имже и мы, удивляющеся, вопием Первопричине: слава Тебе, Чудотворче, едине Царю и Боже наш; молитвами Богородицы сохрани народ наш, егоже избрал еси, и победу на враги даруй ему, яко всесильный.
И ныне и присно и во веки веков. Аминь.
Славословие великое и отпуст.
На литургии: см. 8 сентября.
Переведено в 1867 году в Петербурге со славянского акафиста Иверской иконе Божией Матери имеретинским князем Ираклием (Иосифом) Лордкипанидзе (Сачиноэли).
Праздничное последование переработала и дополнила псаломщица Тинатин Мчедлишвили.
