Праздничное последование преподобному отцу нашему Григорию Хандзтийскому, архимандриту пустынь Кларджетских и строителю Хандзты и Шатберди
Поем «Блажен муж», 1-й антифон.
На «Господи, воззвах» стихиры
на 8, глас 5.
Преподобному Григорию.
Богоносне отче, блаженне Григорие, ангелом собеседниче и сожителю и причастниче пророков, святых апостолов и мучеников, и сонаследниче Света непреходящаго, иже сияеши сиянием Божественным, яко пред Ним стоиши, благодатию просвещен, дерзновенно, и зриши присно славу Его, и наслаждаешися непрестанно благостию Его: Христа моли, ходатай буди нам ко Христу ниспослати Церквам единство, мир и велию милость.
Богоносне отче, блаженне Григорие, звездо пустыни, сияние Божественныя любве и просветителю иноков, столпе непоколебимый терпения, утверждение и древо Церкве, светильниче всесветлый и светило всего мира, сокровище добродетелей, иже град сотворил еси пустыню праздную и яко рай сию показал еси: Христа моли, ходатай буди нам ко Христу ниспослати Церквам единство, мир и велию милость.
Богоносне отче, блаженне Григорие, похвало иноков и утверждение правыя веры, Святыя Троицы избранный служителю, ангелом подобниче, от земли на небо вознесенный наставничеством иноков, Царствия наследниче, ангельским пением небесный гражданине, со святыми венценосием во свете Божия видения просвещенный и святою молитвою твоею всех почитающих тя ходатаю: Христа моли, ходатай буди нам ко Христу ниспослати Церквам единство, мир и велию милость.
Богоносне отче, блаженне Григорие, со ангелы соединенный храме таинств, бездно разума, зрителю неизреченных, отче отцев, главо иноков и наставниче отшельников, иже пред Пресвятою Троицею радуешися, многим сиянием просвещен, и помощник еси молящих тя: Христа моли, ходатай буди нам ко Христу ниспослати Церквам единство, мир и велию милость.
«О, венцы…»
Кими похвальными венцы увенчаем Церкве Христовы утверждение и всех просвещающаго учением, владык нелицемерно обличителя и всех заступника и помощника, всех скорбящих утешителя и всех в напастех сущих прибежище, благочестия столпа, верных поборника, всехвальнаго Григория, имже Христос востания врагов низложи, имущаго велию милость. (Дважды)
Кими похвальными песньми воспоем подобнаго Боголучезарней звезде, в пустыни вселением просиявшаго, и сад райский, плод благий приносящий, великаго помощника и учителя, всех лукавых и ленивых обличителя, егоже ради Христос востания их низложи, имущаго велию милость.
Кими похвальными пении воспоем Церкве украсителя и пастыря и учителя иверов, иже яко солнце явися народу нашему и научаше любви к Богу и отечеству, на негоже возлагаем упование наше, да единством веры и любовию исповедуем его яко наставника и утверждение народа нашего, имущаго велию милость.
Слава Отцу и Сыну и Святому Духу.
Ныне возвеселитеся, празднолюбцы, и хвалебными песньми воспоим и восхвалим священников похвалу и Хандзты славу, источник чудес и верных великаго ходатая и заступника: Радуйся, обителей Кларджетских хранителю неусыпный и пустынь праздных градотворче; радуйся, светильниче всесветлый, иже концы мира чудесы просветил еси; радуйся, скорбящих Божественная радосте и в напастех сущих теплый заступниче, преподобне и чудотворче отче Григорие, моли непрестанно Христа Бога о нас, с верою и любовию почитающих присно радостную и всеблаженную память твою.
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим.
1. Премудрости Соломони чтение. (Праведных души в руце Божией…)
2. Премудрости Соломони чтение. (Праведницы во веки живут, и в Господе…)
Писано под 9 марта.
3. Премудрости Соломони чтение (Праведник, аще постигнет скончатися, в покои будет…). Писано под 7 мая.
На земли ангеле и на небесех человече Божий, мира добре украсителю и сладостию благий, отче Григорие, хвалим тя, иже насажден был еси в дому Божии и процвел еси правдою, и яко кедр в пустыни, тако умножил еси стадо Христово, достойно и праведно словесныя овцы, и светило мира был еси воистинну.
Явился еси, отче Григорие, начальник иноков и пустынь праздных градотворец, и исцеляеши страсти немощи нашея, с верою поющих тя: Радуйся, востока звездо всесветлая и иноков просветителю, светильниче и пастырю; радуйся, благодеянием постников похвало и всего мира радостное сияние; моли о поющих тя.
Священною одеждою украшен богоприлично, проповедал еси Евангелие Царствия, и песнопения церковная изрекл еси, и Церковь обогатил еси учением Божественным; имже ныне просвещеннии величаем тя, небеснаго человека и земнаго ангела, мира украшение и подвижников око, иже умножил еси стадо Христово и правдою и святостию наставник был еси подвижником, и молишися Богу о душах наших.
Оставил еси, святе, мир и взял еси крест, имже хвалился еси, треблаженне отче, и наставлением Святаго Духа и Божиим предведением направил еси стопы твоя во страну Кларджетскую и воздвигл еси в пустыни обители — Хандзту и Шатберди — во спасение душ и во пристанище многим; собраннии же в них братия смирением своим достигоша меры твоея, и изгоняху духи лукавыя, и исцеляху вся недужныя, и благохвальным пением воспеваху тя, яко пастыря великаго и проповедника веры.
Слава Отцу и Сыну и Святому Духу.
Рабе благий, добрый и верный, делателю добрый винограда Христова, ты мужественно и доблестно тяготу дне понесл еси и данный талант умножил еси; сего ради отверзошася тебе врата небесная, и вшел еси в радость Господа твоего благаго; ныне же ходатай буди непрестанно хвалящим тя, да и мы, Божественным желанием подвигнутии, немолчно ублажаем тя.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
Словом и делом прославил еси Бога славнаго и в заповедех Его поучался еси присно, день и нощь, умом чистым, и яко столп светлый, светлая молитва твоя восхождаше на небо, блаженне отче Григорие; испроси нам у Христа велию милость.
Стих: Честна пред Господем смерть преподобных Его.
Умертвил еси похоть и оживотворил еси чистоту, и возлюбил еси святое девство, и яко свет облеклся еси в чистоту, и яко горлица кротостию работал еси Христу умом непорочным, блаженне Григорие, украшенный Божественным разумом.
Стих: Блажен муж, бояйся Господа, в заповедех Его восхощет зело.
Украси тя Бог светом чудес и сиянием благодатей Божественных, треблаженне, и исполни душу твою премудрости, и, яко источник живый и око неоскудное, источаеши учения Божественная на возращение стада Христова.
Слава Отцу и Сыну и Святому Духу.
Множество иноков наставника тя исповедует, богоносне отче Григорие, яко исполняются Божественных благодатей, яже оставил еси, и наслаждаются памятию твоею, сподвижниче святых отец; с нимиже моли Христа Бога, да помилует души наша молитвами твоими.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
Знамений и чудес делателя яви тя Бог, блаженне, и даде ти власть изгоняти духи лукавыя и всякия недуги исцеляти, богоносне; сего ради Божественною славою твоею хвалимся и молим тя: обителей Кларджетских добрый правителю, подвижниче и пустынь градотворче, отче Григорие, ходатай буди уповающим на тя и избави от всякия напасти христианы.
Возсиял еси яко звезда на тверди небесней и, вооружен благодатию Святаго Духа, просветил еси стадо твое богопознанием, преподобне отче; и достигнув страны Кларджетския, воздвигл еси в пустыни обители преукрашенныя во славу Божию и во спасение душ многих, учителю и просветителю народа иверскаго, блаженне Григорие, ходатай буди нам пред Христом Царем и испроси нам милость.
Тропарь преподобнаго. Слава… Тойже. И ныне…
Еже от века утаенное и ангелом несведомое таинство, Богородице, тобою сущим на земли явися: Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
«Ангельския силы…»
Житие благочестно на земли совершил еси и явился еси правило иноков и светило пресветлое всего мира, богоносне отче, и просвещаеши скоро к тебе прибегающих, святе Григорие; ныне же возсияй в сердцах наших свет истинный и ходатай буди непрестанно хвалящим тя. (Дважды)
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
«Явился еси днесь…»
Светом неприступным сияеши, и яко звезда возсиял еси в пустыни Кларджетстей, и умножил еси стадо Христово, преподобне отче; память же твою совершающим избавление испроси прегрешений, яко предстоя Богу. (Дважды)
Слава Отцу и Сыну и Святому Духу, и ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
Премудрость.
От юности освятился еси, приснопамятне преподобне отче, яко воистину просвещенный, и на земли, яко ангел, жительствовал еси, яко плоть умертвил еси подвигом и Божественною ревностию твоею Святей Троице благоугоден явился еси; сего ради лику иноков сопричтеся и от временных сластей на высоту возвел еси люди верныя, богоносне Григорие; моли Христа Бога прегрешений оставление даровати любовию почитающим память твою. (Дважды)
Слава Отцу и Сыну и Святому Духу, и ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Честна пред Господем смерть преподобных Его.
Стих: Что воздам Господеви о всех, яже воздаде ми?
«Всякое дыхание…» Евангелие от Луки, глава 6, стих 17 (Во время оно ста Иисус…); конец — стих 23 (…мзда ваша многа на небесех…).
По 50-м псалме стихира.
Самогласен, глас 6.
Во всю землю изыде вещание исправлений твоих, богомудре отче; сего ради на небесех обрел еси мзду трудов твоих, и бесов полки погубил еси, и ангельскаго чина достигл еси, ихже житию непорочно поревновал еси, святе Григорие; дерзновение имея к Богу, мира проси душам нашим.
Канон Богородицы (на 6) — ищи 28 сентября.
Ирмос: Чудесем спасе люди Господь, и море волнующееся словом изсуши древле, и днесь нетленно родися от Девы и возведе нас на небо, естеством равный Отцу, Емуже воспоим.
Возведи очи души нашея зрети сияние благодатей твоих, преподобне отче, орган же языка подвигни во славу твою, да достойно воспою тя, Григорие, похвало отцев.
Образ Божественный от юности сохранил еси любовию нас ради Младенцем бывшаго, уязвився сердцем, богоносне отче, и с возрастом возвышался еси от силы в силу совершенством духа.
Движение страстей от юности попрал еси под нозе души, блаженне отче, и сладость чувств льстивая отнюдь не усладила тебе чаянием непреходящих оных сладких наслаждений, святе Григорие.
Слава Отцу и Сыну и Святому Духу.
Начало премудрости стяжал еси в самом начале юности твоея, преподобне отче, и страхом Господним пригвоздил еси плоть твою, святе Григорие, и оттуду возшел еси в любовь оную безстрашную святых и благодатию Божиею просиял еси.
И ныне и присно и во веки веков. Аминь.
Душу мою, падшую от многих болезней, о Богородице всеславная, исцели, да благодарственным гласом усердно величаю тя присно.
Ирмос: Боже, призри на пение раб Твоих и смири дерзость прелестника, и превознеси днесь Церковь, и утверди непоколебимо в православии уповающия на Тя.
С лики безплотных вознеслся еси, егда трудов подвиг колесницею души сотворил еси и возшел еси деянием к видениям высоким, блаженне отче, и невидимых зрения сподобился еси, святе Григорие.
Гусли духа живаго явился еси, силами Духа украшенныя, преподобне отче, и возсиял еси звездою пустыни, и сокровище словес, яко злато, скрыл еси в Церкви Божией, блаженне Григорие.
Постом плоть оградил еси, блаженне, и страстей движения умертвил еси молитвою и бдением; сего ради сила Святаго Духа вселися в тя и светилом краев небесных яви тя.
Слава Отцу и Сыну и Святому Духу.
Ветвь плодовита был еси, богоносне, прозябшая от корений боголюбцев, насаждена при исходищих Божественных Писаний, и принесл еси плод сладкий — разумение их.
И ныне и присно и во веки веков. Аминь.
Провиде тя дверь света Иезекииль, еюже пройде Царь, якоже весть, Дево Нетленная; сего ради молю тя: отверзи ми двери покаяния, вводящия в Царствие.
Просветил еси дни твоя, блаженне, в пустыни крепким подвигом, имже приближился еси к сиянию Божественному, отче Григорие; и оставление безчисленных грехов наших испроси от Христа празднующим память твою.
Ирмос: Прежде возвести пророчески спасение человеков Аввакум и глаголаше: во гневе помянул еси милость; от гор приосененных пришел еси, Спасе, Слово, Создатель людей сих.
Не утаи Бог трудов твоих, но знамении и чудесы возвести сияние подвигов твоих и во всех вожделенно сотвори слово и видение твое, богоблаженне.
Поучался еси от юности в книгах богодухновенных и возшел еси на верх совершенства, егда ум очистил еси от страстей и чистотою души твоея был еси жилище Духу Всесвятому.
Был еси, блаженне, подобен Богу, отец сирым и питатель алчущим, одеяние нагим и немощным и врач недугов болящих, отче Григорие.
Слава Отцу и Сыну и Святому Духу.
Светильником светлым сущим в мире возсия тя Свет Отчий, и блистание добродетелей твоих простерл еси до краев небесных, яко сияние Его, преподобне отче.
И ныне и присно и во веки веков. Аминь.
Дева родила еси и матерски не истлела еси, но Мати была еси и Девою пребыла еси; сего ради воспеваем ти: радуйся, Богородице.
Ирмос: Соблазнов темных нощи во оставление пришел еси, Христе; утреннююще приносим Тебе песнь, якоже достоин еси, да наставиши нас на путь мирен, внити в Царствие, еже обещал еси нам.
Яко звезда возсиял еси в пустыни и с верою к тебе прибегающим скоро помогаеши; сего ради ублажаем тя и, яко теплаго заступника, песньми величаем.
Благодетель, всех Милующий, даде богатство роду твоему, устом же твоим даде дух живый, подобно святым учеником Своим, и сотвори тя тринадесятым апостолом.
Источник Святаго Духа в сердце твоем стяжал еси, таинственныя премудрости и богатства благодати исполнився, о треблаженне отче; почитающия тя избави от напастей.
Слава Отцу и Сыну и Святому Духу.
Возлюбил еси премудрость, пустынолюбче, и возжелал еси ея паче всего; сего ради почи на тебе, и устнами твоими источник благодати источи, меда сладчайший.
И ныне и присно и во веки веков. Аминь.
Освяти Бог чрево твое всесвятое, Невесто, егда святостию вселися в не, и на Кресте вознесенный создания с Собою вознесе.
Ирмос: Сниде Иона во глубину морскую и вопияше к Богу молебно: возведи мя от потопления, Господи; аз же, Христе, к Тебе вопию: презри множество прегрешений моих.
Егда злый враг Церкве убиение твое и Хандзты разорение умышляше, огнь ревности Господни разжже ум твой, богоносне, и молитвою твоею онемил еси уста его, хулящая Бога, и до конца погубил еси.
Великий пустынниче славных пустынь Кларджетских, и ныне не умолкни подвизатися о нас ко Христу, яко всячески можеши помогати всем, иже на молитвы твоя уповают и к ходатайству твоему прибегают.
Венцем святости, яко подвига победителя, венча тя Христос Царь, блаженне отче Григорие, и святую главу твою украшением неоцененным украси.
Слава Отцу и Сыну и Святому Духу.
Страстей тайных и явных нападения крепкий поборниче, Григорие блаженне, дерзновение имея к Богу, испроси помощь, да избежим врага душ наших.
И ныне и присно и во веки веков. Аминь.
Новаго Отрока родила еси нам, Преждевечнаго, безлетно со Отцем соседящаго, Богородице, Иже Крестом обетшавшия грехом человеки обнови и Божества причастники сотвори.
Иго Христово приял еси, богоносне отче Григорие, и на рамена твоя взял еси Крест Его, язвы Божественных страстей Его на пречистей плоти твоей носяй; сего ради Божественныя славы Его причастник явился еси, стяжав воздаяние по достоинству.
От корений благих прозябе плод прекрасный: от юности богоносный благодатию воспитася паче, нежели млеком, и покори смертную плоть безсмертному духу, и подвизася даже до смерти, и, отшед от мира, со славою причтеся к собору отцев и молится о нас, прославляющих всесветлую память его.
Ирмос: Любовию всех Спаса ни во чтоже вмениша отроцы ярость мучителя богоненавистнаго и, во огнь ввержени, не опалишася и тако вопияху: отец наших Боже, благословен еси.
Празднуют людие твои, блаженне, память твою и вопиют к тебе: призри на ны, о отче блаженне, с небесе и избави нас от волн мирских непотопляемы, иже научил еси нас пети: отцев наших Боже, благословен еси.
Презрел еси всякую суету мира, преподобне преславне, и, яко брение, попрал еси тщую славу, и нищетою богатство неоскудное Царствия обрел еси на небесех, присно поя: отцев наших Боже, благословен еси. Радуйся, богословия святаго источниче и любомудрия источающая чаше, всемудре, велие светило всего мира, иже научил еси всех пети сице: отцев наших Боже, благословен еси.
Слава Отцу и Сыну и Святому Духу.
Бесов полки посекл еси, богоносне, яко доблий воин Спасов, мечем трудов, и пожегл еси, яко огнем, станы их пещию молитв твоих: отцев наших Боже, благословен еси.
И ныне и присно и во веки веков. Аминь.
Благодатию молитвы твоея, святе, хвалимся усты и душею, славне, яко тобою от напастей и волн, и тяжких печалей, и страстей греховных избавляемся вси.
Ирмос: Отроцы в Вавилоне неопалимии прежде образ тебе быша, Дево преславная, егда от тебе родися огнь Божества и сохрани тя неврежденну, непорочну; вси людие присно благословят тя.
По обычаю своему разжжеся диавол на брань с тобою, богоносне, обрете бо сосуд лжи, якоже древле Иуду предателя, и паки обратися на него меч его.
Узре всеокаянный, отчужденный, диаволе жилище, столп светлый и крест неоцененный окрест тебе, преподобне отче, и ужасеся зело, и ослабеша жилы мышц его.
Помиловал еси, святе, отчаяннаго убийцу твоего и уподобился еси Христу, исцелив со слезами к тебе припадшаго и отпустив его с миром, яко ты еси помощник кающимся, иже благословят Христа и превозносят Его во веки.
Благословим Отца и Сына и Святаго Духа, Господа.
Егда собрася лик святых отцев при преставлении твоем, блаженне, радости исполнился еси видением их, и благословил еси всех, и верно и явственно научил еси пети сице: благословите, вся дела, Господа и превозносите Его во веки.
И ныне и присно и во веки веков. Аминь.
Избавила еси человеческое естество от клятвы рождеством твоим, Дево Нетленная, яко родила еси единаго Благословеннаго, Благословляющаго нас, исполняющаго благодатию небо и землю.
Хвалим, благословим, покланяемся Господеви, поюще и превозносяще Его во вся веки.
Ирмос: Подобает молчание, понеже не можем достойно восхвалити тя днесь, Богородице; обаче не умолчим страха ради, но по немощи нашей принесем хваление, имже величаем тя.
От небесных сил слышал еси глас блаженный, служителю Бога Вышняго, яко земнаго ангела и небеснаго человека призываше тя Царь небесный Христос, и отшел еси с радостию и с Господем радуешися во веки.
Честных благовоний благоухание исполни келлию твою, преподобне отче, и с веселием ангельский собор прият душу твою непорочную, с нимиже наслаждаешися, богоносне.
Не может язык человеческий исповедати подвиги твоя, святе, угодниче Божий, яко прешел еси мир сей достойно, славне, и ныне, наслаждению райскому соединився, со ангелы радуешися и царствуеши со Христом во веки.
Слава Отцу и Сыну и Святому Духу.
Испроси, преподобне, всему миру мирное сохранение, и народу нашему — победу и утверждение православия от Христа Бога, и душам нашим обильно велию милость.
И ныне и присно и во веки веков. Аминь.
Носиши убо Носящаго всех святыма рукама твоима; Егоже моли, святая, от чуждаго злодейства невредимо жити нам.
Явился еси яко образ светлый и приял еси Духа Святаго, преподобне отче, имже очи душевныя Божественным видением просветил еси, и, просвещен, провидя грядущая, вся до конца глаголал еси с чистотою Божественною; ныне же ходатай буди нам пред Богом, святе Григорие. (Дважды)
Слава Отцу и Сыну и Святому Духу, и ныне и присно и во веки веков. Аминь.
Богородицу воистину исповедуем тя, Владычице, тобою спасеннии, яко Бога родила еси неизреченно, Избавляющаго Крестом от смерти и привлекающаго к Себе собор преподобных, с нимиже восхваляем тя, Дево.
«О преславнаго чудесе…»
Богоносне отче, святе Григорие, ты иго Христово на выю взял еси и мужеством нападения врагов сокрушил еси и пустыни градом показал еси; сего ради ублажаем тя и с верою вопием ти: о прекрасная Кларджетии славо, тебе Христос водвори с безплотными, ходатай буди нам. (Дважды)
Богоносне отче, святе Григорие, с верою собравшиися грузины почитаем тя, яко великаго подвижника, и с верою вопием ти: о святому Антонию уподобивыйся пустынниче, иже с радостию изшел еси в пустыню непроходимую и вместо зверей вселил еси человеки, ангелом равныя, ходатай буди пред Богом, да спасет нас.
Богоносне отче, святе Григорие, явился еси правило иноков и похвала православных, услаждающее и светлое светило всего мира, и немощным искуснейший и честный врач, яко не убоялся еси страха прелестнаго врага, и луки и стрелы бесовския сокрушил еси, и лютыя сети их изнемощил еси Божественным учением твоим. О дарований твоих данных, блаженне, имиже злых бесов посрамил еси и прославил еси славу Христову!
Слава Отцу и Сыну и Святому Духу.
Вострубим трубою песней, и возыграем, и возвеселимся, радующеся во всесвятый праздник всехвальнаго учителя нашего. Соберитеся, о вернии грузины, и духовными похвалами украсим и восхвалим блаженнаго отца нашего, яко реки учения нам источившаго, и воспоим: немощнии — недугов врачу, скорбящии — избавителю, согрешившии — теплому ходатаю, печальнии — утешителю, путешествующии — спутнику, плавающии — кормчему, и вси всюду, всех надежду с верою величающе, глаголем: ходатай буди нам, богоносне Григорие, да молитвами твоими и прошением вооружит нас Господь Бог силою Своею непобедимою на вся видимыя и невидимыя враги наша и спасет нас.
И ныне и присно и во веки веков. Аминь.
Богородичен Димитрия, царя грузинскаго, Багратиона.
Богородица и всечестная, Мати Дева, лилия прекрасная, ей благовествова ангел крылатый; тобою веселится Царь венценосный, и Тому служат царие многоподданнии.
Славословие великое и отпуст.
На литургии: на блаженных от канона преподобнаго песнь 3-я и 6-я.
Прокимен, глас 7: Честна пред Господем смерть преподобных Его.
Стих: Что воздам Господеви о всех, яже воздаде ми?
Апостол: 1 Коринфяном, глава 12, стих 7 (Братие, коемуждо же нас…); конец — стих 12 (…разделяя властию коемуждо, якоже хощет…).
Аллилуиа, глас 6: Блажен муж, бояйся Господа.
Стих: Сильно на земли будет семя его.
Евангелие от Матфея, глава 11, стих 27 (Рече Господь Своим учеником…); конец — глава 12, стих 1 (…бремя Мое легко есть…).
Причастен: В память вечную…
Составила Тинатин Мчедлишвили
