Праздничное последование преподобному Евфимию Исповеднику, игумену Зедазенскому
На великой вечерни
Поем «Блажен муж», 1-й антифон.
На «Господи, воззвах» стихиры
на 8, глас 5.
— Святый исповедниче отче, блаженне Евфимие, звездо Грузии, сияние Божественныя любве и просветителю народа нашего, столпе непоколебимый терпения, утверждение и древо Церкве, светильниче всесветлый и светило всего мира, сокровище добродетелей, иже избрал еси течение путем тесным и непоколебимо стоял еси во исповедании правом: помолися ныне ко Христу и испроси, преподобне, ниспослати Церквам единство, мир и велию милость.
— Святый исповедниче отче, блаженне Евфимие, похвало подвижников и утверждение правыя веры, Святыя Троицы избранный служителю, ангелом подобниче, от земли на небо вознесенный трудом и подвигом твоим и вселившийся во Царствие Христа Бога: помолися ныне к Нему и испроси, преподобне, ниспослати Церквам единство, мир и велию милость.
— Святый исповедниче отче, блаженне Евфимие, сияние Божественныя любве и просветителю народа твоего; столпе непоколебимый терпения; утверждение и древо Церкве; светильниче всесветлый и светило всея Грузии; сокровище добродетелей и святою молитвою твоею ходатаю всех почитающих тя: помолися ныне ко Христу и испроси, преподобне, ниспослати Церквам единство, мир и велию милость.
— Святый исповедниче отче, блаженне Евфимие, законности ради и смирения твоего, еже стяжал еси, был еси возлюблен от всех, и научен был еси не токмо в Божественном Писании и учениих отеческих, но и в пении грузинском преуспевал еси, и образ был еси стаду твоему премудрости и богочестия: помолися ныне ко Христу и испроси, преподобне, ниспослати Церквам единство, мир и велию милость.
— Святый исповедниче отче, блаженне Евфимие, премудростию Божественною дивно исполнен быв в жестоком оном подвизе, благодатию Евангелия просветил еси землю грузинскую, богоносне, и, яко пастырь добрый, потрудился еси о стаде твоем; ныне же, просиявый благодатию исповедничества, предстоиши Богу и Спасу нашему: помолися ныне к Нему и испроси, преподобне, ниспослати Церквам единство, мир и велию милость.
— Святый исповедниче отче, блаженне Евфимие, любителю Божий и исполнителю Божественных заповедей Его, паче подобает нам слышати сия дивная дела твоя и славити Бога, даровавшаго нам таковаго попечительнаго отца и дивнаго подвижника, и вопити ти: радуйся, ибо имя твое написано есть на небесех. Христа моли ныне ниспослати Церквам единство, мир и велию милость.
Кими похвальными венцы увенчаем Церкве нашея украшение и грузин просветителя учением, великаго отца и учителя, иже научал еси народ твой в любви к Богу и отечеству и укреплял еси их крепким подвигом, имже нападения вражия низложи Христос Бог, имеяй велию милость.
Кими похвальными песньми воспоем светильника всесветлаго и светило всея Грузии, верных поборника и благодати и премудрости Божия исполненнаго, преподобнаго и богоноснаго отца нашего Евфимия Исповедника, имже нападения вражия низложи Христос Бог, имеяй велию милость.
Слава Отцу и Сыну и Святому Духу.
Празднует Церковь грузинская память твою и повелевает всем верным воспети подвиг твой, иже благодать, от Бога данную, умножил еси премудростию, научая народ твой заповедем Христа Бога: и ныне помолися ныне к Нему и испроси, преподобне, ниспослати Церквам единство, мир и велию милость. (Глас 6).
И ныне и присно и во веки веков. Аминь.
Кто тебе не ублажит, Пресвятая Дево? Кто ли не воспоет твоего пречистаго Рождества? Безлетно бо от Отца возсиявый Сын Единородный, Тойже от тебе Чистыя пройде, неизреченно воплощься, естеством Бог сый и естеством быв человек нас ради, не во двою лицу разделяемь, но во двою естеству неслитно познаваемь. Того моли, Честная Всеблаженная, помиловатися душам нашим. (Глас 6).
На входе прокимен дне
Паремии — чтения преподобному.
1. Премудрости Соломони чтение. (Праведных души в руце Божией…)
2. Премудрости Соломони чтение. (Праведницы во веки живут, и в Господе…)
Писано под 9 марта.
3. Премудрости Соломони чтение (Праведник, аще постигнет скончатися, в покои будет…). Писано под 7 мая.
На литии стихира храма.
Таже преподобнаго Евфимия.
Добродетельми обогатился еси, отче, и, со святым Филимоном и Александром святителем зело подвизаяся о просвещении народа иверскаго, избрал еси путь иноческий, к немуже от юности уготовлял еси себе; и, послушником определен быв в обитель Гелатскую, водительством великаго подвижника отца Алексия старца преуспевал еси в подвизе и молитве: ныне и нас избави от путей погибельных и настави на путь истинный.
Никогдаже предал еси, преподобне отче Евфимие, себе сладости и роскоши, но, вооружен бодрствованием Божественным, ревнитель был еси великих оных Святогорцев, Евфимия и Георгия, Божественных книг распространителей, и вся дни жития твоего иждивал еси в велицем подвизе и бдении: тако и ныне умири сердце мое, волнами мира колеблемое и оскверненное, и бдения Божественнаго исполни мя.
Быв распространитель Божественнаго Писания и учений отеческих, яко светильник огнегорящий, явился еси во тьме неведения падшим душам и ко свету невечернему наставник им был еси, ибо всех призвал еси к познанию и славе Божией и явился еси правило иноком, и Божественную радость излиял еси на Церковь грузинскую и на поющих в ней.
Удивляет нас преудивный подвиг твой, преподобне, паче же дивимся исповедничеству твоему и любви к Богу и ближнему, ибо во время оно безбожия ревность Божественную стяжал еси, блаженне подвижниче Евфимие, и, многия песнопения преписуя и сохраняя чадом Церкве, посрамил еси злую ону козню мучителей.
Дела твоя паче солнечнаго круга возсияша, егда проповедал еси, святе, веру истинную и умножал еси Божественныя книги и древнейшая песнопения; сего ради и мы, не неведуще подвигов твоих и трудов, преподобне отче наш Евфимие, молим тя: помози нам пред Богом, да дарует нам шествовати благообразно в мире сем.
Богомудр явился еси, благословенне, силою Вышняго, и силою оною Божественною сохранил еси сокровище Церкве нашея — богодухновенныя песнопения; и, егда возвысил еси венец православных исповедников, Церковь грузинская, яко сокровище многоценное, обрете тя и с радостию прия.
Яко солнца свет, тако просвети умы поющих всепетый праздник твой, богоносне отче дивный: моли ныне Христа, преподобне, да призрит на люди Своя, неимущия ответа пред Ним, и избавит нас от грехов лютых и многообразных напастей.
Слава Отцу и Сыну и Святому Духу.
Быв добрый плод земли Иверския, сыновним усердием служил еси родному народу, иже ныне почитает тя отцем своим, святе, великий просветителю Евфимие; и, подвигом твоим возрастив пение церковное, даже доныне подвизаеши поющих на благолепную хвалу и пение Богу: ныне испроси нам от Него мирное сохранение миру, и утверждение православия, и возрождение народа нашего, и душам нашим велию милость.
И ныне и присно и во веки веков. Аминь.
Радуйся, Дево, облаче и колеснице Слова; радуйся, превыше ума и внешняго предела, святое Божие жилище; радуйся, безбрачная, духом Бога превыше богов зачавшая; радуйся, без семене Родившая и без истления Питавшая; радуйся, Приснодево благословенная.
Во Христовых заповедех поучаяся присно, день и нощь, умом чистым, любовию пасл еси стадо Его и учил еси хранитися от страстей: ныне и нас возстави подражати добродетелем твоим, блаженне, да бегаем злых обычаев и страстей.
Стих: Честна пред Господем смерть преподобных Его.
Ты мужественно и доблественно тяготу дне понесл еси, о рабе благий и верный, и данный тебе талант умножил еси; сего ради со исповедники сопричтен еси и с преподобными отцы вшел еси в радость Господа твоего благаго: ныне ходатайствуй непрестанно о хвалящих тя.
Стих: Блажен муж, бояйся Господа, в заповедех Его восхощет зело.
Украси тя Бог, святе Евфимие, светом учения и сиянием Божественных дарований, и, исполнив душу твою премудрости, яко источник живый и кладязь неоскудеваемый, источал еси учения Божественная ко возращению стада Христова.
Слава Отцу и Сыну и Святому Духу.
Множество поющих наставника тя исповедует, богоносне, преподобне Евфимие, ибо Божественною оною благодатию исполняются, совершающе песнопения, яже собрал еси великим подвигом, и веселятся в память твою, подражателю древних отец: с ними моли Христа Бога помиловати души наша.
И ныне и присно и во веки веков. Аминь.
Неневестная Дево, Бога во чреве неизреченно заченшая, Мати Бога Вышняго, моление раб твоих приими, Всенепорочная, подающая всем очищение грехов; и наше моление приими и испроси нам велию милость.
Бисеры многоценныя из глубины неведения изъял еси и гласы ангелоподобными Церковь грузинскую паки украсил еси; Божественных песнопений изобразителю, святе исповедниче Евфимие, моли Христа Бога помиловати души наша. (Дважды)
«Богородице Дево…» — единожды.
«Бог Господь»
Бисеры многоценныя из глубины неведения изъял еси и гласы ангелоподобными Церковь грузинскую паки украсил еси; Божественных песнопений изобразителю, святе исповедниче Евфимие, моли Христа Бога помиловати души наша.
Слава… Тропарь (тот же). И ныне…
Еже от века утаенное и ангелом несведомое таинство, Богородице, тобою сущим на земли явися: Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
По 1-м стихословии седален, глас 1:
Житие благочестно на земли скончал еси, всеблаженне Евфимие исповедниче, и явился еси правило иноков и светлое светило Грузии: ныне возсияй в сердцах наших свет истинный и ходатайствуй о хвалящих тя. (Дважды)
Слава Отцу и Сыну и Святому Духу, и ныне и присно и во веки веков. Аминь.
Открывается таинство, от века сокровенное, Архангелу, да со трепетом возвестит Деве, он же благовествует Благословенней в женах; с нимже возопиим: радуйся, Благодатная, Господь с тобою.
— По 2-м стихословии седален. (Глас 4).
Хвалятся днесь от православных христолюбцев Божественныя добродетели твоя: чистота, кротость, и смирение и трудолюбие дивное; ныне и мы почитаем тя, святе, треблаженне отче Евфимие, и хвалим тя, мужественни быв подвигом твоим. (Дважды)
Слава Отцу и Сыну и Святому Духу, и ныне и присно и во веки веков. Аминь.
Всех Творца Бога и Создателя, Всенепорочная Святая, Духом Божественным зачала еси и нетленно родила еси; сего ради величаем тя и воспеваем, Дево, яко всех Царя палату и мира Помощницу.
По величании седален. Глас 8
Премудрость.
Во время оно злополучия, егда посылаше Господь стадом Своим славных мужей, и ты избран был еси, блаженне отче, на служение Богу и народу, и, Церковь обогатив сохранением древних оных песнопений, Божественною ревностию твоею и подвигом многим Святей Троице благоугоден явился еси. (Дважды)
Слава Отцу и Сыну и Святому Духу, и ныне и присно и во веки веков. Аминь.
Собезначальное Слово Отчее от тебе приемлет начало естества нашего, Богородице, и Безлетный входит во время, и Слово воплощается, Сын же Божий Сыном твоим нарицается. О непостижимаго сего таинства! Иисус Христос вчера и днесь, Той же и во веки.
От юности моея мнози борют мя нечистыя страсти; сего ради молю Тя: буди ми помощник и спаси мя, Блаже.
Ненавидящии Сиона, посрамитеся от Господа, и яко траву изсохшую поядет вас геенна.
Слава Отцу и Сыну и Святому Духу, и ныне и присно и во веки веков. Аминь.
Святым Духом всяка душа живится и чистотою возвышается, светлеется Троическим единосущием богоприлично и священнотайне.
Прокимен, глас 7
Честна пред Господем смерть преподобных Его.
Стих: Что воздам Господеви о всех, яже воздаде ми?
«Всякое дыхание…» Евангелие от Луки, глава 6, стих 17 (Во время оно ста Иисус…); конец — стих 23 (…мзда ваша многа на небесех…).
По 50-м псалме стихира.
Во всю землю изыде глас подвига твоего, богомудре отче, блаженне Евфимие, сего ради на небесех обрел еси мзду трудов твоих и сугубый венец приял еси от Бога: исповедника и преподобнаго; и ныне, дерзновение имея пред Ним, мира испроси душам нашим.
Ирмос: Мановением Твоим, Боже, естества текущая стеною воздвигл еси и посреде их провел еси люди израильтяны посуху, и пояху песнь победную.
Преподобне отче Евфимие, моли Бога о нас.
Прозяб от корене богослужителей, от юности был еси, яко древо насажденное при исходищих вод, и во время свое дал еси плод прекрасный и достойный небесных сокровищ.
Преподобне отче Евфимие, моли Бога о нас.
От юности был еси смирен и всячески удален от зла, и, возрастая, преподобне, бегал еси похотей юности и был еси уготован на служение Богу и возрождение народа нашего.
Преподобне отче Евфимие, моли Бога о нас.
Аще и чужд был еси славы человеческия, разумел еси волю Господню, и, научився всем церковным уставом и песнопением на языце грузинском, явился еси столп и утверждение Церкве нашея.
Слава Отцу и Сыну и Святому Духу.
Посла тя Бог светилом грузином, всеблаженне Евфимие, и исполни тя небесных дарований, да учении твоими и на нас излиется и всех направит к жизни истинней.
И ныне и присно и во веки веков. Аминь.
Разрешися клятва Евы, первыя матере, егда Неискусобрачная роди Превысшаго естеств; людие же вернии, якоже достойно есть, праведно славят ю.
Ирмос: Боже Спасе наш, всех Создателю, словом утвердивый небеса высокая со всею силою их, и Духом божественным утверди нас единством на камени веры.
Преподобне отче Евфимие, моли Бога о нас.
მოწოდებულ იყავ რაჲ მსახურებად ერისა შენისა, დაარსე სტამბაჲ, დიდებულო, და იწყე საღმრთისმსახუროთა წიგნთა თარგმანებაჲ და ბეჭდვაჲ ენასა ზედა ქარველთასა, დამცრობილ იყო რაჲ რუსთა მიერ ეკლესიასა შინა ჩუენსა.
Преподобне отче Евфимие, моли Бога о нас.
Паче солнца сияющу Господу в сердце твоем, преподобне, благодать, от Него данную, умножил еси премудростию, непрестанно трудяся о распространении Божественнаго Писания и учения отеческаго в народе твоем.
Преподобне отче Евфимие, моли Бога о нас.
Егда пострижен был еси в малую схиму, преподобне, нарекоша тебе имя Евфимия Афонскаго, емуже сочетался еси, новый сей подвижник, в утешение народу иверскому, и уподобился еси ему иноческим нестяжанием.
Слава Отцу и Сыну и Святому Духу.
Рукоположен быв во иеромонаха, проповедал еси всенепорочную веру православия, и, просвещая народ твой, во тьме неведения погруженный, преподобне, учил еси хранити заповеди Божия.
И ныне и присно и во веки веков. Аминь.
მჴსნელო ჩუენო იესუ, ვედრებითა მშობელისა შენისაჲთა მშჳდობაჲ სოფელსა მოჰმადლე, და ძლევაჲ ჯუარითა მოეც ერსა ჩუენსა ღმრთისმოყუარესა მტერთა ზედა ურწმუნოთა, და მორწმუნენი ღირს-მყვენ შენდობასა.
Видев тя диавол тепле вшедша в подвиг, многоразличныя напасти наведе на тя, да угасит теплоту твою, и попусти сие Бог, якоже на праведнаго Иова; ты же, уготовав себе к напастем, многажды взалкал еси и возжаждал еси; потрудился еси; поношение и укоризну понесл еси; заключен был еси; пред судилищем стал еси и биен был еси, и пред богоборцы дерзновенно исповедал еси Христа: Того моли ныне избавити от скорбей нас, богоблаженне Евфимие, иже совершаем память твою.
Ирмос: Не Ангел, но Сам Господь, от Девы воплотивыйся Бог, пришел еси к нам и всецело спасл еси нас, вопиющих: слава силе Твоей.
Преподобне отче Евфимие, моли Бога о нас.
Законностию и смирением уподобився древним отцем, мужеством ума и незлобием сердца вооружен, желал еси просвещения народа твоего и печатал еси книги церковныя.
Преподобне отче Евфимие, моли Бога о нас.
Во время владычества богоборцев мнози нуждею совлекахуся схимы иноческия, ты же, любя народ твой, научал еси всех брани на враги невидимыя и видимыя, да не приидет на них суд Божий.
Преподобне отче Евфимие, моли Бога о нас.
Повсядневно подвизался еси о возрождении грузинскаго пения и от тления и изглаждения хранил еси древния оныя собрания песнопений и преложил еси я на ноты, имже пением даже доныне славим Бога.
Слава Отцу и Сыну и Святому Духу.
Егда велию скорбь и тесноту наведоша на церкви и верныя оныя богоборцы, разжегся еси желанием небесным и, премудростию Божественною дивно исполнен, непрестанно подвизался еси жесточайшим оным подвигом.
И ныне и присно и во веки веков. Аминь.
Истинная Мати Божия, моли Сына твоего и Создателя, да наставит нас в тихое пристанище и избавит от потопления грехов наших.
Ирмос: Дух спасения, Господи, иже зачаша в сердцах первии пророцы и родиша на земли, возвести нам пришествие Твое на землю в живот верных, и ныне просвещеннии песньми величаем Тя.
Преподобне отче Евфимие, моли Бога о нас.
Во время мучительства безбожных, егда затвориша обитель Гелатскую и повелеша настоятелю отити, умыслил еси сохранити рукописания песнопений от богоборцев и многия собрания скрыл еси от очес их.
Преподобне отче Евфимие, моли Бога о нас.
Служащим им твари паче Творца, Иже есть благословен во веки, возревновал еси, мужественне Евфимие, любовию Христовою и древних оных песнопений собрания из Кутаиси во Мцхету на возе отвез еси.
Преподобне отче Евфимие, моли Бога о нас.
Гражданин небеснаго Иерусалима, вселился еси в новом Иерусалиме, царствующем граде Мцхете, близ Маквлоани, идеже от Иерусалима прииде Нина, раба Христова, и, молящися, обрати грузины Крестом животворящим.
Слава Отцу и Сыну и Святому Духу.
Быв молитвенник о иверех и о благом преуспеянии их, определен был еси в великий оный храм Светицховели и дивно сохраненная рукописания паки скрыл еси на месте невидимом.
И ныне и присно и во веки веков. Аминь.
Небо и земля просветишася тобою, Неневестная Мати Иисусова, ибо возсияла еси нам Свет неугасимый, Бога всех, Иже во тьме заключенныя избави и Небеснаго Царствия жители яви нас.
Ирмос: Погружен волнами искушений мира сего, с корабля греховнаго впад и зверю душегубному вержен, вопию Ти: якоже Иону избавил еси от тления и смерти, тако избави и мене, Христе.
Преподобне отче Евфимие, моли Бога о нас.
Быв пастырь добрый, Богородице велий молитвенник о стаде твоем и зело любяй жребий Ея, Иверию, Божественным промыслом паки изыскивал еси древнейшая оная собрания и невмами писанная песнопения преложил еси на ноты.
Преподобне отче Евфимие, моли Бога о нас.
Непоколебимо стоя во исповедании правом, игуменом определен был еси в Зедазени, и, тамо принес сокровище, от Бога тебе вверенное, — грузинская рукописная песнопения, — в железных ковчегах сокрыл еси е под землею.
Преподобне отче Евфимие, моли Бога о нас.
Паче солнца сияющу Господу в сердце твоем, подвиже Он тайныя верныя творити благое, и ходатайством их сокровище оное, тобою в земли сокровенное, изъяша и положиша в музее; ныне же хранится в хранилище рукописаний и веселит многия верныя, паче же поющих в Церкви.
Слава Отцу и Сыну и Святому Духу.
Безмерная милость, и превысшая сладость, и смирение быша тебе наставницы на пути истиннем, и благодать, от Бога тебе данную, умножил еси премудростию: ныне совершающим память твою испроси оставление согрешений, яко предстоя Богу.
И ныне и присно и во веки веков. Аминь.
Прообрази таинство твое, Дево, первее кивот закона, вместилище божественных писаний, и стамна златая, жилище манны, и жезл.
Радуется Церковь, небесем подражающая, и пением богоукрашенным память твою славит; иже со ангелы поеши Царю, отче святый Евфимие, не престай моля о всех нас.
Мужественно восприим щит веры, преподобне отче Евфимие, вооружен был еси постом, молитвою и иными многими подвиги, и, проповедуя Евангелие посреде безбожных, многия напасти претерпел еси и венец исповедничества приял еси от Бога: ныне испроси нам от Него оставление грехов и беззаконий наших, да сподобимся славы Его.
Ирмос: Отроцы в Вавилоне в пещи росою свыше орошени, к Богу вопияху и глаголаху: благословен еси, Господи отец наших, Боже, во веки.
Преподобне отче Евфимие, моли Бога о нас.
ჟამსა მას შინა ყოვლისავე საქმისა ქართულისა დევნულებათასა, გამოსჩნდი ნუგეშად ერისა შენისა, და არცაღა დასცხრებოდი დაცვისათჳს ენისა ჩუენისა და აღორძინებისათჳს ქართულისა გალობისა. აწ გვიოხე წინაშე ღმრთისა, დანერგოს ჩუენ შორის შიში და მოძაგებაჲ ცოდვისაჲ და სიყუარული ღმრთისა და მოყუასისაჲ.
Преподобне отче Евфимие, моли Бога о нас.
Велий подвиг и труд на ся взял еси о умножении собраний песнопений и землю твою исполнил еси святыми книгами, имиже украсил еси Церковь грузинскую, богомудре отче, и верныя люди светло украсил еси учением Божественным.
Преподобне отче Евфимие, моли Бога о нас.
Светлость лица твоего и истощание тела свидетельствоваху о духовных мужественных трудах твоих, смиренное же житие твое — о чистоте внутренняго ума; и, подобно Христу, учил еси всех раздаяти богатство нищим и помогати скудным.
Слава Отцу и Сыну и Святому Духу.
Древния оныя собрания песнопений нарицая вечным сокровищем, паче злата и сребра и камения и бисера драгаго, себе златокузнецем вменял еси и вопиял еси: како прииде ко мне богатство сие, в немже аз, недостойный, руку мою влагаю?!
И ныне и присно и во веки веков. Аминь.
Радуйся, дщи Адамова; радуйся, Невесто Божия; радуйся, Мати Спасова, вместившая Творца твоего; заступи нас присно.
Ирмос: Купина в Синаи несгораемая Бога яви гугнивому и косноязычному Моисею, и ревность божественная отроки от пещи избави, и в песни вопияху: вся дела, благословите днесь Бога и Господа, пойте и превозносите Его во веки.
Преподобне отче Евфимие, моли Бога о нас.
Дивный подвиг твой высоко вменяя Каллистрат, Католикос-Патриарх Грузии, с честию призва тя и зело благодаряше за труд и подвиг твой; и прошением его преложил еси на ноты возгласы, глаголемыя во время Божественныя службы.
Преподобне отче Евфимие, моли Бога о нас.
В уединении препровождая дни твоя в Зедазени, изнемогл еси, благодатию обоженный, и, терпящу тебе горькия болезни, посетиша тя сестры обители Самтаврской и зело опечалишася о немощи твоей и моляху Бога о облегчении твоем.
Преподобне отче Евфимие, моли Бога о нас.
Моля Бога о народе твоем и отечестве, предал еси душу твою в руце Его и сочетался еси множеству святых; и, егда погребоша тя во дворе Зедазенском, близ алтаря, ниже смертию отступи от тебе, преподобне, честь святыни.
Слава Отцу и Сыну и Святому Духу.
Быв учитель духовный и наставник грузин, подвизался еси, да возрастут в духовных и телесных благах, и, печатая безчисленныя книги и песнопения, многих научал еси и подвизал еси пети Богу: Того моли ныне даровати нам покаяние и оставление грехов.
И ныне и присно и во веки веков. Аминь.
Трие отроцы в Вавилоне в пещи Троице поклонишася и образ златый презреша, и, росою окропляеми, песнию вопияху: вся дела, благословите днесь Бога и Господа, пойте и превозносите Его во веки.
Хвалим, благословим, покланяемся Господеви, поюще и превозносяще Его во вся веки.
Ирмос: Неискусобрачная, нетления хранительница, Слово Творца в естество облекла еси. Прииди, Пречистая Дево Богородице, с рожденным от тебе научи верныя, да сподобимся славити тя.
Преподобне отче Евфимие, моли Бога о нас.
Не токмо поющии, но и вси вернии спешаху притещи ко гробу твоему, ибо бысть немощным, яко сокровище благодати и источник исцелений; и, молящим тя о милости, присно услышал еси моление их и всем подавал еси утешение.
Преподобне отче Евфимие, моли Бога о нас.
Видяще святители гроб твой дивный, источающий исцеления, благодатию твоею бываемыя, велегласно возвеличиша тя, яко славнаго подвижника и отца исповедника, и в память и во веки ублажение и хвалу тебе уставиша грузином.
Преподобне отче Евфимие, моли Бога о нас.
Егда причтоша тя ко святым, отче исповедниче, подвижника и молитвенника, славу и образ святыни стяжаша тя народ и Церковь наша; и ныне, имея благодать помощи, возстави нас подражати добродетелем твоим, да бегаем злых обычаев и страстей.
Слава Отцу и Сыну и Святому Духу.
Талант, вверенный тебе, богоносне, не скрыл еси в земли, но умножил еси, яко раб верный, и многосугубо принесл еси Богу: Того моли ныне, да отженет напасти и бесовская нападения от уповающих на тя и поющих тя.
И ныне и присно и во веки веков. Аминь.
Ветхий закон прообразует тя, Дево Святая, и новый исповедует тя Богородицу, Неневестная, и мы, вернии, с верою глаголем: Родительнице Слова, не престай молитися Богу о уповающих на тя.
Ревность имея о правой вере и о распространении Божественнаго ведения, стаду твоему умножал еси святое Писание и учения отеческая к просвещению душ; и, Церковь украшая Божественными песнопениями, верная чада ея подвизал еси хвалити и пети Бога. (Дважды)
Ублажаем тя, исповедниче отче Евфимие, и почитаем святую память твою, ибо, мужественно подвизаяся о народе грузинском, переводом Божественных книг и умножением трудов твоих восполнил еси скудость богослужения и сохранил еси Церкви собрания песнопений, созданных славными оными предками нашими.
Христос даде тебе благодать подвига и тако почте тя в веце сем, по смерти же твоей паче прославился еси пред Ним, почитаемый с преподобными и исповедники во веки.
Смирение жития и твердость веры показал еси, о отче наш Евфимие, и, во святыни служа Богу, яко злато, очищен был еси в горнилех напастей; сего ради с любовию лобызаем святыя иконы твоя и молим тя, яко любящаго отца христолюбивых людей, да исцелиши нас от недугов телесных и от грехов душевных и покрыеши нас от обстоящих лютых скорбей и прелестей.
Во Христовых заповедех поучаяся присно, день и нощь, умом чистым, любовию пасл еси стадо Его и учил еси всех, да уклонятся от зла и пекутся о душе своей милостынею, постом и молитвою: и о нас ныне моли человеколюбиваго Бога, да вооружит нас силою Своею непобедимою и сохранит нас от напастей невидимых и видимых врагов.
Радуется ныне Церковь грузинская памяти твоей и повелевает всем верным ублажати тя, яко ревнителя теплаго и песнопений наших хранителя, и хвалити Бога, прославившаго тя.
Приидите, о людие грузинстии, и похвалами духовными воспоим преподобнаго Евфимия Исповедника, игумена Зедазенскаго, яко обогатившаго Церковь нашу песнопениями, и всех верных помощника, и поющих непостыднаго предстателя.
აწ ვიქადით შენთჳს, ღირსო მამაო ექვთიმე, აღმსარებელო მამაო, და ურვათა შინა მყოფნი ვითხოვთ შენ მიერ შეწევნასა, რაჲთა ჩვეულებისაებრ წინაპართა ჩუენთასა ვმსახურებდეთ ერსა, და მარადის ვადიდებდეთ ღმერთსა.
Ныне веселися, обителе Зедазенская, и празднуй, земле картлосиан, ибо милостию посети нас Христос Бог и дарова нам отца исповедника и старца подвижника, помощника в скорбех, утешение в печалех, врача недугов и избавителя от страстей.
Ныне дивимся исповедничеству твоему и любви к Богу и ближнему, просветившеся подвигом твоим, и молим тя о ходатайстве за ны пред Богом, во избавление земли сея нашея и народа от сетей сатанинских и от мучительства и прелести злаго антихриста.
«Слава Отцу и Сыну и Святому Духу». Глас 5
Вострубим трубою песней, и возыграем, и возвеселимся, радующеся во всесвятый праздник всехвальнаго отца нашего, яко реки учения нам источившаго, и воспоим: немощнии — недугов врачу, скорбящии — избавителю, согрешившии — теплому ходатаю, печальнии — утешителю, путешествующии — спутнику, плавающии — кормчему, и глаголем: ныне совершающим память твою испроси оставление согрешений, яко предстоя Богу.
И ныне и присно и во веки веков. Аминь.
Богородичен Димитрия, царя грузинскаго, Багратиона.
Богородица и всечестная, Мати Дева, лилия прекрасная, ей благовествова ангел крылатый; тобою веселится Царь венценосный, и Тому служат царие многоподданнии.
Славословие великое и отпуст.
На литургии: на блаженных от канона преподобнаго песнь 3-я и 6-я.
Прокимен, глас 7: Честна пред Господем смерть преподобных Его.
Стих: Что воздам Господеви о всех, яже воздаде ми?
Апостол: 1 Коринфяном, глава 12, стих 7 (Братие, коемуждо же нас…); конец — стих 12 (…разделяя властию коемуждо, якоже хощет…).
Аллилуиа, глас 6: Блажен муж, бояйся Господа.
Стих: Сильно на земли будет семя его.
Евангелие от Матфея, глава 11, стих 27 (Рече Господь Своим учеником…); конец — глава 12, стих 1 (…бремя Мое легко есть…).
Причастен: В память вечную…
Составила Тинатин Мчедлишвили
