Песнопения иконе Анчисхати
Премудросте Отча, Начало и Вино благаго, Боже, Божие Слово, Христе, даруй ми слово, славящему образ вочеловечения Твоего!
Подвизаются языки, издревле возвещенные, племен Адамовых, народов и наречий, восхвалити, воспети и прославити хвальный и славный, страшный образ Спасов!
Помилуй, Милостиве, создания и прославленныя Твоя, на нихже наречеся имя Твое святое и страшное, ихже ради вочеловечися Слово Отца безначальнаго!
Услыши моление наше и припадание и скоро избави от всех бед уповающих на тя, требующих и чающих милости, образе страшный!
Блажен народ, иже весть пение, и славу, и хваление твое, образе вочеловечшагося ради спасения сущих Сына Божия, Предстателю присный уповающих на тя!
Исаия прежде проповеда нам вочеловечение и страдание за страждущих, и избавление Тобою, Свете и от Света Божия, Слове Бога Отца, Иисусе Христе!
Молитву нашу услыши, и призри на моление и воздыхание наше, и не отврати лица Твоего от нас, но милостиво призри на ны молитвами Родительницы Твоея!
Чудеса Твоя кто исповесть, Господи, или кто слышаны сотворит хвалы Твоя? Ибо милуеши милосердием согрешающих и исцеляеши милостию отчаянных!
Се, прибегаем к Тебе, Милостивому, Спасу и Врачу, и, требующе, припадаем и просим: милостию помилуй нас, Анчисхате страшный!
Сего ради людие твои, скорбящии, припадают с пением, воздыханием и плачем, ибо вемы милосердие твое; и ныне преклонися на милость и спаси, Спасе, рабы Твоя!
Не прогневайся на ны, Избавителю, не яростию Твоею обличи нас, ниже гневом Твоим накажи нас, но во гневе древния милости Твоя помяни, Спасов образе страшный!
По обычаю подвизаем, Христе, Слове Божий, на ходатайство пречистую Матерь Твою: избави молитвами Ея от бед и напастей недостойныя сия рабы Твоя!
Восхотев обращения нас, неверных, в веру, Христе Боже Благий, образ вочеловечения Твоего апостолом Андреем возсиял еси нам!
Слух услыша Аввакум о первом пришествии Твоем, Боже, Слове Божий Христе, и ужасся возопи; с нимже и мы зовем: слава силе Твоей, Господи!
Несть от нас, верных человеков, образе страшный, иже призва имя твое и не абие сподобися от тебе великия милости: слава тебе!
Видимаго Бога Слова, вочеловечшагося ради спасения сущих, образе страшный, благий и милостивый, милостиво призри на ны и сохрани уповающия на тя!
Подвизаются вси народи, небесныя и земныя, славити и воспевати тя, Мати Божия: моли о уповающих на тя и на Сына твоего!
Сладкое, благое и милостивое лице твое ко мне преклони, образе страшный, ибо ты еси отрада и радость, и утешение, и заступление!
Слове Божий, пребуди с нами, и присно, день и нощь, храни нас и покрывай на всяк час; буди нам Помощник и избави нас от видимых и невидимых врагов!
Племен Адамовых слава, и похвала, и украшение ты еси, Мати Слова Божия: умилостиви о нас Сына твоего, Господа и Создателя всех!
Возвещенный прежде пророк духом виде вочеловечение Бога нашего и тако возопи: се, Дева во чреве приимет и родит Сына; услышите, языцы, и покоряйтеся!
Ипостасьми Трое, естеством Едино, Едине, Простый, Непреложный, Отче, и Сыне, и Душе Святый, сохрани нас, недостойных рабов Твоих, и избави от всех напастей!
И ныне припадаю и присно молю тя, грешный и недостойный раб твой, окаянный, и милосердно избави от всех бед уповающаго на тя, образе страшный!
Яко львы, хвалятся на ны врази наши и смеются нам; но ты, образе страшный, мышцею твоею сокруши их, да познают вси, яко ты еси сила наша и крепость наша!
Егда сотвориши суд наш со страхом, Иисусе, Слове Божий благости, в той час помози ми и умилосердися, Многомилостиве, и не помяни грехов и прегрешений моих!
Устнами недостойными дерзаем к Тебе мы, смиренные и безпомощные рабы Твои, и славим и покланяемся милостем Твоим: простри нам руку, образе страшный!
Без семене Родшия и Девою пребывшия от племен Адамовых несть, разве тебе, о нас, грешных, скорая Предстательнице, Мати, Сына Божия Родшая!
Не забуди уповающаго на Тя и славящаго Тя, Слове Божий, да хвалю Тя: благословен еси, Господи, от века и до века!
День и нощь людей, поющих и славящих тя, избави, да с благодарением глаголем, образе страшный: слава милостем твоим!
Господи Боже, избави от бед уповающих на Тя, и поющих, и покланяющихся подобию святыя иконы Твоея, нас ради вочеловечшагося!
Услыши нас, грешных и недостойных рабов твоих, и преклонися на милость и милосердие, образе страшный, да благословим тя во веки!
Да будет милость на покланяющихся и славящих тя, иже исповедуют тя Матерь Бога нашего, Предстательнице присная уповающих на тя!
Егда помяну чудеса твоя, безчисленная и страшная, Анчисхате страшный, ужасаемся умом и, удивляющеся, вопием: вся дела, благословите днесь Бога и Господа, пойте и превозносите Его во веки!
Якоже древле ниневитяне, и мы припадаем и молим Тя, Многомилостиве и Благий: милостию помилуй нас и не отвержи недостойных сих рабов Твоих, покланяющихся образу вочеловечения Твоего!
Андрей, глава апостолов, первозванный ученик великаго Царя, — да прославится от всех долин и ущелий Кларджети! — из Иераполя прииде и образ сей страшный нам, уповающим на него, дарова!
Блажени уповающии на тя, и славящии, и покланяющиися образу Спасову, образе страшный, ибо славящих и покланяющихся прославляеши, и молящимся подаеши прошения и исполняеши, и упования их не посрамляеши отнюдь!
О Сыне безначальный и безконечный, безначальному Отцу и Духу равный, Иже прежде век Един от Единаго Отца родился еси, ныне же нас ради от Девы вочеловечился еси неизреченно: слава милостем Твоим!
Исполнишася ныне притчи и образы, пророки возвещенныя: Дева роди Христа без семене, о Немже вернии тако вопием и глаголем: вся дела, благословите!
Волею своею согрешихом Тебе и прогневахом Тя, и забыхом милости Твоя; ныне же к Тебе обратившихся призри, спаси, помилуй и избави от зол, Спасов образе страшный!
Нас ради вочеловечивыйся, Боже, Слове Отчий, Христе, избави от всех бед и напастей уповающих на Тя и покланяющихся образу Твоему; Милостиве, помилуй нас и милости Твоя даруй нам!
Да слышат неверные, иже не покланяются образу Христа Бога и всех святых Его, егда глаголет Василий, яко честь образа на первообразное восходит, емуже мы, вернии, покланяемся!
Литийствуйте, пойте и славите, всяко дыхание и всяка тварь, всякия верныя души Предстателя, стену и Покровителя, Хранителя и Спаса — Анчисхати страшный!
Слыши, небо, и внуши, земле: яко Дева, дщи Адамова, роди нам, человеком, Иисуса Спаса и ходатайствует о нас пред Ним и просит нам милости ныне, и присно, и во веки веков!
