Песнопения Вардзийской Богородице
Начальные буквы глаголют: «Превыше славы превознесенная, ангелов и человеков ко славе твоей, якоже рождество и девство, Сочетавшая, Пресвятая Богородице, поющаго тебе во храме твоем, нарицаемем Вардзийским, спаси и избави мя от духовнаго пленения».
С небесе даруй косноязычному языку слово премудрости, Царице, ибо долг сей благодарения за славы твоя, подобно ликам Израиля, море прошедшаго, воспеваем тебе!
Египет плоти, темный порабощением тесноты, иная пещь, делом опаляющая ко злу скверными движеньми, — о место Бога Царя! — да будет ми ныне тобою местом святыни!
Жезл Ааронов, стамна и светильник, купно трапеза, ковчег, манна, скиния свидения Веселиилова беглаго народа, с сугубым избавлением, тебе, Матерь Божию, предзнаменоваху!
Новый путь сквозь стены водныя, образом Богоданнаго плавания, показа нам, изгнанным, странное путешествие во Едем сладостный тобою, Дево, превыше благословенная!
Сам Бог, судом правды концы мира сего управляющий, вселився в тя, даде силу исповедником Своим дерзновенно тысящи хулителей отразити!
Из твердыни твердынь и от уз железных, купно с гноищ нищих пленников, возносит и возставляет от земли забвения Избавитель, сокрушающий силу измаильтян, Дево Пречистая!
Се, лук сильных изнеможе полка оного персидскаго и мидийскаго, аравлян оскуде сила оружия, и немощнии препоясашася тобою силою!
Глаголет воинство с благодарением Пречистей: да не хвалится никтоже премудростию, ниже всякою силою и богатством, но о сем да хвалится, яко Бог совершенный родися, Дево, в естестве нашем от чрева твоего!
Дивное и мгновенное Аввакумово восхищение чрез дальния пределы образом бысть избавления пленных от скверных пленителей, Невесто Божия, помощию твоею!
Ныне упокоюся вместо дне оного скорби, восходя от полчищ оных халдейских, персидских и армянских; легион же племен Агариных потопляется водою ходатайств твоих, Преславная!
Немилостивы бяху камения претории, солга дело милости порождениям бугдузиан, татей и иноплеменников. Стрелы светлы, оружие блистающее — во обличение Корана Крест и апостоли!
Нападе трепет на народ разсвирепевший, оскудеша овцы их от стада, ибо не позна вол гласа, ни осел яслей. Рог церковный вознесеся, и распространися в Тмогви храм Царицы!
Исаия, егоже устен углем коснуся серафим, егда рече: се, Дева во чреве приимет, — яко светильник, светящий в нощи, Нетленная, возгласи во уши верных!
Оригеново лукавство обличися, болезнь недужных постиже Ария, прильпе язык Несторий к гортани его, умолче безбожный и потребися от человек с клятвою: научитеся, живущии во вселенней!
Корень Иессеов воистину процвете, клятва Давидова прият исполнение, обетование отцев вси познаша Сыном его, вопиюще: «Осанна Сыну Давидову!» — да будет скоро нощи тьме просветитель!
«Иже не позна правды, — рече велегласный, — не может творити истины»; тии убо рождество Девы вымыслом суетно мнеша, заблуждше, врази Рожденнаго и Родившия!
Силою ходатайств твоих избавихся от темницы оныя ровныя, якоже древле Илиею от смерти; молитвами избавися Иона, Пречистая, егда опустеша крепости уз!
Яко от чрева адова, или яко от кита, услышала еси моление мое, егоже вереи — вечные затворы; от тяжести окаянства избавила еси живот мой, Мати Божия!
Иона бысть знамение ниневитяном, во образ тридневнаго воскресения Избавителя; зде же бысть мне знамение боголепно славное, многолетния узы расторгшему, — бегство от четырех стен и стражей!
Благодарения приносят тебе, купно людие безчисленнии литийствуют тебе; аз же гласом хвалы пожру тебе, Евина греха Разрешительнице, елика умиленно обещах устнама моима!
Отроцы оны, от дому Езекиина, егда первее в пленении оном посрамиша безбожнаго мучителя, бога воздвигшаго, Сына твоего явно научиша, яко Той есть Бог, в познание явное!
Разжженный седмерицею пламень яростию разжизашеся от родов томительных мучений; на мене одождила еси помощь твою: буди нам Спасительница, свете и покрове мой!
Не бяше тамо ни жертвы, ни места, но воздыхание со слезами, воздеяние рук связанных с литиею; отнюдуже, яко златый истукан, пещию молний твоих зверей тростных посрамила еси!
Притчами обретохом истину: бяше некогда пещь блаженства достойных юношей; тогда не попаляше их, яко купину горящую, егда плоть опаляшеся, даром от тебе Воплотившагося!
Иаков лествицею тя виде, Моисей же купиною, Даниил горою, Гедеон руном; отроцы, пришествием Ангела оросившиися, в огни тя проповедаша, егда златый истукан поругаше посрамиша!
Поле Деирское и пещь халдейская быша ми удолием, надежды исполненным, егда хлад тихий храняше мя, и помощь с пламенем семо и овамо сечашеся, во сокрушение гордыни рабских служителей!
Благословит от тебе Рожденнаго, Пречистая, Царя и Бога сущих тварь, глаголет всякий чин, яко гласом, хвалу Его и исповедует веков Творца Богочеловеком!
Енох упова, и пренесе его Бог; Ное спасе род животных; рукою Моисеовою избавишася израильтяне; — и лютый труд рудников и огнь глубин быша мне паки тобою в сладость!
Олимпийская победа дарова нам ся: копие нападающих и щиты сокрушишася, яко еленя течением утвердишася ноги пленных, пламень, яко етнейский, возгореся на непокоривыя, гневом низложишася с престолов неверныя!
Побеждается витийство мудрых, и, якоже рекла еси, Богородице, с чинми небесными се, ублажают тя вси роди и племена человеческая; сего ради вопиют ти: положи мышцы моя присно луком медяным!
Из невидимых рвов мира изгнание мое изведи, яко орля обнови юность души, от прегрешений избави мя, Сильная, Преславная, благоволи вселитися во мне, Пречистая!
Сими песненными хвалами величает душа моя от тебе Рожденнаго, поет храм твой, Всенетленная, Адамово избавление и Евино возстание: даром даруй прощение глаголющему!
